ئەڤرۆ نيوز، نیوار محەمەد سەلیم:
وەزارەتا بەرەڤانیا عیراقێ د خولا بۆری یا جڤاتا نوونهران دا، پرۆژێ خزمەتا لەشکریا ب زۆری ئاراستەی جڤاتا شورا کربوو، چاڤەرێ ژی دھێتە کرن ل دەمەکێ نێزیک و پشتی پێکئینانا کابینا حوکمەتا نوو ب تەمامی ئەوی پرۆژەی رەوانەی جڤاتا نوونەران کەن.
د ڤی پرۆژەیی دا داخواز دکەت ژیەکێ دیارکری بۆ گەنجێن وەلاتی بھێتە دیارکرین و تێدا بچینە خزمەتا لەشکری یا ب زووری، ھەر وەکو گەلەک ژ وەلاتان و سەردەمێ حزبا بەعس ل عیراقێ. ھندەک ژ حزبێن سیاسی ژی پشتەڤانیا ڤی پرۆژەی دکەن و کورد ژی دژی پرۆژەی نە.
عەدنان ئەسەدی، ئەندامێ جڤاتا نوونەران ل سەر دەولەتا قانوونێ راگەھاند کو خزمەتا لەشکریا ب زۆری دێ ھەڤسەنگیا ھێزێ پارێزیت، نھا چو یەکەیێن لەشکری ژی د تەمام نینن.
ئاشکەرا ژی کر کو ئەڤ رنگە کارە دێ دبیتە ئەگەر کو ھەست ب خەما گەل و مەینەتیێن وێ بکەت، “د ھەمان دەم دا دێ دەرفەتێن کاری ژی زێدە کەت”.
ناسر ھەرکی، ئەندامێ لژنا بەرەڤانیێ ل جڤاتا نوونەران ئاشکەرا دکەت کو چو پرۆژێن ژ وی رەنگی ب دەست وان نەگەھشتیە، “خزمەتا لەشکری یا ب زۆری ل عیراقێ یا سەرکەفتی نابیت، چونکو حوکمەتەکا نشتیمانی یا گشتگیر نینە و گەنج ژی پابەندی قانوونێن ژ وی رەنگی نابن”.
ئەندامەکێ جڤاتا نوونەرێن عیراقێ ل سەر فراکسیۆنا پارتی دیموکراتی کوردستان خۆیاکر چو پرۆژێن ژ ڤی رەنگی ل عیراقێ سەرناگرن.
ھندرین لەزگین دۆسکی، ئەندامێ جڤاتا نوونەرێن عیراقێ ل سەر فراکسیۆنا پارتی دیموکراتی کوردستان بۆ ئەڤرۆ نیوز گۆت: “چو پرۆژێن ژ ڤی رەنگی ل عیراقێ سەرناگرن، ژ بەر کو د دستوورێ عیراقێ دا رێ ب تشتەکێ ژ ڤی رەنگی نەھاتیە دان و ھەکە بھێتە کرن ژی نەیا قانوونی یە”.
زێدەتر گۆت: “عیراقەکا ئێک گرتی نینە و چو لایەن ب لایەنێ دی ناکەن و کارەکێ ژ ڤی رەنگی و ل سەردەمەکێ ھوسا ل عیراقێ سەرکەفتنێ نائینیت”.
دەربارەی بۆچوونا وان وەکو کورد ژی ل سەر ڤی پرۆژەی گۆت: “ئەم وەکو کورد پشتەڤانیا ڤی پرۆژەی ناکەین خوە ھەکە بھێتە د جڤاتا نوونەران ژی دا دەنگی بۆ نادەین، بەلێ ھێشتا چو تشتێ فەرمی نینە و ب تنێ ئاخفتن ل سەر دھێنە گۆتن”.
نيشاندان