ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی، ب هه‌لكه‌فتا جه‌ژنا رۆژێن ئێزی، په‌یامه‌ك ئاراسته‌ی ئێزدیان كر.

نێچیرڤان بارزانی د په‌یاما خوه‌ دا گۆت” جه‌ژنا رۆژێن ئێزی ل هه‌موو خوشك و برایێ نمه‌ یێن ئێزدی ل كوردستانێ و ل هه‌ر جهه‌كی ل جیهانێ ب گه‌رمی پیرۆز دكه‌م، هیڤیا جه‌ژنه‌كا خوه‌ش و ئارام بۆ وان دخوازم”.

گۆت ژی” د ڤێ چه‌ژنێ دا ئه‌م جاره‌كادی هه‌موو قوربانیێن ئێزدی دئینینه‌ بیرا خوه‌ و سلاڤان بۆ مالبات و كه‌سوكارێن وان دهنێرین”.

سه‌رۆكێ هه‌رێما كوردستانێ گۆت ژی” هه‌موو خوشك و برایێن خوه‌ یێن ئێزدی پشتراست دكه‌ین كو پشته‌ڤانین بۆ مسوگه‌ركرن و پاراستنا هه‌موو مافێن وان، ئاڤه‌دانكرنا هه‌موو وار و جهێن وان و ڤه‌گه‌راندنا ئاوارێن ئێزدی، هنده‌ ئێزدیه‌كێ ره‌ڤاندی مابیت، ئه‌م دێ ل سه‌ر بزاڤێن ئازادكرن و ڤه‌گه‌راندنا وان د به‌رده‌وام بین”.

ئه‌ڤرۆ:

داخوازێ ژ هه‌موو پارێزگه‌هان و باژێران و هه‌موو به‌رپرس و رێڤه‌به‌ران دكه‌م به‌رهه‌ڤیان بكه‌ن بۆ هاریكاریا خه‌لكی د كاره‌ساتێن ب ڤی شێوه‌ی دا

سه‌رۆكێ حوكمه‌تا هه‌رێما كوردستانێ، مه‌سرور بارزانی، د په‌یڤه‌كێ دا ل دۆر له‌هیا هه‌ولێرێ و هاریكاریا زیاندارێن وێ، راگه‌هاند، هه‌رچه‌نده‌ روودان یا سرووشتیه‌، به‌لێ لژنه‌ك یا هاتیه‌ راسپاردن بۆ وێ چه‌ندێ ڤه‌كۆلینێ بكه‌ن هه‌كه‌ لایه‌نه‌كێ خه‌مسار هه‌بیت، دیاركر ژی، ئه‌وا پێدڤی بیت، دێ كه‌ین.

ل سپێده‌یا رۆژا ئه‌ینیا بۆری 17/12/2021، له‌هی ل هژماره‌كا تاخێن باژێرێ هه‌ولێرێ دروستبوو و دئه‌نجامدا 11 كه‌سان گیانێ خوه‌ ژده‌ستدا.

سه‌رۆكێ حوكمه‌تا هه‌رێمێ ل دۆر زیانێن له‌هیێ، گۆت” سه‌ره‌خوه‌شیێ ل هه‌موو كه‌سوكارێن قوربانیان دكه‌م وخودێ هه‌دارێ بده‌ته‌ مالباتێن وان”.

گۆت ژی” مخابن ئه‌ڤه‌ كاره‌ساته‌كا سروشتیه‌ و ژئه‌گه‌رێ بارینا بارانه‌كا زۆر روودایه‌، بۆ ڤێ چه‌ندێ ژی مرۆڤ ژبلی سوپاسگوزاریا خودێ بكه‌ت، هیچ تشته‌كێ دی ژێ ناهێت، به‌لێ د هه‌مان ده‌مدا، پێدڤی دووڤچوونێ یه‌ بۆ وێ چه‌ندێ بزانین ل هه‌ر جهه‌كی هه‌كه‌ خه‌مساری هه‌بیت، بهێته‌ ده‌ستنیشان كرن”.

مه‌سرور بارزانی به‌حسێ فره‌هبوونا باژێرێ هه‌ولێرێ كر وگۆت” مه‌زنبوونا باژێرێ هه‌ولێرێ ل سالێن بۆری، پشتی مه‌ كۆمبوون ل گه‌ل به‌رپرسێن باژێری كری ل ئاڤاهیێ پارێزگه‌ها هه‌ولێرێ، بۆمن به‌حسكر كو ئێك ژ هۆكاران، گرتنا رێره‌وێ ئاڤێ بوویه‌ كو مخابن ل سالێن بۆری دبیت وه‌كو پێدڤی ب شێوه‌كێ ئه‌ندازیاری ئه‌و چه‌نده‌ ل به‌رچاڤ نه‌هاتبیته‌ وه‌رگرتن كو رێره‌وێ ئاڤێ نه‌هێته‌ گرتن، ڤێ چه‌ندێ ژی وه‌كریه‌ كو رێره‌وێ ئاڤێ بهێته‌ گرتن و ئه‌وژی دبیت ببیته‌ هۆكار كو ئه‌ڤ جۆره‌ كاره‌ساته‌ لێ په‌یدا ببیت”.

ل دۆر چاره‌سه‌ركرنا وێ كێشێ ژی، گۆت” لژنه‌ك هاتیه‌ پێكئینان بۆ وێ ئێكێ كێشه‌ بهێنه‌ ده‌ستنیشانكرن بۆ چاره‌سه‌ركرنا وان”.

مه‌سرور بارزانی، سه‌رۆكێ حوكمه‌تا هه‌رێما كوردستانێ، دیاركر كو پلانا كورتخایه‌ن ودرێژخایه‌ن دێ هه‌بیت، بۆ وێ چه‌ندێ بزانین پێدڤیه‌ چ بهێته‌ كرن د ڤان رۆژان دا بۆ دووباره‌نه‌بوونا ڤان جۆره‌ كاره‌ساتان، پشكه‌كا دی ژی ئه‌وه‌ ژ روویێ درێژخایه‌ن ڤه‌ چاوان رێگریێ ل دووباره‌نه‌بوونا ڤان جۆره‌ روودانان بكه‌ین د پاشه‌رۆژێ دا، ڤێ چه‌ندێ ژی پێدڤی ب خواندنه‌كا هوور و ئه‌ندازیاری وزانستی هه‌یه‌، كو پاشی بێگومان ب هووری دێ ل سه‌ر راوه‌ستین ومه‌ لایه‌نێن په‌یوه‌ندیدار یێن راسپاردین بۆ وێ ئێكێ هه‌موو وان خالان ل به‌رچاڤ وه‌ربگرن، دێ ڤه‌كۆلینێ د هه‌موو وان بابه‌تان كه‌ین، بزانین هه‌كه‌ هۆكار هه‌ر چ بن، ئه‌وێن سرووشتی هیچ ب مه‌ ناهێته‌ كرن، به‌لێ ئه‌وا دده‌ستێ مه‌ دا بیت، بێگومان ئه‌م دێ ل سه‌ر راوه‌ستین و ئه‌وا پێدڤی بیت دێ كه‌ین”.

