یاری ب ئاگری ناهێنه كرن و كارێ مرنێ نه‌ك تشته‌كێ هه‌لامته‌یه، قه‌ده‌را مه ژی ئه‌وبوویه كو ئه‌م ب نه‌چاری هاتینه هاژۆتن به‌ر ب مرنێ ڤه، سه‌ره‌رای هندێ كو پتریا ملله‌تاینه حه‌ز ژ مرنێ ناكه‌ین و عاشقێن ژیانێ ینه، ڤێ هاژۆتنێ ژی ئه‌م نه‌چاری ڤی كاری كرینه كو ببینه شه‌ڕڤان و خودان سه‌ربۆر و ده‌لیڤه بۆ مه نه‌هاتیه دان كو ڤێ سه‌ربۆرا خوه بێخینه ل ژێر ركێڤا زانسته‌كێ ئه‌كادیمی و مفایی ژ سه‌بۆرا خوه ببینین، به‌لێ دبیت پرسیاره‌ك بهێته پێش كو به‌لێ ئه‌ڤه پتره ژ گرێبه‌سته‌كا سالان ئه‌م نیمچه ده‌وله‌تین، نه‌خاسمه مژارا مه ژی سه‌ربۆرا پێشمه‌رگاتیێ یه و له‌شكرێ شۆرشگێرێ كوردستانێ، له‌ورا ژی ڤێ داویێ ئه‌م د ڤی شه‌رێ خوه دا ل دژی تیرۆرستێن داعشێ ل ده‌سپێكێ تووشی ڤه‌جنقینه‌كێ بووین و له‌شكربوون و پێشمه‌رگاتی تێكهه‌لنگفتن، ئه‌رێ كیژ وان پتر ب كێر ڤی شه‌ری دهێت؟! شه‌رێ ده‌شتێ تشتێ نوو بوو بۆ پێشمه‌رگه‌ی و به‌ره‌بابێ نوو یێ سه‌رده‌مێ ئه‌نترنێتی و فه‌یسبووكی و.. . هتد. دێ بێژن مانێ له‌شكرێ عیراقێ ژی موووسل به‌ردا و شه‌ر نه‌كر و ژ به‌ر شه‌ڕڤانێن تیرۆرستێن ده‌وله‌تا خیلافه‌تا ئیسلامی ره‌ڤین، به‌لێ وه‌سا دیاره كو راستیا شه‌رنه‌كرنێ دزڤریت بۆ پیلانه‌كا سیاسی و ئه‌ز باوه‌ر ناكه‌م چو فه‌رماندێن و ئه‌فسه‌رێن مه‌زن ب ساناهی ناڤێ ره‌ڤینێ بیننه سه‌ر خوه، چونكو ئه‌م ب خوه د ناڤدا بووین و مه ب چاڤێن خوه دیت هێلانا سه‌ربازگه‌ه و چه‌كی یا رێكخستی بوو، هێشتا ناڤێ تیرۆرستان نه‌هاتی و سه‌ربازگه‌ه هێلان، گه‌له‌ك جهان پێشمه‌رگه گه‌هشتێ و ما بۆ چه‌ند هه‌یڤه‌كان چو شه‌ڕڤان نێزیك نه‌بوون، به‌لێ هه‌می سیناریۆ د دراماتیكی بوون ب فه‌رمان و ب پلان دهاتنه روودان. له‌ورا ل ده‌سپێكێ ژی ژ به‌ر لاوازبوونا لایه‌نێ ئه‌كادیمی د رێڤه‌برنا به‌ره‌یێ مه دا سه‌ده‌مه‌كێ پێشچاڤ بوو بۆ هه‌می چاڤدێران، راسته پاشمایه‌كێ سه‌ربۆرێ هه‌بوو یێ پێشمه‌رگاتیێ و كێمیا چه‌ك و ته‌قه‌مه‌نی و نه‌بوونا پشته‌ڤانێن هه‌رێماتیك و نێڤده‌ولی، به‌لێ هه‌كه ب نێرینه‌كا زانستی ته‌ماشی شه‌رێ نوكه بكه‌ین، دبیت هه‌مان كێماسی هه‌بیت، ئه‌و ژی دوورخستنا كه‌سێن ئه‌كادیمی و شه‌فسه‌رێن نیزامی ژ بریارا پیلانا ستراتیژی و له‌شكری، هه‌كه هه‌بن ژی نه‌ینۆكێن وان هاتینه كه‌زاخستن، چونكو ئه‌و زانینا د سه‌ری دا ژ به‌ر هنده‌ك كریارێن جوسته‌یی ژبیرێ برینه و كاره‌كێ دی بۆ هاتیه ملكه‌چكرن، یا پێدڤی ئه‌وه پلانه‌كا سه‌ربازی یا ستراتیژی هه‌بیت، بۆ ته‌عبیه‌كرنا به‌ره‌یێ له‌شكری و چاوانیا دابه‌شكرنا تاكێن له‌شكری، بلا هێزێن نیزامی د جودا بن ژ یێن شۆره‌شگێری، هه‌ر یه‌كه‌یه‌ك بلا ب ته‌جه‌حفول و هه‌ماهه‌نگی بهێته دانان، نه‌ك هه‌میان تێكهه‌ل بكه‌ی و ل به‌ر هه‌ردویان به‌رزه بیت كا چاوا دێ شه‌ر هێته كرن و چاوا سه‌رده‌ریكرنا ئه‌ته‌كێتێن له‌شكری هێنه كرن، بۆ نموونه تو لێنه‌ری و عه‌میدی بكه‌یه ئێك ئه‌رك، هنده‌ك تشتێن مللی ته‌ڤلی یێن ئه‌كادیمیك بكه‌ی. هه‌لبه‌ت دێ هنده‌ك خلۆله هه‌بیت، هنده‌ك دێ شه‌هید بن، سه‌رێن رێیا دێ ل به‌ر به‌رزه بن، بۆ نموونه كریارێن مژارا (مهنه المیدان) گه‌له‌كا فه‌ره بۆ شه‌رێ ده‌شتێ و هه‌ر وه‌سا ته‌شكیلێن ته‌عبه‌وی، دبیت شه‌رڤانێ چیای باش نه‌زانیت وه‌كو ملازمه‌كی نیزامی و هتد.. په‌یڤینه‌كا گرنگ هه‌بوو یا سه‌رۆك مه‌سعود بارزانی ل ده‌می ده‌رچوونا خۆله‌كا له‌شكرێ تایبه‌تێ زاویته یێ جاران دا گۆتبوو: تێكهه‌لكرنا سه‌بۆرا پێشمه‌رگاتی ل گه‌ل زانستێ له‌شكری تشته‌كێ جوان دێ ژێ ده‌ركه‌ڤیت”. له‌ورا ئه‌ڤێ چه‌ندێ هونه‌ره‌ك و هونه‌رمه‌نده‌ك پێ دڤێت كو هه‌ردو لایه‌ن ل ده‌ف هه‌بن، نه‌ك ببیته پرسه‌كا بازرگانی و ب قه‌باله به‌ره بهێته داگرتن، ئه‌ڤا مه گۆتی زێده‌باری تشته‌كێ گرنگ ئه‌و ژی فاكته‌رێ نه‌زاهه‌تێ یه د ئه‌نجامدانا ئه‌ركی دا.
نووترين نووچه
- سەرۆك بارزانی ب گوهلێبوونا دەنگوباسێ مالئاڤاییكرنا ئیبراهیم گاباری خەمبار بوو
- ئامینا زكری: سەرۆك بارزانی ژێدەرێ باوەری و هێزا ئافرەتا كوردە
- رێككەفتن بۆ كڕینا پەترۆلا كوردستانێ هاتیە كرن و تنێ هنارتن مایە
- ژ ترسا كارڤەدانێن پارتی و بایكۆتكرنا هەلبژارتنان دێ بەغدا بڕیارەكێ ل دۆر مووچەی دەت
- هەرێما كوردستانێ بوویە پەناگەهەكا ئارام بۆ ئاشۆرییان
- نێچیرڤان بارزانی ل گەل شاندەكێ ئاشۆرییێن ئەمریكا كۆمبوو
- بۆ كونترۆلكرنا میلیشیایان ئیراقێ پێدڤی ب قانوون و دادگەهێ هەیە
- هەلبژارتن ل ئیراقێ گوهۆڕینان پەیدا ناكەن
- ئیراقێ پێدڤی ب دادگەهەكێ هەیە كو ب رێیا پشتەڤانییا مادەیا 92 یا دەستوورێ بهێتە دروستكرن
- سەركرداتی و حوكمەت و خەلكێ ئیماراتی هەردەم هاریكار و پشتەڤانێن كوردستانێ بوون
شیرزاد نایف
ئه‌لمانیا وه‌لاتێ زه‌لامانه یان دهۆك!!
