ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل جینین پلاسخارت نوونه‌را تایبه‌ت یا سكرتێرێ گشتیێ نه‌ته‌وێن ئێكگرتی ل ئیراقێ كر.

د كۆمبوونه‌كێ دا دانوستاندن ل دۆر دووماهی پێشهاتێن ئیراقێ و پرۆسا هه‌لبژارتنێن جڤاتا نوونه‌رێن ئیراقێ هاته‌ كرن و رۆلێ چاڤدێرێن نێڤده‌وله‌تی و نه‌ته‌وێن ئێكگرتی، د پشته‌ڤانیكرن و سه‌رخستنا پرۆسا هه‌لبژارتنان ب بلندی هاته‌ نرخاندن.

هه‌ردولایه‌ن د خوازیار بوون كو حوكمه‌تا داهاتی یا ئیراقێ، حوكمه‌ته‌كا گشتگیر بیت و بێ جوداهی خزمه‌تا هه‌موو پێكهات و وه‌لاتیێن ئیراقێ بكه‌ت.

ئه‌ڤرۆ:

ب سه‌رپه‌رشتیا سه‌رۆك بارزانی، كۆمبوونا مه‌كته‌با سیاسی كو یا تایبه‌ت بوو ب قۆناغا دووماهی هاتنا پرۆسا هه‌لبژارتنێن پێشوه‌خت یێن جڤاتا نوونه‌رێن ئیراقێ هاته‌ ئه‌نجامدان.

ل ده‌ستپێكێ كۆمبوونێ پیرۆزباهی ل خه‌لكێ كوردستانێ ب گشتی كر، بۆ پشكداریا وان یا شارستانی د پرۆسێ دا كو ب شێوه‌كێ دیموكراسیانه‌ و ئاشتیانه‌ ب رێڤه‌چوو، هه‌ڤده‌م ب چاڤ ڤه‌كری و رێزگرتن ل پارێزه‌رێن به‌رژه‌وه‌ندیێن بلند یێن نه‌ته‌وی و نیشتمانی، باوه‌ری دایه‌ به‌ربژار و لایه‌نان و پشته‌ڤانی ل وی ئاراسته‌ی كر كو ل قۆناغێن بۆری خه‌مخۆرێ بده‌ستڤه‌ئینانا مافێن وان ب بوو و نوكه‌ و د پاشه‌رۆژێ دا ژی دێ ده‌ستكه‌فت و مافێن وان پارێزیت و بیر و بۆچوونێن واقعبینانه‌ هه‌ین بۆ حوكمرانیا ئیراقێ ل سه‌ر پرنسیبێن هه‌ڤپشكیێ و سازانێ و هه‌ڤسه‌نگیێ، هه‌روه‌سا ل بده‌ستڤه‌ئینانا ئارمانجێن پێكهاتێن نه‌ته‌وی و ئایینی و بجهئینانا هه‌موو برگێن دستووری و دابینكرنا ژیانه‌كا هه‌ژی ژ روویی ئیداری و ئابووری و ئه‌منی ڤه‌. ژ ڤێ روانگه‌هێ ژی پارتی گاڤێن پێدڤی یێن داهاتی بۆ هه‌ماهه‌نگیێ و لێك تێگه‌هشتنێ و هه‌ڤپه‌یمانیان ڤه‌خوینیت، ب شێوه‌كی كو د خزمه‌تا وه‌لاتیێن ئیراقێ ب گشتی و كوردستانێ ب تایبه‌تی دابیت.

كۆمبوونێ سوپاس و پێزانینێن خوه‌ یێن تایبه‌ت بۆ جه‌ماوه‌ر و كادر و ئه‌ندامان و خه‌لكێ خۆراگری سنوورێ كه‌ركووكێ، شنگالێ، خانه‌قینێ، مه‌خمووری، زووماری، ده‌شتا نه‌ینه‌وا و هه‌موو ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ده‌ربری ل به‌رامبه‌ر پشته‌ڤانیا وان یا مه‌زن و باوه‌ریا دایه‌ به‌ربژارێن پارتی.

هه‌روه‌سا كۆمبوونێ سوپاس و پێزانین هه‌بوون بۆ به‌رپرس و كادر و ئه‌ندام و جه‌ماوه‌رێ سنوورێ گشت ئۆرگانێن پارتی ل جڤاتێن سه‌ركردایه‌تیا پارتی ل پارێزگه‌هان، لقان، لژنێن ناوچان، رێكخراوان، بنكان و رێكخراوێن جه‌ماوه‌ری و پیشه‌یی كو ب دلسۆزی و نه‌وه‌ستیان بزاڤ بۆ سه‌رخستنا پرۆسێ و سه‌ركه‌فتنا به‌ربژاران دكر.

