دوهی ئێكشەمبی 23/2/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل ئەحمەد ئەلجەربا، سەرۆكێ باسكێ (غەد) یێ سووری كر.
ب گۆڕەی بەیاننامەیەكا حوكمەتا هەرێما كوردستانێ، د دیدارەكێدا بیر و بۆچوون ل دۆر رەوشا گشتی و گوهۆڕین و پێشهاتێن سووریێ هاتنە لێكگۆهارتن.
حوكمەتا هەرێما كوردستانێ ئاماژە ب وێ چەندێ ژی كر، هەردو ئالییان دوپاتی ل گرنگییا پاراستنا ئارامیێ و دابینكرنا مافێن گەلێ كورد و هەموو پێكهاتەیێن وی وەلاتی كر.

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: هەكە بەغدا پێگیری رێككەفتنا د ناڤبەرا هەرێما كوردستانێ و ئیراقێدا بیت، ئێدی گرفتا مووچەی دروست نابیت و مەهانە د دەمێ خوەدا دێ مووچە هێتە هنارتن بێی گیرۆبوون، هەروەسا دیاركر، بۆ هنارتنا پەترۆلا هەرێما كوردستانێ ژی حوكمەتا هەرێما كوردستانێ دو داخوازی یێن هەین.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گۆت» حوكمەتا هەرێما كوردستانێ بەرهەڤییا خوە یا نیشاندای بۆ وێ چەندێ دوبارە هنارتنا پەترۆلا هەرێما كوردستانێ دەستپێبكەت، بەلێ پێدڤییە میكانیزمەكا رۆهن هەبیت بۆ دەستپێكرنا هنارتنا پەترۆلا هەرێما كوردستانێ، لەوما پێدڤییە ئیراق ژ وێ پەترۆلا بۆ ناڤخوە بكاردئینیت رێژە چەند بیت 14% ژێ بۆ هەرێما كوردستانێ بیت بۆ پێدڤییا ناڤخوەیی وبۆ دابینكرنا پارەیێ كرییا كۆمپانییان ژی میكانیزمەك بهێتە دانان و وەزارەتا داراییا ئیراقێ وێ میكانیزمێ دابنیت و رۆهن بكەت دێ چاوان پارەیێ كۆمپانییان خەرج دكەت، لەوما حوكمەتا هەرێما كوردستانێ یا بەرهەڤە دەست ب هنارتنا پەترۆلا هەرێمێ بكەت ب زووترین دەم ب گۆڕەی راستڤەكرنا قانوونا بۆدجەیا گشتییا ئیراقێ كو ل جڤاتا نوونەرێن ئیراقێ دەنگ ل سەر هاتیە دان و پەسەندكرن، چونكە ئەو كارە د بەرژەوەندییا ئیراقێ و هەرێما كوردستانێ دایە».
د. ڤیانێ گۆت ژی» ب گۆڕەی رێككەفتنا د ناڤبەرا هەرێما كوردستانێ و ئیراقێدا، پێدڤییە بەری ب دووماهی هاتنا هەمو مەمان بەغدا مووچەیێن مووچەخۆرێن هەرێما كوردستانێ ب هنێریت، ئەڤە ژی ژ پێخەمەت وێ چەندێ وەكو سالا بۆری مووچەیێن مووچەخۆرێن هەرێما كوردستانێ گیرۆ نەبن و هەموو مەهان د دەمێ خوە دا مووچە بهێتە هنارتن و ئەو گرفتە ب ئێكجاری بهێتە چارەسەركرن و مەهانە دوبارە نەبیت، لەوما دخوازین ئیراق پێگیری رێككەفتنێ بیت و هیچ ئاستەنگەك ل پێشبەری رێككەفتنێ دروست نەبیت».
سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ رۆهن كر ژی» هەكە ئیراق پێگیری رێككەفتنا د ناڤبەرا هەردو ئالییان بیت، بۆ ئەڤسالە گرفتا هاتنا مووچەیان دروست نابیت و مەهانە د دەمێ خوە دا مووچە دێ هێنە هنارتن و گرفتا هاتنا مووچەی ئێدی دروست نابیت».

هەولێر و بەغدا ل سەر پرسا هنارتنا پەترۆلا هەرێما كوردستانێ گەهشتنە رێككەفتنێ و لژنەیەك بۆ پشكنینا بۆرییان هاتە پێكئینان.
شاندێ دانوستاندكارێ حوكمەتا هەرێما كوردستانێ بەلاڤكر» ل رۆژا ئێكشەمبی 23/2/2025، پشتی پەیوەندی و هەماهەنگیێ د ناڤبەرا هەردو وەزارەتێن پەترۆلا فیدرالی و سامانێن سروشتی ل حوكمەتا هەرێما كوردستانێ، رێككەفتن ل سەر دەستپێكرنا هنارتنا پەترۆلا هەرێما كوردستانێ ب گۆڕەی رێژەیا ل بەردەست، هاتە كرن».
ب گۆڕەی بەیاننامەیەكا شاندێ دانوستاندكارێ حوكمەتا هەرێما كوردستانێ، هەر دوهی ئێكشەمبی، تیمەكا تەكنیكییا هەڤپشك ب مەبەستا پشكنینا بۆریێن هنارتنا پەترۆلا هەرێما كوردستانێ د ناڤبەرا هەردو ئالییاندا یا هاتیە پێكئینان.
د بەیاننامەیێدا هاتیە» پێگیرییا خوە بجهئینانا بڕگەیێن قانوونا بۆدجەیا گشتییا فیدرالی دوپات دكەین».
نێزیكی دو سالایە هنارتنا پەترۆلا هەرێما كوردستانێ هاتیە راگرتن، هەتا نوكە نێزیكی 26 ملیار دۆلار زیان ب ئابوورێ ئیراقێ و هەرێما كوردستانێ گەهشتینە و بازارێ وزەیا جیهانی ژی یێ نە هەڤسەنگ بوو.
هەر د ڤێ حەفتیێدا شاندێ دانوستاندكارێ حوكمەتا هەرێما كوردستانێ د بەیاننامەییەكێدا دیاركربوو» د كۆمبوونا مە یا هەڤپشكدا ل گەل شاندێ وەزارەتا پەترۆلا فیدرال، ئەو چەندە هاتە دوپاتكرن كو بجهئینانا راستڤەكرنا قانوونێ پێدڤی ب رێككەفتنەكێ ل سەر گۆژمەیێ تێچوویێ دەرئینانا پەترۆلییە ژ زەڤیێن پەترۆلی یێن هەرێما كوردستانێ یا هەی».
هەڤدەم دوپاتی ل وێ چەندێ ژی كر» پێدڤییە رێككەفتن ل دۆر میكانیزم و پێدانا شایستەیێن كۆمپانییان و گۆژمەیێ تەرخانكری بۆ بكارئینانا ناڤخوەیی بهێتە كرن».
ب گۆڕەی وێ بەیاننامەیێ « شاندێ دانوستاندكارێ حوكمەتا هەرێما كوردستانێ دوپاتیێ ل پێدڤییا بلەزكرنێ د چارەسەركرنا هەموو وان كێشەیان دكەت كو ل سەری ئاماژە پێ هاتیە كرن».
شاندێ دانوستاندكارێ حوكمەتا هەرێما كوردستانێ دیاركربوو ژی» حوكمەتا هەرێما كوردستانێ دوپاتیێ ل سەر پێدڤییا دوبارە هنارتنا پەترۆلا هەرێما كوردستانێ ب زووترین دەمدا دكەت».