چه‌ند مه بهیستی یه كو رێژه‌یا مرۆڤان ل سه‌رانسه‌ری جیهانێ و ل هه‌می وه‌لات و باژێران، رێژه‌یا ژنان پتره ژ یا زه‌لامان، به‌لێ ل وه‌لاتێ مه وه‌نینه، ژن بوونه‌وه‌ره‌كێ سه‌یر و ئه‌نتیكه‌یه، ده‌مێ ل سه‌ر جادێ دچیت، خه‌لكه‌ك هه‌می كاران دهێلن و ته‌ماشه دكه‌نێ و سه‌د رسته و په‌یڤان به‌حس دكه‌ن، ژن ل وه‌لاتێ مه كه‌سه‌كێ نه‌به‌رهه‌ڤه، هه‌ر وه‌كو هونه‌رمه‌ندا كورد یا مه‌زن گولستان په‌روه‌ر د دیداره‌كا رادیۆیا دهۆك دا گۆتی، دهۆك باژێرێ زه‌لامانه هه‌ر جهێ تو بچیێ هه‌می زه‌لامن، هه‌ره بازاری هه‌می زه‌لامن، هه‌ره كافیه‌كێ هه‌مه‌ی زه‌لامن، هه‌ره ماركێتێ هه‌می زه‌لامن و هتد. هه‌ر وه‌كو چو ئافره‌ت ل ڤی واری نین، هه‌ر چه‌نده نها چه‌نده‌كا گوهۆرینێ په‌یدابوویه و خه‌له‌كێ نوو هاتیه باژێرێ مه و ئه‌ته‌كێتێن ژیانێ هاتینه گۆهارتن، به‌لێ هه‌ر ره‌گه‌ز د ژێكجودا و نامۆنه. چاوا ئه‌لمانیا وه‌لاتێ وه‌لامانه؟ كو رامانا په‌یڤا چێرمه‌نی رامانا وێ وه‌لاتێ زه‌لامانه، به‌لێ وه‌نینه گه‌له‌ك ئامارێن ئه‌لمانیا دیار دكه‌ن كو رێژنا مێیان پتر ژ یا زه‌لامان، له‌وار ئه‌ڤ به‌راوردی و وه‌كهه‌ڤی یه مه كر، ئه‌ڤ سیمایه هه‌لبه‌ت ل هه‌می باژارێن عیراقێ و گه‌له‌ك ده‌وله‌تێن رۆژهه‌لاتا ناڤین هه‌یه و هه‌نه ده‌ڤه‌ر ژ ده‌ڤه‌رێ جوداتر، هه‌ر وه‌سا گه‌له‌ك دیمه‌ن هاتینه گوهارتن به‌لێ مێشك ماینه وه‌كو خوه، بۆ نموونه و هه‌تا ئه‌ڤرۆ هه‌كه ل هنده‌ك تاخێن مللی ژنه‌ك ترومبێلێ بهاژۆت، دێ ب تشته‌كێ سه‌یر هێته سرنجكرن، به‌لێ ل هنده‌ك تاخێن نوو تشته‌كێ نۆرماله، بیرا مه دئێت ل سالێن هه‌شتێیان شه‌رم بوو ژنه‌كێ پێپسی ل نیڤا سیكێ ڤه‌خار با، یا ندا دانیته بن عه‌بایێ خوه و ڤه‌خۆت، هه‌ر دیسا هه‌تا سالێن نوتان ژی ل ڤێ دهۆكێ شه‌رم بوو ژن بچیته كافتریا سنادۆیچان یان چووبا سینه‌مێ، به‌لێ نها گاڤێن مه‌زنتر هاتینه هاڤێتن و دونیا هاته گوهارتن ل سه‌ر دفنا هه‌می ره‌وشت و تیتیالان، ئه‌ڤه ژی هه‌می بارا پتر دابونه‌ریتێن عه‌شیره‌تیێ نه ته‌مه‌تی هندێ كو ژ ره‌وه‌شتێن ئیسلامیبوونێ بن، چونكو بۆ نموونه ئیران وه‌لاته‌كێ ئیسلامی یه، به‌لێ ئازادیا ژنێ پتره ل ده‌ف مه، چونكو ئیسلام رێكێ ل هندێ ناگریت كو ژن ژی مرۆڤ نه‌بیت و مافێ خوه هه‌بیت، به‌لێ هنده‌ك سه‌رده‌ری هه‌نه دڤێت ل ناڤ هه‌می ئایین و جڤاكان رێزگرتن هه‌بیت بۆ ڤی ره‌گه‌زی، ئه‌م به‌رێ خوه ناده‌ینه ژنێ وه‌ك مرۆڤ.. به‌لێ سه‌ره‌رای ڤان هه‌می تشتان به‌لێ هه‌تا نها ئافره‌ت ل دهۆكێ بوونه‌وه‌ره‌كێ سه‌یره و نابیت بچیته پیشه‌سازیێ روونێ ترومبێلا خوه بگوهۆریت یان ترومبێلا خوه ببه‌ته به‌لانسێ یان فیته‌ری، یانژی هه‌ما قه‌ده‌غه‌یه ژن د ناڤ صیناعا دهۆكێ را ببووریت و هه‌كه بۆری ژی، دڤێت ببیته ته‌شابه‌ت و سینه‌ما، له‌ورا ژی دبێژم دهۆك نه‌به‌س وه‌لاتێ زه‌لامانه به‌لێ بابێ زه‌لامانه!!
شه‌مه‌نده‌فر وكه‌رێ بێ كورتان!!!
پێشنیازه‌كه و بیرئانینه‌كه ئاراسته دكه‌م به‌لێ نزا بۆ كیژ لایه‌نێ؟! هه‌ر وه‌كو دیار و نها سكه‌یێ شه‌مه‌نده‌فرێ ـ قیتاڕێ كو ژ پێش پتر ژ ساله‌كێ كه‌فتیه د ده‌ستێن ئێمن دا یێن پێشمه‌رگه‌ی ل ده‌ڤه‌را میحوه‌رێ رۆژئاڤایێ دیجله، ل سه‌ر (GPS) دكه‌ڤیته ده‌ڤه‌را ته‌له‌عفه‌ر و ئیداریه‌ن د كه‌ڤیته ده‌ڤه‌را زومار، خالا ده‌سپێكێ ژ ده‌ڤه‌را )(تل الهیپم) و كارێزێ ده‌ست پیێ دكه‌ت و هه‌تا دگه‌هیته باژارێ ره‌بیعه ل سه‌ر سنۆرێ سووریێ، ئه‌ڤ هێله یا سكه‌یی گه‌له‌كا كه‌ڤنه و ئه‌ڤه نێزیكی نیڤ سه‌ده‌یێ یه یێ هاتیه راوه‌ستان ژ كاری و مینا ب زارێ جادێ دبێژن یێ بوویه (كولند)!!، و چو مفایه‌ك ژێ نه‌هاتیه وه‌رگرتن، كو ئه‌ڤا نها ل بن كۆنترۆلا پێشمه‌رگه‌ی رووبه‌رێ نێزیكی ئێك ده‌مژمێرێ یه ب هاژۆتنا ترومبێلێ، كو خۆیایه بكارخستنا ڤێ هێلێ مفایه‌كێ وه‌به‌رهێنانێ یێ زۆر ل سه‌ر هه‌یه د وارێ ئابووری دا، نه‌مازه كوردستانا و جیۆپۆلتیكا وێ یا بێبه‌هره ژ ده‌رگه‌هێن سنۆری یێن بازرگانی و نه‌بوونا به‌نده‌رێن ده‌ریایی، چونكو هاتنوچوون گرنگترین فاكته‌رێن بازرگانیا گشتینه، ئه‌ڤجا یا مه دڤێت بگه‌هینین، ئه‌رێ دێ كارین د چ بیاڤ دا مفایی ژ ڤێ هێلێ بینین؟َ و كیژان لایه‌ن دپه‌یوه‌ندیدارن ب ڤی ئه‌ركی ڤه، رێڤه‌به‌ریا رێكوپران، وه‌زاره‌تا گه‌هاندن و ڤه‌گۆهاستنێ، وه‌زاره‌تا پێشمه‌رگه‌ی بۆ بكارئانینا له‌شكری، نوونه‌رێن مه ل به‌غدا، و هتد.. یا گرنگ ئه‌وه مفا ژ ڤی سكه‌یێ بهێته وه‌رگرتن، راسته یێ ستراتیژی یه و دبیت عیراقێ ب جیهانێ ڤه گرێدده‌ت، به‌لێ بۆچی ئه‌ڤه هنده ساله یێ بێ مفا؟، ما ئه‌م نكارین دو فرگۆنان بهاڤێژینه سه‌ر بۆ هاتنوچوونا پێشمه‌رگه‌ی یانژی هه‌ما بۆ گه‌شتیاران و ڤه‌گوهاستنا كه‌لوپه‌لان، نه‌مازه ئه‌م یێن ل به‌ر ده‌رازینكا ده‌ركرنا عیسابیاتێن داعش، یانژی هزره‌كێ پێشنییاز دكه‌ین، ئه‌رێ نابیت ئه‌ڤ سكه بهێته راكرن و بهێته دانان ل ناڤخوه‌یا هه‌رێمێ كو ئه‌م گه‌له‌ك د پێدڤی شه‌مه‌نده‌فرێ ینه، بۆ نموونه بهێته گرێدان د ناڤبه‌را دهۆك و زاخۆ دا، یان دهۆك و هه‌ولێر یانژی ل نیڤا باژێران ببیته میترۆ؟! ئه‌م گه‌له‌ك د پێدڤی هێلا شه‌مه‌نده‌فرێینه، هه‌كه ژ حوكمه‌تێ نه‌هێت بكه‌ت ژی، هزار كۆمپانیێن بیانی هه‌نه هێڤیا دكه‌ن و ب قست و ده‌ین گرێبه‌ستێ چێكه‌ین، هه‌تا وه‌بره‌هێنانا وێ دهێت دێ ئه‌دا كه‌ین، نه‌مازه ئه‌و ئه‌ردێ بكێر دهێت ل سه‌ر نه‌خشه‌یا هه‌رێمێ و هێلێن وێ كه‌نتۆری گه‌له‌ك زه‌حمه‌ت پێ نه‌ڤێن بهێنه راستڤه‌كرن، ئه‌ڤه ژی زێده‌باری وێ چه‌ندێ كو د ماسته‌ر پلانێن نه‌خشه‌یا عومرانی یا پارێزگه‌هێن هه‌رێمێ دا هه‌یه تشته‌ك ب ناڤێ شه‌منده‌فرا كوردستانێ، بلا مفا ژێ بهێته وه‌رگرتن، هه‌ر چو نه‌بیت دێ بیته شوونگرێ مه‌زاختنا سۆته‌مه‌نی یێ ترومبێلان و لڤینا هاتنوچوونێ ب ساناهی كه‌ت، بازرگانیێ گه‌شه‌كه‌ت، دیمه‌نه‌كێ شارستانی ده‌ته روویێ هه‌رێما مه یا نازك، هه‌كه چو نه‌بیت هه‌ما هنده‌ك فرگۆنێن ئالیی بهێنه چێكرن ل پیشه‌سازیا دهۆكێ و ئاسنگه‌رێن مه چێكه‌ن هه‌ما بۆ ئینانا سه‌مۆنه و نانی بۆ خالێن پێشمه‌رگه‌ی ل سه‌ر هێلا به‌رگیركرنێ، چونكو ئه‌ڤه سكه‌یێ هه‌یی به‌س فرگۆن ماینه، چاوا مه كه‌ر هه‌بیت به‌س كورتان مابیت؟! یانژی هه‌ما سترانبێژێن مه كلیپێن خوه ل سه‌ر ڤی سكه‌یی چێكه‌ن و بكه‌نه گری!!!