هه‌روه‌سا گۆت” مه‌ لژنه‌ك یا راسپاردی بۆ خه‌ملاندنا وان زیانێن ب خه‌لكی كه‌فتین، هیڤیدارم ئه‌و لژنه‌ ژی بشێت زوو كارێن خوه‌ بجهبینیت، بۆ وێ ئێكێ هه‌ر تشته‌كێ ژ ده‌ستێ مه‌ بهێت هاریكاریا وی خه‌لكێ زیاندار بكه‌ین”.

سه‌رۆكێ حوكمه‌تا هه‌رێما كوردستانێ، گۆت ژی” داخواز ژ هه‌موو پارێزگه‌ه و باژێرێن هه‌رێمێ و هه‌موو رێڤه‌به‌ر و به‌رپرس و فه‌رمانبه‌رێن حوكمه‌تی ژی دكه‌م، بۆ وێ چه‌ندێ به‌رهه‌ڤی بهێنه‌ كرن ل باژێرێن دی كو وه‌كو دیار دبیت پێلا باران بارینێ بۆ ده‌مه‌كی ڤه‌كێشیت، به‌رهه‌ڤیان بكه‌ن و هاریكاریا خه‌لكی بكه‌ن و هه‌ر ژ نوكه‌ خوه‌ به‌رهه‌ڤ بكه‌ن”.

ئه‌ڤرۆ، عه‌زیز هه‌ورامی

چه‌كدارێن PKK بازگێن گۆمركی یێ نه‌ قانوونی یێن داناین ل هه‌موو وان ده‌روازێن نه‌فه‌رمی ل سنوورێ د ناڤبه‌را قه‌زا پێنجوین و رۆژهه‌لاتێ كوردستانێ هه‌ین و خه‌لكێ ده‌ڤه‌رێ كاری تێدا دكه‌ن، ب زۆرێ ژی باجێ ژ وان وه‌ردگرن و بۆ هیچ كه‌سه‌كی ژی نینه‌ بێژیت باجێ ناده‌م.

ل هه‌رسێ ده‌روازێن نه‌فه‌رمی (چه‌مێ سیبار، گوند سیاكوێز و میشه‌ر) چه‌كدارێن PKK بازگێن نه‌ قانوونی داناینه‌ ورۆژانه‌ باجێ ژ خه‌لكێ كاسبكارێ ده‌ڤه‌رێ وه‌ردگرن، هه‌ر كاسبكاره‌كێ به‌رهه‌ڤ نه‌بیت پاره‌ی بده‌ته‌ چه‌كدارێن PKK ب زۆرێ ژێ وه‌ردگرن.

هاوسه‌ر كه‌ریم، خه‌لكێ ئێك ژ گوندێن قه‌زا پێنجوینێ یه‌ بۆ رۆژناما (ئه‌ڤرۆ) دبیژیت” ئه‌م ب رێیا ڤان ده‌روازێن نه‌فه‌رمی یێن ئالۆگۆریا بازرگانی ل گه‌ل ئیرانێ رۆژانه‌ كاردكه‌ین بۆ وێ چه‌ندێ قۆتێ زارۆیێن خوه‌ په‌یدا بكه‌ین، به‌لێ چه‌كدارێن  PKK ب زۆرێ پاران ژمه‌ وه‌ردگرن و هیچ نه‌رازیبوونه‌كێ ژی ژلایێ مه‌ڤه‌ قه‌بوول ناكه‌ن و پێدڤیه‌ ب زۆری پاره‌ی بده‌ینه‌ وان”.

زێده‌تر گۆت” ل هه‌ر بازگه‌یه‌كا چه‌كدارێن PKK كو ب ناڤێ گۆمركێ دانای و مه‌ ژی ناڤێ وان كریه‌ (بازگێن باجێن ب زۆری)، زێده‌تر ژ شه‌ش چه‌كداران یێن لێ هه‌ین، ده‌مێ ئه‌و كه‌لوپه‌ل و په‌له‌وه‌ر و په‌زێ هاورده‌ دكه‌ین ئه‌و مه‌ رادگرن و باجێ ژ مه‌ وه‌ردگرن”.

سلێمان ئه‌حمه‌د، وه‌لاتیه‌كێ وێ ده‌ڤه‌رێ یه‌ كو بازرگانیێ ب په‌زی دكه‌ت دبێژیت” هه‌كه‌ چه‌كدارێن PKK باجێ ژ مه‌ وه‌رنه‌گرن ب زۆرێ، دێ داهاته‌كێ باش بده‌ست مه‌ كه‌ڤیت، به‌لێ پشكه‌كا مه‌زن یا وی پارێ بده‌ست مه‌ دكه‌ڤیت، چه‌كدارێن PKK ژمه‌ وه‌ردگرن”.

ئه‌ڤرۆ:

شیره‌تكارێ مه‌كته‌با سیاسی یا پارتی دیموكراتی كوردستان راگه‌هاند، چوونا شاندێن جودا یێن پارتی و ئێكه‌تی بۆ به‌غدا بۆ ئیمزاكرنا چو رێككه‌فتنان نینه‌ و به‌رۆڤاژی ئێكرێزیێ و ئێك هه‌لویستیێ ژی نابیت.

عارف روشدی، شیره‌تكارێ مه‌كته‌با سیاسی یا پارتی، ل دۆر بزاڤێن پارتی و ئێكه‌تی بۆ ئیمزاكرنا رێككه‌فتنه‌كا نوو د ناڤبه‌را وان دا، گۆت” ئه‌و پرسه‌ دێ ئێك ژ ته‌وه‌رێن دانوستاندنێ بیت د كۆمبوونا داهاتی یا هه‌ردو مه‌كته‌بێن سیاسی یێن پارتی و ئێكه‌تی”.

