NO IORG
نووترين نووچه
هه‌لبژارتى3

ئه‌ڤرۆ، سلێمانیێ، عه‌زیز هه‌ورامی

نێچیرڤان بارزانی، سه‌رۆكێ هه‌رێما كوردستانێ، ئه‌ڤرۆ دێ سه‌ره‌دانا پارێزگه‌ها سلێمانیێ كه‌ت و ل گه‌ل ئالیێن سیاسی كۆمبیت ل دۆر ئاساییكرنا ره‌وشا سیاسی ل هه‌رێما كوردستانێ.

ل چه‌ند رۆژێن بۆری دا، جڤاتا سه‌ركردایه‌تیا پارتی دیموكراتی كوردستان، ب سه‌رۆكایه‌تیا سه‌رۆك مه‌سعود بارزانی كۆمبوویه‌ و تێدا بریار هاته‌ دان پارتی ل گه‌ل هه‌موو ئالیان كۆمبیت بو وێ چه‌ندێ ئره‌وشا گرژیێ نه‌مینیت.

فارس نه‌ورۆلی، په‌یڤدارێ جڤاتا سه‌ركردایه‌تیا سلێمانی – هه‌له‌بچه‌ یا پارتی دیموكراتی كوردستان، بۆ رۆژناما (ئه‌ڤرۆ) گۆت” ب دیتنا مه‌ وه‌كو پارتی سه‌ره‌رای وی چه‌ندی كو ئالیێن سیاسی جوداهی هه‌بن، به‌لێ د هنده‌ك بابه‌تێن ستراتیژی دا نابیت ژ هه‌ڤدوو د دوور بن. پشكه‌ك ژ خالێن ستراتیژی یێن هه‌ین كو په‌یوه‌ندی ب چاره‌نڤیسێ هه‌رێما كوردستانێ ڤه‌ هه‌ی ژ روویێ سیاسی و ئابووری ڤه‌، ب دیتنا پارتی د ڤێ قۆناغێ دا و پشتی شه‌رێ ئوكرانیا و رووسیا دێ گورانكاری د جوگرافیا سیاسی یا ده‌ڤه‌رێ دا هێنه‌ كرن، هه‌كه‌ كورد د ئێكگوتار نه‌بن، دێ بابه‌كا گران ده‌ین”.

فارسی زێده‌تر گۆت” ئاساییبوونا ره‌وشا سیاسی ل هه‌رێما كوردستانێ یا ب ساناهیه‌، هه‌كه‌ نیه‌تا باش هه‌بیت و ب دیتنا من نێچیرڤان بارزانی به‌رده‌وام نیه‌تا خێرێ هه‌بوو د رێكخستنا مالا كوردی دا و گۆتاره‌كا تایبه‌ت یا هه‌ی بۆ ئێكگرتنا كوردان”.

ل دۆر وێ چه‌ندێ ئایا پارتی و ئێكه‌تی بۆ چاره‌سه‌ركرنا كێشێن دناڤبه‌را خوه‌ دا دێ شێن ل سه‌ر مێزا دانوستاندنێ كۆمبن؟ فارس نه‌ورۆلی دبێژیت” هه‌كه‌ هزركرنه‌كا ستراتیژی د به‌رژه‌وه‌ندیا گشتی دا هه‌بیت، هیچ تشته‌ك نینه‌ كو چاره‌سه‌ر نه‌بیت و سیاسه‌ت دانوستاندنه‌ د فه‌زایێ گشتی دا و تشته‌ك نینه‌ هه‌كه‌ نیه‌ت هه‌بیت ب دانوستاندنێ چاره‌سه‌ر نه‌بیت”.

، په‌یڤدارێ جڤاتا سه‌ركردایه‌تیا سلێمانی – هه‌له‌بچه‌ یا پارتی دیموكراتی كوردستان گۆت ژی” سه‌ره‌رای وێ ئالۆزیا ل كوردستانێ و ده‌ڤه‌رێ هه‌ی، سه‌رۆكێ هه‌رێمێ نێچیرڤان بارزانی، شیایه‌ ڤه‌كرنه‌كێ دروست بكه‌ت د ناڤبه‌را سه‌رۆكایه‌تیا هه‌رێما كوردستانێ و ئالیێن سیاسی و هیڤیدارێن ڤه‌كرنه‌كا زێده‌تر دروست ببیت د ناڤبه‌را سه‌رۆكایه‌تیا هه‌رێمێ و ئالیێن سیاسی”.

دیاركر ژی” مه‌كته‌با سیاسی یا پارتی ب هه‌لكه‌فتا جه‌ژنێ و كۆمبوونا جڤاتا سه‌ركردایه‌تیا پارتی ب سه‌رپه‌رشتیا سه‌رۆك بارزانی، ده‌ستپێشخه‌ری كر و داخواز ژ ئالیان كر دانوستاندن بهێته‌ كرن بۆ ده‌ربازكرنا ڤێ ره‌وشا سیاسی و ئایدلۆژی و جڤاكی و داخوازێ ژ ئالیێن سیاسی دكه‌ین پێشوازیێ ل ڤێ داخوازا پارتی بكه‌ن”.

