قەیس وەیس

یاریگەهێن فوتبۆلێ ل سەرانسەری جیهانێ وەکۆ جهێ کەیفخۆشیێ، هەڤرکییا پاقژ، و نیشاندانا کلتورێ بلند یێ جەماوەری دهێنە نیاسین، لێ ئەوا لڤێ دووماهیێ د ناڤا یاریگەها یانەیا دهۆکێ دا هاتیە روودان دگەل یانەیا مووسلێ، دیمەنەکێ نەجوان بوو، ب زێدەکرنا دەمی ل سەر یێ زێدەکری چەند کەسەک ژ جەماوەری هێرش کرنە سەر دادڤان و یاریزانێن مووسلێ، بوو ئەگەرێ دروستبوونا کاردانەوەیێن مەزن د ناڤ سۆشیال میدیایێ ئیراقێ دا، گەهشتە وێ ڕادەی سەرۆکێ یانە د کەنالێن ئاسمانی دا داخازا لێبورینێ بکەت.
ئەڤە نە جارا ئێکێ یە یانەیا دهۆکێ ژبەر ڕەفتارێن نە بەرپرسیارانە یێن تاقمەکێ کێم یێ هاندەران کو ب تبلێن دەستان دهێنە هژمارتن بهێتە سزادان ب کوژمەیێن مەزن یێن پارەی و بێ بەهرکرنا جەماوەری ژ ئامادەبوونێ، چەند خالەک ئەگەرن. ئێک: ئەگەرێن پشتبەستن د دروستبوونا ئەڤان ئالۆزیان دا.
بۆ تێگەهشتن د ڤێ دیاردەیێ دا، پێدڤییە تیشک بهێتە ئێخستنە سەر چەند ئەگەرێن سەرەکی:
* کێماسی د رێکخستنا ئەمنی دا: نەبوونا پلانەکا توند بۆ جوداکرنا جەماوەری ژ گۆرەپانا یاریێ، ب تایبەت دەمێن جەماوەر دبنە خودان پەرچەکردارێن توڕە.
* هاتنەخوارا کارگێریێ بۆ ناڤ یاریگەهێ: نەرازیبوونا چەند ئەندامێن کارگێریێ دناڤ چیمەنی دا دژی دادڤانی، هاندانەکا نەڕاستەوخۆ دا جەماوەر دەستدرێژیێ بکەت، چونکی پێشەنگێن یانێ ب خۆ دان بە خۆداگرتن بەرزە کربوو.
* نەژادپەرستی: هەبوونا چەند کەسێن کێم دناڤ هاندەران دا تێگەهشتنەکا دروست بۆ وەرزشێ و یاریگەهێ نینە.
* رۆلێ نەرێنی یێ سۆشیال میدیایێ: پەیجێن ناڤخۆیی و ڕاگەهاندنا نەبەرپرسیار پێش یاریێ رەوشێ تێکدەن و بارگرژیێ د ناڤبەرا جەماوەران دا دروست دکەن.
دو: چارەسەریێن بۆ بنبڕکرنا ڤێ کێشەیێ.
بۆ پاراستنا ناڤودەنگیا یانەیا دهۆکێ و پاشەڕۆژا وێ د خولێ دا، پێدڤییە ئەڤ پێنگاڤە بهێنە هاڤێژتن:
١. لایەنێ یاسایی و تەکنیکی (سزایێ تاکەکەسی)
* بکارئینانا تەکنۆلۆژیایێ: پێدڤییە دەروبەر و ناڤ یاریگەهێ ب کامیرەیێن چاڤدێریێ یێن پێشکەفتی بهێنە دانان بۆ ئاشکراکرنا تێکدەران.
* دروستکرنا «لیستا ڕەش»: هەر کەسەکێ هێرشێ بکەتە سەر دادڤان یان یاریزانان، ناڤێ وی بچیتە د لیستا ڕەش دا و مافێ نە هاتنا یاریگەهێ لێ بهێتە دانان.
* سزادانا یاسایی یا تاکەکەسی: پێدڤییە ئەڤ کەسە ڕادەستی دادگەهێ بهێنە کرن، دا کو یانە ب تنێ باجا خەلەتیێن وان نەدەت.
٢. لایەنێ کارگێری و هۆشیاری
* پێشەنگیا کارگێریێ و کادرێ هونەری: پێدڤییە ئەندامێن کارگێریێ ببنە نموونە بو جەماوەر و یاریزانێن خوە.
* کاراکرنا رۆلێ دەستەکا پشتەڤانا: پێدڤییە هاندەرێن فەرمی یێن دهۆکێ، ئەندامێن خۆ ل ناڤ جەماوەری بەلاڤبکەن داکو چاڤدێریا هەر ڕەفتارەکا نە دروست بکەن و ڕێگریێ لێ بکەن.
* کەمپینێن ڕاگەهاندنێ: ئەنجامدانا کەمپینێن هۆشیاریێ ل ژێر دروشمێ «پشتەڤانیا شارستانی»، بۆ رەوشەنبیرکرنێ و رۆهنکرنا بابەتێن جودا.
دەرئەنجام:
یانەیا دهۆکێ سیمبولەکێ وەرزشی یا گرنگە ل ئیراقێ و کوردستانێ، خەلکێ دهۆکێ ب دلۆڤانی و مێڤاندوستیێ دهێنە نیاسین، ڕێگەدان ب تێکدانا ڤی ناڤودەنگیێ ژلایێ چەند کەسەکا ڤە ئێدی جهێ قبوولکری نینە، دەم هاتیە کارگێری،هێزێن ئەمنی و جەماوەرێ ڕاستەقینە پێکڤە کاربکەن بۆ پاقژکرنا یاریگەهێ ژ توندوتیژیێ دا کو دهۆک هەردەم وەکۆ ستێرەکا گەش د ئەسمانێ وەرزشا ئیراقێ دا یا بەرزبیت.

