قەیس وەیس:

هەر ژ دەستپێكا ڤەكرنا دەرگەهێ‌ ڤەگۆهاستنا یاریزان و ڕاهێنەرا بۆ وەرزێ‌ نوو یێ‌ خولا ستێرێن ئیراقێ‌، پرۆسێسا ئیمزاكرن گرێبەستان دناڤ هەر 20 یانەیێن پشكدار بەردەوامە، ژبلی گرێبەستێن فەرمی لێ‌ ب هوژداری و بێ‌ دەنگی دانۆستاندن دهێنە كرن و هەڤپەست دهێنە نوكرن، بۆ زانین دگەل نڤێسیا بابەتێ‌ مە هەر نوویاتیەك هاتییە نێڤێسین لێ‌ ژبەركو پرۆسێسە یا بەردەوامە دبیت گوهۆڕین و كێم و زێدەیی هەبن.
دهۆك بەردەوامە
كارگێرییا یانەیا دهۆك ب شێوەیەكێ‌ هوشداری سەرەدەریێ‌ دگەل دانۆستاندنێن خوە بەرانبەر یاریزانان دكەت، هەرچەندە هێشتا چو نە هاتییە ڕاگەهاندن لێ‌ هەتا نوكە هیچ ڕاهێنەرەك نە بوویە فەرمی، پێشتر دەنگۆ هەبوو كو گرێبەست بۆ یێ‌ مسری حوسام ئەلبەدری ڕاهێنەرێ‌ ئەهلی تەرابلس پێشكێش كربوو، لێ‌ ئەوی لێبۆرین خواست، چەند ڕاهێنەرەك ل سەر مێزا یانەیێ‌ نە و دبیت رۆژێن بهێت دا ئێك بهێتە ئێكلاكرن، ژبیر نەكەین هێشتا چوونا ڕاهێنەرێ‌ پارێزگەهێ‌ سلێمان رەمەزا هەلگرێ‌ كۆپا ئیراقێ‌ ئێكلا نەبوویە و دوور نینە ڤەگەڕیت، ژلایەكێ‌ دووڤە یانەیا دهۆكێ‌ نووكرنا گرێبەستێ‌ دگەل یاریزانێ‌ خوە یێ‌ گەنج حەسەن عیماد- عسكولە- ڕاگەهاند، ل دووڤ ژێدەرێن رۆژنامەڤانی د رۆژێن بهێت دا دێ‌ گرێبەستێن نوو هەبن.
زاخۆ یا خوە بهێز دئێخیت
ژلایێ‌ خوەڤە یانەیا زاخۆ شاندەكێ‌ خوە هنارتییە بەغدا ژبۆ ئیمزاكرنا چەند گرێبەستان دگەل ڕاهێنەرەكی و كۆمەكا یاریزانان، نووترین گرێبەستێن وان هاتینە ڕاگەهاند دگەل یاریزانێ‌ پێشتر یێ‌ هێلا بەرەڤانییا یانەیا نەورۆز عەباس یاسینی هاتیە ئیمزاكرن، دیسان گرێبەست دگەل یێ‌ غانی و پێشتر یانەیا لیۆن یا فرەنسی و ئەلزەفرە یا ئیماراتی محەمەد واتارا ئیمزاكرییە، ژلایی ل دووڤ ژێدەرێن نێزیك هەكە گرێبەست دگەل ئەیۆب ئۆدیشۆ نە هاتە ئیمزاكرن ئەوان ڕاهێنەرەكێ‌ دەرڤەیی ئیراقێ‌ دەستنیشانكرییە.
عەلی كازم فێل ل دهۆكێ‌ یان زاخۆ كرییە؟
لژنەیا دێسپلینێ‌ ل فدراسیۆنا فوتبۆلا ئیراقێ‌ داخوازنامەیا حازربوونێ‌ ل فدراسیۆنێ‌ بۆ گۆلپارێزێ‌ یانەیا زاخۆ عەلی كازم هنارتییە ل سەر سكالایا یانەیا دهۆكێ‌، ل دووڤ ژێدەرێن تایبەت كو عەلی كازمی ل 15ێ‌ خزیرانا بۆری گرێبەست دگەل یانەیا دهۆكێ‌ ئیمزاكرییە و گەهشتینە ڕێكەڤتنێ‌، لێ‌ ل حەفتییا بۆری هاتە ڕاگەهاند ئەوی گرێبەستا خوە دگەل یانەیا زاخۆ نووكرەڤە، ئەڤ پێشهاتە بوو ئەگەر ناكۆكییەكا دی دناڤبەرا هەردو یانەیان دا پەیدابیت.
