ئاکپارتی و هەموو پارتێن سیاسی یێن تورکیا پێشوازیێ ل بریارا پەکەکێ یا هلوەشاندنێ و دەست بەردانا ژ چەکی دکەن و دیار دکەن ئەو یەک قووناغەکا دیرۆکی یە و دێ کاریگەریەکا خوە یا گەلەک مەزن ل سەر دیموکراسیێ ل تورکیا هەبیت و کورد چاڤەرێی گوهۆڕینێن سیاسی و قانوونی نە.

دوهی پەکەکێ بریارا هلوەشاندنا خوە ب فەرمی راگەهاند و دیار کر ل سەر بانگەوازیا رێبەرێ خوە عەبدوللا ئۆجەلانی وان کۆنگرەیێ خوە یێ ١٢ ساز کرینە و بریار داینە کو ئێدی ل ژێر ناڤێ پەکەکێ چو خەباتێن سیاسی نەهێنە کرن و هەروەسا ئەو وەکو پەکەکە دێ دەست ژ چەکی ژی بەردەن.
عومەر چەلیک پەیڤدارێ ئاکپارتیێ ژی دیار کر، بریارا هلوەشاندنا پەکەکێ بریارەک گەلەک گرنگ و دیرۆکی یە، قووناغەکا نوو ل تورکیا دەستپێکریە و ئێدی دێ پرسێن هەی ب رێیێن سیاسی هێنە چارەسەرکرن و دێ پەرلەمانێ تورکیا بیتە ناڤەندا چارەسەریێ و گۆت: (مە هەموویان دڤێت ئێدی ل تورکیا شەڕ و توندوتیژی نەمینیت، هلوەشاندنا پەکەکێ ژ بۆ ڤێ یەکێ گەلەک گرنگ و دیرۆکی یە، سەردەمەک نوو دەستپێ دکەت و بێگومان دێ براتی و پێکڤەژیان ل تورکیا پتر پێش کەڤیت و ئەو یەک داخوازیا هەموو وەلاتیێن تورکیا یە). ل ئالیێ دی شیرەتکارێ سەرۆک کۆمارێ تورکیا محەمەد ئۆچۆم ژی دیار کر، هلوەشاندنا پەکەکێ دەستپێکەکا قۆناغا تورکیایەک بێ تیرۆرە، ئەو یەک دەستپێکرنا قۆناغەکا گەلەک گرنگە و بێگومان پشتی هلوەشاندنا پەکەکێ دێ چاکسازیێن مەزن یێن سیاسی و قانوونی ل تورکیا هێنە کرن، ئێدی ل تورکیا دێ هەر کەس بەحسێ ئاشتیێ، دیموکراسیێ و پێکڤەژیانێ کەت، ئەو یەک دێ بیتە ئەگەرێ بهێزبوونا تورکیا، دەمێ تورکیا بهێز بیت و شەڕ ژی نەمینیت هەموو پرسێن هەی دێ ب رێیا دانوستاندنان هێنە چارەسەرکرن و دڤێت ئەم هەموو هێز و ئالیێن سیاسی پێکڤە ژ بۆ چارەسەرکرنا هەموو پرسێن هەی کار بکەین.
ئەحمەد داوود ئۆغلۆ سەرۆکێ پارتا پاشەرۆژێ و سەرۆک وەزیرێن بەرێ یێ تورکیا ژی دیار کر، بریارا هلوەشاندنا پەکەکێ بریارەکا دیرۆکی یە، لێ یا گرنگترە ئەوە کا دێ چاوا ئەو یەک ب کریاری هێتە بجهئینان، بێگومان ب توندوتیژیێ چو پرسەک ناهێتە چارەسەرکرن، نها سەردەمەک نوو دەستپێکریە و کورد و تورک دشێن پێکڤە تورکیا بهێز بکەن و هەموو پرسێن هەی ژی پێکڤە چارەسەر بکەن، ئێدی کەس بەحسێ پارچەبوونا تورکیا ناکەت، هەموو هێزێن سیاسی ل تورکیا دشێن پێکڤە کار بکەن و ئەو یەک ژی جهێ دلخوەشیا هەموو وەلاتیێن تورکیا یە. هەڤسەرۆکێ دەم پارتی تونجەر باکرهان ژی سەبارەت ب بریارا هلوەشاندنا پەکەکێ دیار کر، پەکەکێ بریارەکا گەلەک راست و دیرۆکی دا، ئێدی ژ بۆ پێشڤەبرنا دیموکراسیێ ل تورکیا چو بەهانە نەماینە، دڤێت نها دەولەتا تورکیا ژی ئەرکێن ل سەر ملێن خوە بجه بینیت و دەست ب چاکسازیێن قانوونی و سیاسی بکەت، بریارا هلوەشاندنا پەکەکێ د بەرژەوەندیا هەموو گەلێن تورکیا دایە و دەستپێکەکا نوو یە، دڤێت هەموو هێز و ئالیێن سیاسی ل تورکیا هەست ب بەرپرسیاریا خوە یا دیرۆکی بکەن.