ژ ئالیێ خوه‌ڤه‌ دلشاد شه‌هاب، شیره‌تكارێ سه‌رۆكێ هه‌رێما كوردستانێ راگه‌هاند” ئه‌ڤرۆ ئێكشه‌مبی نێچیرڤان بارزانی، سه‌رۆكێ هه‌رێما كوردستانێ دێ سه‌ره‌دانا سلێمانیێ كه‌ت و دێ پشكداریێ د رێوره‌سمێن ده‌رچوونا خۆلا 16 یا خۆلا كۆلیژا له‌شكری، سه‌رۆكێ هه‌رێما كوردستانێ دێ ل گه‌ل بافل تاله‌بانی، هه‌ڤسه‌رۆكێ ئێكه‌تی نیشتمانی كورسدتان و سه‌لاحه‌دین محه‌مه‌د به‌هائه‌دین، ئه‌میندارێ گشتیێ ئێكگرتوو ئیسلامی كوردستان و عه‌لی باپیر، سه‌رۆكێ كۆمه‌لا دادگه‌ری كوردستان وچه‌ند حزب و كه‌سایه‌تیێن سیاسی ل سلێمانیێ كۆمبیت.

ل دۆر گرنگیا سه‌ره‌دانا سه‌رۆكێ هه‌رێما كوردستانێ بۆ سلێمانیێ، دلشاد شه‌هاب، دبێژیت” وێ سه‌ره‌دانێ گرنگیه‌كا مه‌زن یا هه‌ی و كاریگه‌ریا مه‌زن ل سه‌ر نه‌هێلانا گرژیێ د ناڤبه‌را ئالیێن سیاسی دا و ب دووماهی ئینان ب وێ ره‌وشا سیاسی یا ئالۆز ل هه‌رێما كوردستانێ یا هه‌ی”.

ناڤبری باس ل وێ چه‌ندێ ژی كر، سه‌رۆكێ هه‌رێما كوردستانێ خوازیارێ ئێكرێزی و رێكخستنا ناڤمالا كوردستانی و لێكنێزیكرنا ئالیێن سیاسی یه‌.

ئه‌ڤرۆ:

شیره‌تكارێ سه‌رۆكێ هه‌رێما كوردستانێ راگه‌هاند، بزاڤ یێن هه‌ین بۆ ئه‌نجامدانا كۆمبوونه‌كێ د ناڤبه‌را پارتی دیموكراتی كوردستان و ئێكه‌تی نیشتمانی كوردستان دا.

دلشاد شه‌هاب، شیره‌تكارێ سه‌رۆكێ هه‌رێما كوردستانێ گۆت” بزاڤێن رێكخستنا كۆمبوونه‌كا بلند دناڤبه‌را ئالیێن سیاسی د به‌رده‌وامن و ئالیێن سیاسی ژی پێشوازی ل وان بزاڤان كریه‌، بزاڤ ژێ یێن دهێنه‌ كرن بۆ ئه‌نجامدانا كۆمبوونه‌كێ دناڤبه‌را پارتی دیموكراتی كوردستان و ئێكه‌تی نیشتمانی كوردستان دا”.

ب هه‌لكه‌فتا جه‌ژنا ره‌مه‌زانا پیرۆز، د په‌یاما پیرۆزكرنا جه‌ژنێ دا، نێچیرڤان بارزانی، سه‌رۆكێ هه‌رێما كوردستانێ نووترین ده‌ستپێشخه‌ری خسته‌ به‌رده‌م ئالیێن سیاسی و داخواز ژ پارتی و ئێكه‌تیێ و هه‌موو ئالیێن كوردستانی كر جه‌ژنێ بكه‌نه‌ ده‌لیڤه‌ك بۆ نه‌هێلانا كێشه‌ و ناكۆكیان، هه‌روه‌سا داخواز كر ژی خوه‌ ژ هه‌وێن راگه‌هاندنێ و هه‌ڤدو شكاندنێ بپارێزن.

شیره‌تكارێ سه‌رۆكێ هه‌رێمێ ئاماژه‌ كر” ئالیێن سیاسی سه‌رۆكایه‌تیا هه‌رێما كوردستانێ وه‌كو چه‌ترا كۆمڤه‌كرنا هه‌موویان دهه‌ژمێرن و گۆت” په‌رت و به‌لاڤبوونێ گورزه‌كێ مه‌زن ل مه‌دایه‌”.

دلشادی ئه‌گه‌رێ نه‌بوونا ده‌لیڤێ بۆ كۆمبوونا ئالیێن سیاسی بۆ ره‌وشا سیاسی دزڤرینیت و به‌حس ل وێ چه‌ندێ ژی دكه‌ت كو دشیان دایه‌ د چارچۆڤێ ئارمانجه‌كا نیشتمانی ئێك بگرن.

سه‌رۆكێ هه‌رێما كوردستانێ د په‌یاما خوه‌ دا  ب هه‌لكه‌فتا جه‌ژنا ره‌مه‌زانێ گۆتبوو ژی” ل هه‌رێما كوردستانێ ژ هه‌موو ده‌مه‌كی زێده‌تر مه‌ پێدڤی ب ته‌بایی و ئێكرێزیێ یه‌” هه‌روه‌سا داخوازی ژ ئالیان ژی هه‌بوو كو پێكڤه‌ د ئێكرێز و هاریكار و هه‌ماهه‌نگ بن تاكو ل سه‌ر ئاستێ ئیراقێ ژی پێگه‌ و رۆل وكاریگه‌ری هه‌بیت.