ل دووڤ بەندێ‌ 18ێ‌ یاسایا فوتبۆلا جیهانێ‌ فیفا ناچێبیت یاریزان د ئێك دەمدا گرێبەستا دو یانەیان ئیمزابكەت، گرێبەستا ئێكێ‌ دێ‌ هێتە هژمارتن فەرمی و یا دویێ‌ دهێتە هەلوەشاندن، لێ‌ هەكە سكالا ژلایێ‌ یانەیا ئێكێ‌ هاتە تۆماركرن پشتی دووڤچوونێ‌ سزایێن چاڤەڕێ‌ كر بڤی شێوەینە، دبیت یاریزان دناڤبەرا چار بۆ شەش مەهان بهێتە دووكرن ژ یاریگەهاتن، دانا كۆژەیەكێ‌ پارەیی بۆ یانەیا ئێكێ‌ پشتی دهێتە دەستنیشانكرن، گرێبەستا دویێ‌ دێ‌ هێتە هەلوەشاندن.
مێركاتۆیا یانەیان بەردەوامە
ژلایێ‌ خوەڤە یانەیێن پشكدار د خولێ‌ دا بەردەوامن ل سەر دانۆستاندنان دگەل یاریزان و ڕاهێنەران، یانەیا هەولێر هێشتا نە گەهشتییە چو ڕێكەڤتنان دگەل هیچ ڕاهێنەرەكی، هەرچەندە دەنگۆیێ‌ نە گەهشتنا ڕێكەڤتنێ‌ دناڤبەر ڕاهێنەرێ‌ باژێرێ‌ هەولێرێ‌ سەمیر بابویی بەلاڤبوویە و هەبوونا دانۆستاندنێ‌ دگەل باسم قاسم دهێتە كرن، دیسان نووكرنا گرێبەستا یاریزانێ‌ تیمێ‌ خالد كردەغلی هاتیە ئێكلاكرن، ژلایەكێ‌ دووڤە د گرێبەستەكا كێم وێنەدا، یانەیا ئەمانەت بەغدا گرێبەت دگەل ستێرێ‌ پێشتر یێ‌ هەلبژارتیێ‌ جەزائیری سۆفیان ڤیگۆلی ئیمزاكر، یێ‌ 35 سالی یاری بۆ یانەیێن فالێنسیا یا ئسپانی، وێستهام یا ئنگلتەرایێ‌ و گالاتا سەراریی یا توركی كرییە، هەر دچارچووڤەیێ‌ مێركاتۆیێ‌، یانەیا جەوییە گرێبەست دكەل حارس ئەلحاتم گۆلكەرێ‌ یانەیا ئەلقاسم و گۆلپارێز زەین ئەلعادبدین ئیمزاكرن.

شاهۆ فەرید:

د داخویانیەكێ‌ دا عەلێ وەحید كوڕێ باژێرێ دهۆكێ بۆ رۆژنامەیا ئەڤرۆ دیار كر ئەوی بفەرمی و بۆ سالا سێیێ لدووڤ ئێك وەكو رێڤەبەرێ فوتبۆلا یانەیا ئەلگەرمە یا باژێرێ‌ رۆمادی نووكر و ئەڤچەندە ژی ژبەر هەبوونا هزر و پلانێن وی دگەل یانەیێ‌ د گۆنجن.
زێدەتر ناڤهاتی گۆت: هەرچەندە باژێرێ‌ رۆمادی ژ پارێزگەها دهۆكێ‌ دوورە لێ‌ ژبەركو یانەیا ئەلگەرمە خواست بۆ سالا سێیێ‌ دگەل وان بەردەوامبم وەكو ڕێڤەبەرێ‌ تیما فوتبۆلا یانەیێ‌ ئەڤچەندە ژی هات پشتی ئەوێ‌ سەربۆرا دو سالێن بۆری كو كارگێرییا یانەیێ‌ ژ گەهشتینە وێ‌ قەناعەتێ‌ و پلان و هزرێن من و یانەیێ‌ دگۆنجن لەوما دەست بەرداری من نەبووینە، هەرچەندە د ژییەكێ‌ مەزن دا نینم لێ‌ وەرگرتنا سەربۆر و شارەزاهیێ‌ ئێك ژ خالێن گرنگە، بۆ وەرزێ‌ ئەڤ سالە پلانێن مە ئارمانجێن مەزن هەنە.
ژلایەكێ‌ دووڤە ناڤهاتی ئەوچەندە ژی گۆت: ژبەركو یانەیا ئەلگەرمە دەست بەرداری من نەبوو چو یانەیێن كوردستانی ئۆفەرێن وەرگرتنا ئەركێ‌ ڕاهێنەراتییا تیما وان پێشكێشی من نەكرییە، ئەز ل یانەیا ئەلگەرمە یێ‌ ئارامم و هیچ كێشەیەك نینە، ئەو ڕژدن بەردەوامبم لەوما ژی دڤێت ئەز ژی ژلایێ‌ خوە یێ‌ وەفاداربم و زێدەتر خوەماندی بكەین بۆ سەركەڤتنا كاروانێ‌ تیمێ‌.

