ئهڤرۆ نيوز:
10 پارتێن سیاسی یێن ئیرانێ و رۆژھەلاتێ کوردستانێ پێکڤە بەرەیەکێ نوو یێ خەباتێ ل دژی ئیرانێ راگەھاندن و دیار کرن کو ئارمانجا سەرەکی یا ڤێ بەرەیەکێ ژناڤبرنا دەستھەلاتا ئیرانێ و ئاڤاکرنا ئیرانەکا دیموکراتە کو تێدا مافێ ھەموو وەلاتیان یێ پاراستی بیت و پشتەڤانیێ ل ھەموو خوەنیشادان و مانگرتنێن وەلاتیێن ئیرانێ بۆ بدەستڤەئینانا مافێن خوە یێن رەوا دکەین.
دارا ناتق ئەندامێ سەرکردایەتیا پارتی دیموکراتی کوردستان/ ئیران بۆ رۆژناما ئەڤرۆ دیار کر کو ئەڤرۆکە رژێما ئیرانێ زۆرداریێ ل ھەموو پێکھاتێن ل ئیرانێ دکەت و ژ بەر ھندێ ژی ھەموو نەتەوێن ل ئیرانێ دخوازن کو رژێما نھا ژناڤ بچیت و سیستەمەکێ دیموکراتی و فیدرالی ل ئیرانێ ئاڤا ببیت دا ھەموو گەلێن ئیرانێ بگەھنە مافێن خوە یێن رەوا، بەری نھا پارتێن رۆژھەلات بەرەیێ ھەڤکاریا پارتێن رۆژھەلات دروست کربوون کو وەکو بەدیلەکێ ل ھەمبەر کۆمارا ئیسلامی یا ئیرانێ یە و نھا ژی ب ڤێ پێنگاڤێ ئەڤ بەرەیە بەرفرەھتر دبیت و گۆت: (ل سەر ڤێ بنەمایێ ژی ب پشکداریا چار پارتێن رۆژھەلاتێ کوردستانێ کو پارتی دیموکراتی کوردستان/ ئیران ژی تێدا پشکدارە بەرەیەکێ نوو یێ خەباتێ ل دژی دەستھەلاتا ئیرانێ ھاتە راگەھاندن کو ل گۆر باوەریا من ئەو یەک پێنگاڤەکا گرنگە، چونکو بھێزبوونا ئۆپۆزسیۆنێ ل ئیرانێ دێ بیتە پالدرەکێ باش دا خەلک ل دژی دەستھەلاتێ رابن و داخوازا مافێن خوە یێ رەوا بکەن).
ناڤبری ئەو یەک ژی دیار کر کو راستە ناکۆکی د ناڤبەرا پارتێن سیاسی یێن ئیرانێ ھەنە و گەلەک ژ وان ناخوازن کورد ژی بگەھنە مافێن خوە یێن رەوا، لێ چەندین خالێن ھەڤپشک ژی د ناڤبەرا ئالیێن ئۆپۆزسیۆنێ دا ھەنە کو بوویە ئەگەرێ ھندێ بەرەیەکێ وەسا بھێتە ئاڤاکرن، ب تایبەتی ژی نھا ھەموو ھێزێن ئۆپۆزسیۆنێ داخوازا نەمانا رژێما نھا یا ئیرانێ دکەن و گۆت: (دەستھەلاتا نھا یا ئیرانێ نەشێت ب چو رەنگەکێ گوھۆرینان بکەت و رۆژ ب رۆژێ رەوشا ژیانا وەلاتیێن ئیرانێ و رۆژھەلاتێ کوردستانێ خراب دبیت و ژ بەر ھندێ ژی دڤێت رژێما نھا ژناڤ بچیت و دەستھەلاتەکا نوو ئاڤا ببیت و بێگومان کوردان ژی داخوازیێن خوە ھەنە و دخوازن د سیستەمەکێ فیدرالی دا ل گەل ئیرانێ بژین کو تێدا ھەموو مافێن وان پاراستی بن).