سەرۆكێ ئێكەتی نیشتمانی كوردستان راگەهاند: پڕۆژەیێ ( هەژمارا من) ژ ئەگەرێ مەسرور بارزانی، سەرۆكێ حوكمەتا هەرێما كوردستانێ گەلەك ب باشی یێ بڕێڤە دچیت. هەڤدەم باس ل چوونا تیمەكا نڤیسینگەها سەرۆكێ حوكمەتا هەرێما كوردستانێ ل دۆر پڕۆژەیێ (هەژمارا من) بۆ سلێمانیێ كر.
دوهی ئێكشەمبی 23/2/2025، بافل تالەبانی، سەرۆكێ ئێكەتی نیشتمانی كوردستان، د چارچۆڤەیێ پشكداریێ د حەفتەمین كۆنفرانسێ نێڤدەولەتیێ بەغدا، باس ل پڕۆژەیێ (هەژمارا من) كر كو ژ ئالیێ تیمەكا تایبەتمەند و پسپۆرا نڤیسینگەها مەسرور بارزانی، سەرۆكێ حوكمەتا هەرێما كوردستانێ سەرپەرشتی لێ دهێتە كرن.
سەرۆكێ ئێكەتی نیشتمانی كوردستان ل دۆر پڕۆژەیێ (هەژمارا من) بزاڤێن سەرۆكێ حوكمەتا هەرێما كوردستانێ بلند هەلسەنگاندن و گۆت» ژ بەر رۆلێ مەسرور بارزانی، سەرۆكێ حوكمەتا هەرێما كوردستانێ، تەوتین و پڕۆژەیێ (هەژمارا من) گەلەك ب باشی بڕێڤەدچن».
بافل تالەبانی ئەوژی بەرچاڤكر» ل ڤێ دووماهیێ بەری سەرەدانا ئەمریكا بكەم، ل گەل بەرێز مەسرور بارزانی كۆمبووم و مە گەلەك بابەت گەنگەشەكرن».
سەرۆكێ ئێكەتی نیشتمانی كوردستان ئاماژە ب وێ چەندێ ژی كر» ئێك ژ وان بابەتێن د كۆمبوونا ل گەل سەرۆكێ حوكمەتا هەرێما كوردستانێ مە گەنگەشەكری، پڕۆژەیێ (هەژمارا من) بوو، و ل دۆر پڕۆژەیێ ناڤبری من پرسیارەك ژ مەسرور بارزانی، ژ سەرۆكێ حوكمەتا هەرێمێ كر و ئەوژی پێ حێبەتی بوو» .
ب گۆرەی بافل تالبەنی، پشتی وی ئەو پرسیار كری، مەسرور بارزانی، سەرۆكێ حوكمەتا هەرێما كوردستانێ بریار دا تیمەكێ پڕۆژەیێ (هەژمارا من) ب هنێریتە سلێمانیێ.
سەرۆكێ ئێكەتی نیشتمانی كوردستان ئاماژە ب وێ چەندێ ژی كر كو ئەو تیما سەرۆكێ حوكمەتا هەرێما كوردستانێ هنارتی ل گەل تایبەتمەند و پسپۆرێن قانوونی و دارایی یێن مە كۆمبوون سەحكرە هووردەكاریێن جوداهییا د ناڤبەرا تەوتینێ و هەژمارا من دا.
پشتی وان ئاخڤتنێن بافل تالەبانی، سەرۆكێ ئێكەتی نیشتمانی كوردستان د كۆنفرانسێ نێڤدەلەتیێ بەغدایێ دا، هەر د داخۆیانییەكا رۆژنامەڤانیدا ل دۆر دانوستاندنێن پارتی دیموكراتی كوردستان و ئێكەتی نیشتمانی كوردستان بۆ پێكئینانا كابینەیا دەهێ یا حوكمەتا هەرێما كوردستانێ، گۆت» ب رووحییەتەكا و ئاراستەیەكێ باش یێن دچن».

