ئەڤرۆ نیۆز،زنار تۆڤی:
ئەڤرۆ شەمبیێ 26.8.2017 د سەرەدانەکێ دا وەزیرێ دەرڤە یێ فرنسا جان ئێف لودریان و وەزیرێ بەرەڤانیا فرنسا فلۆرانس بارلی گەهشتنە هەولێرا پایتەختێ هەرێما کوردستانێ.
دهێتە چاڤەرێکرن وەزیرێ دەرڤە و بەرەڤانیا فرنسا کو ئەڤرۆ ل پیرمام ل گەل مەسعود بارزانی سەرۆکێ هەرێما کوردستانێ کۆمببن.
هەروەسا هەردو وەزیرێن دەرڤە و بەرەڤانیا فرنسا، ئەڤرۆ شەمبیێ،سەرەدانا عێراقێ کریە و ل گەل حەیدەر عەبادی، سەرۆک وەزیرێن عێراقێ و بەرپرسێن بلند یێن عێراقێ کۆمبووینە.
ئەڤرۆ نیۆز،زنار تۆڤی:
ھۆشداریەک بۆ بکارھێنەرێن پرۆگرامێ تۆرا پەیوەندیێن (مسنجەرێ فێسبووکی) بەلاڤبوویە،کو تێدا ل ڤەنەکرنا بەستەر (لینک)ەکێ سەختە، ئاگەهدار دکەت.
دوهی ئەینیێ 25/8/2017 میدیایێن تەکنۆلۆژیێن جیھانی ھۆشداریەک بۆ بکارھێنەرێن مسنجەرێ فێسبووکی بەلاڤکریە،کو تێدا بەحسێ هندێ دکەن،کو ھاکەران لینکەکێ سەختە دروستکریە،کو ئەو لینکە ب پەیڤا (bit.ly) ب دوماهی دهێت، دڤی لینکی دا و ھەر جارەکێ ب ناڤ و نیشانەکێ،وان دڤێت بکارھێنەرێن ڤی پڕۆگرامی ھاک بکەن و وێنە و ڤیدیۆ و زانیاریێن وان یێن تایبەت بدزن.
دیسا دیارکریە کو هەکە ھەر لینکەک ژلایێ ھژمارەکا سەختە ڤە بۆتە ھات،یان ژلایێ ھەر کەسەکێڤە بۆتە ھات و نڤێسی بوو:تە گۆژمەکێ زۆر یێ پارەی یێ بری، یان بەحسێ هندێ کربوو،کو مسنجەرێ خوە نوو (Update) بکە،کلیک نەکە،هەروەسا ب لەز ژێ ببە و ھژمارا وی کەسی ژی بلۆک بکە.
پڕۆگرامێ مسنجەر فێسبووک، ل سالا 2011 دا هاتیە کارکرن،نوکە بکارھێنەرەکێ زۆر ل سەرانسەرێ جیھانێدا ھەیە،کۆمپانیا فەیسبووکێ یا ئەمریکی خودانا وێ یە،هەروەسا ب ئێک ژ باشترین پرۆگرامێن تۆرا پەیوەندیان دهێتە دانان.
ئه‌ڤرۆ نيوز:
ل رۆژا 25\8\2017 هولا بنگه‌هێ لالش ل سه‌نته‌رێ ناحیا سنونێ ل ده‌ڤه‌را شنگالێ ودرێ ورسمه‌كێ تایبه‌ت دا ب ئاماده‌بونا اسماعیل محمد احمد هاریكارێ پارێزگه‌رێ دهوكێ بو كاروبارێن مروڤایه‌تی وعبدالقادر شنگالی جێگرێ پارێزگه‌رێ نه‌ینه‌وا و(د.سیریل نان) بالیوزێ وه‌لاتێ ئه‌لمانیا ل به‌غدا و(كورت ستویكل) كونسلێ وه‌لاتێ ئه‌لمانیا ل كوردستانێ وبه‌رپرسێن رێكخراوێن هه‌بیتات وUNDPوUNDSSوچه‌ند به‌رپرسێن حزبی وجه‌ماوه‌ری (562) خانیێن نوژه‌نكرنی راده‌ستی ئاوارێن ڤه‌گه‌ریایی یێن خه‌لكێ ناحیا سنونێ هاتن كرن.
