ژین لونگ
دەما خەونێ دبینم
گرنگیێ نادەم
كا خەلك چ بێژن
من ناترسینیت
هندەك جاران خەلك سەیرترین
تشتی دبێژن
لێ د خەونێن من دا
ئەز تنێ ب گوهەكی دبیستم
ئوو ئەو گوه ژ روویێ تەكنیكی ڤە د خەو دایە
ئەز بەردەوامیێ ددەمە..
خۆ د خەونێن خۆ دا
هەردەم كاودانان ژ دل وەرناگرم
ئەڤە هونەرێ گەڕیانێ یە دناڤ
جیهانا خەونان دا
ئەز غەریبم ل وی خاكێ پڕ غەریب
خیز نە د بن پێن من دایە
جادەیا سەیرە
ئەو ترومبێلا ئەز تێدامە خۆیایە خۆ ل سەر ڕێ ناگریت
بارێ من نەمایە
خەمێن ڤێ دنیایێ
دبیت ل جهەكی دی بەردەوام بیت
لێ لڤێرە روویێ من گەنجە و ژ خەما ڤالایە
هەتا ل گەل دڕندەیێن رادهێلن من
یان تەرزێن نەحەزێن ب سەر مالا من دا دگرن
دەما ل «ڕۆما»یێ بی
وەك رۆمییان رەفتار بكە
لێ دەما د خەونێ دا بی
یا تە بڤێت وێ بكە
ئو فێرببە
كو دلێ خەونبینەكێ ئارام
هەردەم دێ مالەك هەبیت
ل هەر درەكی بلا یێ گەڕۆك بیت
هەتا ل دەرڤەی رەهەندێن دیتر ژی.
::: نڤیسەرەكا ئەمریكییە، ئەڤ هەلبەستە ژ مالپەرێ وێ و ب ڕازەمەندییا وێ هاتیە وەرگرتن و وەرگێڕان.
هەرهین محەمەد:
شێوەكار (رەشا سالح) د دیدارەكێ دا بۆ رۆژنامەیا ئەڤرۆ دبێژیت: من گازندە و رەخنە بۆ شێوەكاران نینن و دزانم ب كارێ شێوەكاری نەشێن ژیانا خوە ب رێڤە ببەن هەموو خودان خێزانن هەكە چ كارێن هونەری نەكەن نە گونەها شێوەكاری یە و دێ نەچار بیت كارەكێ دی بكەت، یان دێ كارێ خوە یێ هونەری كەتە بازرگانی و دبینم چ گرنگیدان ب هونەرێ شێوكاری نینە.
ل دۆر نووترین كارێ خوە یێ هونەری رەشایێ گۆت: د بەرنامێ من دایە پێشانگەهەكا تایبەت ڤەكەم و د وێ پێشانگەهێ دا دبیت كارێن گرافیكی تێدا نەبن و دیسان كەڤالێن رەنگاو رەنگ هەبن و دێ كارەكێ ئەنستلیشن بیت و دێ كارەكێ مەزن بیت، وەكو هاریكاری ژلایێ رێڤەبەریا گشتی یا رەوشەنبیری و هونەری یان سەندیكا هونەرمەندان بیت، و ب راستی ژی هندی رێڤەبەریا رەوشەنبیری یە و چ ژوان بهێت بۆ هونەرمەندان دكەن و گەلەك جاران هونەرمەند دێ كارەكی كەت و دێ خوە پێدڤی سازیەكا پەیوەندی داركەت و دبیت وێ سازیێ ئەو پارە نەبن بدەتە وی هونەرمەندی بۆ وی كاری و ل وی دەمی گێۆلێ هونەرمەندی دهێتە شكاندن.
شاكر ئەتروشی:
گرۆپێ پشتەڤانێن خواندنا پەرتووكان، ب هەماهەنگی ل گەل ناڤەندا خانی یا رەوشەنبیری و راگەهاندنێ، دوهی 16/4/2025، ل دەمژمێر پێنجی ئێڤاری چالاكیەكا تایبەت ژیۆ دانوستاندنێ ل دۆر پەرتووكا (پەپووكێ كۆرە) كو رۆمانەكە ژ نڤیسینا (سادق هیدایەت) و ژ وەرگێڕانا (سادق سالح/ بابێ جەنگۆی) ل هولا ناڤەندێ ل ئاڤاهیێ كەنالێ دهۆك تیڤی گێڕا و هژمارەكا ئەندامێن وی گرۆپی تێدا بەرهەڤ بوون.
پشتی دانەنیاسینا وێ پەرتووكێ ژلایێ وەرگێری وێ ڤە، چەند پرسیار و پێشنیاز ژلایێ ئەندامێن گرۆپی ڤە ئاراستەی وەرگێڕ(سادق سالح) هاتنە كرن و ب سنگەكێ بەرفرەه بەرسڤ ل سەر هاتنە دان.
سندس سالح سلێڤانەیی:
ناریمان عەبدوللا، خانمەكا خەلكا دهۆكێ یە، شارەزای د چێكرنا هەموو جۆرێن نانی دا هەیە، ب تایبەت ژی (سەوكێن پەنیری) و ب گۆتنا وێ ل دەستپێكێ ب تنێ ئەو نان بۆ زارۆكێن خوە چێدكرن، لێ وەكو هاریكاریەك بۆ پشتەڤانیا مالا خوە ئەڤە دەمەكە گەلەك جۆرێن نانی بۆ خەلكەكی دپێژیت و حەزا وێ ئەوە دەلیڤەیەك بهێت بشێت جهەكێ تاییبەت یان خوارنگەهەكێ بۆ خوە ڤەكەت و هەموو جۆرێن نانی تێدا ئامادە بكەت و بفرۆشیت.