دوهی چارشەمبی 19/2/2025، ل سەلاحەدین سەرۆك مەسعود بارزانی پێشوازی ل دانیال رۆبنستین، جێگرێ بالیۆزێ ئەمریكا ل ئیراقێ كر.
ب گۆڕەی بەیاننامەیەكا بارەگەهێ بارزانی» د دیدارەكێدا رەوشا سیاسی و ئەمنییا ئیراقێ و سووریێ و دووماهی پێشهات و گوهۆڕینێن دەڤەرێ هاتنە گەنگەشەكرن. هەروەسا رۆناهی هاتە ئێخستن ل سەر دەرئەنجامێن سەرەدانا شاندێ ئیمرالیێ بۆ هەرێما كوردستانێ و هەروەسا دیدارا د ناڤبەرا سەرۆك بارزانی و مەزلۆم عەبدی دا».
د بەیاننامەیا بارەگەهێ بارزانی دا هاتیە ژی» پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرال تەوەرێ دی یێ دیدارێ بوون و سەرۆك بارزانی سەرەرای ئاماژەدانێ ب رەفتارێن نە دروست و ئازاردانا جوتیارێن كورد ل پارێزگەها كەركووكێ ئاماژەكر كو ئەڤ رەفتارە ئەنجامێ مەژیێ شۆڤینییە و دیمەنێن جینۆسایدا گەلێ مە دئینیتە بیرا مە».
سەرۆك بارزانی ئەوژی دوپاتكر» پێدڤییە ل ئیراقێ د چارچۆڤەیێ دستووریدا كار ب بنەمایێن هەڤپشكیێ و هەڤسەنگیێ و لهەڤهاتنێ بهێتە كرن».

سەرۆكێ هەرێما كوردستانێ راگەهاند: پێدڤییە سووریا نوو بۆ هەموو پێكهاتەیان بیت. ل دۆر هەرێما كوردستانێ ژی دیاركر: وەلاتێن جیهانی ب گرنگیڤە دنێرنە هەرێما كوردستانێ. هەروەسا داخواز ژ PKK كر چەكی ب دانیت و ل دووڤ دەستپێشخەرییا ئۆجەلانی بچیت.
نێچیرڤان بارزانی، سەرۆكێ هەرێما كوردستانێ د هەڤپەیڤینەكێدا ل گەل رووداو ل میونشنێ، باس ل كۆمبوونێن خوە د چارچۆڤەیێ كۆنفرانسێ ئاسایشێ ل میونشن ل ئەلمانیا ل گەل سەركردەیێن وەلاتان كر، هەلوەستێ وەلاتان ل دۆر پرسا سووریێ، هەرێما كوردستانێ و پەیوەندییان ل گەل ئیراقێ و پڕۆسەیا ئاشتیێ و سەقامگیریێ ل جیهانێ بەرچاڤكر.
سەبارەت رەوشا سووریێ، سەرۆكێ هەرێما كوردستانێ باسێ كۆمبوونا خوە ل گەل ئەسعەد شەیبانی، وەزیرێ دەرڤەیێ سووریێ كر وراگەهاند» مە دوپاتی ل سەر وێ چەندێ كر كو دڤێت سووریا نوو سووریایەكا مەدەنی بیت. چو جاران سووریا ب وی شێوەی ناهێتە بڕێڤەبرن كو ئێك ئایدۆلۆژیا خوە ب سەپینیت». هەروەسا ئاماژەكر كو ژناڤچوونا دەستهەلاتا بەشار ئەلئەسەد و دروستبوونا حوكمەتا نوو یا سووریێ ب وی شێوەیێ بلەز بۆ ئەحمەد شەرعی ب خوە ژی جهێ حێبەتیێ بوو.
