هەرهین محەمەد:

رێڤەبەرێ‌ نەفت و كانزایان ل پارێزگەها دهۆكێ‌ دیاركر، پانزینا سامانێ سروشتی ژ بۆ ڤێ‌ مەهێ‌ زێدەبوویە و ل سەرانسەری پارێزگەها دهۆكێ‌ و ل گەل ئیدارەیا سەربخۆ یا زاخۆ رۆژانە ل 12 پانزینخانەیان پانزین دێ‌ هێتە بەلاڤكرن.
كارزان رەئوف، رێڤەبەرێ‌ نەفت و كانزایان بۆ ئەڤرۆ گۆت: «پلانا وەزارەتا سامانێن سروشتی ئەو بوو، د مەها شواتێ‌ دا پانزینا حكومی زێدە بكەت، ل مەها بۆری بۆ مە 216 هزار لێترێن پانزینێ‌ دهاتن، لێ‌ نوكە دوجاركی زێدەبوویە و پتری 430 هزار لێتر دگەهنە پارێزگەها دهۆكێ‌، مەرەم ژێ‌ ئەوە هژمارەكا مەزن یا وەلاتیا ژێ‌ مفادار ببن و نوكە پتریا شۆفێران ئەوێ‌ بۆ ترۆمبێلان بكار دئینن، لەو ئەم پێشبینی دكەین كارتێكرنێ‌ ل سەر بهایێ‌ پانزینا بازرگانی بكەت».
گۆتژی: «بابەتێ‌ كوالیتیێ‌ گەلەك یێ‌ گرنگە، نوكە كوالیتیا پانزینا حكومی گەلەكا باشە و رۆژا دووڤچوونا كوالیتیا پانزینێ‌ ب گشتی دهێتە كرن».

دهۆك، لەزگین جوقی:

دەستەیا ڤەكۆلین و كۆمكرنا بەلگەنامەیان ل پارێزگەها دهۆكێ دیاركر، دوهی 5/2/2025 ل سولاخا دەڤەرداریا شنگالێ دەست ب ڤەكرنا گۆڕێن ب كۆم یێن ئێزدیان هاتە كرن.
شاكر میراتی، ئەفسەرێ دەستەیا ڤەكۆلین و كۆمكرنا بەلگەنامەیان ل پارێزگەها دهۆكێ بۆ رۆژناما ئەڤرۆ ئاشكرا كر، ل شنگالێ 129 گۆڕێن ب كۆم و تاكە كەسی ل دەستەیا ڤەكۆلین و كۆمكرنا بەلگەنامەیان هاتینە تۆماركرن و گۆت: «هەتا نوكە هێشتا 30 گۆڕێن ب كۆم نەهاتینە ڤەكرن».
گۆتژی: «دوهی دەست ب ڤەكرنا گۆڕێن ب كۆم هاتە كرن و هەمی ڕۆفاتێن د ناڤ دا بۆ نۆشداریا داد ل بەغدا دێ‌ هێنە هنارتن، داكو ناسنامەیێن وان بهێنە ئاشكراكرن».

رەمەزان زەكەریا:

بڕیارە هژمارەكا مامۆستا و فەرمانبەرێن سازیێن جودا جۆدا یێن حكومەتا هەرێما كوردستانێ بۆ سەر میلاكێ زانكۆیا ئاكرێ بهێنە ڤەگوهاستن.
د. لوقمان سەعید، پەیڤدارێ زانكۆیا ئاكرێ بۆ زانستێن كرداری بۆ ئەڤرۆ گۆت: «پشتی راگەهاندنا زانكۆیا ئاكرێ ژ لایێ حكومەتا هەرێما كۆردستانێ ڤە، د قووناغا دەستپێكێ دا نێزیكی 170 مامۆستا و فەرمانبەرێن وانەبێژ بوونە گرێبەست».
گۆتژی: «د قووناغا دویێ دا بەرهەڤیێن باش هاتینە كرن، پشتی سەرۆكێ دیوانا جڤاتا وەزیرێن هەرێما كۆردستانێ سەردانا ئاكرێ كری، بڕیار دا 138 مامۆستا و فەرمانبەرێن وەزارەتێن دی بۆ سەر میلاكێ زانكۆیا ئاكرێ بهێنە ڤەگوهاستن، د نوكە دا كار ل سەر رێكارێن ڤەگوهاستنا وان دهێتە كرن».
ناڤهاتی زێدەتر گۆت: «بۆ قووناغا سێیێ ژی رازیبوونا دەستپێكی هاتیە كرن، كو هژمارەكا دی یا مامۆستا و فەرمانبەران بۆ زانكۆیا ئاكرێ ببنە گرێبەست».