ناریمانێ گۆت: د كەڤندا هاتیە گۆتن كو ئەو مالا نانێ سێلێ یان تەنیرێ تێدا هەبیت ئەو مال هەردەم یا ئاڤایە و كابانیا مالێ ژی یا سەرفەرازە، لەورا هەر ژبەرێ هەتا نوكە ئەز بەردەوام نانی دپێژم و ئەڤ كلتۆرە دناڤ مالا مەدا یێ زیندی یە، لەورا دێ یا بەردەوام بم و ل هیڤیا من ئەوە جهەكێ تایبەت یان خوارنگەهەكێ بۆ خوە ڤەكەم و نە بەس نانێ پەنیری، بەلكو نانێ قوراد و گژنیژ و ئارخافكێ و هەر جۆرەكێ دی هەبیت ل وێرێ ب پێژم.
قەیس وەیس:
ب فەرمی تیما یانەیا دهۆك بوو قارەمانا كۆپا كەنداڤی بۆ جارا ئێكێ د دیرۆكا ئیراقێ و كوردستانێ دا، پشتی شیایی د یارییا دویێ یا ڤەبر ژ چارچووڤەیێ فینالا كەنداڤی بۆ یانەیێن قارەمانێن خولا پشتی شیایی ب دو گۆلان بەرانبەر گۆلەكێ سەركەفتنێ ل سەر یانەیا قادسیە یا كوێتی بینت، د یارییا واندا ئەوا ل سێ شەمبییا بۆری ب بەرهەزڤبوونا مەسرۆر بارزانی سەرۆكێ حوكمەتا هەرێما كوردستانێ، د. عەلی تەتەر پارێزگارێ دهۆكێ، نەوزاد عەبدوللا بەرپرسێ لقا ئێكێ و كۆمەكا دی یا بەرپرسێن میری و حزبی هەروەسان عەدنان درجال سەرۆكێ فدراسیۆنا فوتبۆلا ئیراقێ و حەمەد بن خەلیفە سەرۆكێ فدراسیۆنا فوتبۆلا كەنداڤی ل یاریگەها یانەیا دهۆك یا وەرزشی هاتییە كرن.
نیڤا ئێكێ ژ یاریێ بێ گۆل وەكهەڤی ب دووماهی هات، د نیڤا دویێ دا مەسعۆد میرالی ڕاهێنەرێ دهۆكێ شیا تیما خوە باشتر لێبكەت و شێوازێ یاریێ بۆ هێرشبەرێ خۆرتر بكەت و شیان د خولەكا 66ێ دا گۆلا ئێكێ ژلایێ ستێرا دهۆكێ سیابەند عەگید گۆلێ بینن، پشتی بۆرینا چار خولەكا ژ ئەنجامێ خەلەتیەكێ یانەیا قادسیە گۆلا وەكهەڤیێ ژلایێ یاریزانێ خوە محەمەد سۆلە ئینا، لێ هێرشێن ئەلهۆیێن چیا نە ڕاوەستیان دگەل پشتەڤانییا بەردەوام یا جەماوەرێ دهۆكێ و دەرئەنجامێ گڤاشتێن بەردەوام ژی پیشەكارێ دهۆكێ یێ بەرازیلی مارلۆنی شیا گۆلا دویێ و سەركەفتنێ بینت، دادڤانێ یاریێ ب فیركا خوە سەركەفتنا دهۆكێ ڕاگەهاند و ب فەرمی وەكو قارەمانا كۆپا كەنداڤی هاتە خەلاتكرن.
پەیاما پیرۆزباهیێ یا سەرۆك بارزانی
پشتی ب دووماهی هاتنا یاریێ سەرۆك مەسعۆد بارزانی پەیامەكا پیرۆزباهیێ ئاراستەیی یانەیا دهۆكێ كر پشتی بوویە قارەمانا كەنداڤی و ئەڤە ژی پەیاما سەرۆكی یە( پیرۆزباهییەكا گەرم ل یانەیا وەرزشی یا دهۆكێ دكەم بۆ ڤێ سەركەفتنا مێژوویی و ب دەستڤەئینانا قارەمانییا جاما كەنداڤی، هەروەسان پیرۆزباهیێ ل خەلكێ دهۆكێ و هەمی خەلكێ كوردستانێ دكەم، ئەڤ سەركەفتنە سەركەفتنا هەمی كوردستانێ یە، دەستێ هەمی لایەكی خۆش و هەر سەركەفتی بن)
مەسرۆر بارزانی پەیاما پیرۆزباهیێ هەبوو
ل سێ شەمبییا بۆری مەسرۆر بارزانی سەرۆكێ حوكمەتا هەرێما كوردستانێ د ناڤ یاریگەها یانەیا دهۆكێ دا بەرهەڤبوو ژبۆ پشتەڤانییا ئەلهۆیێن چیا، ئەوێ كەیفخوەش بووی ددەمێ یانەیا دهۆكێ گۆل تۆمار دكرین و بوویە قارەمانا كۆپا كەنداڤی، هەروەسان پشتی ب دووماهی هاتنا یاریێ كۆپا كەنداڤی پێشكێشی یانەیا دهۆكێ كر.