كۆمبوونێ سوپاسیا دلسۆزی و بزاڤێن هه‌موو هه‌ڤالێن مه‌ كر، ل سه‌رۆكایه‌تیا هه‌رێمێ و حوكمه‌تێ و په‌رله‌مانی و پێشمه‌رگێن قه‌هره‌مان و داموده‌زگه‌هێن ئه‌منی كو ب ل به‌رچاڤ وه‌رگرتنا رێنمایێن كۆمسیۆنا بلند یا سه‌ربخوه‌ یا هه‌لبژارتنان، هاریكارێن باش یا سه‌رخستنا پرۆسێ بوون و ب دلسۆزی كار بۆ سه‌رخستنا به‌ربژاران دكر.

هه‌ڤده‌م كۆمبوونا مه‌كته‌با سیاسی یا پارتی سوپاس و ده‌ستخوه‌شیێن گه‌رم هه‌بوون بۆ هه‌ڤالێن لژنا بلند یا هه‌لبژارتنان و لژنێن لاوه‌كی و ئۆرگانێن پارتی ل مه‌كته‌بێن رێكخستن، په‌یوه‌ندی، كارگێری و دارایی، دیراسات و ڤه‌كۆلین و ئه‌كادیمیا پارتی، ده‌زگه‌هێ هه‌لبژارتن، ده‌سته‌یا رێكخراوێن جه‌ماوه‌ری و پیشه‌یی، ده‌زگه‌هێ ره‌وشه‌نبیری و راگه‌هاندنێ ب هه‌موو كه‌نالێن رادیۆ و ته‌له‌ڤزیۆن و رۆژنامه‌ و كۆڤار و مالپه‌ران و كادر و هه‌ڤالێن خوین گه‌رم یێن تۆرێن جڤاكی و سۆشیال میدیایێ و ئێك ب ئێك به‌ربژارێن پارتی، هه‌روه‌سا سوپاسیا چاڤ ڤه‌كری و خه‌مخۆریا چاڤدێرێن سه‌ر سندووقان و ویستگه‌هێن ده‌نگدانێ و سوپاسیا ئێك ب ئێك یێن مالباتێن سه‌ربلندێن شه‌هیدان و وی جه‌ماوه‌رێ وه‌فادار كر كو ب هه‌ر جۆره‌كی پشكداربوون د بده‌ستڤه‌ئینانا ڤێ سه‌ركه‌فتنا مه‌زن دا.

هه‌ڤالێن خه‌باتكه‌ر، وه‌لاتیێن به‌رێز …

ئیراق یا د قۆناغه‌كا هه‌ستیار دا ده‌رباز دبیت و بۆچوونا پارتیا مه‌ ئه‌وه‌ حوكمرانیا ئیراقا فیدرال پێدڤی ب رێكخستنه‌كا سه‌رده‌میانه‌ هه‌یه‌ بۆ وێ چه‌ندێ بشێت ل ئاستێ حه‌ز و خواستێن هه‌موو پێكهاتان دابیت و كێشێن هه‌لاویستی چاره‌سه‌ر بكه‌ت، چاره‌سه‌ریا كێشان ژ روانگه‌هێ دستووری دێ بیته‌ ئه‌گه‌رێ سه‌قامگیریێ و ئاشتیا جڤاكی، ب تایبه‌تی بجهئینانا مادێ 140 ژ دستووری و ئێكلاكرنا هه‌موو كێشێن نه‌هاتینه‌ چاره‌سه‌ركرن دناڤبه‌را حوكمه‌تا فیدرال و حوكمه‌تا هه‌رێما كوردستانێ دا، بۆ وێ مه‌به‌ستێ ژی ئێكرێزی و ته‌باییا ناڤخوه‌یا كوردستانێ یا پێدڤیه‌ و پێكڤه‌ كاركرن و پاراستنا به‌رژه‌وه‌ندیێن مه‌ یێن نه‌ته‌وی و نیشتمانی یێن بلند و بده‌ستڤه‌ئینانا مافێن بده‌ستڤه‌ نه‌هاتی ئه‌ركێ هه‌موویانه‌.

ئه‌ڤرۆ:

دوهی چار سال ب سه‌ر خیانه‌تا 16 ئۆكتوبه‌را 2017 ده‌ربازبوون، ئه‌و خیانه‌تا بوویه‌ ئه‌گه‌رێ شه‌هیدبوون و برینداربوونا هژماره‌كا پێشمه‌رگه‌ و وه‌لاتیێن ئاكنجیێن ده‌ڤه‌رێن كوردستانی یێن ده‌رڤه‌ی ئیدارا هه‌رێمێ، ژبلی وان زیانێن مادی ئه‌وێن تووشی وه‌لاتیێن كورد ل وان ده‌ڤه‌رێن هاتینه‌ داگیركرن بووین، زێده‌تر ژ 200 هزار وه‌لاتی ژی ئاواره‌ی هه‌رێما كوردستانێ بوون، كو هه‌تا نوكه‌ پشكه‌ك ژوان نه‌زڤرینه‌ جهێن خوه‌ و نه‌هاتینه‌ قه‌ره‌بووكرن ژی.

