ئەڤرۆ، مەحمود نهێلی:
ژ ئەگەرێ شەرێن بەردەوامێن ل سەر دەڤەرێ و هەبوونا شوونوارێن بنگەه و بارەگایێن كەڤنێن رژێما بەرێ یا عیراقێ هێشتا مەترسیا مینان ل سەر وەلاتیێن دەڤەرا ئامێدیێ و دەڤەرێن سنورێ ب گشتی مایە و ئەڤ یەكە ژی بوویە دلگرانیا وەلاتیێن دەڤەرێ، ژ بەر وێ یەكێ ژی، زێدەباری پاقژكرنا هژمارەكا زەڤیێن مین رێژكری ل ئامێدیێ، لێ هێشتا دهێتە هژمارتن مەترسیترین دەڤەر ل سەر ئاستێ پارێزگەها دهۆكێ.
شیلان نهێلی، رێڤەبەرا گشتی یا كاروبارێن مینان ل پارێزگەها دهوكێ بۆ رۆژناما ئەڤرۆ دیار كر، هەرێما كوردستانێ ب درێژاهیا سالان جهێ شەر و ئالۆزیان بوویە، ب تایبەتی ژی شەرێ ئیراقێ و ئیرانێ، هەروەسا ل سەردەمێ شۆرشێن كوردی حوكمەتا ئیراقێ رێژەكا ئێكجار زۆر ژ مین تەقەمەنیان چاندینە و گۆت: بارا پترێ ئەڤ زەڤیێن مین رێژكری و مەترسی ل سەر دەڤەرا ئامێدیێ یە ، مە پتر ژ 200 زەڤیێن مینرێژكری ل وێ دەڤەرێ هەنە كو هاتینە تومار كرن و ب تنێ ئێك تیم ل وێ دەڤەرێ كار دكەت، ژ بەر وێ یەكێ ژی رێڤەچوونا كارێ راكرنا مینان ل وێ دەڤەرێ یا ڤەمایە.
شیلان نهێلی دیار كر، تیمێن وان شیاینە د سالا 2024 ێ دا 7 زەڤیان ژ مین و تەقەمانیان پاقژبكەن كو ژ وانا سێ زەڤی مین رێژكری بوون و چوار ژی شەرگەه بووینە و رووبەرێ وێ دبیتە 540 هزار 301 میترێن دوجاری و گۆت: د ڤان زەڤیان دا ژمارەك زۆرا مین و تەقەمانیان هاتینە دیتن و ژ وانا ژی 116 مینێن تاكە كەسی و 14 مینێن دژی تانك ل گەل 5983 پارچێن تەقەمەنیان هاتینە دیتن و ژ ناڤبرن كو سەرجەمێ وان دیتە 6122 مین و تەقەمەنی.
و دیاركر، كو ئەو سوپاسیا پارێزگاری دهوكێ و سەرۆكێن یەكەیێن كارگێری و هەركەسەكەكی هاریكار ل گەل مە دا دكەن و گۆت: ب خوەشحالی ڤە ل سالا 2024 مە چ روودانەكا پەقینا مینان نەبووینە.
دهێتە زانین ل سالا 2005 تا نوكە 7 هزار و 778 زەڤیێن مین رێژكری ل سنوورێ پارێگەها دهوكێ هاتینە تومار كرن كو رووبەرێ وێ دگەهیتە 32 ملیون میترێن دوجار و تا نوكە 40% هاتینە پاقژكرن و 60% ماینە و نەهاتینە پاقژكرن و ب تنێ د سالا بوری دا 540 هزار 301 میترێن دوجاری یێن ئەردی ژ مین تەقەمەنیا ل سنوورێ پارێزگەها دهۆكێ هاتیە پاقژكرن.
نيشاندان