عومه‌ر سندى/ فریزلاند
خوه‌نشاندان (Admonstraition)، ئانكو داخوازكرنا هنده‌ك مافان و پێداویستیان ژ ده‌ستهه‌لاتداران یا جهه‌ك ده‌ستنیشانكر ب شێوه‌یه‌ك ئاشتیانه ئارامانه هێمنانه دور ژ هه‌موو جۆرێن زڤراتى و دژوارى و توندوتیژێ ئه‌گه‌ر ژ ئه‌ڤى چارچووڤه‌ى یا ن ئه‌ڤى په‌روازه‌ی ده‌ركه‌ت نابێژنێ خوه نیشادان و بها و ئارمانجێن خوه ژ ده‌ستدده‌ت و به‌ر ب ئاقاره‌ك دنڤه دچه. ناڤه‌ك دن لێ تێ كرن وه‌ك راپه‌رین یانژى سه‌رهلدان یانژى كۆده‌تا و شۆره‌شا چه‌كدارى هه‌تانى دگه‌هه به‌رهه‌لاى و تیرۆرێ خوه‌نیشادانێن ئاشتیانه ل پرانیا وه‌لاتێن جیهانێ دئێنه ئه‌نجامدان, پشتى وه‌رگرتنا موله‌تێ و ده‌ستنیشانكرنا ده‌مى ژ ئالیێ جهێن په‌یوه‌ندیدار داخوازیێن خوه ب شێوه‌یا بیرخستووك و ب ئارامى ژ ئالیێ نوونه‌رێن خوه نیشاده‌ران ڤه پێشكێشى جهێن شۆله‌ژێ و په‌یوه‌ندیدار دئێنه‌كرن و هه‌ردیسا ب شێوه‌ك ئاشتیانه درووشم و سلۆگان دئێنه‌دان هه‌لبه‌ت پشتى كو خوه‌نیشاده‌ر دگه‌هنه خالا ده‌ستنیشانكرى پێشوازیا خوه نیشانده‌ران ژ ئالیێ په‌یوه‌ندیداران ڤه تێكرن ب كورتى تو دكارى بێژیه ڤێ خوه‌نیشادان یان خوه‌پێشاندان. ئه‌گه‌ر ئه‌ڤه خوه‌نشاندانبه ل گۆره‌ى یا پره‌نسیپێن مه ل سه‌رى ئانینه زمان گه‌لۆ پا ئه‌ڤا دوهى و پێر و ئه‌ڤرو ل باشۆرێ كوردستانێ ب تایبه‌تى ل ده‌ڤه‌رێن سلێمانى, هه‌له‌بچه, راپه‌رین, گه‌رمیان, كویسنجه‌ق تێ كرن چیه؟ ئه‌م دكارین بێژینێ (خوه‌نیشادان)؟؟ بێگومان نه‌خێر و ل گۆره‌ى هه‌موو پیڤه‌ران ئه‌ڤا تێ كرن ژ چارچووڤێ خوه‌نیشادانێن ئاشتیانه ده‌ركه‌تیه و دكارین بێژینێ كارێن توندوتیژى و دژوارى violent acts)) یانژى به‌ر هه‌لاى كو ب مخابنیڤه ئه‌ڤێ دبێژم. خه‌لك هه‌ژاره راسته, بێ مه‌هانه‌یه راسته, بێ گاز و ئه‌لكتریكه ئه‌و ژى راسته. گه‌لۆ ژ مافێن ویه ب رێیا خوه‌نیشادانێ ئاشتیانه و سڤیل داخوازا مافێن خوه بكه؟ به‌لێ بێگومان ژ مافێن مه هه‌میانه وه‌لاتى ژ ئاڤا رووبارێن كوردستانێ مافدارتره، به‌لێ نزانم چما ئه‌ڤ وه‌لاتیێ به‌لنگازێ خوه‌دى مافێ خوه‌ى ره‌وا خوه ره‌ش و كرێت دكه؟ چما بخوه پێكولێ دكه مافێن خوه یێن ره‌وا ژ ده‌ستبده ب راستى سه‌یر و سه‌مه‌ر و ئنتیكه‌یه ئه‌رێ گه‌لۆ چما تو روویه‌كێ خوه یێ شارستانى نیشا جیهانێ ناده‌ى؟ ئه‌رێ چما تو دلۆڤانى و به‌زه‌ییا جیهانێ ژبۆ ئالیێ خوه راناكێشى؟ كو تو كه‌سه‌ك خوه‌دى مافى. یانژى چما تو بهێلى كه‌سانه‌ك كیندار ل سه‌ر ده‌ستهه‌لاتا كوردى ل پێشچاڤێن ته ئاراسته‌یا دروستا خوه‌نیشاندانان بگوهۆرن و مه‌ره‌مێن خوه ل سه‌ر ملێن خوه‌نیشانده‌ران بجه بینن و هه‌ر دیسان ته بكنه قوربانێ كین و مه‌ره‌مێن خوه دڤیا وه‌لاتیێ كورد د ئاسته‌كى مه‌زنێ هشیاریێ دابا تشته‌ك دن دخوازم بینم زمان ب راستى كانێ چه‌ند ب خه‌م كه‌تم ژبۆ كه‌سانێن بووینه قوربان و گیانێ خوه ژ ده‌ستداین و جه‌رگێ دایكێ وان سۆتى ب قاسى وێژى ژبۆ راگرتنا په‌خشێ كه‌نالان و هه‌ر ده‌زگه‌هه‌كێ راگه‌هاندنێ ب خه‌مم و ئه‌ڤه ب چ ره‌نگان كێشه‌یان چاره سه‌ر ناكه به‌لكو ته‌قنێ شلتر لێ دكه بلا ئه‌و ده‌ستهه‌لاتا كه‌نالان رادگره پتر د چاڤێن خه‌لكێ خوه‌دا خوه ره‌شتر لێ نه‌كه ئه‌وا من ژ مرنا خوه پتر نه‌دڤیا رووبده‌ت روودا كو دكتاتۆر و دزێن به‌غدایێ بێژن :(ئه‌مێ چین گه‌لێ خوه ل كوردستانێ پارێزین و ئازادیێ چه‌سپینین) ئه‌ڤه خوه‌شه؟ د ره‌وشه‌كا هۆلێ دژوار و نه‌لبارده ده‌ستهه‌لات دكاره ره‌وشا ئاوارته راگه‌هینه و هنك توخیبان ژبۆ ده‌زگه‌هێن مه‌دیا و راگه‌هاندنێ ده‌ستنیشان بكه ل گۆره‌ى به‌رژه‌وه‌ندیا بلندا نیشتیمانى نه‌كو كه‌نالێن راگه‌هاندنێ راگره لێ جهێ داخێ یه ل باشۆرێ كوردستانێ ب تایبه‌ت ل ئه‌ڤێ داویێ هنده‌ك تشت یێ روو ددن نه‌دڤیا، ب هیچ ره‌نگه‌كێ وه‌رن روودان ئانكو كانێ یێ تو كه‌نالان رادگرى ل گه‌ل من پچه‌ك هزرا خوه بكه و بۆ فلاشباكه‌كێ بچین ئه‌رێ ما نه ئه‌ڤه ئه‌و باشۆرێ كوردستانێ یێ هه‌تانى به‌رى ده‌مه‌ك كورتژى چاڤێن جیهانێ ل سه‌ر كو وه‌ك وه‌ك دوه‌مین ده‌ڤه‌را دیمۆكراس پشتى ئیسرائیلى ل رۆژهه‌لاتا ناڤین؟ چما خوه ره‌ش و كریت بكى؟ (نه پیرێ قه‌نجكر و نه‌ژى ئاگرى) خوه‌زى هوون هه‌ردو ئالى مه زێده‌تر كرێت نه‌كن د چاڤێن دوستێن مه‌دا و پتر كه‌یفا نه‌حه‌زان بمه نه ئینن د ئه‌ڤێ گۆتارێده من گه‌له‌ك پرس كرن ئه‌گه‌ر روخسه‌ت هه‌به دێ یه‌كا دیژى كم : ئه‌رێ زه‌حمه‌ت نه‌به كانێ رۆلێ راگه‌هاندنێ؟ كانێ رۆلێ مامۆستایێن ئوولى (هه‌موو ئولێن ل كوردستانێ) كانێ رۆلێ راگه‌هاندنكارێن كورد و مه‌دیاڤانان و رۆژنامه‌ڤان و ره‌وشه‌نبیر و نڤیسه‌ران و رێكخراوێن جڤاكێ سڤیل؟ مانه ئه‌ڤه‌نه ته‌خێن ل هه‌موو ته‌نگاڤى و كاره‌ستان ل وه‌لاتیان ب خوه‌دى ده‌ردكه‌ڤن و ژێرا دبنه سه‌ركێش و به‌ر ب ئاراستێن دروست و ژ هه‌ژى دبن؟ دكارم بێژم ل هه‌موو جڤاكێن جیهانێ ته‌خێن مه ناڤێن وان ئیناین پێشه‌نگن و ئه‌ون ئاراستا دگوهۆرن ئه‌ون رێبه‌ر و سه‌ركێش لێ خۆیا دبه كو هه‌ر تشتێ مه جودایه ژ خه‌لكى.