گریا پێشمه‌رگه‌كێ كوردستانێ دوێ رۆژێ دا، كو روندك و هه‌ناسا سار د خه‌ما وێ خیانه‌تا بوویه‌ ئه‌گه‌رێ ژده‌ستدانا 51% ژ ئاخا كوردستانێ، تێكهه‌لبوون، ئه‌و پارچه‌یا وه‌لاتی كو ل شه‌رێ دژی داعشێ ب خوین و قوربانیدانا هزاران پێشمه‌رگان ژ ده‌ستێ چه‌كدارێن داعشێ هاتینه‌ ئازادكرن و پاراستن.

چار سال ب سه‌ر روودانێن 16 ئۆكتۆبه‌رێ ده‌رباز دبن كو گرۆپه‌كا دناڤ ئێكه‌تی نیشتمانی كوردستان دا، ب رێككه‌فتن ل گه‌ل گرۆپێن میلیشیێن ئیراقی دژی به‌رژه‌وه‌ندیێن هه‌رێما كوردستانێ رێككه‌فتن و بوو ئه‌گه‌رێ هێرشكرنێ ل سه‌ر ده‌ڤه‌رێن كوردستانێ یێن ده‌رڤه‌ی ئیدارا هه‌رێمێ، د وێ رۆژێ دا باژێرێن كه‌ركووكێ و خورماتوو و خانه‌قین و رووبه‌ره‌كێ به‌رفرهه‌ ژ كوردستانێ ژلایێ گرۆپێن میلیشیان و ب پشته‌ڤانیا لایه‌نێ ده‌ره‌كی ده‌ست ب سه‌ر دا هاته‌ گرتن.

ل 16 ئۆكتۆبه‌رێ ب سه‌دان وه‌لاتی شه‌هید و بریندار بوون و نێزیكی 200 هزار كه‌س ژی ئاواره‌ی هه‌رێما كوردستانێ بوون، كو پشكه‌كا مه‌زن ژێ هه‌تا نوكه‌ نه‌زڤرینه‌ جهێن خوه‌، ژبلی پشكه‌كا مه‌زن ژ خانی و مالێن وه‌لاتیێن كورد هاتنه‌ ژناڤبرن و سوتن، ب گۆره‌ی ئامارێن رێكخراوا جه‌ماوه‌رێ خورماتوو ل 16 ئۆكتۆبه‌رێ و رۆژێن د دووڤدا، 88 خانی هاتنه‌ ژناڤبرن و زێده‌تر ژ 300 خانیان ژی هاتنه‌ سوتن و دو هزار و 500 مال ژی هاتنه‌ تالانكرن، دو بازارێن مه‌زن یێن قه‌زا خورماتوو ژی پشتی تالانكرنا وان ب تمامی هاتن سوتن.

هه‌روه‌سا ل كه‌ركووكێ و چه‌ند ده‌ڤه‌رێن دی باره‌گایێن حزبێن سیاسی ب تایبه‌تی باره‌گایێن پارتی هاتن تالانكرن و سوتن.

دو رۆژان پشتی 16 ئۆكتۆبه‌رێ، كۆسره‌ت ره‌سول، سه‌رۆكێ جڤاتا بلندا سیاسی و به‌رژه‌وه‌ندیێن ئێكه‌تی نیشتمانی كوردستان یێ نوكه‌، كو وی ده‌می جێگرێ ئێكێ یێ سكرتێرێ گشتیێ ئێكه‌تیێ بوو د په‌یامه‌كێ دا راگه‌هاند” كاره‌ساتێن كه‌ركووكێ و خورماتوو د ستوویێ كالفامێن دناڤ ئێكه‌تیێ دایه‌”.

به‌لێ پێشمه‌رگێ كوردستانێ ل 20 ئۆكتۆبه‌را 2017 ل پردێ و سحێلا سنووره‌ك ل به‌رده‌م هێرشێن میلیشیێن حه‌شدا شه‌عبی دانا و داستانه‌كا خۆراگریێ و دیرۆكی تۆماركر و دووماهی ب هێرشێن وان ل سه‌ر هه‌رێما كوردستانێ ئینا.