بڤێ هه‌لكه‌فتێ به‌رپرسێ رێكخراوا هه‌بیتات په‌یڤه‌ك خاند وگوت به‌ری سێ سالا داعش هێرش كربو سه‌ر ده‌ڤه‌را شنگالێ وخه‌لكه‌ك كوشت وره‌ڤاند وخانی وێرانكرن وخه‌لك ئاواره‌ی جهێن دی یێن ئارام ببو ، ئه‌ڤرو ئه‌م هاتینه دا به‌لگه‌نامه‌یێن نوژه‌نكرنا 562خانیا راده‌ستی خودانێن وان بكه‌ین دا ببیته هانده‌ر ئاواره ڤه‌گه‌رنه سه‌ر جهێن خو وده‌ست ب ژیانا خو یا روژانه بكه‌ن.
پاش جێگرێ پارێزگه‌رێ نه‌ینه‌وا په‌یڤه‌ك خاند تێدا سوپاسیا حكومه‌تا ئه‌لمانیا وهه‌موو لایه‌نان كر یێن بوینه هاریكار بو نوژه‌نكرنا خانیێن زیانڤێكه‌فتی ل ده‌ڤه‌رێ وخواست ئه‌ڤ به‌رنامه یێ به‌رده‌وامبیت.
پاش اسماعیل محمد احمد هاریكارێ پارێزگه‌رێ دهوكێ بو كاروبارێن مروڤایه‌تی په‌یڤه‌ك پێشكێشكر وسلاڤێن جه‌نابێ پارێزگه‌رێ دهوكێ گه‌هاندنه خه‌لكێ سنونێ وسوپاسیا حكومه‌تا ئه‌لمانیا كر كو ئه‌ڤ 562خانیه ب كوژمێ 2ملیون دولاران نوژه‌نكرینه هه‌روه‌سا دوارێ سیاسی وله‌شكری دا هاریكاریا كوردستانێ وهێزێن پێشمه‌رگه‌ی كریه ، هه‌روه‌سا سوپاسیا رێكخراوێن هه‌بیتات و UNDP كر بو نوژه‌نكرنا وان خانیا وخواست ئه‌ڤ هاریكاریه ]به‌رده‌وامبن تا هه‌موو ئاواره ڤه‌گه‌رنه سه‌ر وارێن خو وداخازكر كو رێكخراوێن دی یێن مروڤایه‌تی قه‌ستا ده‌ڤه‌رێ بكه‌ن وهاریكاریا خه‌لكێ ئاواره بكه‌ن وژخه‌لكێ ده‌ڤه‌رێ ژی خواست كو ل روژا 25-9-2017 قه‌ستا پروسا ریفراندومێ بكه‌ن و سه‌ربخویا كوردستانێ ئه‌رێ بكه‌ن.
پاش نایف سه‌یدو رێڤه‌به‌رێ ناحیا سنونێ دپه‌یڤه‌كێدا سوپاسیا سه‌روك بارزانی وپێشمه‌رگێ كوردستانێ كر كو هه‌ر زوو ناحیا وان ژبن ده‌ستێ تیرورستێن داعش رزگاركر هه‌روه‌سا سوپاسیا هه‌موو لایه‌كی كر كو بوینه هاریكار بو نوژه‌نكرنا وان 562خانیا وداخازكر كو حكومه‌تا ئه‌لمانیا وجڤاكێ ده‌وله‌تی وان پێنچ هزار خانیێن دی یێن وێرانكری ئاڤاكه‌ن وخزمه‌تكاریێن ژیانێ بهێنه دابینكرن .