د پەیاما خوە یا پیرۆزباهیێ مەسرۆر بارزانی گۆت: ئەڤ سەركەڤتنا مەزن جهێ شانازییا مە هەمییانە، هیڤییا سەركەفتنێ بۆ گشت یانەیێن وەرزشی یێن هەرێما كوردستانێ د خوازم.
سەرۆكێ هەرێما كوردستانێ ژی پیرۆزباهی كرن
ژلایێ خوە ڤە نێجیرڤان بارزانی سەرۆكێ هەرێما كوردستانێ پەیاما خوە یا پیرۆزباهیێ ئاراستەیی یانەیا دهۆكێ كر و ئەڤە ژی دەقێ پەیامێ یە: ژ دل و ب گەرمی پیرۆزباهییان ل یانەیا دهۆكێ دكەم، یانەیا دهۆكێ ب ڤێ سەركەفتنێ و ڤێ یارییا جوان و ب هێز دلێ مە هەمییا ل كوردستانێ و سەرانسەری ئیراقێ شاد كر، یانەیا دهۆكێ شانازییا هەمی كوردستانێ یە، ئێك ب ئێك دەستخۆشیێ ل هەمی یاریزانان و بەرپرسێن یانەیا دهۆكێ دكەم كو جهێ سوپاسی و پێزانین و شانازییا كوردستانێ و هەمی ئیراقێ نە، هیڤییا گەلەك سەركەفتن و ب دەسئێخستنا گەلەك قارەمانیێن دی بۆ وان دخوازم هەر بژین و هەر هەبن هەر سەركەفتی بن.
محەمەد شیاع ئەلسۆدانی پەیامەك بەلاڤكر
محەمەد شیاع ئەلسۆدانی سەرۆك وەزیرێن ئیراقێ پیرۆزباهییا یانەیا دهۆكێ كر و گۆت: هوون نوونەرێن هەموو خەلكێ ئیراقێ بوون هەوە شیا ناسناڤەكێ مەزن دەستڤە بیین، پیرۆزباهییێ ل هەوە دكەین و هەمی وەرزشڤانا دكەین، ب هیڤییا دەستكەڤت و سەركەفتنێن مەزنتر.
سەرۆكێ ئێكەتییا نشتیمانییا كوردستانێ ژی پەیامەك بەلاڤكر
باڤل تەلەبانی سەرۆكێ ئێكەتییا نشتینمانییا كوردستانێ گۆت: ژدل پیرۆزباهییا یانەیا دهۆكێ دكەم كو ئێكەمجارە یانەیەكا كوردستانی و ئیراقی ببیتە قارەمانا كەنداڤی، ئەڤ سەركەڤتنا یانەیا دهۆكا ڕەنگین جهێ شانازییا مەیە و ئەم پیرۆزباهییەكا گەرم ل پشتەڤان و یانەیا دهۆكێ و كوردستانیێن خۆشتڤی دكەین، ئەڤ سەركەڤتنە هانددەت كو ئەم هەمی هاریكاری و پشتگێرییا زێدەتر یا وارێ وەرزشێ بكەین دا كو یانەیێن كوردستانێ دڤی واری دا ژی پێشەنگبن.
قوباد تەلابانی ژی خۆشحالە ب دەستكەفتێ دهۆكێ
د پەیاما خوە یا پیرۆزباهیێ دا قوباد تەلابانی جێگرێ سەركێ حوكمەتا هەرێما كوردستانێ پیرۆزباهییا یانەیا دهۆك بڤی شێوەیی كر: پیرۆزە دهۆك، پیرۆزە كوردستان، ئەڤرۆ چاڤەڕێ دهۆكێ بووم/ ئەڤرۆ هەموو كوردستانییەك دهۆكی بوون، ژ دل خۆشحال بووم بڤێ سەركەفتنا دیرۆكی یا یانەیا دهۆكێ كو بوویە قارەمانا كەنداڤی، گەشبینم ئەڤ سەركەفتنا مەزن دێ بیتە پالدەر بۆ هەموو یانەیێن دی یێن كوردستانی كو خەون ب سەركەڤتنێن مەزنتر ل سەر ئاستێ نێڤدەولەتی بینن، ئەڤ سەركەفتنە سەركەفتنا وەرزشا كوردستانێ یە، سەركەفتنا هەر وەرزشڤانەكی سەركەفتنا هەموو وەرزشا كوردستانێ یە.
پارێزگارێ دهۆكێ پەیاما پیرۆزباهیێ هەبوو
د پەیڤا خوە یا پیرۆزباهیێ دا د. عەلی تەتەر پارێزگارێ دهۆكێ گۆت: پیرۆزباهییەكا گەرم ئاراستەیی هەموو كوردەكێ نیشتمان پەروەر و هەموو ئیراقیەكی تایبەت خەلكێ پارێزگەها دهۆكێ و یاریزان، راهێنەر، سەرۆك و ڕێڤەبەر و هاندەرێن یانەیا دهۆكێ دكەم، سوپاس بۆ پالپشتی و پشتەڤانییا سەرۆك بارزانی و سەرۆكێ حوكمەتا هەرێما كوردستانێ رێزدار كاك مەسرۆر بارزانی بۆ سەر ئێخستنا یانەیا كورستانیان، سوپاسیەكا تایبەت بۆ پیر و جەوان و زارۆكێن وەلاتی و بۆ هەموو وان كەس و لایەنان كو پشتەڤانییا خوە بۆ یانەیا دهۆكێ ڕاگەهاندبوو.
