سەردار یەحیا، دەڤەردارێ‌ شێخان بۆ رۆژناما ئەڤرۆ دیار كر، دو روژانە ئاكنجیێن گوندێن دكەڤنە سەر پڕۆژەیێ جۆتسایدێ لالش بۆ شێخانێ‌ گەفێن راوەستاندنا پڕۆژەی دكەن، هەكە نەهێنە قەرەبووكرن و دبێژیت: لژنەك هاتیە پێكئینان بۆ تەخمینكرنا زیانێن دكەڤنە بەر پڕۆژەیێ شێخان بۆ لالشێ‌، دیسا لژنەك بۆ پڕۆژەیێ رێكا باعەدرێ بۆ دهۆكێ‌ ژی هاتیە پێكئینان، هەردو لژنان كارێن خۆ باش كرینە و گەهشتینە قووناغێن دووماهیێ.
ناڤبری گۆت: «ئەم ب نڤیسارێن فەرمی داتایێن وان هەردو لژنان بۆ پارێزگەها دهۆكێ‌ دێ‌ هنێرین و ئەو ژی دێ بۆ وەزارەتێ هنێرن، هەكەر مەرجێن قەرەبووكرنێ ژێ بگرن، دێ هێنە قەرەبووكرن».
گۆتژی: «رێژەیا ئەنجامدانا كاری د هەردو پڕۆژەیێن دهۆك بۆ باعەدرێ‌ و شێخان بۆ لالشێ‌ گەهشتیە 30%

ئامێدیێ، مەحمود نهێلی:

دەڤەردارێ ئامێدیێ ئەگەرێن دەستپێ نەكرنا پڕۆژەیێن دەڤەرا ئامێدیێ بۆ رۆژناما ئەڤرۆ دیار كرن و دبێژیت: ژ ئەگەرێ‌ خرابیا رەوشا سەقای و وەرزێ زڤستانێ، هەتا نوكە دەست ب هەژمارەكا زۆرا پڕۆژەیان نەهاتیە كرن.
وارشین سەلمان، دەڤەردارێ ئامێدیێ دیار كر، د دووماهیا سالا بۆری دا رازیبوون ل سەر هەژمارەكا زۆرا پڕۆژەیان ل سنوورێ دەڤەردارییا ئامێدیێ هاتبوو كرن، ژ وانا، هەژمارەكا كێم كەفتینە د وارێ بجهئینانێ دا و گۆت: «پرۆژە د بیاڤێ‌ جاددە و چێكرن و سەخبێركرنا ئاڤ و كارەبێ دابوون، ژ ئەگەرێ خرابیا سەقای و بارینا بارانان هەتا نوكە ئەڤ پڕۆژە نەكەفتینە د وارێ ب جهئینانێ دا».
گۆتژی: «هیڤیدارین ئەو پڕۆژەیێن هەتا نوكە بۆ چ بەلێندەران دەرنەكەفتین، د دەمەكێ نێزیك دا ئەڤ پرسە ب داوی بهێت و هەموو پڕۆژە بكەڤنە د وارێ بجهئینانێ دا».

ل بارەگەهێ مەكتەبا سیاسی ل پیرمام، فازل میرانی، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان پێشوازی ل ستیڤ بینتەر، قۆنسلێ گشتیێ ئەمریكا ل كوردستانێ و شاندەكێ دگەلدا كر.
د كۆمبوونەكێدا رەوشا نوكە یا دەڤەرێ وئیراقێ ب گشتی و هەرێما كوردستانێ ب تایبەتی هاتە گەنگەشەكرن.
فازل میرانی سەبارەت پرسا دەنگدانا جڤاتا نوونەرێن ئیراقێ ل سەر راستڤەكرنا قانوونا بۆدجەیا گشتییا فیدرالی ئاماژە ب وێ چەندێ كر كو پێنگاڤەكا گرنگە و بزاڤەكا بۆ چارەسەركرنا هەموو كێشەیان ب دانوستاندنێ و تێكگەهشتنێ.
ژ ئالیێ خوەڤە ستیف بینتەر دوپاتكر كو ئێكڕێزی و ئێكهەلویستییا هێز و ئالیێن سیاسی دبیتە جهێ راكێشانا سەرنج و هەڤسۆزییا هەڤپەیمانییا نێڤدەولەتی ب تایبەتی ئەمریكا بۆ بەردەوامیدانێ ب هەماهەنگیێ و هاریكاریكرنێ دناڤبەرا هەردو ئالییاندا.