د داخویانیەكێ‌ دا مەحموود ئیبراهیم سەرۆكێ‌ فدراسیۆنا ئیراقێ‌ بۆ یارییا تیكۆنجتسۆ و ئالسكی دیاركر، ب فەرمی باژێرێ‌ دهۆكێ‌ دەستنیشانكرن بۆ قارەمانییا كۆپا ئیراقێ‌ ل سەر ئاستێ‌ یانەیان ئەوا بڕیارە هەڤڕكیێن وێ‌ ل ناڤەڕاستا ڤێ‌ مەهێ‌ بهێتە كرن.
زێدەترناڤهاتی گۆت: بڕیار هاتییە دان ل باژێرێ‌ دهۆكێ‌ قارەمانییا تیكۆنجتسۆ بۆ چار ژیێن جودا پێشكەڤتی، لاوان، تازەپێگەهشتی ل سەر ئاستێ‌ كوڕان و كچان، ئەوا بڕیارە هەڤڕكیێن وێ‌ ل 16ێ‌ هەتا 22ێ‌ ڤێ‌ مەهێ‌ بهێتە كرن، ژبۆ ژێگرتنا یاریزانان ڕێزێن ئێكێ‌ هەتا سێیێ‌ بۆ هەر كێشەكێ‌ و ئاستەكی بۆ پێكهاتیێ هەلبژارتیێ‌ ئیراقێ‌ خوە بەرهەڤكرن بۆ قارەمانییا عەرەبی ئەوا بڕیارە هەڤڕكیێن وێ‌ ل چرییا دویێ‌ یا بهێت ل ئێك ژ وەلاتێن مەغرب یان مسرێ‌ بهێتە كرن، هەروەسان دهەمان رۆژدا دێ‌ قارەمانییا ئالسكی ل سەر ئاستێ‌ پێشكەڤتی و لاوان یێن كوڕ و كچ هێتە كرن كو ئەڤ قارەمانییە خوە بەرهەڤكرنە بۆ كۆپا ئاسیا ئەوا بڕیارە هەڤڕكیێن وێ‌ ل چریا دویێ‌ یا بهێت پایتەختێ‌ ئیراقێ‌ بەغدا مێڤاندارییا وێ‌ بكەت.
ژلایەكێ‌ دووڤە مەحموود ئیبراهیم دیاركر پرۆسێسا هەلبژارتنێن تەمامكری بۆ مەكتەبا تەنفیزی پێخەمەت ژێگرتنا دو ئەندامان بۆ دەستەیا گشتی یا فدراسیۆنێ‌ و گۆت: ژێگرتنا پارێزگەها دهۆكێ‌ بۆ ڤێ‌ قارەمانیێ‌ ژبەر هەبوونا خالێن سەركەڤتنێ‌ و ژێرخانەیا وەرزشی، هەروەسان پشتەڤانی و هەڤكارییا فدراسیۆنا پارێزگەهێ‌ و لژنەیا ئۆلمپی یا دهۆكێ‌ و پارێزگارێ‌ دهۆكێ‌ و ڕێڤەبەرییا وەرزشی، پێشوەخت ئەم سۆپاسییا هەموویان دكەین و گەشبینن دێ‌ كاروانێ‌ قارەمانیێ‌ یێ‌ سەركەڤتی بیت.

عەلی حاجی :
د داخویانیەکێ دا سکرتێرێ یانەیا زاخۆ یا وەرزشی بۆ رۆژنامەیا ئەڤرۆ دیار کر د پلانا ئێکێ دا وان هەڤبەستا هندەک ژ یاریزانێن خوە یێن وەرزێ بوری نوو کر و کار بۆ ئینانا یاریزانێن نوو دکەت.
زێدەتر هشیار شەهباز گۆت: پشتی ب دووماهی هاتنا وەرزێ ئەڤ سالە هەر ئێکسەر مە دەست ب ئامادەکاریان کر بۆ وەرزێ نوو یێ خولا ستێرێن ئیراقێ و کوپا کەنداڤی و کوپا ئیراقێ، ژبەر کێمیا دەمی مە لژنەیا ئینان و نووکرنا گرێبەستا ئینانا یاریزانان دروستکر، کارێ ئێکێ یێ ڤێ لژنەیێ نووکرنا گرێبەستا هندەک ژ یاریزانێن مە یێن وەرزێ بوری بوو،هەتا نوکە ب شێوەیەکێ باش ئەو کارە یێ هاتیە ئەنجامدان و دەمەک نێزیک دا دێ هەڤبەستا گەلەک یاریزانێن هێتە نوو کرن،هەتا نوکە مە شیایە گرێبەستا هەر ئێک ژ شێرکو کەریم، ئورینهو، محەمەد یاتارا، عەباس یاسین، عیماد عیسا و حەمید عەلی گرێبدەین، کارێ مە یێ ئینانا یاریزانێن نوو دێ بەردەوام بیت هەتا کو تیما مە تمام ببیت.
