ئه‌ڤرۆ نیوز: ڤه‌ده‌ر ره‌شاڤایی:
جڤاتا پارێزگه‌ها نینه‌وا ل دژی دروستكرنا هه‌ڤپه‌یمانییه‌كا ستراتیژی دگه‌ل حه‌شدا شه‌عبی یا شیعه بۆ پشكداریكرنا حه‌شدا شه‌عبی د ئۆپه‌راسیۆنا رزگاركرنا مووسل دا ده‌نگ دا.
جڤات كو ژ 31 ئه‌ندامان پێكدهێت ل باژارێ ئه‌لقۆش ده‌نگدان كر، 22 ئه‌ندامان ل دژی حه‌شدا شه‌عبی ده‌نگ دا، ل دووڤ گۆتان غه‌زوان داودی ئێك ژ ئه‌ندامێن جڤاكا كوردێن شه‌به‌ك د جڤاتێ دا.
ئه‌ڤرۆ نیوز: ڤه‌ده‌ر ره‌شاڤایی:
تیما كه‌نالێ (REN-TV) یێ رووسی شیایه ب ڤیدیۆیێ هه‌بوونه‌كا له‌شكه‌رییا زێده مه‌زن یا توركیا ل سه‌ر سنۆرێ توركیا دگه‌ل كۆبانێ ب سه‌لمینیت و نیشان بده‌ت.
تیما (REN-TV) دانه‌یه‌ك ژ ڤیدیۆیێ دایه كه‌نالێ (RT) و وه‌سا به‌لاڤ كرییه كو توركیا سنۆرێ خوه ب تانك و زریپۆشان بهێز خستییه و بزاڤێن له‌شكه‌ریێن به‌رفره‌هـ رێكدئێخیت چه‌ك و ته‌قه‌مه‌نییا ب به‌رده‌وامی بۆ سه‌ر سنۆری ڤه‌دگوهێزیت،
ل دووڤ ئه‌و دیمه‌نێن هاتیه گرتن و گۆتنا تیما كه‌نالێ ناڤهاتی، سه‌ربازێن توركیا دشێن دده‌مێ چه‌ند خۆله‌كان دا بهێزه‌كا مه‌زن و ئاماده بكه‌ڤنه ناڤ ئاخا رۆژئاڤایێ كوردستانێ و نێزیكی شه‌ش زریپۆش د ئێك خۆله‌ك دا سنۆری ببه‌زینن.
ئه‌ڤرۆ نیوز:
بالیۆزخانا ئه‌مریكا ل عیراقێ د به‌یاننامه‌كێ دا راگه‌هاند، گه‌له‌ك زانیاری یێن ل به‌ر ده‌ست هه‌ین ل دۆر هه‌ڕفینا سكرێ مووسلێ و هۆشداری دایه كو ملیۆنه‌ك و 500 هزار كه‌س ل ده‌وروبه‌رێن رووبارێ دیجله دكه‌ڤنه به‌ر مه‌ترسیا هه‌ڕفینێ.
هه‌روه‌سا حوكمه‌تا عیراقێ به‌لاڤكریه كو به‌رى ده‌ستپێكرنا پرۆسا ئازادكرنا مووسل دێ ده‌ست ب سه‌خبێكرنا سكرێ مووسل كه‌ن و د هه‌مان ده‌م دا ژی داخواز ژ ئاكنجیێن وێ پارێزگه‌هێ كریه دووری رووباری ئاكنجی ببن.
ئه‌ڤرۆ نیوز:
په‌یڤدارێ فراكسیونا پارتى دیموكراتى كوردستان ل په‌رله‌مانێ كوردستانێ محه‌مه‌د عه‌لى یاسین ئاماژه ب وێ یه‌كێ كر كو كاراكرنا په‌رله‌مانى پێدڤى ب رێككه‌فتن و سازانا لایه‌نێن سیاسى یه و راگه‌هاند: ب ڤى ره‌وشا نوكه یا ب زه‌حمه‌ته كۆمبوونا په‌رله‌مانى بێ سازان بهێته كرن”.
ژ ئاليێ خوه‌ڤه، ئه‌ڤرۆ شورش حاجى په‌یڤدارێ گۆڕان راگه‌هاند: پارتى دیموكراتى كوردستان هێشتا یا ل سه‌ر هه‌لویستێن خوه به‌رده‌وامه، و چ سازشه‌ك نه‌كریه و ئه‌م ژى چ كۆمبوونه‌كێ ره‌ت ناكه‌ین، به‌لێ كومبوونێ ژ پێخه‌مه‌ت كومبوونێ ئه‌م ئه‌نجام ناده‌ین.
شورش حاجى په‌یڤدارێ گۆڕان راگه‌هاند: مه‌رجێ مه یێ سه‌ره‌كى بۆ كومبوونێ، ئه‌وه ره‌وش ڤه‌گه‌ریت وه‌كو به‌رى 12 چریا ئێكێ یا 2015ێ.
