ل داوی دیدارا ئالیێن سیاسی ل هه‌رێما كوردستانێ ل گه‌ل سه‌روَكێ هه‌رێمێ ژ ئالیان هاته‌ خواستن كو به‌رهه‌ڤیان ژبوَ ئه‌نجامدانا ریفراندوَما چاڤه‌رێكری را بكن، ئه‌ڤێ یه‌كێژی داخویانیێن جودا جودا ل په‌ی خوه‌ ئانین لێ داخویانیێن نافخوه‌یا هه‌رێمێ ئانكو لوكال دێ ڤه‌دینه‌ ره‌خه‌كی و هێنه‌ سه‌ر دیتن و هه‌لویستێ ئوروَپا و ده‌وله‌تێن رۆژئاڤا به‌ری دوو رۆژان(31-01-2016) و د چارچوَڤێ وان پێكولێن تێنه‌كرن ژبوَ لهه‌ڤئانینا ئالیێن سیاسی ل هه‌رێما كوردستانێ كونسلێن چه‌ندین وه‌لاتێن ئوروَپی رابین ب سه‌رادانا پارتیێن كوردی و یه‌كه‌م ئالی سه‌ره‌داناوی كرین كومه‌لائیسلامیا كوردستانێ بوو پشتی ل هه‌ڤ گوهوَڕینا دیتن و بوَچوونان پاشێ د پرێسكونفرانسه‌كێدا رێزدار علی باپیر میرئَ كومه‌لا ئیسلامی بوَ ده‌زگه‌هێن راگه‌هاندنێ گوت: كونسلان گوتنه‌ مه‌ ئه‌م نها ل گه‌ل ئه‌نجامدانا ریفراندوَمێ نینین و دبت كو ل پاشه‌رۆژێ دیتنا مه‌ وه‌ره‌ گوهوَڕین و ئه‌م دخوازین عێراقه‌كا یه‌كگرتی هه‌بت و درێكا وێدا ئه‌م ئالیكاریا وه‌ بكین.
هه‌ر ئه‌ینی رۆژێ و ئه‌ینی كونسلان سه‌ره‌دانا پیلوَتبیروَیا پارتی دیموكراتی كوردستان كرن و ل گه‌ل مه‌زنه‌ به‌رپرسێن وێ پارتیێ جڤیان و ره‌وشا نازكا هه‌رێمێ و ئه‌و ئاسته‌نگ و هه‌ڤڕكیێن هه‌رێم دووچار بووی ئێخستن به‌ر باس و ڤه‌كوَلینێ و دیتن و بوَچوون ل هه‌ڤ گوهارتن، ل گه‌ل ب داوی هاتنا جڤینێ به‌رێز فازل میرانی سكرتێرێ پیلوَتبیروَیا پارتی بوَ رۆژنامه‌ڤانان گوت: دجڤینێدا كونسلان نه‌گوتیه‌ ئه‌م دژی ئه‌نجامدانا ریفراندومێنه‌ هه‌ردوو به‌رێز ژی راست دبێژن چنكو وه‌لاتێن رۆژئاڤا قه‌ت هه‌لویسته‌ك زه‌لال نه‌بوویه‌ ژ هه‌رێما كوردستانێ چنكو به‌ری نهاژی بدروستی ل 06/01/2016 رێزدار مه‌سعود بارزانی سه‌روَكێ هه‌رێما كوردستانێ ل هاڤینگه‌ها پیرمام ل گه‌ل سه‌روَكێن نوێنه‌راتی و كونسولێن وه‌لاتێن بیانی ل هه‌ولێرێ كوَمبوو كو وه‌كو ئه‌ته‌كێته‌ك سالانه‌ ژبوَ ئاشكراكرنا سیاسه‌تا گشتی یا هه‌رێمێ ب ڤان كونسلان و پیروَزكرنا سالا نوو ل وان؛ سه‌روَكێ هه‌رێما كوردستانێ ب وان راگه‌هاندیه‌ كو ئه‌و رژده‌ ل سه‌ر ئه‌نجامدانا ریفراندۆمێ داكو جیهان بزانت كورد چی دخوازن و چه‌وا دێ بریارێ ل سه‌ر چاره‌نڤیسێ خوه‌ ده‌ن و ب شێوه‌یه‌ك ئاشتیانه‌. ژ وێ به‌روارێ و هه‌تانی ئیروَ هه‌لویسته‌ك زه‌لال و ئه‌رێنی ژ یه‌ك ژ وه‌لاتێن یه‌كه‌تیا ئوروَپا و نه‌ ژی ئه‌مه‌ریكا ده‌رنه‌كه‌فتیه‌ تنێ وه‌لاتێن ب زه‌لالی هه‌لویستێ خوه‌ ئێكلا كرینه‌ وه‌لاتێ هنگاریا و وه‌لاتێ ئیسرائیله‌ ب دیتنا من ئه‌ڤه‌ژی بێ ئه‌مه‌كیه‌كی مه‌زنه‌ ل هه‌مه‌بر گه‌لێ كورد تێ كرن و رۆژانه‌ به‌رپرسێن ئوروَپی دبێژن ئه‌م حێبه‌تی ماینه‌ ژ قه‌هره‌مانیا پێشمه‌رگه‌ی و پێشمه‌رگه‌ پێش هه‌موو جیهانێڤه‌ شه‌رێ تیرورێ دكه‌ت. به‌لێ وه‌سا خوَیایه‌ تنێ ئه‌ڤێن هه‌نێ سه‌رێ مه‌ گه‌رم دكن و دبێژنه‌ مه‌ هون ژبوَ مرنێ باشن به‌لێ نابت هون مافێ ره‌وایێ خوه‌ بخوازن و ئه‌م وه‌ ناسناكین وئه‌م وه‌لاته‌كێ ناس دكین و دانپێدانێ پێ دكین كو ئه‌وژی عێراقه‌ ل ڤێره‌ چی دكه‌ڤه‌ سه‌رملێ حوكمه‌تا هه‌رێما كوردستانێ ل هه‌مبه‌ر ڤێ بێ وه‌فیای وبێ ئه‌مه‌كی و نانكوَریێ. گه‌ره‌كه‌ چ پێنگاڤ بهێنه‌ هاڤێتن وه‌كو به‌رسڤدانه‌ك ل سه‌ر نه‌زه‌لالیا هه‌لویستێن وان: یه‌كه‌م ب ره‌نگه‌ك فه‌رمی هه‌رێما كوردستانێ ژ ئه‌مه‌ریكا و ئوروَپا بخوازت كو هه‌لویستێ وان یێ زه‌لال ژ ریفۆاندوَمێ و پێنگاڤێن پشتی ریفراندوَمێ چیه‌؟ دووه‌م دڤیا بله‌ز و گه‌له‌ك بله‌ز لوَبیه‌ك كوردی بهێز وه‌ره‌ ئاڤا كرن ژكه‌سانێن ره‌ڤه‌ندا كوردی ل ئه‌مه‌ریكا و ئوروَپا و ئوسترالیا كو ب روَلێ خوه‌ بله‌یزن و بكارن جهێن بریارێ ئاشنابكن ب دیروَك و خه‌باتا گه‌لێ كورد و ئه‌و قوَربانێن ڤی گه‌لی داین, سێ یه‌م كورد دكارن پشكداریا پێشمه‌رگه‌ی د رزگاركرنا میسلێ دا وه‌كو كارته‌ك بكاربینن و ب ریفراندومێڤه‌ گرێبدن، چنكو وه‌كو خوَیایه‌ وه‌لاتێن رۆژئاڤا و عێراقێ ژی ل به‌ره‌ پشتی كو پێشمه‌رگه‌ ب شه‌هید و قوَربانیێن خوه‌ ده‌وله‌تا خیلافه‌تا ئیسلامی ژناڤ دببه‌ بێن و بێژنه‌ كوردان سوپاس بوَ هه‌وه‌ و نوكه‌ هون وه‌لاتیێن عێراقێنه‌ و هه‌ڤدو بگرن و ئه‌وێ نه‌رازیه‌ ئه‌و تیروَرسته‌ گه‌ره‌كه‌ بمرت. چاره‌م ئیروَ رۆژ نه‌تنی َ رۆژئاڤا و ئه‌مه‌ریكا د ده‌ڤه‌رێ ده‌نه‌ ئیروَ هرچا روسی ژی یا هاتیه‌ ده‌ڤه‌رێ ب هێزه‌كا بوَكه‌ڤه‌(مه‌زن) بێی كو حه‌سابێ بوَ هیچ هێزه‌كێ بكه‌ت، ئه‌ڤه‌ ژی مرۆڤ دكارت بێژت ئه‌لترناتیڤه‌كه‌ ژبوَ كوردان و دكارن ل هه‌مبه‌ر وان ئالیێن دژی ریفراندوَمێ و هه‌لگرێن هزرا عێراقا عه‌ره‌بی یا هه‌ڤگرتی بكاربینت و بێژته‌ وان گه‌لێ كورد خوه‌دی مافه‌كی ره‌وایه‌ و هه‌موو رێكان وێ بگرته‌ به‌ر ژبوَ سه‌رخوه‌بوونا كوردستانێ چنكو كوردان ب سه‌ربلندیڤه‌ تێرا هندێ قوَربانی داینه‌.