گوهدار شێخۆیی كەیفخوەشییا خوە دیاركر
ژلایەكێ دووڤە گۆهدار شێخۆ سەرپەرشتێ ئیدارا سەربەخوەیا زاخۆ پیرۆزباهیێن خوە گەهاندنا یانەیا دهۆك و گۆت: ژ دل پیرۆزباهیێ ل جەماوەر و حەز ژێكەرێن یانەیا دهۆك و سەرۆك و دەستەیا كارگێرییا یانەیێ دكەین، ب هەلكەفتا سەركەفتنا وان ل سەر قادسیە یا كوێتی د قارەمانییا كەنداڤی دا ئەوا ل یاریگەها دهۆك یا وەرزشی هاتییە كرن و برنا ناسناڤێ قارەمانیێ دوبارە پیرۆز بیت.
كەمال كەركووكی و پارێزگارێ كەركووك كەیفخوەشن
ژلایێ خوەڤە كەمال كەركووكی ئەندامێ مەكتەبا سیاسی و بەرپرسێ بەشێ پەیوەندیێن گشتی گۆت: ژ دل پیرۆزباهییا تیما دهۆكێ دكەین بۆ ئەڤێ سەركەفتنا ژ هەژی ل كۆپا كەنداڤی دا كو دەستكەڤتەكێ دیرۆكییە و جهێ شانازیێ یە بۆ كوردستانێ و ناڤێ وەرزشێ بلند دكەت، ئەڤ سەركەفتنە ڕەهەندكێ قۆلتر هەیە كو بەری رۆژەكێ ژ رۆژا رەش یا ئازاریا هەلكەتی ئەنفالدا هات، دگەل خۆ پەیاما هیڤی و خۆراگریێ بۆ گەلێ مە ئینا، ئەڤ سەركەفتنە بۆ هەلەبچە، كەركووك، هەولێر، سلێمانی و هەمی باژێر و جهێن كوردستانێ یە، پیرۆزە و هوون جهێ شازانیێ نە بۆ مللەتێ كورد.
پارێزگارێ كەركووكێ رێبوار تاها ژی پیرۆزباهیێن گەرم ئاراستەیی یانەیا دهۆكێ كر و گۆت: ئو سەركەڤتنا دیرۆكی ل یانەیا دهۆك و وەرزشڤانان پیرۆز دكە مكو ببیتە دەستپێكا ب دەستڤەئینانا ناسناڤێن پتر، هیڤیدارم سەركەڤتن بۆ هەموو یانەیێن كوردستانی بیت.
قۆنسلخانەیا وەلاتێ ئەمریكا ژی پیرۆزباهی كر
د تۆڕا چڤاكی دا قۆنسلخانەیا وەلاتێن ئێگكرتییا ئەمریكا پەیاما پیرۆزباهیێ بڤی شێوەیی بەلاڤكر، پیرۆزباهیێن خوە ئاراستەیی ئەلهۆیێن چیا یێن یانەیا دهۆكێ یا وەرزشی دكەین ژبۆ سەركەڤتنا وان یا ژ هەژی د یارییا دووماهییا كۆپا كەنداڤی دا، ئەڤ سەركەڤتنە قۆناغەكا گرنگە ژبۆ فوتبۆلا ئیراقێ ل سەر ئاستێ نێڤدەولەتی نیشان ددەت.
سەرۆكێ یانەیا دهۆكێ ژی پەیدامەك هەبوو
د. عەبدوللا جەلال سەرۆكێ یانەیا دهۆك گۆت: پیرۆزە ل هەموو حەز ژێكەرێن یانەیا دهۆك، پیرۆزە ل هەموو كوردستانیان، سوپاس بۆ خودێ ئەم شیاین سۆزا خوە ب جهبینن ئەوا هەر ژ دەستپێكا قارەمانیێ مە گۆتی كو دێ هەڤڕكییێ بۆ ناسناڤی كەین، بۆ مە جهێ شانازیێ بوو د ماوەیێ بۆری دا خەلكەكێ دی یێ دەرڤە قەستا مە كرین و پەسنا ئارامی و خۆشی و ئاڤادانییا دهۆكێ و كوردستانێ كری، داخواز لێبیورینی ژ وان پشتەڤانان دكەین ئەوێن نەشیان بهێنە یاریگەهێ، بۆ گرنگ ئەو بوو مە ناڤێ باژێرێ خوە و وەلاتێ خوە كوردستانێ بلند كر و هیڤی دخوازین پتر بشێن قارەمانییا و ناسناڤان ب دەستڤە بینن.
ناڤەندا خانی ژی پیرۆزباهی هەبوون
ژلایەكێ دووڤە ناڤەندا خانی یا ڕەوشەنبیری و ڕاگەهاندنێ پیرۆزباهییا هەموو خەلكی كوردستانی كر و گۆت: پیرۆزبیت ل هەمی خەلكێ كوردستانێ پشتی كو یانەیا دهۆك شیایی د یارییا فینالێ دا سەركەڤیت و ناسناڤێ قارەمانیێ ب دەستڤە بینت، هەروەسان وەكو ڕۆژنامەیا ئەڤرۆ ژی ئەم جوانترین پیرۆزباهییا ل هەموو خەلكێ كوردستانێ دكەین ئەڤ دەستكەفتێ دیرۆكی و ب هیڤییا دەستكەڤتێن مەزنتر.