سه‌باره‌ت چوونا شاندێن جودا یێن پارتی و ئێكه‌تی بۆ به‌غدا، گۆت” سه‌ره‌دانا ڤێجارێ یا هه‌ردو شاندێن جودا یێن پارتی و ئێكه‌تی بۆ به‌غدا بۆ ئێمزاكرنا رێككه‌فتنێ نینه‌، به‌لكو بۆ وێ چه‌ندێ یه‌ كو زێده‌تر لێكتێگه‌هشتنه‌ك هه‌بیت د هه‌لویستێ ئالیێن دی یێن ئیراقی دا، بۆ وێ ئێكێ ل ژێر رۆناهیا وان لێكتێگه‌هشتنان ل هه‌رێما كوردستانێ رێكبگه‌ڤن، له‌وما وان سه‌ره‌دانان ب كاره‌كێ شاش نابینین، هه‌روه‌سا به‌رۆڤاژی ئێكرێزیێ و ئێك هه‌لویستیێ ژی نینن”.

ل دۆر چاوانیا پشكداریا كوردان د حوكمه‌تا داهاتی یا ئیراقێ دا و ئه‌و ئالیێن ژ كوردان د نێزیك، عارف روشدی گۆت” ل سالا 2003 مه‌ پێ باشبوو پشكداریا مه‌ كوردان د حوكمه‌تا ئیراقێ دا ل سه‌ر سێ پره‌نسیپان بیت ئه‌وژی رێككه‌فتن، هه‌ڤسه‌نگی و هه‌ڤپشكی، چونكه‌ ئیراق وه‌لاته‌كێ فره‌نه‌ته‌وه‌ و ئایین و هێزێن سیاسی یه‌ بۆ وێ چه‌ندێ حوكمه‌ته‌كا سه‌قامگیر هه‌بیت و بشێت ئه‌ركێن خوه‌ وه‌كو پێدڤی بجهبینیت، پێدڤیه‌ وان هه‌رسێ پره‌نسیپان ل به‌رچاڤ بگریت”.

شیره‌تكارێ مه‌كته‌با سیاسی یا پارتی گۆت ژی” نوكه‌ ژی مه‌ ئه‌و باوه‌ری یا هه‌ی و بزاڤێ دێ كه‌ین ئه‌و پره‌نسیپه‌ ل به‌رچاڤ بهێنه‌ وه‌رگرتن بۆ وێ چه‌ندێ حوكمه‌تا داهاتی حوكمه‌ته‌كا كارگۆزار بیت و به‌رسڤا خواستێن خه‌لكێ ئیراقێ بیت ب گشتی و یا هاریكار بیت د چاره‌سه‌ركرنا كێشێن دناڤبه‌را به‌غدا و هه‌رێما كوردستانێ دا هه‌ین، ل ده‌ف مه‌ یا گرنگه‌ حوكمه‌تا داهاتی باوه‌ری ب دستووری هه‌بیت و یا پێگیر بیت ب وی دستووری”.

سه‌باره‌ت یه‌كخستنا بزاڤێن ئالیێن كوردستانی ب تایبه‌تی پارتی و ئێكه‌تی وه‌كو شانده‌كێ ئێكگرتی سه‌ره‌دانا به‌غدا بكه‌ن، گۆت” پارتی چاڤه‌رێی شاندێ ئێكه‌تی نیشتمانی كوردستان دكه‌ت، پێشتر پارتی سه‌ره‌دانا ئێكه‌تیێ و هه‌موو ئالیێن دی كربوو، ب سه‌ره‌دانا شاندێ ئێكه‌تیێ دێ ده‌لیڤا لێكتێگه‌هشتنێ باشتر بیت”.

ل دۆر بزاڤێن ئیمزاكرنا رێككه‌فتنه‌كا نوو د ناڤبه‌را پارتی و ئێكه‌تیێ دا، دبێژیت” ئه‌و پرسه‌ دێ ئێك ژ ته‌وه‌رێن دانوستاندنێ بیت د كۆمبوونا داهاتی دناڤبه‌را هه‌ردو مه‌كته‌بێن سیاسی یێن پارتی و ئێكه‌تیێ، مه‌ پێخوه‌شه‌ ئه‌و رێككه‌فتنێ بهێته‌ كرن و بهێته‌ به‌رفره‌هكرن ژی ول گه‌ل ئالیێن دی ژی ئه‌و رێككه‌فتنه‌ هه‌بیت”.

ئه‌ڤرۆ:

فه‌رماندێ هێزا پێشمه‌رگه‌ی ل شنگالێ، قاسم شه‌شۆ، راگه‌هاند، ئه‌وا PKK ل شنگالێ دكه‌ت، كاره‌كێ گه‌له‌ك مه‌ترسیداره‌ و حوكمه‌تا ئیراقێ به‌رپرسیاره‌، چونكه‌ نابیت رێ بده‌ته‌ PKK ب وی شێوه‌ی ره‌فتارێ بكه‌ت، دیاركر ژی، هه‌كه‌ ئه‌و چه‌نده‌ به‌رده‌وام بیت، خه‌لك ل شنگالێ نامینیت.

قاسم شه‌شۆ، گۆت” ئه‌وا ل رۆژێن بۆری ل شنگالێ، كاره‌كێ گه‌له‌ك مه‌ترسیدار بوو و پێدڤیه‌ ب جدی هه‌لویست ل دۆر بهێته‌ وه‌رگرتن، كو PKK خوه‌ كریه‌ ده‌ستهه‌لاتدار و حیسابێ بۆ هیچ     ئالیه‌كی ناكه‌ت، هه‌تا بۆ حوكمه‌تا ئیراقێ ژی، ئه‌ڤ چه‌نده‌ ژی بۆ وێ ئێكێ دزڤریت كو حوكمه‌تا ئیراقێ یا خه‌مسار بوو ل ده‌مێ بۆری و رێككه‌فتنا شنگالێ بجهنه‌ئینایه‌، له‌وما ئه‌و ئه‌نجامێ خراب ژێ په‌یدابوو، نوكه‌ ژی حوكمه‌تا ئیراقێ یا به‌رپرسیاره‌ و پێدڤیه‌ بله‌ز چاره‌سه‌ریا وێ ره‌وشێ بكه‌ت و ئێدی رێ نه‌ده‌ت PKK ل شنگالێ بمینیت.