د پێنگاڤه‌كا نه‌چاڤه‌رێ كری دا په‌رله‌مانێ وی وه‌لاتی د رونشتنا خوه‌ یا داوی دا چه‌ندین بریارێن بله‌ز و گرێدای ئاسایشا نه‌ته‌وه‌ییا وان دان و ژ وان بریاران قه‌ده‌غه‌ كرنا ناڤێن عه‌ره‌بی و ب زوَری تراشینا رهێن كه‌سانێن ئولدارێن رادیكال و هزر هشك دائێخستنا جهێن فروَتنا جل و به‌رگێن عه‌ره‌بی كو موسلمانێن رادیكال وان جل وبه‌رگان ل به‌ر خوه‌ دكن. روَژناما ده‌یلی میل یا بریتانی دبێژیت: پوَلیسێن تاجیكستانێ كارین رهێن 13هزار كه‌سان بتراشن و1700 هزار و هه‌فتسه‌د ژنژی رازیكرینه‌ كو حیجابێ بێخن و ئێدی بكار نه‌ئینن ب مه‌ره‌ما كونتروَلكرن و رێگرتن ل ئیسلاما سیاسی و هزرێن هشك و رادیكال ل وی وه‌لاتی هه‌روه‌ها روژنامێ ئاماژه‌ ب وێ یه‌كێژی كریه‌ كو پوَلیسان 162جهێن بازرگانی ژی دائێخستینه‌ كو تایبه‌ت بوون ب فروَتنا حیجابێ و په‌نته‌لونێن كورت و رادیوا ئازادی (Radio liberty) ژێده‌را نوچه‌یێن ناڤه‌ندا ئاسیا و تاجیكستانێ دبێژیت: هه‌ركه‌سێ رهێ وی بوَش و بوَ مه‌ره‌ما ئولی به‌رداین ب زوَری هاتنه‌ تراشین، دیسا ده‌یلی مه‌یلی درێژیێ دده‌ بابه‌تی و دبێژیت: حوكمه‌تا تاجیكستانێ ئه‌ڤ پێنگاڤه‌ هاڤێت پشتی هه‌ست ب مه‌ترسیێ كری ب تایبه‌تی ب سه‌ده‌ما هه‌بوونا ب هزاران چه‌كداران ل ئه‌ڤگانستان و پاكستانێ و هه‌ڤ سوَزیا خوه‌ بوَ ده‌وله‌تا خیلافه‌تا ئیسلامی یا داعشێ ئاشكه‌را كرین و هه‌ڤ توخیبێن وێنه‌، تێته‌ زانین كو 2000كه‌سێن تاجیكی ل ناڤ رێزێن ده‌وله‌تا خیلافه‌تا ئیسلامی (داعشی) ل سووریا شه‌ری دكن، ل هه‌موو جیهانێ نه‌كو تنێ ل وه‌لاته‌ك مینا تاجیكستانێ ئه‌ڤ جوره‌ پێنگاڤه‌ دهێنه‌ هاڤێتن به‌ری ڤی وه‌لاتی پێنگاڤێن ژ ڤی جوری ل مسرێ ژی هاتبوون هاڤێتن چنكو وه‌لات ل به‌ر مه‌ترسیێ دایه‌ و پێنگاڤێن ژ ڤی جوری پێدڤیه‌ و ل هه‌ر وه‌لاته‌كێ ئه‌ڤ جوره‌ هزرێن هشك و رادیكال لێ سه‌رهلدان و ته‌شه‌نه‌كرن ئه‌و وه‌لات یێ ل هه‌مبه‌ر مه‌ترسیه‌كا هه‌ری مه‌زن و كوشنده‌ و ب ترس رادیكالیا ئولی ئه‌نجامێن وێ تنێ كاڤلكرنا وه‌لاتایه‌ یا كو من ئارمانج پێ و بێژم هزرا هشك و رادیكال ل ڤێ هه‌رێما مه‌ یا د وه‌راره‌كا دژواردایه‌ و مینا پێلێن ئاڤا بهاران روَژ ب روَژ یا بوَش دبیت ژبه‌ركو ژ ئالیێ ده‌ستهه‌لاتێ و جهێن په‌یوه‌ندیدارڤه‌ هیچ حه‌سابه‌ك ل گه‌ل وان ناهێته‌ كرن و گه‌را گه‌هشتیه‌ وێ رادێ روَژانه‌ و ل سه‌ر مینبه‌رێن مزگه‌فتان ل ڤی وه‌لاتی ل سه‌ر سكرینێن سه‌تلایتان و ته‌له‌ڤزیونێن لوَكال و رادیو و سایتێن ئه‌لكترونی ئه‌وا وان دڤێن یێ ب ئاشكه‌را دبێژن بێی كو هزرێ بوَ كه‌سه‌كی بكن، تاوانێن داعشێ شه‌رمزار ناكن و پێشمه‌رگه‌ی ژی ب شه‌هید نابینن و ب فیتی و تلیلیێن وان ب ده‌هان گه‌نجان ژ هه‌رێما كوردستانێ به‌رێ خوه‌ دانه‌ ناڤ رێزێن ده‌وله‌تا خیلافه‌تا ئیسلامی یا تیروَرست و هێدی هێدی كه‌تینه‌ ناڤ دام و ده‌زگه‌هێن میری گه‌ر گهایه‌ هندێ تیروَرسته‌كێ به‌رماییێ ریكخراوا جند الاسلام یانژی ئه‌نصار الاسلام یێن تیروَرستی ببیت سه‌روَكێ لیژنا مافێن مروَڤی ل په‌رله‌مانێ كوردستانێ به‌لێ مافێن مروَڤان ئه‌گه‌ر لڤێ ئاستی ژی راوه‌ستابا داگه‌له‌ك باشبیت لێ ئه‌ڤ بابه‌ته‌ بێ سنووره‌ چنكو هه‌ر یێ وه‌رار و گه‌شه‌ دكت كو به‌لاڤكرنا هزر و بیرێن هشك و رادیكال و نه‌ساخ به‌رده‌وامه‌ په‌رتوكێن جوانترین ناڤێن زاروكان ب عه‌ره‌بی یێ ل سه‌ر جادان و پرتوكخانان ب روَژا روَژ یێن دهێنه‌ فروَتن دیسا روَژ بۆ روَژێ جهێن فروَتنا چوَخكێن خه‌لیجی یێن ل باژیرێن ڤێ هه‌رێمێ به‌رفره‌ه دبن و ریهژی به‌رده‌وام یێ بوَش و گه‌ڤوَزه‌ و درێژتر دبن و شه‌لواال و په‌نته‌لوَن ژی یێ كورت دبن؛ ره‌وش ئه‌ڤه‌یه‌ یا من گوتی یێ باوه‌ر ژی نه‌كه‌ت بلا ژكه‌ره‌ما خوه‌ هنه‌كێ ژ ده‌مێ خوه‌ وندا بكه‌ت و گوهداریا كه‌نالێ ئاموَژگاری بكه‌ت یانژی هه‌ما سه‌ره‌دانا چه‌ند پرتووكخانه‌یا بكه‌ت هینگێ وێ بزانیت ره‌وش چه‌ند ب سه‌همه‌ و به‌ره‌ڤ كیژان ئاقاریدا دچیت، منژی لڤێره‌ پرسیاره‌كا هه‌ی هه‌ما كی به‌رسڤ دده‌ت مالاوی ئاڤا، گه‌لوَ ئه‌گه‌ر هاندانا دژواریان و شه‌رمزار و پروته‌ستوَنه‌كرنا كریارێن داعشێ و ب شه‌هید نه‌دیتنا پێشمه‌رگه‌ی و پێكولا شیرینكرنا كولتورێ بیانیان به‌لكو دوژمنان ب به‌هانا ئولی نه‌ به‌زاندن و پێلێكرنا ئاسایشا نه‌ته‌وه‌ی بیت!! پا كانێ من تێبگه‌هینن به‌زاندنا ئاسایشا نه‌ته‌وه‌ی ب چ ره‌نگی یه‌؟؟ ئه‌گه‌ر گه‌شه‌كرنا ناڤێن عه‌ره‌بی و درێژكرنا ریهان و كورت كرنا په‌نته‌لوَن و شه‌لوالان و زوَر بوونا جهێن بازرگانی یێن جل و به‌رگێن عه‌ره‌بی و حیجابێ دفروَشن مه‌ترسی نه‌با پا چما په‌رله‌مانێ تاجیكستانێ و حوكمه‌تا وێ و خودێ سه‌روَك كومارێ وێ ئیمو مالی راهمون بریاردان توخیبه‌كێ بوَ ڤێ دیاردێ ده‌ینن گه‌لو كه‌نگێ ئه‌مێ هزرێ لێ بكین؟؟؟