ئه‌ڤرۆ كو چار سال ب سه‌ر وێ خیانه‌تا دیرۆكی دا ده‌رباز دبن، هه‌تا نوكه‌ نه‌ نه‌ته‌وێن ئێكگرتی و نه‌ لژنێن دووڤچوونا راستیێن وێ نه‌هامه‌تیێ ب ئه‌گه‌رێ كاره‌ساتێن وێ روودانێ بێ ده‌نگی ل ئاستێ زیانێن گیانی و مادی یێن گه‌لێ كوردستانێ ل وان ده‌ڤه‌ران دیاركریه‌، به‌لێ ل دووماهیێ وه‌لاتیێن كورد ئه‌و بێده‌نگی شكاند و ل 10 ئۆكتۆبه‌را 2021 ل ده‌نگدانا گشتی یا هه‌لبژارتنێن پێنجه‌مین خۆلا جڤاتا نوونه‌رێن ئیراقێ تۆلا خوه‌ ڤه‌كر و ده‌نگ ب وان نه‌دا ئه‌وێن ده‌ست د وێ خیانه‌تێ دا هه‌ی و ئه‌و سزادان.

ئه‌ڤرۆ:

ب هه‌لكه‌فتا سه‌ركه‌فتنا پرۆسا هه‌لبژارتنێن ئیراقێ و سه‌ركه‌فتنا پارتی دیموكراتی كوردستان د وان هه‌لبژارتنان دا، سه‌رۆك بارزانی په‌یامه‌ك به‌لاڤكر و تێدا پیرۆزباهی ل گه‌لێ كوردستانێ و هه‌موو كادر و ئه‌ندام و لایه‌نگرێن پارتی كر.

ده‌قێ په‌یاما سه‌رۆك بارزانی:

ب هه‌لكه‌فتا سه‌ركه‌فتنا پرۆسا هه‌لبژارتنێن جڤاتا نوونه‌رێن ئیراقێ و سه‌ركه‌فتنا پارتی دیموكراتی كوردستان د وان هه‌لبژارتنان دا پیرۆزباهیێ ل گه‌لێ كوردستانێ دكه‌م.

پیرۆزباهیێ ل كادر و ئه‌ندام ولایه‌نگرێن پارتی دكه‌م كو شیاین د هه‌ڤركیه‌كا مه‌ده‌نی و ئارام دا سه‌ركه‌فتنه‌كا مه‌زن بۆ پارتی مسۆگه‌ر بكه‌ن و گیانێ شه‌هیدان ئارام بكه‌ن. سه‌ركه‌فتنا پارتی د وان هه‌لبژارتنان دا ب رامانا سه‌ركه‌فتنا پره‌نسیب و بها ووان بنه‌مانه‌ كو گه‌لێ كوردستانێ خه‌بات بۆ كری و په‌یامه‌كه‌ بۆ هه‌موو لایه‌كی كو گه‌لێ كوردستانێ د هیچ ره‌وشه‌كێ دا ده‌ستبه‌رداری دیرۆك و بهایێن خوه‌ نابیت، پێدڤیه‌ ئه‌و سه‌ركه‌فتنا پارتی ببیته‌ ئه‌گه‌رێ وی چه‌ندێ به‌رپرس و كادر و ئه‌ندامێن پارتی زێده‌تر خزمه‌تا خه‌لكی بكه‌ن و به‌رده‌وام ئه‌و شیره‌تا بها یێ بارزانیێ نه‌مر ل بیرا وان بیت ئه‌وژی (ل سه‌ركه‌فتنا مه‌غروور نه‌بن و ل شكه‌ستنا بێ ئومێد نه‌بن).

هه‌ر ب ڤێ هه‌لكه‌فتێ سوپاسیا كۆمسیۆنا بلند یا هه‌لبژارتنان و ده‌زگه‌هێن ئه‌منی و هه‌موو لایه‌نێن په‌یوه‌ندیدار یێن هه‌رێما كوردستانێ و ئیراقا فیدرال دكه‌ مكو ب وه‌ستیانا وان بوو ئه‌گه‌رێ سه‌ركه‌فتنا پرۆسا هه‌لبژارتنێن جڤاتا نوونه‌رێن ئیراقێ و ده‌ستخوه‌شیێ لێ دكه‌م، هه‌روه‌سا رۆلێ به‌رێز مسته‌فا كازمی سه‌رۆكێ وه‌زیران د ئه‌نجامدانا هه‌لبژارتنان دا ب بلند دنرخینین.

سه‌ركه‌فتنا پرۆسا هه‌لبژارتنان سه‌ركه‌فتنا ئیرادا ملله‌تی یه‌ و سه‌ركه‌فتنا دیموكراسیێ یه‌، له‌وما هیڤیدارم پشتی هه‌لبژارتنان لایه‌نێن كوردستانێ د ئێكرێز و تمامكارێن هه‌ڤدوو بن، هیڤیدارم هه‌موو لایه‌ن پێكڤه‌ و بۆ ئێك ئارمانجا هه‌ڤپشك و ژ پێخه‌مه‌ت به‌رژه‌وه‌ندیێن بلند یێن كوردستانێ و به‌رگریكرن ژ ماف و ده‌سكه‌فتێن گه‌لێ كوردستانێ كار بكه‌ن و ل سه‌ر بنه‌مایێ هه‌ڤپشكیا راسته‌قینه‌ په‌یوه‌ندیێن هه‌رێما كوردستانێ و ئیراقا فیدرال بهێنه‌ ئاڤاكرن.