نووترين نووچه
- سەرۆك بارزانی و پارێزگارێ سەلاحەدین ڕەوشا سیاسی یا ئیراقێ گەنگەشە كر
- مەسرور بارزانی و بالیۆزێ ئەلمانیایێ دوپاتیێ ل سەر پێشڤەبرنا پەیوەندییان دكەن
- مەسرور بارزانی: دەستێ دۆستینیێ بۆ پێكهینانا حوكمەتێ مە بۆ هەموو ئالییان درێژ كریە
- سەرۆك بارزانی: هەكە ئەم ب خوە نەبین كەس مە ناپارێزیت
- د دژوارترین قووناغان دا مام جەلال دەنگێ تێكگەهشتن و پێكڤەكاركرنێ بوو
- سەرۆكێ حوكمەتا هەرێمێ و بالیۆزێ كرواتیایێ ب هێزكرنا پەیوەندییان گەنگەشەكر
- سیروان بارزانی: مووچەیێ پێشمەرگەی ناگەهیتە نیڤا مووچەیێ لەشكەرێ ئیراقێ
- ئیراق ئەگەرێ بجهنەئینانا سیستەمێ ئاسیكۆدایە
- سەرۆك بارزانی: هێزا پێشمەرگەیێ كوردستانێ هەر دێ مینیت و هەرێمێ پارێزت
- سەرۆك بارزانی و خەمیس خەنجەر دوپاتیێ ل هەماهەنگییا د ناڤبەرا هێز و ئالییێن سیاسی دا دكەن
عومه‌ر سندي
شەڕەکی دژوار ھەرەشێ ل رۆژھەلاتا ناڤەراست و ئاسیا ناڤین دکەت
عومەر سندی /فریزلاند
مانشێتەکی ب ترس و تۆمەتە مرۆڤی ژ شەڕەک داھاتی دترسینە، چونکی شەڕ ئانکو کافل و وێرانبوون ئانکو ھەڕفاندن و مالوێرانی، لێ ئەڤ مانشێتە من نەھەلبژارتیە، ئەڤە مانشێتێ گۆتارا نڤیسەرێ رۆسی یێ ناڤدار ئەلیکسەندەر چارکۆڤسکی یە دوھی سێشەمبێ ل رۆژناما (نیزافیسیمایا گازێتا) یا رۆسی دا بەلاڤکریە (و د ڤێ گۆتارێ دا نڤیسکار ئاماژێ ب شەرەکێ دژوار و گران ل دژی ئیرانێ دکە و خۆیا دکە کو ھەوالگیریا ئیسرائیلی ئاماژە یا ب وێ یەکێ کری کو ئیران ناخوازە ژ سووریا دەرکەڤە ئەفسەر و میلیشیاتێن شیعی ژبۆ ماوەیەکێ درێژ ل بنگەھاندا ل دەڤەرا دیمەشق خوە ھەشار داینە کو ئەڤ دەڤەرە تنێ 30 کیلۆمیتران ژ توخیبێ ئیسرائیلی دوورە)، ھەتانی ڤێرە دیتنا نڤیسکارێ رۆسە ھەلبەت دیتنەکا د جھێ خوەدایە و تلئەبیب ھەست ب ڤێ مەترسیا مەزن دکە و دیسا ژی ھەوالگیریا ئیسرائیلی باش دزانە کو میلیشیا و ئەفسەرێن باش پەروەردەکریێن ئیرانی ب نەپەنی یێن تەڤلی سۆپایێ سووریا بووینە و کۆنترۆلا سۆپایێ یا کەتیە دەستێن گەنەرالێن ئیرانی ئەگەر مرۆڤ ب درستی ل داخۆیانیێن ئەڤگیدولیبرمان وەزیرَێ بەرەڤانیا ئیسرائیلی یێن ڤێ داویێ گوھداری بکە، دێ بۆ مرۆڤی خۆیابە کو مەترسیەکا بەر ب رۆژھەلاتا ناڤەراست تێ و چو خواندنەکا کوور ژی ژبۆ داخۆیانیێن وەزیرێ بەرەڤانیا ئیسرائیلی نە ڤێن و پێدڤی راڤەکرنان نینە، چونکی بێ ڤەشارتن و زەلال د ئاخڤە و دیتنا دەولەتا ئیسرائیلی ددە خۆیاکرن، بۆ نموونە یەکشەمبیا دەربازبووی لیبرمانی داخۆیانیەک دا و تێدا گازیەک دایە دەولەتێن ھەرێمێ و رۆژئاڤا و گۆت:(ھەڤپەیمانیا دژی دەولەتا خیلافەتا ئیسلامی ھزر دکە ل گەل ب داوی ھاتنا ڤێ دەولەتێ ئانکو داعش ئەرکێن وە ب داوی ھات؟!. نەخێر ئیرۆ رۆژ ژ ھەموو دەمەکێ پتر مە پێدڤی ب ھەڤپەیمانیەکێ ھەیە دژی ئیرانێ بێتە ئاڤاکرن، چونکی ئیران پشتگیر و لاندالا تیرۆرێ یە) ئەرێ ما ژڤێ ئاخفتنێ زەلالتر ھەیە؟ ئەڤە پێدڤی ھیچ راڤەکرن و شیکاران نینە و ئیسرائیل داخوازا ئاگاکرنا ھەڤپەیمانیەک بھێز دکە ل دژی کۆمارا ئیسلامیا ئیرانێ و ھە وو ئاماژە ژی نیشاددن کو ئیران بخوژی یا خوە ژبۆ ھەموو ئەگەران بەرھەڤ دکە و یا پێکۆلا پەیداکرنا دۆستان دکە ژبۆ ئاڤاکرنا ھەڤپەیمانیەکا ھەڤدژ ب خواندنا من شەر تنێ نابتە شەڕێ ئسرائیلی و ئیرانێ، بەلکو ئەڤ شەڕە دێ دەربازی دەڤەرێن دەورو بەربن، بۆ نموونە دەولەتێن سنە مەزھەب ل وی چاخی نا میننە تەماشەڤان بەلکو دێ کەڤنە د شەری دا و رۆژئاڤا و ئیسرائیل وێ پشتگیریا سونەیان ل دژی ئیرانێ بکن ئەڤێ ھیچ گومانەک تێدانیە و شەڕەکی ئەتەنی یێ مەزن د ناڤبەرا سونە و شیعاندا وێ دەرکەڤە و بێگومان ئەڤ ھەڤپەیمانیا نھا ل دژی داعشێ رەنگە ل وی چاخی بەرفرەھتر و بھێزتر بکەڤە و مل ب ملی ئیسرائیلی و سونە مەزھەبان ل ئیرانێ بدن بەری ئەز بێمە سەر ھەلویستێ رۆسیا دخوازم بێژم ئەم کورد بخوازین نەخوازین نەکو تنێ چریسکێن ڤی شەڕی وێ وەرن مە، بەلکو ھنک حەسابات وێ ل سەر ئاخا کوردستانێ وەرن ڤاڤێرکرن، لێ ئەز گەشبینم کو کورد دیسا وێ دەڤەرێن کوردستانیێن دەرڤەی کوردستانێ ب کەرکووکڤە ڤەگەرینن ل ژێر کونترۆلا کوردستانێ ب مەرجەکێ کورد یەکدەنگ و یەک پێشمەرگە بن و ل دەما شەڕی دیسا ب دەڤولێڤێن ھەڤڤە نەمینن کو ئەو شەڕ ژی، ب دیتنا من ھەلەکا دی و دەرفەتەکی زێرینە ل پێشیا کوردان و ئەزموونەکا دنە دڤیا ب ژیرانە و ھۆشمەندانە سەرەدەری ل گەل وەرەکرن و یا دن ژی دڤیا کوردان ھەلویستەکی زەلال ژ شەڕێ داھاتی ھەبە و ھەڤالەتیا خوە ل گەل ھەڤپەیمانان تێکنەدن، ژ بەر بۆیەرێن 16 ئۆکتۆبەرێ، دڤیا ھەر پەرە و گرنگی و بھا ب ئەڤان پەیوەندیان وەرە دان ب مەرەما خورتکرنێ دڤیا ئەم وێ یەکێژی ژبیر نەکین کو ھەڤپەیمانیا ئەڤێ جارێ دێ گەلەکا ب ھێز و خورت بیت چونکی ھەموو دەولەتێن عەرەبێن سونە و ھەموو ھێزێن سونە مەزھەب و ئالی و تەڤگەرێن وان دێ ژ دل کەڤنە ل گەل ھەڤپەیمانا نوو و دێ ڤەگەرم و بێژم ئەگەر کورد ئەڤێ جار بزانن ب ژیری و ھۆشمەندی و یەکرێزی دەست ب لەیزتکا سیاسی بکن و وانە ژ سەربۆر و بۆیەرێن بۆری وەرگرتبیت، ئەگا داھاتی دیسا ھەلەک و فرسەندەکا زێرینە بۆ ڤەگەراندنا بھا و شکۆیا کوردان و ھەمژی ڤەگەراندنا خاکا داگیرکری ب کەرکووکڤە و ئەڤا ئەز نھا دبێژم نە تنێ چاندنا ئۆمێدانە، یانژی تنێ ژبۆ بلندکرنا مۆرالانە، نەخێر ئەڤە وێ وەرە ئەنجامدان و دڤیا کورد بۆ ڤێ قووناغێ بەرھەڤبە دەربارێ گەلۆپا رۆلێ رۆسیا وێ چ بە د شەڕێ داھاتی دا؟ ل گۆرەی دیتنا ئەلیکسەندەر چارکۆڤسکی: رۆسیا تنێ دو رێک ھەنە یان بکەڤیتە ناڤ شەرەک دژوار کو زیانەک مەزن وێ بەر مۆسکۆڤایێ بکەڤە یانژی خوە ژ ھەڤپەیمانیا ئیران ـ سووریا ـ حیزبولاە ڤەکێشیت، ب دیتنا من رێیا دوویەم وێ وەرە ھەلبژارتن، ئەو ژی ب زانەبوونا ئەمەریکا و رێیین دبلۆماسی ل ھنک جھان ھنک سازش وێ ژ رۆسیا را بێنە کرن ل ھەمبەر بێ دەنگیا وێ ئەمەرکا نا خوازت بەرۆکێ شەڕی بەرفرەھتر ببە چونکی پشکداربوونا رۆسیا د شەڕی دا نەلۆژیکە چین دەستان داھیلە ل وی چاخی ژی ب شێوەیەک ئوتومات کۆڕیا وێ گورزێ خوە ڤەوەشینە، لەورا ئەمەریکا بەری ھەرتشتی ل گەل ئسرائیل وێ پیکۆلا گرەنتیکرنا بێ دەنگیا مۆسکۆڤایێ بکن، ئەو ژی ب مەرەما کو بەرۆکێ شەڕی بەرفرەە و مەزن نەبە و سەرکەفتن مسۆگەرتر ببە و ئارمانج زویکا وەرە بجە ئانین دەربارێ تورکیا ئەوێ یەک ئارمانج یا ھەی دێ وەکو بێ ئالی خوە پارێزیت تنێ چاڤێ وێ وێ ل تەڤگەرا ئازادیخوازا کوردی بە ل کیڤە لڤی دا لێ بدت یانژی دێ پشکداری ھەڤپەیمانیا دژی ئیرانێ بیت وەکو ھێزەک سونی، لێ ھەر دیسا مەرەما وێ ئەوە پرۆژێ کوردان و خەونێن وان ژناڤببت، ئانکو تورکیا پشکداربە یا ن نە ئارمانج ھەر یەکە ئەو ژی لێدانا پرۆژێ کوردستانێ یە، ھیڤیدارم کوردان وانە ژ بۆیەران وەرگرتبن.
تێبینی: ئەزێ ڤان رێزکا دنڤیسم و سەرۆکێ وەزیرێن لوبنان ژ دەستژکارکێشانا خوە پووشمانبوو ھەلبەت وێژی باندۆرا خوە ل سەر ھەڤکێشێ ھەیە.
شه‌رمێ ژ سه‌فه‌وی و ئۆسمانیان بكن
كیژان پارتیا كوردى یان ئالى و گرۆپ به‌لكو تاكێ كورد ژى ڤه‌لڤینى و بێژیێ چاره ژبۆ ڤێ كریزێ یا رۆژه‌ڤا ئیرۆ چیه، یه‌كسه‌ر وێ به‌رسڤ بده و بێژه: (گه‌ره‌كه ئه‌م یه‌كده‌نگ بین, یه‌ك ره‌نگ و یه‌ك گۆتار بین, سازشێ و كێماتیێ ژبۆ هه‌ڤدو بكین و تۆمه‌تان نه‌دینه پال هه‌ڤدو نه‌چاخێ وێ یه‌كێ یه)، هندى رۆژێ ئه‌ڤ تێكسته دوباره و ده‌ه باره دبه، زارۆیێن كوردان ژى وه‌كى ناڤێ خوه ژبه‌ركریه پا ئه‌گه‌ر دا ئه‌م ئه‌و بین كو یه‌كده‌نگ بین ئارێشه ل كیڤه‌یه؟ پا ئه‌گه‌ر دا ئه‌م ئه‌و بین چما نه‌بینه ملله‌ت؟ چما نه‌بینه ده‌وله‌ت؟ چما ئالایا مه به‌ژنا خوه ل ناڤ ئالایێن گه‌لان دا نا هه‌ژینیه؟ ئه‌ز دزانم گۆتن هێسانیه و خوه‌شه ژى، لێ چه‌ند پارتیێن كوردى ل ڤێ یه‌كێ خوه‌دى ده‌ركه‌تینه یان به‌رهه‌ڤن بكنه كه‌توار ل جهێ گۆتنان و وه‌كو پراكتیك بجه بینن یان چه‌ند كه‌س؟ هیچ هه‌ر ئه‌وێن شه‌ڤ و رۆژ دبێژن گه‌ره‌كه ئه‌م ل هه‌ڤوه‌رین و سازشێ ژ هه‌ڤدورا بكین رۆژه‌ڤ دژواره، لێ هه‌ر ئه‌ون دخوازن كه‌وێ خوه ل به‌ر وى ئاگرى ببرێژن یێ ب مالا مه هه‌میان (كوردستانێ) كه‌تى و مه‌رج و به‌ربه‌ستان ژبۆ ل هه‌ڤهاتنه‌كا گشتى دده‌ینن و ب شێوه‌یه‌ك نه‌راسته‌وخوه تۆلا ڤه‌دكن و بۆیه‌ر و كاره‌ساتا رووداى بكنه كارتا فشارێ و گڤاشتنێ ل سه‌ر هه‌ڤدو، ئێ باشه بلا تنێ ئه‌م شه‌رمێ ژ ل هه‌ڤهاتنا سه‌فه‌وى و ئۆسمانیان بكین كو دوژمناتیا سه‌ختا وان بۆ سه‌دان سالان ڤه‌دگه‌ره ده‌ما زانین گه‌لێ كورد بریار ل سه‌ر پێشه‌رۆژا خوه دا ده‌ست دانه هه‌ڤ ته‌ڤایا كێش و بێش و ناكۆكى دانه ئالیه‌كێ و كه‌تن گیانێ مه تنێ دێ ڤێ بێژم باشه ئه‌گه‌ر مه‌ره‌م یه‌كگرتن و هه‌ڤكارى و هه‌ماهه‌نگیه ب ئارمانجا ده‌ربازكرنا ڤێ قووناغا هنده دژوار و ئاسێ، پا داخوازا هلوه‌شاندنا حوكمه‌تا هه‌رێما كوردستانێ چیه؟ ئه‌و حوكمه‌تا رزگاریا نیشتیمانى یانژى حوكمه‌تا (قورتالكرنا) نیشتیمانى كو كوردیتره دێ كاركت ژبۆ به‌رهه‌ڤیكرنا هه‌لبژارتنێن په‌رله‌مانى كو كێمتر ژ هه‌شت مه‌هان یێن بۆ ماین ئه‌رێ پرسیار ل ڤێره ئه‌وه گه‌لۆ هه‌ر جارا كابینه‌یه‌كا نوو هاتیه ئاڤاكرن، پشتى هه‌لبژارتنان چه‌ند مه‌هان ڤه‌كێشایه؟ چه‌ند كێش و بێش و بگره و بكێش په‌یدابووینه؟ ئه‌و ده‌م ل به‌رده‌ست نینه كو نها رابن حوكمه‌تا قورتالكرنا نیشتیمانى ئاڤا بكن، یا دووه‌م دڤیا پچه‌كێ رێز ل بارێ ده‌روونى یێ به‌لنگازێن كوردستانێ وه‌ره گرتن خه‌لكێ مه ئه‌و دل نه‌مایه ژنوى ئۆمێدان ل سه‌ر حوكمه‌تا قورتالكرنا نیشتیمانى ئاڤا بكه، ب دیتنا من ئه‌گه‌ر ئارمانج دیتنا چاره‌یه‌كێ یه ژبۆ ڤێ ره‌وشێ و ئه‌گه‌ر وه‌كو دبێژن هه‌موو دخوازن بهه‌ڤره كاربكن باش خراب مه حوكمه‌ته‌ك یا هه‌ى ئه‌م نابێژین سه‌ركه‌فتى بوویه بلا ب زووترین ده‌م ئه‌و وه‌زیرێن ژ سه‌ر كار هاتینه لادان ڤه‌گه‌رن وه‌زاره‌تێن خوه وه‌رگرن مل ب ملێ نێچرڤان بارزانى سه‌رۆكێ جڤاتا وه‌زیران و قوباد تاله‌بانى جهگرێ سه‌رۆكێ جڤاتا وه‌زیران كار بكن و پێكڤه پێكۆلێ بكن، په‌رله‌مانێ كوردستانێ ئه‌كتیڤ بكن و سه‌رۆكێ په‌رله‌مانى ڤه‌گه‌ره سه‌ركارێ خوه پاشێ هه‌م حوكمه‌ت هه‌مژی په‌رله‌مان ده‌ست ل ناڤ ده‌ستان كاربكن و به‌رهه‌ڤیان ژبۆ هه‌لبژاردنێن په‌رله‌مانێ داهاتى بكن داكو ئه‌ڤ قووناغا ئاوارته ده‌رباز ببه، هه‌روه‌ها ژى كۆمیته‌یه‌ك نوو و ژ چه‌ندین سه‌رو سیمایێن نوو وه‌ره پێكئانین وه‌كو شاند ژبۆ دیالۆگێ ل گه‌ل به‌غدا، چونكى كێشه ل گه‌ل به‌غدایه و چارسه‌ریژى هه‌ر ل وێرێ یه دستوور ژى هه‌ر ل وێرێ یه، گه‌ره‌كه ئیرۆ كورد رژدبن ل سه‌ر بجهئانینا دستوورى ب هه‌موو بڕگه و ئارتیكلانڤه و گه‌له‌ك گرنگه یه‌كه‌مین داخوازا شاندێ كوردى ئه‌وبه كو ئالیێ سێیه‌م چاڤدێرئه‌ڤه دبه ژ خوه دبه ئه‌گه‌رنه ئه‌ڤێن دن هه‌موو مزایدات و پیلانێن سیاسینه و پرۆپاگه‌نده‌كا ئه‌رزانا هه‌لبژارتنایه به‌رى ئه‌ز گۆتارا خوه ب داوى بینم دخوازم تێبینیه‌كا خوه ده‌ینم به‌ر چاڤێن حوكمه‌تا نێچرڤان بارزانى كو شاندێ به‌رى نها وه دشانده به‌غدا ب چو ره‌نگه‌كێ سه‌ركه‌فتى نه‌بوون و دانا و لێزان و دبلۆماتكار نه‌بوون و ل گه‌ل خه‌لكێ خوه ژى زه‌لال نه‌بوون، هه‌موو هیڤى و ئۆمێد ئه‌ون ئه‌و سه‌ر و سیما وه‌رن گوهۆرین و ئه‌و نه‌چنه به‌غدا.
ملله‌ت .. هێز و ئیراده‌یه
16 ئوكتۆبه‌رێ بوویه وه‌رچه‌رخانه‌كا دیرۆكى نه تنێ د دیرۆكا باشۆرێ كوردستانێ دا، به‌لكو د دیرۆكا هه‌موو كوردستانێدا، چونكى ئه‌وێ گۆتى (كه‌ركووك دلێ كوردستانێ یه) مه‌ره‌ما وى هه‌موو كوردستان بوویه د وێ به‌روارێ دا ئه‌ڤ باژێرێ دیرۆكى یێ كوردستانێ هاته ژ ده‌ستدان ل گه‌ل چه‌ندین ده‌ڤه‌رێن دن ژ ئه‌وێ شه‌ڤێ و هه‌تانى كو نها ده‌مژمێر 11 سپێدێ یه ل گۆر ده‌مێ فریزلاند (سێ شه‌مب 24/10/2017) لڤینێن سیاسى و كۆڕ و كۆمبوون و ده‌ینانا سیناریۆێین جودا جودا به‌رده‌وامن… لێنانگه‌ها سیاسى ل هه‌ڤلێر ــ ته‌هران ـ ئانكه‌ره ـ به‌غدا ـ واشینتۆن ژ سالا 2003 و هڕڤه قه‌ت ئه‌ڤ گه‌رمبوونه ب خوه‌ڤه نه دیتیه, بوویه‌ر وه‌سا بله‌زن نه چاڤدێرینَ سیاسى و نه‌ژى نڤیسه‌ر و رۆژنامه‌ڤان و پۆله‌تیكمان دكارن كونترول بكن، یانژى پێشبینى بكن و دۆرهێلى ب درستى بخوینن مه‌ره‌ما من ژ ڤێ گۆتارێ ئه‌و نینه شیكاره‌كێ بكم، یانژى چ سیناریۆ هه‌نه و كیژان باشه یانژى د پشت په‌ردان ده سه‌ركرداتیا سیاسیا كوردى مژوولى چ پلانه‌كێ یه، لێ سیناریۆیا كودێ سه‌دێ سه‌د قه‌ومه و پێكوه‌ره و ببه دۆرهێل، ئه‌وه كو گه‌لێ كورد وێ ڤێ ژى ب ساناهى ده‌ربازبكه و ب ئۆمێده‌كا مه‌زنترڤه چما؟ چونكى كوردان هژیان و كاره‌سات و شكه‌ستنێن گه‌له‌ك ژ ڤێ مه‌زنتر دیتینه، جاران كوردان هیچ نه‌مایه لێ ب زووترین ده‌م ب سه‌رخوه‌ڤه هاتینه و ب هێزتر ژى هاتینه د قادێده هه‌ما هه‌ما بیرا من دئێت ل نسكۆیا سالا 1975 كوردان هه‌ر تشت ژ ده‌ستدان، لێ نه‌كێشا ساله‌كێ شۆره‌شا گولانێ و شۆرشا نوو ب دووڤ خوه‌دا ئانین، لێ باش و باش بیرا من ل ئه‌نفالێن ره‌شێن ب گه‌مار تێ 5000 هزار گوند وێرانبوون ب هزاران كورد ب ساخى ل بیابانێ، (نگره‌ت سه‌لمان)، هاتنه بنئاخكرن لێ سه‌رهلدانا پیرۆزا بهارا 1991 ب دووڤ خوه‌دا ئانى ئه‌و سه‌رهلدانا كاریه د ماوێ تنێ 14 رۆژانده هه‌موو باژارێن سه‌ره‌كى یێن باشۆرێ كوردستانێ ب كه‌ركووك ڤه ژ بن پوستالان رزگار بكن و ژوێ ژى باشتر تێ بیرامن ده‌ما ئه‌م ب ملیۆنان و ب بێ ئۆمێدیه‌كا مه‌زن و چه‌نگ شكه‌ستى ل مشه‌ختبوونا ملیۆنى به‌ر ب توخیبێن توركیا و ئیرانێ چووین، لێ ل ده‌مه‌ك گه‌له‌ك كورت پشتى رژدبوونا فره‌نسا بریاره‌ك دیرۆكى د به‌رژه‌وه‌ندیا گه‌لێ كورد ل نیسانا 1991 ده‌رچوو كو نابه ل هێلا پانیا 36 فرۆكێن رژێما عیراقێ ل سه‌ر بفڕن و دڤیا گه‌لێ كورد وه‌ره پاراستن، ئه‌ڤ بریاره بوویه بنه‌سڕه‌كا موكم كو ته‌ناهى و ئارامى ڤه‌گه‌ره ده‌ڤه‌رێ و یه‌كه‌مین هه‌لبژارتن ل باشۆرێ كوردستانێ هاتنه‌كرن و د ئه‌نجامدا ل گولانا سالا 1992 په‌رله‌مان و حوكمه‌تا هه‌رێما باشۆرێ كوردستانێ بۆ جارا ئێكه‌مین د دیرۆكا كوردستانێ دا هاتنه ئاڤاكرن. من مه‌ره‌م ب ئه‌ڤێ گۆتارێ بلندكرنا مۆرالان نینه و ئه‌ز وێ هژیانا جیۆپۆله‌تیكى و سیاسى و سه‌ربازى و سایكۆلۆژیا رۆژا 16 ئوكتۆبه‌را سالا 2017 ب بچووك نابینم هه‌ژیانه‌كى مه‌زنبوو نێزیك بوو ئۆمێدێن گه‌لێ كورد بگه‌هنه مه‌ترسیێ، لێ سوپاس بۆ خوه‌داى ئۆمێدێن مه مینا جاركێن جاران نه‌هاتن سه‌رژێكرن. لێ دیسا دڤیا مه هیڤى هه‌بن وه‌كو ل ده‌ستپێكێ مه ئاماژه پێ داى چه‌ندین سیناریۆ هه‌نه و ئه‌مه‌ریكا ب هوورى چاڤدێریا ره‌وشێ دكه، یه‌ك ژ سیناریۆیێن ئۆمێدبه‌خش ئه‌ڤه‌یه: (ئه‌مه‌ریكا رژده ل سه‌ر كو رێڤه‌به‌ریه‌ك هه‌ڤپشك ژبۆ ده‌ڤه‌رێن كوردستانیێن ده‌رڤه‌ى هه‌رێما كوردستانێ وه‌ره پێكئانین و مادده‌یا 140 دوباره وه‌ره ئه‌كتیڤكرن، هه‌روه‌هاژى سه‌روژنوى ژ ئالیێ رۆژئاڤا و ئه‌مه‌ریكا ڤه، دیسا پێشمه‌رگه وه‌ره په‌روه‌رده و چه‌كداركرن و ل نێزیكترین ده‌م دیالۆگ د ناڤبه‌را هه‌ڤلێر و به‌غدا ده‌ست پێ بكه یا ژ هه‌موویێ گرنگتر به‌رهه‌ڤى ل پشت په‌ردان دئێنه كرن كو بریاره‌ك دیرۆكى ژ جڤاتا ئاسایشا نه‌ته‌وێن هه‌ڤگرتى ل دۆر وه‌رچه‌رخانا ڤێ داویێ د به‌رژه‌وه‌ندیا كوردانده وه‌ره ده‌ركرن)، ئه‌ڤه نه كو هه‌ما سیناریۆیه‌كه كا سه‌ردگره یانژى نا، به‌لكو ئه‌ڤه بۆچوونا ئه‌مه‌ریكایه و تیله‌رسۆن هاتیه راسپاردن كو بجه بینه خالێن ده‌ربازبووى وێ بێنه ئه‌نجامدان و د ناڤ وان دا مادا 140 ئانكو نه‌خشه كێشانا توخیبێن د ناڤبه‌را هه‌رێما كوردستانێ و ده‌ڤه‌رێن سونه‌نشین ب ئه‌ڤێ پلانا خوه‌رى ئه‌مه‌ریكى ب ره‌نگه‌ك نیمچه ئوتۆماتیكى هه‌رێما سونه‌نشین په‌یدا دبه و ب ره‌نگه‌ك خوه‌زاى عیراق دئێته دابه‌شكرن ژبۆ سێ هه‌رێمان و ل وى چاخى ئه‌ڤ هه‌رێمه دكارن هه‌ڤ بگرن ب ره‌نگه‌ك نیمچه كۆنفیدرالى، یان نا ل گۆره‌ى پلان ژبۆ وى ده‌مى و دیالۆگان دمینه، ئه‌ڤه هه‌موو وێ وه‌ره په‌سه‌ندكرن ل هه‌مبه‌ر مانا عه‌بادى وه‌كو سه‌روكوه‌زیرێن عیراقێ ژبۆ چار سالێن دن، ئانكو ل هه‌لبژارتنێن داهاتى ره‌نگه یه‌ك هه‌به ب پرسه پا رۆلێ ئیرانێ ل ئه‌ڤێ سیناریۆیێ كانێ كو خوه‌دى هه‌ژمۆن و باندۆره‌كا هه‌رى مه‌زنه ل عیراقێ؟ هه‌لبه‌ت پرسیاره‌ك د جهێ خوه‌دایه چوونا عه‌بادى ژبۆ عه‌ره‌بستانا سعوودیێ ب ئه‌ڤى بابه‌تیڤه گرێداییه ئه‌مه‌ریكایه ڤى كارى دكه نه‌كو عه‌ره‌بستانا سعوودى ده‌ما عه‌بادى خواستیه سعوودیێ بۆ وێ یه‌كێ بوویه كو ل كه‌نداڤێ نێزیك بكه و نینۆكێن ئیرانێ ل عیراقێ بتراشه و ب سیناریۆیا ده‌ربازبووى ریچالێن وێ ژ كوردستانێ دئێنه بڕین. سیناریۆیێن ب ئۆمێد گه‌شبینتر هه‌نه، لێ نها مه ئه‌و گۆت یا كو كار بۆ دئێته‌كرن و دێ سه‌رگرتژى و بلا خوینده‌ڤانێن خۆشه‌ڤى بزانن پلانا مالكى كو سلیمانى كه‌ركووك و هه‌له‌بجه ببنه هه‌رێمه‌ك ئیران و توركیا پێ كه‌یفخۆش بوون، لێ ئه‌مه‌ریكا وه‌ناكت ئه‌ڤ پلانه سه‌ر بگره و عه‌بادی ژى پشتگیرێ ئه‌مه‌ریكایه ژبۆ تێكدانا ڤى پرۆژه‌ى، تنێ مه مایه تشته‌ك كو ژ هه‌موو پلان و سیناریۆیێن دوژمنان گرنگتر ئه‌وژى ئه‌وه ل جهێ بێ ئۆمێدێ باراندنا رۆندكێن سار و بێ مفا و تۆمه‌تباركرنا هه‌ڤدو موكم ده‌ست ل ناڤ ده‌ستبین ب مۆراله‌ك و گۆره‌ك بلند و گه‌شبین یا دوژمنان ژى دڤێ ئه‌وه كو بێژه مه خه‌ونێن وه بوونه پارچه‌یه‌ك ژ رابردوى و ژبیر بكن، لێ خه‌ونێن مه ل جهێ خوه‌نه و ده‌وله‌تا كوردستانێ نه‌خه‌ونه ره‌نگه هنه‌ك دوور بكه‌ڤه و دنیا د هه‌ژه، لێ ب سه‌ر هه‌ڤدا نائێ و كاڤلژى نابه.
