سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ سەرەرای پیرۆزباهیێ ل خەلكێ ئیراقێ و هەرێما كوردستانێ ب دەنگدانێ ل سەر راستڤەكرنا قانوونا بودجەی ل جڤاتا نوونەرێن ئیراقێ، راگەهاند: دێ قانوونێن زێدەتر بۆ زێدەتر خزمەتا خەلكێ ئیراقێ و هەرێما كوردستانێ دەركەین.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ل تۆرا جڤاكییا فەیسبووكی پەیامەك ل دۆردەنگدانێ ل سەر راستڤەكرنا پڕۆژەقانوونا بودجەی ل جڤاتا نوونەرێن ئیراقێ بەلاڤكر و تێدا ب وێ هەلكەفتێ پیرۆزباهی ل خەلكێ ئیراقێ و هەرێما كوردستانێ كر.
ڤیان سەبری گۆت» دەنگدان ل سەر راستڤەكرنا قانوونا بودجەی، دێ پەیوەندیێن د ناڤبەرا حوكمەتا هەرێما كوردستانێ و حوكمەتا فیدرالی ب هێز كەت، ب هێزبوونا پەیوەندییان ژی دێ خزمەتا كەرتێ پترۆلێ و بلندكرنا داهاتێن فیدرالی كەت ل گەل كێمكرنا كورتئینانا بودجەی ل گەنجینەیا فیدرالی».
سەرۆكا فراكسیۆنا پارتی دیموكراتی كوردستان ئاماژە ب وێ چەندێ ژی كر» ب رێكا لژنەیەكا شیرەكارییا نێڤدەولەتییا تایبەتمەند، دێ تێچوویێ دەرئینانا پەترۆلێ ژ زەڤیێن پەترۆلی یێن هەرێما كوردستانێ ب شێوەیەكێ دادپەروەرانە و یەكسان هێتە دیاركرن و ب رێكا كۆمپانییا (سۆمۆ) و بەندەرێ جەیهان یێ توركی دێ هێتە هنارتن».
ڤیان سەبری سوپاسییا سەرۆكێ جڤاتا نوونەرێن ئیراقێ و فراكسیۆنان و ئەندامێن لژنەیا دارایی ل جڤاتا نوونەران كر بۆ پشتەڤانییا وان ل دەربازكرنا قانوونێ و گۆت» هەماهەنگییا بلند دناڤبەرا حوكمەتا فیدرال و حوكمەتا هەرێما كوردستانێدا بلندد هەلسەنگینین و دێ بزاڤێن دەستكەفت و تێكگەهشتن و دەركرنا قانوونێن نوو بین بۆ خزمەتا بەرژەوەندییا گشتییا ئیراقێ و هەرێما كوردستانێ».

جێگرێ سەرۆكێ جڤاتا نوونەرێن ئیراقێ راگەهاند: هیچ گرفتەك ل پێشبەری هنارتنا پەترۆلا هەرێما كوردستانێ نەما.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ د كۆنگرەیەكێ رۆژنامەڤانیدا گۆت» هەموو ئالییەك گەهشتنە وێ باوەریێ كو دڤێت قانوونا بودجەی بهێتە راستڤەكرن، نوكە هیچ گرفتەك ل پێشبەری هنارتنا پەترۆلا هەرێما كوردستانێ نەما».
شاخەوان عەبدوللای رۆهنكر ژی» ل نێزیك دێ دەست ب هنارتنا پەترۆلا هەرێما كوردستانێ هێتە كرن و ئارمانجا مە ئەوە كێشەیا مووچەی نەمینیت و ئێدی نەبیتە دەنگوباسێ رۆژانە».
جێگرێ سەرۆكێ جڤاتا نوونەرێن ئیراقێ باس ل وێ چەندێ ژی كر» محمەد شیاع سۆدانی، سەرۆك وەزیرێن ئیراقێ ب مە راگەهاند كو ئەڤسالە وەكو سالا بۆری نابیت و پشتەڤانییا شاندێن هەردو ئالییان دكەم».