ب دیتنا شێره‌تكارێ سه‌رۆكێ هه‌رێما كوردستانێ” پارتی و ئێكه‌تیێ به‌رسڤا ده‌ستپێشخه‌ریا سه‌رۆكایه‌تیا هه‌رێما كوردستانێ دایه‌” دیاركر ژی” سه‌رۆكایه‌تیا هه‌رێما كوردستانێ دخوازیت ئێكرێزی هه‌بیت”.

هه‌ولێر، قائید میرۆ

بڕیاره‌ ل دووماهیا ڤێ حه‌فتیێ حوكمه‌تا هه‌رێما كوردستانێ ب فه‌رمی به‌رسڤا وه‌زاره‌تا په‌ترۆلا ئیراقێ لدۆر بجهئینانا بڕیارا دادگه‌ها فیدڕال بده‌ت و شیره‌تكاره‌كێ په‌رله‌مانێ كوردستانێ ره‌تكر، هه‌رێما كوردستانێ پێگیریێ ب بڕیارا دادگه‌ها فیدڕال بكه‌ت و دبێژیت، دێ دانوستاندن هێنه‌ ده‌ستپێكرن بۆ گه‌هشتن ب چاره‌سه‌ریێ و رێككه‌فتنێ دناڤبه‌را به‌غدا و هه‌رێمێ دا.

د. ئه‌رشه‌د ته‌ها، شیره‌تكارێ ئابوری یێ په‌رله‌مانێ كوردستانێ بۆ رۆژناما (ئه‌ڤرۆ) گۆت” بڕیارا دادگه‌ها فیدڕالی لدۆر په‌ترۆلا هه‌رێما كوردستانێ 100% بریاره‌كا سیاسیه‌ و ل ده‌مێ ده‌ركرنا بڕیارا دادگه‌هێ ژی  دیاربوو ده‌ستێن سیاسی ل پشت ده‌ركرنا وێ بریارێ یێن هه‌ین، له‌وڕاژی حوكمه‌تا هه‌رێما كوردستانێ و هه‌ر چار سه‌رۆكایه‌تیێن هه‌رێمێ ره‌تكر پێگیریێ ب بڕیارا دادگه‌هێ بكه‌ن بۆ راده‌ستكرنا په‌ترۆلا هه‌رێما كوردستانێ”.

گۆت ژی” بڕیارا دادگه‌ها فیدڕال زیان ب پرۆسا سیاسی ل ئیراقێ ژی گه‌هاندینه‌ و كاریگه‌ری لسه‌ر گیروبوونا پێكئینانا حوكمه‌تێ و دیاركرنا سه‌رۆك كۆماری هه‌بوویه‌، ئه‌ڤه‌ چه‌ند رۆژه‌كه‌ به‌رپرسێن حوكمه‌تا ئیراقێ دبێژن كار دكه‌ن بۆ بجهئینانا بڕیارا دادگه‌ها فیدڕال، ئانكو دێ دۆسێیا په‌ترۆلێ ژ حوكمه‌تا هه‌رێما كوردستانێ وه‌رگرن و ئه‌و دێ بڕێڤه‌به‌ن، ئه‌ڤه‌ژی شاشیه‌كا مه‌زنه‌ و خویایه‌ بڕیار سیاسیه‌، چونكه‌ دیاره‌ ئه‌ڤه‌ هه‌موو گڤاشتنن لسه‌ر هه‌رێما كوردستانێ تاكو كورد داگیرانێ بكه‌ن د پرسا دیاركرنا سه‌رۆك كۆماری و پێكئینانا حوكمه‌تا نوو یا ئیراقێ، هه‌رده‌مێ هه‌رێما كوردستانێ نه‌چیته‌ ژێر بڕیارێن وان دێ به‌حسێ بجهئینانا بڕیارا دادگه‌ها فیدڕال كه‌ن، ئه‌ڤه‌ژی هه‌موو ئه‌جێندایێن سیاسی نه‌، ئه‌ز باوه‌رم حوكمه‌تا هه‌رێما كوردستانێ ب هیچ شێوه‌یه‌كی پێگیریێ ب بڕیارا دادگه‌ها فیدڕال ناكه‌ت، له‌وڕاژی پێدڤیه‌ هه‌ردو حوكمه‌ت ڤه‌گه‌ڕن بۆ دستوورێ ئیراقێ و ب گۆره‌ی مادێن ١١٢ و ١١٧ یێن دستوورێ ئیراقێ هاتیه‌، هه‌ردو حوكمه‌تێن هه‌رێمێ و فیدڕال پێكڤه‌ دێ دۆسێیا په‌ترۆلێ بڕێڤه‌به‌ن و نابیت به‌غدا ئێك لایه‌نه‌ ده‌ست بسه‌ر په‌ترۆلا هه‌رێما كوردستانێ بگریت و حوكمه‌تا هه‌رێما كوردستانێ ژی چو رۆل نه‌بیت.

