ئه‌ڤرۆنيوز:
سپێده‌يا ئه‌ڤرۆ چارشه‌مبى 20/12/2017، بيڤه‌له‌رزه‌كێ ل نيزيك هه‌ردو باژێرێن ده‌ربه‌نديخان وهه‌له‌بجه دا وچو زيان په‌يدا نه‌كرن.
ده‌سته‌يا كه‌شناسيێ وبيڤه‌له‌رزان ل عيراقێ راگه‌هاند” ئه‌ڤرۆ سپێدێ بيڤه‌له‌رزه‌ك ب دووريا 12 كيلۆمه‌تران ژ باژێرێ ده‌ربه‌نديخان و 27 كيلۆمه‌تران ژ هه‌له‌بجه روودا”.
دياركر ژى” هێزا وێ بيڤه‌له‌رزێ 3.7 بوو ل دووڤ بيڤه‌رێ ريخته‌ر يێ جيهانى” .
ئاماژه دا ، هه‌تا نوكه چو زيانێن دراڤى وگيانى نه‌هاتينه تۆماركرن.
ئەڤرۆ نیۆز ، زنار تۆڤی:
رۆژناما فاینەشنال تایمز یا بریتانی راپۆرتەک بەلاڤەکریە و تێدا بەرپرسێن بلند یێن كۆمپانیا رۆسنەفت دووپاتکریە کو دێ پابەندبن ب وێ گرێبەستا د وارێ وزێ دا یا ل گەل هەرێما كوردستانێ و ڤەنزوێلا ئەنجادای و جێگرێ رێڤەبەرێ رۆسنەفت گوتیە،دێ ل هەموو پڕۆژێن خۆ یێن ل كوردستانێ بەردەوام بین و دێ پەرەیێ پێ دەین و كوردستان ژ روویێ ئابووری ڤه یا سەرسامە و كوالێتیا نەفت و غازا وێ گەلەک یا بەرزە و بەرهەمئینانا وێ تێچوویەکێ كێم دڤێت.
وێ رۆژنامێ نڤێسیە،پشتی دوپاتكرنێ ژ پابەندبوونێ ب گرێبەستا خۆ د وارێ وزێ دا ل گەل هەرێما كوردستانا عێراقێ، سەرەرای نە جهگیریا دۆخێ سیاسی و توورەیی یا بەغدا، رۆسنەفت دەست ب گرێبەست و وەبەرهێنانێ زێدەتر كریە ل وان دەڤەرێن ململانێ ل سەر هەین.
ئیگور سیتشین سەرۆكێ جێبەجێكارێ كۆمپانیا رۆسنەفت ئاماژە ب هندێ ژی دایە،کو كاركرن ل كوردستانێ و ڤەنزویلا سەركێشیە،ب ئەگەرێ هەبوونا ناكۆكیێن سیاسی و ململانێن زۆر ل ڤان هەردو جهان، بەلێ رۆسنەفت دێ یا بەردەوام بیت ل سەر كارێن خۆ و یا رژدە ل سەر جێبەجێكرنا گرێبەستان ب وی شێوێ بڕیار ل سەر هاتیە دان.
هەروەسا پاڤێل فیۆدۆرۆڤ جێگرێ ئێکێ یێ سەرۆكێ رۆسنەفت دیارکریە،ل كوردستانێ ئەم ب شێوەیەكێ روون بەردەوامین ل سەر كار و پڕۆژێن خۆ و ئەم گەلەک د رژدین ژی ل سەر وان دەرفەتێن مە گرێبەست ل سەر كرین، ئەڤە دەرفەتەکا ب هێزە بۆ ئەوان ژی هەتا ژێرخانا وەبەرهێنانێ ل وارێ وزێ بهێتە دانان.
دیسا فیۆدۆرۆڤ دبێژیت، هەموو پڕۆژێن مە ل كوردستانێ بەرەف پێشڤەچوونێدانە،مە 400 ملیۆن دۆلار د پێنج كێڵگەهێن بەرهەمئینانێ دا خەرج كرینە و مە دەست ب پارەداركرنا پڕۆژێ بۆریا غازێ كریە و پرۆژێ دووبارە نۆژەنكرنا بۆریا نەفتێ كوردستانێ ژی یا بەردەوامە و كار ل سەر دهێتە كرن، ب باوەریا مە كوردستانێ دەسپێشخەریەكا ئابووری یا زۆر سەرسورهێنەر هەیە و یەدەکێ وزەیا وێ كوالێتیەکێ زۆر بەرز هەیە و تێچوونا بەرهەمئینانێ ژی یێ كێمە.
