ئه‌ڤرۆ نيوز:

سەرۆک وەزیرێن تورکیا راگەھاند کو ب بریارا یەک ئالی ئەمریکا یەکینەیێن پاراستنا گەل پرچەک دکەت و ل سەر ڤێ یەکێ رەخنە ل ئەمریکا گرتینە و ئەمریکا سۆز دایە پشتی رزگارکرنا باژێرێ رەققە ژ دەستێ داعشێ دێ ھەڤکاریێن بۆ یەپەگێ راوەستینیت و دڤێت یەپەگە ژی ب عاقل بیت ھەکە نە دێ دیسان ب فرۆکێن شەری بنگەھێن وێ ھێنە بۆمبەباران کرن.
بینالی یلدرم سەرۆک وەزیرێن تورکیا د داخۆیانیەکی دا ل بریتانیا راگەھاند کو ئەو دلگرانن ل ھەمبەر ھەڤکاری و ھاریکاریێن سەربازیێن ئەمریکا بۆ یەپەگێ و گۆت: (گەلەک ئاشکرایە کو یەپەگە پشکەکە ژ پەکەکێ و پەکەکە ژی ل دووڤ دستوورێ ئەمریکا و ئێکەتیا ئورۆپا رێکخستنەکا تیرۆرستە و نابیت ئورۆپا و ئەمریکا ھاریکاری و ھەڤکاریێ بگەھیننە دەستێ تیرۆرستان و ئەم ب چو رەنگەکێ پرچەک کرنا یەپەگێ قەبوول ناکەین و ئەو ل دژی ئێمناھیا وەلاتێ مە مەترسیان دروست دکەن و ھەر دەمێ زێدەگاڤیان بکەن ئەم دێ بێگۆمان وان سزا بدەین).
بینالی یلدرم سەرۆک وەزیرێن تورکیا د پشکەکا دی یا ئاخڤتنا خوە دا ژی راگەھاند کو ئەو ئامادەنە وەکو حوکمەتا تورکیا ل گەل ئەمریکا دەست ب قۆناغەکا نوو بکەن و پەیوەندیێن خوە بگەھیننە ئاستێ ھەری بلند و گۆت: (ئەمریکا دۆستێ مەیە لێ مخابن د ڤان سالێن داوی دا ئێدی راستەوخوە ھەڤکاریا رێکخستنا تیرۆرست ل سووریێ دکەت و ئەو یەک زیانێ دگەھینیتە پەیوەندیێن دو ئالی و ھێڤیدارم ئەمریکا ھەر زوو ژ شاشیێن خوە ڤەگەریت و یەپەگە ژی وەک پەکەکێ رێکخستنەکا تیرۆرست ب ناڤ بکەت و ھەموو ھەڤکاری و ھاریکاریێن بۆ وێ راوەستینیت).
سەرۆک وەزیرێن تورکیا راگەھاند ژی کو دێ ١٦ گولانا ئەڤسالە سەرۆک کۆمارێ تورکیا رەجەب تەیب ئەردۆگان سەرەدانا ئەمریکا بکەت و ل گەل سەرۆکێ ئەمریکا ھەڤدیتنەکێ ئەنجام بدەت و گۆت: (بەرێز سەرۆک کۆمار د ھەڤدیتنا ل گەل دۆنالد ترامپ سەرۆکێ ئەمریکا دا دێ بەحسێ پەیوەندیێن د ناڤبەرا ھەر دو ئالیان دا کەت و دێ ژ سەرۆکێ ئەمریکا بخوازیت کو ھەموو جۆرێ ھەڤکاریێن بۆ یەپەگێ بھێتە راوەستاندن و ئەم ب ھێڤینە کو ئەمریکا ژ شاشیێن خوە پاشڤە ڤەگەریت و ل گەل تورکیا چارەیەکێ بۆ قەیرانا سووریێ پەیدا بکەت).
