ئه‌ڤرۆ:

به‌پرسێ لقێ 17 یێ پارتی دیموكراتی كوردستان ل شنگالێ، به‌حس ل رێككه‌فتنه‌كا نهێنی یا پارتیا كاركه‌رێن كوردستانێ (PKK) و گرۆپه‌كا حه‌شدا شه‌عبی دكه‌ت ل سه‌ر ئازادكرنا وان داعشێن كو ل ژێر ده‌ستێ هێزێن PKK دانه‌ ل رۆژئاڤایێ كوردستانێ و پشكه‌ك ژ وان داعشان خه‌لكێ ئیراقێ نه‌.

ئاشتی كۆچه‌ر، به‌رپرسێ لقێ 17 یێ پارتی دیموكراتی كوردستان ل شنگالێ، ل دووڤ رۆژناما (خه‌بات) گۆت” به‌ری چه‌ند رۆژان ب فشارا سه‌رانێن قه‌ندیلی ل سه‌ر مه‌زلوون كۆبانی، پشكه‌كا مه‌زن ژ داعشێن ژێر ده‌ستێ وان راده‌ستی هۆزێن ئه‌ره‌ب هاتنه‌ كرن كو پشكه‌ك ژ وان هۆزان ئه‌ره‌بێن ئیراقێ نه‌ و ب رێككه‌فتنا چه‌ند فه‌رمانده‌یێن PKK ل شنگالێ و گرۆپه‌كا حه‌شدا شه‌عبی ئه‌و ئه‌ندامێن داعشێ ل ده‌ڤه‌را ( دۆلا حۆران) ل پارێزگه‌ها ئه‌نبار هاتنه‌ ئازادكرن به‌رامبه‌ر گۆژمه‌كێ پاره‌ی كوپ ێشتر رێككه‌فتن ل سه‌ر هاتبوو كرن”.

به‌رپرسێ لقێ 17 زێده‌تر گۆت” PKK ل شنگالێ مژوولی بجهئینانا ئه‌جندایه‌كا هه‌والگیری یا مه‌زنه‌ و ل وێرێ ئاسانكاریان بۆ وان گرۆپێن ئه‌ره‌ب یێن شیعه‌ دكه‌ تكو ل ئیراقێ و سووریێ و لوبنانێ دژایه‌تیا هه‌رێما كوردستانێ دكه‌ن، هه‌ر ل وێرێ ژی هاریكاریێن هه‌والگیری و له‌شكری بۆ جهێن دی دچن، ڤێ چه‌ندێ ژی ئاسته‌نگ ل به‌رده‌م رێككه‌فتنا شنگالێ دروست كریه‌”.

ئاشتی كۆچه‌ر ئاماژه‌ ب وێ چه‌ندێ ژی كر كو چه‌ند رۆژه‌ به‌حس ل هاتنا هێزا PKK وه‌كو پشته‌ڤانی بۆ وێ هێزا نوكه‌ ل شنگالێ دهێته‌ كرن، ئه‌ڤه‌ ژی جهێ مه‌ترسیێ یه‌ و PKK دخوازیت ره‌وشا ده‌ڤه‌رێ ب تمامی تێك بده‌ت.

ناڤبری ئه‌وژی به‌رچاڤكر كو پشكه‌كا به‌رچاڤ یا وان داعشێن نوكه‌ ل ئیراقێ زێده‌ بووین، ب تایبه‌تی ل سنووران و ئه‌و لڤینێن چه‌ند رۆژه‌ دكه‌ن، ده‌رئه‌نجامێ وێ رێككه‌فتنا PKK یه‌ ل گه‌ل پشكه‌كا حه‌شدا شه‌عبی.