ل سالا 2017 هەرێما كوردستانێ و رۆسنەفت چەند گرێبەستێن نەفتێ ئیمزا كرن، گرێبەستا ئێکێ پێکهاتیە ژ بەرهەمئینان و هناردەكرنا نەفتا كوردستان بۆ پالاوگەهێن رۆسنەفت ل ئەلمانیا، گرێبەستێ دویێ ژی پێکهاتیە ژ دامەزراندنا بۆریا غازا كوردستانێ و وەبەرهێنان ل كەرتێ غازا سروشتیا كوردستانێ ل پێنج كێڵگەهێن وزێدا، هەر چەندە بەغدا چەندین فشار دروست كرینە، داکو رۆسنەفت دەستبەرداری وان گرێبەستێن نەفتێ بیت، بەلێ وێ كۆمپانیێ دووپات ل هندێ کریە کو گرێبەستێن وێ ب هیچ شێوەکێ ل دژی دستوورێ عێراق نینن و دێ یا پابەند و بەردەوام بیت ل کارکرنێ ل دووڤ وان گرێبەستان.
ئه‌ڤرۆنيوز:
به‌رى ده‌مه‌كێ كێم كۆمبوونا هه‌رسێ سه‌رۆكاتيێن عيراقێ ( سه‌رۆكاتيا كۆمار، سه‌رۆكاتيا وه‌زيران، سه‌رۆكاتيا جڤاتا نوونه‌ران) ل گه‌ل سه‌رۆكێن فراكسيۆنێن جڤاتا نوونه‌ران ب دووماهى هات.
هه‌رسێ سه‌رۆكاتيان وسه‌رۆكێ فراكسيۆنێن جڤاتا نوونه‌رات راگه‌هاند” هه‌لبژارتن دێ ل ده‌مێ خوه يێ دياركرى دا هێنه ئه‌نجامدان”.
برياره ل رۆژا 18/5/2018 هه‌لبژارتنێن عيراقێ بهێنه ئه‌نجامدان.
دھۆک، لەزگین جوقی:
رێڤەبەرێ نڤێسینگەھا رزگارکرنا رەڤاندیێن ئێزدی، دیارکر کو چار رەڤاندیێن ئێزدی ئەڤرۆ 20/12/2017 ژ دەستێن تیرۆرستێن داعش ژ وەلاتێ سوریا ھاتنە رزگارکرن و گەھشتنە ناڤ خێزان و کەسوکارێن خوە ل دھۆکێ.
حسێن قائێدی، رێڤەبەرێ نڤێسینگەھا رزگارکرنا رەڤاندیێن ئێزدی، بۆ ئەڤرۆ نیوز دیارکر: “سێ کچ و کورەک ھاتنە رزگارکرن”، گۆتژى: “ئەڤ ھەر چار کەسێن ھاتینە رزگارکرن خەلکێ سیبا شێخدر و سولاغ و کوچو و تل قەسەبن، ئەڤە پتر ژ سێ سالايه د دەستێ تیرۆرستێن داعش دا ئەڤرۆکە رزگار بوون و گەھشتنە دھۆکێ”.
خۆیا ژی کر: “ھەتا نوکە ب پشتەڤانیا نڤێسینگەھا سەرۆکێ حکومەتا ھەرێما کوردستانێ پتر ژ 3220 رەڤاندیان ژ دەستێن تێرۆرستان ھاتینە رزگارکرن”.
ئه‌ڤرۆ نيوز:
رۆژنامه‌يه‌كا سه‌ر ب ئيرانێ ڤه ئاشكه‌ره كر كو عه‌بادى بزاڤێ دكه هه‌رێما كوردستانێ بكه دو پارچه.
لگۆری رۆژنامه‌یا ئه‌خبار یا حزبوللا یا لوبنان كو سه‌ر ب ئیرانێ ڤه‌یه ، ره‌وشا نها یا هه‌رێما كوردستانێ ئالیكاره كو عه‌باده به‌رژه‌وه‌ندییا خوه د پارچه‌كرنا كوردستانێ بجھ بكه.