(د.سیریل نان) بالیوزێ وه‌لاتێ ئه‌لمانیا ل به‌غدا دپه‌یڤه‌كێدا دیاركر وگوت: به‌ری سێ سال وده‌مێ تراجیدیا شنگالێ چێبوی حكومه‌ت وپه‌رله‌مان ئه‌لمانیا هه‌ر زوو بریاردا هاریكاریا خه‌لكێ لێ قه‌ومی بكه‌ت وپتر ژ1500ژن وره‌ڤاندیێن ئێزدی یێن رزگاربوی گه‌هاندنه ئه‌لمانیا بو چاره‌سه‌ریێ هه‌روه‌سا گه‌له‌ك هاریكاریێن دی بو ئاواره وخه‌لكێ ده‌ڤه‌رێ كرن وسوزدا كو حكومه‌تا ئه‌لمانیا یا به‌رده‌وامبیت ل سه‌ر هاریكاریێن خوبو ئاوارا وخه‌لكێ ده‌ڤه‌رێ .
پاش بره‌نگه‌كێ فه‌رمی به‌رپرسێ رێكخراوا UNDPبه‌لگه‌نامه‌یێن نوژه‌نكرنا وان خانیا راده‌ستی رێڤه‌به‌رێ ناحیا سنونێ كرن.
پاش سه‌ره‌دانا چه‌ند خانیێن نوژه‌نكری هاته كرن و به‌لگه‌نامیێن نوژه‌نكرنێ راده‌ستی خودانێن وان هاته كرن.
هه‌ژی گوتنێ یه حكومه‌تا ئه‌لمانیا بو نوژه‌نكرنا وان562 خانیا (2) ملیون دولار ته‌رخانكرنبون وب رێكا رێكخراوێن هه‌بیات وUNDP هاتینه نوژه‌نكرن.
ولدویف ئامارێن ناحیا سنونێ تانوكه 11هزار خێزان ڤه‌گه‌ریاینه سه‌ر مالێن خو ل ناحیا سنونێ.
ئەڤرۆ نیۆز،زنار تۆڤی:
فەرماندێ ئۆپەراسیۆنێن هەڤبەشێن سوپایێ عێراقێ رزگارکرنا 16 گەرەکێن باژێرێ تەلەعفەر ل پارێزگەها نەینەوا رادگەهینیت.
رۆژا شەمبی 26/8/2017 فەرماندێ ئۆپەراسیۆنێن هەڤبەشێن سوپایێ عێراقێ بەیاننامەیەک بەلاڤکریە و راگەهاندیە، کو هژمارەیەکا گەرەکێن کێم ل تەلەعفەر ماینە ل ژێر دەستهەلاتا رێکخراوا تیرۆریستی یا داعشێ.
هەروەسا ئاماژە ب هندێ ژی دایە،کو هێزێن دژە تیرۆرا عێراقی سەنتەرێ تەلەعفەر و کەلها کەڤن و 16 گەرەکێن دیتر یێن وی باژێری رزگار کرینە.
سپێدەهیا رۆژا ئێکشەمبی 20/8/2017 حەیدەر عەبادی، سەرۆک وەزیر و فەرماندێ گشتی یێ هێزێن چەکدارێن عێراقێ دەستپێکرنا ئۆپەراسیۆنا رزگارکرنا تەلەعفەرێ راگەهاند.
ل هەیڤا خزەیرانا 2014 و ل سەردەمێ سەرۆک وەزیرێن عێراقێ نوری مالکی،پشتی شکەستنا سوپایێ عێراقێ،ل باژێرێ حەویجە ل پارێزگەها کەرکووکێ و باژێرێ شنگالێ و زۆربەیا دەڤەرێن پارێزگەها نەینەوا، سەلاحەدین،دیالە و ئەنبار ژلایێ چەکدارێن رێکخراوا تیرۆرست یا داعش ڤە هاتنە داگیرکرن.