ئه‌ڤرۆ، سالار محه‌مه‌د سلێمان:

نوونه‌رێ‌ به‌رێ‌ یێ‌ ئیراقێ ل قۆلپا (ناتۆ) راگه‌هاند، نوكه‌ گه‌له‌ك مه‌ترسی ل سه‌ر هه‌رێما كوردستانێ‌ یێن هه‌ین و دڤێت رێككه‌فتنه‌كا نێڤده‌وله‌تی بهێته‌كرن كو پێشمه‌رگه‌ پشكه‌كا پاراستنا ته‌ناهیێ یه‌ ل ئیراقێ و پشكا كوردستانێ‌ ژ وه‌زاره‌تا به‌رگریا ئیراقێ هه‌ر هه‌می بهێته‌ دابینكرن.

لیوا سه‌باح سالح، نوونه‌رێ‌ به‌رێ‌ یێ‌ ئیراقێ ل قۆلپا (ناتۆ) بۆ رۆژناما (ئه‌ڤرۆ) گۆت” هه‌كه‌ رێككه‌فتنه‌ك د ناڤبه‌را هێزێن ئه‌منی و له‌شكری دا ل ئیراقێ  دروست نه‌بیت دێ‌ قوربانی زێده‌تر لێ‌ هێن و گرنگه‌ سیاسی و سه‌ركردێن له‌شكری ستراتیژیه‌كا رژد بدانن و پشته‌ڤانیا نێڤده‌وله‌تی زێده‌تر بۆ هێزێن ئه‌منی بهێته‌كرن، هه‌كه‌ دو لیوایێن هه‌ڤپشك راهێنانێن دروست و ستراتیژیه‌كا دروست و سه‌ركردێن له‌شكری یێن كورد ل گه‌ل ناتۆ بهێنه‌ دانان، مه‌ باوه‌ری هه‌یه‌ دێ‌ سنور هێته‌ كونترۆلكرن”.

لیوا سه‌باح  ئه‌و ژی گۆت” هه‌لبژارتنێن ئیراقێ و هه‌تا ده‌ركه‌فتنا هێزێن ئه‌مریكی ژل ئیراقێ دێ‌ گه‌له‌ك كارتێكرن ل سه‌ر هه‌رێما كوردستانێ‌ هه‌بیت نوكه‌ ل هه‌رێمێ دو هێزێن پێشمه‌رگه‌ی یێن هه‌ین ئه‌وژی یه‌كه‌یێن 70 و 80 هه‌روه‌سا دو ئه‌كادیمیێن له‌شكری ل كوردستانێ‌ یێن هه‌ین ل زاخۆ و قه‌لاچوولان كو دڤێت ئه‌ڤه‌ ببنه‌ ئێك دا پێشمه‌رگه‌ی ئێك باوه‌ری هه‌بیت و نه‌ هه‌ر ئێك ب ره‌نگه‌كی و هه‌تا ل گه‌ل له‌شكرێ‌ ئیراقێ ژی و هه‌تا هێزێن ئیراقێ و حه‌شا شعبی ژی هه‌تا نوكه‌ دیتنا وان نه‌یا دروسته‌ و هزر ناكه‌ن ئه‌ڤه‌ هێزێن ئیراقێ نه‌ و گه‌له‌ك جاران ب دوژمن سه‌حدكه‌نه‌ پێشمه‌رگێ‌ كورستانێ‌، هه‌روه‌سا هێزێن پێشمه‌رگێ‌ كوردستانێ‌ ژی پێدڤی ب ته‌كنه‌لوژیه‌كا نوویه‌”.

