ئەڤرۆ نیوز:
جێگرێ رێڤەبەرێ گشتی یێ ساخلەمیا سلێمانیێ راگەهاند: ئەڤرۆ دوشەمبی 13-07-2020، حەفت کەسان ل سنوورێ پارێزگەها سلێمانیێ ژ ئەگەرێ کۆرۆنایێ وەغەر کر.
عەبدوللا ئەحمەد، جێگرێ رێڤەبەرێ گشتی یێ ساخلەمیا سلێمانیێ گۆت ژی: ئەوێن وەغەر کرین، چار کەس ژ وان خەلکێ ناڤا باژێرێ سلێمانیێ نە و سێ کەسێن دیتر خەلکێ دەرڤەی سلێمانیێ نە.
ئەڤرۆ نیوز:
ژێدەرێن میدیایی یێ ئیرانێ دیار کرن کو حەفتیا داهاتی محەمەد جەواد زەریف وەزیرێ دەرڤە یێ ئیرانێ دێ سەرەدانا عیراقێ کەت و ل گەل بەرپرسێن عیراقێ کۆمبیت.
ل گۆر دەزگەهێن راگەهاندنا ئیرانێ وەزیرێ دەرڤە دێ ل گەل شاندەکێ مەزن سەرەدانا عیراقێ کەت و دێ ل گەل سەرۆک کۆمارێ عیراقێ بەرهەم سالح، سەرۆک وەزیران مستەفا کازمی و فوئاد حسێن وەزیرێ دەرڤە یێ عیراقێ کۆمبیت.
ئەڤرۆ نیوز:
وەزارەتا ساخلەمیا عیراقێ راگەهاند کو د ماوەیێ ٢٤ دەمژمێرێن بۆری دا وان پشکنین بۆ پتر ژ ١٥ هزار کەسان کرینە و د ئەنجام دا دەرکەفتیە کو دو هزار و ٢٢٩ کەس ل عیراقێ تووشی ڤایرۆسێ کۆرۆنایێ بووینە.
وەزارەتا ساخلەمیا عیراقێ ئەو یەک ژی دیار کریە کو سەد کەسێن دی ل عیراقێ ب ڤایرۆسێ کۆرۆنایێ مرینە.
ئه‌ڤرۆ نیوز، عه‌لى حاجى :
سه‌رۆكێ لژنێن سه‌ندیكا كرێكارێن كوردستانێ زاخۆ د داخویانیه‌كێ دا بۆ ئه‌ڤرۆ نیوز دیار كر هه‌ر ژ ده‌ستپێكا ئه‌ڤساله هه‌تا نوكه ب تنێ پێنچ قوربانیێن كرێكاران هاتینه تومار كرن و به‌راورد ب سالا بورى ئه‌ڤ رێژه‌یه گه‌له‌ك كێم بوویه و ئه‌گه‌ر ژى بۆ كۆرۆنایێ ڤه‌دگه‌ریت .
زێده‌تر سه‌گڤان سندى گۆت: (هه‌ر ژ ده‌ستپێكا سالا بورى هه‌تا دووماهیا هه‌یڤا شه‌شه ل دووڤ دووماهى ئامار ل سه‌ندیكا كرێكارێن كوردستانێ زاخۆ هاتیه تومار كر سێ كرێكاران د ده‌ما كارى دا گیانێ خو ژ ده‌ست دانیه دو ژ وان شوفێر بوون و كه‌سێ دیتر ژى ل پێشه‌سازیا زاخۆ كار دكر و هه‌ر دیسان دو كرێكارێن دیتر ژى د روودانه‌كا ترافیكى دا د ده‌ما كارى بریندار ببوون و به‌لێ ره‌وشا وان نوكه یا باشه و ڤه‌گه‌ریاینه سه‌ر كارێ خوه، ل دووڤ وێ ئامارا د ماوه‌یێ شه‌ش هه‌یڤێن بورى دا هاتیه تومار كرن كو ئه‌ڤ رێژه‌یه ل چاڤ سالا بورى گه‌له‌ك كێمتر بوویه و ئه‌گه‌ر ژى بۆ وێ چه‌ندێ ڤه‌دگه‌ریت كو د ئه‌ڤساله دا ژ به‌ر هاتنا كۆرۆنایێ و گرتنا پرانیا جهان و كێمبوونا كارى بۆ ئه‌گه‌ر ئه‌و رێژه‌یه كێمتر بهێته تومار كرن).