قیس ویس

پشتی هەڤرکیەکا توند و ماندیبوونەکا مەزن، هەردو جەمسەرێن وەرزشی یێن پارێزگەهێ، یانەیێن دهۆک و سێمێل، شیان ژ هەژییاتی پلێتا دەربازبوونێ بۆ خولا نایابا کوردستانێ ب دەستڤە بئینن، ئەڤ ڤەگەڕیانە بۆ جهێ وان یێ سروشتی نیشانا هندێیە کو ئیرادەیا سەرکەفتنێ یا هەی، لێ پرسیارا هەرە گرنگ ئەوە ئەرێ سالا بهێت دێ بتنێ بۆ پشکداریێ چنە د خولێ دا، یان دێ کار بۆ ئەنجامێن مەزن و رێزێن پێشیێ هێتە کرن؟
پلانەکا نوو بۆ قووناغەکا نوو
دەربازبوون ب زەحمەت بوو، لێ مان و هەڤرکی د ناڤ خۆلا نایاب دا پێدڤی ب پلانەکا تۆکمەتر هەیە، دا کو ئەڤ دەربازبوونە نەبیتە مێهڤانیەکا کورت، پێدڤییە کارگێریێن هەردو یانەیان ل سەر ئەڤان تەوەرێن سەرەکی کار بکەن:
ئینانا یاریزانێن خودان ئەزموون:
خولا نایاب پێدڤی ب یاریزانێن خودان ئەزمون هەیە کو بشێن د دەمێن بەرتەنگ دا ئەنجامێ ب گوهۆڕن و بشێن هەڤرکیێ بکەن، پشتبەستن بتنێ ب گەنجان بێی هەبوونا خودان ئەزمونان، دبیتە ئەگەرێ تێکچوونا ریتما تیپێ د یارییێن دژوار دا.
پێگەهاندنا لاوان وەکۆ ستوینێن پاشەڕۆژێ:
پێدڤییە گرنگیەکا تایبەت ب یاریزانێن لاو بهێتە دان، لێ ب مەرجەکێ ئەڤ لاوە د پشکدار بن و دەلیڤەیا یاریێ پێ بهێتە دان، دا کو د پاشەڕۆژێ دا ببنە ستوینێن بهێز یێن یانێ و ناسنامەیا تیپێ بپارێزن.
سەقامگیریا دارایی و دوور ژ سۆزێن بێ کریار
ئێک ژ کێشەیێن هەرە مەزن یێن وەرزشا مە، کێشەیا دارایی و بەلێنێن بێ کریارن، پێدڤییە چاڤدانا دارایی یا دروست بۆ یاریزانان هەبیت و مافێن وان د دەمێ خۆ دا بن، دوورکەفتن ژ سۆزێن بێ بنەما دێ باوەریێ د ناڤبەرا یاریزان و کارگێریێ دا دروست کەت، کو ئەڤە ژی کلیلا سەرکەفتنێ یە.
ئاڤاکرنا کادرەکێ ئیداری و تەکنیکی یێ سەربەخۆ:
پێدڤییە کارگێری خودان پلانەکا درێژخایەن بیت و دەستێوەردانێ د کارێ راهێنەری دا نەکەت، سەقامگیریا تەکنیکی و دانا دەستهەلاتان بۆ کادرێ هونەری، نیڤا سەرکەفتنێ یە بۆ هەر یانەیەکا بشێت هەڤرکیا رێزێن پێشیێ بکەت.
رۆلێ جەماوەری وەکۆ پالپشتەکێ سەرەکی
دهۆک و سێمێل خودان جەماوەرەکێ وەفادارن، پێدڤییە کارگێری کار بکەت بۆ زڤڕاندنا باوەریێ بۆ جەماوەری دا کو یاریگەهێ تژی بکەن. پشتەڤانیا جەماوەری د خولا نایاب دا فشارەکا ئەرێنی ل سەر یاریزانان دروست دکەت و یاریگەهێ دکەتە دۆزەخ بۆ یانەیێن مێهڤان.
دووماهیێ
ڤەگەڕیانەیا دهۆک و سێمێل بۆ خولا نایاب دەستپێکا ئەرکەکی یە نەک دووماهی، جەماوەرێ ڤان هەردو یانەیان چاڤەڕێی هندێ ناکەن بتنێ ناڤێ وان د لیستێ دا هەبیت، بەلکو دڤێت ئەڤ ڤەگەڕیانە ببیتە سەرهەلدانەکا نوی بۆ وەرزشا پارێزگەهێ و جهێ خۆ د ناڤ پێشەنگان دا جێگیر بکەن.