ئەڤرۆ نیوز ، نەوزاد ھلۆری:
پشتی کود وھی وەلاتیەکێ دەڤەرا بارزان د رووبارێ زیێ مەزن ل گوندێ ھەمدلا کەفتیە د رووباری دا و خەندقی ئەڤرۆ تەرمێ وی ھاتەدیتن.
دڤی واریدا زنار نەزار وەلاتیەکی َدەڤەرا بارزانە بو ئەڤرۆ نیوز گۆت: ( دوھی وەلاتیەکێ دەڤەرا بارزان کەفتە د رووبارێ زێ مەزن دا و خەندقی ، ئەڤرۆ تەرمێ وی ژلایی َنقومڤانێن ئاکرێ ھاتەدیتن ، پشتی کو بو نەخوشخانا داد ل سوران ھاتیە رەوانەکرن ، بو کەس و کارێن وی ھاتە رادەستکرن)
زێدەتر گۆت: ( ئەو وەلاتی بناڤێ ئەمجەد بابەکر و خەلکێ گوندی َھەمدلایە ل دەڤەرا بارزان وژیی َوی نێزیکێ ٥٥ سالایە و خێزاندارە و زاروک ژی ھەنە)
ئەڤرۆ نیۆز،زنار تۆڤی:
پشتی کو تورکیا نوونەرێ ئێکەتیا نیشتمانی یا کوردستانێ ل ئەنقەرە دەرکری،میدیایێن وێ حزبێ بەلاڤەکریە کو تورکیا ڤیزێ نادەتە وەلاتیێن سلێمانیێ.
ل دووڤ زانیاریێن کونسۆلخانا تورکیا هیچ نڤێسینەکا فەرمی بۆ نڤێسینگەهێن پێدانا ڤیزا تورکیا بۆ کۆمپانیێن گەشتیاری و نڤێسینگەهێن وێ کونسولخانێ ل سلێمانیێ نەهاتینە هنارتن.
عەتا ئەنوەر رێڤەبەرێ کۆمپانی و نڤێسینگەهێن گەشتیاری ل سلێمانیێ بۆ K24 گۆتیە،کو وەلاتیێن سلێمانیێ هیچ کێشەیەک د وەرگرتنا ڤیزێ دا نینە و ئەو دەنگۆیێ هاتیە بەلاڤەکرن ژی بتنێ ل کۆمپانیەکێ هە بوو،کو وێ کۆمپانیێ ژی کێشەکا تەکنیکی هەبوو.
هەروەسا ب ئەگەرێ رەڤاندنا هژمارەکا وەلاتیێن تورکیا ژ لایێ چەکدارێن پەکەکێ ڤە ل سلێمانیێ،کو ل دووڤ دا ڤەگوهاستینە قەندیلی،حوکمەتا تورکیا بریارا دەرکرنا بەهرۆز گەلالی، نوونەرێ ئێکەتیێ ل ئەنقەرە دەرێخست.
ئەڤرۆ نیۆز،زنار تۆڤی:
هەڤوەلاتیەکێ ئوردنی بوویە ئێكەم عەرەب،کو داخوازا رەگەزناما كوردستانێ دکەت و دبێژیت دێ شەرەفمەندبم کو ببمە هەڤوەلاتیەکێ كوردستانێ.
هەڤوەلاتیەکێ ئوردنی ب ناڤێ بیلال غازی قەرعان كو خودان دو زارۆیە و هەلگرێ باوەرناما دكتۆرایێ یە د وارێ كۆمەلناسی دا و مافێ خوەجهیێ ل كوێت و سعوود یێ ژی هەیە،وەكو رێڤەبەرێ كۆمپانیا جیهان ژی كار دکەت.
وی هەڤوەلاتی داخوازکریه کو وەكو ئێكەم عەرەب رەگەزناما كوردستانێ پێ بهێتەدان و هەکە رێ پێ بهێتەدان دێ هەموو ژیانا خوە ل كوردستانێ بورینیت.