دو كه‌ڤال پاش ریفراندۆمێ
1ـ مرۆڤ د كاره ب پتر ژ دیتنه‌كێ ره‌وشا هه‌رێما كوردستانێ یا پاش ریفراندۆمێ ببینه یانژى ب پتر ژ خواندنه‌كێ ئه‌و كه‌ڤالێن په‌یدابووین بخوینه و جارانژى به‌روڤاژیژى دئێنه خواندن و دیتن ئانكو چاڤدێره‌ك جاران ره‌وشێ به‌روڤاژى دیتنا خوه د بینه و به‌روڤاژى خواندنا خوه د خوینه منژى دیتنێنجودا ل دۆر ره‌وشێ هه‌نه, نه ئه‌ز به‌لكو هه‌موو چاڤدێرێن ره‌وش هه‌ست ب بێده‌نگیا به‌رپرسێن كوردان دكن پشتى ل 25 سپته‌مبه‌را ده‌ربازبووى هاتنه ئه‌نجامدا و رێژه‌یا 93 ژ سه‌دان ژ خه‌لكێ كوردستانێ ژبۆ چاره‌نڤیسێ خوه گۆتین به‌لێ و خواندنێن جودا جودا بۆ دئێنه‌كرن ب دیتنا من ژ ئالیێ سایكۆلۆژى دیمه‌نێ ڤێ بێده‌نگیێ و هنگ داخویانیێن مژه‌وى دوژمنان هه‌م د ترسینه هه‌مژى گێژ دكه و ئه‌ڤ ره‌فتاره ژى سه‌ركه‌فتیه ل ده‌ما مرۆڤ دكه‌ڤه قادا شه‌ڕێ سایكۆلۆژى یا ن شه‌ڕێ ساردا ئالیێ به‌رامبه‌ر دخوازه تشته‌كێ بزانه كا ل ناڤ ژۆرێن تارى ل هه‌رێما كوردستانێ و ب تایبه‌ت ل لێنینگه‌ها سیاسیدا كیژان خوارن تێ ئاماده‌كرن و ژبۆ كو سیاسه‌تمه‌دارێن كوردان بده‌نه ئاخفتن داكو بزانن داوى ره‌وش گهایه چ ئاست و وێ چ لێ وه‌ره رۆژانه هه‌ریه‌ك ژ تركیا عیراق ئیران داخویانیێن گه‌رم و دژوار و ئستیفزازى ددن كو داكو به‌رسڤه‌ك ژ ئالیێ به‌رپرسێن كوردانڤه هه‌به و ئه‌و بكارن ب وێ به‌رسڤێ پاسڤوردى بزانن و بكه‌ڤنه ناڤ ژۆرا تارى یا هه‌رێمێ یان لێنانگه‌ها سیاسى لێ ل ئالیه‌ك دن هه‌ر ئه‌ڤ بێده‌نگیه هنده‌ك ئه‌نجامێن دن ل په‌ى خوه دهێله بۆ نموونه وه‌لاتیێ كورد یێ ساده و كو ب گه‌رم و گورى چوویه ده‌نگ ب به‌لێ دایه بۆ وى ئه‌ڤ بێ ده‌نگیه گرانه نه‌خوه‌شه یێ پیچ پیچه تووشى بێئۆمێدیه‌كێ دبه، چونكى وى خه‌ونێن مه‌زن ل سه‌ر ریفراندۆمێ ئاڤاكربوون وى هزر دكر ریفراندۆم ئانكو سه‌رخوه‌بوون و ئاڤاكرنا ده‌وله‌تا كوردستانێ لێ ئه‌و نزانت یێ د ناڤ چار دیوارێن كۆنكریتی دا هه‌تا ژناڤ ده‌ركه‌ڤت پێدڤى ده‌مى و هێزێ یه ئاخر ئه‌ڤه بۆ ڤى وه‌لاتیێ دلبێش نه‌هاتیه رۆهنكرن ژبۆ كو هنك ئۆمێد ل جه‌م په‌یدا ببه, دیسا خاله‌كا دن یا نێگاتیڤ ل سه‌ر بێده‌نگیا هه‌رێمێ پشت ریفراندۆمێ جاران دوژمنێن كوردان گورێخ و گورخوه‌ش دكه وه‌لێ هزردكه كو ب ئه‌نجامدانا پرۆسێسا ریفراندۆمێ كورد كه‌تینه ریسیكه‌كێ و قه‌یرانه‌ك و كریزه‌كا سیاسى نزانن وێ چاوا خوه ژێ ده‌رینن ژ به‌ركو مه دوژمنه‌كى سته‌مكار و نه هوشمه‌ند و به‌ربه‌رى هه‌یه ل گۆره‌ى ئه‌قلیه‌تا دوژمنكارانه‌یا خوه داخویانیان ددن هه‌تا نها هنك زانه‌بوون و هوشمه‌ندى تنێ ب داخۆیانییًن به‌رپرسێن پایه بلندێن ئیرانێڤه دیاره به‌روڤاژى داخۆیانیێن هه‌ردو دوژمنێن دن ترك و عه‌ره‌ب میناك گۆتارا ئه‌ردوگان یا ئیرو07/10/2017 ل باژێرێ ئه‌فیۆنێ كوتێدا سڤكاتى ب ئالایا پیرۆزا كوردستانێ دكر ووه‌كو (كنجر) ئانى زمان د هه‌مبه‌ردا بهایه‌ك و گرانیه‌ك ددایه ئالایا تركان و دگۆت چاوان ئه‌ڤه هه‌ردو وێ ببنه یه ئاست هه‌روه‌ها درووشمێ (ته‌ك زمان ته‌ك ئالا ته‌ك وه‌لات) ب درووشمه‌ك پیرۆز ل قه‌له‌مدا داخۆیانیێن ب ئه‌ڤى ئاواى دو رامانان دده‌ن یه‌كه‌م بێده‌نگیا كوردان و پرۆسێسا ریفراندۆمێ باندۆره‌ك مه‌زن ل سه‌ر سایكۆلۆژیه‌تا وان په‌یداكریه و ئا ددوان دخوازن ب ئه‌ڤان داخۆیانیێن كرێت و ئیستفزازى كوردان بده‌نه ئاخفتن داكو بزانن ل پشت په‌ردان چ هه‌یه. 2ـ راگه‌هاندنا كوردى جهێ داخه‌كا مه‌زنه: ئه‌ڤه 12 رۆژ ب سه‌ر پرۆسێسا ریفراندۆما كوردستانێدا ده‌ربازبوون من د ڤان 12 رۆژاندا ب درستى مه‌دیا و رۆژنامه‌ڤانى و راگه‌هاندنا كوردى خواند راگه‌هاندنا كوردى ب شێوه‌یه‌ك گشتى ل هه‌رێما كوردستانێ خوه‌دیك و ره‌نگڤه‌دانا ره‌وشا سیاسیا هه‌رێما كوردستانێ یه راگه‌هاندنه‌كا حزبى ژ 100سه‌دێ 100 نه كه‌ناله‌ك نه ژى رۆژنامه و كۆڤاره‌ك نه ژى سایته‌ك نه‌ژى سوسیا میدیایه‌ك سه‌ربخوه یان نیشتیمانى من نه‌دیت د ڤان چه‌ند رۆژێن ده‌ربازبوویدا مه‌دیایا كوردى ل سه‌ر سێ ئالیان هاتبون پشك و دابه‌شكرن و رول د له‌یزین مخابنى رۆلێ نێگاتیف بوون وه‌كى چاڤێ رۆژا گه‌ش ل وه‌لاتێ رۆژێ خۆیابوو، هنه‌كان داخۆیانى و كرێتاهى و سڤكاتیا ژ ئالیێن به‌رپرسێن ئێراقێڤه كو ب كوردان دهاته كرن پاته دكرن و ڤه دشارتن و هنه‌كان یێن تركان و هنه‌كان یێن ئیرانێ. مه‌دیایا كوردى ب مخابنیڤه ل گه‌ل وه‌لاتیێ كوردێ دلبێش و وه‌لاتپارێز و د هه‌مان ده‌مدا به‌لنگاز راستگۆ نه‌بوو و ئه‌ڤه ژى هه‌نه‌ك و یاریپێكرنه ب هه‌ستێن ڤێ خه‌لكێ سه‌یر و سه‌مه‌ر و ئه‌نتیكه‌یه د وه‌لاته كیده تو نه ده‌زگه‌هه‌كی مه‌دیایێ و مه‌دیاكاره‌كێ نه‌ژى رۆژنامه‌یه‌كێ و رۆژنامه‌ڤانه‌كێ بێ ئالى و سه‌ربخوه نه‌بینى هه‌لبه‌ت پرانیا كه‌سانێن د مه‌دیا و رۆژنامه‌ڤانیا كوردی دا كاردكن ژ به‌تالى بوونه راگه‌هاندنكار و میدیاڤان و جۆرنالیست، له‌وما ژى نزانن بایه‌خ و داخبارى و باندۆرا راگه‌هاندنێ ل سه‌ر بۆیه‌ران و ل سه‌ر وه‌لاتیان چه‌نده، له‌وما ژى دێ بینى هه‌ر تم و تم وه‌لاتیێ كورد ل كوردستانا باشۆر مرۆڤه‌كى گوهشیه.