نه ب ده‌ستێ منه!!
ل كوردستانێ هه‌می تشت ب ده‌ستێ مهنه به‌لێ “چو ب ده‌ستێ مه نینه!! كه‌س ژ مه مرۆڤاینیتر نینه، كه‌س ژ مه دلۆڤانتر نینه و كه‌س ژ مه گونجایتر نینه، ئه‌م هه‌می خه‌بیرین و ماله‌كین، كاربارێن مه هه‌می د رێخستی و نه‌زیهن، سازیێن مه ژی هه‌می د ته‌كنۆقراتن، ده‌مێ به‌حس ل نه‌زاهه‌ت و قانوونێ دهێته كرن، خوه با دبه‌ر را ناچیت، و. . هتد، به‌لێ پا د راستی دا ئه‌ڤه هه‌می ب تنێ ب گۆتن و نه‌ك ب كریار..
هه‌كه تو یێ حه‌ق بی و ته مافه‌كێ قانوونی هه‌بیت و تو بخوازی بۆ بهێته ئه‌نجامدان ژی كه‌س نزانیت ب چ شێوه دێ سكالایا خوه یان داخوازناما خوه گه‌هینی! دێ ل گۆر به‌رژه‌وه‌ندیا حه‌فكستیران بیت، بۆ خوه ب خوه وه‌كو دادوه‌ریا یوزارسیفی بن، به‌لێ هه‌كی لایه‌نێ به‌رانبه‌ری چه‌ندێ یێ حه‌ق بیت به‌لێ هه‌كه نانه‌ك نه‌گه‌هیتێ كه‌س ژ مه وێرانتنر نینه، ده‌مێ تو ب زنجیرا مه‌راجعان بچی، دێ بێژیه به‌رپرسێ ئێكه‌م كو تو پێڤه یێ گرێدای ل خالا بنگه‌هین دێ بێژیته ته “نه ب ده‌ستێ منه” !! دێ ته هاڤێته ده‌ف یێ ل ژوور وی دا دی ئه‌و ژی دێ هه‌مان تشتی بێژته ته: “نه ب ده‌ستێ منه” !! هه‌ر دیسا ئه‌و ژی دێ ته گه‌هینته یێ ل سه‌ر وی دا ئه‌و ژی دێ هه‌مان تشتی بێژیته ته، دێ گه‌هیه كه‌سێ ل پله‌یا ئێكێ ل ئۆفیسا خوه پشتی سه‌ختیه‌كا دژوار ژ بال چه‌ندین فلته‌رێن دیتۆلین دا، به‌لێ كابرا ژی وه‌یا ب ده‌نگه‌كێ نازك و هێدی دێ هه‌مان گۆتنێ بێژیته ته، “نه ب ده‌ستێ منه” !! دێ ته زڤرینته ڤه بۆ لایێ یێن ل ژێر وی دا یان ژی بۆ وه‌زاره‌تێ یان بریكاریێ یان هه‌ر ناڤه‌كێ هه‌بیت، هه‌می دێ كۆك بن ل سه‌ر ئێك په‌یڤ ئه‌و ژی “نه ب ده‌ستێ منه” !!. هه‌ر دیسا هه‌كه بێسه‌روبه‌ریه‌ك ل سه‌رانسه‌ری وه‌لاتی هه‌بیت، قه‌یرانه یان ئاریشه‌كه یان خه‌مساریه‌كه، فه‌سادیه‌كه (حاشا)، شاشیه‌كه، هه‌می دێ بێژن نه ب ده‌ستێ منه، نزا ئه‌م دلناهێلین یانژی نه‌وێرین یان هند ژێ چێدكه‌ین!! به‌لێ پێچه‌وانی ڤێ چه‌ندێ ژی هه‌كه كاره‌كێ خێرێ یان حنێره‌ك بیت، شاشك دبێژیته شاشكێ وێڤه هه‌ره!!. هه‌كه قه‌هه‌ره‌مانیه‌ك بیت یان سه‌ركه‌فتنه‌ك بیت، ئیمام عه‌لی دبێژیت: “په‌شێمانی ل سه‌ر گونه‌هێ ئه‌وێ گونه‌هێ ناهێلیت”، هوون ژی دلێ خوه ب هه‌ژار و بێچاره‌یان ببه‌ن، حه‌قێ وان بده‌نێ، نێ ئه‌ڤێ هه‌میێ هۆ ب سه‌رێ مه ئینا، هه‌ر عه‌مه‌لێ مه‌یه ئه‌م گه‌ڤزاندین ل ناڤا قه‌یرانان و خونمێژان ل مه زال كرن، هێشتا ژی ئه‌م پێڤه نه‌چووینه، هه‌ر ئێك حه‌قی دهاڤێته به‌ر یێ دن وه‌كو پێنگ پۆنگێ لێدكه‌ن، ده‌مێ عه‌ریزا من یان مافێ من وه‌كو ئه‌وێن مامه‌لا وان برێڤه‌چووی بگه‌هیته ده‌ستێ حه‌فكستویران بۆچی دێ ب به‌ژن و بالا من بێژن و دره‌و ل من هێنه كرن ل به‌رهه‌ڤبوونا من، به‌لێ گه‌ر پشتا من كه‌فته وان دێ خه‌به‌ر چنه به‌ر ئه‌سمانان.
نازكیا قه‌هره‌مانیێ؟!