قەیس وەیس

د جیهانا فزتبۆلێ دا دهێتە گوتن گولپارێز نیڤا تیمێ یە، لێ ل یانەیێن مە یێن وەرزشی ئەڤ نیڤە گەلەک جاران دبیتە قوربانییا هندەک بڕیارێن کارگێری یێن نە دروست، کێشە نە ب تنێ د ئاستێ تەکنیکی دایە، بەلکو د کێم باوەریێ دایە بەرامبەر کوڕێن باژێری.، د خالێن دیارکری دا دێ روهنکرنەکێ ل سەربابەتێ خوە دەین.
• بەهرەیێن ل سەر کورسییا یەدەک چاڤەڕیێ دەلیڤێ نە:
دو نموونەیێن دیار و بەرچاڤ یێن یاریزانێن ئەم بەحس ژێ دکەین، ئەحمەد بەشار ل یانەیا دهۆکێ و عیماد عیسا ل یانەیا زاخۆ، ئەڤ هەردو گولپارێزە خودان جەستە، زیرەکی و شیانێن بلند هەنە، لێ سال بۆ سالێ جهێ وان یێ جێگیر ب تنێ کورسیکا یەدەکە، یا سەیر د ڤێ چەندێ دا ئەوە، ئەو گولپارێزێن ب کوژمەیێن دارایی یێن خەیالی و گرێبەستێن مەزن ژ دەرڤە دهێنە ئینان، د گەلەک یاریان دا ئاستێ وان نە گەهشتیە ئاستێ ئەحمەد و عیمادی ژی یان جووداهییەکا مەزن دروست بکەن.
• شکاندنا گیانێ وەرزشی:
نەدانا دەلیڤەیێ بتنێ زیانێ ب ئەنجامان نا کەڤیت، بەلکو زیانەکا دەروونی یا مەزن ل دیڤ خۆ د هێلیت ژ وانا:
• لاوازبوونا هەڤرکیێ: دەمێ یاریزان بزانیت چەند یێ ب هێز بیت ژی، هەر دێ یێ یەدەک بیت چونکی یێ بیانی ب پارەیەکێ گران هاتیە کرین، روحیەتا وی یا کارکرنێ دهێتە کوشتن.
• نەمانا وەفاداریێ: یاریزانێ باژێری ب دل و گیان بۆ درێسێ یانەیێ شەڕی دکەت، لێ دەمێ هەست دکەت بتنێ بۆ پڕکرنا ڤالاهیێ یە، ئەڤ سۆزە بەر ب سستبوونێ دچیت.
پەیاما دووماهیێ:
پێدڤییه کارگێرییا یانەیێن مە بزانن کو ئاڤاکرنا ستێرەکێ باژێری کو بۆ سالان بمینیت و ببیتە سمبول بۆ یانێ، ب هزاران جار ب مفاترە ژ ئینانا یاریزانەکێ دەمکی یێ گرانبها کو بتنێ بۆ وەرزەکێ میڤان بیت. باوەریێ ب کوڕێن خۆ بکەن، چونکی ئەوان پتر دل ب ناڤێ یانێ ڤە هەیە .