فه‌رماندێ هێزا پێشمه‌رگه‌ی ل شنگالێ رۆهنكر ژی” هه‌كه‌ سنووره‌ك بۆ PKK نه‌هێته‌ دانان، دێ ره‌وش خراپتر و مه‌ترسیدارتر بیت، چونكه‌ سه‌ركردێن PKK هه‌موو یێن لژ توركیا و سووریێ هاتین و ل ڤێرێ ژی ب ناڤێن كوردێن ئێزدی هه‌موو كارێن خراب دكه‌ن، له‌وما هه‌كه‌ ب ڤی شێوه‌ی بیت دێ خه‌لكێ شنگالێ ئاواره‌ بن و ئێدی نه‌شێن خوه‌ ل به‌ر وێ ره‌وشا ئه‌منی یا خراب بگرن، كو به‌رده‌وام ژ ئه‌گه‌رێ PKK ژیانا وان یا د مه‌ترسیێ دا.

ئه‌ڤرۆ ، زنار تۆڤی:

چاڤدێره‌كێ‌ سیاسی، بۆ رۆژناما (ئه‌ڤرۆ) راگه‌هاند، پشتی ئالۆزبوونا ره‌وشا ئه‌منی و سیاسی ل ئیراقێ، ب هاتنا داعشێ‌، ل سه‌رده‌مێ‌ سه‌رۆك وه‌زیرێن ئیراقێ یێ‌ به‌رێ‌ نوری مالكی، هاتنا هێزێن ئه‌مریكا ل سه‌ر داخوازیا حوكمه‌تا ئیراقی بوویه‌، د هه‌مان ده‌مدا رێككه‌فتنا ئه‌منی دناڤبه‌را ئیراقێ و ئه‌مریكا دا ل سالا 2008 ێ‌ هاتیه‌ ئیمزا كرن، دیسان په‌رله‌مانتارێن شیعی ژی ب پتریا ده‌نگان شیان قانوونه‌كێ‌ ده‌ربكه‌ن ب ناڤێ‌ ” ده‌ركرنا هێزێن بیانی “، ئه‌ڤ بزاڤه‌ یا شیعێن سه‌ر ب ئیرانێ‌ ڤه‌یه‌، ب تایبه‌تی ژی ئه‌و میلیشیێن دناڤا حوكمه‌تێ دا، ئه‌ڤه‌ داخوازیه‌كا ئیرانی یه‌، به‌ری كو داخوازیا خه‌لكێ‌ ئیراقێ بیت، هه‌روه‌سا ئه‌و میلیشیێن چه‌كداری یێن د ڤان هه‌لبژارتنێن جڤاتا نوونه‌رێن ئیراقێ دا شكه‌ستن ئینای، ئه‌و حه‌ز دكه‌ن ئه‌مریكا ژ ئیراقێ ده‌ركه‌ڤیت، دیسان پشتی ئه‌نجامدانا هه‌لبژارتنان، وان گرۆپێن شیعی هێرش دكرنه‌ سه‌ر ده‌ڤه‌را كه‌سك ل به‌غدا، هنده‌ك رۆكێت ئاراسته‌ی بالیۆزخانا ئه‌مریكا ل به‌غدا و بنگه‌هێن وان یێن له‌شكری كرن، هه‌روه‌سا هنده‌ك سه‌ركردێن میلیشیان ژ ئالیێ‌ ده‌ستهه‌لاتا دادوه‌ریا ئیراقێ ڤه‌ هاتینه‌ داخوازكرن ب مادێ‌ چار یێ‌ تیرۆرێ‌، لێ‌ ناهێنه‌ ده‌سته‌سه‌ر كرن.

د. ئازاد دۆسكی، چاڤدێرێ سیاسی ئه‌و ژی گۆت” مه‌ترسیا ڤان میلیشیێن شیعی یێن چه‌كدار، كێمتر نینه‌ ژ مه‌ترسیا داعشێ‌، چونكی ئه‌بۆ به‌كر به‌غدادی ژی درووشمێ‌ (ئه‌لده‌وله‌) بلند كربوو، دیسان ئه‌و میلیشیا دپشكدارن د حوكمه‌تێ‌ دا،د هه‌مان ده‌مدا كریارێن تیرۆریستی و چه‌كداری و میلیشیایی ل دژی به‌رژه‌وه‌ندیێن حوكمه‌تا فیدرالی و هێزێن هه‌ڤپه‌یمانان ئه‌نجام دده‌ن، ل ژێر چه‌ترێ‌ ده‌وله‌تبوونێ‌ دا، ئه‌ڤ چه‌نده‌ ل چو وه‌لاتان نینه‌، هه‌روه‌سا دناڤا له‌شكرێ ئیراقێ دا چه‌ندین رێكخراو و گرۆپێن چه‌كداری هه‌نه‌، به‌رژه‌وه‌ندیێن ده‌وله‌تێ‌ د ئێخنه‌ دمه‌ترسیێ‌ دا، له‌وما دڤێت حوكمه‌تا ئیراقێ ڤێ‌ پرسێ‌ چاره‌سه‌ر بكه‌ت، هه‌ر چه‌نده‌ موقته‌دا سه‌دری ئاماژه‌ ب هندێ‌ دایه‌، دڤێت ئه‌نجامێن دووماهیێ‌ یێن هه‌لبژارتنان بهێنه‌ په‌سه‌ند كرن و گۆتیه‌ ژی، دڤێت چه‌ك ژ ده‌ستێ‌ گرۆپێن شیعی یێن سه‌ر ب ئیرانێ‌ ڤه‌ بهێته‌ ده‌رخستن”.

د. ئازاد دۆسكی هێشتا دبێژیت” هه‌ر چه‌نده‌ ب پتریا ده‌نگێن كۆتلێن شیعی، قانوونه‌ك بۆ ده‌ركرنا هێزێن ئه‌مریكا ژ ئیراقێ ل جڤاتا نوونه‌رێن ئیراقێ ڤه‌ هاتیه‌ په‌سه‌ندكرن، لێ‌ هێشتا ئه‌و رێككه‌فتنا ئه‌منی یا ل سالا 2008 ێ‌ یا د ناڤبه‌را ئه‌مریكا و ئیراقێ دا هاتیه‌ ئیمزا كرن، نه‌هاتیه‌ هه‌لوه‌شاندن، له‌وما بۆ هه‌لوه‌شاندنا هه‌ر رێككه‌فتنه‌كێ‌ دڤێت جڤاتا نوونه‌ران ده‌نگی ل سه‌ر بده‌ت، دیسان هه‌رێما كوردستانێ‌ هه‌تا راده‌كێ‌ زۆر ماف هه‌یه‌، رێككه‌فتنه‌كێ‌ ل گه‌ل هێزێن بیانی بكه‌ت، ئه‌و ژی ب رێیا ده‌ركرنا قانوونه‌كێ‌ ل په‌رله‌مانێ‌ كوردستانێ‌، داكو شه‌رعیه‌تێ‌ بده‌ته‌ مانا هێزێن ئه‌مریكا ل كوردستانێ‌، دیسان سیسته‌مێ‌ سیاسی ل ئیراقێ سیسته‌مه‌كێ‌ فیدرالیه‌، پتریا وان قانوونێن ژ ئالیێ جڤاتا نوونه‌رێن ئیراقێ دهێنه‌ په‌سه‌ند كرن، ئێك ژ وان قانوونان ده‌ركرنا هێزێن بیانیه‌، بۆ په‌سه‌ندكرنا ڤێ‌ قانوونێ‌ پێدڤی ب رێككه‌فتنێ‌ ل گه‌ل په‌رله‌مانێ‌ كوردستانێ‌ هه‌یه‌، ئه‌ڤه‌ پرسه‌كا قانوویه‌، به‌ری كو پرسه‌كا سیاسی بیت”.