نه‌ جهێ باوه‌ریێ و نه‌ژی به‌ر ئاقله‌ كو لێزان و شاره‌زا و سیاسه‌تڤان و له‌یزتكڤانێن كوردان بێ ئاگه‌هبن ژ یاكو ل ده‌ڤه‌رێ روو دده‌ت و ئه‌و پلانێن ژبوَ روَژهه‌لاتا ناڤین د ژوورێن تاریڤه‌ هاتینه‌ دانان، ئه‌م دبێژین نه‌ به‌ر ئاقله‌ ژبه‌ركو هێدی هێدی له‌یزتك یا تێته‌ ئاشكه‌را كرن ب تایبه‌ت پشتی هاتنا روسیا بوَ ده‌ڤه‌رێ بێی كو گوه بده‌ت هیچ هوَشداریه‌كێ یان حه‌سابه‌كێ بوَ هه‌ر هێزه‌كێ بكه‌ت، دبت كو جوداهیه‌ك د ناڤبه‌را شه‌رێن چه‌رخێ ده‌رباز بووی و ڤی چه‌رخیدا هه‌بت چنكو یا ئاشكه‌را دبت شه‌رێ ڤی چه‌رخی و ململانێ ل سه‌ر ژێده‌رێن ئابووری یێن جیهانێ یه‌ و میكانزم و رێكێن كونتروَلكرنا وان ژێده‌ران، ئه‌نه‌رجی (ووزه‌) یه‌كه‌ ژ وان ژێده‌رێن گرنگ كو پێدڤیه‌كا جیهانی پێ هه‌یه‌ و ژیان ژی بێ ئه‌ڤ ئه‌نه‌رجیه‌ یا له‌نگه‌ یا خوَیایه‌ ژێده‌رێن ئه‌نه‌رجیێ ژی ل هه‌موو ده‌رێن جیهانێ په‌یدا نابن تنێ هنك ده‌ڤه‌رێن تایبه‌ت و ده‌ستنیشانكریدا هه‌نه‌ ل جیهانێ هه‌ر ئه‌ڤ سه‌ده‌مه‌یه‌ وه‌ دكه‌ت هه‌رتم ئارێشه‌ و هه‌ڤڕكی و ئالزین ل ڤان ده‌ڤه‌را بن ب مه‌ره‌ما كونتروَلكرنێ ژ ئالیه‌كی ژبوَ مفا لێ وه‌رگرتن و ژ ئالیێ دن ژبوَ بكار ئانینا ڤی ژێده‌ری وه‌كو كارته‌ك گڤاشتنێ ل سه‌ر بلوَكێ هه‌مبه‌ر، هه‌رێما كوردستانێ یه‌كه‌ ژ ناڤه‌ندێن گرنگ ل جیهانێ كو ئه‌نه‌رجیه‌كا ئێكجار مه‌زن یا تێدا كوَمبووی ژ په‌ترول و غازێ و غازا وێ ب باشترین و بلنترین كوالیتی تێته‌ ژمارتن و هه‌بوونا ڤێ كوَگایا یا ئه‌نه‌رجیێ یا بوویه‌ ئه‌گه‌رێ وێ یه‌كێ كو سه‌رنجا هێزێن زه‌به‌لاح و هه‌ڤدژ وه‌ره‌ كێشان بوَ هه‌رێمێ و زلهێز پێكوَلێ دكه‌ن جهێ پیێن خوه‌ ل ده‌ور و به‌رێن ڤێ كوَگایێدا بكن، له‌ورا دیتن هه‌نه‌ و تێته‌ پێشبینیكرن كو كوردستان د پاشه‌روَژه‌ك نێزیك دا ل بالانس و هاوكێشێن نێڤده‌وله‌تی دا ببت جه‌مسه‌ره‌كی مه‌زن و هه‌ری گرنگ. لێ ل گه‌ل ده‌نگویێ هه‌رفینا توخیبێن سایكس-پیكوَ 1916 ێ و ده‌ینانا نه‌خشه‌یه‌كا نوو بوَ روَژهه‌لاتا ناڤین و بلوَكێ روَژهه‌لاتێ یێ سه‌رهل دده‌ت لێ ڤێ جارێ نه‌ ب ناڤێ یه‌كه‌تیا سوَڤیه‌تی به‌لێ دوو جه‌مسه‌ری یا ئاشكه‌را بووی و دژاتی یا روَژ ب روَژ گه‌رم دبت و هاوكێشه‌ ژی یێ د ئالزن و چاڤێن هه‌موو یا ژی ل سه‌ر ئه‌نه‌رجیێ و گرتن و كونتروَلكرنا نه‌راسته‌وخوَ. گه‌لوَ خودانێن ڤێ كوَگایا بوَكه‌(مه‌زن) ژ گاز و پتروَلێ ئانكو كورد ل كیده‌را ڤان هاوكێشێن نێڤده‌وله‌تی و ئالزین و هه‌ڤركیانن؟؟ مه‌ ل پێشیێ خوَیاكر كو نه‌ به‌ر ئاقله‌ كورد د ڤێ له‌یزتكا مه‌زن و مه‌ترسیدار دا نه‌ گه‌هشتبن، ها ئه‌ڤه‌ سه‌روَكێ هه‌رێما كوردستانێ ب ئاشكه‌را و ده‌نگه‌ك بلند یێ گازی دكت خوه‌ به‌رهه‌ڤ بكن ژبوَ ریفراندوَمێ ئانكو ئه‌ڤه‌ پێنگاڤا یه‌كه‌مینه‌ ژبوَ به‌ره‌ڤ ئاڤاكرنا ده‌وله‌تێ، ڤێجا ره‌نگ و جورێن ڤێ ده‌وله‌تێ چه‌وانه‌ و چ سیستمه‌ ئه‌و ژی ل پاشه‌روَژێ خوَیا دبت. به‌ری ڤێ گازیا ریفراندوَمێ چه‌ندین جاران چ ل هه‌ڤلێرێ چ ژی ل ئه‌مه‌ریكا و ئوروپا و توركیا ژی سه‌روَكێ هه‌رێمێ گوتیه‌ كوردان ژی وه‌ك هه‌موو گه‌لێن جیهانێ ماف هه‌یه‌ چاره‌نڤیسێ خوه‌ ب هه‌لبژێرت و كارڤه‌دانێن ڤان داخویانیان ژی ل سه‌ر ئاستێ نێڤده‌له‌تی هه‌ر جارێ بره‌نگه‌كی بوون و ل ڤێ داویێ ژی نه‌كو كارڤه‌دانێن دژوار نه‌بوون به‌لكو هن ده‌نگ ژ هنك ده‌وله‌تان ده‌ركه‌تن قادێ كو د پوزه‌تیڤ بوون ل گه‌ل نه‌ لبار بوونا ره‌وشا كوردان بخوه‌ ل هه‌رێما كوردستانێ و دیتنێن جودا جودا ل سه‌ر ڤی بابه‌تی. لێ ئه‌م بخوازین یان نه‌خوازین پارچه‌بوونا عێراقێ و سووریا یا بوویه‌ دیفاكتوَ و زلهێزێن جیهانێ ژی ئه‌ڤ پارچه‌بوونه‌ ل به‌رچاڤ گرتینه‌، ب هه‌ر ئاوایێ هه‌بت كورد دڤێت ژبوَ ئه‌نجامێن ڤان ئالزینێن نێڤده‌وله‌تی ئاماده‌بت و هزر ل هه‌موو پێشهاتان و سپرایزان بكه‌ت چنكو بلا ئه‌م هێز و پلانێن هه‌رچار داگیركه‌رێن كوردستانێ ژی ژبیر نه‌كین كو ئه‌گه‌ر نها بێده‌نگیه‌ك ل سه‌ر بابه‌تێ ده‌وله‌تبوونێ هه‌به‌ت ژتشته‌ك پێ چێنابت لێ ل ده‌مژمێرا سفر دێ شه‌رێ مان و نه‌مانێ كن و ناكوَكیێن خوه‌ یێن سیاسی و ئته‌نی ژی دنه‌ ئالیه‌كی و ژبه‌ر ڤێ خالێ ژی به‌ری هه‌ر تشته‌كی ئالیێن سیاسی ل هه‌رێما كوردستانێ دڤیا هیچ نه‌بت بوَ خاترا گه‌لێ خوه‌ كو هنده‌ ساله‌ خه‌ونێ ب ده‌وله‌تبوونێ ڤه‌ دبینن ململانێ و ناكوَكیێن خوه‌ بدنه‌ ئالیه‌كی و خوه‌ به‌رهه‌ڤ بكن ژبوَ پێشهاتان و بوویه‌رێن گرنگێن ده‌ڤه‌رێ.