زێر كانزایه‌كێ ب بهایه و ژه‌نگی نابیت، ناڤوده‌نگیا وی ژی ل سه‌رانسه‌ری گه‌رۆدنی ده‌نگڤه‌دایه و هه‌رده‌م ژی به‌هرا شێری بۆ وی یه د ناڤ كانزایێن دیتر یێن خۆلیسه‌ر دا، به‌لێ ئه‌و زێر پێدڤی یه بهێته پاراستن د ناڤ په‌مبی دا و گه‌له‌ك نه‌ئێته ده‌ستڤه‌دان دا ره‌زیل نه‌بیت. ئاڤ ژی گه‌له‌كا نه‌رم و نازه‌لینه و نازكه به‌لێ ئه‌و هێزا هه‌یی چو تشت خوه ل به‌ر ناگریت، ئه‌ز ئیرادا شه‌ڕڤانی ژی وه‌سا دده‌مه دیاركرن، مه وه‌كو له‌شكر گه‌له‌ك تێكهه‌لی كریه ل گه‌ل له‌شكرێن ڤێ جیهانێ ب حوكمێ بارودۆخێن ده‌ڤه‌رێ و و بۆیه‌ران، كێم ئیراده و وێره‌كی یا ل ده‌ف شه‌رڤانێ كورد هه‌یی ل ده‌ف خه‌لكه‌كی هه‌بیت، چونكو تێكدا له‌شكره‌كێ خوه‌به‌خشه، هه‌می پێشمه‌رگه د زیره‌كن و هه‌می ژی فه‌رمانده و سه‌ركرده‌نه، شیره‌كێ تیژن ل سه‌ر حه‌فكا هه‌می زۆردار و سته‌مكاران، به‌لێ هه‌كه وی شیری كالۆخكێ خوه نه‌بیت (غمد)، ئه‌و تیژیاتی دێ نه خۆش بیت، زیره‌كی یا سه‌ربازی ژی بارا پتر نها ستێره‌ك و ئستیقامه‌كرنا فورزه و شه‌عیره و ئارمانجێ یه كو سه‌رێن داعشانه، بكه‌نه ئێك هێل و تبلا خوه ل سه‌ر جه‌له‌پكی بشدینن و فیشه‌كه‌كا ژ كیستێ خوه به‌رده‌تێ، بلا جارێ زكێ كورێ من یێ برسی بیت، دێ قه‌تیێت هندی گلێشخانه د پڕ بن ژ به‌رمایكێن هنده‌ك نه‌هنگان، دا گه‌له‌كا خۆش بیت هه‌كه فیشه‌ك ژ كیسێ گه‌نجینه‌یا گشتی با، هه‌كه ل شوونا هندێ كو (بی كه‌ی سی) و ناتۆ و (ئار بی جی) ل پێشانگه‌هێن ترۆمبێلا بان بۆ پۆفكرن و فه‌خفه‌خه‌یان، ل چه‌په‌رێ پێشێی یێ گڤانده‌یا ل هنداڤی دوژمنی با باشتر بوو، چونكو ئه‌م ب چاڤ دبینین و تڤه‌نگ ناگه‌هیتێ، یان دووربینێن حه‌راری و یێن شه‌ڤێ شوونا د جه‌بلخانێن كه‌ساتی ڤه تۆزگرتی بان، بلا بۆ وان كه‌سان بن یێن رۆژانه شه‌هید دبن. هه‌كه ژۆرێن پاشیێ یێن ده‌یناسۆران یێن بووینه عه‌لوه‌یێن فێقی ل سه‌ر پێشمه‌رگێن هه‌ژار هاتبانه پارڤه‌كرن، دا باشتر شه‌رێ خوه ژی كه‌ن چونكو گه‌ده‌یێ وان پێدڤی ب فێقی یه دا قۆلۆن نه‌گریت، یێ ده‌ه رۆژان زه‌رزه‌واتی و فێقی نه خۆت دێ نه‌ساخ بیت، یان خشته‌كێ زانستی هاتبا بژاندن ژ لایێ ئه‌فسه‌رێن ئه‌كادیمی و زانا ڤه كو بدارێژن، ل جاتی خشته‌یێ (ب هیڤیا خودی) ڤه برێڤه‌چووبا، گه‌له‌ك فه‌رمانده ب له‌ز هاتینه چێكرن چونكو بارودۆخی و پارا رێكا ناڤوده‌نگیێ بۆ خۆشكر، ئه‌ڤه ژی نیشانا ده‌وله‌مه‌ندیا شه‌رڤانێ كورده كو هه‌می بۆ زیره‌كیێ وه‌كهه‌ڤن، ناپلیۆن پۆناپه‌رت دبێژیت: ئه‌و سه‌ربازێ ئۆمێدێ نه‌كه‌ت كو رۆژه‌كێ ببیته فه‌رمانده‌كێ مه‌زن ئه‌و سه‌ربازه‌كێ خاڤه.. له‌ورا ژی ژ هه‌می بیاڤێن دیتر بیاڤێ له‌شكری یه كو سه‌ربازێن مه ب ساناهی دبنه ئه‌فسه‌ر و فه‌رمانده. ژ لایه‌كێ دی ڤه شه‌ڕكرن هونه‌رێ سه‌رده‌ریكرنێ یه ل گه‌ل مرنێ له‌ورا بلا ئه‌م د راست بین ل گه‌ل هه‌ڤدو و خوه ژ ره‌خنه‌یا ئاڤاكار تۆره نه‌كه‌ین، له‌ورا بلا كار یێ زانستی بیت، بۆچی ئه‌فسه‌ر و سه‌رباز دهێنه ژێكڤاڤارتن؟ هه‌لبه‌ت دا هه‌ر ئێك كارێ خوه بكه‌ت، هه‌كه ته كارێ سه‌ربازی دا ئه‌فسه‌ری ئه‌و ته نه‌ینۆك و په‌نجێن خوه بڕین، چونكو ته بایۆلۆجیا وی كره سه‌رباز، دبیت ب وی ره‌نگی ته ئۆمێدا وی هه‌لوه‌شاند بیت، ده‌مێ كه‌سه‌ك بۆ ئه‌فسه‌ریێ دخوینیت و ببینیت كو ئه‌ركێ وی بوو یێ سه‌ربازه‌كی، دلسۆزیا وی ژی دێ ل كیمیێ ده‌ت، كورت و كرمانج بلا له‌شكر یێ ته‌كنۆقرات بیت و ئه‌ڤه‌یه به‌یتولقه‌سید.
پارله‌مان.. پاره نه‌مان!!
په‌رله‌مان مینا برایه‌كێ مه‌زنه ل هه‌مبه‌ر گه‌ل و حوكمه‌تێ و ده‌ستهه‌لاتێن دیتر، به‌لێ جوداهی د ناڤبه‌را حوكمه‌تێ و په‌رله‌مانی دا، ئه‌وه ملله‌تی دلۆڤانیه‌كا نێزیكر هه‌یه بۆ په‌رله‌مانی ژ حوكمه‌تێ، چونكو نوونه‌راتیا وی دكه‌ت ل هه‌مبه‌ر حوكمه‌تێ ده‌ربرینا هه‌ست نه‌ستێن وان دكه‌ت، په‌رله‌مانێ مه‌یێ كوردستانێ ژی نوونه‌رێن وی خۆشتڤیێن مهنه و په‌یوه‌ندیێن مه یێن جڤاكی گه‌له‌ك د گه‌رمن، چونكو مه قه‌نجی یێن ل سه‌ر ئێك هه‌ین، جوامێران ئه‌و ژی دخراب نین، به‌لێ په‌رله‌مانێ مه یێ كوردستانێ به‌ری هه‌ر تشته‌كی كارێ وێ ئه‌وه به‌رنامه‌كی بدانیت بۆ جڤینێن خوه یێن ئاسایی، وه‌كو ل گۆره‌یی ئه‌حكامێن بڕگه‌یا (1) ژ مادێ (20) ژ سیسته‌مێ ناڤخوه‌یی یێ په‌رله‌مانێ كوردستانا عیراقێ، یێ راستڤه‌كری ل سالا 1992، ئه‌و ژڤانێ جڤینا خوه بدانن بۆ فلان رۆژی، كه‌یفا مه گه‌له‌ك دهێت ب روونشتنێن وان، ئه‌و ژی هه‌مان پێشنیاز و پرۆژه‌یێن خۆلێن به‌ری ده‌می دخوینن و راستڤه دكه‌ن، هنده‌ك قانوون و بریارێن گرێدایی په‌یره‌وێ وان یێ ناڤخوه‌ینه و هنده‌ك د گشتینه، به‌لێ هنده‌ك پرۆژه گرێدای ساخله‌میێنه، هنده‌ك گرێدای خونیشادانانه و. . هتد. دبیت هنده‌ك ژ نوونه‌ران جوامێران تایبه‌تمه‌ندیا وان نه‌بیت، ژ به‌ر جڤینێن درێژ د حه‌قن خه‌وا وان بهێت وه‌كو گه‌له‌ك ژ مه وێنه‌یێن وان دیتینه ل سه‌ر لاپه‌رێن ئه‌نترنێتی، به‌لێ هه‌ر وه‌كو ئاریشێن ئابووری خواندنا وان خاڤیه‌ك تێدا هه‌یه، ئه‌و ژی دبیت ژ به‌ر نه‌بوونا دراڤی یه و مینا ب كولانكی دبێژن “به‌ریك یا ڤالایه”. یان گرارا رۆن ژ گێم دانی یه. چونكو كارمه‌ندیا هه‌ر په‌رله‌مه‌كی یا دارایی هاتیه دانانان هه‌ر ژ ده‌مێ په‌رله‌مانان ده‌سهه‌لاتا خوه یا دارای وه‌رگرتی پشتی قووناغه‌كا درێژ ل گه‌ل حوكمه‌تێ هه‌ر ژ سه‌ده‌یا نوزدێ، ئه‌ڤ ده‌سهه‌لاتا دارایی یا