ئاماژه‌كر” هه‌كه‌ هێز بكه‌ڤیته‌ ده‌ستی شیعان، دێ مه‌ترسی كه‌ڤیته‌ سه‌ر هه‌رێما كوردستانێ‌ وهه‌تا نوكه‌ لژنه‌كا هه‌فپشك نینه‌ و ترسه‌كا مه‌زن هه‌یه‌ و هه‌كه‌ هێزێن شیعی یێن توندره‌و هاتنه‌ سه‌ر ده‌ستهه‌لاتێ‌ ل ئیراقێ، دێ مه‌ترسی ل سه‌ر هه‌رێما كوردستانێ‌ هه‌بیت، چونكه‌ وان چه‌كه‌كێ‌ باش و پشته‌ڤانیه‌كا مه‌زن هه‌یه‌ و گرنگه‌ ئه‌ڤ رێككه‌فتنا ل سه‌ر كاغه‌زێ یا كو ئاماژه‌ دكه‌ته‌ وێ‌ چه‌ندێ‌ كو پێشمه‌رگه‌ پشكه‌كه‌ ژ هێزێن ئه‌منی ل ئیراقێ دڤێت ب كریار بهێته‌ سه‌لماندن و پێدڤیه‌ پشكا هه‌رێما كوردستانێ‌ نه‌بتنێ‌ ژ مووچه‌ی ل ئیراقێ هه‌بیت به‌لكو چه‌كی و به‌رگریێ و فرۆكان و دڤێت 17%  ژ هه‌موو پێدڤیێن له‌شكری، حوكمه‌تا ئیراقێ  بده‌ته‌ هه‌رێما كوردستانێ‌”.

زێده‌تر گۆت” گرنگه‌ هه‌موو په‌رله‌مانتارێن كورد ل جڤاتا نوونه‌رێن ئیراقێ د ئێك ده‌ست و هه‌لویست بن و كار بكه‌ن ل سه‌ر وێ‌ چه‌ندێ‌ كو پشكا پێشمه‌رگه‌ی ل وه‌زاره‌تا به‌رگریا ئیراقێ‌ بهێته‌ دابینكرن و مافێ‌ پێشمه‌رگه‌ی بهێته‌ وه‌رگرتن و رێككه‌فتنه‌كا نێڤده‌وله‌تی هه‌بیت كو پێشمه‌رگه‌ پشكه‌كه‌ ژ هێزێن ئه‌منی ل  ئیراقێ‌”.

هه‌ولێر، قائید میرۆ

زێده‌تری ١٤٠٠ سكالا لسه‌ر رێڤه‌چوونا پڕۆسا هه‌لبژارتنێن ئیراقێ هاتینه‌ تۆماركرن و كۆمسیۆنا بلند یا هه‌لبژارتنان ل ئیراقێ مژوولی ئێكلاكرنا وان سكالایانه‌ به‌ربژاره‌كێ سه‌ركه‌فتیێ هه‌لبژارتنان ژی راگه‌هاند، ب چو شێوه‌یه‌كی ده‌نگێن هه‌موو ئیراقێ بده‌ستی ناهێنه‌ هژمارتن و هه‌لبژارتنێن ڤێجارێ زه‌لالترین هه‌لبژارتن بوون ل ئیراقێ هاتینه‌ ئه‌نجامدان.

سیپان شێروانی، به‌ربژارێ پارتی دیموكراتی كوردستان یێ سه‌ركه‌فتی د هه‌لبژارتنێن جڤاتا نوونه‌رێن ئیراقێ دا بۆ رۆژناما (ئه‌ڤرۆ) گۆت” پشتی راگه‌هاندنا ئه‌نجامێن هه‌لبژارتنان هه‌موو جار هنده‌ك لایه‌ن هه‌بووینه‌ كو ژ ئه‌نجامێن هه‌لبژارتنان رازی نه‌بووینه‌، نه‌ك تنێ ئه‌ڤ پرسه‌ ل هه‌لبژارتنێن ئیراقێ هه‌بووینه‌، به‌لكو هه‌تا ل هه‌لبژارتنێن هه‌رێما كوردستانێ ژی وه‌سا بوویه‌، لایه‌نێن ده‌نگان وه‌كو پێدڤی بده‌ستڤه‌ نه‌ئینن به‌رده‌وام گازندان ژ ئه‌نجامێن هه‌لبژارتنان دكه‌ن، هێزێن شكه‌ستنێ د ئینن ل جیهانێ كارێ وان ئه‌وه‌ دخوازن به‌هانه‌یا ببنن بۆ ڤه‌شارتنا شكه‌ستنا خوه‌، د هه‌لبژارتنێن ڤێجارێ ژی ل ئیراقێ، هژماره‌كا لایه‌نێن سه‌رنه‌كه‌فتی ل ئیراقێ و هه‌رێما كوردستانێ ژی دخوازن ب رێیا ره‌تكرنا ئه‌نجامێن هه‌لبژارتنان شكه‌ستنا خوه‌ ڤه‌شێرن، ئه‌ز باوه‌رم هه‌لبژارتنێن ١٠ی ئۆكتۆبه‌ریا بۆری شه‌فافترین و زه‌لالترین هه‌لبژارتن بوون د ئیراقا نوو دا هاتینه‌كرن، ئه‌و هێزێن خزمه‌تا خه‌لكی كری هاتنه‌ پاداشتكرن و ئه‌و هێزێن نه‌شیاین وه‌كو پێدڤی خزمه‌تا خه‌لكی بكه‌ن هاتنه‌ سزادان، نوكه‌ هژماره‌كا لایه‌نێن شیعی یێن خه‌لكێ ئیراقێ باوه‌ری نه‌داینه‌ وان د هه‌لبژارتناندا، یێن ل به‌هانه‌یا دگه‌ڕیێن بۆ ڤه‌شارتنا شكه‌ستنا خوه‌ و  گازندان ژ شێوازێ هه‌لبژارتنان دكه‌ن”.

