ئەڤرۆ نیوز، ئەمیر ئەترووشی:
ژێدەرەکی ژ قەزا شنگالێ راگەھاند کو بەرھەڤی دھێنە کرن رێیا سحێلا بۆ شنگال ب شێوەیەکێ فەرمی بھێتە ڤەکرن.
وی ژێدەری تایبەت بۆ ئەڤرۆ نیوز دیار کر کو رێککەفتن د ناڤبەرا حوکمەتێن ھەرێما کوردستانێ و عیراقێ دا ھاتیە کرن بۆ ڤەکرنا رێیا سحێلا بۆ شنگال، بەلێ ھەتا نوکە ئەڤ رێیە ب فەرمی نەھاتیە ڤەکرن و بڕیارە ل چەند رۆژێن بھێت ببیتە بریار و بکەڤیتە د وارێ بجھئینانێ دا و گۆت: “ھەموو رێکار و دانۆستاندن دناڤبەرا ھەر دو لایەنان دا ب دووماھی ھاتینە و ب تنێ چاڤەڕێ ب بجھئینانا بریارێ نە”.

ئەڤرۆ نیوز، لەزگین جوقی:
سەرۆکێ دەزگەھی ئێزدیان ل ھولەندا تایبەت بۆ ئەڤرۆ نیوز دیار کر کو کۆمبوونەکا گرنگ ل سەر پێکھاتان سوبەھی 29/11/2018 دێ ل جنێڤ ھێتە ئەنجامدان و بۆ دەمێ دو رۆژان دێ یا بەردەوام بیت و گۆت: “کوردێن ئێزدی د ڤێ کۆمبوونێ دا دێ بەرھەڤ بن و دێ داخواز ھێتەکرن ناڤێ ئاینی ل سەر ناسنامان بھێتە راکرن”.
حەسو ھورمی، سەرۆکێ دەزگەھی ئێزدیان ل ھولەندا دیار کر کو پیکھاتێن ئاینی یێن گەلەک وەلاتان دێ د کۆمبوونا جنێڤ دا بەرھەڤ بن، چونکو کۆمبوونەکا گرنگ ل سەر چارەنڤیسی پیکھاتان ل وەلاتان وەکو ئێزدی و یھودی و شەبەک و کاکەیی و گەلەک پێکھاتیێن دی یێن ئاینی و ئۆلی و گۆت: “ئەم وەکو ئێزدی دێ داخوازا رەتکرنا قانوونێن کەڤن کەین و ئەو قانوونێن ھەتا نوکە پیکھاتێن ئاینی ژ بەر دبنە قوربانی بۆ نموونە ژی دەمێ تیرۆرستێن داعش ھاتینە عیراقی، چونکو ئەم ئێزدی بووین و ئەم کورد بووین گەلەک ژ خەلکێ مە ھاتە کوشتن و دێ داخوازێ کەین ناڤێ ئاینی ل سەر ناسنامان نەمینت”.
ناڤھاتی ئاماژە دا وێ چەندێ کو ژ ئەنجامی شەران و ھاتنا رێکخراوێن تیرۆری گەلەک زارۆ یێن پەیدابووین و ئەڤ زارۆیە ماینە بی باب و یێن ماینە بی ناسنا مە ژ بەر ڤێ چەندێ دێ دانوستاندن ل سەر چارەنڤیسی وان ھێتە کرن، ب تنێ ژ بەر رێکخراوا ئەلقاعدە ل عیراقێ چەندین زارۆ پەیدابووینە و ھەموو بێ باب ماینە، ھەروەسا ژی ل سوریا و گەلەک وەلاتێن دی یێن جیھانی ئەڤ ئاریشە ھەیە زارۆ ماینە بێ ناسنامە و گۆت: “پێدڤیە قانوونا مافێن مرۆڤی بھێنە بکارئینان بێ جۆداھی بۆ ھەموو کەس و پێکھاتیێن ئاینی و ئۆلی و ئەو دەڤەرێن گوھۆرینێن دیموکرافی لێ دھێنە کرن بەلگە بھێنە زڤراندن دا کو ئارامیی پەیدابیت”.
ل دووماھیێ سەرۆکێ دەزگەھی ئێزدیان ل ھولەندا خویا کر کو ل سالا 1950 پتر ژ 124 ھزار و 623 یھودیان ژ ناسنامێ ھاتنە بێ بەھرکرن، ل سالا 1980 ناسنا مە پتر ژ نیڤ ملیون کەسێن کوردێن فەیلی ھاتە وەرگرتن، ھەتا نوکە ژی ئەڤ ئاریشە ب دروستاھی چارەسەر نەبوویە و گۆت: “ئەڤ بابەتێن ناسنامان دێ ل جنێڤ ھێنە گەنگەشەکرن ب مەرەما دیتنا رێ یێن چارەسەریێ”.

ئەڤرۆ نیوز، لەزگین جوقی:
جێگرێ سەرۆکێ لیژنا ئاسایشێ ل جڤاتا پارێزگەھا نەینەوا دیار کر کو جڤاتا نەینەوا بڕیار دایە ھەموو ھێزێن ژ دەرڤەی سنوورێن ھەرێما کوردستانێ و عیراقی ھاتینە قەزا شنگالێ وێ دەڤەری چوول بکەن، لێ مخابن ھەتا نوکە حوکمەتا عیراقێ پشتەڤانیا بجە ئینانا ڤێ بریارێ نەکریە، لەوڕا دوسەیا ئەمنی ل شنگالێ ئالۆز بوویە.
ھاشم بریفکانی، جێگری سەرۆکی لیژنا ئاسایشێ ل جڤاتا پارێزگەھا نەینەوا بۆ ئەڤرۆ نیوز دیار کر کو وان بریار دایە ھەموو ھێزین ژ دەرڤەی سنوورێن ھەرێما کوردستانی و عیراقێ ھاتینە شنگالێ دەرکەڤن، لێ مخابن ھەتا نوکە حوکمەتا عیراقێ پشتەڤانیا بجە ئینانا بڕیارا وان نەکریە و ھێشتا ئەڤ بڕیارە بجە نەھاتیە و چەندین جاران وان داخواز کریە دوسەیا ئەمنی یا شنگالێ د دەستێ نەینەوا دا دابیت، چونکو شنگال یا ب سەر جڤاتا نەینەوا ڤە، لێ بەغدا ھاریکاری نەکریە و پشتەڤانیا وان لایەنێن نەقانوونی دکەت.
ناڤھاتی ئاماژە دا وێ چەندێ کو دوسەیا ئەمنی یا شنگالێ د دەستێن حەشدا شەعبی و پەکەکێ دایە، ھەر تشتەکێ نوکە ل شنگالێ رووبدەت ئەو ژێ د بەرپرسن و گۆت: “ھەتا نوکە دوسەیا ئەمنی ل شنگالێ یا ئالوزە، چونکو بەغدا نەیا ھاریکارە دگەل جڤاتا نەینەوا کارەکێ باش بۆ شنگالێ بھێتە ئەنجامدان”.