ئەڤ هەڤوەلاتیێ عەرەب دبێژیت،بۆ وی دێ شەرەف و خۆشحالیەکا مەزن بیت،كو ئەو ل كوردستانێ خوجهبیت و یێ ئامادەیە وەكو خۆبەخش د سۆپایێ كوردستانێ دا خەبات و بەرگریێ بكەت،هەکە یاسا رێکێ پێ بدەت.
ل دوماهیێ وی هەڤوەلاتی نڤێسییە بژی كوردستانا ئازاد و رێزدار سەرۆك مەسعود بارزانی.
ئه‌ڤرۆ نیۆز،زنار تۆڤى:
عه‌بدولسه‌لام به‌روارى ئه‌و چاڤدێرێ سیاسى و ماموستایێ زانكۆیێ یه بۆ ئه‌ڤرۆ نیۆز دبێژیت:باشكرنا ژیارا خه‌لكێ و چاره‌سه‌ركرنا قه‌یرانا دارایى و لادانا سیسته‌مێ پاشه‌كه‌فتا مووچێ فه‌رمانبه‌ران یا بوویه ئاخفتنا ئێكێ ل سه‌ر ئه‌زمانێ هه‌ر به‌رپرسه‌كێ حزبى و ئه‌ڤ چه‌نده د راگه‌هاندنێن كۆمبوونێن هه‌ڤبه‌ش ژى دا دهێته گۆتن
دیسا هنده‌كان ئه‌ڤ بابه‌ته كریه پێش مه‌رجێ تازه بۆ كاراكرنا په‌رله‌مانى و پشكداریكرن د ریفراندۆم و پرۆسا سه‌ربه‌خۆیێ دا،هه‌روه‌سا هه‌موو ڤێ ئاخفتنێ دكه‌ن،به‌لێ هیچ كه‌سه‌كێ ژ وان به‌حسێ چاوانیا ئه‌نجامدانێ ناكه‌ت،هه‌روه‌سا كه‌سێ داتا و هژمار و پێشنیارێن دیاركرى ژى پێشكێش نه‌كرینه،به‌لێ د ئێك خالدا دهه‌ڤبه‌شن،ئه‌و ژى هه‌سته‌كێ ل ده‌ف خه‌لكێ دروست بكه‌ن،كو د شیانێن پارتى دایه ڤى كارى بكه‌ت،به‌لێ ناكه‌ت و حوكمه‌ت”وه‌سا دهێته نیشاندان،كو حوكمه‌تا پارتیه” و پاره یێ هه‌ى،داهاتێ وێ یێ زێده‌كرى،به‌لێ یا رازى نینه وى داهاتى،بۆ لادانا سیسته‌مێ پاشه‌كه‌فتێ ب كاربینیت.
هه‌روه‌سا عه‌بدولسه‌لامى ئەو ژی گۆتیه:ئه‌و هوكارێ بۆ به‌رده‌وامبوونا حزبێن سیاسى ل سه‌ر ب كارئینانا ڤى بابه‌تى بۆ تۆمه‌تباركرنا پارتى و حوكمه‌تا هه‌رێمێ،ژ نه‌بوونا به‌رنامه‌یه‌كێ دارێژتیێ یێ حوكمه‌تێ یه بۆ چاوانیا روو ب رووبوونا ڤێ هه‌لمه‌تا به‌رده‌وام و هه‌مه‌لایه‌نى بۆ نه‌شرینكرنا حوكمه‌تێ ل به‌ر چاڤێن خه‌لكێ،دیسا جار جاران ئاخفتنه‌ك دهێته گۆتن كو لیژنێن تایبه‌ت و وه‌زاره‌تا دارایى گفتوگۆیێ ل سه‌ر چه‌ند سیناریۆیا دكه‌ن،بۆ هه‌مواركرنا سیسته‌مێ پاشه‌كه‌فتێ،یان ژى لادانا وێ،بێى كو بزانین ئه‌ڤ سیناریۆیه چنه و دێ چ مفا گه‌هیته وه‌لاتیان و دێ كاریگه‌ریا وێ ل سه‌ر ژیارا رۆژانه یا خه‌لكێ یا چاوا بیت؟.