بۆ ره‌ڤه‌ندا كورد ل هه‌موو جیهانێ ب تایبه‌ت ئه‌ورۆپا و ئه‌مه‌ریكا
به‌ری چه‌ند رۆژه‌كان د پرێس كۆنفرانسه‌كێ دا سه‌رۆكێ پارتیا نه‌ژادپه‌رستا توركیا (مه‌هه‌په) ده‌وله‌ت باخچه‌لی، دیسا دلگرانیا خوه ده‌ربارێ ریفراندۆما كوردستانێ ده‌ربری لێ ئه‌ڤێ جارێ وه‌كو خوه و ژ ره‌نگێ خوه ئاخفت گه‌ف ل خه‌لكێ هه‌رێمێ كرن ب وه‌شاندنا گورزه‌ك گران كو ئه‌گه‌ر ریفراندۆم وه‌ره‌كرن ل هه‌رێما كوردستانێ وه‌ها گۆت: (بارزانی له‌وڕا موكوره ل سه‌ر ئه‌نجامدانا ریفراندۆمێ، چونكو ئه‌مه‌ریكا و ئنگلته‌را ل پشتا وینه، بارزانی ئه‌مه‌ریكا و ئنگلته‌را ناس دكه‌ت لێ تركیا ناس ناكه‌ت، ده‌ما توركیا گورزه‌كێ ڤه دوه‌شینه كوردان هینگێ دره‌نگه بارزانی توركیا ناس بكه‌ت) به‌رسڤا مه‌ژی ژبۆ ڤی راسیزمێ دژی مرۆڤایه‌تیێ و تورك په‌رێس ئه‌وه: راسته بارزانی و هه‌موو كوردژی ئه‌مه‌ریكا و ئنگلته‌را ب باشی ناس دكن و دزانن هێزێن بۆكه‌نه و هێزا وان چه‌نده و د چی دایه و براستیژی ئه‌ون كو ب هێزا خوه سه‌ركردایه‌تیا جیهانێ دكن ژكنارێ پۆله‌تیكێ، له‌شكری، ئیكونومی، مه‌دیای.لێ د هه‌مانده‌مدا سه‌رۆك بارزانی و كورد هه‌مووژی توركان و توركیا ناس دكن و دزانن هێزا وێ چه‌نده و دزانن ل هه‌مبه‌ر ئورۆپا و ئه‌مه‌ریكا و ئیسرائیلا دۆستا كوردان چه‌نده، دیسا ئه‌م كورد دزانین ره‌وشا (ده‌وله‌تا ته‌ك بایره‌ق و ته‌ك زمان و ته‌ك وه‌لات) د ده‌ستێن شه‌ركه‌رێن كورد ددا ب چی ئاواییه و چ داد و بێ داده و چاوا كه‌تیه له‌پێ خوه!! به‌لێ بارزانی ڤێ ئێكێ باش دزانت كورد هه‌موو ژی دزانن و ژ مێژه مه گۆتیه: (نه مێرێ زڕزڕی و نه هه‌ورێن قرقری) هه‌رژخوه‌ره باخڤن و كورد ڤێ جارێ دزانن چی د بنێ قازانێ دایه! ل هه‌مبه‌ر ئیراده‌یا گه‌لێ كورد و حه‌زا وان ژبۆ سه‌رخوه‌بوونێ و ژیانه‌كا ئازاد مینا هه‌ر گه‌له‌كێ هوون بێ حساب و ڤالانه كورد وه ل هه‌مبه‌ر خوه و مێرانیا خوه نابینن كورد ب سه‌ر ره‌قیاخوه ناڤدارن، لێ ب هوشمه‌ندی و هوون ب رادیكالی و نه‌ژادپه‌رستیا خوه ناڤدارن و بێ هزركرن. مێزه بكن پتره ژ هه‌شتێ سالان تورك دخوازن بكه‌ڤنه د یه‌كه‌تیا ئوروپا دا لێ وه نه كاری و ئیرۆ رۆژ هوون دوورترن ژ ڤێ یه‌كه‌تیێ ژ به‌ری چل سالان ئانكو به‌ری چل سالان هوون نێزیكتربوون كو ببنه ئه‌ندامێ یه‌كه‌تیا ڤی كیشوه‌رێ هه‌موو مافێن مرۆڤان و گیانداران لێ پاراستی ژبه‌ركو وه هیچ رێزه‌ك ل مافێن مرۆڤان نه‌گرتیه و هه‌موو یاسایێن گرێدای مافێن مرۆڤان وه بن پێ كرینه و وه گوه نه‌دایه جارناما مافێن مرۆڤان و مافێن گه‌لان و و ه تاوان ئه‌نجام داینه و پرۆبله‌ما هه‌ری مه‌زن ئه‌وه ئه‌ڤ تاوانه به‌رده‌وام ل وه‌لاتێ وه تێنه ئه‌نجامدان. هوین بازرگانیێ لگه‌ل كوردان دكن و هوون ژ هه‌رێما كوردستانێ مفادارن لێ سه‌ره‌رای هه‌موو ئه‌ڤێ هوون دژی سه‌ربه‌خۆیا ڤێ ده‌ڤه‌رێنه و هوین ناخوازن كورد ل باشۆرێ كوردستانێ ب سه‌ربه‌ستی بژین. هه‌لبه‌ت بۆ مه نه‌سه‌یره، نه‌ئه‌نتیكه‌یه و نه ژی سه‌مه‌ره‌یه، چونكو ئه‌م وه ناسدكین ئاسن و قوماشێ وه ل جه‌م مه پێ گۆتیه لێ هوون بێژن كورد ب تایبه‌تی كوردێن هه‌نده‌ران و ده‌رڤه‌ی كوردستانێ ده‌ستان داهێلن و شیرێ وان دكاڤلاناندان بنڤه؟ نه‌خێر نا قه‌ت وێ هزرێ نه‌كن ئه‌مین یێن پلانێن وه ئه‌شكه‌ره دكن و وه رسوا دكن .. باش دزانین چی ب چیه ….. به‌رێزان به‌رپرس و ئه‌ندامێن كۆمه‌له و پلاتفۆرم و مالێن كوردی ل هه‌نده‌ران … ئه‌ندامێن ره‌ڤه‌ندا كورد ل هه‌موو جیهانێ ب تایبه‌ت ئه‌مه‌ریكا ئورۆپا ئه‌ڤه مه ناڤێ خودای لێ ئینا چ نه‌مایه كو ئه‌م چاره‌نڤیسێ خوه ئه‌شكه‌ره و دیار بكین گورگێن گورێخ و سه‌یێن هار یێن كێلبێن خوه د هه‌سین و تیژ دكن كو كورڤه‌ی كوردستانێ بكن بتایبه‌ت توركیا و ئیران چونكو هه‌ردووێن دن (ئێراق ـ سووریا) د حه‌سابا ده‌وله‌تاندان نه‌ماینه رۆژ بۆ رۆژێ ئه‌مێ ل رۆژا 25 سیپته‌مبه‌رێ 2017 نێزیك دبین ئه‌مێ ل چاره‌نڤیسێ كوردان و ده‌وله‌تا كوردستانێ نێزیك دبین ئه‌مێ ل رۆژا گه‌ش نێزیك دبین و ده‌وله‌تا وه‌لاتێ رۆژێ و سوار چاكێن رۆژهه‌لات وێ وه‌ره راگه‌هاندن دڤیا ژ ئیرۆ پێڤه ئها ژڤێ چركێ پێڤه ئه‌م ره‌ڤه‌ندا ل هه‌نده‌ران مینا ماسیا دئاڤێدا هشیار كو نه‌كه‌ڤیته دێمیێ هشیارتربین و هایێ مه ب رێكا تۆرێن جڤاكی و ته‌له‌فۆنان ژ هه‌ڤ هه‌بت، هه‌ر ده‌ما زێده‌گاڤیه‌ك ل سه‌ر كوردستانێ ژ ئالیێ توركیا و ئیرانێڤه هاته‌كرن ئه‌م ئه‌مبه‌ساده (بالیۆزخانه) و كونسولخانه‌یێن ڤان هه‌ردوو وه‌لاتان بكینه ئارمانج و بێ دلشه‌وات ئه‌وا نه‌بوویه ژی بلا ببت ژ ئه‌نفالان زێده‌تر نابت ژ هه‌له‌بچه، ئه‌به‌غورێب، ئه‌منه سوره‌كه، مه‌نزومه‌ت ئه‌لشیمال، ئه‌منا دهۆكێ و زاخۆ زێده‌تر نابت، (یه‌ك ب یه‌كه و ئه‌لبادی ئه‌زله‌م) ئه‌ڤه نه‌هه‌فتێ و شه‌شه و نه‌ژی هه‌شتێ و هه‌شته ئیرۆ ئه‌م خوه‌دی دوست و هوگرین، ل جیهانێ ئه‌م شكێنه‌رێ دفنا ده‌وله‌تا خیلافه‌تا ئیسلامی یا نونه مه بهایێ هندێ هه‌ڤالێن په‌یدا كرین كو ل مه خوه‌دی ده‌ركه‌ڤن بلا هه‌ر تم و تم ئگاهێ مه ل هه‌ڤدو بت، هه‌رتم گوهداری نۆچه‌یان بین كا ل كوردستانێ چی روودده‌ت و لڤینێن ده‌ورو به‌ران چنه، چونكو گه‌ره‌ك ئاسن ب گه‌رمی وه‌ره لێدان و به‌لێ بۆ ده‌وله‌تا كوردستانێ.