ناڤبری گۆت ژی: پشتەڤانییا گوهدار شێخۆی سەرپەرشتێ ئیدارەیا سەربەخویا زاخۆ کارێ مە گەلەک ب ساناهی کرییە و ئەم بەردەوامین ل سەر ئینانا یاریزانێن نوو و دەمەک نێزیک دا دێ هندەک گرێبەستێن نوو و باشتر ڕاگەهینن.

ب شێوەیەكێ‌ فەرمی فیدراسیۆنا فوتبۆلا جیهانێ‌ فیفا گوهۆڕین د هەشت یاسایێن نوو یێن فوتبۆلێ‌ بۆ وەرزێ‌ 2025-2026ێ‌ دانان كو بهێنە ب كارئینان بڤی ڕەنگی.
یا ئێكێ‌، بتنێ‌ كاپتنێ‌ تیمێ‌ مافێ‌ هەیی دگەل دادڤانی گەنگەشێ‌ بكەت ل سەر هەر بابەتەكی، یا دویێ‌، دەمێ‌ هاڤێتنا تەپێ‌ ژلایێ‌ گۆلپارێزی د چركەیا پێنجێ‌ ژ ئەوان هەشت چركەیێن بۆ هاتینە دانان دادڤان دێ‌ دێ‌ ئاماژەیەكێ‌ دەت بەری بگەهینە چركەیا نەهێ‌ و دانا كارتا زەر، یا سێیێ‌، ئەگەر تەپە دناڤا هێلا پەنەلتیێ‌ دا بیت دەمێ‌ ڕاوەستیانێ‌ بۆ هەر ئەگەرەكی دێ‌ تەپە بۆ گۆلپارێزی مینت، لێ‌ د ئەگەرێن دی دا هەكە تەپە یا تیما هەڤڕك بیت دێ‌ بۆ وان مینیت، یا چارێ‌، هەكە ڕاهێنەری یا یاریزانەكێ‌ پێكگوهۆڕ دەستێ‌ خوە ل تەپێ‌ دا و ئەو تەپە دچیتە دەرڤەیی یاریگەهێ‌، دێ‌ فاولەكا نە ئێكسەر بۆ هەڤڕك هێتە هژمارتن لێ‌ بێ‌ هیچ كارەتێ‌ وەربگرن، یا پێنجی ئێكەم خالا ڤێككەڤتنێ‌ دێ‌ بیتە خالا دیاركرنا ئۆفسایدێ‌، دەمێ‌ هاڤێتنا تەپێ‌ ژلایێ‌ گۆلپارێزی ڤە دووماهی ڤێكەڤتن دهێتە هژمارتن بۆ ئۆفسایدێ‌، یا شەشێ‌، هەكە گۆلپارێزی تەپە زێدەتر هەشت چركەیان دەستێ‌ خوە دا هێلا، دێ‌ كورنەر بۆ تیما هەڤڕك هێتە هژمارتن بێ‌ چو كارت بهێنە دان، دیسان دێ‌ ئەڤ یاسایە مینن فاولا ئێكسەر دهێتە هژمارتن هەكە دوجاركی گۆلپارێزی تەپە هەلگرت و دانا و جارەكا دی هەلگرتەڤە، هەكە تەپە گرت پشتی هەڤالێ‌ وی بۆ پاسەك دا یان ژی دەمێ‌ تەپە چیتە ژدەرڤە و یاریزان بۆ گۆلپارێزێ‌ خوە د هاڤێژیت، یا حەفتێ‌، هەكە تەپە ب ئێكچاری ژ هێلا تۆڕا گۆلپارێزی دەربازبوو بێ‌ كو ببیتە گۆل و هێرشبەرێ‌ تیما هەڤڕك دەستێ‌ خوە لێدا نابیت گۆل، یا هەشتێ‌، دێ‌ هێتە هژمارتن كۆرنەر بۆ تیما هەڤڕك هەكە تەپا ژ هێلا گۆلپارێزی دەربازبوو ب دەستێ‌ یاریزانێ‌ هێلا بەرەڤانیێ‌ و نا هێتە هژمارتن گۆل.