دیرۆكا كۆپایێ قارەمان كی بوون
بۆ جارا ئێكێ قارەمانییا كۆپا كەنداڤی ل سالا 1982ێ ب پشكدارییا پێنج یانەیان بوو، یانەیا عەرەبی یا كوێتێ ئێكەم ناسناڤی دەستڤە ئینابوو، ب گشتی 30 جاران قارەمانی هاتیە كرن، ل 12 جاران هاتییە هەلوەشاندن یان ژی نە هاتییە ئەنجامدان، یانەیێن شەباب، ئەهلی و ئیتفاق یێن سعۆدیێ پترترین ناسناڤ برینە ئەوژی هەر ئێكی سێ جاران، ژلایێ خوەڤە قادسیە یا كوێتی دو جاران ب دەستڤە ئینایە ل سالێن 2000 و 2005 بوویە، ژلایێ خوەڤە یانەیا دهۆك وەكو ئێكەم یانەیا كوردستانێ و ئیراقێ چوو د دیرۆكا قارەمانێن كۆپا كەنداڤی دا.
كی بۆ گۆلكەرێ قارەمانیێ و یێن دهۆكێ كینە؟
ب فەرمی فدراسیۆنا فوتبۆلا كەنداڤی عەلی ئەحمەد مبخۆت یاریزانێ یانەیا نەسرا ئیماراتی دەستنیشانكرن وەكو گۆلكەرێ قارەمانیێ پشتی چوار گۆلان تۆماربكەت، ژلایەكێ دووڤە گۆلكەرێن یانەیا دهۆكێ بڤی شێوەیی بوون پیتەر گۆرگیس، یانیك زاكێری، مارلۆن دیسانتۆس هەر ئێك دو گۆل هەنە، هەروەسان بەیار ئەبۆبەكر، ئیبراهیم غازی، پاشەنگ عەبدوللا، كەریم دەرویش، زوئەلفەقار، رۆبێن ئەكۆا و سیابەند عەگید هەر ئێك گۆلەك تۆماركریە.هارۆن ئەحمەد باشترین یاریزانێ قارەمانیێ
د ڕێورەسمێن خەلتێن باشترینێن قارەمانیێ دا، فدراسیۆنا فوتبۆلا كەنداڤی كوڕێ باژێرێ ئاكرێ و ستێرا یانەیا دهۆك یێ هێلا ناڤین هارۆن ئەحمەد وەكو باشترین یاریزان د قارەمانیێ دا دەستنیشانكر، هەروەسان گۆلپارێزێ یانەیا قادسیە خالد ئەلرەشیدی باشترین یگۆلپارێزێ قارەمانیێ دەستنیشانكر.
ئەلهۆیێن چیا چەوا دەربازبوو یارییا دووماهیێ
تیما فوتبۆلا یانەیا دهۆك وەكو نوونەرا ئێكانە یا ئیراقێ و كوردستانێ دەربازبوو یارییا دووماهییا كۆپا كەنداڤی بڤی شێوەیی، دەستپێكێ د كۆما ئێكێ دا ل رێزا دویێ هاتبوو ب كۆمكرنا نەهـ خالان ژ دو سەركەفتن، سێ وەكهەڤی و خوسارەتیەكێ، یانەیا ئیتفاق وەكو خودانا رێزا ئێكێ یا كۆما دویێ دەربازبوو قۆناغا چارگۆشەیا زێرین ب كۆمكرنا 13 خالان ژ چار سەركەفتن، وەكهەڤییەك و خوسارەتیەكێ، د قۆناغا چارگۆشەیێ دا د یارییا هاتنۆچوونێ دا سەركەفتن ل سعۆدیی ب گۆلەكێ ل سەر یانەیا ئیتفاق ئینا و یارییا دویێ ل یاریگەها خوە سەركەفتن ب هەمان ئەنجام ل سەر ئیتفاق دوبارەكر، د یارییا دووماهیێ یا ئێكێ دا دهۆك ل یاریگەها قادسیە بێ گۆل وەكهەڤبوو، د یارییا دویێ دا ب2-1 ب سەركەڤیت و ناسناڤی دەستڤەبینت.