دهۆك، لەزگین جوقی:

دوهی 4/2/2025 رۆژا جیهانیا بەرهنگاریا نەخۆشیا پەنجەشێرێ بوو، نۆشدارەكێ دهۆكێ ژی دیار دكەت، د سالێن بۆری دا هەتا نوكە ل دهۆكێ 473 حالەتێن نەخۆشیا پەنجەشێرا زارۆكان هاتینە تۆماركرن ژ وانا ژی: 339 زارۆك ژ پەنجەشێرێ‌ قۆرتالبووینە و نوكە 134 نەخۆش چارەسەریێ وەردەگرن.
د. عەبدولرەحمان عەبدوللا محسن، تایبەتمەندێ نەخۆشیێن زارۆكان و نەخۆشیێن خوینێ یێن زارۆكان ل نەخۆشخانا كوردستان یا ئافرەت و زارۆكان ل پارێزگەها دهۆكێ دیاركر، سالانە 50 هەتا 60 حالەتێن نوو یێن نەخۆشیا پەنجەشێرێ ل نك زارۆكان ل پارێزگەها دهۆكێ دهێنە تۆماركرن و گۆت: «دەرمان و نشتەرگەری و تیشك و پشكنین و هەر پێدڤیەكا بۆ چارەسەریێ بۆ زارۆكان دهێتە كرن، ژ وان 473 توشبوویان، 339 زارۆك ژ پەنجەشێرێ‌ قۆرتالبووینە، دیسا هندی نەخۆشێ زوو بهێتە دەستنیشانكرن، زووتر نەخۆش قۆرتال دبیت».
ناڤهاتی گۆتژی: «پتریا حالەتان پەنجەشێرا خوینێ و دەماغ و گرێكێن لمفاوی و گۆلچیسكان و هەستیان و تۆرێن چاڤ ل نك زارۆكێن دهۆكێ پەیدا دبن، زارۆك هەیە دژییێ حەفتیەكێ دا تووشێ پەنجەشێرێ‌ بوویە، لێ گەلەك حالەت ژی دهێنە چارەسەركرن».

رەمەزان زەكەریا:

بڕیارە مەزنترین پڕۆژەیێ گەشتیاری ل سەر ئاستێ‌ ئیراقێ‌، ب ناڤێ‌ یۆنان ستی ل ئاكرێ بهێتە دروستكرن، پڕۆژە دێ گەلەك یێ مەزن بیت و چەندین خزمەتگوزاریا ب خۆڤە گریت.
وەبەرهێنەرێ پڕۆژەی بۆ ئەڤرۆ گۆت: «د ناڤ پڕۆژەی دا ئۆتێلەكا پێنج ستێر، هژمارەكا خوارنگەهـان، تلفریك، درێم، گۆلف، ڤیلە و یاریێن ئاڤێ دێ‌ هێنە دروستكرن، ب ئەنجامدانا ڤی پڕۆژەی دێ بزاڤا گەشتیاری ل دەڤەرێ‌ خورتتر لێهێت، ب تایبەت مانا گەشتیاران ل ئاكرێ‌«.
ئەمین سەلیم، رێڤەبەرێ گەشتوگوزارێ ل ئاكرێ بۆ ئەڤرۆ گۆت: «ژ بەر نەبوونا هۆتێل و مۆتێلان، گەشتیار ل دەڤەرێ نەدمان، لێ‌ ب ئەنجامدانا ڤی پڕۆژەی گەشتیار ژی دێ‌ شێن ل ئاكرێ‌ بمینن».
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «هەر وەبەرهێنەرەكێ‌ بهێتە ئاكرێ وەبەرهێنانێ‌ بكەت، ئەم دێ‌ كارئاسانیێ بۆ كەین، داكو ئاڤەدانیێ ل دەڤەرێ بكەت».
پڕۆژەیێ یونان ستی ل سەر رووبەرێ 446 دۆنەمێن ئەردی ب گوژمێ نزیكی 150 ملیۆن دۆلاران دێ‌ هێتە دروستكرن.