ناڤبری ئاماژه‌كر” ل ڤێ حه‌فتیێ دێ هه‌رێما كوردستانێ  بفه‌رمی به‌رسیڤا حوكمه‌تا ئیراقێ ده‌ت و ب گۆره‌ی پێزانینێن به‌رده‌ست دێ شانده‌كێ حوكمه‌تا هه‌رێما كوردستانێ سه‌ره‌دانا به‌غدا كه‌ت و دێ گه‌ڕه‌كا دی یا دانوستاندنان دگه‌ل وه‌زاره‌تا په‌ترۆلا ئیراقێ كه‌ت بۆ وێ چه‌ندێ بگه‌هنه‌ رێككه‌فتنێ، بێی رێككه‌فتن بڕیارا دادگه‌ها فیدڕالی جهێ خوه‌ ناگریت و سه‌رناگریت، چونكه‌ تاكه‌ چاره‌سه‌ر بۆ پرسا په‌ترۆلێ ئه‌وه‌ هه‌ردو ئالی پێكڤه‌ هاریكاربن، حوكمه‌تا هه‌رێما كوردستانێ ئه‌و چه‌نده‌ پشتڕاستكریه‌ كو په‌ترۆلا هه‌رێما كوردستانێ مولكی هه‌موو خه‌لكێ ئیراقێ یه‌ هه‌روه‌كی چاوا په‌ترۆلا به‌سرا مولكێ هه‌موو ئیراقیانه‌، به‌لێ نابیت دۆسێیا په‌ترۆلا هه‌رێما كوردستانێ دبن كۆنتڕۆلا هه‌رێمێ دا نه‌بیت و به‌غدا تنێ سه‌ره‌ده‌ریێ دگه‌ل په‌ترۆلا هه‌رێما كوردستانێ بكه‌ت، ب دیتنا من دامه‌زراندنا كۆمپانیه‌كا تایبه‌ت ب په‌ترۆلا هه‌رێما كوردستانێ دێ چاره‌سه‌ریا پرسا په‌ترۆلێ كه‌ت، به‌لێ ب مه‌رجه‌كی ئه‌و كۆمپانی بۆ هه‌رێما كوردستانێ بیت و ژئالیێ به‌غداڤه‌ چاڤدێری بهێته‌كرن، ئه‌ز باوه‌رم هه‌رێما كوردستانێ ژی ب ڤێ چه‌ندێ یا رازیه‌”.

ئه‌ڤرۆ:

سه‌رۆكێ دیوانا جڤاتا وه‌زیرێن هه‌رێما كوردستانێ ل دۆر دانوستاندنێن حوكمه‌تا هه‌رێما كوردستانێ و حوكمه‌تا فیدرالی یا ئیراقێ سه‌باره‌ت دۆسێیا په‌ترۆل و غازا هه‌رێما كوردستانێ راگه‌هاند، هه‌تاكو دووماهیا ڤێ حه‌فتیێ حوكمه‌تا هه‌رێما كوردستانێ دێ ب فه‌رمی به‌رسڤا ره‌شنڤیسه‌كێ وه‌زاره‌تا په‌ترۆلا ئیراقێ ده‌ت.

ئۆمێد سه‌باح، سه‌رۆكێ دیوانا جڤاتا وه‌زیرێن هه‌رێما كوردستانێ گۆت” پشتی سه‌ره‌دانا شاندێ حوكمه‌تا هه‌رێما كوردستانێ بۆ به‌غدا و ئه‌نجامدانا كۆمبوونێ ل گه‌ل وه‌زاره‌تا په‌ترۆلێ، وه‌زاره‌تا په‌ترۆلێ ره‌شنڤیسه‌ك بۆ حوكمه‌تا هه‌رێما كوردستانێ هنارتیه‌ كو نوكه‌ حوكمه‌تا هه‌رێمێ مژوولی خواندنا وی ره‌شنڤیسی یه‌ و هه‌تاكو دووماهیێ ڤێ حه‌فتیێ ب فه‌رمی دێ به‌رسڤا وه‌زاره‌تا په‌ترۆلێ هێته‌ دان هه‌روه‌سا د چارچۆڤێ دستووری دا دێ هه‌ماهه‌نگی و دانوستاندن د به‌رده‌وام بن”.

ل دۆر بجهئینانا بریارا دادگه‌ها فیدرالی یا ئیراقی سه‌باره‌ت دۆسێیا په‌ترۆل و غازا هه‌رێما كوردستانێ، ئۆمێد سه‌باح گۆت” هه‌لویستێ هه‌ر چار سه‌رۆكایه‌تیێن هه‌رێما كوردستانێ یێ رۆهنه‌، پێشتر ژی ژ ئالیێ جڤاتا وه‌زیران ڤه‌ دووپاتی ل سه‌ر هاته‌ كرن”.