نێچیرڤان بارزانی گۆت ژی» كارێ مە یێ بەراهیێ ل دۆر ڤی بابەتی ئەوە ئەم چاوان بشێین كوردان ژ وی ئاگری بپارێزین. د پەیوەندییەكا بەردەوامدا بووین ب تایبەتی ل گەل توركیا و ئەمریكا و وەلاتێن ئۆرۆپی. ل رۆژێن ئێكێ سەرنجا مە ل سەر وێ چەندێ بوو دێ چاوان شێین كوردان پارێزین».
سەرۆكێ هەرێما كوردستانێ بۆچوونا خوە ل دۆر بۆچوونێن ئەحمەد شەرع بەرچاڤكر و گۆت» ئەوا ئەم دبینین ئەوە، ئەحمەد شەرع دخوازیت ب جدی كێشەیێن سووریێ چارەسەر بكەت. هەكە ب راستی ئەڤە سیاسەتا وان بیت، یێ هەژی وێ چەندێیە پشتەڤانی لێ بهێتە كرن».
نێچیرڤان بارزانی باسێ پڕۆسەیا ئاشتیێ ل توركیا و دەستپێشخەرییا ئالیێن وێ كر و گۆت» پێدڤییە PKK پێشوازیێ ل پەیاما عەبدوللا ئۆجەلانی بكەت و چەكی ب دانیت، چەكدانان ب رامانا خوەرادەستكرنێ ناهێت، بەلكو رامان ئەوە پرسا چەكداری و هێزا چەكدار هیچ كێشەیەكا كوردان ل توركیا چارەسەر ناكەت».
د بەرسڤا پرسیارەكێدا ئایا دەلیڤەیا ب هێزكرنا پەیوەندیێن هەرێما كوردستانێ ل گەل وەلاتێن جیهانێ هەیە؟ سەرۆكێ هەرێما كوردستانێ گۆت» ب دیتنا من بەلێ یا هەی. وەلاتێن جیهانێ گەلەك ب گرنگیڤە دنێرنە هەرێما كوردستانێ. هەرێما كوردستانێ د چارچۆڤەیێ ئیراقێدا و ب راستی دخوازن هەرێما كوردستانێ هەرێمەكا ب هێز بیت كو بشێت هەم هاریكارییا خوە بكەت و هەم هاریكارییا ئیراقێ ژی بكەت و رۆلەكێ بلند ژی ل دەڤەرێ هەبیت».
سەرۆكێ هەرێما كوردستانێ باس ل وێ چەندێ ژی كر» ل وان دیدارێن مە ئەنجامداین ژی د وێ چەندێ دگەهین كو بەلێ گرنگییەكا گەلەك مەزن ب هەرێما كوردستانێ یا هەی، وەكو هەرێما كوردستانێ د چارچۆڤەیێ ئیراقێدا».
نێچیرڤان بارزانی سەبارەت سیاسەتا ئیدارەیا نوو یا ئەمریكا و دۆنالد ترەمپی گۆت» ئەوا ئەم د سیاسەتا ترەمپیدا وەكو سەرۆكێ ئەمریكا دبینین ئەو دخوازیت ل هەموو جهان ئاشتی بەرقەرار بیت. وی ب خوە ژی یا راگەهاندی كو دخوازیت دووماهیێ ب شەڕان بینیت».
ب دیتنا نێچیرڤان بارزانی پێدڤییە هەموو ئالی پێشوازیێ ل دەستپێشخەرییا سەرۆكێ ئەمریكا بۆ پڕۆسەیا ئاشتیێ ل جیهانێ بكەن و دوپاتكر» پێدڤییە بزاڤێن جدی ژی بهێنە كرن بۆ وێ چەندێ ئاشتی ل هەموو جهان بەرقەرار بیت».

دوهی چارشەمبی 19/2/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندێ ئیمرالی یێ دەم پارتی، ب سەرۆكایەتییا هەردو پەرلەمانتاران پەروین بۆلدان و سرا سورەیا كر.