وی چاڤدێرێ‌ سیاسی ئاشكرا كر ژی” وه‌زاره‌تا گه‌نجینا ئه‌مریكا چه‌ندین كه‌ساتیێن شیعی یێن رادیكال خستینه‌ ل ژێر سزایان، دیسان دژایه‌تیكرنا ئه‌مریكا ژ ئالیێ‌ حوكمه‌تا ئیراقێ ڤه‌، دێ‌ باجا وێ‌ گه‌له‌ك یا گران بیت، دیسان حوكمه‌تا ئیراقێ ژی زوو ب زوو شاشیه‌كا ب ڤی ره‌نگی ناكه‌ت، چونكی عیراق دزانیت هه‌ژموونا ئه‌مریكا ل جیهانێ‌ چه‌نده‌، دیسان پێدڤیه‌ كورد ژی هه‌موو داخوازیێن خوه‌ ب رێیا دستوری ژ حوكمه‌تا ئیراقێ بكه‌ن، هه‌ر چه‌نده‌ ژ سالا 2005 ێ‌ هه‌تا نوكه‌ حوكمه‌تا ئیراقێ چه‌ندین مادێن دستوری بجهنه‌ئیناینه‌، ژ وان ژی مادێ‌ 140، پرسا بۆدجی و پرسا قانوونا په‌ترۆلێ و غازێ‌ و چه‌ندین پرسێن دیتر ژی ماینه‌ هه‌لاویستی، دیسان یا گرنگ ئه‌وه‌، كورد هه‌موو ب ئێكده‌نگ و ئێكرێزی بچنه‌ به‌غدا، هه‌ر چه‌نده‌ نوكه‌ ل سلێمانیێ‌، جۆره‌ ئالۆزیه‌كا سیاسی هه‌یه‌، گۆتارا پارتێن سلێمانیێ‌ یا ئێكرێز نینه‌، ئه‌ڤه‌ د به‌رژه‌وه‌ندیا كوردان دا نینه‌، له‌وما دڤێ‌ قووناغێ‌ دا گرنگه‌ ئه‌و حزبه‌ خوه‌ ژ موزایه‌داتێن سیاسی و عه‌قلێ‌ شۆفینیا عه‌ره‌بی دوور بكه‌ن.

ئه‌ڤرۆ:

سه‌رۆكێ گشتی یێ پارتا ماف و ئازادیان ل باكورێ كوردستانێ راگه‌هاند كو دڤێت سیسته‌مێ نها ل توركیا بهێته‌ گوهۆرین، چونكو سیسته‌مێ نها كوردان قه‌بوول ناكه‌ت و هه‌كه‌ سیسته‌مێ توركیا ببیته‌ فیدرالی دێ پرسا كوردی و هه‌موو پرسێن دی هێنه‌ چاره‌سه‌ركرن، چونكو ب شه‌ری پرسا كوردی ناهێته‌ چاره‌سه‌ركرن.

له‌تیف ئه‌پئۆزده‌میر سه‌رۆكێ گشتی یێ پارتا ماف و ئازادیان پشتی كۆنگرێ پارتا خوه‌ ل ئامه‌دێ بۆ ده‌زگه‌هێن راگه‌هاندنێ ئاخڤی و دیار كر كو دڤێت هه‌موو پارتێن كوردی ل توركیا پێكڤه‌ كار بۆ چاره‌سه‌ركرنا پرسا كوردی بكه‌ن، چونكو پرسا كوردی ئێدی بوویه‌ پرسه‌كا سه‌ره‌كی ل توركیا و بێی چاره‌سه‌ركرنا پرسا كوردی پرسێن دی یێن توركیا ژی ناهێنه‌ چاره‌سه‌ركرن و گۆت: (سیسته‌مێ نها یێ توركیا ژی بێگومان بخوه‌ گه‌له‌ك ئاریشه‌یه‌، چونكو سیسته‌مێ نها هه‌بوونا كوردان قه‌بوول ناكه‌ت و بێگومان هه‌تا سیسته‌مێ نها یێ توركیا وه‌كو خوه‌ بمینیت پرسا كوردی ژی ناهێته‌ چاره‌سه‌ركرن، ژ به‌ر هندێ ژی مه‌ به‌ری نها گه‌له‌ك جاران دیار كریه‌ كو دڤێت سیسته‌مێ نها یێ توركیا بهێته‌ گوهۆرین).

ناڤهاتی د به‌رده‌وامیا ئاخڤتنا خوه‌ دا ئه‌و یه‌ك ژی دیار كر كو دڤێت سیسته‌مێ ده‌ستهه‌لاتداریێ ل توركیا ببیته‌ فیدرالی، ده‌مێ سیسته‌مێ توركیا ببیته‌ فیدرالی دێ پرسا كوردی و هه‌موو پرسێن دی یێن نها ل توركیا ژی هێنه‌ چاه‌رسه‌ركرن، هه‌كه‌ سیسته‌مێ توركیا نه‌بیته‌ فیدرالی و زۆرداریا نها ل سه‌ر كوردان ژی وه‌كو خوه‌ به‌رده‌وام بیت بێگومان دێ كورد ژی نه‌چار بن گه‌له‌ك رێیێن دی بكار بینن دا بگه‌هنه‌ مافێن خوه‌ و گۆت: (ل جیهانێ گه‌له‌ك ملله‌تان شه‌ر بۆ ئازادیا خوه‌ كرن و د ئه‌نجام دا هه‌ر ب رێیا دانوستاندنان و ئاشتیێ گه‌هشتنه‌ مافێن خوه‌، ژ به‌ر هندێ ژی دڤێت به‌رپرسێن توركیا ئێدی ڤێ راستیێ قه‌بوول بكه‌ن كو بێی چاره‌سه‌ركرنا پرسا كوردی ئالۆزیێن نها ل توركیا دێ به‌رده‌وام بن، لێ د هه‌مان ده‌می دا دڤێت هه‌موو پارتێن كوردی ل توركیا ژی پێكڤه‌ ل سه‌ر به‌رنامه‌كێ نه‌ته‌وه‌یی بۆ بده‌ستڤه‌ئینانا مافێن نه‌ته‌وه‌یی یێن گه‌لێ كورد كار بكه‌ن).