10 پارتێن ئیرانێ کو بەرەیەک ب ناڤێ خەباتا ھەڤپشک ل دژی رژێما ئیرانێ ئاڤا کرینە د داخۆیانیەکا ھەڤپشک دا دیار دکەن کو دڤێت سیستەمەکێ نوو ل ئیرانێ ئاڤا ببیت کو رێزێ ل ھەموو ئایین و بیروباوەریێن جودا ل ئیرانێ بگریت و نابیت چو وەلاتیەک ژ بەر بیروباوەریێن خوە بھێتە سزادان و دڤێت ھەموو کریارێن نە دیموکراتی یێن رژێما نھا ئێدی ل ئیرانێ ل دژی وەلاتیان نەھێتە دوبارەکرن، دڤێت سیستەمێ نوو پەیوەندیێن باش ل گەل ھەموو وەلاتەکێ دروست بکەت و رێزێ ل سەروەریا وەلاتێن جیران بگریت و دەستێوەردانێ د کاروبارێن چو وەلاتەکێ دا نەکەت.
د بەردەوامیا داخۆیانیێ دا ھاتیە دیار کرن کو دڤێت پێکڤەژیانا ل ئیرانێ ل سەر بنەمایێ رێزگرتنا ل مافێن ھەموو نەتەوە و پێکھاتێن ئیرانێ بیت و دڤێت ھەموو رەنگێن زۆرداریێ و قەدەغەیێن ل سەر زمان و کەلتورێن گەلێن دی یێن ل ئیرانێ نەمینیت و ھەموو ئالی پێکڤە د ئاڤاکرنا وەلاتەکێ نوو دا پشکدار بن.
ھەژی ئاماژەپێدانێ یە کو 10 پارتێن ئیرانی پێکڤە ئەڤ بەرەیەکێ ئاڤا کرینە کو پارتی دیموکراتی کوردستان- پارتی دیموکراتی کوردستان/ ئیران و ھەر دو پارتێن کۆمەلە و کۆمەلا زەحمەتکێشان یێن رۆژھەلاتێ کوردستانێ د ئاڤاکرنا ڤێ بەرەیەکێ دا جھێ خوە گرتینە و چاڤدێرێن سیاسی ژی دبێژن دڤێت کورد داخوازا مافێ خوە یێ رەوا و ئاڤاکرنا سیستەمەکێ فیدرالی بکەن، چونکو ئەزموونێن بەرێ ژی نیشا ددەن ھندەک ھێزێن ئۆپۆزسیۆنێ ھەلویستێ وان ل دژی مافێن کوردان ژ یێ حوکمەتا نھا باشتر نینە.
ئەڤرۆ نیوز ، زنار تۆڤی:
لدووڤ خشتێ بهێنڤەدانێن حوکمەتا هەرێما كوردستانێ سێ سێشەمبی دێ بنە بهێنڤەدانێن فەرمی ل هەموو دامودەزگەهێن هەرێمێ.
لدووڤ وی خشتێ بهێنڤەدانێن پەرلەمانێ کوردستانێ پەسەند کری هەر ئێک ژ رۆژێن 11/20 و 12/25 و سەری سالا نوو، کو ههرسێ رۆژ دکەڤنە سێشهمبێ، دێ بنە بهێنڤەدان.
هەروەسا رۆژا سێشەمبێ 20 ڤێ هەیڤێ دێ بیتە بهێنڤەدانا فەرمی ل عیراقێ و هەرێما کوردستانێ، ب ئەگەرێ ژ دایکبوونا پێغەمبەرێ ئیسلامێ.
دیسا رۆژا سێشەمبی 12/25 دێ بیتە بهێنڤەدانا فەرمی ل هەرێما کوردستانێ، ب بوونەیا یادا ژ دایکبوونا حەزرەتێ مەسیح.
ئەڤە د دەمەکێ دایە کو بهێنڤەدانا سالا نوو یا 2019 دکەڤیته هەمان رۆژا حەفتیێ کو رۆژا سێشەمبیێ یە.
ئەڤرۆ نیوز، رێوار مزیری:
سەرۆکێ رێکخراوا ئێکەتیا زەلامێن کوردستانێ بۆ ئەڤرۆ نیوز دیار کر کو د ئەڤ سالە دا ھەشت زەلام ب دەستێن ھەڤژینێن خوە ل ھەرێما کوردستانێ ھاتینە کوشتن و گۆت: ” 80 ژن ژی ژ بەر ئەنجامدانا یاریا پۆبجی ھاتینە بەردان”.
دکتور ئەژی ئیبراھیم، سەرۆکێ رێکخراوا ئێکەتیا زەلامێن کوردستانێ ئاشکرا کر کو ئەڤ سالە 800 حالەتێن توندوتیژیا ھەمبەر زەلامان ل رێکخراوا ئێکەتیا زەلامێن کوردستانێ ھاتینە تۆمارکرن و گۆت: “ئەڤ سالە ھەشت زەلام ب دەستێن ھەڤژینێن خوە ب ھاریکاریا ھندەک کەسێن دی ھاتینە کوشتن”.