جاره‌كا دی سوپاس بۆ گه‌لێ كوردستانێ و سوپاسیه‌كا تایبه‌ت بۆ خوه‌شك و برایێن خۆراگر و خودان بیروباوه‌ر ل كه‌ركووكا دلێ كوردستانێ.

ئه‌ ڤرۆ:

سه‌رۆكێ هه‌رێما كوردستانێ ل دۆر سه‌ ركه‌ فتنا هه‌ لبژارتنێن پێشوه‌ خت یێن جڤاتا نوونه‌رێن ئیراقێ، په‌ یامه‌ ك به‌ لاڤكر و تێدا راگهه‌اند، ئێدی ئیراق و هه‌رێما كوردستانێ د قۆناغه‌كا نوو دانه‌.گۆت ژی پێدڤیه‌ ئه‌م هه‌موو پێگڤه‌ خوه‌ بۆ ئه‌رك و به‌رپرسیاره‌تیا هه‌ڤپشك و پێشهاتێن قۆناغا داهاتی به‌ رهه‌ڤ بكه‌ ین.

نێچیرڤان بارزانی، سه‌ رۆكێ هه‌رێما كۆردستانێ، د په‌یاما خۆه‌ دا ئاماژه‌ ب وێ چه‌ندێ كر كو ئه‌ ركێ هه‌ موو هێز ولایه‌نێن سیاسی یێن كوردستانێ یه‌، پێگڤه‌ د ته‌با و ئێكرێز بن، كاری بۆ نوكه‌ و پاشه‌رۆژه‌كا  باشتر بۆ هه‌ رێما كوردستانێ و ئیراقێ بكه‌ین، بۆ ڤێ مه‌به‌ستێ ژی دێ ل گه‌ل هێز و لایه‌نێن ئیراقی د هه‌ڤكار بین.

ده‌قێ په‌ یاما نێچیرڤان بارزانی، سه‌رۆكێ هه‌ رێما كوردستانێ…

وه‌لاتیێن خوه‌شتڤی.. هێز و لایه‌نێن سیاسی ل هه‌رێما كوردستانێ و ئیراقێ.. پیرۆزباهیا سه‌ركه‌فتنا هه‌لبژارتنێن گشتی یێن جڤاتا نوونه‌رێن ئیراقێ ل هه‌موو لایه‌كی دكه‌م، ئێدی ئیراق وهه‌رێما كوردستانێ یێن د قۆناغه‌كا نوو دا و ئه‌نجامێن دووماهیێ هه‌ر چاوان ئێكلا ببن، ئه‌م هه‌موو د سه‌ركه‌فتی نه‌، پێدڤیه‌ ئه‌م هه‌مو پێگڤه‌ خوه‌ بۆ ئه‌رك و به‌رپرسیاره‌تیا هه‌ڤپشك و پێشهاتێن قۆناغا داهاتی به‌رهه‌ڤ بكه‌ین، ئێكرێزی، ته‌بایی و پێگڤه‌یی، كلیلا سه‌ركه‌فتنا مه‌یه‌ كو ده‌سته‌به‌ریا مافێن دستووری یێن هه‌رێما كوردستانێ دكه‌ت، ده‌ستكه‌فت و سیسته‌مێ فیدرالی و قه‌وارێ  وێ یێ سیاسی دپارێزیت، ئه‌ ركێ هه‌موو هێز ولایه‌نێن سیاسی یێن كوردستانێ یه‌، پێگڤه‌ ته‌با و ئێكرێز كاری بۆ نوكه‌ و پاشه‌رۆژه‌كا باشتر بۆ هه‌رێما كوردستانێ و ئیراقێ بكه‌ین، بۆ ڤێ مه‌به‌ستێ ژی دێ ل گه‌ل هێز لایه‌نێن ئیراقی د هه‌ڤكار بین.

ئه‌ركێ هه‌موو هێز  ولایه‌نێن سیاسی یێن ئیراقێ ئه‌وه‌ ب روانگه‌ و خواندن و تێگهه‌هشتنه‌كا نوو و واقعبینانه‌ ب مفا وه‌رگرتن ژ ئه‌زموون و شاشیێن بۆری ل سه‌ر بنه‌مایێ دستووری كێشێن وه‌لاتی چاره‌سه‌ر بكه‌ین. كاری بۆ ئیراقه‌كا سه‌قامكیر وخوه‌شگوزه‌ران بكه‌ین كو تێدا مافێن دستووری یێن هه‌موو پێكهاتان دمسۆگه‌ر وپاراستی بن، باوه‌ری، پێگڤه‌یی، هه‌ڤچاره‌نڤیسی، هاریكاریا هه‌ڤپشك، به‌رژه‌وه‌ندیا گشتی یا وه‌لاتی، هه‌ڤپشكیا راسته‌قینه‌، سازان و یه‌كسانی، دێ مه‌ هه‌موویان كۆم كه‌ت.