سه‌رۆكێ گشتی یێ پارتا ماف و ئازادیان HAK-PAR ئه‌و یه‌ك ژی دیار كر كو ب شه‌رێ چه‌كداری پرسا كوردی ناهێته‌ چاره‌سه‌ركرن، چونكو ئه‌زموونا چه‌ندین سالێن بۆری ئه‌و یه‌ك سه‌لماند كو شه‌ر بوویه‌ ئه‌گه‌رێ هندێ پرسا كوردی ل توركیا پتر ئالۆز بوویه‌ و نه‌هاتیه‌ چاره‌سه‌ركرن و گۆت: (ژ به‌ر هندێ ژی ئه‌م دبێژین دڤێت پرسا كوردی دوور ژ شه‌ری و ب رێیێن سیاسی و د ناڤ سیسته‌مه‌كێ فیدرالی دا ل توركیا بهێته‌ چاره‌سه‌ركرن، دڤێت توركیا هه‌بوونا پرسا كوردی قه‌بوول بكه‌ت، گه‌له‌ك جاران به‌رپرسێن توركیا دبێژن ل توركیا پرسا كوردی نینه‌ یان ژی ئه‌ردۆغان دبێژیت پرسا كوردی هاتیه‌ چاره‌سه‌ركرن، ئه‌و یه‌ك راست نینه‌، پرسا كوردی ل توركیا نه‌هاتیه‌ چاره‌سه‌ركرن و ئالۆزتر ژی لێ هاتیه‌).

ناڤهاتی د دووماهیا ئاخڤتنا خوه‌ دا ئاماژه‌ ب هندێ ژی كر كو سیسته‌مێ نها ل هه‌رێما كوردستانێ نموونه‌كا باش و سه‌ركه‌فتیه‌ و مه‌ پێ باشه‌ ل پارچێن دی یێن كوردستانێ ژی هه‌مان ئه‌زموون بهێته‌ دوباره‌كرن، چونكو ده‌وله‌تێن داگیركه‌رێن كوردستانێ نه‌شێن ب شه‌ری كوردان ژناڤ ببه‌ن و دڤێت هه‌بوونا كوردان قه‌بوول بكه‌ن، هه‌تا كورد نه‌گه‌هنه‌ مافێن خوه‌ یێن ره‌وا ره‌وشا رۆژهه‌لاتا ناڤین ژی ئارام نابیت، ژ به‌ر هندێ ژی دڤێت توركیا و ده‌وله‌تێن دی كار بۆ چاره‌سه‌ركرنا پرسا كوردی بكه‌ن.

ئه‌ڤرۆ، نه‌وزاد هلۆری:

ئه‌ندامێ‌ مه‌كته‌با سیاسی و به‌رپرسێ‌ ده‌زگه‌هێ‌ ره‌وشه‌نبیری و راگه‌هاندنا پارتی دیموكراتی كوردستان سه‌ره‌دانا ناڤه‌ندا خانی یا راگه‌هاندن و ره‌وشه‌نبیرێ‌ دا، د داخوانیه‌كا رۆژنامه‌ڤانی دا بۆ سازیێن راگه‌هاندنا ناڤه‌ندێ‌ دیاركر كو پارتی دیموكراتی كوردستان ل گه‌ل ئالیێن سیاسی د دانوستاندنێن به‌رده‌وام دایه‌ بۆ وێ‌ یه‌كێ‌ حوكمه‌ته‌ك ل ئیراقێ بهێته‌ پێكئینان كو هه‌موو پێكهاته‌یێن ئیراقێ خوه‌ تێدا ببینن.

مه‌حمود محه‌مه‌د، ئه‌ندامێ‌ مه‌كته‌با سیاسی و به‌رپرسێ‌ ده‌زگه‌هێ‌ ره‌وشه‌نبیری و راگه‌هاندنا پارتی دیموكراتی كوردستان گۆت”وه‌كو دیار نه‌خشێ‌ سیاسی یێ‌ ئیراقێ ب كێموكوری هاتیه‌ دروستكرن و هه‌رده‌م وه‌كو مینێن داناینه‌ كو قابلی وێ چه‌ندێ یه‌ زیانێ‌ ب هه‌موو پێكهاتێن ئیراقێ بگه‌هینیت، ل ده‌ستپێكا دروستبوونێ‌ هه‌تا نوكه‌ زۆر ب كێمی هه‌بوویه‌ كو ئارامیه‌ك ل ئیراقێ دروست ببیت كو خه‌لك ژ سیاسه‌تا حوكمه‌تا وێ‌ رازی ببیت و ب دلخوه‌شی بژیت، پێكهاتێن ئیراقێ ب ئارمانج و هیڤیێن خوه‌ ناگه‌هن و بوویه‌ ئه‌گه‌ر كو ئاسته‌نگ هه‌مبه‌ر ژیانا وان دروست ببن وئه‌ڤ چه‌نده‌ به‌ر ب زێده‌بونێ‌ یه‌،  نوكه‌ ئاریشه‌ كه‌فتینه‌ سه‌رئێك و ئیراق به‌ر ب مه‌زهه‌بیێ و تایفه‌گه‌ریێ دچیت، ئه‌ڤ ئێكه‌ ژی بوویه‌ ئه‌گه‌ر كو سه‌قامگیریا سیاسی و جڤاكی و ئابووری ل كوردستانێ‌ و ئیراقێ ژی دروست نه‌بیت و خه‌لك ل پاشه‌رۆژا خوه‌ ئارام و پشتراست نه‌بوویه‌”.