حوكمەتا هەرێما كوردستانێ د بەیاننامەیەكێدا ئاماژە ب وێ چەندێ كر» د دیدارەكێدا، شاندی خوەشحالییا ب سەرەدان و دیدار و كۆمبوونێن خوە ل هەرێما كوردستانێ دیاركر و كورتییەك ل دۆر ئارمانجا سەرەدانا خوە و بزاڤێن پڕۆسەیا ئاشتیێ ل توركیا بەرچاڤكر و ئاماژە ب وێ چەندێ كر كو نوكە قۆناغەكا نوو ل توركیا یا دەستپێكری و پرسا ئاشتیێ و چارەسەرییا دۆزا كوردی یا بوویە بابەتەكێ گرنگ و پێدڤییەكا فەر. شاندی هەروەسا رۆل و پێگەه و پشتەڤانییا سەرۆك مەسعود بارزانی بۆ پڕۆسەیێ بلند هەلسەنگاند».
د بەیاننامەیا حوكمەتا هەرێما كوردستانێدا هاتیە ژی» سەرۆكێ حوكمەتا هەرێما كوردستانێ دوپاتی ل
گرنگییا مفا وەرگرتنێ ژ هەر دەلیڤەیەكێ كر ژ پێخەمەت ئاشتیێ و سەقامگیریێ و ب هێزكرنا پێكڤەژیانا ئاشتییانە و برایەتییا د ناڤبەرا گەلێن دەڤەرێ و جیهانێدا ب گشتی».
هەروەسا مەسرور بارزانی پشتەڤانییا خوە یا تمام بۆ پڕۆسەیا ئاشتیێ ل توركیا و ب دووماهیئینانێ ب شەڕ و توندوتیژیێ دوپاتكر و بەرهەڤییا هەرێما كوردستانێ ژی بۆ هەر هاریكاری و هەماهەنگییەكێ ل دۆر وێ چەندێ نیشاندا».

زاخۆ، دلۆڤان هالۆ

عومەر ئۆرەیی، بەرپڕسێ لقا هەشت یا پارتی دیموكراتی كوردستان ل ئیدارەیا سەربخوە یا زاخۆ بۆ ڕۆژنامەیا (ئەڤرۆ) دیار كر: سەرۆك مەسعود بارزانی وەكو لێڤەگەڕێ مللەتێ كوردە ل هەر چار پارچەیێن كوردستانێ، ئەو كەسێ كو بڕیارێن دروست بدەت بتنێ سەرۆك بارزانی یە و پێدڤییە بۆ هەر بابەتەكێ گرنگ ڕاوێژا وی بهێتە وەرگرتن، و ئەز باوەرناكەم ل دەڤەرا ڕۆژهەلاتا ناڤەڕاست هەموویێ كارەك یان بڕیارەك بێی ڕاوێژا سەرۆك بارزانی بهێتە كرن، چونكی جهێ باوەرییا هەموو ئالییەكییە.
عومەر ئۆرەیی گۆت ژی” ب باوەرییا وەلاتێ توركیا و عەبدوللا ئۆجەلانی بتنێ سەرۆك بارزانی دشێت زامنێ ڤێ ئاشتیێ بیت، و هەكە ئەو نەبیت ئەڤ ئاشتییە سەرناگریت و شەڕێ د ناڤبەرا توركیا وPKK دا ناهێتە چارەسەركرن، لەوما ل دووڤ داخوازییا عەبدۆللا ئۆجەلانی شاندێ ئیمڕالیێ سەرەدانا سەرۆك بارزانی كر و د گەلدا كۆمبوون ژ بۆ وەرگرتنا ڕاوێژ و بڕیارا سەرۆك بارزانی دەربارەی وێ ئاشتییا كو ل بەرە د ناڤبەرا توركیا و PKK دا بهێتە ئەنجامدان».