سوپاسیا وه‌لاتیان، هه‌موو هێز ولایه‌نێن سیاسی، داموده‌زگه‌هێن ئیداری و ئه‌منی، میدیا و جڤاكێ مه‌ده‌نی دكه‌م كو ل سه‌رخستنا هه‌لبژارتنان دا د هاریكار بوون. سوپاس و ده‌ستخوه‌شی بۆ ئه‌رك و ماندیبوونا كۆمسیۆنا بلند یا سه‌ربه‌خوه‌ یا هه‌لبژارتنێن ئیراقێ، بۆ چاڤدێرێن ناڤخوه‌یی و بیانی و تیمێن نه‌ته‌وێن ئێكگرتی ب تایبه‌تی سه‌رۆك و تیما یوونامی ل ئیراقێ و ئێكه‌تیا ئه‌وروپا و كۆمكارا ئه‌ره‌بی كه‌ چاڤدێریا پرۆسا ده‌نگدانێ كری و پرۆسه‌ ب ئارامی ب ڕێڤه‌ چووی. ئه‌ڤه‌ گاڤه‌كا  گرنگه‌ ل سه‌ر رێیه‌كا راست.

پشكداریا مه‌ د هه‌لبژارتنێن نوێنه‌رێن مه‌ ل به‌غدا، پێگیریا مه‌یه‌ ب بنه‌مایێن دیموكراسیێ، ژ لایه‌كی دی ڤه‌ رێژا پشكداریێ د ده‌نگدانێ دا په‌یامه‌كا رۆهن یا وه‌لاتیانه‌ كو چاڤێ وان یێ ل ژیان و گوزه‌ر‌ان و خزمه‌تگوزاریێن زێده‌تر و ئه‌ڤه‌ مافێ وانه‌. ئه‌ڤه‌ بۆمه‌ هه‌موومان ل حوكمه‌تێ و هێز ولایه‌نێن سیاسی یێن ئیراقێ و هه‌رێما كوردستانێ، پێدڤیه‌ ببیته‌ په‌ند و وانه‌ك بۆ پێداچوونه‌كا جدی و ئاڤاكرنا باوه‌ریێ، هه‌روه‌سا ببیته‌ هانده‌رێ كار و خزمه‌تا زێده‌تر.

ئێدی ده‌مێ وێ چه‌ندێ یه‌ پێكڤه‌ كار بكه‌ین بۆ دامه‌زراندنا حوكمه‌ته‌كا نیشتمانی فیدرالی كو ره‌نگڤه‌دانا خواست و چاڤه‌رێبوونا وه‌لاتیان بیت، دستووری بجهبینیت، ده‌زگه‌هێن ده‌وله‌تێ ب هێز بكه‌ت، گرۆپ و هێزێن ده‌رڤه‌ی قانوونێ كونترۆل بكه‌ت، ل سه‌ر بنه‌مایێ دستووری و هه‌ڤپشكیێ هه‌موو پێكهاتێن ئیراقێ، پرۆسا سیاسی راست بكه‌ت به‌ر ب پاشه‌رۆژه‌كا باشتر بۆ هه‌موویان، وه‌لاتی ب رێڤه‌ببه‌ت.

ئه‌ڤرۆ:

هیڤیدارم ئه‌م هه‌موو پێكڤه‌ كار بكه‌ین بۆ بجهئینانا هه‌موو ب ده‌ستڤه‌ئینانا سه‌قامگیریا سیاسی و ئابووری و ئه‌منی و هه‌ڤپشكیا راسته‌قینه‌ ل سه‌ر ئاستێ ئیراقێ

ب هه‌لكه‌فتا سه‌ركه‌فتنا پرۆرسا هه‌لبژارتنێن پێشوه‌خت یێن جڤاتا نوونه‌رێن ئیراقێ و سه‌ركه‌فتنا پارتی دیموكراتی كوردستان د وان هه‌لبژارتنان دا، مه‌سرور بارزانی په‌یامه‌كا پیرۆزباهیێ به‌لاڤكر و ئه‌ڤه‌ ژی ده‌قێ وێ یه‌ …

ب هه‌لكه‌فتا سه‌ركه‌فتنا به‌رچاڤ یا پارتی دیموكراتی كوردستان د هه‌لبژارتنێن جڤاتا نوونه‌رێن ئیراقێ دا، گه‌رمترین پیرۆزباهیان ل سه‌رۆك بارزانی، سه‌ركردایه‌تی و ئه‌ندام و لایه‌نگرێن پارتی و هه‌موو خه‌لكێ كوردستانێ دكه‌م، ب تایبه‌تی پیرۆزباهیێ ل  سه‌ركه‌فتنا نوونه‌رێن كورد ل كه‌ركووكا دلێ كوردستانێ دكه‌م كو جاره‌كادی سه‌لماند كو پێناسا كه‌ركووكێ كوردستانیه‌.