ژبه‌ر كو هه‌ر تم و تم هونێن رێزدار ل ژان و كول و كوَڤانێن گه‌لێ كورد ل هه‌ر جهێ هه‌بت خوه‌دی ده‌ركتینه‌. .. . ژبه‌ركو ب درێژاهیا دیروَكا خه‌باتا وه‌ هون بوونه‌ خه‌مێن هه‌ژار و به‌لنگازێن كوردان ب خه‌مێن خوه‌ زانینه‌، دیسان وه‌ مینا هه‌ڤ و بێ جوداهی مێزه‌ی هه‌رچار پارچێن كوردستانێ كریه‌ و شكاندنا توخیبێن ده‌ستكرد و ئاڤا كرنا كوردستانا مه‌زن خه‌ونا هه‌ری دێرینا هه‌وه‌ بوویه‌.
جه‌نابێ سه‌روَك : ناهێته‌ ڤه‌شارتن ئه‌و جینوَسایدا ئیروَ ل هه‌مبه‌ر باكوورێ كوردستانێ تێ كرن روَژانه‌ كه‌سانێن سڤیل و زاروَك و ژن ب ده‌ستێن جه‌ندرمێن ئوردیا تورك تێنه‌ كوشتن، باكوورێ كوردستانێ یێ ب دژوارترین شێوه‌ هاتیه‌ دورپێچ كرن و قه‌ده‌غه‌یا هاتن و چوونێ كه‌ته‌ د مه‌ها دوواندا، سڤیل ل جزیرا بوَتان و شیرنه‌خێ و سلوَپیا و هه‌كاری و وانێ وشویرها ئامه‌دێ و مێردینێ تێنه‌ شه‌هید كرن و قه‌ده‌غه‌یه‌ شه‌هیدێن خوه‌ ل گورستانان ڤه‌شێرن، ئاڤ و ئه‌لكتریك و هه‌موو ئالاڤێن په‌یوه‌ندیكرنێ یێن ژ باژار و گوند و گونده‌وارێن باكوورێ كوردستانێ هاتینه‌ برین و نێزیكه‌ ژیان وێ ل ده‌ڤه‌رێن ناڤهاتی وه‌ره‌ راوه‌ستان، حوكمه‌تا داد و گه‌شه‌ پێدانێ و ئوردیا تورك ل ئالیه‌كێ و پارتیا كاركه‌رێن كوردستانێ ل ئالیێ دن، درژدن ل سه‌ر درێژه‌ پێدانا ڤی شه‌ری، سڤیل و به‌لنگازێن كوردان ژی ل باكوورێ كوردستانێ یێن بووینه‌ دارێن كو د ئه‌ڤی ئاگری دا تێنه‌ شه‌وتاندن، و گومركا گرانا ڤی شه‌ری ددن، خالا هه‌ری مه‌ترسیدار ل ڤێره‌ ئه‌وه‌ كو ئه‌ڤ شه‌ره‌ چ نه‌مایه‌ ژبن كوَنتروَلا پارتیا كاركه‌رێن كوردستانێ و پارتیاداد و گه‌شه‌پێدانێ ده‌ربكه‌ڤت و به‌ره‌ڤ شه‌ره‌ك ئته‌نی دچت و ئالی هه‌نه‌ ل توركیا پێكوَلا ئازراندنا ئه‌ڤێ خالێ دكن و دكه‌ڤندا یه‌ك ژئارمانجێن وان یێن سه‌ره‌كی و هه‌ر ئه‌ڤ ئالیه‌نه‌ هه‌تانی نها دانپێدان ب هه‌بوونا گه‌له‌كی بناڤێ كورد و وه‌لاته‌ك بناڤێ كوردستان ناكن و نها ژی كه‌تینه‌ بزاڤه‌ك دژوار و دانانا پیلانان ژبوَ به‌رپا كرنا شه‌رێ ئه‌ته‌نی، له‌ورا گازی و هه‌وارا باكوورێ كوردستانێ دگه‌هینم وه‌ یێن خوه‌دی بها و ته‌نها كه‌سێ كو بكاره‌ باندوَرێ ل سه‌ر ڤێ كاره‌ساتێ بكه‌ت و ئاگری ڤه‌مرینت و بكارت دیسان پروَسێسا ئاشتیێ ئه‌كتیڤ بكه‌ت و ته‌نها كه‌سێ كو دیسان ره‌وشێ مینا به‌رێ سروشتی بكه‌ت و ژیانێ ڤه‌گه‌رینت ده‌ڤه‌رێن دورپێچ كری هونێن رێزدارن.
جه‌نابێ سه‌روَكێ هه‌رێما كوردستانێ: ڤێ په‌یامێ ئاراسته‌ی جه‌نابێ وه‌دكم نه‌كو ژبه‌ر كو هون سه‌روَكێ هه‌رێما كوردستانێ نه‌ به‌لكو ژبوَ هندێ كو جه‌نابێ وه‌ هه‌لگرێ په‌یاما كه‌سه‌كینه‌ كو ل كیده‌رێ كورد توَشی سته‌مێ بان ئه‌و ل وێرێ بوو خه‌ما هه‌ر كورده‌كێ خه‌ما وی بوو ئه‌و ژی بابێ روحی یێ كوردان بارزانی مسته‌فایه‌ به‌لێ ژبوَ قێ سه‌ده‌مێ هاوار و گازیا ژن و زار و سڤیلان ژ باكوورێ كوردستانێ دگه‌هینم هه‌وه‌ یێن رێزدار كو ب رێكا په‌یوه‌ندیێن وه‌ ل گه‌ل هه‌ردوو ئالیێن په‌یوه‌ندیدار و باندوَرا كه‌سایه‌تیا وه‌ بكارن ڤان كاره‌ساتان راوه‌ستینن و ئه‌ڤ ره‌وشا خویناڤی بداوی وه‌ره‌ت. .. ئێدی ل گه‌ل رێزێن مه‌. چاڤه‌رێنه‌ و پشتراستین كو جه‌نابێ وه‌ وێ ل هه‌وارا كوردان وه‌ره‌.

شاره‌زایێن بارێ سیاسه‌تێ و چاڤدێرێن سیاسیێن ناڤدارێن جیهانێ و شروَڤه‌كارَێن دیبلوَماتیك و ستراتیژی د وێ باوه‌رێدانه‌ كو روَژهه‌لاتا ناڤین به‌ره‌ڤ گوهوَڕینا سنوورانه‌ وتوخیبێن سایكس- پیكوَی سه‌ركه‌فتن بده‌ستڤه‌ نه‌ئانین و تنێ ئه‌گه‌ربوون ژبوَ خوینرشتنێ و سته‌م و زوَرداریێ و ده‌رده‌سه‌ریا كوردان و بوَ ماوێ سه‌د سالان قه‌ت روَژه‌كێ گه‌لێ كورد توخیبێن سایكسپیكو ب توخیب نه‌زانینه‌ و ب پیروَزی ژی نه‌زانینه‌ ل سه‌دسالیا ده‌ینانا ڤان توخیبێن سته‌مێ ل جهێ كو موَكم ببان، خوه‌شبه‌ختانه‌ یێ دهه‌رفن ئها ئه‌ڤه‌ پارچه‌بوونا هه‌ردوو ده‌وله‌تێن عه‌ره‌بی عێراق و سووریا بوویه‌ دیفاكتوَ كو سووریا به‌ربه‌ست و ئاسته‌نگه‌كی هه‌ری ئاسێ بوو ل هه‌مبه‌ر ئاڤاكرنا ده‌وله‌تا كوردی. د ره‌وشا ئیروَ دا ئه‌و رژێما سه‌ر سه‌خت تێدا بهزار ده‌رده‌سه‌ری كاریه‌ هه‌تا نها خوه‌ ژ هه‌رفینێ بپارێزت؛ كه‌واته‌ نه‌مایه‌ جهێ ترسێ ژبوَ ده‌وله‌تا كوردی و ئه‌ڤه‌ژی فاكته‌ره‌كێ گرنگه‌ هه‌لبه‌ت دانپێدان نه‌كرنا كوردان ب توخیبێن سایكس-پیكو و ب پیروَز نه‌دیتنا وان ژ ئالیێن كوردانڤه‌ ژبَو هه‌ڤپه‌یمانان و ئه‌وروَپا و ئه‌مه‌ریكا و هه‌موو هێزێن نوكه‌ ل جیهانێ یا روَهن و ئاشكه‌را بووی و ل هه‌مان ده‌می دا هه‌ست دكن چ جوره‌ سته‌مه‌ك ل كوردان هاتیه‌كرن. تشتێ مروَڤی دلخوه‌ش دكه‌ت ئه‌وه‌ روَژئاڤا و هێزێن خوه‌دی بریار ل جیهانێ باش تێگه‌هشتینه‌ كو ئێدی گه‌لێ كورد نه‌ما بنده‌ستیێ قه‌بوول دكه‌ت، یانژی ب په‌ژرینت ب تایبه‌تی ته‌خا خوَرتان. ئها ل هه‌مبه‌ر ره‌وشه‌كا ب ڤی ره‌نگی گه‌لوَ كورد چ بكه‌ن؟ راسته‌ ره‌وش ل باره‌ ب شێوه‌یه‌ك گشتی لێ چ دكه‌ڤه‌ت سه‌ر ملێ كوردان و سه‌ركردایه‌تیا وان؟ گه‌ره‌كه‌ كورد ب خوه‌ژی هنك پێنگاڤێن گرنگ باڤێژن و بریار وه‌رن دان كو به‌ری سال ب نیڤی ببت ریفراندوَمه‌ك سه‌رانسه‌ری ب وان ده‌ڤه‌رێن نوه كو پیشمه‌رگێن قه‌هره‌مان رزگاركرین ڤه‌ بێ ئه‌نجامدان، هه‌لبه‌ت ژ ئه‌نجامێ سته‌ما كوردان ژ ئه‌گه‌رێ بنده‌ستی و نه‌بوونا ده‌وله‌تێ دیتی مروَڤ دكارت ئه‌نجامێن ریفراندومێ بزانت. دیسان خاله‌كا دن یا هه‌ری گرنگ و جه‌وهه‌ری ئه‌وه‌ گه‌ره‌كه‌ كوردان گوتاره‌كا هه‌ڤگرتی هه‌بت و یه‌كرێزبن؛ هه‌ر هیچ نه‌بت ژبوَ بابه‌تێ ده‌وله‌تبوونێ د بابه‌تێ ده‌وله‌تبونێ دا جڤیان ل دور سه‌روَكه‌كی خوه‌دی پێگه‌هه‌ك بهێز وخوه‌دی رێز و بها ل نێڤ جڤاكێ نێڤ ده‌وله‌تی دا فاكته‌ره‌كێ هه‌ری گرنگه‌ ژبوَ پروَسێسا سه‌ركه‌فتنا ده‌وله‌تبونێ. پاشی بله‌ز كاركرن ل سه‌ر خوَرتكرنا په‌یوه‌ندیان ل گه‌ل ده‌وله‌تێن خوه‌دی هێز و پێگه‌ه ل جیهانێ و پێكوَلا راكێشانا هه‌ڤسوَزیا وان و روَهن كرنا دوَزا ره‌وایا كوردی، دیسان ژ خالێن گرنگ به‌ری راگه‌هاندنا ده‌وله‌تاكوردی ئاڤاكرنا چه‌ندین كوَمیتان ژدبلوَماتكارێن كورد و كه‌سانێن شه‌هره‌زا د په‌یوه‌ندیێن نێڤده‌وله‌تی دا كو سه‌ره‌دانا دوله‌تێن ده‌ڤه‌رێ و پرانیا ده‌وله‌تێن په‌یوه‌ندیدار بكن ژبوَ بده‌ستڤه‌ ئانینا هه‌ڤسوَزی و دانپێدانێ یانژی ل دژی ده‌وله‌تا كوردی ده‌رنه‌كه‌ڤن، دیسان پێكوَلا په‌یدا كرنا لوَبیه‌كێ بهێز ل ئه‌مه‌ریكا و ئێكه‌تیا ئه‌وروَپی و روسیا و ئیسرائیلی هه‌رچه‌ند ئیسرائیلێ و هنگاریا پێشده‌م هه‌لوێستی خوه‌ دیار كرینه‌ كو وێ یه‌كه‌مین ده‌وله‌ت بن دانپێدانێ ب ده‌وله‌تا كوردی بكه‌ن ل ده‌مێ راگه‌هاندنێ، گه‌لوَ چما 2016 نه‌بت سالا راگه‌هاندنا ده‌وله‌تا كوردی، خه‌ونا 40 ملیون كوردان؟؟

گوتنه‌ك هه‌یه‌ دبێژیت: “گه‌ل دكتاتۆران دروست دكه‌ت” یانژی گه‌لێن رۆژهه‌لاتێ ئاخفتنێ هه‌بوو، براستیژی هه‌ما ل بیراهیێن مه‌ گه‌لێن رۆژهه‌لاتا ناڤین ب په‌سنێن ڤالا و دروشمێن مه‌زن و بێ رامان و گوتنا ستران و سرود گوتن ب به‌ژن و بالێن سه‌ركردێن كوَده‌تاچی چه‌ندین دكتاتۆر په‌یداكرن، و ل سه‌ر خوه‌ سه‌پاندن دیسان من باوه‌ری هه‌بوو كو گه‌ل دكارت هه‌ر كه‌سه‌كی ل سه‌ر سه‌رێ خوه‌ بكه‌ت مه‌زنترین دكتاتۆر و دورهێلێ رۆژهه‌لاتا ناڤین ڤێ یه‌كێ نیشانی مه‌ دده‌ت وه‌كو مه‌ ئاماژه‌ پێكری، كه‌سانێن پروَفیشینال د وارێ سایكوَلوَژی دا ل وێ باوه‌رێنه‌ كو ب رێكا مه‌ ئانیه‌ زمان ل رۆژهه‌لاتێ دكتاتۆر په‌یدابووینه‌ چنكو ل ئه‌ڤێ رۆژهه‌لاتێ ده‌ما سه‌ركرده‌ كاره‌كێ ژ هه‌ژی ئه‌نجام دده‌ت یان گوتنه‌ك ب مفا ژ ده‌ڤی ده‌ردكه‌ڤه‌ت، گه‌ل ده‌ستان دقوَتن و سلوَگانان ددن و دكه‌ڤنه‌ په‌سنا سه‌ركرده‌ی، ل هه‌مان ده‌م دا ل ده‌ما ئه‌ڤ سه‌ركرده‌یه‌ بریاره‌كا نه‌ دجهێ خوه‌ژی دا دده‌ت، دیسان گه‌ل ده‌ستان دقوَتن ئێدی ئه‌ڤ سه‌ركرده‌ توَشی سه‌رگه‌رمیێ (غرورێ) دبت، وه‌لێ هزر دكه‌ت هه‌ر تشتێ ئه‌و بێژت و بكه‌ت یێ دروسته‌ و جهێ ده‌ستخوه‌شیێ و رازیبوونا گه‌لێ ویه‌ و ئه‌ڤه‌ ب خوه‌ ژی ل گوَڕه‌ی دكتورێن سایكوَلوَژی نه‌خوه‌شیه‌ك ده‌روونیه‌؛ لێ هه‌روه‌ك خویایه‌ گه‌ل نكارت هه‌ر سه‌ركرده‌یه‌كی گه‌رم بكه‌ت و ب سه‌ردا ببن و به‌رێ وی بده‌ت رێیا سته‌مكاری و دكتاتۆریه‌تێ چنكو كه‌سانه‌ك هه‌نه‌ راسته‌ بووینه‌ سه‌ركرده‌ لێ سه‌ركرده‌نه‌ تنێ ژبوَ خزمه‌تا گه‌ل و وه‌لاتێ خوه‌، كێم سه‌ركرده‌ هه‌نه‌ بێژنه‌ هه‌وادارێن خوه‌ و گه‌لێ خوه‌ پێدڤی په‌سن و سرودان ناكه‌ت و بچت و بێت خزمه‌تكاره‌كی گه‌لێ خوه‌ مه‌. به‌ری چه‌نده‌كێ رێكخراوا خامتیر یا به‌ره‌ڤانیكرتێ ژ مافێن رۆژنامه‌ڤانان و گه‌شه‌ پێدانا مه‌دیایێ ئه‌ز وه‌كو یه‌ك ژ ئه‌ندامێن كوَمیتا هه‌لسه‌نگاندنا هنك ژ رۆژنامه‌ڤانێن زاخو هه‌لبژارد بووم، پشتی ل ده‌م و جهێ ده‌ستنیشانكری ئاماده‌بووم و مه‌ ده‌ست بكارێ خوه‌ كر ل بێهنڤه‌دانێ كاك سالم تاهر كو ئێكه‌ ژ مه‌دیاكارێن كه‌ڤنێن باژارێ زاخو و ده‌ڤه‌رێ، هه‌ردیسان شانوڤانه‌ژی سه‌رهاتیه‌ك ژمنرا ڤه‌گێرا، براستی ژی ئه‌گه‌ر هه‌موو كه‌ره‌كته‌رێن ڤێ سه‌رهاتیێ نه‌ دژیانێدابان دبت كو من باوه‌ر نه‌كربا كاك سالم تاهر بابێ سامانی ژمنره‌ گوت: ل سالا 1974ێ ئه‌ز ل ئێزگێ ده‌نگێ كوردستانێ بووم وه‌كو هاریكارێ ده‌رهێنه‌ری و دبێژت: “پروَگرامه‌ك ل ئێزگه‌ی هه‌بوو بناڤێ بوَ هه‌ر هێزه‌ك گوله‌ك” ژئالیێ ماموستا دژیانێده‌یه‌ د داویا پروگرامی ده‌ خوَرته‌ك خه‌لكێ رۆژئاڤایێ كوردستانێ ده‌نگبێژبوو هاتبوو مێهڤانكرن و ناڤێ وی سه‌رفراز بوو ویژی ده‌ست هاڤێته‌ ته‌نبیرا خوه‌ و ده‌ست ب سترانا خوه‌كر كو ده‌ستپێكا وێ دبێژت: كێ دنیا هه‌ژاند ؟. .. . بارزانی،كێ دولاب زڤراند ؟. .. . بارزانی. كێ دوژمن شكاند؟.. .. بارزانی كاك سالم دبێژت ئه‌ڤ سترانه‌ بوَ مه‌ ژی خوه‌شبوو و ئه‌م كه‌تبوین ده‌ستقوتانێ لێ به‌ری ستران ب داوی ببت دیتنا مه‌دیتی مه‌لا مسته‌فا بارزانی بخوه‌ هاته‌ د ستودیوێَڤه‌ و گوت:( ئه‌و كیبوو ئه‌و ستران دگوت و دگوت بارزانی دنیا هه‌ژاند؟؟ ئه‌رێ باشه‌ ما نه‌شه‌رمه‌. مانه‌ فهێت و فه‌دیه‌ من كه‌نگی دنیا هه‌ژاندیه‌؟ كه‌نگی من دولاب زڤراندینه‌؟ ده‌جال و دكتاتۆر دنیایێ دهه‌ژینن من تنێ مافێ گه‌لێ خوه‌ یێ خواستی ئه‌ز جاره‌ك دن گوه ل ڤان په‌سنێن بێ رامان نه‌بم ) پرسیارا ل ڤێره‌ خوه‌ دهاڤێت مه‌یدانێ د دیروَكا بكارئانینا سیاسه‌تێ و رێڤه‌برنێ دا چه‌ند سه‌ركرده‌ ژ ڤی ره‌نگی هه‌بوونه‌ چه‌ند سه‌ركردان ره‌تكریه‌ كو سرود و ستران پێ بێنه‌ گوتن و په‌سنا وی وه‌ره‌كرن! هه‌رچه‌نده‌ د هه‌ل و مه‌رج و ره‌وشا وی چاخی دا مافه‌كێ ره‌وا یێ بارزانیێ نه‌مربوو سرود پێ بێنه‌ گوتن ب بوونا هندێ كو كه‌سه‌ك بوویه‌ گه‌له‌ك نڤستی و د خه‌وه‌ك گران دا ژخه‌وێ راكری و گوتیێ تو مافخواریێ و سته‌م یالته‌ تێ كرن ئه‌ڤه‌ ئه‌ز ل پێشیا ته‌ ژبوَ ستاندنا مافێ ته‌، ئه‌ڤه‌ یه‌كه‌ ژ ده‌هان به‌لكو سه‌دان سه‌رهاتیێن بڤی جوری ل سه‌ر حكمه‌ت و ساده‌ییا ڤی سه‌ركردێ كێم وێنه‌ یێ گه‌لێ كورد هاتینه‌ گوتن؛ هیڤیدارین به‌رپرسێن نها هزرا خوه‌ د ڤێ سه‌رهاتیێ دا بكن.

ل سالا 2015اندا ل توركیا دوو جاران هه‌لبژارتن هاتن ئه‌نجامدان، جارا یه‌كه‌مین ل 7ی خزیرانێ و ل جارا دووه‌مین ل 1ی نوڤێمبه‌رێ، د هه‌لبژارتنێن یه‌كه‌مین دا كوردان ب رێكا پارتیا دیموكراتیكا گه‌لان (هه‌ده‌پێ) مه‌زنترین سه‌ركه‌فتنا دیرۆكی بده‌ستڤه‌ ئانین ئه‌و ژی ب شاندنا 80 په‌رله‌مه‌نته‌ران ژبۆ ناڤ ئاڤاهیێ جڤاتا نوێنه‌ران ل ئه‌نقه‌رێ؛ ژبۆ ڤێ سه‌ركه‌فتنا مه‌زن كوردێن هه‌موو جیهانێ شاد و به‌خته‌وه‌ر بوون و پیروَزی ل هه‌ڤدو كرن بێ جوداهی. هه‌تا ڤێرێ پروَسێس یا نورمال برێ دچت و تاما ئه‌ڤێ سه‌ركه‌فتنا دیرۆكی سێ به‌هرێن كوردێن جیهانێ سه‌رخوه‌ش كرن. لێ به‌لێ و دێ دیسا ن ڤه‌گه‌رم و مینا جاران بێژم: سه‌ركه‌فتنێن كوردان و به‌خته‌وه‌ریێن كوردان دوم كورتن و گه‌له‌ك نا ڤه‌كێشن. به‌ری ئه‌ز بێمه‌ سه‌ر یه‌كه‌مین داخوَیانلیا به‌رێز سه‌لاحه‌دین ده‌میرتاش هه‌ڤسه‌روَكێ هه‌ده‌پێ دای دخوازم وێ یه‌كێ بێژم بلا ئه‌م خوه‌ نه‌ خاپینین و سه‌ردا نه‌بین كو پارتیا دیموكراتیكا گه‌لان بێی قه‌ندیلی نكارت هیچ بریاره‌كا چاره‌نڤیساز بده‌ت و ئه‌ڤه‌ ژی تشته‌كه‌ نایێ ڤه‌شارتن. یاراستی قه‌ندیل نه‌خوازیارێ به‌شداربوونا هه‌ده‌پێ بوو د حكومه‌تێ دا لگه‌ل ئاكه‌پێ له‌وراژی د یه‌كه‌مین داخویانییا خوه‌ دا به‌رێز سه‌لاحه‌دین ده‌میرتاش گوت: “ئه‌م لگه‌ل ئاكه‌پێ پشكداری حكومه‌تێ نابین هه‌لبه‌ت” به‌شداریا هه‌ده‌پێ د حكومه‌تێ دا وێ ببا ئه‌گه‌را وێ یه‌كێ كو تنێ له‌یستنا روَلێ له‌شكه‌ری د ده‌ستێ قه‌ندیلی دا بمینه‌ وه‌كو دن هه‌رتشت بكه‌ڤه‌ن بن كونتروَلا هه‌ده‌پێ و لڤێره‌ ئه‌م گه‌له‌ك لسه‌ر ڤێ خالێ ناراوه‌ستین و دكارین د گوتاره‌ك دن دا پتر روَهن بكه‌ین، هه‌رپه‌نده‌ ئه‌ڤه‌ خاله‌كا هه‌ری جه‌وهه‌ریه‌ لێ رێزبه‌نده‌كا خالێن دن ژی هه‌بوون كو ئه‌گه‌ر و سه‌ده‌م بوون ژبۆ كو هه‌ده‌پ ده‌نگان كێم بكه‌ت و ئاكه‌پ ده‌نگان زێده‌ بكه‌ت د هه‌لبژارتنێن جارا دووه‌مین دا ئانكو یه‌كی نوڤێمبه‌را ده‌ربازبووی.
1- وه‌كو ئه‌ته‌كێته‌كی خوه‌زایی خه‌لكێن توركیا و پرانیا جیهانێژی خوازیارن ئه‌و پارتیا وی ده‌نگ داییێ د ده‌ستهه‌لاتێ دا بت، گه‌ره‌كه‌ ئه‌م ژبیر نه‌كین د هه‌لبژارتنێن 7ی خزیرانێ دا رێژه‌یه‌ك مه‌زن ژ وه‌لاتیێن بره‌گه‌ز تورك ده‌نگ دابوونه‌ هه‌ده‌پێ، لێ ده‌مێ هه‌ده‌پێ بریاردا نه‌كه‌ڤت ناڤ حكومه‌تێ لگه‌ل ئاكه‌پێ ئه‌و ده‌نگده‌ر توَشی بێ ئومێدیێ بوون و د هه‌لبژارتنێن یه‌كی نوڤێمبه‌رێ ده‌نگ نه‌دانه‌ هه‌ده‌پێ وه‌كو سزایه‌ك.
2- ل هه‌لبژارتنێن 7ی خزیرانێ دا هه‌ده‌پێ هه‌لا هه‌بوونا په‌یوه‌ندیان د ناڤبه‌را ئاكه‌پێ و ده‌وله‌تا ئیسلامی(داعش) ل ئێراقێ و شامێ ژ ده‌ست نه‌دا و ل هه‌وا هه‌لبژارتنانده‌ وه‌كو كارته‌ك بهێز بكار ئانی و براستی ژی باندوَرا خوه‌ ل سه‌رهزرێن ده‌نگده‌ری هه‌بوو، لێ پشتی حكومه‌تا ئاكه‌پێ شه‌ر دژی داعشێ راگه‌هاندی (ئه‌گه‌ر ژبۆ ركلامژی بت) لێ دیسان كاریگه‌ری هه‌بوویه‌ لسه‌ر ده‌نگده‌ران و بوَچوون هاتن گوهوَڕین.
