ئه‌ڤرۆ نیوز، زنار تۆڤى:

د. سه‌نگه‌ر سه‌ید قادر مامۆستایێ زانكۆیا ئه‌مریكى ل قاهیره‌، به‌رپرسێ دیسكێ عیراقى و كوردستانى و ناڤه‌ندا ئیماراتێ بۆ ڤه‌كۆلینێن ستراتیجى، بۆ ئه‌ڤرۆ نیور دیار كر: ئارمانج ژ سه‌ره‌دانا كازمى بۆ ئه‌مریكا ب هێزكرنا په‌یوه‌ندیێن ئه‌مریكا و عیراقێ یه‌، هه‌ر چه‌نده‌ كازمى گۆتیه‌ كو مه‌ پێدڤى ب هێزێن ئه‌مریكا هه‌یه‌، هه‌روه‌سا بابه‌تێ په‌یوه‌ندیێن بازرگانى و ئابوورى و وزێ پرسه‌كا گرنگ یا گوتۆبێژانه‌ دناڤبه‌را عیراقێ و ئه‌مریكا دا، چونكى ئه‌مریكا دڤێت كه‌رتێ وزا عیراقێ ژ ده‌ستێن رووسیا و توركیا و ئیرانێ رزگار بكه‌ت و رێككه‌فتنا چینێ و عیراقێ ژى هه‌لوه‌شینیت، دیسان ئه‌مریكا دێ هه‌موو بزاڤان كه‌ت كو ئیرانێ ژ عیراقێ دووربێخیت و بالا ده‌ستیا وێ نه‌هێلیت، لێ مسته‌فا كازمى دڤێت هه‌ڤسه‌نگیێ دناڤبه‌را ئه‌مریكا و ئیرانێ دا بكه‌ت و وى نه‌ڤێت عیراق ببیته‌ مه‌یدانا ململانا ئیرانێ و ئه‌مریكا و دیسان ئه‌مریكا دڤێت چه‌ك ژ میلیشیاتان بهێته‌ وه‌رگرتن.

ناڤهاتى گۆت ژى: كازمى لبه‌ره‌ ژێده‌رێن داهاتێ میلیشیاتان كونترۆل بكه‌ت و دیسان وى بزاڤ كرینه‌ كو سه‌ركردێن میلیشیاتان ئه‌وێن دناڤ ده‌زگه‌هێن ئه‌منى دا نه‌هێلیت و هه‌روه‌سا وى سۆپا و ده‌زگه‌هێن هه‌والگیریێ و دژه‌ تیرۆرێ بهێز كرینه‌، داكو چالاكیێن میلیشیاتان بێ هێز بكه‌ت، هه‌ر چه‌نده‌ ئه‌مریكا دڤێت كازمى ب هێزا چه‌كى روو ب روو میلیشیاتان ببیت و ئه‌ڤه‌ ژى بۆ كازمى یا ب زه‌حمه‌ته‌، لێ كازمى دڤێت حه‌شدا شه‌عبى و كورد و سنه‌ و پێشمه‌رگه‌ و توركمان و ئێزدى و شیعه‌ و هه‌موو پێكهاتێن عیراقێ بێخیته‌ دناڤا چارچۆڤێ نیشتیمانى یێ عیراقى دا.

د. سه‌نگه‌ر هێشتا دبێژیت: بۆ ڤێ سه‌ره‌دانێ سه‌رۆكێ ئه‌مریكا دۆنالد تره‌مپى دڤێت بانگه‌شا ڤه‌كێشانا هێزێن ئه‌مریكا ل عیراقێ بكه‌ت، دیسان ئه‌مریكا دڤێت عیراق خودانا بریارا خوه‌ بیت و ب ته‌مامى بكه‌ڤیته‌ ژێر ستراتیجیه‌تا وێ، د قۆناغا داهاتى ژى دا عیراق بشێت بچیته‌ به‌ره‌یێ هه‌ڤپه‌یمانیا ئه‌منى و ستراتیجى ل رۆژهه‌لاتا ناڤین، هه‌روه‌سا ل ڤان هه‌یڤێن بورى كازمى زیان گه‌هاندینه‌ به‌رژه‌وه‌ندیێن ئیرانێ ل عیراقێ، رۆلێ ئیرانێ ل عیراقێ لاواز بوویه‌، لێ ژبه‌ركو بارێ ئیرانێ یێ ئابوورى خراب بوویه‌ن له‌وما پێدڤى ب عیراقێ هه‌یه‌، ئیرانێ نه‌ڤێت وه‌سا خوه‌ نیشان بده‌ت، كو ل دژى چاكسازیێن عیراقێ یه‌، دیسان د ده‌مێ سه‌ره‌دانا كازمى دا بۆ ئه‌مریكا دهێته‌ چاڤه‌رێ كرن، كو میلشیاتێن ئیرانێ و حه‌شدێ هێرشێ بكه‌نه‌ سه‌ر بنگه‌ه و بالیۆزخانا ئه‌مریكا، خۆپیشاندان ژى ل دژى ڤێ سه‌ره‌دانێ بهێنه‌ كرن، هه‌ر چه‌نده‌ ئه‌مریكا دزانیت هه‌كه‌ ده‌ست ژ كازمى به‌رده‌ت، دێ جاره‌كا دى عیراق كه‌ڤیته‌ ده‌ستێ ئیرانێ و توركیا و دیسان ئه‌مریكا گۆتیه‌ كازمى بابه‌تێ هێرشا و مه‌ترسیێن توركى بگه‌هینیته‌ ناڤه‌ندێن بریاردانێ ل ئه‌مریكا.