زێدەتر گۆت” پشتی كو هەموو ئالی گەهشتینە وێ باوەرییێ كو ب چەكی چو ئاریشە چارەسەر نابن، ل سەر ڤی بنەمای توركیا داخوازا وێ چەندێ كر ئاشتی بهێتە بەرقراركرن، ڤێ ئاشتیێ دێ گەلەك ڕەنگڤەدانێن خوە یێن ئەرێنی هەبن كو یا ژ هەموویێ گرنگتر دێ خوونڕشتن ب دووماهی هێت و ئاشتی و برایەتی و پێكڤەژیان ل دەڤەرێ دێ بەرقرار بیت و ئەم وەكو كوردستانا باشوور ژی دێ ژ ڤێ ئاشتیێ د مفادار بین چونكی خەلكێ مە دێ زڤڕنە سەر گۆندێن خوە و دێ ب ئێمناهی و ئارامی ژین، بۆ ڤی دەمێ مللەتێ كورد تێدا دژیت پێكڤەژیان یا گرنگە، چونكی وەسا دیارە ڕوودان و پێشهات بلەزن و دێ گوهۆڕینێن مەزن ل ڤێ دەڤەرێ دروست بن، لەوما پێدڤییە كورد بۆ هەر پێشهاتەكێ د بەرهەڤ بن”.

هەولێر، قائید میرۆ

شرۆڤەكارەكێ سیاسی ئاماژە ب وێ چەندێ دكەت، بەغدا پیلان بۆ لاوازكرنا هەرێما كوردستانێ یێن هەین و دبێژیت، بەغدا هەرچەند مەرج هەبن و هەرێما كوردستانێ پێگیربیت دێ هەر مەرجێن زێدەتر هەبن هەروەسا ئاشكراكر، ئەو ئالیێن ل بەغدا سكالا ل دۆر سیستەمێ هەلبژارتنێن هەرێما كوردستانێ تۆماركری پیڤەر بۆ هەلبژارتنان دانابوون هەتا پارتی شكەستنێ بینیت، بەلێ ئەنجام بەرۆڤاژی دیاربوون.
مەشخەل كەولۆسی، شرۆڤەكارێ سیاسی بۆ رۆژنامەیا (ئەڤرۆ) گۆت» ئەو پیڤەرێن بووینە ئەگەرێ سەركەفتنا پارتی د هەلبژارتنێن سالا بۆریدا یێن پەرلەمانێ كوردستان هەمان ئەو پیڤەرن یێن ژئالیێ هێزێن سیاسی ڤە هاتینە دیاركرن، ئەو هێزێن نوكە دژایەتییا پارتی دكەن هەمان ئەو هێزن یێن چووینە دادگەها فیدڕالی ل بەغدا و سكالا تۆماركری ل دۆر سیستەمێ ئەنجامدانا هەلبژارتنێن هەرێما كوردستانێ، ئەو بڕیارا هاتیە دەركرن ل دۆر هەلبژارتنێن هەرێما كوردستانێ ب دلێ وان ئالییان بوویە و هەموو ئەو مەرج و فلتەرێن هاتینە دانان ژئالیێ وان هێزانڤە هاتینە دانان یێن دژایەتییا پارتی دكر و هەڤڕكێن پارتی بوون بۆ هەلبژارتنان، سەركەفتنا پارتی ل هەلبژارتنێن بۆری یێن پەرلەمانێ كوردستانێ بوویە جهێ حێبەتییا هندەك ئالیێن كوردی، چونكە ب دیتنا وان هەكە پیڤەرێن نوو بهێنە دانان بۆ هەلبژارتنان پارتی دێ شكەستنێ ئینیت و نامینیت، بەلێ ئەنجامێن هەلبژارتنان بەرۆڤاژی بۆچوونا وان دەركەفتن و هەمان هێز نوكە زێدەتر دترسن، ئەز باوەرم نوكە ئەو ئالیێن دەمێ خوە چووینە بەغدا و سكالا تۆماركری د پێشەمانن، گرەف گرتنا رۆژێن بۆری ل سلێمانیێ و بزاڤێن هندەك ئالیێن سیاسی ڤەڕێژا هەلبژارتنانە و هێشتا تایا هەلبژارتنان هندەك ئالی بەرنەداینە، لەوڕاژی یێ دژایەتییا پارتی دكەن پشتی وێ سەركەفتنا پارتی بدەستڤە ئینای، ، پڕۆسەیا سیاسی نابیت وەسا بیت، بەلكو دڤێت هندەك عەقلانی تێدابیت و ب قانوون بهێتە رێكخستن.