ب دیتنا سه‌رۆكێ دیوانا جڤاتا وه‌زیرێن هه‌رێمێ، حوكمه‌تا ئیراقێ سه‌باره‌ت بریارێن دادگه‌ها فیدرالی ره‌فتارا بژارده‌كرنێ دكه‌ت و دبێژیت” بۆ نموونه‌ دادگه‌ها فیدرالی یا ئیراقی ل سالا 2019 بریاره‌ك سه‌باره‌ت پێناسه‌كرنا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ و بجهئینانا مادێ 140 یێ دستووری و پێگیریكرنا حوكمه‌تا فیدرالی بۆ بجهئینانا وێ مادێ ده‌ركریه‌، به‌لێ هه‌تا نوكه‌ ئه‌و بریارا دادگه‌ها فیدرالی یا ئیراقێ نه‌هاتیه‌ بجهئینان و چو دووڤچوونه‌ك ژی نه‌هاتیه‌ كرن ژ ئالیێ هیچ داموده‌زگه‌هه‌كێ حوكمه‌تا فیدرالی ڤه‌ بۆ بجهئینانا وی بابه‌تی”.

سه‌باره‌ت وێ چه‌ندێ د ئۆمێد سه‌باح دبێژیت” ئه‌و نموونه‌یه‌ وێ چه‌ندێ دیاردكه‌ت كو جۆره‌ك ژ بژارده‌كرنا بریاران و سوچگرتنا هه‌رێما كوردستانێ هه‌یه‌ سه‌باره‌ت وان بابه‌تان، له‌وما دێ دووپاتیێ ل سه‌ر مافێن خوه‌ یێن دستووری كه‌ین و ده‌ستبه‌رداری وان مافان نابین”.

ئه‌ڤرۆ:

لقێ 17 یێ پارتی دیموكراتی كوردستان ل شنگالێ ل دۆر ئالۆزیێن رۆژێن بۆری ل قه‌زا شنگالێ به‌یاننامه‌ك به‌لاڤكر وتێدا هاتیه‌ پشتی پیلانا 16 ئۆكتۆبه‌را 2017 پێشمه‌رگێن پارتی ل سه‌ر داخوازا خه‌لكێ شنگالێ و بۆ وێ چه‌ندێ شه‌ر نه‌كه‌ڤیته‌ دناڤ قه‌زا شنگالێ دا و گرفت دروست نه‌بن، پاشڤه‌چوون.

لقێ 17 یێ پارتی د به‌یانناما خوه‌ دا دبێژیت” ل دۆر ره‌وشا شنگالێ و ئه‌و نه‌هامه‌تیا ب سه‌ر خه‌لكێ خوه‌شتڤیێ شنگالێ دا هاتی، ژ ئالیێ هنده‌ك ئالیێن نه‌ به‌رپرس دیسان موزایه‌دات دژی پارتی دووپاره‌ دبن، ل ڤێرێ دئینینه‌ بیرا هه‌موو ئالیه‌كی كو خه‌لكێ شنگالێ ب خوه‌ دیده‌ڤانێن وێ چه‌ندێ نه‌ كێ بۆ شنگالێ قوربانی و خوین دایه‌. ل ده‌مێ هێرشا تیرۆرستێن داعشێ ل سه‌ر شنگالێ هه‌موو ئه‌و هێز و ئالیێن موزایه‌دا دكه‌ن ب ئێكه‌تی و PKK  و حوكمه‌تا ئیراقێ ڤه‌ ل شنگالێ بوون، كه‌س ژوان به‌رگری ژ شنگالێ نه‌كر و تنێ پارتی به‌رگری كر و خوین دا. د پرۆسا ئازادكرنا چیایێ شنگالێ و رێیێن شنگالێ ل هه‌یڤا كانوونا ئێكێ 2014 و ل ئۆپه‌راسیۆنا ئازادكرنا شنگالێ ل چریا دوویێ 2015 پارتی و پێشمه‌رگێن پارتی بوون ب تنێ و ب خوینا خوه‌ شنگال ئازادكر و تۆله‌ ژ تیرۆرستێن داعشێ ڤه‌كر”.

دیاركر ژی” پشتی پیلانا 16 ئۆكتۆبه‌را 2017 ژی پێشمه‌رگێن پارتی ل سه‌ر داخوازا خه‌لكێ شنگالێ و بۆ وێ چه‌ندێ شه‌ر نه‌كه‌ڤیته‌ د شنگالێ دا و د ناڤبه‌را شنگالیان دا گرفت دروست نه‌بن، ل شنگالێ پاشڤه‌چوون ب وی مه‌رجی كو خه‌لكێ شنگالێ ب خوه‌ كاروبارێن خوه‌ ب رێڤه‌ببه‌ن و ئارمانجا پارتی ژی ئه‌وبوو ده‌لیڤه‌ ب ئاكنجیێن شنگالێ بهێته‌ دان كو ب خوه‌ حوكمرانیا خوه‌ بكه‌ن، به‌لێ حوكمه‌تا ئیراقێ بوو سۆزێن خوه‌ پێشێلكرین و شنگال دایه‌ ده‌ستێ قه‌ده‌رێ و حوكمێ چه‌كدارێن PKK و میلیشیێن نه‌ قانوونی كو كارێ وان تنێ قه‌چاخ و مادێن بێهۆشكه‌ر و رێگرتن ل ڤه‌گه‌راندنا ئاواران و یاریكرن ب چاره‌نڤیسێ شنگالێ بوو”.