سیپان شێروانی گۆت ژی” هه‌ر كه‌س و لایه‌نه‌كێ گازنده‌ و گومان هه‌بن ل سه‌ر شێوازێ رێڤه‌چوونا هه‌لبژارتنان ب گۆره‌ی قانوونێ دڤێت سكالایێ تۆمار بكه‌ت و به‌لگه‌ هه‌بن بۆ گازندا خوه‌، كۆمسیۆنا بلندیا  هه‌لبژارتنان ژی ده‌ست ب ڤه‌كۆلینێ كریه‌ لدۆر سكالایێن هاتینه‌ تۆماركرن، هه‌ر سكالایه‌كا به‌لگه‌ دگه‌ل هه‌بیت ده‌نگێن وان ویستگه‌هان بده‌ستی دهێنه‌ هژمارتن، به‌رۆڤاژی سكالایێن به‌لگه‌ نه‌بن ژلایێ ده‌سته‌یا قانوونی ل كۆمسیۆنا بلند یا هه‌لبژارتنان ڤه‌ دهێنه‌ ره‌تكرن، ب هیچ شێوه‌یه‌كی هه‌موو ده‌نگێن هه‌لبژارتنان بده‌ستی ناهێنه‌ هژمارتن، چونكه‌ پڕۆسه‌یه‌كا دۆم درێژه‌ و چه‌ند سالان دێ ڤه‌كێشیت، ژ به‌ر كو دڤێت نوونه‌رێ نه‌ته‌وێن ئێكگرتی و نوونه‌رێن به‌ربژاران و دبن چاڤدێریه‌كا هوور دا بهێنه‌ هژمارتن ئه‌ڤه‌ژی مه‌حاله‌ بهێته‌ كرن”.

خویاكر ژی” ئه‌نجامێن هه‌لبژارتنان دێ هێنه‌ په‌سه‌ندكرن، به‌لێ هنده‌ك سكالا ماینه‌ وكار یێ لسه‌ر دهێته‌كرن و هه‌كه‌ ب دووماهی بهێن دێ دادگه‌ها فیدڕالی ئه‌نجامێن هه‌لبژارتنان په‌سه‌ندكه‌ت، چونكه‌ هزار و 400 تانه‌ ل هه‌لبژارتنان هه‌بووینه‌ و هه‌تا نوكه‌ نێزیكی ٥٠٠ تانه‌ هاتینه‌ ئێكلاكرن و هنده‌ك سندووق ژی ل مووسل بده‌ستی دێ هێنه‌ هژمارتن”.