ناڤبرى گۆت ژى: ئاریشه‌یا سه‌ره‌كى یا كرێكاران ل زاخۆ نه‌هاتیه تومار كرن یان ژى خوه تومار نه‌كرینه ده‌ما د هه‌ر روودانه‌كێ دا تووشى زیانه‌كێ بیت دا كو ژلایێ خوه ڤه بشێن كار بۆ دابینكرن مافێن وى بكه‌ن و ئه‌م به‌رده‌وامین ژى دا كو سالانه بشێن رێژه‌یه‌كا زێده‌تر تومار بكه‌ین.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ب رێیا ڤیدیو کۆنفرانسەکێ سەرپەرشتیا کۆمبوونا لیژنا بلند یا بەرهنگاریا کۆرۆنایێ کر و د کۆمبوونێ دا سەرۆکێ حوکمەتا هەرێما کوردستانێ راگەهاند کو مخابن بابەتێ کۆرۆنایێ پشتی کو هاتیە سیاسیکرن زیانێن گەلەک مەزن گەهشتنە کوردستانێ و بۆ ئەگەرێ هندێ کو وەلاتی وەکو جاران پێگیریێ ب رێنمایان نەکەن و ژ بەر هندێ ژی ژمارا تووشبوون و مرنا ب کۆرۆنایێ ل کوردستانێ گەلەک زێدە بوویە و رۆژ ب رۆژێ زێدەتر ژی لێ دهێت.
سەرۆکێ حوکمەتا هەرێما کوردستانێ راگەهاند کو جارەکا دی داخواز ژ هەموو وەلاتیێن هەرێما کوردستانێ دکەم کو بۆ پاراستنا خوە و کەسوکارێن خوە پێگیریێ ب رێنمایان بکەن و خوە ب پارێزن.
ئەڤرۆ نیوز:
پشتی کو فەرسەت سوفی پارێزگارێ هەولێرێ دیار کر هەر وەلاتیەک ژ پارێزگەهێن دی یێن عیراقێ بهێتە هەولێرێ دێ پشکنینا کۆرۆنایێ بۆ وان هێتە کرن و دێ ٥٠ هزار دینار ژ وان هێتە وەرگرتن، لێ د تۆرێن جڤاکی دا گەلەک گۆتنێن جودا ل سەر بابەتی هاتنە کرن و نڤیسینگەها پارێزگارێ هەولێرێ ژی داخۆیانیەک د ڤێ دەربارێ دا بەلاڤ کر.
ڕوونکردنەوەیەک لە نووسینگەی پارێزگاری هەولێر
لەلایەن هەندێک کەس و میدیا، لێکدانەوەی هەڵەی بەمەست و بێمەبەست بۆ قسەکانی پارێزگاری هەولێر کراوە کە ئەمڕۆ لە کۆنگرەیەکی ڕۆژنامەوانی لەسەر هاتنە ژوورەوەی خەڵکی پارێزگاکانی دیکەی عێراق بۆ پارێزگای هەولێر کردنی.
پارێزگاری هەولێر زۆر بەڕوونی ڕایگەیاند: “لەپێناو کارئاسانی هاتنە ژوورەوەی هاوڵاتییانی شارەکانی دیکەی عێراق جگە لە پارێزگاکانی هەرێمی کوردستان، ژووری ئۆپەراسیۆنی پارێزگای هەولێر بەهەماهەنگی لەگەڵ بەڕێوەبەرایەتی گشتی تەندروستی هەولێر، سەرقاڵی داڕشتنی میکانزمێکن بۆ ئەوەی ئەو خەڵکانە بتوانن بێنە ناو شاری هەولێر بەمەرجی ئەنجامدانی پشکنینی پزیشکی لەسەر ئەرکی خۆیان و بە نرخێکی گونجاو، ئەمەش هەم بۆ کارئاسانی هاوڵاتییان و هەمیش بۆ پەرەپێدانی جموجۆڵی بازرگانی و ڕانەوەستانی کاروکاسبی خەڵک”، بۆیە هەرچی دیکەی دەگوترێ بێجە لەوەی کە باسکراوە دوورە لەڕاستی و مەبەست لێی تەنها بڵاوکردنەوەی چەواشەکاری و بەلاڕێدابردنی ڕاستییەکانە.