لقێ 17 یێ پارتی د به‌یانناما خوه‌ دا خویا دكه‌ت” هه‌موو ئالیه‌ك وێ راستیێ باش دزانن ژ ئه‌گه‌رێ داخوازی و حه‌زا خه‌لكێ شنگالێ، پارتی ژ شنگالێ پاشڤه‌چوو ئه‌گه‌ر نه‌ كا چاوان پارتی ل پردێ و سحێلا دفنا چه‌كدار و میلیشیان شكاند دا وه‌سا دفنا ده‌ست درێژكاران و چه‌كدار و قه‌چاخچیان ل شنگالێ شكێنیت”.

زێده‌تر تێدا هاتیه‌”ل ده‌ف پارتی چاره‌نڤیسێ خه‌لكێ شنگالێ و ڤه‌گه‌راندنا ئاواران و جهگیربوونا ژیان و سه‌قامگیریێ بۆ خه‌لكێ شنگالێ كارێ سه‌ره‌كیه‌، ئه‌و هه‌مان ئه‌و سیاسه‌تا دروسته‌ كو به‌رژه‌وه‌ندیا شنگالیان دخوازیت و خه‌لكێ خوه‌شتڤیێ شنگالێ ژی گه‌له‌ك ب باشی د وێ سیاسه‌تا پارتی دگه‌هن و پشته‌ڤانیێ لێ دكه‌ن و به‌لگه‌ ژی ل سه‌ر وێ چه‌ندێ هه‌لبژارتنێن ئۆكتۆبه‌را بۆری ل ئیراقێ كو خه‌لكێ شنگالێ تنێ ده‌نگ ب پارت یدا و پارتی بوو كورسیێن شنگالێ بده‌ستڤه‌ئیناین”.

د دووماهیا به‌یاننامێ دا هاتیه‌” ب دیتنا پارتی دیموكراتی كوردستان پێدڤیه‌ ره‌وشا شنگالێ بهێته‌ ئاسییكرن و هێزێن نه‌ قانوونی و قه‌چاخچی و میلیشیا ژ شنگالێ ده‌ركه‌ڤن و پێدڤیه‌ بله‌ز ده‌لیڤه‌ بۆ ڤه‌گه‌راندنا ئاوارن بهێته‌ دان و شنگال بۆ خه‌لكێ ره‌سه‌نێ شنگالێ ڤه‌گه‌ریت و پارتی نه‌شێت ئێدی چاڤه‌رێی وێ ئێكێ بیت خه‌لكێ شنگالێ دبن گه‌ف و ئاواره‌یێ دا بژیت و یاری ب چاره‌نڤیسێ وی خه‌لكی بهێته‌ كرن”.

سه‌رۆك بارزانی ل سالڤه‌گه‌را 48 یا تۆپبارانكرنا باژێرێ قه‌لادزێ، په‌یامه‌ك به‌لاڤكر و راگه‌هاند، خه‌لكێ وی باژێری ب راستی ئیرادا گه‌لێ كوردستانێ یا ب هێزنره‌ ژ مووشه‌كێن ناپالم یێن دوژمنی و سیاسه‌تێن قركرنێ.

ده‌قێ په‌یاما سه‌رۆك بارزانی:

ل سالڤه‌گه‌را 48 سالیا تۆپبارانكرنا قه‌لادزێ، ژئالیێ رژێما به‌رێ یا ئیراقێ دخوازم سلاڤێن تایبت بگه‌هینمه‌ ئاكنجیێن وی باژێری، كو دیاركر ب راستی ئیرادا گه‌لێ كوردستانێ یا ب هێزتره‌ ژ مووشه‌كێن ناپالم یێن دوژمنی سیاسه‌تێن قه‌ركرنێ.

دهێته‌ زانین، ل 24/4/974، چه‌ند فرۆكێن حوكمه‌تا به‌عس قه‌لادزێ تۆپبارانكر و د ئه‌نجامدا 134 وه‌لاتی شه‌هید بوون و 150 یێن دی ژی بریندار بوون، هه‌روه‌سا نێزیكی 200 خانیان ژ ئه‌گه‌رێ تۆپبارانكرنێ هاتنه‌ ژناڤبرن، پشكه‌ك ژ وان قوتابی و مامۆستایێن زانكۆیا سلێمانیێ بوون، چونكه‌ وی ده‌می ژ ترسا حوكمه‌تا به‌عس زانكۆیا ناڤبری بۆ قه‌لادزێ هاتبوو ڤه‌گوهاستن.