زێده‌تر گرت”د نوكه‌ ژی دا ئه‌ڤ جۆرێ‌ كه‌لتوری ل ئیراقێ دهێته‌ دیتن و ل شوونا به‌خته‌وه‌ریێ‌ بۆ ئیراقێ ببینن، به‌رده‌وام نه‌هامه‌تی و نه‌خوه‌شی بۆ خه‌لكی دئینن و ئیراق د یاریه‌كا ترسناك دا دژیت ب تایبه‌تی هه‌بوونا ده‌ستێ‌ ده‌ره‌كی، ئیراقێ كو نوكه‌ شیانێن داریی یێن مه‌زن یێن هه‌ین و په‌ترۆل هه‌یه‌ و خه‌لك ژی هه‌یه‌، به‌لێ‌ نه‌بوویه‌ خوه‌شگوزه‌رانی بۆ وه‌لاتیان، به‌لكو نه‌خوه‌شی زێده‌كرینه‌ و هه‌ژاری زێده‌تر بویه‌، ژ به‌ر ڤێ‌ چه‌ندێ پێدڤیه‌ پێداچوونه‌كا هوور و سه‌رده‌میانه‌ بۆ ره‌وشا گشتی یا ئیراقێ بهێته‌كرن و ب تمامی بهێته‌ چاره‌سه‌ركرن ب تایبه‌تی ژی ئه‌و ئاریشێن كو ئه‌ڤه‌ چه‌ند ساله‌ د ناڤبه‌را هه‌رێما كوردستانێ و ئیراقێ دا ب هه‌لاویستی ماین”.

ل دۆر رێكخستنا ناڤمالا كوردی وهه‌روه‌سا ناڤمالا سونه‌یان ژی كو هنده‌ك جاران دهێنه‌ تومه‌تباركرن ب ئه‌گه‌رێ پێكنه‌ئینانا حوكمه‌تا داهاتی یا ئیراقێ، ناڤبری گۆت”رێكخستنا ناڤمالێن هه‌موو پێكهاتێن ئیراقێ كاره‌كێ گه‌له‌ك گرنگه‌، سونه‌ ژی وه‌كو پێكهاته‌كا ئیراقێ یا گرنگه‌ كو رێكخستنه‌ك بكه‌ڤیته‌ تێدا و هه‌موو پێكهاته‌ د هه‌ڤپشك بن د پرسا ب رێڤه‌برنا ئیراقێ دا و وان پێكهاتان ئه‌رك و مافێن خوه‌ ژی هه‌بن، هه‌رده‌مێ‌ ناكۆكی دناڤ ئێك ژ وان پێكهاتان دروست بوو، بێگومان دێ ئاریشه‌ بۆ هه‌موو ئیراقێ دێ دروست بن”.

ئه‌ندامێ‌ مه‌كته‌با سیاسی یا پارتی دیموكراتی كوردستان د درێژاهیا داخویانیا خوه‌ دا دیاركر ژی كو تاكه‌ تشتێ‌ كو نوكه‌  سه‌باره‌ت پوستێ‌ سه‌رۆك كومارێ‌ ئیراقێ هاتیه‌ ئێكلاكرن ئه‌وه‌ كو ئه‌ڤ پوسته‌ پشكا كوردانه‌ و گۆت” هه‌تا نوكه‌ یا دیار نینه‌ كا پوستێ‌ سه‌رۆك كومارێ‌ ئیراقێ بۆ كیش لایه‌نێ سیاسی یه‌، به‌لكو ئه‌ڤ چه‌نده‌ دێ‌ مینیت هه‌تاكو ئالیێن سیاسی ل سه‌ر رونن و دانوستاندنێ‌ بكه‌ن و د ناڤبه‌را خوه‌ دا بگه‌هنه‌ رێككه‌فتنه‌كێ‌ كا ئه‌ڤ پوسته‌ بۆ كیش ئالیێ‌ كوردی بیت، ئه‌ڤ یه‌ك د ناڤبه‌را كورد و سونه‌ و شیعه‌یان دا پێشتر هاتیه‌ ئێكلاكرن كو پوستێ سه‌رۆك كوماری بۆ كوردایه‌ له‌وا دبێژین نه‌ رێككه‌فتنه‌كا نوێ‌ یه‌، هه‌تا نوكه‌ چو دانوستاندن بۆ دیاركرنا كه‌سه‌كی بۆ پوستێ‌ سه‌رۆك كوماری نه‌هاتینه‌كرن”.

سه‌باره‌ت وێ چه‌ندێ كو پشتی ده‌ستكاریكرنێ د پرۆسا ڤاڤارتنا ده‌نگان دا و راگه‌هاندنا ئه‌نجامێ‌ دووماهیێ‌ یێن هه‌لبژارتنێن جڤاتا نوونه‌رێن ئیراقێ وكێمبوونا  دو كورسیێن پارتی و چونا وان هه‌ردو كورسیان بۆ ئێكه‌تیێ، مه‌حموود محه‌مه‌د، گۆت”مه‌ پێشتر ژی گوت كو ئه‌و هه‌ردو كورسیێن پارتی یێن هاتینه‌ تالانكرن، بێگومان ئه‌ڤ یه‌ك ژی ب ده‌ستێوه‌ردانا سه‌رۆك كومارێ‌ ئیراقێ و جڤاتا بلند یا دادوه‌ریا ئیراقێ بوویه‌ و كۆمسیۆنا بلند یا هه‌لبژارتنان ل ئیراقێ كفتیه‌ بن فشاراه‌ وێ‌ لایه‌نێ‌ كو هاتیه‌ ئاراسته‌كرن، ئه‌م دێ‌ ل دادگه‌ها فیدرالی یا ئیراقێ به‌حس كه‌ین، دیسان وه‌كو پارتی به‌ری هه‌لبژارتنان و پشتی هه‌لبژارتنان ژی مه‌ لێكتێگه‌هشتن ل گه‌ل (سه‌در)ی هه‌بوویه‌، پارتی ل سه‌ر دانوستاندن و سه‌ره‌دانێن خوه‌ بۆ لایێ‌ سه‌دری و هه‌موو ئالیێن دن دێ‌ دێ به‌رده‌وام بیت داكو لێكتێگه‌هشتنه‌كا دروست بهێته‌كرن و د ئه‌نجام دا حوكمه‌ته‌ك بهێته‌ دروستكرن كو هه‌موو پێكهاتێن ئیراقێ خوه‌ تێدا ببینن”.