دیدار، سالار محەمەد دۆسكی:
4 – 5
ئەو ژی ل دووماهی یا بارەگایێن مە دێ چینە ئیرانێ و ئەم ژی هاتینە سەرا زارۆكێن خوە بدەین و هەڤژینا من ل گەل ئەوان دەربازبوو هەتا گەهشتیە لقێ دو و ئەم ژی دچیایی را ب رێكێن نەقانوونی را دەرباز بووین و ئەو دناڤ حوكمەتێ را و ب هاریكاریا حزبا دیموكراتا ئیرانێ دەربازبوون و ئەم گەهشتینە ئێك ل ئیرانێ، وی دەمی جەنابێ سەرۆك (مەسعود بارزانی) زانی من هەڤژینا خوە و زارۆكێن خوە ژ ئیراقێ ئیناینە وی دەمی نوینەرێن لقێ ئێك ل ئیرانێ (قادر قاچاخ، نێچیرڤان ئەحمەد و عەبدوالعەزیز تەیب) بوون و ئەڤ هەرسێ مرۆڤە باوەرپێكەرێن لقێ ئێك بوون ل ئیرانێ و ڤەگوهستنا هەڤژین و زارۆكێن خوە ب رێكا ئەڤان هەرسێ كەسان بوو و من بەری هینگی ئاگەهدار كربوون، و دەمێ ل گەل هەڤژین و زارۆكێن خوە گەهشتیمە ئیرانێ، جەنابێ سەرۆك (مەسعود بارزانی) ل مەكتەبا سیاسی یا پارتی داخوازا دیتنا من كر، و دەمێ من سەرەدانا جەنابێ سەرۆكی كری، (نێچیرڤان بارزانی) ل مەكتەبا وی بوو و گۆتە من كاك (شاكر) ل ڤێرە بە هەتا جەنابێ سەرۆكی تە بینت و گۆتیە دڤێت (شاكر) ببینم، و مینتە بتنێ ومام هەتا بوویە دەمژمێر 12ی شەڤ و دەلیڤە كەفتێ بتنێ ببینم، و كاك (نێچیرڤان بارزانی) گۆت مامێ من یێ بتنێ یە و كەرەم بكە دەف و ل گەل من هات هەتا چوویمە ژوور و ئەو دەركەفت و ئەز و سەرۆك بتنێ ماینە ل ژوور، دا ژ بیر نەكەم دەمێ ئەم بەرەف ئیراقێ چووین بۆ ئینانا ڤەژین و زارۆكێن خوە ل رابەراتیا شۆڕەشگێران حزبا دیموكراتا ئیرانێ سەركردەكێ وێ حزبێ بناڤێ(عەزیز) خەلكێ (شنو) بوو ل وێرێ بوو و گۆتە من كاك (شاكر) هوون دێ شێن كارەكی بوومە كەن، من گۆتێ فەرموو گۆت مرۆڤێن من ل (شنو) نە و ئەگەر كاغەزەكێ بدەمەف هەوە هوون دێ دەنەڤێ؟ من گۆتێ سەرچاڤا و كاغەزەك نڤێسی و من داف برایێ وی ل (شنو) بەری كاغەزێ بنڤیست گۆت كاك (شاكر) دێ جەنابێ (مەسعود بارزانی) بینی؟ من گۆت ب ئانەهیا خودێ دێ بینم و گۆت خێرا هەوە دایە و ئەگەر خودێ حەز بكەت سالەكا دی چونكە هاتن و چوونا وێ دەڤەرێ یا بزحمەتە و گەلەك بەفر دهێت و هاتن و چوون نامینت و رێكا مە هاتن و چوون (قەندیلی) رابوو وی برادەرێ حزبا دیموكراتا ئیرانێ گۆت بتنێ كاك (مسعود) نامەكێ بوومن بنڤیست و ناڤێ تە تێدا بیت و بێژیت ئەڤە كادرێ مەیە دێ چیت سەرا مرۆڤێن خوە دەت یان دێ چیت رێكخستیێن خوە بینت ل دهۆكێ، دێ بووتە ژ دهۆكێ و زاخۆ هەتا دگەهیە سلێمانیێ دێ بووتە كارتێ چێكەین و تە كەینە كادرێ خوە و چ كەس نەشێن ل گەل تە باخڤن و هەرە دهۆك و كارێ خوەیێ حزبی بكە و هەر كارەكێ تە هەبیت ئەو خەما من و دەمێ چوویمە دەف جەنابێ سەرۆك (مەسعود بارزانی) ماینە بتنێ و جەنابێ وی گۆت كاك (شاكر) تە گەلەك زحمەت بر و پێ شكەستی ڤە چەوا چوویە ئیراقێ و تە زارۆكێن خوە ئینان و من بەحسێ چوونا خوە بۆ كر وی گۆت حزبا دیموكرات هاریكاریا هەوە كر؟ من گۆت بەلێ گۆت بەلێ ڤێ ل چ جهان نەبێژی ژ بەر ئیرانێ نە كوو تە بگرن و من گۆتێ نەخێر نابێژم ئەگەر ئەو نەبان رەنگە ئەم نەشیاباین و گەلەك هاریكاریا مە كر گەلەك كەیفا وی هات و گۆت كا تە چ مەزاختی كریە بوومن بنڤیسە ئەو لقێ ئێك ل وێرێ دێ بۆ رەوانەكەم دا مەزاختیێ تە بدەنێ و هاریكاریا من كر و دەمێ بۆ پێێ منێ شكەستی ژی بریمە تەهران جەنابێ وی هاریكاریا من كر.