دهۆك، لەزگین جوقی:

راگەهاندنا سەرۆكاتیا باژێرڤانیا دهۆكێ دیاركر، تیمێن سەرۆكاتیا باژێرڤانیا دهۆكێ بەردەوامی دایە پڕۆژەیێ ڤەكرن و قێركرنا چەندین جاددەیێن ناڤخۆیی ل تاخێ‌ ئێتووتێ.
ئیسماعیل مستەفا، بەرپرسێ راگەهاندنا سەرۆكاتیا باژێرڤانیا دهۆكێ بۆ ئەڤرۆ خویا كر، پڕۆژە 17 جاددەیان ب خۆڤە دگریت، كار د قووناغا دانانا كربستۆنێ رەخێن جاددەیان دا ب دووماهی هاتیە، نوكە كار د قووناغا راستڤەكرن و دانانا بەرێن شكەستیدا دەستپێكریە و رێژا ئەنجامدانا كاری گەهشتیە 35%».
گۆتژی: «پڕۆژە ل سەر بودجەیا پارێزگەها دهۆكێ و ب سەرپەرشتیا ئەندازیارێن سەرۆكاتیا باژێرڤانیا دهۆكێ دهێتە بجهئینان».

زنار تۆڤی:

عادل ئەمین، رێڤەبەرێ‌ ناوچەداریا فەیدیێ‌ بۆ رۆژناما ئەڤرۆ دیار كر، ل ڤان چەند مەهێن بۆری، ب گوژمی نێزیكی 12 ملیار و 150 ملیۆن دیناران، هژمارەكا پڕۆژەیێن خزمەتگوزاری ل سنوورێ‌ ناوچەداریا فەیدیێ‌ هاتینە ئەنجامدان، هندەك ژ وان پڕۆژەیان د قووناغا دووماهیێ‌ دانە و هندەكان ژی كار ل سەر دهێتە كرن.
ناڤهاتی گۆت: «چێكرنا رێیا چەندین گوندان ل سنوورێ‌ ناوچەداریا فەیدیێ‌ ب گوژمێ‌ ملیارەك و 300 ملیۆن دیناران، هەروەسا مە بەرێ‌ بنیاتی بۆ قێركرنا رێیا سەرەكی یا رێڤەبەرییا هاتنوچوونا پارێزگەها دهۆكێ‌ دانایە، ل گەل قێركرنا جاددەیێن تاخێ‌ مەسیحیان و وارڤین ستی و نیوار ب گوژمێ‌ دو ملیار و 200 ملیۆن دیناران، دیسا مە دەست ب چێكرنا جۆتسایدكرنا رێیا سەرەكی یا فەیدیێ‌ كرییە، كو پێكدهێت ژ چێكرنا جاددەكا 30 مەتری یا جۆتسایدی، ب گوژمێ‌ ملیارەك و 800 ملیۆن دیناران».
گۆتژی: «د چار سالێن بۆری دا حكومەتا هەرێما كوردستانێ‌، ب تایبەتی كابینەیا نەهێ‌ گرنگییەكا مەزن ب ناوچەداریا فەیدیێ‌ دایە، كو ئیدارەكا هەڤپشكە د ناڤبەرا پارێزگەها دهۆكێ‌ و پارێزگەها نەینەوا دا، هەتا نوكە حكومەتا هەرێمێ‌ پتری 95 ملیار دیناران بۆ پڕۆژەیێن خزمەتگوزاری ل ڤێ‌ ناوچەداریێ‌ مەزاختینە، پلانا مە بۆ ئەڤ سالە ئەوە ب گوژمێ‌ نەه ملیار دیناران پڕۆژە ل ناوچەداریێ‌ بهێنە ئەنجامدان».

رەمەزان زەكەریا:

كار ل سەر هەژمارەكا رێكێن ناڤخۆیی ل سەنتەرێ ناوچەداریا دینارتە دهێتە كرن و پڕانیا وان تەمامبووینە و كەفتینە د خزمەتا ولاتیان دا، یێن مایی ژی كاركرن ل سەر بەردەوامە.
نەعمان سەلیمخان، سەرۆكێ باژێرڤانیا دینارتە بۆ ئەڤرۆ گۆت: «كابینەیا نەهێ یا حكومەتا هەرێما كوردستانێ گرنگیەكا باش دایە ناوچەداریا دینارتە، د بیاڤێ‌ چێكرنا رێكێن ناڤخۆیی دا، ب گوژمێ 687 ملیۆن و 450 هزار دیناران، هەژمارەكا جاددەیێن سەنتەر و دەوروبەرێن ناوچەداریێ هاتینە دروستكرن و هندەك ژی د قووناغا بجهئینانێ دانە».
‎ناڤبری گۆتژی: «نوكە كار ل سەر بازاڕەكێ هەڤچەرخ ل ناوچەداریێ‌ دهێتە كرن و د قووناغا بجهئینانێ دایە».