قیس ویس

دەمێ ئەم سەیری دیرۆکا یانەیا دهۆکێ دکەین، ب تایبەت ل سالێن زێرین یێن خولا نایابا ئیراقێ، پێکهاتیێ سەرەکی و یەدەک پڕ بوون ژ کوڕێن پارێزگەهێ کو ب دل و گیان بۆ درێسێ یانەیێ شەڕ دکر، لێ مخابن ئەڤڕۆ رەوش بەر ب ئاقارەکێ مەترسیدار چوویە، ب جۆرەکێ کو بتنێ دو یان سێ یاریزانێن ناڤخۆیی د پێکهاتیێ دا ماینە.
ئەڤ پاشەکشەیا مەترسیدار د چەند خالێن سەرەکی دا کورت دبیتەڤە:
* سیاسەتا کارگێریێ: گوشارێن بۆ ب دەستڤە ئینانا ئەنجامێن خێرا، وەکرییە کو کارگێری و راهێنەران پشت بەستن ل سەر یاریزانێن پیشەکار و خودان ئەزموون بکەن، ب ڤێ یەکێ یاریزانێ گەنجێ دهۆکی بێ دەلیڤە مایە و رۆلێ وێ د یاریگەهێ دا نامینیت.
* قەیرانا قووناغێن تەمەنی: نەبوونا راهێنەرێن پسپۆر د تیمێن بنەڕەتی دا کو بشێن سالانە یاریزانان بۆ تیما ئێکێ بەرهەڤ بکەن، بۆشاییەکا مەزن دروست کریە.
* نەمانا یانەیێن هەڤڕک: بەری نوکە هەبوونا یانەیێن وەکۆ زێرەڤانی و گارە دەرگەهەک بوو بۆ دەرکەفتنا شیانێن گەنجان، لێ نەمان و سستبوونا وان بارێ یانەیا دهۆکێ گرانتر کریە.
* گوشارا جەماوەری: داخوازا بەردەوام یا پشتەڤانان بۆ سەرکەفتنێ، بێهنفرەهیێ ل دەف راهێنەران ناهێلیت کو «مخاگرە» یێ ب یاریزانێن نوو و گەنج بکەن.
ئەگەر کارگێری و راهێنەر ب ڕژدبن ل سەر ڤێ کێشەیێ نەوەستن، د پاشەڕۆژەکا نێزیک دا دێ یانەیا دهۆکێ بینین کو چ ناسنامەیەکا ناڤخۆیی تێدا نەمایە، پێدڤییە هەڤسەنگییەک د ناڤبەرا ئەنجام و پێگەیاندنا نەوەیەکێ نوو دا بهێتە دروستکرن.

