ئه‌ڤ ساله 800 باده‌كێن گه‌نده‌لیێ گه‌هشتینه ده‌سته‌یا ده‌ستپاكیێ
هه‌ولێر، قائید میرۆ:
سه‌رۆكێ ده‌سته‌یا ده‌ستپاكیێ ل هه‌رێما كوردستانێ ئاشكرا كر، ئه‌ڤ ساله نێزیكی 800 باده‌كێن گه‌نده‌لیێ گه‌هشتینه ده‌سته‌یا ده‌ستپاكیێ و 40 ژ وان هه‌تا نوكه بۆ دادگه‌هێ هاتینه هنارتن و هه‌ژماره‌ك كه‌س ژی ب تۆمه‌تا گه‌نده‌لیێ هاتبوونه گرتن و ب فه‌رمانا دادگه‌هێ هاتینه ئازادكرن.
حاكم ئه‌حمه‌د ئه‌نوه‌ر، سه‌رۆكێ ده‌سته‌یا ده‌ستپاكیێ د كۆنگره‌یه‌كێ رۆژنامه‌ڤانی دا راگه‌هاند: “د شه‌ش هه‌یڤێن بۆری یێن ئه‌ڤ ساله دا 548 داخوازیێن سزادانێ ل ده‌سته‌یا ده‌ستپاكیێ هاتینه تۆماركرن، خه‌لكی ژی 251 باده‌كێن گه‌هاندینه ده‌سته‌یێ، سه‌رجه‌مێ باده‌كێن ئه‌ڤ ساله نێزیكی 800 باده‌كێن گه‌نده‌لیێنه و ڤه‌كۆلین یا تێدا دهێته كرن، هه‌ر ئه‌ڤ ساله ب بڕیارا دادوه‌رێن ده‌سته‌یا ده‌ستپاكیێ 138 باده‌كێن گه‌نده‌لیێ بۆ دادگه‌هێ هاتینه هنارتن و 40 ژ وان باده‌كان ژ لایێ دادگه‌هێڤه هاتینه ئێكلاكرن، كو تێدا 28 كه‌س تۆمه‌تبارن و داگه‌هێ بڕیارا ئازادكرنا 12 ژ وان تۆمه‌تباران ده‌ركریه”.
حاكم ئه‌حمه‌د ئه‌نوه‌ر گۆت: “د سالێن بۆری دا ده‌سته‌یا ده‌ستپاكیێ ڤه‌كۆلین دگه‌ل 72 به‌رپرسێن پله بلند و تایبه‌ت كریه و شه‌ش ژ وان به‌رپرسان پله‌یا وه‌زیر هه‌بوویه، به‌لێ هنده‌ك ژ وان پارێزبه‌ندی هه‌بوویه و رێك نه‌هاتیه‌دان بهێنه هه‌مبه‌ر دادوه‌رێن ده‌سته‌یا ده‌ستپاكیێ، نوكه ژی ڤه‌كۆلین دگه‌ل هه‌ژماره‌كا به‌رپرسان دهێته كرن كو تۆمه‌تبارن ب گه‌نده‌لیێ”.