رۆژنامه‌یێ د هه‌ژمارا خوه یا ئیرۆ ده ل سه‌ر زارێ یێن ب سه‌كرده‌یێن كورد بناڤ كریه گۆت ئه‌ڤ ده‌م یێ هه‌ری گونجاوه كو سه‌ركرده‌یێ پارتیا دیموكراتا كوردستانێ مه‌سعود بارزانی بێت دوورخستن وه‌كو حاله‌ته‌كی سیاسی ، و ژ ئالیه‌كی دن ڤه هه‌رێم ببه دوو پارچه ، هه‌ولێر و سلێمانیێ ، ژبه‌ر سلێمانیێ وه‌كو واقع جودایه ، لگۆری رۆژنامه‌یێ .
هه‌روه‌ها رۆژنامه‌یا ئه‌خبار گۆت دیاره دانوستاندن دناڤبه‌را به‌غدا و هه‌ولێر دوورن و دێ مینن هه‌یا ده‌ستپێكا سالا نوو ، ئه‌ڤ ژی ده‌مه‌كی گونجاوه كو عه‌بادی به‌رژه‌وه‌ندیا خوه پێكبینه و هه‌رێما كوردستانێ پارچه بكه .
ئه‌ڤرۆ نيوز:
ئەڤرۆ سپێدێ 20-12-2017 فەرھاد ئەمین ئەتروشی پارێزگەرێ دھوکێ پێشوازیا (ماتیو نوروایی) بەرپرسێ رێکخراوا سەنێریان پێرس ل کوردستانێ کر.
دھەڤدیتنەکێ دا بەحسێ رەوشا ئاوارە وپەنابەران و ئەو ھاریکاری وخزمەتکاریێن ب رێکا کارگێریا پارێزگەھێ و رێکخراوێن مروڤایەتی بو دھێنە پێشکێشکرن وبەرنامێن سالا 2018یێن ھاریکاریکرنا ئاوارە وپەنابەران ب گشتی ھاتە کرن.
بەرپرسێ رێکخروا سەنێریان پێرس سوپاسیا پارێزگەرێ دھوکێ وسازیێن پەیوەندیدار کر ھەمبەر ھەڤکاریا وان د گەل رێکخراوێ ژبوو ئەنجامدانا بەرنامێن رێکخراوێ و خواست ئەڤ ھەڤکاریە یا بەردەوام بیت بۆ یەکێ باشتر ھاریکاریا ئاوارەیان بھێتە کرن.
پارێزگەرێ دھۆک دەست خوشی ل رێکخراوا سەنێریان پێرس کر و بەرنامێن وان باش سەنگاندن ھەمبەر ئەو خزمەتا پێشکێش دکەن و خواست ھەموو رێکخراو پتر ھاریکاریا ئاوارە و خەلکێ دەڤەرێ بکەن وبەرھەڤیا پارێزگەھێ نیشان دا بۆ ھەر ھەڤکاریەکێ.
ئه‌ڤرۆ نيوز، عه‌زيز هه‌ورامى:
به‌رپرسێ ئه‌منى ل كفرى راگه‌هاند كو ژ ئه‌نجامێ ته‌قه‌كرن ل هێزێن ئه‌منى دو كه‌س ژ هێزێن ئه‌منى ژ لايێ چه‌ند چه‌كداران ب فيشه‌كێ بريندار بووينه.
رائيد عه‌لى جه‌مال ئاخفتنكه‌رێ پۆليسێن گه‌رميان راگه‌هاند ئه‌ڤرۆ رۆژا چارشه‌مبى دو كه‌س ژ وێ هێزێ بريندار بووينه يا بۆ رێگريكرن ل خوه‌نيشانده‌ران ل كفرى هاتيه بنه‌جهكرن.
گۆتژى: “پشتى وێ چه‌ندێ ئێكسه‌ر ئه‌و هه‌ردو كارمه‌ند بۆ نه‌خۆشخانا هه‌ژار ل كه‌لار هاتينه ره‌وانه كرن و ديار بوويه كو چار گوله ب لاشێ وان كه‌فتينه”.
ئه‌ڤرۆ نيوز، عه‌زيز هه‌ورامى:
دو رۆژێن بۆرى ل ناڤه‌ندێن سلێمانى و هه‌له‌بچه و گه‌رمان خوه‌نيشاندانان ده‌سپێكرن و زيانێن مه‌زن گه‌هاندنه مالێن گشتى و پارتيێن سياسى. بزاڤا گۆڕان ژى ل دۆر ڤان خوه‌نيشاندانان بوويه دو پشك.
