دیدار، سالار محەمەد دۆسكی:

3 – 5

رەمەزان بۆتی، گۆت: وەك پێشتر مە ئاماژە پێكری كو بەری ببمە پێشمەرگە ئەم رێكخستی بوون و مە كارێ‌ رێكخستنێ‌ ل گەل خودێ‌ ژێ‌ رازی محەمەد سالح بۆتی و فەریق فاروق دكر، و مە گەلەك بەلاڤووك بەلاڤەدكرن و جارەكێ‌ بیرا من دهێت وێنەك سەدام ل بەرۆشكێ‌ بوو، و ئەز و هەڤالەك خوە بناڤێ‌ خالد بێسفكی خودێ‌ ژێ‌ رازیبت چووین ب قەمێ‌ مە دراند و ئەم ب ترۆمبێلا وی چووین، و ئەوێ‌ چالاكیێ‌ گەلەك دەنگ ڤەدا وی سەردەمی ل دهۆكێ‌، و گەلەك بەلاڤووك مە گەهاندینە دهۆكێ‌ و من رادەستی مەجیدێ‌ پسمامێ‌ خوە دكرن وی دەمی رێكخستیان هەمیان ئێك دو نەنیاسین، چونكە ئەگەر ئاشكرا ببانە دا هەمی نەهێنە ئاشكراكرن، و بتنێ‌ مرۆڤی دو هەتا سێ‌ كەسان نیاسین، ل بێسرێ‌ بتنێ‌ عەبدولكەریم رەئووف و سەعید یونس هەڤالێن من بوون، و ترس بوو مە نەوێریا گەلەك بەلاڤ بكەین، وی دەمی گەلەك بەلاڤوكان دەنگڤەدان و دا بێژن بەلاڤووكەكا ل جهەكی هاتیە دیتن و ئەم یا هار بووی، جارەكێ‌ پێشمەرگە هاتە بازارێن عەسری ل بەرۆشكێ‌ جارەكێ‌ هاتنە تاخێ‌ گەلی و جارەكێ‌ هاتنە حەفت تەبەقیێ‌ و دەست و پێن زێرەڤانی گرێدان و چیایی ڕا گەهاندە لژنا دهۆكێ‌.
زیندانیێ‌ سیاسی رمەزان بۆتی گۆت: بەری ببمە پێشمەرگە ل سالا 1983 شەهید محەمەد سالح بۆتی و سلۆ بەندی و سادق گەلناسكی هاتنە گوندێ‌ مە وی دەمی كێم ژی بوون، و هاتنا وان ئەو بوویە دا خارنەكێ‌ خوە و چن و سەلامێ‌ برایێ‌ من ل گەل چەند پسمامێن مە شەهید محەمەد سالح هنارتنە سەرێ‌ گری، و گۆتێ‌ هوون زێرەڤانیێ‌ ل مە بكەن و بتنێ‌ دێ‌ ئاڤەكێ‌ ل سەر لەشێ‌ خوە كەین، و خوارنەكێ‌ خوەین و چین، ژ نشكەكێ‌ ڤە سەلامێ‌ برایێ‌ من ئەو دبینن لەشكر گەلەك نێزیكی گوندی بوویە، و هەژمارەكا هەرە زوو و ئێكسەر سەلامێ‌ برایێ‌ من دچیتە نێزیكی گوندی و چەند گولەكان دهاڤێت و محەمەد سالح دەردكەڤیت، و گۆت خێرە گۆتێ‌ پسمام لەشكرێ‌ ئیراقێ‌ گەلەك نێزیكی گوندی بوویە، و محەمەد سالح و عیسا بۆتی چوونە دەردورێن گوندی و ئەم رابووین گوندێن دورپێچ كریە، بابێ‌ من گوت ئەڤ جارە یا مە ب دووماهی تەقە ل گوندی هاتیەكرن و دیسا دەنگۆباس گەهشتینە حوكمەتێ‌ كو پێشمەرگە هاتیە گوندی ئەڤجا دبینم ئەڤە دووماهی یا مە بیت، ژ نشكەكێ‌ ڤە مە دیت عومەر زێوەی برایێ‌ عیسا زێوەی ب ترۆمبێلا خوە ژ زێوێ‌ هات و بەرەف دهۆكێ‌ ڤە چوو و من گۆتە بابێ‌ خوە ئەگەر عومەر بوری ئەژی دێ‌ دناڤا پەزی دا خوە دەرباز كەم، بابێ‌ من گۆت كێشە ل گوندێ‌ مە یە و لەشكر چ نابێژیتە عومەر و دەربازبوو و خوە ئێك لەشكر ژ جهێ‌ خوە نەلڤی، من گۆتێ‌ باب ئەژی دێ‌ چم كێ‌ هاش من هەیە و ل تەرەكتورێ‌ سوار بووم و چووم هەتا نێزیك بووم دا ژ گوندی دەركەڤن من دیت ئێك ژ لەشكرێن ئیراقێ‌ هات گازی من كر و گۆت راوستە، گۆت وەرە بچنە دەف ئەفسەری و گۆت: تو زمانێ‌ عەرەبی زانی من گۆتێ‌ نەخێر گازی كرە جندیەكێ‌ ئێزدی ئەو ی كوردی زانی ودامە سووندێ‌ كو راستیێ‌ بێژم و من ژی گۆتێ‌ سووند راستیێ‌ بێژم گۆت راستیێ‌ نەبێژی دێ‌ تە كوژم و گۆت ئەو چ رەمی بوو هاتیەكرن من گۆتێ‌ ئەزێ‌ نڤستی بووم و من ترەكتور هەیە و من كرێكار هەنە دبمە باكوزێ‌ و رابووم من لەشكر دیت، و من چ كێشە ل گەل كەسەكێ‌ نینە و هەما پشست راستی ئەز دەركەتیمە و ئێكسەر زلەهەك دانا من و گۆتە جندیان ئەڤی ببنە سەرێ‌ ملێ‌ و پشتی ڤەگوهاستیمە وی جهی من دیت ئێكێ‌ بابوخكی ئەمن بوو بناڤێ‌ جمیل گۆت كورو تە خێرە بناڤ چاڤێن خوین من گۆتێ‌ من كرێكار ل باكوزێ‌ هەنە و دا چمە كرێكارا ئەز گرتیمە گۆت كورو من چەند نانێ‌ بابێ‌ تە خواریە و هەمان دەم ئەفسەرەكی گۆتێ‌ جەمیل تو ڤی دنیاسی؟، گۆت بەلێ‌ گەلەك خوش مرۆڤن و خوش مالن، ئەوی ئەفسەری گۆت چ برا یان پسمامێن تە نە پێشمەرگە نە من گۆتێ‌ نەخێر گۆتێ‌ جەمیل چ مرۆڤێن نێزیكی ڤی نە پێشمەرگە نە گۆتێ‌ نە، گۆت دێ‌ باشە جەمیل بلا ئەڤە ل گەل تەبیت چونكە لەشكری لڤین كریە بۆ ناڤ گوندی و ئەگەر ئەڤە بچییتە ناڤ گوندی دێ‌ لەشكر وی دەستەسەركەن و ئێشینن، جەمیل بابوخكی گۆت باشە مال میرات ما تە روحا خوە نەڤێت ب قورئان ڤێرە نەبام دا تە كوژن و هەمان دەم مە دیت شەش فرۆكێن دوژمنی ژ لایێ‌ دهۆك و پیرۆمەرا ڤە هاتن و دەر دورێن گوندی زڤرین و زیلێن عەسكری هاتن و تەنشت گوندی راوستیان و گۆتنە لەشكری وەرنە خوارێ‌، ئەزێ‌ ل گەل جەمیل و ژ نشكەكێ‌ ڤە من كەسەكێ‌ دی دیت و ناڤێ‌ وی نابێژم گۆتە جەمیل ئەو كیە ل گەل تە؟، جەمیل گۆتێ‌ هەژارەكە هندەك كرێكار هەنە دا چتێ‌ ل باكوزێ‌ وی برادەری، گۆت ئەو هەژارە و هەمان دەم ئەو ئەفسەرێ‌ ل گەل من ئاخفتی و قوتایم ل بەرا مە یێ‌ چیت و ئەوی ئاگەه ژ بابەتی هەبوو و ئەوی برادەری گۆتە ئەفسەری كا بێژێ‌ محەمەد سالح بۆتی و عیسا بوتی چیێن وی نە؟، ئەو ئەفسەر ئێكسەر زڤری و گۆت تو درەوا ل گەل من دكەی؟ و هەمان دەم پێنەكا بهێز دانا من و ناف چاڤێن من هەمی كرنە خوینو پیاڤە هاتە سەر سینگێ‌ من و قوتام و ئێكسەر گۆتنە فرۆكەكێ‌ دادە و ژ نشكەكێ‌ ڤە من ئاگەهـ ژ خوە هەبوو، كو دەست و پێن من دگرتینە، هەمان دەم شەر ل شاوریكێ‌ دروست بوو و ئەو لەشكر ب فرۆكێ‌ چوونە شاوریكێ‌ و ب مودرعێ‌ ئینامە لیوا دهۆك و ئەز و ئێكێ‌ باكوزی ناڤێ‌ وی عەبدولقادر بوو بابێ‌ وی دوكانا ئامیرێن كارەبێ‌ هەبوو، و ئێك ژ بانسورا ئینا بوو بناڤێ‌ مەعدان ناسناما وی یا خەلەت بوو و یێ‌ باكوزی دەستیردانا وی یا لەشكریێ‌ ب دووماهی هات بوو، هەمان دەم مە دیت چەند لەشێن لەشكری ژ فرۆكێ‌ ئینانە خوار و جندیەكی دیتم و ئێكسەر ئاخفتنێن كرێت گۆتن و هەیڤا رەمەزانێ‌ بوو و یێ‌ ب رۆژی بووم وی جندی بەرێ‌ كلاشینكوفا خوە دا من و كێشا و گۆت رەنگە مرۆڤێن ڤی ئەڤ جندیە كوشت بیت وی ئەفسەری ل جندی حەیتان و گۆتێ‌ رەمەزانە و روونە خوار، بیرا من هات جەمیل بابوخكی گۆت رەمەزان من گەلەك نانێ‌ بابێ‌ تە خواریە و بووتە بێژم هەما تە ئاخفتنێن خوە گوهارتن دێ‌ تە سێدارەدەن و هشیار بی ئاخفتنێن خوە نە گوهورە و دێ‌ تە قوتن و كارەب كەن بخوە زولام بە و مادێ‌ منێ‌ گران بوو بەرامبەر عەبدولقادر و مەعدانی، و دوڤدا ئەم برینە ئستخباراتا زاخو ئەم برینە سەرێ‌ گوندكی وێرێ‌ ئاڤاهیەكێ‌ سپی هەبوو و ئستخباراتا زاخۆ وی ئاڤاهی دا بوو.