ئه‌ڤرۆ نيوز:

له‌تيف عومه‌ر، ئاخفتنكه‌رێ ب ناڤێ ئێكه‌تى نشتيمانى كوردستان راگه‌هاند كو پشتى هه‌لبژارتنا ده‌سته‌يا سه‌رۆكاتيا په‌رله‌مانى قووناغه‌كا نوو د ره‌وشا سياسى يا هه‌رێما كوردستانێ دا هاته‌ پێش.

گۆتژى: “ئێكه‌تى گۆتن و هه‌لويستێن نوو دێ هه‌بن و ئه‌و هه‌لويست و گۆتن د جودانه‌ ژ يێن به‌رى نها خستينه‌ به‌ر چاڤ”.

ئه‌ڤرۆ نيوز:

بڕياره‌ ئه‌ڤرۆ ل باژێرێ سلێمانيێ كۆمبوونه‌كا به‌فره‌هـ د ناڤ سه‌ركردايه‌تى و ئورگانێن ئێكه‌تيێ دا ب رێڤه‌ بچيت و تێدا هه‌لويستێ خوه‌ د ده‌رباره‌ى پشكداريكرن د پرۆسا سياسى يا هه‌رێما كوردستانێ دا گه‌نگه‌شه‌ بكه‌ت.

له‌تيف شێخ عومه‌ر، ئاخفتنكه‌رێ ب ناڤێ ئێكه‌تى نشتيمانى كوردستان بۆ ميديا حزبا خوه‌ راگه‌هاند كو مه‌كته‌با سياسى يا ئێكه‌تيێ دێ كۆمبوونه‌كا به‌رفره‌هـ بۆ جڤاتا ناڤه‌ندى و مه‌لبه‌ند و كۆميته‌يان ئه‌نجام ده‌ت، “پتريا كادران دێ تێدا د پشكدار بن”.

ئاشكه‌را ژى كر كو گشتاندنا مه‌كته‌با سياسى كو ئاراسته‌ى جڤاتا ناڤه‌ندى و مه‌لبه‌ند و كۆميتان كريه‌، يا تايبه‌ته‌ ب به‌رچاڤكرنا دووماهى هه‌لويستێ ئێكه‌تيێ ده‌رباره‌ى گورانكاريێن سياسى بۆ كادران روون كه‌ت.

ب گۆره‌ى پێزانينێن ئه‌ڤرۆ نيوز د كۆمبوونا ئێكه‌تيێ يا ئه‌ڤرۆ دا دێ دووماهى هه‌لويستێ وێ حزبێ هێته‌ دان ل هه‌مبه‌ر هه‌ر بژارده‌كا وان هه‌ى كو هنده‌ك سه‌ركردێن وێ داخوازا دو ئيداره‌ى و هنده‌ك ژى يا ئۆپۆزسيۆن بوون و هنده‌ك ژى يا پشكداريكرن د حوكمه‌تێ دا دكه‌ن. دبيت بڕيار ل سه‌ر ده‌ستنيشانكرنا رۆژا ئه‌نجامدانا كۆنگرێ ئێكه‌تيێ يێ چارێ ژى بهێته‌ دان.

ئه‌ڤ كۆمبوونه‌ پشتى وێ چه‌ندێ هات كو ل 18ى شوباتا 2019ێ كۆمبوونا په‌رله‌مانێ كوردستانێ بێ ئاماده‌بوونا ئێكه‌تى نشتيمانى كوردستان هاته‌ ئه‌نجام دان و تێدا ده‌سته‌يا سه‌رۆكاتيا په‌رله‌مانى هاته‌ هه‌لبژارتن.

ل به‌رى كانديدكرنا به‌ربژارا خوه‌ بۆ سه‌رۆكاتيا په‌رله‌مانى، هێمن هه‌ورامى، به‌رى بهێته‌ به‌ربژاركرن بۆ جێگرێ ئێكێ يێ سه‌رۆكێ په‌رله‌مانى ب ناڤێ پارتى ديموكراتى كوردستان راگه‌هاند كو هه‌رده‌ما ئێكه‌تى رازى بوو پۆستێ سه‌رۆكاتيا په‌رله‌مانى وه‌ربگريت، ئه‌و د ئاماده‌ نه‌ سه‌رۆكا په‌رله‌مانى ده‌ست ژ كار بكێشيت و ئێكه‌تيه‌ك بۆ ڤى پۆستى خوه‌ به‌ربژار كه‌ت و ئه‌و ده‌نگى پێ بده‌ن.

ئه‌ڤرۆ نیوز، ئازاد نسری:

رێڤه‌به‌رێ‌ راگه‌هاندنا په‌روه‌ردا گشتی یا پارێزگه‌ها دهۆكێ‌ دیار كر كو ئه‌زموونێن ده‌ستپێكی “تمهیدی” یێن پۆلا 12 ئاماده‌یی سالا خواندنێ‌ 2019-2018 ئه‌ڤرۆ رۆژا چارشه‌مبی 20ى شوباتا 2019ێ ل ده‌مژمێر 13:00ی پشتی نیڤرۆ دێ‌ هێنه‌ ئه‌نجامدان و شه‌ش هزار و 986 قوتابی دێ‌ پشكداریێ‌ تێدا كه‌ن.

ئه‌حمه‌د عه‌بدوللا زوبێر رێڤه‌به‌رێ‌ راگه‌هاندنا په‌روه‌ردا گشتی یا پارێزگه‌ها دهۆكێ‌ بۆ ئه‌ڤرۆ نیوز گۆتژی: (هه‌موو به‌رهه‌ڤی یێن هاتینه‌ كرن و هه‌موو پێدڤیێن ئه‌زموونان یێن هاتینه‌ دابینكرن).

ئه‌حمه‌د عه‌بدوللا زوبێر خویا كر كو سێ هزار و 824 قوتابی ل پشكا زانستی و سێ هزار و 61 قوتابی ل پشكا وێژه‌یی و 101 قوتابی ژی ل پشكا پیشه‌یی دێ‌ پشكداریێ‌ د ڤان ئه‌زموونان دا كه‌ن.