ئه‌ڤرۆ نيوز:
ژبه‌ر وان پێشێلكاریێن ژئالیێ هنده‌ك كه‌سێن د ناڤ رێزێن حه‌شدا شه‌عبی هاتینه ئه‌نجامدان ل پارێزگه‌هێن دیێن عیراقێ وه‌كی دیالا و سه‌لاحه‌دین و یا ژ هه‌میێ خرابتر ل پارێزگه‌ها ئه‌نبار ، وه‌ك هێڤیه‌ك بۆ سه‌ركه‌فتنا پرۆسا رزگاركرنێ و پشته‌ڤانیا هێزێن ئێمناهیا عیراقێ یا رێكخستی ژ له‌شكر و پۆلیس و پێشمه‌رگه‌ی، جڤاتا پارێزگه‌ها نه‌ینه‌وا د كۆمبوونا خویا نه ئاسایی دا رێككه‌فتی 29 / 2/ 2016 ، ب پڕانیا ده‌نگێن ئه‌ندامێن جڤاتێ بڕیار هاته دان:
1. جڤاتا پارێزگه‌ها نه‌ینه‌وا پشكداریا حه‌شدا شه‌عبی د پروسا رزگاركرنا موسلێ دا ره‌تكر.
2. جڤاتا پارێزگه‌ها نه‌ینه‌وا ژ حكومه‌تا عیراقێ و هێزێن هه‌ڤپه‌یمانان دخوازیت كوڕێن هوزێن سه‌ر ب نه‌ینه‌وا ڤه ب هه‌موو پێكاهتێن وێ ڤه بهێنه پڕ چه‌ككرن بو هندێ ئه‌و پشكداریێ د رزگاركرنا ده‌ڤه‌رێن خوه‌دا بكه‌ن و ئه‌و ژ هه‌ر كه‌سه‌كێ فه‌رترن بڤی كاری رابن، هه‌لبه‌ت وانا دڤێت به‌رهنگاریا داعشا تیرورست بكه‌ن.
3. جڤاتا پارێزگه‌ها نه‌ینه‌وا هه‌ر شروڤه‌كرنه‌كا تائیفی بو ڤێ بڕیارێ ره‌ت دكه‌ت، هێزێن ئێمناهیێ یێن رێكخستی ژ له‌شكر و پولیسان هه‌مو پێكهاتێن عیراقێ تێدا پشكدارن ل باكور هه‌تا باشور و رێژا خه‌لكێ نه‌ینه‌وا گه‌له‌ك تێدا یا كێمه، به‌لێ هه‌تا نها چو پێشێلكاری ژ ئالیێ له‌شكری ڤه ل ده‌ڤه‌رێن رزگاری نه‌هاتینه ئه‌نجامدان.
ئه‌ڤرۆ نیوز: ڤه‌ده‌ر ره‌شاڤایی:
خوه‌كوژه‌كی خوه دناڤ به‌هییه‌كێ دا ل ناوچا میقدادیه ل پارێزگه‌ها دیالا په‌قاند و د ئه‌نجام دا پتری 20 كه‌سان هاتن كوشتن و ب ده‌هان كه‌س هاتن برينداركرن.
به‌هی یا ملیشیایه‌كێ شیعه بوو كو د شه‌رێ دژی داعش دا هاتبوو كوشتن.
چ ئالییه‌كی هێشتا به‌رپرساتییا خوه ژ روودانێ رانه‌گه‌هاندییه.
ئه‌ڤرۆ، سالار دۆسكى:
سه‌رۆكێ لژنا پیشه‌سازى و به‌رهه‌مێن گازێ ل جڤاتا پارێزگه‌ها دهۆكێ دیاركر كو بهایێن ئه‌مپێرێن كاره‌بێ هاتنه خوار و ئه‌ڤ بریاره بۆ هه‌یڤا ئادارێ دێ كه‌ڤیته دبیاڤێ بجهئینانێ دا. عه‌بدوسه‌مه‌د تێلى سه‌رۆكێ لژنا ناڤبرى زێده‌تر بۆ ئه‌ڤرۆ نیۆز گۆت: كاركرنا موه‌لیدان ب ده‌مژمێران هه‌یڤانه دهێته لێكدان و بهایێ ئه‌مپێرى وێ هه‌یڤێ ده‌ردكه‌ڤیت، پێشتر بۆ هه‌ر ده‌مژمێره‌كێ هزار و 500 دینار هاتبوونه ده‌ستنیشانكرن، نوكه 20% هاتنه كێمكرن و بوو هزار و 200 دینار.
ناڤبرى هێشتا رونكرن و گۆت: بۆ هه‌یڤا شواتێ یا چووى دێ بهایێ ئه‌مپێرى 10 هزار دیناربن، بۆ هه‌یڤا ئادارێ و دووڤ دا دێ گوهۆرین كه‌ڤیتێ، ماوێ كاركرنا موه‌لیدان دێ چارى ئێڤارى بیت هه‌تا ئێكى شه‌ڤێ و هه‌یڤا بهێت ئه‌م پێشبینى یا شه‌ش هزار دیناران دكه‌ین بۆ ئه‌مپێرى، ئانكو ژ دوازده هزاران دێ بیته شه‌ش هزار دینار.
