زاخۆ، دلۆڤان هالۆ:

لقێ‌ هەشت یێ‌ پارتی ل زاخۆ ب هەلكەفتا 55 سالیا دامەزراندنا ئێكەتیا نڤیسەرێن كورد، ڕێز ل ئەندامێن ئێكەتیا نڤیسەرێن كورد یێن سنوورێ ئیدارەیا سەربخوە یا زاخۆ گرت.
نازدار عارف، بەرپرسا پشكا ڕەوشەنبیری یا لقێ‌ هەشت بۆ ڕۆژناما ئەڤرۆ گۆت: «ب هەلكەفتا 55 سالیا دامەزراندنا ئێكەتیا نڤیسەرێن كورد، مە ب فەر زانی ئەندامێن ئێكەتیا نڤیسەرێن كورد یێن زاخۆ، ل بارەگایێ لقێ‌ هەشت كۆمڤە بكەین و ڕێزێ ل خامە و خزمەتا وان یا چەندین سالان بگرین».
بەرپڕسا پشكا ڕەوشەنبیری یا لقێ‌ هەشت گۆتژی: «هەر ب ڤێ هەلكەفتێ مە دیوانا 10 بەرگی یا هەلبەستڤانێ خودێ ژێ ڕازی سەلمان كۆڤلی پێشكێشی وان كر، ئەم هیڤیدارین نڤیسەرێن مە ل سەر خزمەتا خوە یا نڤیسینێ بەردەوام بن».

هەولێر، قائید میرۆ:

ئەندامەكێ فراكسیۆنا پارتی ل پەرلەمانێ ئیراقێ رەتكر چو پڕۆژە بۆ راستڤەكرنا قانوونا خانەنشینیێ هاتبنە بەرهەڤكرن و دبێژیت: زەحمەتە ڤێ خۆلا پەرلەمانی قانوونا خانەنشینیێ بهێتە راستڤەكرن.
سیپان شێروانی، ئەندامێ فراكسیۆنا پارتی ل پەرلەمانێ ئیراقێ بۆ رۆژناما ئەڤرۆ دیار كر، راستە نیەتەك هەیە بۆ راستڤەكرنا قانوونا خانەنشینیێ ل ئیراقێ، بەلێ هەتا نوكە هەر گۆتنە و چو پڕۆژە نەهاتینە پێشكێشكرن، ب مەرەما راستڤەكرنا قانوونا خانەنشینیێ و گۆت: «زەحمەتە ڤێ خۆلا پەرلەمانی قانوونەكا وەسا گرنگ بهێتە راستڤەكرن، ژ بەركو تەمەنێ پەرلەمانێ ئیراقێ بەر ب دووماهیێ دچیت و راستڤەكرنا قانوونەكا وەسا گرنگ ژی پێدڤی ب هووربینیان هەیە و ئەگەر بهێتە پەرلەمانی دێ گەلەك ڤەكێشیت، هەتا دهێتە ئێكلاكرن، ئەڤ سالە هەلبژارتن دێ هێنە كرن، لەو باوەر ناكەم دەم هەبیت بۆ راستڤەكرنا چو قانوونێن گرنگ».
ل گورەی دووڤچوونەكا رۆژناما ئەڤرۆ، بەرهەڤی دهێنەكرن بۆ راستڤەكرنا قانوونا خانەنشینیێ و ئەگەر سەر بگریت، گوهۆڕینێن بەرچاڤ ل بڕگە و ماددەیێن قانوونا خانەنشینیێ دێ‌ هێنە كرن، ب تایبەتی دێ تەمەنێ خانەنشینكرنا فەرمانبەران ڤەگەڕیت بۆ 63 سالیێ و ئەڤا نوكە هاتیە بجهئینان نامینیت، بەلێ دیار نینە دێ چارەنڤیسێ فەرمانبەرێن نوكە دهێنە خانەنشینكرن بەر ب كیڤە چیت.

رەمەزان زەكەریا:

د چارچوڤێ بجهئینانا پڕۆژەیێن ئاڤا ڤەخوارنێ دا ل سنوورێ دەڤەرداریا ئاكرێ، پڕۆژەیێ ئاڤا گوندێ باشقال رەوەند ب دووماهی هات.
ئەندازیار زرار ئەحمەد، رێڤەبەرێ ئاڤا ئاكرێ بۆ ئەڤرۆ گۆت: «كابینەیا نەهێ یا حكومەتا هەرێما كوردستانێ گەلەك گرنگی ب سامانێ ئاڤێ دایە، داكو ئاریشەیا ئاڤێ‌ ل هەمی دەڤەران چارە ببیت».
ناڤبری گۆتژی: «پڕۆژەیێ ئاڤا گوندێ باشقال رەوەند ل ئاكرێ ب دووماهی هات، ئەڤ پڕۆژە ژ لایێ رێڤەبەریائاڤا ئاكرێ ب رەنگەكێ راستەوخۆ دهاتە بجهئینان، پڕۆژە ژ كۆلانا بیرا ئاڤێ و دانانا تۆڕێن ئاڤێ و دروستكرنا ئاڤاهیێ بیرێ و راكێشانا هێلا كارەبێ پێك دهێت و ئێدی ئاریشەیا كێمئاڤیێ ل گوندێ ناڤبری دێ‌ چارە بیت».