ئه‌ڤرۆ:

مه‌سرور بارزانی سه‌رۆكێ‌ حوكمه‌تا هه‌رێما كوردستانێ‌ دوهی سه‌ره‌دانا باژێرێ‌ زێڕین و گوندێ‌ كۆری ل ده‌وروبه‌رێن باژێرێ‌ هه‌ولێرێ‌ كر و ژ نێزیك هایداری ره‌وشا زیانڤێكه‌فتیێن له‌هیان ل هه‌ردو جهان و پرۆسا د هه‌وارچوونا زیانڤێكه‌فتیان ژ ئالیێ‌ ده‌زگه‌هێن په‌یوه‌ندیدارێن حوكمه‌تا هه‌رێما كوردستانێ‌ بوو.

سه‌رۆكێ‌ حوكمه‌تێ‌، سه‌ره‌رای ده‌ستخۆشیێ‌ ل ده‌زگه‌هێن په‌یوه‌ندیدار، بۆ دهه‌وارچوونا ب له‌ز یا زیانڤێكه‌فتیان، ئاماژه‌ ب وێ‌ چه‌ندێ‌ دا، كو حوكمه‌تا هه‌رێما كوردستانێ‌، هه‌موو هاریكاریه‌كا پێدڤی دێ‌ بۆ لێقه‌ومیێن وان له‌هیان پێشكێشكه‌ت و ل دووڤ شیانان دێ‌ قه‌ره‌بوو كه‌ت.

سه‌رۆكێ‌ حوكمه‌تێ‌ دوپات ژی كر كو پێدڤیه‌ به‌رپرسێن حوكمه‌تێ‌ هه‌رده‌م خزمه‌تكارێن خه‌لكی بن و ئه‌وا د شیانێن مه‌ دا بیت بۆ خزمه‌تكرنا خه‌لكی كێمخه‌میێ‌ ناكه‌ین.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی، د په‌یامه‌كێ دا سه‌ره‌خوه‌شیێ ل مالبات و كه‌سوكارێن وان دو پێشمه‌رگان دكه‌ت كو ل سنوورێ پردێ د هێرشه‌كا داعشێ دا شه‌هید بووین و تێدا دبێژیت، دوباره‌بوونا به‌رده‌وام و به‌رفره‌هبوونا هێرشێن تیرۆرستان، وێ راستیێ د سه‌لمینیت كو هێشتا داعش مه‌ترسیه‌كا راسته‌قینه‌یه‌ و گه‌فه‌ ل سه‌ر ئارامی و سه‌قامگیریا وه‌لاتی.

ده‌قێ په‌یاما سه‌رۆكێ هه‌رێما كوردستانێ..

به‌هیداری و سه‌ره‌خوه‌شیێ ل مالبات و كه‌سوكارێن سه‌ربلندێن هه‌ردو شه‌هیدێن گیانفیدا خالد حه‌مید هه‌یاس و ئاكۆ كه‌ریم قادر ژ لیوایا 10 یا په‌یاده‌ سه‌ر ب وه‌زاره‌تا پێشمه‌رگه‌ دكه‌م كو پشتی روو ب رووبوونه‌كا قه‌هره‌مانان ل گه‌ل تیرۆرستێن داعشێ ل ده‌ڤه‌را پردێ شه‌هید بوون و گیانێ خوه‌ یێ پاقژ ب وه‌لاتی به‌خشی.

ژدل هه‌ڤسۆز و هه‌ڤخه‌مێ مالبات و كه‌سوكار و هه‌موو هه‌ڤال و هه‌ڤسه‌نگه‌رێن وان و پێشمه‌رگێن قه‌هره‌مانم، ژ نێزیك ڤه‌ هه‌ست ب ئێش و ئازارێن وان دكه‌م، ژ په‌روه‌رده‌گارێ مه‌زن دخوازم گیانێ شه‌هیدان ب مێهره‌بانیا خوه‌ شاد بكه‌ت و سه‌بر و هه‌دارێ ب وان و مه‌ و هه‌موویان ببه‌خشیت.