نوسینگەی پارێزگاری هەولێر
2020.7.13
ئەڤرۆ نیوز، عەلی حاجی :
رێڤەبەرێ ناحیا دەرکارێ د داخۆیانیەکێ دا بۆ ئەڤرۆ نیوز دیار کر بۆ ئێکەم جارە سوپایێ تورکیا گوندێ دەخلک گوندک ل سنورێ ناحیا مە توپباران کر کو دو ساروخ ل سنورێ وی گوندی دان و بۆ ئەگەر ژی پاوانێ وی گوندی بهێتە سوتن و شەر و پەفچوون دناڤبەرا سوپایێ تورکیا و هێزێن پەکەکێ بەردەوامە .
زێدەتر زێرەڤان موسا گۆت: (ل درەنگیا روژا ئێکشەمبیێ رێککەڤتی ١٢/٧/٢٠٢٠ فروکەیێن تورکیا بۆ ئێکەم جار گوندێ دەخلک گوندک ب دو ساروخان توپباران کر کو دبیتە بۆ ئێکەم جار ئەو گوندە دهێتە توپباران کرن بۆ ئەگەر زیان ب پاوانێ وی گوندی بکەڤیت و زێدەباری وێ چەندێ ژی هەر دوهی روژا ئێکشەمبیێ سوپایێ تورکیا ب ١٥ توپان گوندێ باجوا ل دەرورێ ناحیا باتیفا توپباران کر و سەرەرای توپبارانا بەردەوام ژی شەرێ دووشکان بەردەوام دناڤبەرا سوپایێ تورکیا و هێزێن پەکەکێ دا دروست دبیت ل چیایێ خامتیری کو ب تایبەتی ژی ل دەوروبەرێن وان خالێن هێزێن تورکیا ل وی چیایی دانان و ئەڤە ژی وێ چەندێ دگەهینیت کو هێشتا هێزێن پەکەکێ ل وێ دەڤەرێ ماینە) .
ناڤبری دووپات کر ژی ل چیایێ شاخولێ یا دەڤەرا بوسەلیان سوپایێ تورکیا بەردەوامە ل سەر رەوانە کرنا هێزێن خوە و پێشتر ژی هێزەکا کوماندویێ یا سوپایێ تورکیا ل وی چیایی هاتبوونە بنەجهـ کرن پشتی بوردومانەکا دژوار یا سوپایێ تورکیا .
ئه‌ڤرۆ نیوز، عه‌لى حاجى :
ئه‌ندامه‌كێ لیژنا بلند یا چاڤدێریكرنا ده‌رمانخانه و كلینیكێن نوشدارى ل زاخۆ بۆ ئه‌ڤرۆ نیوز دیار كر ژلایێ لیژنه‌یا وان ڤه جهه‌ك ل زاخۆ هاته دائێسختن كو رادبوو ب فروتنا ده‌رمانان كو ل دویڤ رێنمایێن ساخله‌میێ نابیت ئه‌و جهه رابیت ب فروتنا ده‌رمانان و چه‌ندین هوشدارى ژى ب جهێن دیتر هاته دان .
زێده‌تر خه‌لات ئوسمان گۆت: (ئه‌ڤرۆ روژا دوشه‌مبیێ لژنه‌یا وان سه‌ره‌دانا حه‌فت جهان كریه كو پێك دهاتن ژ كومه‌لگه‌هێن نوشدارى و ده‌رمانخانه‌یان و ئه‌گه‌رێ نه‌پێگیركرنا دو ده‌رمانخانه‌یان ب رێنمایان هوشدارى ب وان هاته دان و هه‌ر دیسان جهه‌كێ فروتنا بهاراتان كو درابوو ب فروتنا ده‌رمانێن گیایى هاته دائێسختن و سوزنامه‌یه‌ك ژى ژێ هاته وه‌رگرتن ژ به‌ر كو ل دویڤ رێنمایێن وه‌زاره‌تا ساخله‌میێ نابیت ئه‌ڤ جهه رابن ب فروتنا ده‌رمانان له‌ورا هاته دائێخستن و هه‌كه وى كه‌سى دوباره كر دێ پێرابونێن یاسایى ل به‌رامبه‌ر هێنه وه‌رگرتن و هه‌ر دیسان هه‌مى كومه‌لگه‌هێن نوشدارى ژى هاتینه ئاگه‌هدار كرن كو پێدڤیه ل به‌ر ده‌رگه‌هێ گشتیێ كومه‌لگه‌هێ ب تنێ رێك ب وان كه‌سان بهێته دان بهێنه دناڤ كومه‌لگه‌هێ دا ئه‌وێن كه‌مامه ب كارئیناین) .