سه‌ركه‌فتنا به‌ربژارێن پارتی دیموكراتی كوردستان ل كه‌ركووكێ ب وێ رێژا بلند، ئاماژه‌یه‌ بۆ وه‌فاداریا خه‌لكێ كه‌ركووكێ بۆ رێبازا پیرۆزا بارزانی و به‌رخودانێ و كوردایه‌تیێ.

سوپاسیا خوشك و برایێن ئێزدی دكه‌م كو ل ده‌ڤه‌رێن خوه‌ و ب تایبه‌تی ل ده‌ڤه‌را شنگالێ، پشته‌ڤانیا خوه‌ یا ب هێز بۆ پارتی دووپاتكر كو ب پشتراستی ڤه‌، پارتی ژی وه‌كو به‌رده‌وام دێ به‌ره‌ڤانا ب هێز یا مافێن وان بیت.

هه‌روه‌سا پیرۆزباهیێ ل لایه‌نێن سه‌ركه‌فتی یێن دی یێن هه‌لبژارتنان دكه‌م و هیڤیدارم ئه‌م هه‌موو پێكڤه‌ بشێین ژ پێخه‌مه‌ت به‌رژه‌وه‌ندیێن بلند یێن گه‌ل و نیشتمانی كار بكه‌ین بۆ بجهئینانا هه‌موو دستووری و ب ده‌ستڤه‌ئینانا سه‌قامگیریا سیاسی و ئابووری و ئه‌منی و هه‌ڤپشكیا راسته‌قینه‌ ل سه‌ر ئاستێ ئیراقێ دا، ب ئارمانجا ب هێزتركرنا په‌یوه‌ندیێن هه‌رێما كوردستانێ و حوكمه‌تا فیدرالی.

ئه‌ڤرۆ، هۆشه‌نگ تاجر:

چاڤدێرێن سیاسی یێن رۆژهه‌لاتێ كوردستانێ دیار دكه‌ن كو ئه‌نجامێن هه‌لبژارتنێن ئیراقێ نیشا دده‌ن كو خه‌لكێ ئیراقێ ل دژی ده‌ستێوه‌ردانێن ئیرانێ نه‌ و هه‌روه‌سا سه‌ركه‌فتنا پارتی د هه‌لبژارتنان دا بۆ هه‌موو كوردان گرنگه‌ و دێ پێگه‌هێ‌ كوردان بهێزتر لێ هێت.

سادق فه‌رهادی چاڤدێرێ سیاسی یێ رۆژهه‌لاتێ كوردستانێ بۆ ئه‌ڤرۆ دیار كر كو هه‌لبژارتنێن په‌رله‌مانێ ئیراقێ نه‌ تنێ بۆ ئیراقیان به‌لكو بۆ ئیرانێ ژی گه‌له‌ك گرنگ بوو، چونكو ئیران چاڤه‌رێ بوو گرۆپێن سه‌ر ب وێ د هه‌لبژارتنان دا سه‌ركه‌فتنه‌كا مه‌زن تۆمار بكه‌ن دا ئیران بشێت پتر پێگه‌هێ خوه‌ ل ئیراقێ بهێز بكه‌ت لێ ئه‌نجامێ نها یێ هه‌لبژارتنان ب دلێ ئیرانێ نینه‌ و گۆت: (ده‌زگه‌هێن راگه‌هاندنا ئیرانێ ژی به‌حسێ هندێ دكه‌ن كو گرۆپێن سه‌ر ب ئیرانێ د هه‌لبژارتنان دا تووشی شكه‌ستنێ هاتینه‌ و دبێژن ژ به‌ر پیلانگێریا ئه‌مریكا و هنده‌ك وه‌لاتێن دی ل ده‌ڤه‌رێن شیعه‌ خه‌لكی كێم پشكداری د هه‌لبژارتنان دا كرینه‌ و ژ به‌ر هندێ ژی هێزێن سه‌ر ب ئیرانێ تووشی شكه‌ستنێ هاتینه‌).