مەشخەل كەولوسی ئاماژەكر» ب دیتنا من دێ ئیراق درێژیێ ب سیاسەتا برسیكرنا خەلكێ هەرێما كوردستانێ د دەت، نوكە ئیراق یا دەمی د كوژیت و كار ل سەر پیلانێ دكەت و دخوازیت پێنگاڤ ب پێنگاڤ هەموو میكانیزمێن سەروەریێ و حوكمڕانیێ ژ كوردان وەرگریت، باشترین نموونە ژی ئەو مەرجەنە یێن ل سەر هەرێما كوردستانێ هاتینە سەپاندن هەمبەر هنارتنا مووچێ فەرمانبەران، هەتا ڤەگوهاستنا فەرمانبەرەكی ل فەرمانگەهەكێ بۆ فەرمانگەهەكا دی هاتیە راگرتن ب گۆرەی مەرجێن ئیراقێ داناینە سەر هەرێمێ، باشە هەكە مە وەكی هەرێما كوردستانێ دەستهەلاتێن ڤەگوهاستنا فەرمانبەرەكی نەبن ئەڤە وێ چەندێ دگەهینیت ئەم حوكمی ل خوە ناكەین، هەر پشتی رێككەفتنا رۆژێن بۆری وەزیرا داراییا ئیراقێ دو مەرجێن دی داناینە سەر هەرێما كوردستانێ، ل هەرێما كوردستانێ هندەك ئالی یێن هەین كو ل بەغدا دژایەتییا هەرێما كوردستانێ دكەن، پێدڤییە خەلكێ كوردستانێ بزانیت چ یاریەك دهێتەكرن و هەكە كورد هەموو مەرجێن ئیراقێ ژی بجهبینن دێ مەرجێن دی د دووڤدا هێن و هەبن و مەرجێن بەغدا بەرانبەری هەرێما كوردستانێ ب دووماهی ناهێن».

مەسرور بارزانی، سەرۆكێ حوكمەتا هەرێما كوردستانێ، دوهی پێشوازی ل شاندێ ئیمرالیێ یێ‌ دەم پارتی، ب سەرۆكاتییا هەردو پەرلەمانتاران پەروین بۆلدان و سرا سورەیا كر.
د دیدارەكێ دا، شاندێ ناڤبری خوەشحالییا خوە ب سەرەدان و دیدار و كۆمبوونێن خوە ل هەرێما كوردستانێ دیار كر و كورتییەك ل دۆر ئارمانجا سەرەدانا خوە و بزاڤێن پرۆسەیا ئاشتیێ ل توركیا بەرچاڤكر و ئاماژە ب وێ چەندێ كر كو نوكە قۆناغەكا نوو ل توركیا یا دەستپێكری و پرسا ئاشتیێ و چارەسەرییا دۆزا كوردی یا بوویە بابەتەكێ گرنگ و پێدڤییەكا فەر.
ژ ئالیێ‌ خوە ڤە، مەسرور بارزانی پشتەڤانییا خوە یا تمام بۆ پرۆسەیا ئاشتیێ ل توركیا و ب دووماهیئینانێ ب شەڕ و توندوتیژیێ دوپاتكر و بەرهەڤییا هەرێما كوردستانێ ژی بۆ هەر هاریكاری و هەماهەنگییەكێ نیشا دا».