دووباره‌ بوونا به‌رده‌وام و به‌رفره‌هبوونا هێرشێن تیرۆرستان، وێ راستیێ د سه‌لمینیت كو هێشتا داعش مه‌ترسیه‌كا راسته‌قینه‌یه‌ و گه‌فه‌ ل سه‌ر ئارامی و سه‌قامگیریا وه‌لاتی، له‌وما پێدڤیه‌ ب ئیراده‌ و ده‌سته‌كا پیلایی، ب هاریكاری و هه‌ماهه‌نگیا پێشمه‌رگه‌ی و له‌شكرێ ئیراقێ و هێزێن ئه‌منی و ب پشته‌ڤانیا هه‌ڤپه‌یمانیا نێڤده‌وله‌وتی تاكو ژناڤبرنا وان یا ئێكجاری، روو ب روو و به‌رهنگاری وان ببین.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، په‌یامه‌ك ل دۆر هێرشا تیرۆرستێن داعشێ بۆ سه‌ر سه‌نگه‌رێن پێشمه‌رگه‌ی به‌لاڤكر و تێدا دبێژیت” گه‌له‌ك خه‌مبار بووم ب شه‌هیدبوونا هه‌ر پێشمه‌رگێن قه‌هره‌مان خالد حه‌مید هه‌یاس كاكه‌یی و ئاكۆ كه‌ریم قادر د هێرشا تیرۆرستێن داعشێ دا ل پردێ”.

سه‌رۆكێ حوكمه‌تا هه‌رێمێ، په‌یاما خوه‌ د پێگه‌هێ خوه‌ یێ تایبه‌ت ل تۆرا جڤاكی یا (تویته‌ر) به‌لاڤكر و سه‌ره‌رای ده‌ربرینا خه‌مباریا خوه‌ بۆ شه‌هیدبوونا هه‌ردو پێشمه‌رگه‌یێن قه‌هره‌مان و ئاراسته‌كرنا سه‌ره‌خوه‌شیێ بۆ كه‌سوكارێن وان، ئاكاژه‌ ب وێ چه‌ندێ كر، ئه‌ڤ هێرشا تیرۆرستی، جاره‌كادی گرنگیا هه‌ماهه‌نگیێ د ناڤبه‌را هه‌رێما كوردستانێ و حوكمه‌تا فیدرال و هاریكاریا هه‌ڤپیه‌مانیا نێڤده‌وله‌تی دووپات دكه‌ت.

سه‌باره‌ت وێ چه‌ندێ، مه‌سرور بارزانی دبێژیت” ڤێ هێرشا تیرۆرستی، جاره‌كادی گرنگیا هه‌ماهه‌نگیێ دناڤبه‌را هه‌رێما كوردستانێ و حوكمه‌تا فیدرالی و هاریكاریا هه‌ڤپه‌یمانیا نێڤده‌وله‌تی دووپات دكه‌ت بۆ روو ب رووبوونا هێرشێن تیرۆرستێن داعشێ و داگرتنا ڤالاهیا ئه‌منی ل ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ”.

پێشتر سه‌رۆكێ حوكمه‌تا هه‌رێما كوردستانێ، هۆشداری ل دۆر گه‌ف و مه‌ترسیێن چه‌كدارێن داعشێ دابوو و ئاماژه‌ ب وێ چه‌ندێ كربوو هه‌رچه‌نده‌ هیچ رووبه‌ره‌كێ ئه‌ردی د ده‌ستێ چه‌كدارێن داعشێ دا نه‌مایه‌، به‌لێ گه‌ف و مه‌ترسیێن چه‌كدار و شانێن نڤستی یێن وێ رێكخراوا تیرۆرستی د به‌رده‌وامن ل سه‌ر ده‌ڤه‌رێ و به‌رسڤدانا وان گه‌ف و مه‌ترسیان ژی پێدڤی ب بزاڤێن هه‌مه‌لایه‌نی و هه‌رێمێ هه‌یه‌.

