سه‌رۆكایه‌تیا جڤاتا وه‌زیران دێ پێشینه‌یێ بۆ 14 هزار كێم ئه‌ندامان مه‌زێخیت
هه‌ولێر، قائید میرۆ:
په‌یڤدارێ وه‌زاره‌تا كار و كاروبارێن جڤاكی یا حوكمه‌تا هه‌رێما كوردستانێ ئاشكرا كر، 14 هزار ناڤێن كێم ئه‌ندامان هاتینه پشتڕاستكرن و بۆ سه‌رۆكایه‌تیا جڤاتا وه‌زیران هاتینه هنارتن و دبێژیت: هه‌رده‌مێ بهێنه په‌سه‌ندكرن ئێكسه‌ر پێشینه‌یا هه‌یڤانه دێ بۆ هێته مه‌زاختن.
ئاریان ئه‌حمه‌د، په‌یڤدارێ وه‌زاره‌تا كار و كاروبارێن جڤاكی بۆ رۆژناما ئه‌ڤرۆ دیار كر، د چوارچوڤێ چاكسازیێن وه‌زاره‌تا كار و كاروبارێن جڤاكی دا پێداچوونه‌كا ته‌مام د لیستا كێم ئه‌ندامان دا هاتیه كرن و گۆت: “نێزیكی 30 هزار ناڤان هاتینه لادان، هنده‌ك ژ وان به‌ر چاكسازیێ كه‌فتینه و هنده‌كێن دی ژی ژ لایێ لیژنه‌یێن تایبه‌تمه‌ند ڤه هاتینه ره‌تكرن، هنده‌كان ژی وه‌غه‌ركریه و نه‌ماینه سه‌ر دونیایێ، له‌وڕا ژی لیسته هاتیه ڤاڤارتن و 14 هزار ناڤێن دی یێن كێم ئه‌ندامان ل جهێ وان هاتینه دانان”.
ئاریان ئه‌حمه‌د گۆتژی: “ئه‌و ناڤێن كێم ئه‌ندامان یێن هاتینه تۆماركرن، به‌ری نوكه و ل سالێن بۆری ژ لایێ رێڤه‌به‌ریێن وه‌زاره‌تێ ڤه هاتینه تۆماركرن، لیستا وان بۆ سه‌رۆكایه‌تیا جڤاتا وه‌زیران هاتیه بلندكرن و نوكه ئه‌م چاڤه‌ڕێی سه‌رۆكایه‌تیا جڤاتا وه‌زیرانین بۆ مه‌رزاختنا پێشینه‌یا وان 14 هزار كێم ئه‌ندامان یێن هاتینه په‌سه‌ندكرن”.