سترانێن ڤیستیڤالا سه‌رخوه‌بوونێ ل كۆلنێ
وه‌كو پێشده‌م هاتبوو راگه‌هاندن كو رۆژا 26 و گستۆسێ ل باژارێ كۆلنێ ل ئه‌لمانیا ڤیسته‌ڤالا سه‌رخوه‌بوونا كوردستانێ وێ وه‌ره لدارخستن و كۆمیته‌ك ژبۆ به‌رهه‌ڤى و ئۆرگانیزه‌كرنێ هاته ده‌ستنیشانكرن، كۆمیته ژى ده‌ستبكاربوو و كه‌تن د خه‌باتێدا ژ بۆ سه‌رخستنا فێ بۆیه‌را مه‌زن، مالا وان ئاڤابیت و ده‌ستێن وان خوه‌ش وه‌ستیانه‌ك مه‌زن دیتن و جهێ سوپاسى و پێزانینانن، مه‌ژى وه‌كو كورد و وه‌كو ئه‌ركه‌ك نیشتمانى رۆژ و سعه‌ت د هژمارتن كو ببه ئه‌و رۆژ و ئه‌م به‌ر ب كۆلنێ هه‌رین ژبۆ پشكداریێ د ڤى كارێ پیرۆزدا ب راستى ژبۆ كو پێنگاڤه‌ك ژبۆ كوردینیێ وه‌ره هاڤێتن ره‌ڤه‌ندا كورد ل سه‌رانسه‌رى ئورۆپا هه‌ر تم به‌رهه‌ڤه و هه‌ر تم سه‌ر پشك بوویه و درێغى نه‌كریه كو ئه‌ڤه ژى خاله‌كا پۆزه‌تیڤه د دیرۆكا ره‌ڤه‌ندا كورد دا ل ده‌رڤه‌ى كوردستانێ, خودایێ مه‌زن ژى دایه مه و مه كارى بگه‌هینه رۆژا 26/08 هه‌ر سپێدێ ل گه‌ل بانگێ دیكلان مه كاروان هاژۆت و پشتى روودانا بۆیه‌ره‌كا بچووك كو ب رێكێ ڤه رووداى و بڕینا 275 كیلۆ میتران گه‌هاینه جهێ مه‌ره‌مێ هه‌لبه‌ت دیمه‌نه‌كه قه‌ت مرۆڤ ژ بیرناكه بێ ده‌ستێ مرۆڤى رۆندك خوه ژ چاڤان درژینن كوردستانى وه‌رپێچاى ئالایا كوردستانێ ب گه‌میان ب ترێنان ب ترومبێلان ب پاسان و پیاده به‌ر ب كۆلنێ دهاتن.. دهاتن (من كل فج عمیق) من دیتن ژ ئه‌سه‌ندنافیا هاتبوون ژ ئیتالیا و فره‌نسا و لۆكسمبورگ و به‌نه‌لۆكس و ژ سۆیس و ئاوستریا دیمه‌نه‌كه مرۆڤى دهه‌ژینه… سلۆگانان خۆن د فیراند و گۆرێ مرۆڤى دبرنه ئاسمانێ حه‌فتێ (به‌لێ ژبۆ ریفراندۆمێ. به‌لێ ژبۆ ده‌وله‌تا كوردستانێ. به‌لێ ژبۆ جودابوونێ. ئێدى به‌سه بنده‌ستى…) من بخوه هزر دكر كو د ناڤبه‌را 8000-10000 كه‌س وێ ئاماده ببن، لێ دیتنێن مه شاشبوون ل گۆره‌ى داخۆیانیا رێڤه‌به‌رێ پۆلیسێن كۆلنێ كو پترى 25000 هزار كه‌س ئاما ده‌ببوون تشتێ كو ئه‌ز دخوازم ئاماژێ پێ بدم نه ئه‌وه كا چه‌ند مرۆڤ ئاما ده‌ببوون و ژ كیڤه هاتبوون، چونكى ره‌ڤه‌ندا كوردى ب هه‌لۆیستێن خوه یێن كوردانه پێگۆتیه یا ئه‌ز دخوازم بێژم ئه‌وه كو من هزر دكر ل گه‌ل ده‌ستپێكا ده‌ستپێكرنا فیستڤالێ و پشتى سروودا ئه‌ى ره‌قیب و په‌یڤا سه‌رۆكێ هه‌رێمێ ژب ئاماده‌بوویان و په‌یڤا كۆمیتا به‌رهه‌ڤكار ئه‌زێ گوه ل ته‌مبیرا شڤانێ په‌روه‌ر بم و ئه‌ندێشویا وى ب ده‌نگێ زه‌لال و چیاى گازى بكه (كینه ئه‌م؟ ئه‌مین ئه‌و كوردێن سه‌ر هشك و هه‌سن) داكو گیانێ مامۆستا جگه‌رخوین د گورێ دا ئارام ببه… داكو بیرا زیندانێن تارى یێن به‌عسیان شه‌ره‌قێنا قامچیێ ئازاردانا گه‌نجێن كورد سه‌را سترانان كینه ئه‌م و گه‌لێ شۆرشڤان و ئه‌ز دلگه‌شێ جانم هتبا بیرامه و د دووڤ دا سترانبێژێ پێشمه‌رگه حه‌سه‌ن شه‌ریف ب ده‌نگێ خوه یێ زه‌لال وێ بسترت و بێژت (كاغه‌زه‌ك ژ هێرۆشیما بۆ ته شیرین دایێ) داكو دیمه‌نێن جه‌رگبرێن كه‌مپێن دیاربه‌كر و مۆشێ و مێردینێ ل بیرا ئاماده‌بوویان، بینه پشتى وى دێ بینم ناسڕى ره‌زازى هات قێركریه، (بۆ نیشتمان و گیانفیداى خاكى پیرۆز)، دا پتر عه‌شقا په‌سار و كێریێن كوردستانێ د دلاندا ب ئازرینیت و پشتى وى جوان حاجۆ وێ ده‌ركه‌ڤه سه‌ر ده‌پێ شانۆێ و بقێرینه (پێشمه‌رگه‌نه پێشمه‌رگه‌نه … ب شه‌ڤ ب رۆژ پێشمه‌رگه‌نه)، چونكى پرانیا ئاماده‌بوویان ئه‌وبوون یێن رۆژێن سه‌خت چه‌كێ سه‌ربلندى و كه‌رامه‌تێ هلگرتین و د دووڤدا خێر و عه‌باس وێ ده‌ركه‌ڤه سه‌ر ده‌پێ شانۆێ بیرا كۆچا ملیۆنى ل بیرا مه‌بینه ب سترانا خوه (وه‌ستیابووم ل رێكه‌ك دوور) و دێ ڤیستیڤال ب ده‌نگێن زه‌لالێ زه‌كریا عه‌بدوللا و عه‌دنان كه‌ریم و نیزامه‌دین ئارینج ب داوى وه‌ره. لێ داخا من ئه‌و داخه من كه‌س ژ ناڤهاتیان ل سه‌ر ده‌پێ شانۆێ نه‌دیت و گوه ل ده‌نگێ وان نه‌بوو فیستیڤالێ ب سروودا ئه‌ى ره‌قیب ده‌ستپێكر، لێ كیژان ئه‌ى ره‌قیب ؟؟ ئه‌ى ره‌قیبا وه‌رگێراى شێوازێ بادینى و شێواندى په‌یڤا جه‌نابێ سه‌رۆكێ هه‌رێمێ هاته خواندن و په‌یڤا كۆمیتا به‌رهه‌ڤكار و پاشێ بڕگا هونه‌رى پشتى هنه‌ك دیداران ده‌ستپێكر، لێ ل جهێ سترانا كینه ئه‌م و گه‌لێ شۆرشڤان سترانا (ئه‌ز خه‌له‌فم خه‌له‌فم هه‌واره میر هه‌وارا من) ژ ئالێ كۆمه‌كێ ڤه هاته گۆتن كو هه‌كه شاش نه‌بن یێن رۆژئاڤایێ كوردستانێنه و ل جهێ سترانا كاغه‌زه‌ك ژ هێرۆشیما سترانا (ئه‌ز كه‌ڤۆكم كه‌ڤۆكا سۆڕم واى واى ل سه‌ر بان و بنبانا تنێ دمه‌شم) و ل جهێ ناسڕێ ره‌زازى و مارشا بوو نیشتمان سترانا (شه‌مسیخانێ منێ سوند خارى مێرا ناكم)، هاته گۆتن و ل جهێ جوان حاجۆ بكته قێر و بێژت پێشمه‌رگه‌مه سترانا (هه‌ى نێرى نێرى ل سه‌ربانێ بلند چێرى زالم وه‌یلۆ)، هاته گۆتن و ل جهێ خێرو عه‌باسى و سترانا وه‌ستیابووم سترانا (هێژایێ هێژایێ) ب ده‌نگێ رۆژینێ هاته گۆتن ل داویێژى نه نه زه‌كه‌ریا و نه‌ژى عدنان و نه‌ژى نیزامه‌تین ئارینج مه نه دیتن كه سێ كو د ناڤ هونه‌رمه‌ندان دا مه نیاسى هونه‌رمه‌ند براده‌ر بوو هه‌و داكو ژبیر نه‌كم راپه‌ره‌كێ گه‌نج یێ رۆژئاڤایێ كوردستانێ ب داوى هات، به‌لێ ئه‌ڤه‌بوون مارش و سترانێن ڤیستیڤالا سه‌رخوه‌بوونێ ل كۆلنێ تشتێ كو ئه‌ز تێگه‌هشتیم كو كۆمیتا به‌رهه‌ڤكار پرانیا وان ژ براده‌رێن مه یێن رۆژئاڤایێ كوردستانێ بوون، هه‌روه‌كو خۆیا كو ڤه‌خواندنا هونه‌رمه‌ندان ژبۆ پشكداریا فیستیڤالێ ل گۆره‌ى گێۆل و حه‌زا وان بوویه، له‌ورا ژى ولێ خۆیایه هه‌سپێ هونه‌رمه‌ندێن ناڤهاتى ل جه‌م ڤێ كۆمیتێ ئالیك نه دبوون تشتێ بۆ من ئه‌نتیكه و جهێ سه‌رسورمانێ كو بۆیه‌ره‌ك ب ڤى ئاواى گرنگ و مه‌زن و دیرۆكى و ب سپونسه‌ریا تۆرا مه‌دیایا رووداوێ و دلبرین دارا بخوه ئاما بوویه ئه‌ڤ هزره یان ئه‌ڤ تێبینى نه‌كریه تنێ دگۆت: ئیرو قیامه‌ت رابیه زنار ل جه‌م من قیامه‌ته ل جه‌م ته و ئالایێ چى هه‌یه؟؟
ل گه‌ل رێزێن من ژبۆ كۆمیتا به‌رهه‌ڤكار و ماندیبوون و وه‌ستیانا وان ل به‌رچاڤ تێ گرتن.
ده‌ستخوه‌ش ئاریێ هه‌رسینى
هه‌ر تم دیتنا من ئه‌و بوویه كو ده‌ما كه‌سه‌ك ره‌وشه‌نبیر بخوازه خوه بێخه ناڤا چارچوڤه‌یه‌ك به‌رته‌نگدا ده‌ردوورێن خوه په‌روازه بكه یان بریار بده د ناڤ جیهانا ره‌وشه‌نبیراندا نه‌مینه وى چاخى بلا بجت ناڤێ خوه د ناڤ رێخستنێن پارتیه‌كا كوردستانی دا بنڤیسه كیژان پارتى دبه بلا ببه گرنگ ئه‌وه ناڤێ خوه تۆمار بكه و بكه‌ڤه ناڤا كێشڤه كێشا حزبێن كوردیدا. ل ڤێره مه‌ره‌م ئه‌و نینه كو پارتیێن كوردستانى كارو خه‌باتێ ژبۆ سه‌رخوه‌بووونا كوردستانێ و كوردبوونێ ناكن، به‌لكو ته‌ڤایا پارتیان به‌رژه‌وه‌ندیا پارتیێن خوه ل به‌رى هه‌ر به‌رژه‌وه‌ندیه‌كا دن دده‌ینن و بۆ كه‌سه‌ك ره‌وشه‌نبیر ژى كوردبوون و سه‌رخوه‌بوونا كوردستانێ ل پێشیا هه‌ر ئه‌وله‌ویه‌ته‌كێ یه و ئه‌ڤ خاله‌ژى ژ خالێن بنه‌سڕه ل جه‌م ره‌وشه‌نبیرى یان نڤیسه‌رى. ده‌ستبه‌ردانا رێزێن پارتى دیمۆكراتى كوردستان ژ ئالیێ برێز ئارى هه‌رسینڤه ب شێوه‌یه‌ك ده‌مكى هه‌تانى پشتى ریفراندۆما 25/09/2017 ژبۆ من نه‌سه‌یربوو به‌لكو چاڤه‌رێكریبوو چونكى هنه‌ك نیاسبوونا من ل گه‌ل كاك ئارى هه‌یه و ده‌مه‌ك كن مه بهه‌ڤره د چارچووڤه‌یه‌كێدا كاركریه. ب راستى مرۆڤه‌كى وه‌لاتپارێز و كوردستانپه‌رێس و حه‌یرانێ سه‌رخوه‌بوونا كوردستانێ یه، له‌وما ژى نه‌خوه‌ست د كه‌ڤلوژانكێ حزبایه‌تیێ دا بمینه. ب دیتنا من بێ ئالیبوون دده‌مه‌كیدا مینا ڤێ روژه‌ڤێ، بۆ كه‌سه‌ك ره‌وشه‌نبیر ب تایبه‌ت نڤیسه‌ر گرنگه و د نڤیسینێن خوه‌دا دكاره پتر رووبه‌رێ ئازادیا بیروبۆچوونان ببینه و مفاى ژێ وه‌رگره، نڤیسین بۆچوونێن وى ل سه‌ر چو ئالیه‌كێژى ناهێن لقه‌له‌مدان، هیڤیدارم هه‌م كاك ئارى و هه‌م ئه‌م هه‌مووژى ته‌ڤدا بكارین ب بیروبۆچوونێن خوه پتر خزمه‌تا ڤێ پرسا چاره‌نڤیساز بكین؛ چونكى ئه‌ڤه دیرۆكه و دێ هێته توماركرن و وه‌رچه‌رخانه‌كا هه‌رى گرنگ و مه‌زنه د دیرۆكا ته‌ڤگه‌را رزگاریخوازا كوردستانێ دا. بێگۆمان ژبۆ پرسه‌كا وه‌كو ریفراندۆمێ هندى مرۆڤ قوربانیێ بده‌ژى هه‌ر كێمه، ڤێجا ئه‌و قوربانى پله و پایه به یانژى سه‌رمایه‌به چونكى به‌رى مه جۆبارێن خوینێژى یێن هاتینه رشتن، ژبۆ ڤێ ئارمانجا پیرۆز و نابه ب هیچ ره‌نگه‌كێ ئه‌و قوربانى و جۆبارێن خوینێ ب هه‌روه ده‌رباز ببن. بلا ریفراندۆم ژبۆ سه‌رخوه‌بوونا كوردستانه‌كا ئازاد، به‌رخوه‌ر و به‌رهه‌مێ وان قوربانیان بیت، گه‌لێ كورد قه‌ت و قه‌ت نابیت قوربانیێن خوه ژبیر بكه‌ت یانژى ب به‌هانا كو ده‌م هاتیه یان نه‌هاتیه رازى ببیت، ژبۆ پرسه‌كا ب ڤى ئاواى هه‌رتم ده‌مه و هه‌لبه‌ت دوژمنیێن مه وێ به‌هانا ده‌رخن و بێژن نه‌ده‌مه ئه‌ڤه به‌رسڤا ئیرۆیه و به‌رسڤا دوهیژى ئاگر و ئاسن و سێداره‌بوون. ئیرۆژى بكارن بكن به‌رسڤ دێ هه‌ر به‌سڤا رۆژێن كمێد بیت!! ئه‌رێ كه‌نگى كوردان یان هه‌ر گه‌له‌كێ ژبۆ هلكرنا ئاگرێن شۆرشان خوه ل هیڤیا ده‌مێن گونجاى گرتینه؟ یان موله‌ت و روخسه‌ت وه‌رگرتینه ئه‌ڤه بریارێن گه‌لن و گه‌ل بریارێ دده‌و د پرسا ریفراندۆما كوردستانێ دا نابیت ئه‌م خوه ب هیچ هه‌رێمه‌كا دن ل جیهانێ به‌راوورد بكین ب تایبه‌ت یێن ئوروپا و رۆژاڤا چونكى دو ره‌وشێن ژ هه‌ڤ جودانه. ژبۆ من تشته‌كى زۆر نۆرماله ده‌ما ریفراندۆم ژبۆ سه‌رخوه‌بونێ ل هه‌رێمه‌كا مینا كه‌ته‌لونیا یانژى باسك بێنه ئه‌نجامدان و ده‌نگێن نه‌خێر ژبۆ جودابۆنێ پتربن ژ یێن به‌لێ یانژى د ناڤبه‌را 50 ـ60 دابن، به‌لێ ل گۆره‌ى دیتنا من ل ریفراندۆما كوردستانێ ژبۆ جودابوون ژ ده‌وله‌تا ئێراقێ ده‌نگێن به لێ ژ 80 ـ 90 كێمتر بن تشته‌ك ژ وێ فهێتتر و كرێت تر و سه‌رشۆریتر و بێ وه‌فاییتر نینه ل هه‌مبه‌ر ڤى وه‌لاتى چونكى ل هه‌رێمێ مه ناڤێن وان ل سه‌رى ئیناى ل ده‌مێ ریفراندومێ وه‌لاتێ وێ هه‌رێمێ تنێ هزرێ خوه د بابه‌تێ ئابوریدا دكه‌ت و ژبۆ پاشه‌رۆژا وى كیژان باشتره هزرێن خوه دكه‌ن ژیانا وان چه‌وان به‌خته‌وه‌رتر دبیت جودا ببیت یانژى نا، هزر دكه‌ت ژبۆ خانه‌شینا وى كیژان باشتره چونكى وى مینا وه‌لاتیێ كورد ل هه‌رێما كوردستانێ نه قه‌ده‌غه‌كرنا زمانێ ماكێ دیتیه و نه‌ژى گرتن و ئه‌شكه‌نجه و ئازار نه‌ژى گوند و كاڤل كرن و ده‌ربه‌ده‌رى و ده‌رده‌سه‌رى نه‌ژى خه‌باتا نهێنى و سێداره‌دان و نه‌ژى كیمیاباران و ئه‌نفال و مشه‌ختبوونا ملیۆنى!! ئه‌ڤه‌یه جیاوازى و جوداهى دناڤبه‌را ریفراندۆما كوردان و یا هنك هه‌رێمێن دن. دڤێت تاكێ كورد هزرا خوه دوان هه‌موو ده‌رده‌سه‌رى و نه‌هامه‌تێن مه ل بیر ئانینه بكه‌ت و پاشێ بریار بده‌ت و ده‌نگ بده‌ت. رۆژ هاتیه كو وه‌لاتیێ كورد هزر ل شكۆ و بها و كه‌رامه‌تا خوه بكه‌ت هه‌تا كه‌نگێ ل گه‌شت و كاروان و سه‌فه‌رێن خوه ئه‌مێ بناڤێ وه‌لاتێن خه‌لكێ یێن ئه‌م داگیركرین خوه ده‌ینه نیاسین؟! هه‌تا كه‌نگێ ئه‌مێ خه‌لكێ كوردستانا ئێراقێ و كوردستانا تركا و كوردستانا ئیرانێ و كوردستانا سووریا بین!! تاكو ئه‌م بێنه نیاسین؟ ماجاره‌كێ ئه‌م نكارین بێژین ئه‌ز خه‌لكێ كوردستانێ مه و هه‌و؟؟
ژ خه‌لكێرا جانه‌گانه و ژ خوه‌را گۆلكن
هندى كو من دیرۆكا ژیانا وان كه‌ساتیێن كورد ئه‌وێن ژ ده‌رڤه‌ى په‌روازێ كوردایه‌تیێ و ژ ده‌رڤه‌ى گه‌لێ كورد ب تایبه‌ت د ناڤ گه‌لێن تورك و فارس و عه‌ره‌ب دا، مه‌ره‌ما من ده‌ما د كه‌ڤنه د قادا خه‌باتێ و كاری دا ژبۆ گه‌لێن ناڤهاتى گه‌له‌ك ب شاره‌زاى و زیره‌كى و سه‌ركه‌فتى و وێره‌كانه كارێ خوه برێڤه بریه و 100% كه‌تیه د خزمه‌تا وى گه‌لی دا، یێ كو بۆ كار دكه‌ت، ڤێجا ئه‌ڤ كه‌سایه‌تیه سیاسه‌تڤانبه, هونه‌رمه‌ندبه, كه‌سایه‌تیا له‌شكری به، كه‌سایه‌تیا ئۆلی به، نڤیسه‌ربه هتد..دكارم بێژم د خزمه‌تكرنا خه‌لكی دا كورد باشترین و سه‌ركه‌فتیترن خزمه‌تكارن، هه‌كه نه‌چینه دیرۆكا كه‌ڤن و سه‌لاحه‌دینێ ئه‌یۆبى و خزمه‌تا وى یا هه‌رى مه‌زن و دیرۆكى ژبۆ عه‌ره‌بان ل بیر نه ئینین و ئاماژێ پێ نه‌دین چونكى كارێ ئه‌یۆبى ئه‌نجامداى، بخوه پێدڤى چه‌ندین بابه‌تێن درێژه به‌لكو پێدڤى ده‌ینانا پرتووكانه، دیسا ل دیرۆكا هه‌ڤچه‌رخ و ئاڤاكرنا ده‌وله‌تێن مودێرن ل ده‌ستپێكا چه‌رخێ بیستێ هه‌كه ئسمه‌ت ئینۆنۆ پاشا و رۆلێ وى د ئاڤاكرنا ده‌وله‌تا مۆدێرنا تركی دا و خزمه‌تا وى ژبۆ تاكێ تورك نه ئینین زمان باشترین و ناڤدارترین نڤیسه‌رێن توركان و ئه‌كته‌ر و سینه‌ماكارێن وان كوردن دیسا هه‌كه نه چینه دیرۆكا سووریا كو باشترین سه‌رۆكوه‌زیر د دیرۆكا سووریا دا و یێ ژ هه‌ر كه‌سه‌كێ پتر قوربانى دایه داكو ئێكگرتنا عه‌ره‌بان بجه وه‌ره، ئه‌و ژى شوكرى قوه‌تلیێ كورد بوویه ژ بلى نڤیسه‌ر و ئه‌كته‌ر و زانایێن ئولى كو خزمه‌تا ده‌وله‌تا سووریا كرینه‌ناڤدارترین هه‌لبه‌ستڤانێ عه‌ره‌بان و میرێ هه‌لبه‌ستڤانان كورده و ژێرا دبێژن ئه‌حمه‌د شه‌وقى كورد كورێ كوردى بوویه زیره‌كترین و ناڤدارترین رۆژنامه‌ڤانێن مسرێ كورد بوونه، ب ناڤێن (عه‌لی ئه‌مین و مسته‌فا ئه‌مین)، كو دامه‌زرێنه‌رێن رۆژنامه‌ڤانیا میسرێنه ئها نوكه ژى باشترین و بناڤدارترین ئه‌كته‌رێن میسرێ كوردن باشترین و خوه‌شده‌نگترین قورئانخوین، دیسا كوردبوویه، لێ ب حه‌سابا مسرێ دیسا مه‌زنترین سینه‌ماكار و ده‌رهێنه‌رێ عه‌ره‌بان كورده و بهایێ دو فره‌هنگان خزمه‌ت ژبۆ كوردان نه‌كریه ژخوه ئه‌گه‌ر ئه‌م ڤه‌گه‌رین دیرۆكا ئێراقێ مرۆڤ دكاره بێژه ژ سه‌د سالان و ڤرده باشترین ئه‌فسه‌رێن له‌شكرى و باشترین سیاسه‌تمه‌دار و باشترین سه‌روكوه‌زیر و سه‌رۆك كۆمار و باشترین زانایێن ئۆلى ته‌نانه‌ت یه‌ك ژ مه‌زنترین هه‌لبه‌ستڤانێ ئێراقێ كو زه‌هاویه ئه‌ڤانا هه‌موویان باشترین خزمه‌ت پێشكێشى وه‌لاتێ ئێراقێ كریه بێكو كورد خێرێ ژێ ببینن هه‌لبه‌ت ژبۆ ئیرانێ و گه‌لێ فارس ژى هه‌ر هه‌مان به‌زمه و هه‌مان دیلان خزمه‌تكرنا بیانیان ب شێوه‌یه‌ك سه‌ركه‌فتى و وێره‌كانه وه‌كو كولتۆره‌كێه د ناڤ كوردان دا ئێدى تشته‌كى نۆرماله. جاران مرۆڤ بۆ خوه و د دلێ خوه‌دا دبێژه ئێدى نه‌مایه ئه‌و رۆژ كه‌سێن كورد خزمه‌تا بینیان یا دوژمنێن خوه بكن مینا به‌رێ، چونكى ره‌وش گه‌له‌ك یاهاتیه گوهۆرین،/ به‌لێ مخابن وه‌سا نینه و نه ئه‌و بهاره یا ئه‌م ل به‌ندا كولیلكێن وێ ژ بێ ئومێدیا خوه من ئه‌ڤ چه‌ند رێزه نڤیسین هنگ كه‌س نها ژى ل سه‌ر هه‌مان په‌یره‌و و هه‌مان كۆلتوورێ ئه‌یۆبى و ئینۆنۆى به‌رده‌وامن ب راستى ڤى هه‌لۆیستى ژ دل ئه‌ز برینداركرم. ل رۆژا ئه‌ینیا ده‌ربازبووى 21.07.2017 ژ ئه‌گه‌رێ ده‌ینانا ده‌ریزانكێن ئه‌لكترۆنى بۆچوونه ژۆرا مزگه‌فتا ئه‌قسا ل ئۆرشه‌لیمێ شه‌ر و په‌ڤچوون د ناڤبه‌را عه‌ره‌بان و پۆلیسێن ده‌وله‌تا ئسرائیلی دا په‌یدابوو كوشتى و بریندار ژى هه‌بوون ژ ئه‌گه‌رێ ڤان بۆیه‌ران پێله‌كا نه‌رازیبوونان په‌یدابوو ب تایبه‌ت ل ده‌وله‌تێن عه‌ره‌بى و ئیسلامى كو پرۆته‌ستۆیا ڤان دژواریا و كریاران دكرن پرانیا داخۆیانیان نه‌رم بوون و ژ هه‌ردو ئالیان دخواستن كو خوه راگربن و بكارن خوه كونترۆل بكن داكو بۆیه‌ر مه‌زنتر نه‌بت و ل چاره‌سه‌ریێ بگه‌رن ژبۆ كو پتر خوین نه‌رژت و ئێكه‌تیا زانایێن ئیسلامێژى به‌یننامه‌یه‌ك وه‌شاندن و ب دژوارى پرۆتوستۆیا ڤێ بۆیه‌رێ كرن و داخواز ژ ته‌ڤایا موسلمانان كر كو هه‌لۆێسته‌ك ل هه‌مبه‌ر ڤان بۆیه‌ران هه‌به. لێ كه‌سێ هه‌رى دژوار ئاخفتى و خوه ل بۆیه‌ران كریه خوه‌دى و هه‌روه‌كو ئه‌و عه‌ره‌بێن فلستینێ باب و برا و پسمامێن وى دیسا كورده‌ك بۆ بناڤێ عه‌لی قه‌ره‌داغى ئه‌میندارێ گشتى یێ یه‌كه‌تیا زانایێن موسلمانان كو د داخۆینیا خوه دا هایداریێ ددا ده‌وله‌تا ئسرائیل و د بێژه هۆكار و ئه‌گه‌ر چى دبن بلا ببن لێ نابه رێك لبه‌ر نمێژكه‌ران وه‌ره گرتن یا ژ ڤێژى خرابتر عه‌لی قه‌ره‌داغى داخوازا به‌رپاكرنا شۆره‌شێ دكت دژى ئسرائیلى هه‌لبه‌ت ئه‌ڤ عه‌لیه هه‌ر ئه‌و عه‌لیه ئه‌وێ پارسال پشتى ب ده‌هان گوند و باژارێن كوردان ل باكۆرێ كوردستانێ ب ده‌ستێ ده‌ستهه‌لاتدارێن تركیا هاتینه كاڤل و وێرانكرن و ب سه‌ر سه‌رێ به‌لنگازان دا هه‌ڕفاندین، ئه‌ڤ عه‌لیه چوویه تركیا و ده‌ستخوه‌شى ل ده‌ستهه‌لاتێ كر و بێكو گوه بدته هه‌ستێ 30 ملیۆن كوردان ل باكۆر ب ده‌نگه‌ك بلند دگۆت گونه‌هه كورد ل دژى حوكمه‌تا ئاكه‌پێ شه‌ڕى بكن وه دیت چاوا مێركێ كورد ژبۆ خزمه‌تكرنا بیانیان داخوازا به‌رپابوونا شۆرشان دكه به‌لێ هه‌ر ئه‌و مرۆڤ د ده‌ڤێ ویرا نائێت ب حوكمێ جهێ خوه و كورسیا خوه بانگ ل ده‌وله‌تێن ئیسلامى و عه‌ره‌بى بكه و بێژته وانا چما هوون ل دژى ریفراندۆما كوردان و راگه‌هاندنا ده‌وله‌تا كوردستانێ نه د ده‌مه‌كێدا كو د دیرۆكێ دا ئه‌م وه‌كى ئیرۆ پێدڤى پشتگیریا ده‌ره‌كى نه‌بووینه و هه‌ر ئه‌ڤى كه‌سى به‌رى نها ب ده‌هان جاران داخوازا كریه كو ده‌وله‌ته‌ك سه‌ربخوه ژبۆ فلستینیان بێته راگه‌هاندن و دانپێدان پێ بێته‌كرن باشه گه‌لۆ پرسیاره‌كێ ئه‌ڤێن هۆسا ژ دیرۆكێ ناترسن كو رۆژه‌كێ ژ رۆژان ڤان هه‌لوێستان ئاشكه‌ره‌بكن.