ناڤھاتی ئاماژە دا وێ چەندێ کو د ئەڤ سالە دا 80 ژن ژ بەر ئەنجامدانا یاریا پۆبجی ل ھەرێمێ ھاتینە بەردان، چونکی ئەنجامدانا یاریا پۆبجی ژ لایێ ڤان ژنان ڤە ببوو ئەگەرێ وێ چەندێ ئەڤ ژنە گرنگیێ ب ھەڤژین و زارۆ و سەرەدانێن خێزانین نەدەن.
ئەڤرۆ نیوز، رێوار مزیری:
سەرۆکێ لیژنا قانوونی و ھێزێن ناڤخۆ ل جڤاتا پارێزگەھا دھۆکێ بۆ ئەڤرۆ نیوز دیار کر زێدەتری 11 جۆرێن پانزینێ دھێنە د ناڤ پارێزگەھێن ھەولێر و سلێمانیێ دا و کوالێتیا وێ نە د ئاستێ پێدڤی دایە ژ بەر ڤێ چەندێ بھایێ لترا پانزینێ ل وان پارێزگەھان ئەرزان بوویە، بەلێ ئەو پانزینا ل پارێزگەھا دھۆکێ دھێتە بەلاڤکرن ژ یا ھەر دو پارێزگەھێن ناڤھاتی پاقژترە.
ئدریس ھەرکی، سەرۆکێ لیژنا قانوونی و ھێزێن ناڤخۆ ل جڤاتا پارێزگەھا دھۆکێ ئاشکرا کر کو پانزینا نۆرمال ژ کۆمپانیا کار و پانزینا محەسەن ژ وەلاتێ تورکیا دھێتە د ناڤ پارێزگەھا دھۆکێ دا، لێ پانزین ژ 11 ژێدەران پتر دھێتە د ناڤ پارێزگەھێن ھەولێر و سلێمانیێ دا و کوالێتیا وێ د ئاستێ پێدڤی دا نینە ژ بەر ڤێ چەندێ بھایێ لترا پانزینێ ل وان ھەر دو پارێزگەھان ئەرزان بوویە و ل پارێزگەھا دھۆکێ ژی ھەر وەکو خوە مایە و گۆت: “بازارێ کرین و فرۆتنا پانزینێ یێ ئازادە و حوکمەت نەشێت دەستکاریێ د بھایان دا بکەت ب تنێ دشێت چاڤدێریا کوالێتیێ بکەت”.
ناڤھاتی خویا کر کو ل ھەیاما بۆری وان داخواز ژ سەرۆکێ حوکمەتا ھەرێما کوردستانێ کربوو کو پارزینگەھەکا مەزن ل پارێزگەھا دھۆکێ ژی بھێتەدانان و گۆت: “ھەکە ئەڤ پارزینگەھە ل پارێزگەھا دھۆکێ ھاتە دانان بێ گۆمان بھایێ لترا پانزینێ دێ ئەرزان بیت”.
ئهڤرۆنيوز:
شيرهتكارێ جڤاتا ئاسايشا ههرێما كوردستانێ، مهسرور بارزانى ئهڤرۆ شهمبيێ 17/11/2018 پێشوازى ل ئهندرێ پييك، جێگرێ وهزيرێ دهرڤهيێ ئهمريكا بۆ كاروبارێ ئيرانێ وعيراقێ وشاندهكێ دگهلدا كر.
دكۆمبوونهكێ دا مهسرور بارزانى وئهندرێ پييك بهحس ل پێشهاتێن سياسى ورهوشا دهڤهرێن كوردستانى يێن دهرڤهى ئيدارا ههرێما كوردستانێ ودهستپێكرنا قۆناغهكا نوو يا چارهكرنا كێشێن ههلاويستى دناڤبهرا بهغدا وههولێرێ.
مهسرور بارزانى وجێگرێ وهزيرێ دهرڤهيێ ئهمريكا هنارتنا پهترۆلا كهركووكێ ب رێيا بۆريا پهترۆلا كوردستان – توركيا ب پێنگاڤهكا گرنگ بۆ چارهكرنا كێشێن دناڤبهرا ههرێمێ وعيراقێ هژمارت.