ل رۆژا 24/4/1982 ده‌مێ خه‌لكێ قه‌لادزێ سالڤه‌گه‌را تۆپبارانكرنا سالا 1974 سخ دكر، جاره‌كا دی ژئالیێ حوكمه‌تا به‌عس ڤه‌ تووشی توندوتیژیێ بوون و د ئه‌نجامدا دو ئافره‌ت شه‌هید بوون و هه‌ژماره‌كا وه‌لاتیان بریندار بوون.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، د سالڤه‌گه‌را 34 یا تاوانێن ئه‌نفالێ په‌یامه‌ك به‌لاڤكر و راگه‌هاند، هه‌رچه‌نده‌ پشكه‌ك ژ ئه‌نجامده‌رێن ئه‌نفالێ گه‌هشتنه‌ سزایێ خوه‌ و ژناڤچوون، به‌لێ پێدڤیه‌ بزاڤێن مه‌ بۆ دانه‌نیاسینا تاوانا جینۆسایدێ د به‌رده‌وامبن و ئاماژه‌كر، ل 34 مین سالڤه‌گه‌را هه‌وا جینۆسایدا ئه‌نفالێ، ب رێز و شكۆڤه‌ بیرئینانا شه‌هید و قوربانیێن وێ تاوانا درندانه‌ یا رژێما به‌عس دكه‌ین و بۆ هه‌تا هه‌تایێ ژی ل بیرا مه‌نه‌.

ئاماژه‌كر، هه‌رچه‌نده‌ پشكه‌ك ژ ئه‌نجامده‌رێن وێ تاوانا مه‌زن و سیاسه‌تا نه‌ژادپه‌رستانه‌، گه‌هشتنه‌ سزایێ خوه‌ و ژناڤچوون، به‌لێ پێدڤیه‌ بزاڤێن مه‌ د به‌رده‌وام بن بۆ زێده‌تر دانه‌نیاسینا تاوانێن جینۆسایدا ئه‌نفالێ و شه‌رمزاركرنا ئه‌نجامده‌رێن وێ و رێگرتن ل دووباره‌نه‌بوونا وێ تاوانێ چ دژی گه‌لێ كوردستانێ یان هه‌ر گه‌له‌كی دی ل جیهانێ. نابیت ئێدی ئه‌ڤ كۆمه‌لكوژی و وێرانكاریه‌ ل كوردستانێ، ل بن هه‌ر ناڤه‌كی و ب هه‌ر بیانوویه‌كی بیت دووباره‌ ببیت.

دووپاتكر ژی، ب ڤێ هه‌لكه‌فتا خه‌مگین، جاره‌كا دی دووپات دكه‌ین كو پێدڤیه‌ حوكمه‌تا ئیراقێ، ب گۆره‌ی دستووری، ئه‌رك و به‌رپرسیاره‌تیا خوه‌ ل قه‌ره‌بووكرنا كه‌سوكارێن شه‌هیدان و هه‌روه‌سا قوربانی و زیانلێكه‌فتیێن ئه‌نفالێ و هه‌موو تاوانێن شه‌ری و وێ كۆمه‌لكوژیا كو ل به‌رامبه‌ر خه‌لكێ كوردستانێ هاتینه‌ ئه‌نجامدا، بجهبینیت. هه‌روه‌سا راگه‌هاند، یا ئاشكرایه‌ ژ ئه‌گه‌رێ وێ تاوانێ، خه‌لك و ئاخا كوردستانێ روو ب روویێ سیاسه‌تا قركرنێ و تالانكاریێ و وێرانكرنێ و ژناڤچوونێ بووینه‌، له‌وما نابیت ئێدی بابه‌تێ قه‌ره‌بووكرنا قوربانیێن رژێما به‌رێ یا ئیراقێ، بهێته‌ پشت گوه هاڤێتن. هه‌روه‌سا خویاكر، حوكمه‌تا هه‌رێما كوردستانێ، به‌رده‌وام خوه‌ ب قه‌ردارا كه‌سوكارێن شه‌هیدان و ئه‌نفالكریێن كوردستانێ دزانیت و هه‌موو بزاڤان دكه‌ت بۆ وێ چه‌ندێ خزمه‌ته‌كا هه‌ژی بۆ وان بكه‌ت بكه‌ت و ب گۆره‌ی شیانان، برینێن وان سڤك بكه‌ت.

سه‌رۆكێ فراكسیۆنا پارتی ل په‌رله‌مانێ كوردستانێ رادگه‌هینیت، د په‌راوێزا دیداره‌كێ دا ل گه‌ل به‌رپرسێ كاروبارێن سیاسی یێن یونامی ل ئیراقێ  به‌حس ل به‌رهه‌ڤیێن پرۆسا هه‌لبژارتنێن په‌رله‌مانێ كوردستانێ و رێكارێن قانوونی یێن به‌رده‌م وێ و پرسا كاراكرنا كۆمسیۆنێ هاته‌ كرن و مه‌ دووپاتی ل سه‌ر هه‌لویستێ پارتی كر بۆ ئه‌نجامدانا هه‌لبژارتنان د ژڤانێ خوه‌ دا و به‌رهه‌ڤیا فراكسیۆنا پارتی بۆ لادانا به‌ربه‌ستێن قانوونی ب ئارمانجا لێكتێگه‌هشتنێ دناڤبه‌را فراكسیۆنان بۆ چاره‌سه‌ریا گرفتێن قانوونی و مه‌ هوشداری ل دۆر پێشهاتێن به‌رده‌م ئه‌نجامدانا پرۆسا هه‌لبژارتنان و ئیفلجبوونا پرۆسا قانوون دانانێ ل هه‌رێمێ دا.