به‌روارى هێشتا دبێژیت:رۆژانه بوهایێ نه‌فتێ و بلندبوونا وێ د ده‌زگه‌هێن راگه‌هاندنێ دا دگه‌هنه خه‌لكێ،هه‌روه‌سا هه‌كه كه‌سه‌كێ ساده و شاره‌زا ژى نه‌بیت،ب ساناهى دشێت بگه‌هیته وێ باوه‌ریێ كو داهاتێ حوكمه‌تێ ل رۆژا په‌یاده‌كرنا سیسته‌مێ پاشه‌كه‌فتێ هه‌تاكو نوكه دوباره بوویه،ئانكو دهێته چاڤه‌رێكرن كو ئه‌گه‌رێ سه‌ره‌كیێ كاركرنا سیسته‌مێ پاشه‌كه‌فتێ،ب لایه‌نێ كێم گوهۆرین ب سه‌ردا هاتبیت و پێدڤیه فه‌رمانبه‌ر ژ زێده‌بوونا داهاتێ حوكمه‌تا هه‌رێمێ د مفادار بن.
وى چاڤدێرێ سیاسى زێده‌تر گۆت:ئه‌ڤه نێزیكى دو سالایه فه‌رمانبه‌ر و خانه‌نشین و كێم ئه‌ندام و…هتد،ملكه‌چى ئیراده‌یا حوكمه‌تا خوه نه و ب نیڤ مووچه‌ى و چارێكا مووچه‌ى ژیانا خوه دبه‌نه سه‌ر،راسته چه‌ندین جارا هه‌ول هاتنه‌دان كو خه‌لك بهێته هاندان ل دژى حوكمه‌تێ،به‌لێ زۆرینه‌یا قوربانیێن سیسته‌مێ پاشه‌كه‌فتێ تێگه‌هشتن هه‌بوویه و ئه‌گه‌رێن سه‌ره‌كى یێن په‌نابرنێ بۆ ڤى سیسته‌مى ژى دزانن،كو برینا بوودجه‌یێ هه‌رێمێ یه ژ لایێ به‌غدا ڤه و دیسا دابه‌زینا بوهایێ نه‌فتێ و شه‌رێ داعش و و هه‌روه‌سا هه‌بوونا نێزیكى دو ملیۆن ئاواره و په‌نابه‌ران بوویه،به‌لێ مافێ وانه ژى ب پرسن،ده‌رباره‌ى داهاتێ رۆژانه و چاڤه‌رێ بن،كو ئه‌ڤ پابوندبوونا وان بهێته خه‌لاتكرن.
هەروەسا عەبدولسەلامی دیارکر ژى:کو ل گه‌ل نێزیكبوونا ده‌مێ ئه‌نجامدانا ریفراندۆمێ و هه‌لبژارتنا په‌رله‌مانێ كوردستانێ،ڤه‌مانا ڤى بابه‌تى ب ڤى ره‌نگى،ئه‌گه‌ره‌كه بۆ ب كارئینانێ ژ لایێ پۆپۆلیست و عێراقچیان و ئه‌وێن ل دژى ریفراندۆمێ و ئه‌وێن وه‌كى وان،ل د ژى حوكمه‌تا هه‌رێمێ و پارتى،له‌ورا ئه‌ركێ حوكمه‌تا هه‌رێمێ یه بهێته پێش و ئه‌گه‌رێن به‌رده‌وامبوونا سیسته‌مێ پاشه‌كه‌فتێ بۆ خه‌لكێ به‌حس بكه‌ت،یان ژى پلانێن خوه بۆ چاره‌سه‌ركرنێ بێخیته به‌رچاڤ،چونكى خه‌لكێ مه ئه‌وا پێدڤى یا كرى ب زێده‌هى ڤه،له‌ورا ده‌مێ وێ چه‌ندێ هاتیه كو حوكمه‌تا وان پاداشتێن وان بده‌تێ.