هەولێر، قائید میرۆ:

سەرپەرشتیارێ هووربینی و رێكخستنا فۆرمێن ئەردی ل وەزارەتا باژێڕڤانی و گەشتوگوزارێ‌ ئاشكرا كر، ناڤێ 200 هزار فەرمانبەرێن دی بۆ وەرگرتنا پارچەیێن ئەردی هاتیە پەسەندكرن و دبێژیت: ل نێزیك ناڤێن وان بۆ باژێڕڤانیێن سنوورێ وان دێ هێنە هنارتن و دەست ب بەلاڤكرنا ئەردی هێتە كرن.
سەربەست مەولود، سەرپەرشتێ هووربینی و رێكخستنا فۆرمێن بەلاڤكرنا ئەردی بۆ رۆژناما ئەڤرۆ دیار كر، ناڤێ 200 هزار فەرمانبەر ژلایێ سەرۆكایەتیا جڤاتا وەزیران بۆ وەرگرتنا پارچەیێن ئەردی هاتیە پەسەندكرن و گۆت: «نوكە ناڤێن بۆ وەزارەتا باژێڕڤانی و گەشتوگوزارێ هاتینە ڤەگەڕاندن، ئەم مژوولی ڤاڤارتنا ناڤێن فەرمانبەراینە، داكو ل گورەی جهێ ئاكنجیبوونا وان ل سەر باژێڕڤانیێن هەرێما كوردستانێ بهێنە بەلاڤكرن، هەر فەرمانبەرەك ل جهێ ئاكنجیبوونا خۆ دێ ئەردی وەرگریت».
سەربەست مەولود گۆتژی: «رێكارێن قانوونی تەمام بووینە، ب نڤیسارا فەرمی ناڤێن فەرمانبەران بۆ باژێڕڤانیێن وان دێ هێنە هنارتن، د دووڤ دا دێ دەست ب پرۆسێسا بەلاڤكرنا پارچەیێن ئەردی هێتە كرن، ل هندەك باژێڕڤانیان ئەرد یێ بەرهەڤە و ل دەمەكێ‌ نێزیك ل سەر فەرمانبەرێن ناڤێن وان هاتینە پەسەندكرن؛ دێ‌ هێتە بەلاڤكرن».

دلۆڤان ئاكرەیی

رێڤەبەرێ ناحیا مسێریكێ راگەهاند، نوكە ب تنێ فەرمانگەها باژێرڤانی و بنگەهێ پولیس و جێگرێ ئاسایشێ و بنگەهەكێ ساخلەمیێ كۆ ب تنێ نوژدارەك لێ هەیە و گۆت: مە پێشنیار بۆ ڤەكرنا بلەز یا فەرمانگەهێن ئاڤ و كارەب و ئاگرڤەمراندن و چاندن و بنگەهێن هاتن و چوونێ كریە دا كۆ بشێین زێدەتر خزمەتا خەلكێ ناحیا مسێریكێ بكەین و ل دەمەكێ‌ نێزیك دێ‌ مەزنترین كارگەها باجان سۆركان ل ناحیا مسێریكێ‌ هێتە دانان

سامی ئوشانا رێڤەبەرێ ناحیا مسێریكێ ل دور پرۆژەیێن خزمەتگوزاری ل سنورێ ڤێ ناحیێ گۆت: پێدڤییە گاڤێن زێدەتر بهێنە هاڤێتن ب رێكا چێكرنا پروژەیێن جودا مینا یاریگەهێن وەرزشی و خوارنگە و بازرگانی و گەشت و گوزاری ل سەر روویێ ڕووبارێ دیجلە ل سەر بەنداڤا مووسل بۆ پەیداكرنا دەلیڤێن كاری و كێمبوونا رێژا هەژاریێ ل ڤێ دەڤەرێ و گۆت: دێ كار بۆ زێدەكرنا باخچێن كەسكاتیێ كەت و باخچێ زارۆیان ژی هێتە نووژەنكرن و هێتە ڤەكرن و ئاشكرا كر، ل ناحیا مسێریكێ چێ كێشەیێن دابەشكرنا ئاڤێ نینن و كارەبا گشتی ژی مینا سەنتەرێ باژێرێ دهوكێیە.
سەبارەت چێكرنا پروژەیێن خزمەتگوزاری بۆ خەلكێ ڤێ ناحیێ گۆت: ل دەمێ هاتنا وەرزێ دابارینان ئاستەنگ دروست دبن ل پێشییا وەلاتییان و ل هندەك جهان ژی ئاڤڕا بوون پەیدا دبن و زور جاران ژی دبیتە سەدەم ژن و قوتابی نەشێن ب ئاسانی هاتن و چوونێ بكەن و ب چێكرنا رێكان جوتیارێن گوندان ژی دشێن ب ئاسانی بەرهەمێن خۆ بگەهیننە سەنتەرێ باژێران.
سامی ئوشانا رێڤەبەرێ ناحیا مسێریكێ سەبارەت ب ڤەكرنا فەرمانگەهێن میری ل سەنتەرێ ناحیێ گۆت: مە پێشنیار بۆ ڤەكرنا بلەز یا فەرمانگەهێن ئاڤ و كارەب و ئاگرڤەمراندن و چاندن و بنگەهێ هاتن و چوونێ كریە دا كۆ بشێین زێدەتر خزمەتا خەلكێ ناحیا مسێریكێ بكەین، د پلانا واندا هەیە پشتی كوژاندنا پارچە زەڤیێن چاندنێ ژلایێ لایەنێن پەیوەندیدارڤە دەست ب دابەشكرنا پارچە ئەردێن ئاكنجیبوونێ ب سەر وان كەسان بكەن و یێن مافێ وەرگرتنا وان پارچە زەڤیان ل سالێن بوری بۆ هاتیە دان بكەن.
دهێتە زانین كو ژمارەیا ئاكنجیێن ناحیا مسێریكێ‌ یێن رەسەن نێزیكی 50 هزار كەسانە كۆ ل سەنتەر و گوندێن وێ كۆ 12 گوندان دژین و جودا ژ ڤێ 10 هزار پەنابەر ل سنورێ ناحیێ د ئاكنجینە و زۆریا وان دناڤا سەنتەرێ باژێریدا دژین و پرانییا ئاكنجیێن وێ ب رێژا 98% بوسلمانن و یێن مەسیحی و ئاشووری و كلدانی و ئەرمەنی ژی د سنورێ ڤێ ناحیێدا هەنە كۆ ل گوندێن وێ دژین.