3- به‌شداریكرنا هنه‌ك پارتی و ئالیێن كوردی دهه‌لبژارتنێن یه‌كی نوڤه‌مبه‌رێده‌ كو 150 هزار ده‌نگ بده‌ستڤه‌ ئانیبوون ئه‌ڤ ده‌نگه‌ ژ هه‌ده‌پێ هاتن كێمكرن 4- د هه‌لبژارتنێن 7 ی خزیرانێده‌ هاكپار بێ ئالی راوه‌ستا به‌لێ رێژه‌یه‌ك مه‌زن ژ ئه‌ندامێن وێ ده‌نگ دانه‌ هه‌ده‌پێ لێ ل هه‌لبژارتنێن 1ی نوڤه‌مبه‌رێ سه‌روكێ هاكپارێ به‌رێز كه‌مال بوركای ب فه‌رمی راگه‌هاند و ئه‌و پشتگیریا كو ئه‌و پشتگیریا ئاكه‌پێ دكه‌ت ئانكو ئه‌ندامێن هاكپارێ ده‌نگدانه‌ ئاكه‌پێ.
5- پشتی هه‌لبژارتنێن 7ی خزیرانێ حكومه‌تا ئاكه‌پێ چه‌ندین پێنگاڤ ژبۆ خوَرتكرنا ئیكونومیا توركیا ئاڤێتن كو ئه‌ڤه‌ژی گرنگترین كاره‌ ب دیتنا ده‌نگده‌رێ تورك چونكی گرێدای ژیاناوی یه‌.
. 6- هه‌ده‌پێ پروَژه‌یه‌ك زه‌لال ژبۆ به‌ره‌ڤ پێشبرن و وه‌رارا ئیكونومیا توركیا نه‌بوو پتر لسه‌ر پرسێن سیاسی راوه‌ستا و بلا ئه‌م بزانین ژبۆ ده‌نگده‌رێن تورك ئیكونومی و بوژاندن و وه‌رارا ئابووری پرسه‌ك هه‌ری گرنگه‌.
7- نێزیكبونا هه‌ده‌پێ ل روسیا و ئیرانێ بوویه‌ سه‌ده‌ما وێ یه‌كێ هه‌م ئه‌مه‌ریكا و هه‌مژی ئه‌وروپا پشت ل ڤێ پارتیێ بكن، هه‌رچه‌نده‌ بوَ من ژی ئه‌ڤه‌ گریمانه‌كا لاواز و بێ باندوَره‌.
8- ئاكه‌پێ كاری ئه‌وقاس لسه‌ر پرسا ئولی كاربكه‌ت بهزاران ژ ئالیگرێن ته‌ڤگه‌را (خزمه‌ت) و فه‌تحولاه گویله‌ن ژبۆ ئالیێ خوه‌ڤه‌ رابكێشت، ئه‌وژی ب دروستكرنا كه‌ڤاله‌كێ كو ئاكه‌په‌ تنێ خوه‌دی و هه‌لگرا هزرا ئیسلامێ یه‌ و ئه‌ڤێن دن و هه‌ڤركێن وێ بێ ئولن.
9 -لڤێ داویێ ئاكه‌پێ پێكولێن خوه‌ خورت كربون ژبۆ ئه‌ندامبوونێ د یه‌كه‌تیا ئه‌وروپاده‌ و گه‌ره‌كه‌ ئه‌م وێ یه‌كێ بزانین كو ئه‌ندامبوونا توركیا د یه‌كه‌تیا ئه‌وروپانده‌ ئێكه‌ ژ خه‌ونێن هه‌ر وه‌لاتیك تورك ب تایبه‌ت پێشڤه‌روَ خاز و عه‌لملنیێن ڤی وه‌لاتی.
• -10 د هه‌لبژارتنا 7ی خزیرانێ دا شه‌ره‌كی هه‌ری مه‌زن كه‌فتبووو نێڤبه‌را هه‌ردوو سه‌ركردان ده‌میرتاش و ئه‌ردوغانی لێ ل هه‌لبژارتنا ئێكی نوڤه‌مبه‌رێ دا ئه‌ڤ شه‌ره‌ هنه‌كی سست ببوو، شه‌ره‌ك بڤی ره‌نگی دژوار د به‌رژه‌وه‌ندی ده‌میرتاشی دا بوو.
11- بلا ئه‌م ژبیر نه‌كین كو روژانه‌ گه‌ف ل ئه‌ندام و ئالیگرێن هه‌ده‌پێ دهاته‌ كرن و ب ئه‌ڤێ سه‌ده‌مێ ژی نه‌وێریا ژبه‌ر ته‌قینان ل جهێن گشتی بجڤن و ركلاما پارتیا خوه‌ بكن، ب تایبه‌ت پشتی ته‌قینا ئه‌نقه‌رێ ئانكو ركلام بوَ هه‌ده‌پێ نه‌بوو بوَ نموونه‌ ته‌له‌ڤزیونا فه‌رمی یا توركیا 18 ده‌مژمێران ركلام بوَ ئاكه‌پێ دكر دمه‌ها هه‌وا هه‌لبژارتنان ده‌ به‌لێ د وێ مه‌هێ دا ل وێ ته‌له‌ڤزینێ تنێ 7 خوله‌ك ركلام بوَ هه‌ده‌پێ هاته‌ كرن. دێ ڤه‌گه‌رین و بێژین ئه‌نجامێن هه‌لبژارتنێن 7ی خزیرانێ سه‌ركه‌فتنه‌كا مه‌زن و دیرۆكی بوو ژبۆ هه‌موو كوردان لێ بریارا ب له‌ز و نه‌دویردیتنا قه‌ندیلی هه‌ر بله‌ز ئه‌ڤ سه‌ركه‌فتنه‌ تێكدان و كوردان تام نه‌كره‌ تاما ڤێ سه‌ركه‌فتنێ، ئه‌ڤه‌ شاشیكا كوژه‌ك و دیرۆكی بوو هیڤیدارین كورد پتر نه‌كه‌ڤنه‌ شاشیان و چاڤان لسه‌ر به‌رژه‌وه‌ندیێن ته‌نگ وه‌رگێرن.

ئاخفتنه‌ك عه‌ره‌بی هه‌یه‌ دبێژت: “مصائب قوم عند قوم فوائد” ئانكو دبه‌ ده‌رده‌سه‌ریێن گه‌له‌كی ببن قه‌زه‌نجێن گه‌له‌كێ دن، ڤێجا نزانم د كوكا خوه‌د عه‌ره‌بیه‌ یانژی هاتیه‌ وه‌رگێران، بهه‌ر حال بویه‌ر بله‌زن وپرانیا وانژی لسه‌ر ئاخا كوردستانا داگیركری تێنه‌ ئه‌نجامدان؛ هه‌روه‌كو جاركێن جاران ئوسمانی و سه‌فه‌ویان لسه‌ر ئاخا كوردستانێ خوه‌ ژهه‌ڤدوو رازی دكرن و ل داویێ ل شه‌رێ چالدێران 1514ێ دا كوردستان ژبوَ دوو پارچان پارچه‌ كرن. ئێخستنا باله‌فرا له‌شكه‌ری یا روسی بوویه‌ ئه‌گه‌رێ ئالزینا تێكلیێن توركان و روسان كو د كوكا خوه‌دا نه‌لباربوون. ب سه‌ده‌ما تێكلیێن بگومان د نێڤبه‌را توركیا و ده‌وله‌تا خه‌لافه‌تا ئیسلامی ل ئێراقێ و شامێ(داعش) دال 25. 11. 2015 توركیا باله‌فره‌كا له‌شكه‌ری یا روسی ئێخسته‌ خوارێ و كه‌ته‌ دناڤ ئاخا سوریادا. ب سه‌ده‌ما كه‌تنا فێ باله‌فرێ تێكلیێن موسكو و ئه‌نكه‌ره‌ به‌ره‌ڤ ئالزینێچون پشتی بویه‌رێ ئێكسه‌ر روسیا تێكلیێن خوه‌ یێن له‌شكه‌ری لگه‌ل توركیا بداوی ئینانوه‌كو به‌رسڤه‌ك ب له‌ز داخواز ژوه‌لاتیێن خوه‌كر كو قه‌ستا توركیا نه‌كن ئه‌ڤه‌ژی ژبوَ پاراستنا گیانێن وان، دیسان روسیا گه‌میه‌كا له‌شكه‌ری به‌ره‌ڤ كه‌نارێن سوریا دلڤینه‌ وسیسته‌مێ به‌ره‌ڤانیێ ئێس 400 ل سوریا رادگه‌هینه‌. سه‌روَكێ وه‌زیرێن روسیا دبێژت: ئه‌وا توركیا ل هه‌مبه‌ر روسیا كری تاوان بوویه‌ ژبوَ به‌ره‌ڤانی كرنێ ژ رێكخراوا تیروَرستیا ده‌وله‌تا ئیسلامی،ده‌سته‌یا سوپا سالاریا روسیا بریاردا كو ئه‌و