ئەڤرۆ نیوز ، ھلۆری:
ئێڤارە درەنگی یا ئەڤرۆ کچەکا عەرەب ب مەرەما گەشتوگۆزار سەرەدانا ئاڤا گەلیێ شێرانە ل سنووری َناحیا دێرەلوک کر ، بەلێ د ئاڤێ دا خەندقی و تیمێن نقومڤانێن شێلادزێ ژی شیان تەرمێ وێ دەربینن.
دڤی واریدا رۆژھاد حاجی ژ تیما نقومڤانێن شێلادزێ بۆ ئەڤرۆ نیوز گۆت: ( ئەڤرۆ ئێڤاری ب درەنگڤە ئەم ھاتینە ئاگەھدارکرن لسەر خەندقینا کچەکا عەرەب ب ناڤێ نەجات حسێن کو ژیی َوێ ١٢ سال بوون کو ب مەرەما گەشتوگۆزارێ قەستا ھاڤینگەھا گەلیێ شێرانە کربوو)
زێدەتر گۆت: ( مە تەرمێ وێ ژ ئاڤی َدەرئینا و پشتی ڤەکولین لسەر ئەگەرا خەندقینا وێ ھاتیەکرن ، بو کەس و کارێن وێ ھاتە رادەستکرن)
ئەڤرۆ نیوز ، نەوزاد ھلۆری:
نھا کریارەکا مەزن یا تیرورستی کو دناڤبەرا ٣٠-٤٠ ترومبێلێن TNT کری و چەکدارێن خوکوژ بوون ب شێوەیەکێ بلەز بەر ب سەنگەرێن پێشمەرگەی ڤە دھاتن ل قەزا تەلەعفەر ، بەلێ فروکەیێن ھەڤپەیمانان نەھێلا بگەھنە سەنگەرێن پێشمەرگەی و ھەموو ھاتنە ژ ناڤبرن.
دڤی واریدا نەقیب بێدار زێباری فەرماندەیێ ھێزا پێشمەرگێ ژینگەھێ ل مێحوەرێ سنوورێ قەزا تەلەعفەرتایبەت بۆ ئەڤرۆ نیوز گۆت: ( نھا ھژمارەکا چەکدارێن داعش کو ھەموو خوکوژ بوون و ب ٣٠ – ٤٠ ترومبێلێن TNT کری ڤە بەر ب سەنگەرێن پێشمەرگەی ل سنوورێ قەزا تەلەعفەر ڤە بلەز دھاتن ، و ب زوترین دەم فروکێن ھەڤپەیمانان ھاتنە ئاگەھدارکرن و نھا فروکێن ھەڤپەیمانان ب دژواری بوردومان دکەت و ھەموو ەو ترومبێل و خوکوژ ھاتنە ژناڤبرن و کریار و پلانا وان ھاتنە ژ ناڤبرن )
زێدەتر گۆت: ( مەرەما وان ئەو بو بگەھنە سەنگەرێن پێشمەرگەی و خوە ب پێشمەرگەیان ڤە ب تەقینن و رێکێ ڤە بکەن کو چەکدارێن دن یێن داعش بگەھنە سوریا و خوە ل وان دەڤەرا ب تایبەتی ناحیا عیازی ڤەشێرن بەلێ سوپاس بو خودێ ب ھەڤکاریا ھێزێن پێشمەرگەی و فروکێن ھەڤپەیمانان ئەو کریار ھاتە ژناڤبرن)
ل گورەی ئاخفتنێن زێباری نھا رەوشا دەڤەرێ ئارامە و چوو زیان نەگەھشتینە پێشمەرگەی.
نيشاندان