فەرماندارێ گشتی یێ هێزێن سووریا دیموکرات دیار کر، ئەو نە پارچەیەکن ژ شەڕێ د ناڤبەرا تورکیا و پەکەکێ دا و وان دڤێت د سووریایەک نوو دا بژین و نها هەڤپەیمانیا نیڤدەولەتی د ناڤبەرا وان و شامێ دا ناڤبژیڤانیێ دکەن و ئەو ل دژی پارچەکرنا سووریێ نە.

مەزلوم عەبدی فەرماندارێ گشتی یێ هێزێن سووریا دیموکرات دیار کر، وەکو هێزێن سووریا دیموکرات وان دڤێت سیستەمێ بهێت یێ سووریێ سیستەمەک نە ناڤەندی بیت و سیستەمەک دیموکراتی بیت، کو هەموو خەلکێ سووریێ بشێن پێکڤە وەکو برا بژین و گۆت: (پێویستیا خەلکێ سووریێ ب ئاشتیێ و پێکڤەژیانێ هەیە، ژ بەر ڤێ یەکێ ژی دڤێت سیستەمێ نوو یێ سووریێ سیستەمەک دیموکراتی بیت و دڤێت سیستەمەک ناڤەندی ژی نەبیت و وەکو کورد وان دڤێت د سیستەمەک وەسا دا جه بگرن و ژ بۆ ڤێ یەکێ ژی ئەو نها ب رێیا ئەمریکا و وەلاتێن دی یێن هەڤپەیمان ل گەل شامێ دانوستاندنان دکەن).
فەرماندارێ گشتی یێ هێزێن سووریا دیموکرات ئەو یەک ژی دیار کر، وەکو هێزێن سووریا دیموکرات ئەو نە پشکەکن ژ شەڕێ د ناڤبەرا تورکیا و پەکەکێ دا، بەلکو وان دڤێت پرسێن خوە ل گەل شامێ چارەسەر بکەن و ژ بۆ ڤێ یەکێ ژی نها دەست ب دانوستاندنان کرینە و وەلاتێن هەڤپەیمان ب تایبەتی ژی ئەمریکا، فرەنسا، ئەلمانیا و بریتانیا رۆلەک گەلەک باش دگێرن و پشتەڤانیێ ل مافێن رەوا یێن گەلێ کورد ل سووریێ دکەن و گۆت: (وەکو کورد ئەم ل دژی پارچەبوونا سووریێ نە، بەلکو مە دڤێت سووریا نوو سووریایەک دیموکراتی بیت و سیستەمەک مۆدێرن بیت و رێزێ ل مافێن مرۆڤی بگریت، رێزێ ل هەموو وان پێکهاتەیان بگریت یێن ل سووریێ دژین و ژ بۆ ڤێ یەکێ ژی وەکو کورد و وەکو هێزێن سووریا دیموکرات ئەم ل گەل شامێ دانوستاندنان دکەین).
سەبارەت ب سەربازێن ئەمریکا یێن ل سووریێ ژی ناڤهاتی دیار کر، هێشتا مەترسیا داعشێ هەیە، ب تایبەتی ژی پشتی ژناڤچوونا رژێما بەشاری ل گەلەک دەڤەرێن سووریێ رێکخستنا تیرۆرستی یا داعشێ دەست ب کریارێن خوە کریە، ئەو یەک ژی نیشا ددەت نها مەترسیا داعشێ زێدەتر بوویە و هەکە رێگری نەهێتە کرن داعش دشێت جارەکا دی ببیتە مەترسی ل سەر سووریێ و وەلاتێن دی یێن دەڤەرێ و گۆت: (ژ بەر ڤێ یەکێ ژی دڤێت هێزێن ئەمریکا ل سووریێ بمینن، مانا هێزێن ئەمریکا ژ بۆ پاشەرۆژا سووریێ گەلەک گرنگە و وەکو گەلێ کورد ئەم دخوازین هێزێن ئەمریکا ژ بۆ ئارامیێ و ئاشتیێ ل سووریێ بمینن و ئەو یەک د بەرژەوەندیا ئەمریکا دایە).