سەبارەت ب قۆناغا پشتی هلوەشاندنا پەکەکێ ژی عەبدولرەحیم سەماوی چاڤدێرێ سیاسی دیار دکەت، دێ قۆناغەکا نوو دەستپێکەت و دێ دەم پارتی بیتە پارتەکا مەزن و بهێز، ئێدی دێ دەم پارتی بیتە پارتا ئۆجەلانی و دێ ب هەماهەنگی ل گەل ئۆجەلانی سیاسەتێ کەت، سەردەمەک نوو وەسا دەستپێ دکەت و گۆت: (ئۆجەلان ب رێیا تەلەفۆنێ پشکداری د کۆنگرەیێ پەکەکێ دا کر و وەسا ژی پەکەکێ بریارەکا گرنگ و دیرۆکی دا، هەموو بەرپرسێن تورکیا و هێزێن سیاسی پێشوازیێ ل هلوەشاندنا پەکەکێ و دەست بەردانا ژ چەکی دکەن، ئێدی دێ هەموو هێز و ئالیێن سیاسی کار بۆ تورکیایەک نوو کەن). ل ئالیێ دی وەلاتیێن کورد ل تورکیا ژی دیار دکەن، پەکەکێ ل سەر بانگەوازیا ئۆجەلانی بریارەکا دیرۆکی دا، لێ دڤێت دەولەتا تورکیا ژی بەری هەر تشتەکێ گرتیێن سیاسی ئازاد بکەت، دووماهیێ ب سیاسەتا قەیوومان بینیت و ل ژێر ناڤێ تیرۆرێ نابیت ئێدی سیاسەتمەدارێن کورد بهێنە دەستەسەر کرن، دڤێت زۆرداریا ل سەر گەلێ کورد ل تورکیا ب دووماهی بهێت، هەروەسا دڤێت ئێدی چو ئاستەنگی ل هەمبەر پەروەردەیا ب زمانێ کوردی ل تورکیا نەمینیت، هەروەسا وەلاتیێن کورد داخواز دکەن د زووترین دەم دا قانوونا تیرۆرێ ل تورکیا بهێتە هلوەشاندن و نابیت ئێدی ل ژێر ناڤێ تیرۆرێ سیاسەتمەدارێن کورد بهێنە سزا دان.
چاڤدێرێن سیاسی ژی وەسا دبینن هەکە پشتی بریارا پەکەکێ تورکیا ژی دەست ب گوهۆڕینێن مەزن بکەت و هندەک پێنگاڤێن دلخوەشکەر بهاڤێژیت ئەو یەک دشێت ببیتە دەستپێکەکا گەلەک نوو و ئێدی شەڕێ چەندین سالان دێ ب دووماهی هێت، لێ هەکە تورکیا یا پێدڤی نەکەت ئالۆزی و شەڕ دێ بەردەوام بن، چونکی بابەت تنێ پەکەکە نینە، بابەت پرسا مللەتێ کوردە و دڤێت پرسا کوردی ل تورکیا بهێتە چارەسەر کرن.

مەسعود پزیشکیان سەرۆک کۆمارێ ئیرانێ راگەهاند وان دڤێت پرسا بەرنامێ ئەتۆمی یێ ئیرانێ ب رێیا دانوستاندنان ل گەل ئەمریکا چارەسەر بکەن، لێ ئەو یەک رامانا هندێ نادەت ئیران دێ دەست ژ بەرنامێ خوە یێ ئەتۆمی بەردەت، بەری نها ژی رێبەرێ شۆرەشا ئیسلامی یا ئیرانێ دیار کریە کو چەکێ ئەتۆمی حەرامە و ئیران کار بۆ دروستکرنا چەکێ ئەتۆمی ناکەت، لێ بەرنامێن ئەتۆمی یێن ئیرانێ بۆ مەرەمێن ئاشتیێ نە و ئیران دەست ژ بەرنامێ خوە یێ ئەتۆمی ژی بەرنادەت.سەرۆک کۆمارێ ئیرانێ ئەو یەک ژی دیار کر، هەلوەستێ ترامپی و بەرپرسێن دی یێن ئەمریکا سەبارەت ب بەرنامێ ئەتۆمی یێ ئیرانێ ناهێتە قەبوول کرن، چونکی هەلوەستێ وان خزمەتا رێککەفتنێ ناکەت، هەرچەندە نها دانوستاندنێن ل گەل ئەمریکا بەردەوام دکەن، لێ دڤێت ترامپ و بەرپرسێن دی یێن ئەمریکا ژی رێزی ل ئیرادە و داخوازیێن گەلێ ئیرانێ بگرن، ل ژێر ناڤێ دانوستاندنان و رێککەفتنێ ئیران دەست ژ مافێن خوە بەرنادەت و بەرنامێ ئەتۆمی یێ ئیرانێ ژی ناهێنە هلوەشاندن، هەکە ئەمریکی ل سەر هندەک ژ داخوازیێن خوە د رژد بن بێگومان دێ دانوستاندن هێنە راگرتن.