ب ڤى ئاواى داعش ب داوى نابه
پتره ژ 80 سالان عه‌ره‌بێن سونه‌مه‌زهه‌ب ل ئێراقێ ب رۆله‌كى هه‌رى نێگاتیف ل هه‌مبه‌ر كوردان و شیعه مه‌زهه‌بان له‌یزینه بگره ژ ئاڤا كرنا پارتا به‌عسا شۆفینى و رۆلێ وان د سۆپایێ سه‌ركوتكه‌رێ سه‌ددامیدا هه‌تانى دگه‌هى راوه‌ستیانا وان ل دژى هه‌بوونا پێشمه‌رگه‌ى ل مووسل و پاشێ پێشوازیا هه‌رى گه‌رما وان ژبۆ چه‌تێن ده‌وله‌تا خیلافه‌تا ئیسلامى ل ده‌ما ڤه‌گرتنا باژارێ مووسل ل ناوه‌راستا سالا 2014. داكو بابه‌ت درێژ نه‌به ئه‌م ل سه‌ر قووناغێن ناڤهاتى ناراوه‌ستین. خۆیایه كو پرانیا كه‌سایه‌تیێن خوه‌دى هه‌ژمۆن و كاریگه‌ر د ناڤ پێكهاتا سونه‌دا زانین چى ب چیه یانژى زانین چ گونه‌ه ئه‌نجامداینه هه‌ر هیچ نه‌به وژدانا وان ئه‌و ئێشاندینه و هه‌ستێ وان لڤاندینه كو بكه‌ڤنه ل گه‌ل به‌ره‌یێ هاتیه ته‌په سه‌ركرن و زۆردارى ب هه‌مى ره‌نگان دیتیه، له‌وما ئه‌م ئیرۆ پارا هه‌رى مه‌زن ژ سه‌ركردێن سونا ل هه‌ولێرێ دبینین و هه‌موو ژى خوه‌دى هه‌لوێستێن جامێرانه و مه‌ردانه‌نه ل هه‌مبه‌ر گه‌لێ كورد بۆ نموونه ئیرۆ ئێك ژ مه‌زنێن وان د چارچووڤێ پشتگیریا وان ژبۆ ریفراندۆما كوردستانێ، ژبه‌ر كه‌ناله‌ك كوردی دگۆت: پشتی كو ئه‌وا داعشێ ب سه‌رێ كوردان ئیناى و هه‌لوێستێ مه یێ نه‌رێنى ل هه‌مبه‌ر كوردان مه قه‌ت باوه‌ر نه‌دكر ئه‌و دێ ل گه‌ل مه ڤێ ره‌فتارا جامێرانه كن و ب هزاران ئاوارێن مه خودان كن، له‌ورا ژى ئه‌م ب دل و جان ل گه‌ل رێفراندۆمێ و ده‌وله‌تا كورداتیێ نه) عه‌ره‌بێن سونه مه‌زهه‌ب ب دیتنا من گهانه وێ راستیێ كو ئێدى سه‌رۆك كۆمار و سه‌رۆكێ وه‌زیران و سه‌رۆكێ په‌رله‌مانى و هه‌موو وه‌زاره‌تێن سه‌روه‌رى ل گه‌ل له‌شكرى و هه‌والگیرى و په‌یوه‌ندیێن ژ ده‌رڤه د ده‌ستێ واندابن و میرێ دلێ خوه بن ئه‌و رۆژ چوو و فنها و ئێدى نا ڤه‌گه‌ره. ئێدى عه‌ره‌بێن سونه ژى گهانه وێ راستیێ كو گه‌ره‌كه هه‌ركه‌س لنگێ خوه ل گۆره‌ى به‌ركا خوه درێژ بكه… هه‌ر كه‌س ل گۆره‌ی شیانا خوه بارى راكه, پۆستێن وان ل گۆره‌ى گرانیا وانه. ئه‌ڤه بخوه پیًشكه‌تنه‌كا هه‌رى باشه و ب دیتنا من ئه‌ڤ تێگه‌هشتنا هه ژبۆ دۆرهێلى دێ ئارامیكێ ل ده‌ڤه‌رێ په‌یداكت و دێ بته ئه‌گه‌رێ پێشڤه‌چوونێ و وه‌رگه‌راندنا رۆپه‌له‌كێ نوو ئه‌م بخوازین نه‌خوازین پرانیا رێكخراوێن تیرۆرستى مینا قاعیده و بۆكو حه‌رام و نصره و رێكخراوا ده‌وله‌تا ئیسلامى ل ئێراقێ و شامێ هتد… هه‌ر هه‌موو سنى مه‌زهه‌بن لێ مه نه‌گۆتیه هه‌موو سنى ل گه‌ل ڤان رێكخراوانن. لێ دیسا دڤیا بێ دودلى و شه‌رم ئه‌م بێژین ل ده‌مێ ڤه‌گرتنا باژارێ مووسل ژ ئالیێ چه‌تێن ده‌وله‌تا خیلافه‌تا ئیسلامی ڤه هژماره‌كا هه‌رى به‌رچاڤ ژ خه‌لكێ باژارى پێشوازى لێ كرن و به‌یعه دانه خه‌لیفێ وێ (ئه‌ڤه نایێ ڤه‌شارتن) و بوونه سه‌ربازێ ڤێ ده‌وله‌تا تیرۆرستى یاكو هه‌موو ستانداردێن جیهانى د تاوانان دا ده‌ربازكرین و تشته‌ك ناڤێ وێ تاوانه نه‌ماى ل هه‌مبه‌ر وه‌لاتیان دا نه‌ماى نه‌كرى. پشتى زانینا راستیان گه‌له‌ك ژ ڤان كه‌سان په‌شێمانبوون ل تاوانێن خوه، خوه ژ ده‌ستێ ڤێ رێكخراوا تیرۆرستى قورتالكرن و هنده‌ك ژى مان و ل مووسل شه‌رێ مان و نه‌مانێ كرن یان هاتنه كوشتن یانژى كه‌تنه ده‌ستێن هێزێن ئه‌منى و هاتنه ڤه‌گوهاستن ژبۆ زیندانان ب مه‌ره‌ما هووربینیێ ل گه‌ل، ئه‌ڤه ژى پێرابوونه‌كا نۆرمال و قانوونى یه و ل گۆره‌ى هه‌موو پیڤه‌ران ژى د ڤێ ئه‌ڤ جۆره كه‌سانه وه‌رن زیندانكرن تشتێ كو دیسا مرۆڤى بریندار دكه دكارم بێژم رۆژانه ئه‌ڤ كه‌سایه‌تى و سه‌ركردێن سونه‌مه‌زهه‌ب یێن كۆنگرێن چاپه‌مه‌نى و پرێس كۆنفرانسان گرێ ددن و ئۆرگانیزه دكن و تێدا داخوازا ب ده‌هان تاوانباران دكن كو ل ده‌مێ ئوپه‌راسیۆنا رزگاركرنا باژارێ مووسل دا هاتینه گرتن بێنه ئازاد كرن و پرسیارێ ژ خوه ناكن ئه‌رێ چما ئه‌ڤ مرۆڤه هاتینه گرتن و ب مخابنی ڤه ئه‌ڤ بابه‌ته ژى خستینه د چارچووڤێ شه‌ره‌نیخا هزار و چارسه‌دسالیا سونه‌تى و شیعیه‌تیێ دا، دیسا ڤان داخواز و داخۆیانیان ژ پایته‌ختێ هه‌رێما كوردستانێ هه‌ولێرێ دده‌ن بێ كو گوه بده‌نه وێ ئیحراجا بۆ ده‌ستهه‌لاتا كوردى په‌یدا دبه ژ ئه‌نجامێ داخواز و داخۆیانیێن سه‌ركرده و سه‌رۆك هۆزێن سونه پاشێ مانه رۆژانه هوون دبێژن گه‌ره‌كه ره و رییشالێن تیرۆرستان ده‌ربێخین داكو جاره‌كا دى شین نه‌بن و ته‌لهه نه‌ده‌ن؟ بهێلن ده‌زگه‌هێن ئه‌منى چى ل هه‌رێما كوردستانێ و چى ل ئێراقێ كارێ خوه بكن, من ل بیره پشتى شه‌ڕێ ئازادكرنا ئێراقێ ل سالا 2003 ب هه‌مان شێوه‌ى سه‌ركرده و سه‌رۆك هۆزێن عه‌ره‌بێن سونه ل مووسل و ده‌وروبه‌ران و تكریت و ئه‌نبار بوونه ئه‌گه‌ر و ئاسته‌نگ كو هه‌موو تاوانبارێن مه‌زن یێن به‌عسیان و ده‌ستێن وان ب خوینا هه‌ژاران سۆر ژ دادگه‌هان قورتال ببن و لێپێچین ل گه‌ل نه هێته‌كرن هه‌ر ئه‌و تاوانبار د دووڤدا بوونه سه‌ركرده‌یێن هه‌رى گرنگ د رێكخراوا تیرۆرستیا قاعیده دا و بوونه ئه‌میر ل ناڤ رێزێن چه‌تێن ده‌وله‌تا خیلافه‌تا ئیسلامى ل ئێراقێ و شامێ و یێ گۆمركا هه‌رى مه‌زن ژى داى هه‌ر هه‌ژار و به‌لنگازێن سونى و كوردان بوون و گه‌ره‌كه ئه‌زموونا ده‌ربازبووى ببته باشترین وانه چونكى د ناڤبه‌را هه‌ڕفین و ژناڤچوونا رژێما سه‌ددامى و به‌عسیان و ژناڤچوون و هه‌ڕفینا داعشێ تنێ 14 سالن ئانكو ده‌مه‌كى كورته و هه‌ر هه‌مان كه‌سایه‌تى و كاراكته‌ر د قادێ دانه هیڤیدارم به‌رپرسێن كوردان ژى ل سه‌ر ڤێ خالێ چاڤ ڤه‌كرى بن.
نيشاندان
WP Facebook Auto Publish Powered By : XYZScripts.com