سه‌رۆكێ پێشتر یێ كۆمسیۆنا هه‌لبژارتنان ل ئیراقێ، سه‌ربه‌ست مسته‌فا راگه‌هاند، یا گرنگ ئه‌وه‌ هه‌لبژارتنێن په‌رله‌مانێ كوردستانێ ل ده‌مێ خوه‌ یێ دیاركری دا بهێنه‌ ئه‌نجامدان و هه‌كه‌ ئێك بازنه‌ ژی بیت د به‌رژه‌وه‌ندیا هه‌موو ئالیه‌كی دایه‌ و ئه‌ندامێن په‌رله‌مانی ژی نابنه‌ نوونه‌رێن ده‌ڤه‌ره‌كێ ب تنێ به‌لكو دێ بنه‌ نوونه‌رێن هه‌موو خه‌لكێ كوردستانێ و ئاماژه‌كر ئێك بازنه‌یی د به‌رژه‌وه‌ندیا هه‌موو حزبان دایه‌ ب گشتی و ب تایبه‌تی حزبێن بچووك كو ده‌نگێن وان ژی كۆم دبن، له‌وما ئێك بازنه‌یی د به‌رژه‌وه‌ندیا گشتی دایه‌ و ب ڤی سیسته‌می ده‌نگێن هه‌موو حزبان ل هه‌موو ده‌ڤه‌ران دهێنه‌ كۆمكرن له‌وما ده‌نگێن وان ب هه‌ده‌ر ناچن و دبیت كورسیێن وان ژی زێده‌ ببن، به‌لێ د فره‌ بازنه‌ییێ دا ب وی شێوه‌ی نینه‌.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی ل دووماهی كۆمبوونا جڤاتا وه‌زیرێن هه‌رێمێ به‌حسێ ره‌وشا دارایی یا هه‌رێما كوردستانێ كر و دووپاتكر كو كارێ سه‌ره‌كی و نوكه‌ یێ حوكمه‌تێ دابینكرنا مووچێ مووچه‌خۆرێن هه‌رێما كوردستانێ یه‌ و هیچ ده‌مه‌كی حوكمه‌تا هه‌رێمێ ژ پێخه‌مه‌ت دانا مووچه‌ی د ده‌مێ خوه‌ دا خه‌مساری نه‌كریه‌.

ب سه‌رۆكایه‌تیا مه‌سرور بارزانی سه‌رۆكێ جڤاتا وه‌زیران ب به‌رهه‌ڤبوونا قوباد تاله‌بانی جێگرێ سه‌رۆك وه‌زیران، جڤاتا وه‌زیرێن هه‌رێمێ كۆمبوو.

ل ده‌ستپێكا كۆمبوونێ، سه‌رۆكی جڤاتا وه‌زیران كورتیه‌ك سه‌باره‌ت سه‌ره‌دانا وی یا ڤێ دووماهیێ بۆ وه‌لاتێ ئیمارات و پشكداریكرن د كۆربه‌ندێ وزێ جیهانی و كۆپیتكا جیهانی یا حوكمه‌تان ل دوبه‌ی و كۆمبوون و دیدار ل گه‌ل به‌رپرسێن بلند یێن وه‌لاتێ ئیمارات وبه‌رپرسێن وه‌لاتان د په‌راوێزا كۆپیتكا جیهانی یا حوكمه‌تان به‌رچاڤكر.

د وان دیدار و كۆمبوونان دا، سه‌رۆك وه‌زیرێن هه‌رێمێ هه‌لویستێ هه‌رێما كوردستانێ سه‌باره‌ت گورانكاری و پێشهاتێن ئیراقێ و ده‌ڤه‌رێ و جیهانێ ب تایبه‌تی ده‌لیڤێن پێشخستنا كه‌رتێ وزێ ل هه‌رێما كوردستانێ رۆهنكر، هه‌روه‌سا یاداشته‌كا لێكتێگه‌هشتنێ ژی د ناڤبه‌را حوكمه‌تا هه‌رێما كوردستانێ و وه‌لاتێ ئیمارات هاته‌ ئیمزاكرن بۆ پێشڤه‌برنا شیانێن مرۆڤی و به‌ر ب پێشڤه‌برنا داموده‌زگه‌هێن حوكمه‌تا هه‌رێمێ و مفا وه‌رگرتن ژ ئه‌زموونا سه‌ركه‌فتی یا وه‌لاتێ ئیمارات د بوارێ حوكمه‌تا ئه‌لكترۆنی و ب دیجیته‌لكرنا خزمه‌تگوزاریان.

پاشی سه‌رۆكێ جڤاتا وه‌زیران، به‌حسێ روشا دارایی یا هه‌رێما كوردستانێ كر و دووپاتكر كو كارێ سه‌ره‌كی و نوكه‌ یێ حوكمه‌تا هه‌رێمێ دابینكرنا مووچێ مووچه‌خۆرێن هه‌رێما كوردستانێ یه‌ و هیچ ده‌مه‌كی حوكمه‌تا هه‌رێمێ خه‌مساریێ ناكه‌ت د كاركرنێ ژ پێخه‌مه‌ت دانا مووچه‌ی د ده‌مێ خوه‌ دا.

website security
WP Facebook Auto Publish Powered By : XYZScripts.com