ئه‌ڤرۆ:

به‌ره‌یێ توركمانی و جڤاتا ئه‌ره‌بی ل كه‌ركووكێ، ب ناڤێ هه‌ردو پێكهاتێن ئه‌ره‌بی و توركمانی، به‌یاننامه‌ك دژی زڤرینا پێشمه‌رگه‌ی بۆ ده‌ڤه‌رێن كوردستانی و پێكئینانا لیوایا هه‌ڤپشك د ناڤبه‌را پێشمه‌رگه‌ی و له‌شكرێ ئیراقێ ده‌ركر، به‌ربژاره‌كێ پارتی ییچ سه‌ركه‌فتی د هه‌لبژارتنێن جڤاتا نوونه‌رێن ئیراقێ دا به‌رسڤا وان دده‌ت.

سه‌ره‌رای وێ چه‌ندێ چاڤدێرێن ئه‌ره‌ب و توركمان ئاماژه‌ بۆ وێ ئێكێ دكه‌ن، كو به‌ره‌یێ توركمانی و جڤاتا ئه‌ره‌بی ل كه‌ركووكێ، نوونه‌راتیا راسته‌قینه‌یا هه‌ردو پێكهاتێن ئه‌ره‌ب و توركمان ناكه‌ن، به‌لێ گه‌له‌ك جاران ب ناڤێ وان پێكهاتان داخۆیانیان دده‌ن.

دوهی ئێكشه‌مبی 31/10/ 2021 ، به‌ره‌یێ توركمانی و جڤاتا ئه‌ره‌بی، ل باره‌گایێ به‌ره‌یێ توركمانی ل كه‌ركووكێ، پرێس كۆنفرانسه‌كێ رۆژنامه‌ڤانی ب رێڤه‌بر و به‌یاننامه‌كا هه‌ڤپشك ب ناڤێ هه‌ردو پێكهاتێن ئه‌ره‌ب و توركمان ل كه‌ركووكێ خواند.

د وێ به‌یاننامێ دا هاتیه‌” نوكه‌ كو جڤاتا نوونه‌رێن ئیراقێ هاتیه‌ هه‌لوه‌شاند و حوكمه‌تا ئیراقێ یا نوكه‌ حوكمه‌تا كار ب رێكه‌ره‌ و سه‌ره‌رای ره‌وشا ئه‌منی ل كه‌ركووكێ ژبه‌ر هێزێن ئه‌منی یێن فیدرالی یا باشه‌، فه‌رماندێ گشتیێ هێزێن چه‌كدار ل ئیراقێ بریار دایه‌ كو لیوایه‌كا پێشمه‌رگه‌ی بچیته‌ ب سه‌ر له‌شكرێ ئیراقێ ڤه‌ و هێزا هه‌ڤپشك پێكبینن”.

ئه‌وژی تێدا هاتیه‌ به‌رچاڤكرن كو ئه‌و دژی زڤرینا پێشمه‌رگه‌ی نه‌، داخوازێ ژی ژ سه‌رۆك وه‌زیرێن ئیراقێ دكه‌ن ده‌ست ژ وێ بریارێ به‌رده‌ت و دۆسییا ئه‌منی ل كه‌ركووكێ و سه‌لاحه‌دین و نه‌ینه‌وا وه‌كو نوكه‌ بمینیت.

شاخه‌وان ئه‌بدوللا، به‌ربژارێ پارتی یێ سه‌ركه‌فتی د هه‌لبژارتنێن جڤاتا نوونه‌رێن ئیراقێ ژ پارێزگه‌ها كه‌ركووكێ، سه‌باره‌ت وی بابه‌تی، گۆت” ئه‌و دۆسییه‌، دۆسیه‌كا ئه‌منی یه‌ و پێدڤی ناكه‌ت ئه‌و بكه‌نه‌ دۆسیه‌كا سیاسی، ل ده‌ف مه‌ هه‌ر كه‌س و لایه‌نه‌ك دژی زڤرینا پێشمه‌رگه‌ی بیت، یان كه‌ڤنه‌ داعشن، یان ژی كرێگرتیێن وه‌لاتانه‌”.