په‌رله‌مانی د شرۆڤه‌كرنا قه‌بارێ مه‌زاختنێن ده‌وله‌تێ دایه د پرۆژێ بودجێ دا، كو بۆ حوكمه‌تێ پێشكێش دكه‌ت، دا وان شێوازێن گرنگ و فه‌ر و گونجای وه‌ربگرن بۆ مشتكرنا عه‌جزا دارایی د بودجێ ئه‌ڤجا چ ب رێیا باجێ یان ئه‌و رێێن دیترنه‌خاسمه كه‌یفا ملله‌تی ژی هه‌می ژ بیاڤێ ئابووری یه و بریارێن خۆش و قانوونێن خۆش. ئه‌م دزانین نابیت هه‌می بناسا بێخینه ستوویێ په‌رله‌مان و په‌رله‌مانتاران، دزانین ژی دانانا قانوونان و چاڤدێریكرن ل سه‌ر حوكمه‌تێ ئه‌ركێ په‌رله‌مانی یه و نوونه‌راتیكرن و ده‌ربرینا ملله‌تی ل همبه‌ر حوكمه‌تێ، وه‌كو كارێ وانژی پارڤه‌دبیته سه‌ر چه‌ندین تایبه‌تمه‌ندیان، به‌لێ قه‌یرانا دارایی نها گرنكتره ژ هه‌ر ئێكا دیتر، هه‌كه په‌رله‌مانێ كوردستانێ نها خوه ژ ڤێ ئالۆزیێ رانه‌گریت، گه‌له‌كا ب زه‌حمه‌ته كارێ خوه بكه‌ت، نه وه‌كو هه‌ر په‌رله‌مانه‌كێ جیهانێ یه، چونكو ملكه‌چی گه‌له‌ك ئه‌ركانه، هه‌می ئالیان ژی ئاریشه ئاگرن، هه‌ر ل ده‌سپێكێ ل سه‌ر شاشیێ برێڤه‌دچوو، چونكو ئۆپۆزسیۆن ئالیه‌ك بوو د ناڤ دا، وه‌كو ڤایرۆسه‌كێ تێكدانێ بوو د ناڤ هۆلا په‌رله‌مانی دا، ب ناڤێن سازانێ و حوكه‌مه‌ته‌كا هه‌ڤپشك و به‌هانه‌یێن زۆر كارێ خوه دكرن، ئه‌ڤه ب سه‌رێ خوه ئاریشه‌كه، ژ لایێ دیتر ڤه په‌یوه‌ندی و هه‌ماهه‌نگی ل گه‌ل ناڤه‌ندا عیراقێ و جڤاتا نوونه‌رێن وێ و ئه‌و ئاسته‌نگێن زۆر، شه‌رێ داعشێ و دلۆپێن حه‌شدا شه‌عبی. ژ لایه‌كێ دیتر ئه‌ڤه سه‌رێ سالێ هات و به‌لانسا 2016 یا كو هاتیه دارێتن، هێشتا بۆدجه‌یێن 2015 دنیڤه‌رۆ، هاتنا په‌رنابه‌ران و باندۆرا وێ ل سه‌ر بارێ ئابووری، له‌ورا یا باش ئه‌وه نها په‌رله‌مانێ كوردستانێ سه‌رێ خوه هه‌لبده‌ت و هه‌می قه‌یرانان بكه‌ته د به‌ریكا خوه یا دڕیایی دا، ب تنێ خه‌ما بكه‌ته بزاڤێن به‌لانسكرنه‌كا گونجای بۆ قه‌یرانا دارایی یا نه‌بوونا پاره‌یی، چو قانوون بهێنه دانان، چو بهێته كرن، ئه‌وا به‌ری ده‌مه‌كی نوونه‌ره‌كێ په‌رله‌مانێ كوردستانێ راگه‌هاندی كو هه‌كه عیراق ب ناڤێ بۆدجێ و پترۆلێ و سه‌رده‌ریكرنا مه وه‌كو وه‌لاتیێن پله‌یا دویێ، ئه‌م نه‌چارین سه‌ربه‌خوه‌بوونا خوه یا ئابووری راگه‌هینین و ئێدی ئه‌و كونترۆلێ ب هێزا مه یا ئابووری بكه‌ن، یانژی له‌زكرن د وان قانوونان دا یێن به‌ری ده‌می هاتینه دانان، د كه‌رتێن كه‌هربێ و چاندنێ و پترۆلێ و به‌هرا ئازۆقه‌ی دا، ڤه‌دیتنا چاره‌یان وه‌كو دابینكرنا قه‌ران ژ ئالیێن نێڤده‌ولی وه‌كو سندۆقا نه‌قدا نێڤده‌ولی، نها هه‌ر چاوا بیت مه هیڤیی یه په‌رله‌مان ده‌ربرینا مه بكه‌ت ل همبه‌ر حوكمه‌تێ و چاره‌سه‌ریه‌كا گونجایی ڤه‌ببنیت بۆ مه هه‌ردو ئالیان وه‌كو دینامۆیه‌كا دارایی.
DNA یا داعشێ
بۆ بنبركرنا ڤایرۆسێ كوژه‌كێ ڤێ نه‌خۆشیا رادیكال ب ڤه‌دیتنا ده‌رمانه‌كی یا نشته‌رگه‌ریه‌كا ژێڤه‌كرنێ ژ له‌شێ پاكێ كوردی و یێن دیتر، یا فه‌ره ئه‌ڤ نه‌خۆشیه د بیاڤه‌كێ پزیشكی دا بهێته چاره‌سه‌ركرن و ژ ره‌ه و رووشالان بهێته ده‌ستنیشانكرن، له‌ورا پشكنینا DNA یا گرنگه بهێته دیاركرن كا ئه‌ڤ زارۆیێ نه ره‌وا و حه‌رام یێ هاڤێتی تێشكێ كیژ ده‌وله‌تانه، نه‌خاسمه بزاڤێن ڤه‌دیتنا ڤێ ترشا ناڤۆكی د هه‌می بیاڤان دا هاتیه لێگه‌ریان، به‌لێ مه ژی د بیاڤێ (زانستێ نۆشداریا سیاسی) * دا هه‌لبژارت، هه‌لبه‌ت ل دووڤ ده‌روونا ئایدۆلۆجی یا داعش ل سه‌ر هاتیه ئافراندن، مێشكه‌كێ شه‌هره‌زا پێ دڤێت زێده‌باری توندوتیژیه‌كا ب مێشك یانكو هشكباوه‌ریه‌كا ب مێشك و ب حنێر و جه‌مباز، بۆ ڤه‌دیتنا دایكوبابێن ڤی زارۆیێ نه‌شه‌رعی، پێ نه‌ڤێت باب ماده‌م گه‌له‌كێ شاره‌زایه كو ل ئاسته‌كێ بلنده، دبیت ئه‌مریكا بژاره‌كێ سه‌ره‌كی بیت بۆ پێكئینانا هه‌ڤژینیه‌كا نهێنی یانژی یا قه‌ده‌غه، هه‌كه (تكهن) بیت، گومانه‌كا زێده‌یه، چونكو ئه‌مریكا ل پله‌یا ئیكێ دهێت بۆ ئاقلداریا سیاسی و ئه‌و ساخله‌تێن مه به‌حس كرین، ئه‌و داخۆیانیێن هاتینه به‌لاڤكرن ل سه‌ر ده‌زه‌گه‌هێن میدیایی یێن هیلاری كلینتۆن یێن به‌ری ساله‌كێ د پرتووكا خوه دا، چو راست بیت یانژی ئه‌و خه‌ونا به‌ری چه‌نده‌كێ بوویه پێكه‌نین دناڤ خه‌لكی دا ده‌مێ ئه‌بۆ به‌كر به‌غدادی دیتی كو پێغه‌مبه‌ر دیتیه دبێژیتێ خوه ژ مووسلێ ڤه‌كێشه، یانژی ته‌له‌فۆنه‌ك بۆ ژ واشنتونێ هاتبوو؟!، ئه‌ڤه ئاماژێن ئاشكرانه كو ئه‌مریكا زارۆیه‌كێ نازاندی و شیم هاڤێتیه هۆلێ، هه‌ڤدم ژی توركیا باشترین دایكه بۆ ڤی زارۆیی، ب گرۆڤه‌یا چ تشتی؟ گه‌له‌ك ئاماژه هه‌نه بۆ سه‌لماندنا ڤێ چه‌ندێ، دوور ژ وێ چه‌ندێ كو ده‌ستێن گه‌هاندنێ ژی هه‌نه د ناڤدا، ئه‌ڤ ده‌سته ژی شاره‌زایه‌كا ئه‌زۆكانه هه‌یه ئاماژه به‌ر ب ئیرانێ ڤه دچن، كو ب رۆلێ گه‌هینه‌ری رادبیت، چونكو ره‌وشا جیهانێ هاتیه گوهۆرین و رێككه‌فتنا ناڤۆكی ژی ئێكه ژ وان ئه‌گه‌ران، ئه‌و ژی ژ لایه‌كی ڤه سونه‌یێن مووسل ژناڤببه‌ت ژ هه‌بوونا ڤێ گرژیێ. دبیت ژی ره‌هه‌نده‌كێ به‌ره‌ڤاژی بیت ل گه‌ل توركیا یا ئۆسمانی و سونی كو ئه‌و به‌رژه‌وه‌ندیێن پشت به‌رژه‌وه‌ندیێن هه‌ڤپشك بن. ئه‌گه‌رێن سه‌ره‌كی یێن شه‌ران هه‌می بازرگانی نه و ئه‌ڤ وه‌لاتێن هه‌نێ ژی حه‌زژ بازارێن ره‌ش دكه‌ن، نه‌خاسمه دین و ئیمانیێن ئیرانێ و توركیا یاریا بلیاردێ یه ل سه‌ر ئه‌ردێن بێخودان وه‌كو عیراق و سووریێ، ل شوونا ماسیان د ئاڤێن شێلی دا بگرین، حیتێن (نه‌هه‌نگ) ێن وه‌كو مالكی گرتینه..