ئه‌ندامێ‌ مه‌كته‌با سیاسی و به‌رپرسێ‌ ده‌زگه‌هێ‌ ره‌وشه‌نبیری و راگه‌هاندنا پارتی دیموكراتی كوردستان ل دۆر كێمبونا ده‌نگان د هه‌لبژارتنێن ڤێجارێ یێن جڤاتا نوونه‌رێن ئیراقێ ب تایبه‌تی ل پارێزگه‌ها دهۆكێ گۆت”ب شێوه‌كێ‌ گشتی ده‌نگ ل هه‌موو پارێزگه‌هێن هه‌رێما كوردستانێ‌ یێن كێمبوین، بێگومان هنده‌ك ژ ئه‌گه‌ران گرێدای  وێ چه‌ندێ نه‌ كو هه‌موو كارتێن بایۆمه‌تری نه‌هاتینه‌ به‌لاڤكرن و هنده‌ك ژ وان كارتان ژی نه‌هاتینه‌ خواندن و بێگومان هنده‌ك ژی نه‌چووینه‌ ده‌نگدانێ‌، وه‌كو پارتی لژنه‌ك هاتیه‌ پێكئینان و دێ‌ به‌حس ل كێمبوونا ده‌نگان كه‌ت و پشتی ڤه‌كولینێ‌ دێ‌ دووڤچوون هێته‌كرن كا ئه‌گه‌ر چیه‌ و چه‌وا بهێته‌ چاره‌سه‌ركرن، بێگومان دبیت هنده‌ك ژ ئه‌گه‌رێن كێمبوونا ده‌نگان گرێدای ده‌ستێوه‌ردانێ‌ ژی بیت”.

ل دوماهیێ‌ ژی گۆت”پارتی دیموكراتی كوردستانێ‌ دێ‌ كۆنگرێ‌ خوه‌ ئه‌نجام ده‌ت، به‌لێ‌ هه‌رده‌مێ‌ كو ببینیت كو ده‌م یێ گونجایه‌ بۆ ئه‌نجامدانا كۆنگره‌ی دێ بریارێ ده‌ت و ئه‌ز ب باوه‌رم ده‌مێن داهاتی دێ‌ ئه‌ڤ چه‌نده‌ دیار بیت”.

ئه‌ڤرۆ، له‌زگین جوقی

قایمقامێ‌ قه‌زا شنگالێ راگه‌هاند، داخستنا داموده‌زگه‌هێن حوكمه‌تا ئێراقی ل شنگالێ گاڤه‌كا شه‌رعی نینه‌ وب هیچ شێوه‌یه‌كی دانپێدان ب وێ بریارا (یه‌په‌شێ) یا ب سه‌ر PKK ێ ڤه‌ ناهێته‌ كرن.

مه‌حما خه‌لیل، قایمقامێ‌ قه‌زا شنگالێ دیاركر” نابیت (یه‌په‌شه‌) بریاران ل شنگالێ بده‌ت و ب هیچ شێوه‌یه‌كێ‌ دانپێدان ب بریارێن داخستنا داموده‌زگه‌هێن حوكمه‌تا ئیراقێ ل شنگالێ ناهێته‌ كرن وپێدڤیه‌ حوكمه‌تا ئێراقی ل سه‌ر ره‌فتارێن (یه‌په‌شه‌) بهێته‌ سه‌رهێلێ وئه‌ڤ سیاسه‌تا شكه‌ستی بۆ حوكمه‌تا به‌غدا دزڤریت ده‌مێ‌ دبێژیت وێ رێككه‌فتنا شنگالێ یا بجهئێنای، هه‌روه‌سا (یه‌په‌شه‌) كار دكه‌ت ترسێ‌ بێخیته‌ د ناڤ فه‌رمانبه‌رێن شنگالێ‌ دا وڤان ره‌فتارێن خراب به‌رامبه‌ر داموده‌زگه‌هێن حوكمه‌تا ئێراقێ‌ ل شنگالێ دكه‌ت”.

قایمقامێ‌ قه‌زا شنگالێ، ئه‌وژی دیاركر كو پێدڤیه‌ حوكمه‌تا ئێراقی داموده‌زگه‌هێن شه‌رعی یێن شنگالێ بپارێزیت وب هه‌موو شێوه‌یان پێدڤیه‌ پاراستنا فه‌رمانبه‌ران بهێته‌ كرن و PKK شنگالێ چۆل بكه‌ت تاكو ژیان ڤه‌گه‌ریت بۆ شنگالێ.

مه‌حما خه‌لیل، پتر رۆهنكر كو PKK ناخوازیت ژیان بۆ شنگالێ ڤه‌گه‌ریت وبه‌رده‌وام دڤێت شنگال یا وێرانكری بیت وئاڤه‌دانی و ته‌ناهی ل شنگالێ په‌یدا نه‌بیت، هه‌روه‌سا دووپاتكر” ئه‌م دانپێدانێ ب بریارێن (یه‌په‌شه‌) ناكه‌ین وئه‌و مه‌رجه‌عێ‌ مه‌ نینن ودشكه‌ستی نه‌ وهه‌تا ئه‌م دانپێدانی ژی ب وان ناكه‌ین كو ب دیتنا مه‌  PKK ب پشته‌ڤانیا حه‌شدا شه‌عبی ڤان گاڤان دهاڤێت.

دهێته‌ زانین سپێده‌هیا دوهی ئێكشه‌مبی 12/12/2021ێ‌ هه‌موو داموده‌زگه‌هێن شنگالێ ژلایێ (یه‌به‌شه‌) ڤه‌ هاتبوونه‌ ئاگه‌هداركرن  كو بهێنه‌ داخستن هه‌تا ده‌مه‌كێ‌ نه‌ دیاركری.

جه‌میل سفۆكا، رێڤه‌به‌رێ‌ باژێرڤانیا شنگالێ دبێژیت” ل سپێده‌هیا 12/12/2021ێ‌ ئه‌م هاتینه‌ ئاگه‌هداركرن ژلایێ‌ PKK ڤه‌ بۆ داخستنا ئاڤاهیێ‌ باژێرڤانیێ‌ وهێزه‌ك ژی ل به‌ر ده‌رگه‌هێ‌ ئاڤاهیێ باژێرڤانیێ یا هاتیه‌ جهگیركرن بۆ بجهئینانا وێ بریارێ”.

ناڤبری ئاماژه‌كر كو ئێدارا پارێزگه‌ها نه‌ینه‌وا  ل دۆر بریارا داخستنا داموده‌زگه‌هێن حوكمه‌تێ یا هاتیه‌ ئاگه‌هداركرن و تنێ‌ بنگه‌هێ‌ پۆلیسان ل شنگال مایه‌.