شاخه‌وانی زێده‌تر گۆت” نابیت دۆسیا ئه‌منی ببیته‌ قوربانیا خه‌لكێ دی و ئه‌و بریارا هاتیه‌ دان بۆ پێكئینانا هێزا هه‌ڤپشك د ناڤبه‌را پێشمه‌رگه‌ی و له‌شكرێ ئیراقێ دێ هێته‌ بجهئینان و هه‌ر كه‌س و لایه‌نه‌كێ دژی وێ بریارێ بیت، ل گه‌ل هاتنا داعشێ و زووربوونا كریارێن تیرۆرستی یه‌ ل ده‌ڤه‌رێن كوردستانی”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل شانده‌كێ بلند یێ رێكخراوا LDS یا خێرخوازی یا ئه‌مریكی كر.

د دیداره‌كێ دا، مه‌سرور بارزانی سوپاسیا رێكخراوا LDS كر كو د چه‌ند سالێن بۆری دا، ب هه‌ماهه‌نگی ل گه‌ل ده‌زگه‌هێ خێرخوازی یێ بارزانی دا، چه‌ندین پرۆژێن هه‌ڤپشك بۆ هاریكاریكرنا ئاواره‌ و په‌نابه‌ران و خه‌لكێ هه‌ژار و كێم ده‌رامه‌ت ل هه‌رێما كوردستانێ، ئه‌نجامداینه‌.

شاندێ رێكخراوا LDS، دیارك ركو هه‌رێما كوردستانێ سه‌ره‌رای ره‌وشا ئابووری یا دژوار، یا به‌رده‌وامه‌ ل حه‌واندنا زێده‌تر ژ ملیۆن ئاواره‌ و په‌نابه‌ران ژ پێكهاتێن جودا.

د ته‌وه‌ره‌كێ دی یێ كۆمبوونێ دا، دووپاتی ل گرنگیا هاریكاریكرنێ و زه‌مینه‌ خوه‌شكرنێ بۆ زڤراندنا ئاوارێن شنگالێ بۆ جهێن وان هاته‌ كرن.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی، پێشوازی ل ئاتیلا تۆس كۆنسۆلێ گشتیێ وه‌لاتێ هنگاریا ل هه‌رێما كوردستانێ كر.

د دیداره‌كێ دا نێچیرڤان بارزانی، سه‌ره‌رای پێرۆزباهیێ و هیڤیا سه‌ركه‌فتنێ و پشته‌ڤانیا بۆ كۆنسۆلێ هنگاریا، سوپاس و پێزانین بۆ وی وه‌لاتی ده‌ربرین بۆ پشته‌ڤانیا وی ل هه‌رێما كوردستانێ و ئیراقێ د چارچۆڤێ هه‌ڤپه‌یمانیا نێڤده‌وله‌تی دژی داعشێ دا، هه‌روه‌سا بۆ هاریكاریێن مرۆڤی كو پێشكێشی ئاواره‌ و په‌نابه‌ران كرین، خواستا هه‌رێما كوردستانێ ژی بۆ پێشڤه‌برنا په‌یوه‌ندیان دووپات كر.

ژلایێ خوه‌ڤه‌ كۆنسۆلێ گشتیێ هنگاریا ل هه‌رێمێ خوه‌شحالیا خوه‌ ب ده‌ستبكاربوونێ نیشان دا و دووپاتی ل وێ چه‌ندێ كر كو وه‌لاتێ وی یێ پێگیره‌ ب پێشڤه‌برنا په‌یوه‌ندیان ل گه‌ل هه‌رێما كوردستانێ ب تایبه‌تی د بوارێ ئابووری دا.

هه‌لبژارتنێن ئیراقێ، پێشبینی بۆ پاشه‌رۆژا پرۆسا سیاسی و دامه‌زراندنا حوكمه‌تا نوو یا ئیراقێ و شه‌ری دژی تیرۆرێ، ته‌وه‌ره‌كێ دی یێ دیدارێ بوون.