ههردو لايهنان ل دۆر ئاساييكرنا رهوشا دهڤهرين كوردستانى يێن دهرڤهى ئيدارا ههرێمێ دووپاتى ل سهر ئاساييكرن وڤهكرنا ههموو رێيان وپاقكرنا وان ژ مينێن چاندى ودابينكرنا خزمهتگوزاريێن دهستپێكى بۆ وان دهڤهران كر.
دهستپێكرنا قۆناغهكا نوو يا پێكڤه كاركرنا ههردو حوكمهتێن نوو ل ههرێما كوردستانێ وعيراقێ بۆ چارهكرنا كێشه وناكۆكيان، تهوهرهكێ دى يێ ديدارێ بوو.
ئەڤرۆ نیوز ، زنار تۆڤی:
جێگرێ سهرۆكێ كۆمسیۆنا بلند یا سهربهخۆیا ههلبژارتنان ل عیراقێ دیارکریە: کو سوبەهی دێ پارێ كارمهندێن كۆمسیۆنێ هێته دابهشکرن.
رزگار حهمه، جێگرێ سهرۆكێ كۆمسیۆنا بلند یا سهربهخۆیا ههلبژارتنێن عیراقێ ئهڤرۆ شهمبیێ 17 چریا دویێ یا 2018 گۆتیە: ل رۆژا چارشهمبا بوری بریارا خهرجكرنا پارێ كارمهندێن كۆمسیۆنێ هاتیە دان و سوبەهی ئەو پاره دێ ل سهر كارمهندان هێته دابهشکرن.
ئەو ژی گۆتیە: د قۆناغا ئێکێ دا دێ پارێ وان كارمهندان هێتە دابهشکرن یێن کو هووربینی د ناڤێن وان دا هاتیه كرن و پاشی ههر دڤی حهفتیێ دا دێ پارێ كارمهندێن د دیتر ژی هێتە دابهشکرن.
پارێ كارمهندێن سهر سندوقێن دهنگدانێ، سێ جۆرن و ژ وانا كارمهندێن رێكخهرێن ویستگههێن دهنگدانێ 300 هزار دینارن و كارمهندێن رێڤهبهرێن ناڤهندێن دهنگدانێ 250 هزار دینارن و كارمهندێن ئاسایى یێن كۆمسیۆنێ ژی 200 هزار دینارن.
ئهڤرۆنيوز:
پشتى ب دووماهى هاتنا كۆمبوونا ههڤپشك يا ههردو شاندێن پارتى ديموكراتى كوردستان وبزاڤا گۆران ل سلێمانيێ، بهرپرسێن ههردو لايهنان دووپاتى ل سهر دانوستاندنێن ئهرێنى كر.
مهحمود محهمهد، پهيڤدارێ پارتى ديموكراتى كوردستان دكۆنگرهكێ رۆژنامهڤانى يێ ههڤپشك دا ل گهل شورهش حاجى، پهيڤدارێ بزاڤا گۆران، گۆت” ئهم يێن هاتين دا وان سۆزێن مه داينه خهلكى دههلبژارتنان دا بجهبينين و بزاڤێن خوه بكهين تاكو سهقامگيرى ل كوردستانێ دروست ببيت”.
دياركر” ههموو لايهن ب بهرپرسيارهتى ڤه بهحس ل وێ چهندێ دكهن كو پێدڤيه دڤێ قۆناغێ دا پێكڤه بين، مه وبرايێن ئێكهتيێ وگۆران ژى ئهو ههسته يێ ههى ومه پێدڤى ب وێ چهندێ ههيه پێكڤه بين، تاكو ل چار سالێن داهاتى بزاڤێ بكهين پێكڤه كوردستانێ بگههينينه قۆناغهكێ كو خواستا مه ههموو لايهنان بيت”.
شورهش حاجى، پهيڤدارێ بزاڤا گۆران، گۆت” كۆمبوونا ئێكێ يا ئهرێنى بوو وكۆمبوونێن دى ژى دێ ددووڤدا ههبن”.
گۆت ژى” پارتى پێ باشه گۆران پشكداريێ دكابنيا نوو يا حوكمهتا ههرێما كوردستانێ دا بكهت”.
دياركر ژى” بريارا گۆران يا ل دهف جڤاتا نيشتمانى وئهم دێ تێبينى وبهرسڤا خوه ژى ل جڤاتا نيشتمانى بهحس كهين وبريارا دووماهيێ دێ ل وێرێ بيت”.
