زنار تۆڤی:
سترانبێژ (جانان یلدزجا) كو ل دەڤەرا ئەرجیشێ ل باژێرێ وانێ ل باكورێ كوردستانێ ژ دایكبوویە، د دیدارەكێ دا بۆ رۆژناما ئەڤرۆ دبێژیت: پشتی من خواندنا خوە یا زانكۆیێ ب دووماهی ئینایی، ب رەنگەكێ پرۆفیشنال من دەست ب كارێ مۆزیكێ كر، نوكە ئەز د ژیێ 25 سالیێ دامە و هەتا نوكە من شەش كلیپ چێكرینە، دووماهی كارێ من یێ هونەری كلیپەك بوو ب ناڤێ ( پاییز بوو) ل گەل هندێ من 25 سترانێن دی تۆماركرینە، بەلێ من ئەو كلیپ نەكرینە، من لبەرە هەر هەیڤ كلیپەكێ چێكەم، هەروەسا ئەز هەموو بزاڤان دكەم، د وارێ مۆزیكێ و گۆتنا سترانان دا یا سەركەفتی بم.
هەروەسا گۆت : من لبەرە هژمارەكا سترانێن دویت ل گەل چەند سترانبێژان بیژم و ئەز ئامیرێ گیتارێ دژەنم، حەز دكەم ئامیرێ سازێ ژی بژەنم، چنكو فێربوون و ژەنینا ئامیرێ مۆزیكێ ژ بۆ هونەرمەندان كارەكێ گرنگە، هەروەسا گەلەك جاران ئەم ل گەل سترانبێژێن تورك كار دكەین و ئەو پشتەڤانیێ ل كارێ مە دكەن، ل دەمێ تۆماركرنا بەرهەمێن مە، مۆزیكژەنێن تورك مۆزیكێ بۆ مە دژەنن و ئەم وەكو تیمەك ب هەڤرا كارێ خوە دكەین، ل گەل هندێ ئەو كەسێ هاریكاریا من كری دەست ب مۆزیكێ بكەم، پرۆفیسۆرەكێ زانكۆیێ بوو، خەلكێ ئاگری بوو، كارتێكرنا مۆزیكێ ل سەر ژنان ب تایبەتی ژی ب هەستا ئازادیێ ڤە گرێدایە، ئەز ژی ڤی كاری ب ئازادانە دكەم و ئەڤە وەدكەت، كو گیانێ من وەكو ژنەك یێ ئازاد بیت، مۆزیكێ ژ بۆ مە ژنان گەلەك رامانا خوە هەیە.
نيشاندان