بۆچی ئه‌مریكا باب بیت و توركیا دایك؟ و زارۆیێ نه شه‌رعی هێشتا دایكوبابێن خوه نانیاسیت!! ئه‌م نزانین كه‌نگی ڤێ هه‌ڤژینیا نه شه‌رعی ده‌سپێكربوو، چونكو هه‌یڤا هنگڤینی ژی تشته‌كێ نهێنی بوو، به‌لێ گرۆڤه‌ك هه‌یه وێ په‌یوه‌ندیا ئه‌مریكا و توركیا هاتیه برێڤه‌برن ژ لایێ جه‌نه‌رالێن وان یێن له‌شكری و هه‌والگیری ڤه، نه‌خاسمه به‌ری هه‌یامه‌كێ فه‌رماندێ هێزێن پیاده یێ توركی هاتبوو خه‌لاتكرن ژ لایێ به‌نتاگۆنێ ڤه. به‌لێ د بیاڤێ سیاسی دا نه ل سه‌ر چو دینه‌كی د راوه‌ستاینه، وه‌كو سه‌ربۆرا 2003 یا نه‌هێلانا بۆرینا هێزێن هه‌ڤپه‌یمانان بۆ عیراقێ نیشانه‌كا ژێكدووریێ یه، به‌لێ هه‌ڤده‌م ژی به‌رژه‌وه‌ندیێن وان ب ئافراندنا داعش د هه‌ڤپشك بوون، هه‌ر دیسا ب گرۆڤه‌یا پره‌نسیپا حزبا داد و گه‌شه‌پێدان كو بزاڤێ دكه‌ت توركیا ببیته هێزه‌كا مه‌زنا سه‌ربه‌خوه ل رۆژهه‌لاتا ناڤین خوه هه‌وجه‌ی واشنتونێ نه‌كه‌ت ب تنێ هه‌كه به‌رژه‌وه‌ندیێن وان دنێزیكی هه‌ڤ بوون. توركیا ئۆسمانی حه‌ز ژ چه‌ك و چه‌كداركرنێ دكه‌ت و بجهئینانا كوشتاران كو یا ئه‌رمه‌نان دووه‌مین تاوانا دژواره ل جیهانێ و ژ بلی سته‌ما ل 20 ملیۆن كوردان كری، ئه‌ڤه فاكته‌ره‌كه كو توركیا حه‌ز ژ پێكئینانا داعشێ بكه‌ت و ژ لایه‌كێ دیڤه دربه‌كی ل شیعه و كوردان بده‌ت یێن عیراقێ و سووریێ چونكو سووری ژی مه‌ترسیه‌كا مه‌زنه ب ره‌خ ڤه، كو و هه‌ر وه‌سا زڤراندنا ویلایه‌تا مووسلێ یا جاران، واته كوشتنا ماری ب ده‌ستێن داعشێ. توركیا نها یا تبلێ د ئاخڤیت و پشتراسته ب شیانێن خوه و ب هه‌ڤژینێ خوه ئه‌مریكا یا دێزه‌ره‌ش، له‌ورا ژی خه‌مساری نه‌كر د ئێخستنا فرۆكێن رۆسی دا. ئێك ژ وان به‌رژه‌وه‌ندیان ژناڤبرنا رژێما ئه‌سه‌دی یه كو ئه‌و ڤان چه‌ته‌یان بۆ خوه چێكه‌ن و به‌رێ وان بده‌نه هه‌ر جهێ وان بڤیت، گرۆڤێن ڤێ هه‌ڤژینیێ ناهێنه هه‌ژمارتن، وه‌كو چێكرنا دراڤێ داعشیان ل ناڤ ماله‌كا توركی دا، زێده‌باری ره‌وشا ئارام كو ده‌ستێن تیرۆرێ و هه‌ره‌شێن داعشێ نه‌گه‌هشتینێ هه‌می پسیارن. بۆچی ئیران و ئه‌مریكا و توركیا و به‌لكو ئه‌نگلیز ژی سه‌رێ وان یێ ته‌نایه و چو قه‌قین و كریارێن تیرۆرستی نینن؟ خودێ دزانیت ژی كا ئه‌ڤ پیلانگیریه موئامه‌ره) یا چه‌ند قۆلی یه؟؟!
په‌یامه‌ك د ناڤبه‌را دیواری و ده‌واری دا!
به‌ری چار سالان گۆتاره‌ك ب مانشتیێ “په‌یامه‌ك بۆ دیواری!!” من نڤیسابوو، به‌لێ هه‌تا نها ئه‌و په‌یام مایه هه‌لاویستی، چونكو دیوار یێ پێشكه‌فتی و ئه‌ز په‌شێمان بووم چونكو من غه‌ده‌ره ل دیواری كر، چاوا؟! دیوار جهه‌كێ گه‌رم و نه‌رمه بۆ خه‌له‌كه‌كی ل سه‌ر كیستێ خه‌مخۆر و تیكۆشه‌ران تێر دنڤن ئه‌و جهه یێ دبێژنێ (بن دیوار)!! ئه‌ڤجا خوارنێن خۆش دخۆن هه‌ستیان دهاڤێنه به‌ر یێن خه‌مخۆر ل به‌ر دیواران!!، ئه‌ڤه ژ لایه‌كی ڤه، وه‌كو دی دیوار ل ده‌زگه‌ه و سازیێن خواندنا بلند و زانكۆیان جهێ نڤیسینا په‌یڤا ئازاده دبێژنێ (الجدار الحر) هه‌می بۆچوون و تێبینی و نڤیسكارێن پێدڤی یه و بێنه‌كا دیمۆكراتی ژێ دهێت، پیرۆزیه‌كێ دده‌نێ و تابلۆیێن رێزگرتنێ دئێخنێ، ل هنده‌ك جهان ل ناڤا باژاران دا لافیته‌یێن ئاگه‌هداریان و ریكلامان پێڤه د هه‌لاویسن هه‌ر وه‌كو دیوارێ مرنێ ل به‌رۆشكێ هه‌می لافیته‌یێن مالئاڤاهیبوونێ لێ دده‌ن.. . ژ لایه‌كێ دی ڤه دیوار هه‌ر ژ كه‌ڤن وه‌ره و ل ناڤا پرانیا جڤاكان نیشانا بێخه‌می و نه هایداربوونێ یه، مه ژی ب وی ره‌نگی په‌یڤی بوو، هه‌تا هنده‌ك هه‌ڤالان گۆتبوو: هه‌ما مانشێت به‌سه! په‌یام گه‌هشت، به‌لێ نها و پشتی په‌شێمانبوونێ من گۆت هه‌ما دێ بۆ ده‌واران فرێكه‌م به‌لكو ئه‌و ژ دیواری نه‌زانتربن، ئه‌ز رابم گیزێن خوه ل سه‌ر دلێ ده‌وارێن خۆلیسه‌ر و ره‌به‌ن بشكێنم، سه‌ره‌رای هندێ كو جوداهی د ناڤبه‌را وان دا وه‌كو په‌یڤ تنێ پیته‌كه، به‌لێ ل داویێ ژی هه‌ر ئه‌ز په‌شێمان بووم من غه‌ده‌ره ل ده‌وارێ خۆلیسه‌ر ژی كر، چونكو ده‌وار كه‌سه‌كێ دلسۆزه و نه‌یێ زكره‌شه و جوامێری گوهێ خوه دده‌ته مرۆڤی و رێزێ ل مرۆڤی دگریت، ئه‌م بۆ وه‌رزشێ بكاردئینین و مفایان ژێ ده‌به‌ین، جاره‌كێ ببه رێیه‌كێ جوامێری ب رێیا مال دكه‌ڤیت و گه‌له‌كێ دلسۆژه، هه‌ر چونه‌بیت هه‌ما یێ جوانه!! و جهه‌كێ خوه هه‌یه د زانستێ ئه‌ستاتیك دا، واته دبیت ره‌به‌نی په‌یامێ بحه‌بینیت!!، به‌لێ په‌یاما من هێشتا یا مایه هه‌لاویستێ، من گۆت ڤێ جارێ هه‌ما دێ بۆ خوه فرێكه‌م، به‌لێ نه‌كو هنده‌ك خوونده‌ڤان هزر بكه‌ن ئه‌زێ شێتم بوویم و بێژن: ئه‌ڤه چو مانشێته ((په‌یامه‌ك بۆ من !!)). له‌ورا هێشتا په‌یام یا مه ل سه‌ر پشتا كووسه‌له‌ی و نزا دێ گه‌هیته كیڤه؟! چونكو نزا كی به‌رپرسه ژ وێ په‌یامێ، هه‌ر كه‌سێ بێژیێ دێ ته هاڤێته به‌ر یێ دیتر و په‌یاما مرۆڤی دبیته ڤۆلی بۆل.. چونكو هه‌كه مرۆڤ سه‌حكه‌تێ ل ده‌ڤه‌را مه یا رۆژهه‌لاتا ناڤین هه‌میێ، ده‌مێ ته په‌یامه‌ك هه‌بیت، كو بۆ لایه‌نێ په‌یوه‌ندیدار بیت، ب تایبه‌تمه‌ندی و جهێ دروست یێ بریارێ و ئه‌نجامێ وێ په‌یامێ، ژ بلی جۆراتیا وێ په‌یامێ، كو د ناڤ تێكستێ وێ دا چو هه‌یه، ده‌سپێشخه‌ریه، پێشنیازه، بۆچوونه، فه‌رمانه‌كا حكومی یه، ئستیحاقاقه، گازنده‌یه، ده‌روه، مه‌لاقی یه، شه‌ڕه بابۆ. .. هتد. دێ بینی ده‌مێ تو ل جهێ دروست، دێ ب ته كه‌نن و حه‌نه‌كان ب ته كه‌ن، كو جهێ بریارێ بۆ نموونه ل بۆڕسێ یه، یان ل سیكا تزبیان، یان ل ده‌ف شۆفێره‌كی، یان چایچیه‌كی یان ده‌زگرا كابرایی.. ، دێ چیه ئۆفیسه‌كێ بۆ كاره‌كێ فه‌رمی، دێ چی ل واسته‌یی گه‌رییێ كا مرۆڤێ ته ل كیڤه‌یه، دێ چیه ده‌ف وی و ئه‌و دێ ته به‌ته به‌ر په‌رنجه‌را وه‌لاتیان.. هه‌ر چه‌نده وه‌كو دبێژن ” دیوار ب گوهن” ئه‌و گوه ژی هه‌ر كه‌سێن بندیوارن، چونكو تایبه‌تمه‌ندیا وان ئه‌وه، فه‌سادی یه، كو تبلا خوه بێخنه د چاڤێ مرۆڤی دا و بێژن: ئه‌ڤ كابرایی یێ تیژ نڤیسیت، به‌س بلا مرۆڤێ پشتراسته ژ په‌یاما خوه، ل دووماهیێ ژی دبێژم سه‌ره‌رای ره‌شبینیا گۆتارا من، به‌لێ من دار ژ بنی نه‌بڕیه و هیڤیێن مه د گه‌شن ب رێچكا دارماتیك یا به‌ره‌بابێن داهاتی كو وجه‌ك ژ وان چێببیت و په‌یام نه‌مینیته هه‌لاویستی ل سه‌ر پشتا كیسه‌له‌ی نه‌خاسمه ئه‌م یێن ل چه‌رخێ كۆلێرایێ و نه‌دووره ژی تاعۆنێ!!. هیڤیی یه خودێ ژ بانێن بلند ڤه‌گریت.