ھەر د ڤێ مژارێ دا یەک ژ فەرماندارێن ئەمریکا ژی راگەھاند کو سەرۆک ترامپ ب زانەبوون و پشتی ڤەکۆلینەکا گەلەک بەرفرەە بریار دا ھەڤکاریا ھێزێن کوردی بکەت و ژ نھا پێڤە دێ ھەتا داویا ڤێ ھەیڤێ ھەڤکاری و ھاریکاریێن سەربازی بۆ یەپەگێ و ھێزێن سووریا دیمۆکراتیک بکەت و گۆت: (دڤێت ھەموو ئالیەک بزانیت کو ل عیراقێ پێشمەرگەیێن کورد ل ھەمبەر داعشێ سەرکەڤتن تۆمار کرن و نھا ژی ھێزێن یەکینەیێن پاراستنا گەل (یەپەگە) رۆلەکا گەلەک د شەرێ ل دژی تیرۆرستان دگێرن و بۆ نەمانا تیرۆرستان ل سووریێ شەری دکەن و نھا ب ھزر و کریارێن خوە رۆلەکا گەلەک مەزن د نەمانا تیرۆستان دا دبینن).
ھەروەسا رێدور خەلیل پەیڤدارێ فەرمی یێ یەپەگێ ژی د داخۆیانیەکی دا راگەھاند کو پەیوەنیێن وان ل گەل ئەمریکا، ئوروپا و وەلاتێن ھەرێمێ ژی گەلەک باشن و گۆت: (نھا ھەموو جیھان ئاگاھدارە کو ئەم شەرەکی دیرۆکی ل ھەمبەر تیرۆرستان دکەین و رۆلێ یەپەگێ د لاوازبوونا داعشێ و کۆمێن دی یێن تیرۆرستان دا گەلەک دیارە و ژ ئەڤرۆ پێڤە یەکینەیێن مە پتر ب رەنگەکی ئەکتیڤ رۆلێ خوە د ئارامکرنا دەڤەرێ دا ببینن).

ئەڤرو نیوز ، نەوزاد زادە ھلۆری:
مەسرور بارزانی راوێژکارێ ئەنجومەنا ئاسایشا ھەرێما کوردستانێ دێ پشکداریێ د پەنەلا ھێریتیج ل ئەمریکا کەت و تێدا بەحس ل سەر ئەوشا عیراقێ پشتی نەمانا داعش و سەربخوە بوونا ھەرێما کوردستانێ و ئازادتیا پێشمەرگەی دژی داعش و ھەڤکاریا ھێزێن ھەڤپەیمانان بو وان کەت.
نونەراتیا ھەرێما کوردستانێ داخوازنامەیا دا ” بەرێز مەسرۆر بارزانی ” راوێژکارێ ئەنجومەنا ئاسایشا ھەرێما کوردستانێ بەلاڤکریە و تێدا دیاردکەت کو ناڤبری پشکدارە د پەنەلا ” ھێریتیج ” ل ئەمریکا.
ل گورەی نونەراتیا ھەرێما کوردستانێ ل ئەمریکا ئەو پەنەل دێ ژلایێ ئێک ژ دامەزراوەیێن ئەمریکا ل رێکەفتی ١٦/٥/٢٠١٧ ھێتە ئەنجام دان و تێدا کومەکا کەساتیان لسەر ئاستێ جیھانێ پشکداربن و مەسرۆر بارزانی راوێژکارێ ئەنجومەنا ئاسایشا ھەرێما کوردستانێ ئێکە ژ وان کەساتیانە کو دێ ل ھەرێما کوردستانێ پشکداربیت و دێ بەعس لسەر رەوشا عیراقێ پشتی کو داعشێ سنوورێن موسل کەت و دێ بەرێخودانەکا کوردستانێ بو رەوشێ کەت ، ئەڤ زێدەباری کو دێ بەحس لسەر ئازایی و بەرخودانێن پێشمەرگەی و ھێزێن عیراقی و ئەمریکی و ھەڤپەیمانان ژی کەت کا چەوا شیاینە شکەستنێ ب داعش بینن ، ئەڤە زێدەباری کو دێ بەحس ل ئایندەیێ ھەرێما کوردستانێ ل گەل عیراق و سەربخویا کوردستانێ ژی کەت.
دداخوازنامەیا نونەراتیا ھەرێما کوردستانێ ھاتیە ژی کو ھەر کەس دکاریت ناڤێ خوە تومار بکەت بۆ پشکداربوون د بەرھەڤبوونا پەنەلێ دا.