پێشمەرگەیێ شۆڕەشا گولانێ، شاكر زێوەی دۆسكی، بەردەوامی دا سحبەتا جڤاتا خوە ل گەل یا جەنابێ سەرۆك (مەسعود بارزانی) گۆت: من بەحسێ كاك(عزیز) كادرێ حزبا دیموكراتا ئیرانێ بۆ سەرۆكی كر و جەنابێ وی گۆت كاك (شاكر) دێ چی؟ من گۆتێ ئەگەر (غەفار) ل گەل من بیت ئەم دو كادر دێ چین وی گۆت خودێ كەریمە هەتا وی دەمی و دبیتە بوهار و هاتن وچوون خوش بیت و ئەم دێ چین، ل سالا 1990 ئەم هاتینە كوردستانێ و د.(كەمال كەركووكی) خوە بەرهەفكر و رۆژەكێ د.(كەمال كەركووكی) ل مالا (مقداد كورێمەی) كادرێ لقێ پارتی بوو، ل هەولێرێ ئەم ل مالا وی بووین و (د.كەمال) گۆتە من كاك (شاكر) ئەگەر ل گەل من بهێی ئەم یێ خوە بەرهەڤ دكەین دێ چینە ئیراقێ و من گۆتێ هوسا ب سادەهی ناهێم، كاك (كەمال) گۆت تشتەكێ هەی دێ بووتە بێژم من گۆتێ بەلێ گۆت من جەنابێ سەرۆكی دیتی یە و جەنابێ وی گۆتیە ئەگەر (شاكر زێوەی و سەربەست سندوری) ژ لقێ ئێك ل گەل تە بهێن ئەز حەز دكەم، من زانی تو ل مالا (مقدادی) لەوما هاتیمە ڤێرە و من گۆتێ كاك (مەسعود بارزانی) گۆتیە؟ گۆت بەلێ ئەڤە ئاخفتنا وی یە و گۆت نابێژمە هەوە پێكڤە وەرن هوون ئێك و دو ب گوهورن، من گۆتێ بلا و هەیڤا شەش سەقایێ دونیایێ خوش بوو ئەم (72) پێشمەرگە ل گەل د.(كەمال كەركووكی) هاتینە كوردستانێ و ئەم هاتینە سەر سنوری و سنورێ هەرسێ وەلاتێن (ئیران، تروكیا و ئیراق) سێ گوشێ و هەر ئێك ژ مە شەش بۆ حەفت پێشمەرگان ل گەل دا بوو و ئێكێ خەلكێ سورا ل گەل د. (كەمال كەركووكی ) بوو دگۆتێ (عەبدولرەحمان) خودان هێز بوو، (خالد بانی، محەمەد خالد بۆسلی، سەعید بۆسلی، ئەبو عەلو بانی) هەڤالێن لاسلكیێ كاك( رەمەزان بەرواری) خودێ ژێ رازیبت و ئەم هەمی سەر ب (د. كەمال كەركووكی) و جەنابێ سەرۆك (مەسعود بارزانی) كومبوونەك ل گەل مە هشتا ئەنجامدا و بەرهەڤبوونا د.(كەمال كەركوكی) بەحسێ ئارمانجا چوونا مە كر، و مە ژی داخوازا مەزاختی و چەكی و پارا و ئێمناهی یا رێكێ ژێ كر، دێ بۆ دیرۆك و خودێ دێ بێژم ئەڤە یا بیرا من (مەسعود بارزانی) حەز ل شەرێ برا كوژیێ نینە و حەژێ ناكەت،.
سەرۆك بارزانی ل سالڤەگەڕا ئنفالێ دا دبێژیت: باشترین وەفاداری بۆ شەهیدێن ئەنفالێ ئەوە ئەم هەموو د خزمەتكرن و پاراستنا وەلاتێ خوە ئێكدەنگ بین و پێكڤە پاشەڕۆژەكا گەش بۆ گەلێ خوە ئاڤا بكەین.
دوهی دوشەمبی 14 نیسانا 2025، سەرۆك بارزانی، پەیامەك ب هەلكەفتا سالڤەگەڕا 37 یا ئەنفالێ بەلاڤكر و ئاماژە ب وێ چەندێ كر» دڤێت دەولەتا ئیراقێ قەرەبوویا ئەنفال و جینۆسایدێ بكەت كو ل دژی مللەتێ مە هاتیە ئەنجامدان، پێدڤییە ژی رێك ل هەموو جۆرە*- بۆچوون و سیاسەت و كریارەكا شۆڤینی ل دژی خەلكێ كوردستانێ بهێتە گرتن».
دەقێ پەیاما سەرۆك بارزانی ل سالڤەگەڕا 37 یا تاوانا ئەنفالێ:
پرۆسەیا ئەنفالێ پشكەكا وان ستەم و تاوانان بوو كو ل چەرخێ بۆری ژ ئالیێ رژێما بەرێ یا ئیراقێ دژی گەلێ مە هاتیە ئەنجامدان. ژ ئەنجامێ وێ پرۆسەیا نە مرۆڤانەدا كو ب چەند قۆناغان هەموو دەڤەرێن كوردستانێ ڤەگرت، 180 هزار هەڤوەلاتیێن بێتاوانێن كوردستانێ هاتنە بێسەروشوین و شەهیدكرن. هەڤدەم ل گەل وێ چەندێ دا كیمیابارانكرن و سیاسەتا ب ئەرەبكرنێ و دەربەدەركرنێ و تێكدانا ژێرخانەیا ئابوورییا كوردستانێ و وێرانكرنا هزاران گوندان پشكەكا دی یا وان تاوانان بوون كو ل چەرخێ بۆری ژ ئالیێ رژێما ئیراقێ ل بەرانبەر گەلێ مە هاتینە ئەنجامدان.