ژ رۆژانه‌بوونا وار و ئه‌ڤرۆ. . زمان ل به‌ر مه به‌رزه‌بوو!!
ئه‌م دهۆكی گه‌له‌ك یێن پێ شاهینه كو مه دو رۆژنامێن خوه یێن رۆژانه هه‌نه و هه‌تا نها ئه‌م باوه‌ر ناكه‌ین كو یێن بووینه خودان دو رۆژنامێن كاریگه‌ر كو ل ڤی باژێرێ ـ ئێك خێزانی ـ رۆژانه ده‌ردچن و خه‌لك یێ ب ئۆمێده كو رۆژێن بێهنڤه‌دانان ژی ده‌ربچن، ئه‌ینێ و شه‌مبیێ، بۆچی؟! هه‌لبه‌ت ژ به‌ر وێ هشكاتیا به‌ری ده‌می كو باژاره‌كێ بێبه‌هر بوو ژ رۆژنامێن رۆژانه، سه‌ره‌رای ده‌ركه‌فتنا سایتێن ئه‌لكترۆنی و تۆرێن په‌یوه‌ندیكرنا خه‌لكی، به‌لێ به‌ری چه‌ند رۆژه‌كان ئه‌ڤ هه‌لكه‌فته ب سه‌ر مه دا هات، یا ده‌ركه‌فتا رۆژناما ـ رۆژنامه‌یا (وار) و رۆژانه‌بوونا (ئه‌ڤرۆ)، كو هه‌ر ئێك ژ وان د گه‌لیه‌كێ جودا دا ژ هه‌ڤ برێڤه‌دچیت، ل ڤێره دێ راوه‌ستم و خالان دانمه سه‌ر په‌یڤان و سه‌رێ خوه و یێن وان هه‌ردویان شۆم! (إن صح التعبیر) وه‌كو عه‌ره‌ب دبێژن!، دبیت ئه‌ڤه بۆ ستافێن هه‌ردو رۆژنامان مژاره‌كا هه‌ستیار بیت، ژ به‌ر ـ به‌ڤلاتیه‌كا ڤه‌شارتی ـ ئه‌و ژی هه‌كه هه‌بیت، هه‌بوونا وێ ژی یا گرنگ و ئه‌كتیڤه هه‌كه ل سه‌ر بنیاته‌كێ زانستی بیت و ژ بۆ پێشخستنا به‌رژه‌وه‌ندیا بزاڤا ره‌وشه‌نبیری و بلندكرنا ئاستێ خواندنێ یا كو دبێژنێ مونافه‌سا شه‌ریف، نه‌خاسمه هه‌كه یێ بنڤیسیت كه‌سه‌كێ وه‌كو من بیت، ژ ناڤا جه‌رگێ ستافێ وان ب خوه دا بیت، به‌لێ ئه‌و وێره‌كیا ماف دایه من ل سه‌ر بنڤیسم، ئه‌وه كو من ل هه‌ردویان خزمه‌تكریه و بێ سلبوونه‌ك یان كه‌ربه‌ك هه‌بیت، ساله‌كا ره‌به‌ق ل وار هه‌ر ژ ده‌ركه‌فتنا ژماره‌یا سفر و پتره ژ چار سالان ل ئه‌ڤرۆ ژی خزمه‌تێ دكه‌م، كو هه‌تا نوكه خه‌له‌ك من ب وار دنیاسیت و ناڤێ من هێشتا د مۆبایلێن وان دا مایه (شێرزاد وار)، له‌ورا ئه‌ز ژی وه‌كو (عه‌لی بن ئه‌بی تالب) لێهاتیمه كو كافر و بوسلمانان حه‌ز ژێ دكر!!، من ژی نه‌كره نه‌مه‌ردی. برایێ من یا ئه‌ز تێدگه‌م دڤێت نه هۆسا بیت، ئه‌نجامدانا كارێ رۆژنامه‌ڤانی، دڤێت ل سه‌ر رێیه‌كا زانستی و ئه‌كادیمی بیت، هه‌ر چه‌نده هه‌می نه ده‌رچوویێن بسپۆرن و به‌ری هه‌میان ژی ئه‌ز به‌حسێ خوه دكه‌م، كو پێشمه‌رگه‌مه، پێلێن ده‌ریا ژیانێ ئه‌ز هاڤێتیمێ وه‌كو هونه‌رمه‌ندێن (سه‌ماعی) كارێ خوه ئه‌نجام دده‌ین، به‌لێ ب راستی ب راستی دبێژم هه‌ردو رۆژنامان ژ به‌ر به‌ڤلاتیا هه‌ڤدو غه‌دره ل گه‌له‌ك تشتان كریه وه‌كو زمانی و وه‌كو نووچه‌یێ رۆژنامه‌ڤانی، ژ كه‌ربێن ئێكو دو دا، باژار یێ بچووكه ده‌نگ زوو ڤه‌دده‌ت، د سعه‌ته‌كێ دا نووچه به‌لاڤ دبیت، هه‌كه په‌قینه‌ك روو بده‌ت دهۆكێ ژ رۆژهه‌لاتێ هه‌تا رۆژئاڤایێ ده‌نگ و ره‌نگ راسته و خوه دگه‌هیت، له‌ورا دێ رابن گه‌له‌ك توخمێن پێكهاتنا په‌یامی گوهۆرن، یان دێ ل به‌ر ئێكودو راوه‌ستن كا دێ چاوا هه‌ڤدو تووش كه‌ن به‌ر ب ته‌بكان!، دێ ئیێنه سه‌ر زمانی و ده‌ڤۆكا ده‌ڤه‌را مه، كو كاكلكا مژارا منه، هه‌لبه‌ت ئه‌ز نه‌ك ده‌رچوویێ چو كۆلیژێن زمانێ كوردیمه، ب تنێ ده‌رچوویێ وار و ئه‌ڤرۆ مه كو رۆژ ب سه‌ر من دا ناچیت و هه‌كه پتر ژ 10000 په‌یڤان نه‌خوینم و راستڤه‌نه‌كه‌م و نه ته‌یسینم، چونكو دو لاپه‌رێَن بۆچوونان ئه‌ڤه سه‌رێ چه‌ندین سالانه ده‌ردئێخم، هه‌می ژی وه‌كو ب كورده‌واری دبێژن (ره‌شره‌شكن)نه‌ك وێنه‌نه، ئه‌ڤجا زمان د ناڤبه‌را هه‌ردو رۆژنامێن دهۆكێ یێن سه‌ره‌كی دا ب راستی خوهار بوویه، وار رێنڤیسا خوه یا جودا و بێمنه‌ت هه‌یه جوامێران، سه‌رنڤیسه‌رێ وێ ژی جوامێری شوونپیلێن وی د هه‌ردو رۆژنامان دا دیارن، مرۆڤ بۆ خودێ بێژیت جوامێری (خه‌بیره) ب زمانی و گه‌له‌ك جاران ئه‌م پسیارا وی دكه‌ین بۆ هنده‌ك ئاسته‌نگێن زمانی، به‌لێ چونكو سیمایێ ئه‌ده‌بی پتر یێ ستافێ وان د مه‌له‌ڤانن پرانیا وان ئه‌دیبن، سه‌روبه‌رێ وار پتر وێژه‌یی یه و هه‌تا نووچه‌یێن رۆژنامه‌ڤانی یێن وان بێهنا هه‌لبه‌ست و په‌خشانێ ژێ دفڕیت، چونكو هه‌می دونیایێ دو زمان هه‌نه زمانێ ئه‌ده‌بی و زمانێ رۆژنامه‌ڤانی، هه‌ر ئێكی سه‌لیقا خوه هه‌یه، به‌لێ (ئه‌ڤرۆ) بۆ خوه زمان ب نه‌كریه مه‌ره‌ق و خه‌ما وێ ب تنێ (سبق صحفی) یه، حه‌ز دكه‌ت د نێڤ شه‌ڕگه‌ها روودانێ دا بیت و تشتێ كاریگه‌ر بده‌ستڤه‌بینیت و حه‌ز ژ رۆتینێ ناكه‌ت، ئه‌ڤه یه ژی نهێنیا حه‌زژێكرنا خه‌لكه‌كی بۆ ڤێ چه‌ندێ چونكو خه‌لك ل په‌یامی دگه‌ریێن و تشتێ سرنجراكێش ب راستی من د سه‌ربۆرا خوه دا دیت كو خوانده‌ڤانێ مه حه‌ز ژ رێنڤیسا پاقژ ناكه‌ت یان ئه‌ده‌بیاتێن لاوك و حه‌یرانان، نوكه هنده‌ك تشتێن هه‌ڤپشك