قەیس وەیس

د دیرۆکا فوتبۆلا پارێزگەها دهۆکێ دا، هندەک وێستگەهـ هەنە نابیت ب ساناهی ل سەر راوەستیێن، ژبەر کۆ وان وێستگەیان نە ب تنێ ناسناڤەک بۆ یانەیێ ئینایە، بەلکو شکۆ و ناسنامەیا وەرزشی یا دەڤەرێ گوهۆڕی، سالەک ل سەر دەستکەفتێ مەزن یێ کۆپا یانەیێن کەنداڤی دەرباز بوویە، لێ هێشتا وەکۆ دوهی د مێشکێ جەماوەرێ وەفادارێ یانەیا دهۆکێ دا زیندی یە و ل هەر کووچە و کۆلانەکێ بەحس لێ دهێتە کرن، ئەڤ دەستکەفتە نە ب رێکەفت بوو، بەلکو بەرهەمێ ئیرادەکا پۆڵایین و پلانەکا سەرکەفتی بوو.
جەماوەرێ دهۆکێ: وانەیا وەفاداریێ
ئەگەرێ ئێکەم و سەرەکی یێ ڤی دەستکەفتی، ئەو جەماوەرە بوو کو د هەمی بارودۆخان دا پشتەڤان بوو، دیمەنێ وێ یاریێ کو جەماوەر پێنج دەمژمێران بەری دەسپێکرنا یاریێ و ب دەمێ روژی ل سەر کورسیێن یاریگەهێ روینشتین، دێ وەکۆ وانەیەکا وەفاداریێ د دیرۆکێ دا مینیت، ئەو هاوار و پشتەڤانیا بێ وێنە بوو پالدەر کو یاریزان ل ناڤ یاریگەهێ ب گیانەکێ فیداکارانە شەڕی بۆ ناسناڤی بکەن و ئاهەنگێن سەرکەفتنێ ل سەرتاسەری باژێری بەڵاڤ ببن.
ژ پلا ئێکێ بۆ سەرێ لوتکەیێ
ئەوا ڤی دەستکەفتی پتر تایبەت دکەت، ئەو بازدانە بوو کو کارگێریەکا خودان شیان ئەنجام دای، یانەیا دهۆک شیای د دەمەکێ کورت دا ژ خولا پلا ئێک بگەهیتە ئاستەکێ کو ل سەر ئاستێ نێڤدەولەتی هەڤرکیێ بکەت، سەرکەفتن ب سەر جەمسەرێن ب هێزێن کەنداڤی وەکۆ ئیتفاقا سعوودی و پاشان ل دووماهیێ ب سەر ئەلقادسیەیا کوێتی، نیشانا هندێ بوو کو دهۆک نە تنێ بۆ پشکداریێ چوبوو، بەلکو بۆ سەپاندنا ناڤێ خۆ وەکۆ هێزەکا نوو ل ناوچەیێ چوبوو.
دهۆک.. ئێکەمینێ بێ رکابەر
ب ڤێ سەرکەفتنێ، دهۆکێ ناڤێ خۆ د دیرۆکێ دا نەمر کر؛ بوو ئێکەمین یانەیا کوردی و ئێکەمین یانەیا ئیراقی کو بشێت ڤی ناسناڤی دەستەبەر بکەت، ئەڤە وەرچەرخانەکا مەزن بوو د دیرۆکا فوتبۆلا ئیراقێ دا، چونکی دهۆکێ سەلماند کو یانەیێن کوردستانێ د شێن ل دەرڤەی سنۆران ژی ئاڵایێ سەرکەفتنێ بلند بکەن.
رەنگێ زەر: ژ یاریگەهێ بۆ ناڤ مالان
کارتێکرنا ڤی ناسناڤی گەهشتە وی رادەی کو جەماوەر ب شێوەیەکێ بەرچاڤ ب یانەیا خۆ ڤە هاتە گرێدان، فرۆتنا ب کۆم یا درێسێن یانەیێ و خاڵیبوونا ستۆرێن وەرزشی ژ رەنگێ زەرد، نیشانەکا روونە بۆ وێ پەیوەندیا کویر کو د ناڤبەرا باژێر و یانێ دا دروست بووی، دهۆک بوو تاکە تێما کو هەمی خەلک ب ئێک دەنگ و ب ئێک رەنگ ل دەور کۆم بوون.
دەرئەنجام:
کۆپا کەنداڤی بۆ دهۆکیان تنێ پارچەکا مەدەنێ نینە، بەلکو سیمبولێ سەرکەفتنا ئیرادەیێ یە ب سەر ئاستەنگان دا، داستانەک بوو کو دێ ل سەر زمانێ هەر دلسۆزەکێ ڤی باژێری ب شانازی ڤە هێتە گێڕان، دا کو نەوەیێن داهاتی بزانن دهۆک هەر دێ یا لوتکە پارێز بیت.