ل دۆر موه‌لیدێن بازارى ناڤبرى گۆت: پێشتر ئه‌وان بۆ هه‌ر ده‌مژمێره‌كێ 2000 دینار وه‌ردگرتن و ئه‌و ژى 25% هاتنه خوار، بۆ هه‌ر ده‌مژمێره‌كێ دێ هزار و 500 دیناربن و دێ به‌رده‌وام كاركه‌ن چونكه ل بازارى نه.
ل دۆر موه‌لیدێن شوقان ژى گۆت: چونكه ئاڤا شوقان ب كاره‌بێ یه، كاركرنا موه‌لیدان دێ وه‌ك به‌رێ بیت ژ حه‌فتى سپێدێ هه‌تا دووێ شه‌ڤێ، بهایێ ئه‌مپێرى 20% دێ كێم بیت.
ئه‌ڤرۆ نیوز:
نێچیرڤان بارزانى سه‌رۆكێ حوكمه‌تا هه‌رێما كوردستانێ داخاز ژ پاتریك سیمۆنى بالیوزێ ئێكه‌تیا ئورۆپا ل عیراقێ كر كو جڤاكى نێڤده‌وله‌تى پشكا هه‌رێمێ ژ وان قه‌ران دابین بكه‌ت یێن كو دێ ب حوكمه‌تا عیراقێ هینه دان.
نێچیرڤان بارزانى د دیداره‌كێ دا ل گه‌ل بالیۆزێ ئێكه‌تیا ئورۆپا به‌حسێ برینا پشكا بۆدجا هه‌رێمێ ژ ئالیێ به‌غدا ڤه كر و گۆت” برینا بودجه‌ى و هاتنا ژماره‌كا زۆر یا ئاواران و ئه‌رزانبوونا بهایێ نه‌فتێ كارتێكرنێن زور نه‌رێنى ل سه‌ر ره‌وشا هه‌رێما كوردستانێ دروست كرن”.
نێچیرڤان بارزانى ئاماژه ب پابه‌ندبوونا حوكمه‌تا هه‌رێمێ ب وان رێكار و چاكسازیان كر كو بۆ ده‌ربازبوونا قه‌یرانا داراییا هه‌رێمێ هاتینه دانان و گۆت” حوكمه‌تا هه‌رێمێ هیڤى خوازه جڤاكى نێڤده‌وله‌تى ب گشتى و ب تایبه‌ت دوست و هه‌ڤپه‌یمانێن مه، هه‌ڤكاریا هه‌رێمێ بكه‌ن و ب واقیعانه ته‌ماشه‌ى ره‌وشا هه‌رێما كوردستانێ بكه‌ن”.
ئه‌ڤرۆ نیوز:
عه‌بدولره‌حمان عه‌لى ئه‌ندامێ په‌رله‌مانێ كوردستانێ راگه‌هاند ل هه‌رێما كوردستانێ نێزیكى 25 هزار كۆمپانیا هه‌نه كو پرانیا وان كۆمپانیێن مه‌زنن، سالانه ب ملیاره‌ها دولاران ل هه‌رێما كوردستانێ قازانجێ دكه‌ن، به‌لێ حوكمه‌تێ ژ باجێ به‌خشى نه و چ پاره‌یه‌كێ وه‌ك باج ناده‌نه حوكمه‌تێ ب تنێ بۆ خوه قازانجى خرڤه دكه‌ن،
زانیار محه‌مه‌د رێڤه‌به‌رێ گشتى یێ باجێن هه‌رێمێ راگه‌هاند: ب تنێ 40% كۆمپانى سالانه باجێن خوه دده‌ن، ئه‌وێن دیتر دوسیه بۆ نه‌هاتینه ڤه‌كرن و باجان ناده‌ن.
زانیار محه‌مه‌د راگه‌هاند ژى ل دووڤ ئامارێن ل به‌رده‌ست داهاتێ باجێ ل سالا 2015 ب 160 ملیار دهاته خه‌ملان و ل چاڤ سالێن بورى كێم بوویه ژ به‌ر ئیفلاسبوونا هنده‌ك كۆمپانیان و خوه‌ڤه‌دزینا هنده‌ك خۆدان كۆمپانیان ژ دانا باجێ.
ئه‌ڤرۆ نیوز:
شورش حاجى په‌یڤدارێ گۆڕان راگه‌هاند: پارتى دیموكراتى كوردستان هێشتا یا ل سه‌ر هه‌لویستێن خوه به‌رده‌وامه، و چ سازشه‌ك نه‌كریه و ئه‌م ژى چ كۆمبوونه‌كێ ره‌ت ناكه‌ین، به‌لێ كومبوونێ ژ پێخه‌مه‌ت كومبوونێ ئه‌م ئه‌نجام ناده‌ین.
شورش حاجى په‌یڤدارێ گۆڕان راگه‌هاند: مه‌رجێ مه یێ سه‌ره‌كى بۆ كومبوونێ، ئه‌وه ره‌وش ڤه‌گه‌ریت وه‌كو به‌رى 12 چریا ئێكێ یا 2015ێ.
نيشاندان