ئهڤرۆنيوز:
بهرپرسێن بلند يێن ئهمريكى دحوكمهتا دۆنالدترامپى دا ل دوێ باوهرێ دانه كو رژێما ئيرانێ نهشێت خوه ل بهرانبهر وان سزايێن گران يێن ئهمريكى ئهوێن ل سهر هاتينه سهپاندن رابگريت ول دووماهيێ دێ هێته ژناڤبرن.
ئهو پێزانينه ژلايێ كهنالێ ئێن بى سى يێ ئهمريكى ژزاردهڤێ چهند بهرپرسێن بهرێ يێن حوكمهتا ئهمريكى هاته بهلاڤكرن، ههڤدهم بهحس ل وێ چهندێ هاته كرن كو ترامپى ب خوه گومان يا ههى كو ئيران بشێت ل بهرانبهر وان سزايان خوه رابگريت.
پێشتر ترامپى دديدارهكا تهلهڤزيۆنى دا ل گهل كهنالێ بلوومبێرگ گۆتبوو” دهمێ من شياى بگههمه كۆچكا سپى وهكو سهرۆكێ ئهمريكا، دلگرانيا من يا سهرهكى ئهبوو كهنگى دێ ئيران دهست ب سهر ههموو رۆژههلاتا ناڤين دا گريت، بهلێ نوكه رهوش گهلهك يا هاتيه گوهۆرين”.
چهندين دبلوماتكارێن بيانى ژى دياركريه كو مايك بۆمبيۆ وهزيرێ دهرڤهيێ ئهمريكا وجۆن بولتۆن شيرهتكارێ ئاسايشا نهتهوى يا ئهمريكى دديدارێن خوه ل گهل هژمارهكا بهرپرس ودبلوماتكارێن بيانى بهحس ل وێ چهندێ كريه كو رژێما ئيرانێ گهلهك يا لاوازه ونهشێت خوه رابگريت، ديسا وان بهحسێ ههلاوسانا ئابوورى ومانگرتن وخوهنيشادانان وچهندين كێشێن دى دكر.
ههروهسا وان بهحس ل وێ چهندێ كر ژى كو سزايێن ئهمريكى دشێن نه تنێ دهستێ ئيرانێ ل ههموو رۆژههلاتا ناڤين كورت بكهن، بهلكو دێ بنه ئهگهرێ ژناڤبرنا رژێما ئيرانێ ب خوه ژى.
ل دووڤ مالپهرێ (يورۆنيوز) هێشتا چو هێمايهك ل دۆر ژناڤچوونا رژێما ئيرانى نهگههشتيه دهزگههێن ههوالگيرى يێن ئهمريكى بهلكو وان دهزگههان دياركريه كو ئيران وهكو جارێن پێشتر هێشتا يا شياى كونترۆلا رهوشێ بكهت.
وى مالپهرى دياركر، ئهوا بهرپرسێن ئهمريكى بهحس لێ دكهن، ئارمانجان وان گوهۆرينا رهفتارێن رژێما ئيرانێ يه نهكو گوهۆرينا رژێمێ ب خوه، پێشتر ژى بۆمبيۆى ئهو چهنده دووپات كريه.
ئهڤرۆنيوز:
سهنتهرێ راگههاندنا ئهمنى يێ عيراقى ئهڤرۆ شهمبيێ 17/11/2018 دهستهسهركرنا شهش ئهندامێن رێكخراوا داعش يا تيرۆرستى ل لايێ چهپێ يێ باژێرێ مووسل راگههاند.
سهنتهرێ ناڤبرى دراگههاندنهكێ دا بهلاڤكر” ل دووڤ پێزانينێن ههوالگيرى، هێزهكا لهشكرى يا سهر ب فهرماندهيا ئۆپهراسيۆنێن نهينهوا شهش ئهندامێن رێكخراوا داعش يا تيرۆرستى دهستهسهركرن كو چالاكيێن خوه ب ناڤێ (ديوان الجند) ل تاخێن زههراء وخهزراء وئيخاء ل باژێرێ مووسلێ ئهنجام ددان”.
دياركر ژى” ئێك وان تيرۆرستێن هاتينه دهستهسهركرن دانپێدان كر كو ئهو بهرپرسێ (تهل عهبته) بوو ل دهمێ داگيركرنا مووسلێ ژلايێ داعشێ ڤه”.
نيشاندان