قەیس وەیس

وەكو دیار د نوكە دا بانگەشیا هەلبژارتنان بۆ پەرلەمانێ‌ ئیراقێ‌ دهێتە كرن، هەر لایەنەك بخوە چەند بەربژار داناینە ژبۆ نوونەراتییا وان بكەت، لەوما ژی دڤێت تاكە كوردستانی یێ‌ هوشیار بیت ژبۆ دەستنیشانكرنا كەسێ‌ ژ هەژی كو خزمەتا مللەتێ‌ خوە بكەت، ئەم وەكو وەرزشڤان ژی چاڤەڕێ‌ بین كو خزمەتا وەرزشا مە ژی بهێتە كرن، ئەڤچا دڤێت ئەم دیرۆكێ‌ بخوین و ئەو قووناغێن بەری نوكە هاتینە پێش ب روونی ل سەر ڕاوەستیێن دێ‌ باش دیار بیت ژبلی پارتی كەس نەبوویە باشتر و چێتر خزمەتا وەرزشا كوردستانێ‌ و پارێزگەها دهۆكێ‌ بكەت، هەكە ب كورتی دیار بكەین دگەل خزمەتگوازریێن بەردەوام یێن حوكمەتا هەرێما كوردستانێ‌ ب سەركێشییا سەركردێن پارتی ژ لایێ‌ ئاڤەدانكرنێ‌ و پێكەڤتنا كەرتێن جودا بەر ب ئاستێن بلند چوویە، گەلەك دوور ناچین، دێ‌ ژ وەرزشێ‌ دەستپێكەین، بەری چەندی سالان ئەم پێدڤی ب یاریگەهـ و هۆلێن وەرزشی بوو، ئەڤ ژێرخانە پێشكەڤتییە و نموونە د زوور، هەروەسان دەستكەڤێن یانەیێن مە یێن وەرزشی د سالێن بۆری و هەتا ئەڤ سالە ل سەر ئاستی كوردستانێ‌، ئیراقێ‌ و دەرڤە دا، ژبیر نەكەین كوردستانێ‌ دەرگەهێن خوە بۆ چەندین قارەمانیێن مەزن یێن نێڤدەولەتی ڤەكریینە،
دڤێت ئەم رۆلێ سەركردایەتییا پارتی ب تایبەتی بەرێزان سەرۆكێ هەرێمێ نێجیرڤان بازرانی و سەرۆكێ حكومەتا كوردستانێ مسرۆر بارزانی و فەرماندە مەنسور بارزانی ژبیر نەكەین بۆ پشتەڤانییا وان یا بەردەوام بۆ سكەتەرێ وەرزشێ ب گشتی، بەلگەژی سالانە ب سەدان وەرزشڤانان بێ جوداهی ب دیاریێن پارتی هاتینە خەلاتكرن، بێ گۆمان ئەڤە پووتەدانە ئارمانج پێ ئەوە خزمەتكرنا وەرزشڤانایە، ژبەر كو پارتی باش دزانیت وەرزش رێكەكا سەرەكی یە بۆ ئاڤاكرنا كەسەیەتیا گەنجان كو ببنە مرۆڤێن كاریگەر دناڤ جڤاكی دا، دیسان ژبیر نەكەین پەیڤا سەرۆك بارزانی ڤێ چەندێ ب ئاشكرایی دووپات دكەت، دەمێ دبێژیت(رۆلێ وەرزشێ ژ هیچ لایەنەكێ سیاسی كێمتر نینە بۆ ناساندنا مللەتێ كورد ل جیهانێ)، بڤێ پەیڤا گرنگا سەرۆك بارزانی ژبلی هندێ كو ئەرك و بەرپرسیارەتێن دیرۆكی بۆ كارمەندێن بیاڤی وەرزشی دەستنیشاندكەت، رۆلێ وەرزشێ دخزمەتكرنا دۆزا رەوایا مللەتێ كوردستانێ بەرچاڤدكەت، ژبەر كو پارتی باش دزانیت وەرزش چییە و ئارمانجێن وێ چنە، هەردەم ڤیایە گەنجێ كوردستانی دهەموو بواران دا یێ سەركەڤتی بیت و بگەهیتە هەمی هیڤی و ئارمانجێن خوە، ئەگەر ئەڤرۆگە پارتی برێكا وەرزشێ هزرێن نەتەوەیی بەلاڤبكەت، بێ گۆمان ئەڤە دیاردەكا ساخلەمە و ژهەژی رێزگرتنێ یە، لەوما پێدڤییە ل ئەم وەكو وەرزشڤان هەموو پشتەڤان بین بۆ لیستەیا 275 یا هەلبژارتنێن پەرلەمانێ ئیراقێ، ژبەركو ئەڤ هەلبژارتنەگ گەلەك گرنگن بۆ وەرزشڤانێن مە تایبەت ئەوێن هیڤیێن مەزن هەبن د قارەمانیێن دەرڤە دا، دیسان دا مافێ‌ یانە و وەرزشڤانێن مە ل بەغدا نە هێتە خوارن، ب هەموو شیانێن خوە ئەندامێن پەرلەمانێ ئیراقێ‌ ب لیستا 275ێ‌ ڕێژەیا وێ‌ زێدەتر بكەین، ژبەركو دێ‌ كەڤیتە د خزمەتا وەرزشڤان دا و دێ‌ مافێ‌ هەمییا پارێزیت و دەستۆرێ‌ ئیراقێ‌ بجهئینن، پشكدارییا وەرزشڤانان و دەنگ ب لیستا پارتی سەركەڤتنە بۆ لیستەیا هەڤپشكی، هەڤسەنگی و لهەڤكرن، لیستا 275 گەرەنتییا هیڤی و ئۆمێدێن وەرزشڤانایە.