هه‌نه د رێنڤیسیا وان دا به‌لێ گه‌له‌ك دكێمن وه‌كو جۆرێن (واو) ێ یا قه‌له‌و و هه‌ردوو واوان و یا سڤك و لێكدانا په‌یڤێ، پێكڤه بیت یان ژێكڤه وه‌كو ل، د، ب، دا، را، نه. .. هتد، به‌لێ ئاخفتنا ده‌ڤۆكیێ بوویه ئاریشه وار گه‌له‌ك (ـه) بكاردئینیت هه‌تا وی راده‌یی كو مۆزیكا رستا په‌یڤا كورده‌واریا مه به‌رتر كریه و هه‌ر وه‌كو كراسه‌كێ نوو و شارستانی كریه به‌ر، بۆ نموونه (رۆژنامه‌یا، ناسنامه‌یا، كێشه‌یا، رسته‌یا.. . ) یا ژ من ڤه ئه‌ڤه نه‌ئاریشه‌یه په‌یڤا كوردی ب خوه یا درێژه ئه‌ز باوه‌ر ناكه‌م د چو زمانێن دونیایێ دا ژ په‌یڤێن كوردی درێژتر هه‌بن، بلا په‌یڤ یا كورت بیت و رسته یا كورت بیت ب پۆخته بگه‌هیت، (خیر الكلام ما قل و دل)، بلا ده‌ڤێ مه نه‌وه‌ستیێت و ده‌مێ مۆزیكی ژ مه نه‌چیت، ژ ته‌مه‌نێ مه دچیت!!، وه‌كو دی ژی مانێ جوانی ژی مه‌رجه بۆ په‌یڤێ وه‌كو د بنیاتێن باشنڤیسیێ دا جۆرێن (قواعد الخگ العربی) هه‌نه و هه‌كه نه بلا لاتینی بیت!!، په‌یڤا درێژ نه‌یا جوانه، نه‌خاسمه ئه‌م یێن بنیاتێن زمانه‌كی ددانین بۆ به‌ره‌باره‌كێ داهاتی، یا باش ئه‌وه هه‌ردو رۆژنامه د ڤی بیاڤی دا حه‌ز ژ هه‌ڤدو بكه‌ن، هه‌ماهه‌نگیه‌ك هه‌بیت، جڤاتێن زانستی و پلانان بدانن، دێ زمانێ مه قورتال بكه‌ن بابۆ. . لوووو.. سۆرانی و كرمانجی به‌س نه‌بوون، وار و ئه‌ڤرۆ ژی هاتنه سه‌ر؟! وه‌رن ببینه ئێك بۆ ستانداركرنا زمانه‌كێ جینۆسایدكری ئه‌و ژی یێ دهۆكێ بیت، جارێ.. كادێ چ ل مه‌سه‌لێ ئێت؟!. هه‌كه ئه‌زێ نه‌حه‌ق بم بێژن من قه‌بووله.. !!
سینه‌ما دهۆكێ. . وه‌ی تری!!
باگره‌وندا دیرۆكا ره‌وشه‌نبیریا سینه‌ماڤانیا دهۆكێ، ژ ئێك هۆلا سینه‌مایێ ب تنێ مه ل دهۆكێ هاتیه، ئه‌و ژی هاته سۆتن و دیكێل ژێ چوو، ده‌رگه‌هێن وێ هاتنه گرتن و بوو (خه‌به‌ر كان) نه‌ك فه‌ستیڤالا (كان)!!، هندی بیرا من دهێت هه‌می باژێرێن عیراقێ هه‌ر ئێكێ چه‌ندین سینه‌مایێن جۆره و جۆر لێ هه‌بوون، ئێكێ دگۆته یا دی وێڤه هه‌ره، تنێ ل باژارێ مه ئێك بوو ئه‌و ژی نه ژ پله‌یێن ئێكێ بوو.. هینگی فلمان ره‌واجا خوه هه‌بوو هه‌تا راده‌كی، ل سپێده‌هیێن رۆژێن جه‌ژنان، دا بینی ل دهۆكێ ل به‌ر ده‌رگه‌هێ سینه‌مێ دبوو قه‌ره‌بالغ و گه‌نجێن دهۆكێ لێ خڕڤه‌دبوون و عه‌ربانێن باقلك، تۆفك، هنار،زه‌به‌ش، جۆرێن فێقی و پێپسی و سه‌نده‌ویچ لێ دهاتنه فرۆتن، یاریا (له‌گاوێ) دهاته كرن، جاران (لۆج) ل سینه‌مایێ هه‌بوون، هه‌كه خێزانه‌كێ بۆ خوه گرتبا، به‌لێ نه ل دهۆكێ، تشته‌كێ شه‌رم بوو هه‌كه خێزان و ئافره‌ت چووبانه پێش سینه‌مێ، هه‌تا ئه‌ڤرۆ ژی ل دهۆكێ ئه‌ڤه 2015 ژی یا بدووماهی دهێت، دبیت ژن ته‌مه‌تی تبلێن ده‌ستێ مرۆڤی چووبنه د سینه‌مێ ڤه و هۆلا سینه‌مێ دیت بیت و ژ لایه‌كێ دیڤه، نوكه مه‌له‌ڤانگه‌هێن ژنان و جهێن سه‌مایێ و مه‌ساجی هه‌نه، سالێن به‌ری هه‌شتێیان ل دهۆكێ جاران (سێرك) دهاتنه دانان، تۆتییا دهاتنه دانان وه‌كو په‌رژان و نه‌مایش دكرن، به‌لێ خه‌لكی راهێلایێ و ره‌ڤین و هه‌تا نوكه یێن د وێ ره‌ڤێ دچن!!، دبێژن به‌ری سینه‌ما نه‌ورۆز یا كو نها هاتیه گرتن، هۆله‌كا دیتر هه‌بوو، كو نها هۆلا دهۆكێ یا شه‌هیانانه، كه‌س نه دچوویێ. ئه‌ڤه بوو دیرۆكا ره‌وشه‌نبیریا سینه‌مایێ ل دهۆكێ. له‌ورا ئه‌ڤرۆ ئه‌ڤ باژاره یێ كو دهێته بژاره‌كرن بۆ پایته‌ختبوونا سینه‌مایێ، یێ بۆ جارا سیێ هه‌مبێزا فلمه فه‌ستیڤالا سینه‌مایا نێڤنه‌ته‌وی دكه‌ت، كو دێ خه‌لك ژ 42 ده‌وله‌تێن جیهانێ قه‌ستا وێَ كه‌ن، ب هه‌لكه‌فتا ده‌رهێنه‌رێ كورد یێ داهێنه‌ر (یه‌لماز گۆنای). لۆگۆیێ ڤێ فه‌ستیڤالێ وینه‌یێ به‌لگێ مێوا تری یه، چونكو دهۆك ژ كه‌ڤندا یا ب تری ده‌وله‌مه‌ند و به‌رنیاسه، ئه‌ڤجا لێكدانا مژارا مه رێككه‌فتنا تشتێن سه‌یروسه‌مه‌ره، ئه‌و ژی كو تشته‌كێ ئه‌نتیكه یه كو فه‌ستیڤالا سینه‌مایێ ل باژاره‌كی بیت كو ئێك هۆلا سینه‌مێ لێ نه‌بیت و ئێك جه‌ماوه‌ر ژی نه‌بیت، تو بكه‌یه فیسته‌ڤاله‌كا جیهانی!!. گه‌له‌ك حنێره و خودێ هاریكارێ بكه‌رێن وێ بیت و سه‌بڕێ بده‌ته تێكۆشه‌رێن وێ، یا دی ژی لۆگۆیێ تری گه‌له‌كا گونجایه، چونكو ئه‌ڤه باشترین په‌یڤینا هه‌ڤاله‌كێ مه یێ رحسڤكه كو سه‌رنڤیسه‌رێ ڤێ رۆژنامێ یه، ((وه‌ی تری!!)) هه‌ر بكاردئینیت، بۆ وان بابه‌تێن چونه و ئه‌نتیكه و تشته‌كێ نه ب دلێ وی بیت، یان بابه‌ته‌كێ بێ رامان و كه‌ڤن بیت، له‌ورا ئه‌م ژی دبێژینه جه‌ماوه‌رێ سینه‌ماڤانێ دهۆكێ ـ ئه‌و ژی هه‌كه هه‌بیت ـ : وه‌ی تری!!
نيشاندان
WP Facebook Auto Publish Powered By : XYZScripts.com