سندس سالح سلێڤانەیی:

پشتی مەسرور بارزانی سەرۆكێ حوكمەتا هەرێما كوردستانێ بڕیار دای، بۆ هەر پرۆژەیەكێ وەبەرهێنانێ پێدڤیە ب رێژەیا 75% پالێن ناڤخۆیی كاربكەن، ڤێ چەندێ پالێن دهۆكێ دلخۆشكرن و سەرپەرشتێ پرۆژەیەكی ژی گۆت: ئەڤە بڕیارەكا د جهێ خوە دا بوو، رێڤەبەرێ وەبەرهێنانێ ژی ل پارێزگەها دهۆكێ دبێژیت، وان د سالا بۆری دا مۆلەت دایە 35 پرۆژەیێن وەبەرهێنانێ و ئەو شیاینە دەلیڤەیا كاركرنێ بۆ پتری (2000) گەنجان د سالا 2024 دا دابین بكەن.

قەیس سالح، گەنجەكێ دهۆكێ یە بۆ دەمێ چەند سالانە كارێ پالەتیێ دكەت، گۆت: ئەم ب بڕیارا سەرۆكێ حكومەتێ د دلخۆش بووین و مە هەستپێكر د سالا بۆری دا كارێ مە باشتر بوو، هیڤیا من ئەوە د ئەڤ سالەدا هێشا بڕیار د بەرژوەندا پالە و كرێكاران دا دەربكەڤن.
نوری خدر، پالەكێ دی یە، گۆت: ئەم گەلەك ب وێ بڕیار د دلخۆش بووین و هەتا رادەیەكی كارێ مە باشتر لێ هات و ئەم ب هیڤی نە د ئەڤ سالەدا هێشتا باشتر لێ بهێت.
سەرپەرشتێ پرۆژەیەكێ وەبەرهێنانێ یە ل دهۆكێ وی ژی گۆت: مە پێگیریەكا باش ب وێ بڕیارێ كریە، چونكو د بەرژەوەندا پالە و كرێكارێن مە دابوو، ئەو ژی هەموو خەلكێ دهۆكێ بوون و ل هندەك پرۆژەیان مە ب رێژەیا پێشتر ژ 75% پالێن ناڤخویی داینە كاری و ل دەستپێكا هەر پرۆژەیەكی مە بزاڤ كرینە پالێن خوە یێن ناڤخۆیی فێری وی كاری بكەین یێ كو هەتا نوكە ژ لایێ پالێن بیانی ڤە دهاتە ئەنجامدان و ئەڤ چەندە پێنگاڤەكا گرنگ بوو.
د. هەڤال سدقی، رێڤەبەرێ گشتیێ‌ وەبەرهێنانێ ل پارێزگەها دهۆكێ گۆت: بڕیارا سەرۆكێ حوكمەتا هەرێما كوردستانێ گەلەكا گرنگ و د جهێ خوە دابوو، لەورا مە پێگیریەكا باش پێكر، لەورا ئەم شیاین دسالا بۆری دا دەلیڤەیا كاركرنێ بۆ پتر ژ (2000) پالێن ناڤخۆیی دابین بكەین و هیڤیا مە ئەوە د ئەڤ سالەدا وێ هژمارێ گەلەك زێدەتر لێ بكەین.