تاوانبار كەفتنە د زبلدانا دیرۆكێ دا، بەلێ برین و شوونوارێن وێ جینۆسایدێ و ستەمێ هێشتا یێن ماین و نەهاتینە دەرمانكرن. دڤێت دەولەتا ئیراقێ قەرەبوویا ئەنفال و وێ جینۆسایدێ بكەت كو ل دژی مللەتێ مە هاتینە ئەنجامدان. هەروەسا پێدڤییە ژی رێك ل هەموو جۆرە بۆچوون و سیاسەت و كریارەكا شۆڤینی ل دژی خەلكێ كوردستانێ بهێتە گرتن. ل سالڤەگەڕا 37 یا بیرئینانا خەمگین یا ئەنفالێ باشترین وەفاداری بۆ شەهیدێن ئەنفالێ ئەوە ئەم هەموو د خزمەتكرن و پاراستنا وەلاتێ خوە د ئێكدەنگ بین و پێكڤە پاشەڕۆژەكا گەش بۆ گەلێ مە ئاڤا بكەین.
سەربلندی بۆ مالبات و كەسوكارێن شەهیدان و ئەنفالێ، هزاران سلاڤ ل گیانێ پاقژ یێ شەهیدێن ئەنفالێ و هەموو شەهیدێن رێكا ئازادییا كوردستانێ.
سەرۆك بارزانی پەیامەكا پیرۆزباهیێ ئاراستەی هەردو كەسایەتیێن سیاسی یێن ئیراقێ، نووری مالكی و د. هومام حەموودی كر ب هەلكەفتا دوبارە هەلبژارتنا وان ب سەرۆكێن حزبێن خوە.
سەرۆك مەسعود بارزانی ب رێكا نامەیەكێ پیرۆزباهی ل نووری مالكی كر ب هەلكەفتا هەلبژارتنا وی وەك ئەمیندارێ گشتیێ حزبا دەعوەیا ئیسلامی ل كۆنگرەیێ 19 یێ حزبا دەعوەیا ئیسلامی.
د نامەیەكا دی دا، سەرۆك بارزانی پیرۆزباهی ل د. هومام حەموودی كر ب هەلكەفتا دوبارە هەلبژارتنا وی وەك سەرۆكێ جڤاتا بلند یا ئیسلامی ل ئیراقێ ل خولا 14 یا حزبا ناڤبری.
دوهی دوشەمبی 14 نیسانا 2025 ل سەلاحەدین سەرۆك مەسعود بارزانی پێشوازی ل شاندەكێ هەڤپشك یێ پەرلەمانێ بریتانیا و پەرلەمانێ ئێكەتییا ئۆرۆپا كر.
د دیدارەكێدا شاندێ مێهڤان ئارامی و پێشڤەچوونا ل هەرێما كوردستانێ ل دەمێ 30 سالێن بۆری پەیدابووی بلند هەلسەنگاند و حێبەتییا خوەژی ب هەبوونا پێكڤەژیانا ئایینی و نەتەوەیی ل كوردستانێ دیاركر. هەروەسا د وێ دیدارێدا پەیاما دۆستایەتییا و هەڤسۆزیێ و پشتەڤانییا خوە بۆ دۆزا رەوا یا گەلێ كوردستانێ بۆ سەرۆك بارزانی دوپاتكر.
ژ ئالیێ خوەڤە سەرۆك بارزانی ب گەرمی ب خێرهاتنا شاندێ مێهڤان كر و كورتییەك ل دیرۆكا نەهامەتیێ و ئەو كارەساتێن ب سەر گەلێ كوردستانێ هاتین بۆ شاندێ مێهڤان بەرچاڤكر و سەرەرای ئاماژەدانێ ب دەستپێشخەری و پێشڤەچوونێن د پرۆسەیا چارەسەرییا توركیا پەیدا بووین، دوپاتی ل وێ چەندێ كر مادەم دەلیڤەیا ئاشتیێ هەیە و دەرگەهێ چارەسەرییا ئاشتییانە یێ ڤەكریە، نابیت هیچ ئالییەك پەنایێ بۆ رێكێن شەڕكرنێ ببەت.
سەرۆك بارزانی رۆناهی ئێخستە سەر فەرهەنگا پێكڤەژیانا گەلێ كوردستانێ و بەرچاڤكر كو پێكڤەژیان ژ ناخێ جڤاكێ كوردستانییە و فەرهەنگەكا دێرین یا گەلێ مەیە. هەروەسا سەرۆك بارزانی وەلاتێن رۆژئاڤای و ئەمریكا ژی كر كو ل دەمێ تەنگاڤییاندا پشتەڤانێن گەلێ كوردستانێ و هاریكار و پشتەڤانێن دۆزا رەوا یا گەلێ كوردستانێ بوون. داخواز ژی كر وەلاتێن ئۆرۆپایێ د وارێ چاكسازیێ و ئاڤەدانكرنێ و چاندنێ و پەروەردەیێ و تەكنۆلۆژیایێ و زانستی هاریكارییا هەرێما كوردستانێ بكەن.
د پشكەكا دی یا وێ دیدارێدا ل سەر رەوشا سیاسییا دەڤەرێ و دۆزا كوردی ل رۆژهەلاتا ناڤین و دیرۆكا خەباتا گەلێ كوردستانێ و پاشەڕۆژا كوردان ل دەڤەرێ كۆمەكا پرسیاران ئاراستەی سەرۆك بارزانی هاتنە كرن و سەرۆك بارزانی ژی بەرسڤا تێبینی و پرسیارێن ئەندامێن شاندێ مێهڤان دا.
نيشاندان