ناڤهاتی ل دۆر هه‌رێما كوردستانێ ژی راگه‌هاند كو پارتی دیموكراتی كوردستان تنێ هێزا نه‌ته‌وه‌یی یه‌ كو ئه‌ڤرۆكه‌ د مه‌یدانێ دا به‌رگریێ ژ مافێن ره‌وا و نه‌ته‌وه‌یی یێن خه‌لكێ كوردستانێ دكه‌ت، ژ به‌ر هندێ ژی سه‌ركه‌فتنا پارتی گه‌له‌ك گرنگ بوو، پارتی شیا كورسیێن خوه‌ زێده‌ بكه‌ت و ئه‌و یه‌ك دێ كارتێكرنا خوه‌ ل پێگه‌هێ كوردان ل حوكمه‌تا نوو یا ئیراقێ كه‌ت و بێگومان بهێزبوونا پارتی ل ئیراقێ دێ كارتێكرنا خوه‌ یا باش بۆ هه‌موو كوردان هه‌بیت و گۆت: (ئه‌ز دشێم بێژم كو بهێزبوونا پارتی دهێته‌ رامانا بهێزبوونا كوردان و هێڤیدارم كو هه‌موو هێزێن كوردی پێكڤه‌ به‌ره‌یه‌كێ ئاڤا بكه‌ن و بهێز ڤه‌گه‌رنه‌ به‌غدا).

به‌هرام خه‌لیلی چاڤدێرێ سیاسی ژی دیار كر كو به‌ری هه‌ر تشته‌كێ ئه‌و هێز و كه‌سێن كو ل هه‌رێما كوردستانێ و به‌غدا به‌رده‌وام ل دژی مافێن ره‌وا یێن گه‌لێ كوردستانێ بوون و رۆژانه‌ ل دژی حوكمه‌تا هه‌رێما كوردستانێ كار دكرن تووشی شكه‌ستنه‌كا مه‌زن هاتن، ئه‌و یه‌ك ژی ب سه‌رێ خوه‌ بۆ گه‌لێ كورد ل هه‌رێما كوردستانێ سه‌ركه‌فتنه‌كا مه‌زنه‌، د ئاستێ ئیراقێ و ده‌وله‌تێن هه‌رێمێ دا گه‌له‌ك بزاڤ هه‌بوون دا پارتی لاواز بیت لێ خه‌لكێ كوردستانێ پشته‌ڤانی ل پارتی كر و د ئه‌نجام دا پارتی شیا كورسیێن خوه‌ زێده‌تر ژی لێ بكه‌ت و گۆت: (ب تایبه‌تی ژی سه‌ركه‌فتنا پارتی ل كه‌ركووكێ و ده‌ڤه‌رێن دی یێن داگیركری وه‌كو شه‌نگالێ گه‌له‌ك گرنگ بوو، كوردان جاره‌كا دی ل وان ده‌ڤه‌ران سه‌لماند كو ئه‌و پشته‌ڤانیێ ل پارتی دكه‌ن چونكو پارتی تنێ هێزه‌ ئه‌ڤرۆكه‌ كار بۆ پاراستنا مافێن گه‌لێ كوردستانێ و هه‌روه‌سا پاراستنا قه‌وارێ هه‌رێما كوردستانێ دكه‌ت، خه‌لكی ب ره‌نگه‌كێ ئاشكرا ئه‌و په‌یامه‌ ژی دانه‌ دوژمنێن كوردستانێ كو ئه‌و ده‌ستان ژ ناسنامه‌ و مافێن خوه‌ یێن ره‌وا به‌رناده‌ن).

مه‌ریم ره‌حمانی ئه‌نداما رێكخراوا مافێن مرۆڤی یا رۆژهه‌لاتێ كوردستانێ ژی راگه‌هاند كو رێژه‌كا باش یا ژنان شیان ل هه‌رێما كوردستانێ سه‌ركه‌ڤن و بچنه‌ په‌رله‌مانێ ئیراقێ، ئه‌و یه‌ك بۆ هه‌موو ژنێن كورد گرنگه‌، ئێدی ژنا كورد ل هه‌رێما كوردستانێ و ئیراقێ خوه‌دان بریاره‌ و ئه‌و یه‌ك بۆ هه‌موو ژنێن كوردستانێ گرنگه‌ و گۆت: (ئه‌ز هێڤیدارم هه‌موو هێزێن كوردی ئێدی پشتی هه‌لبژارتنان ده‌ست ب قۆناغه‌كا نوو بكه‌ن، چونكو ئیران و وه‌لاتێن دی ناهێلن ره‌وشا ئیراقێ ئارام بیت و دێ به‌رده‌وام بزاڤا هندێ كه‌ن كو ل به‌غدا هێزێن شیعه‌ ئاریشان بۆ كوردان دروست بكه‌ن، ژ به‌ر هندێ ژی گرنگه‌ كورد ل به‌غدا پێكڤه‌ كار بكه‌ن و خوه‌دان ئێك هه‌لوه‌ست بن).