ئه‌ندامه‌كێ جڤاتا گشتى يا گۆڕان كو ژ به‌ر هه‌ستياريا كاودانان نه‌ڤيا ناڤێ خوه بێژيت بۆ ئه‌ڤرۆ نيوز گۆت: “نوكه بزاڤا گۆڕان د ناڤ خوه دا بوويه دو پشك، كا پشته‌ڤانيا خوه‌نيشاندانان بكه‌ت يان ژى نه‌كه‌ت.
ئه‌ڤى به‌رپرسێ پله بلندێ گۆڕان گۆتژى: “ئه‌و پشكا ل گه‌ل خوه‌نيشاندانان نه‌يى، پێكهاتى نه ژ عومه‌رێ سه‌يد قادر رێكخه‌رێ گشتى يێ بزاڤا گۆڕان و خانه‌يا راپه‌راندنێ كو كورێن نه‌وشيروان مسته‌قاى پشته‌ڤانيا ڤێ به‌ره‌يێ دكه‌ن.
ئاماژه ب وێ چه‌ندێ ژى كر كو ئه‌و پشكا پشته‌ڤانيا خوه‌نيشاندانان ژى دكه‌ن ئه‌و گه‌نجێن ناڤ گۆڕانن كو ب سه‌رۆكاتيا قادرێ حاجى عه‌لى نه ئه‌و به‌رپرسێن سه‌رۆكايه‌تيا تايه‌كێ گرنگ يێ ناڤ گۆڕان دكه‌ن.
خۆيا ژى كر كو عومه‌رێ سه‌يد عه‌لى ژ به‌ر وێ چه‌ندێ پشته‌ڤانيا خوه‌نيشاندانان ناكه‌ت ژ به‌ر كو نه‌وشروان مسته‌فا به‌رى وه‌غه‌ر كه‌ت وه‌سيه‌تا وێ چه‌ندێ كربوو كو خوه ژ حوكمه‌تێ ڤه‌نه‌كێشن، پشته‌ڤانيا خوه‌نيشاندانان نه‌كه‌ن، هه‌كه دروست بوو د پاشه‌رۆژێ دا ب هاريكاريا ئێكه‌تى نشتيمانى و پارتى كار بكه‌ن بۆ دروستكرنا حوكمه‌ته‌كا خزمه‌تگۆزار.
ب بۆچوونا شاره‌زايان د نوكه دا بزاڤا گۆڕأن ئه‌و هێزه كو نه‌شێت د چو قووناغێن خوه دا بڕيارێ بده‌ن ژ به‌ر هه‌بوونا كوتله‌يان د ناڤ وێ بزاڤا سياسى دا.
ئەڤرۆ نیوز، نەوزاد ھلوری:
سەرۆکێ کوریا باکوور کو ب کەسەکێ دکتاتور دھێتە نیاسین بەرپرسەکێ پلە بلند کو ب زەلامێ دوویێ دھاتە نیاسین ژ ئەگەرا پاشئێخستنا تاقیکرنا موشەکەکا ئەتومی سێدارەدا.
لدوڤ نوچەکێ روژنامەیا دەیلی مەیلی یا بەریتانی ئەڤرۆ روژا چوارشەمبی کیم جونگ ئون سەرۆکێ کوریا باکوور کو ژ ئەگەرا پاشئێخستنا تاقیکرنا موشەکەکا نوو ئەوی بەرپرسەکێ پلە بلند سێدارەدا.
ئاماژ ب وێ یەکێ ژی کریە کو ئەو بەرپرس کو ب زەلامێ دوویێ دھاتە نیاسین یێ سەرکەفتی نەبویە ژ تاقیکرنا موشەکا نوو ژ جورێ پونچی ری کو ئێکبویە ژ موشەکێن نوو یێن ئەتومی ، ئەو بەرپرس ژی رێڤەبەرێ نڤیسینگەھا 131 و بەرپرسێ ئێخستنەکار یا بنگەھێ ئەتومی بوویە ل کوریا باکوور.
ئەڤە د دەمەکێ دایە کو پێنج روژ بەریا نھا ژ ئەگەرەکا نەدیار بەرپرسەکێ دن ژی دیار نینە و دھێتە چاڤەرێکرن کو ئەو ژی ھاتیە سێدارەدان.
نيشاندان