باله‌فرێن روسی ئه‌وێن بوردومانا ده‌وله‌تا ئیسلامی ل سوریا دكن ژ ئالیێ هنه‌ك باله‌فرێن دنڤه‌ وێ وه‌رن پاراستن، هه‌روه‌هاژی بریار هاته‌دان هه‌موو تیكلیێن له‌شكه‌ری وه‌رن پچاندن هه‌ڤده‌م رایه‌دار و به‌رپرسێن روس دبێژن ئه‌وا ژتوركیاڤه‌ هاتیه‌ ئه‌نجامدان پێشێلكرنا یاسایا فرینا نێڤده‌وله‌تیه‌ ده‌ربارێ ئاسایشا پاراستنا فرینێ یه‌ لسه‌ر ئاسمانێ سوریا كو ژ ئالیێ ئه‌مه‌ریكا و روسیاڤه‌ هاتیه‌ ئیمزاكرن و هه‌ر ئارمانجه‌كا ببت مه‌ترسی لسه‌ر وان وێ ژناڤ ببن،هه‌ڤده‌م دیمتری مێدڤێدڤ سه‌روَكێ روسیا راگه‌هاند كو ئێخستنا باله‌فرا له‌شكه‌ری یا روسی ژ ئالیێ توركیاڤه‌تاوانه‌كه‌ دچارچوڤێ پێكوَلێن ئه‌نقه‌ره‌ دایه‌ ژبوَ به‌ره‌ڤانیكرن ژ ده‌وله‌تا ئیسلامی ل ئێراقێ و شامێ وئالزیێن دنێڤبه‌را روسیا و توركیا د ده‌مه‌كیدایه‌ كو 48% ژ ئه‌لكتریكا ناڤخوی یا توركیا ب گازا روسی تێته‌ دابینكرن و ل گوَره‌ی كو پسپوَر و كه‌سانێن پرۆفیشینال دبێژن ئه‌گه‌ر هاتو روسیا بریارێ بده‌ت ڤێ گازێ ژ توركیاببرت ل وی چاخی توركیا وێ یه‌كسه‌ر په‌ك بكه‌ڤه‌ت و ئیفلیج ببت، ژبلی ڤێژی روسیا بریار یادای ئێدی گوشتێ سپی ژ توركیا نه‌كرت كوسالانه‌ ب بهایێ 27 ملیون دولاران دهاته‌ مه‌زنده‌كرن. ده‌رئه‌نجامێن ڤێ بریارێكاردانه‌كا نێگاتیف ل توركیا ڤه‌دگه‌رت دهه‌موو بوارێ كو مه‌ ئانینه‌ زمان دا و زه‌ره‌رمه‌ندا سه‌ره‌كی توركیایه‌،دپه‌یوه‌ندیێن نێڤده‌وله‌تی دا هه‌موو ده‌وله‌تان پێدڤی ب هه‌ڤدوو هه‌یه‌؛ لێ ئه‌م دكارین بێژین روسیا هیچ پاكیه‌ك ب توركیا نینه‌ ویا ژێ بێمننه‌ته‌ وژئالیێ هێزا له‌شكه‌ریژیڤه‌ روسیا ل رێزبه‌ندا دووه‌م بهێزترین ده‌وله‌ت تێ لسه‌ر ئاستێ جیهانێ وخودانا 775 هزار سه‌ربازایه‌ به‌لێ توركیا ل رێزبه‌ندا ده‌هی تێت وخودانا 500 هزار جه‌ندرمایه‌، ژبلی بوارێ مه‌ لسه‌ری گوتین چه‌ندین كارتێن دن هه‌نه‌كو روسیابكار بینت و له‌یستكێن سیاسی پێ بكه‌ت ل دژی توركیالێ كارتا ژ هه‌موویان مه‌ترسیدارتر ژبوَ توركیا كارتا كوردانه‌ هه‌ر ئه‌ڤروَ روَژناما فاینانشل تایمز یا به‌لاڤكرری كو روسیا ژبوَ تولڤه‌كرنێ ل توركیا وێ ده‌سته‌ك و ئالیكاریێ بده‌ كوردێن روژئاڤا دیسان هه‌ر ئه‌ڤرو ئاژانسا A+ به‌لاڤكریه‌ سه‌روكێ جڤانا دوما یا روسی یێ به‌رێ و سه‌روكێ پارتیا لیبرالیا دیموكراسی یا روسی ڤلادیمێر چیرنوڤسكی دبێژت : ئه‌م وه‌كو ده‌وله‌تا روسیا ئاسته‌نگ بووینه‌ ل هه‌مبه‌ر گه‌لێ ئه‌رمه‌نی و مه‌ نه‌هێلا ئاخا خوه‌ یا داگیركری ژ ئالیێ توركانڤه‌ و مه‌ ل سالا 1918ێ ملێ خوه‌ دایه‌ ملێ توركان وئه‌گه‌ر ئه‌م ل ملێ تركانره‌ نه‌راوه‌ستابان ئه‌رمه‌نیان وێ كاریبان د ده‌مه‌ك كێمدا ئاخا خوه‌ بستینن ودڤێ ئه‌م نها بكین ودیسان لسه‌رمه‌ پێدڤیه‌ ئه‌م دانپێدانێ ب مافێن 20 ملیون كوردان بكین كو ل توركیا دژین، دیسان دڤێ ئه‌م دانپێدانێ ب سه‌رخوه‌بون و ده‌وله‌تبونا كوردان بكین و ژ توركیا جودا ببن ئه‌و توركیا هه‌ر تم وتم مافێن ئه‌رمه‌نان و كوردان بنپێ كرینه‌ ئه‌م دكارین ڤێ یه‌كێ بكین بیێ كو گوله‌یه‌ك بێ ته‌قاندن. كورد چ بكه‌ت باشه‌؟؟؟نه‌شه‌رمه‌ ئه‌گه‌ر مروڤ كێماسیێن خوه‌ بێژت و ئه‌شكه‌ره‌ بكه‌ت داكو نه‌ڤیێن داهاتی نه‌كه‌ڤنه‌ شاشیێن مه‌ یانژی ژبوَ خوه‌ بكن وانه‌یه‌ك. پرانیا خانده‌ڤانان لگه‌ل من هه‌ڤرانه‌ ئه‌گه‌ر بێژم كورد مێرن وچاڤنه‌ترسن د شه‌ران و شورش و به‌رخوداناندا. به‌لێ چه‌ند خانده‌ڤان لگه‌ل منن و بمنره‌ هه‌ڤرانه‌ ئه‌گه‌ر بێژمكورد كا چه‌وا دبه‌رخودان و شورشاندا مێرخاس و ئه‌گیدن ئها وه‌لێژی د رێڤه‌برنێ و دبلوماسیه‌تێده‌ ژیر و زیره‌ك و شاره‌زانه‌ هه‌لبه‌ت وێ كێم كه‌س هه‌ڤرای منن كه‌واته‌ ئه‌م د رێڤه‌ برنێداب مخابنیڤه‌ ئه‌م سه‌ركه‌فتی نینین ودیسان مخابنی ئه‌م نه‌ دبلوماتكارین ب ده‌هان هه‌ل مه‌ یێ ژ ده‌ست داین ب دیتنا من ئه‌گه‌ر كورد ژیر و دپلوماتكاربن وێ ڤێ بویه‌رێ (بویه‌را ئێخستنا فروكا له‌شكه‌ری یا روسی ژ ئالیێ توركانڤه‌)د به‌رژه‌وه‌ندیا گه‌لێ كورددا بكاربینندبت كو ئه‌ڤه‌ هه‌له‌ك و فه‌رسه‌نده‌ك دیروَكی بت گه‌ره‌كه‌ د روَژه‌ڤا ئیروَ دا ئه‌ڤ كار بێ ئه‌نجامدان به‌ری سار ببت چنكو”ئاسن ب گه‌رمی تێ قوتان” ومفا ژێ تێ وه‌رگرتن. ئها ئه‌ڤه‌ ڤلادیمێر پوتینه‌ ل ده‌سپێكا بویه‌رێ دبێژت: ئه‌ڤه‌ خه‌نجه‌ره‌كه‌ توركیا ژ پشتڤه‌ده‌ینایه‌ روسیا،ئه‌ڤه‌ژی تێ وێ واته‌یێ كوبویه‌ر نه‌ بچووكه‌ یانژی هه‌ما وێ بێ سزادانا توركیا ده‌رباز ببت و ژده‌ست نه‌دانا فرسه‌نده‌ك ژڤی جوره‌ی مافه‌كێ سروشتی یێ كوردانه‌ دڤێ كورد هشیار و ئاماده‌بت ژبوَ قه‌ومینان. گوهوَڕینا هه‌لوێستان، گوهوَڕینا سنووران،پێشهات وبویه‌رێن له‌زگین.