ئامێدیێ، مەحمود نهێلی:

كار د چێكرن و سەخبێركرنا پڕۆژەیێ ستراتیژی یێ رێكا گەلیێ بالندا بۆ سیدان بەردەوامە و نوكە قووناغا دانانا دیوارێن پالپشت ب دووماهی هاتیە و دەست ب قووناغێن د دووڤ دا هاتیە كرن.
رزگار عوبەید، رێڤەبەرێ ناوچەدارییا شێلادزێ‌ بۆ رۆژناما ئەڤرۆ دیار كر، ئەڤ پڕۆژە ئیكە ژ وان پڕۆژەیێن گرنگ و ستراتیژی یێن ل دەڤەرێ‌ دهێنە بجهئینان و گۆت: «مەسرور بارزانی، سەرۆكێ حكومەتا هەرێمێ‌ ل سالا بۆری بەرێ بنیاتی بۆ دانابوو، دیسا پڕۆژە ب گوژمێ پتر ژ 24 ملیار دیناران دهێتە بجهئینان».
ناڤهاتی گۆتژی: «نوكە قووناغا دانانا دیوارێن پالپشت ب دووماهی هاتیە، قووناغا راكرنا جاددەیا كەڤن و بەرفرەهكرنا وێ دەسپێكریە و درێژاهیا وێ‌ 14 كیلۆمەترن».
دیار ژی كر، رۆناهی بۆ جاددەیێ هەتا دگەهیتە گوندێ سیدان دێ‌ هێتە دانان و گۆت: «د قووناغێن دووڤ دا، ئەو جاددەیە دێ گەهیتە گوندەوارێن دەڤەرا رێكان و نێروە و دوسكی ژووریان، هەروەسا ب رێكا چێكرنا پرەكێ ب دەڤەرا مزووری ژووریان ڤە دێ هێتە گرێدان و ب رێكا ڤێ جاددەیێ خزمەتەكا باش یا دەڤەرێ دێ هێتە كرن و دەستێ ئاڤەدانیێ دێ گەهیتە تەڤایا گوندێن دەڤەرێ».

رەمەزان زەكەریا:

ل ئاكرێ ژ ئەگەرێ دروستكرنا جاددەیا سەرێ گرین هژمارەكا گۆڕێن گوڕستانا پیربانێ هاتینە تێكدان، بەلێ دێ هەموو هێنە دروستكرن ڤە.
ئەندازیار هەوار ئادەم، جێگرێ سەرۆكێ باژێرڤانیا ئاكرێ بۆ ئەڤرۆ گوت: «ئەو رێكا دچیتە سەرێ گری راستە بوویە ئەگەرێ تێكدانا هژمارەكا گۆڕان ژ ئەگەرێ هاتنەخوارا گەلەك كەڤران، بەلێ باژێرڤانی دێ ب ئەركێ دروستكرنا وان گۆڕان و لادانا وان كەڤرێن كەڤتینە سەر گوڕستانێ رابیت».
ناڤبری گۆتژی: «ئەگەر خودانێن وان گۆڕان بخوازن گۆڕێن وان ژ بۆ گورستانا نوی یا ئاكرێ دێ هێنە ڤەگوهاستن، ئەم ب هەمی رەنگان د گەل وەلاتیێن خوداینە و ئەو جاددەیا دهێتە دروستكرن، جاددەیەكا پێدڤییە و دێ بیتە ئەگەرێ كێمكرنا قەرەبالغیێ ل سەرێ گری

شێخان، بارزان مزووری:

مەهران نێروەی، رێڤەبەرێ ناوچەداریا قەسرۆكێ‌ بۆ رۆژناما ئەڤرۆ دیار كر، حكومەتا هەرێما كوردستانێ گرنگیەكا مەزن دایە رۆلێ ئافرەتێ، لەوما وەزارەتا سامانێن سروشتی ب هەڤكاری ل گەل ئیدارا دەڤەرداریا شێخان دەست ب ڤەكرنا خولێن پیشەیی بۆ ئافرەتێن دەڤەرێ‌ كریە، داكو فێری كاری ببن و بشێن بۆ خۆ كار بكەن.
ناڤبری گۆت: «وەزارەتا سامانێن سروشتی یا حكومەتا هەرێما كوردستانێ مەزنترین دەلیڤەیا كاری بۆ ئافرەتێن دەڤەرا قەسرۆكێ‌ دابینكریە، د ئێكەم قووناغ دا خولەكا دروارێ‌ بۆ 60 ئافرەتان ڤەكریە ل گەل دابینكرنا ئامیرێن كاری، داكو ببنە خودان كار».