ناڤبرى گۆت ژى ل حه‌فتیا بورى سه‌ندیكا ده‌رمانسازێن كوردستانێ لقا زاخۆ سه‌ره‌دانا چه‌ند ده‌رمانخانه‌یان كربوو كو ژ ئه‌گه‌رێ نه‌پێگیریا دو ده‌رمانخانه‌یان كو ده‌رمانساز ئاماده نه‌بوون ب كوژمه‌یه‌كێ پاره‌یى هاتنه سزادان و هه‌ر دیسان سێ ده‌رمانخانه‌یێن دیتر هوشدارى ب وان هاتبوو دان و هه‌ر دیسان سوزنامه ژى ب ده‌رمانخانه‌یه‌كێ ژى هاتبوو پر كرن دا كو پێگیر بن ب رێمایێن ساخله‌میێ .
ئەڤرۆ نیوز، زنار تۆڤی:
ئەڤرۆ دوشەمبی 13.7.2020 ب بەهانەیا هەبوونا گەریلایێن پەکەکێ، جارەکا دی هێزێن ئەسمانی یێن سوپایێ تورکیا گوندێ بێشیلێ ل بنارا چیایێ مەتینا ل دەڤەرا بەرواری بالا یێ سەر ب قەزا ئامێدیێ ڤە بوردۆمان کر، د ئەڤ سالە دا ئەڤە چەندین جاران ئەو گوندە هاتە بوردۆمان کرن.
حەجی وەلاتیەکێ گوندێ بێشیلی یە، بۆ ئەڤرۆ نیوز دیار کر: ئەڤرۆ ل دەمژمێر 12:30 خولەکی نیڤرۆ، هێزێن ئەسمانی یێن سۆپایێ تورکی ب دژواری گوندێ بێشیلێ و گەلیێ بێشیلێ بوردۆمان کریە، هەر چەندە چەند کەسان د ناڤ ئاقارێ گوندی دا کارێ ئاڤدانێ دکر، لێ چو زیان نەگەهشتینە وان و ب سلامەتن، لێ پرچکێن وان بۆمبەیان ب نێزیکی وان کەفتینە و ترس ل دەف وان پەیدا کریە، دیسان هەکە ب ڤی رەنگی بۆمبەباران یا بەردەوام بیت، ئێدی ئەم نەشێین بچینە ناڤ ئاقارێ خوە و دێ زیانەکا مەزن گەهیتە کارێ مە یێ چاندنێ، هەر چەندە نوکە چ مال ل گوندی نینن و ب تنێ بۆ کارێ چاندنێ ئەم دچینە گوندێ خوە.
ئه‌ڤرۆ نیوز:
په‌یڤدارێ وه‌زاره‌تا ساخله‌میا حوكمه‌تا هه‌رێما كوردستانێ راگه‌هاند پشكنینا ڤایرۆسێ كورونایێ بۆ وه‌لاتیان، ناهێته دان ب كه‌رتێ تایبه‌ت، به‌لێ ئه‌وێن دڤێن بۆ پشت راستبوونا ساخله‌میا خوه دڤێن پشكنینێ ل كه‌رتێ تایبه‌ت بكه‌ن، ئه‌ڤه ل ده‌مێن بهێت بریار ل سه‌ر هێته‌دان.
د.محه‌مه‌د قادر په‌یڤدارێ وه‌زاره‌تا ساخله‌میا هه‌رێما كوردستانێ راگه‌هاند پشكنینا ڤایرۆسێ كورونایێ بۆ وه‌لاتیان بتنێ دێ ل تاقیگه‌هێن نه‌خوشخانه‌یێن حوكمه‌تا هه‌رێما كوردستانێ بن و بێ به‌رامبه‌ر بۆ وه‌لاتیان هێنه ئه‌نجام دان، تاكو نوكه چ بریاره‌ك نه‌هاتیه دان ئه‌و پشكنین بهێته دان ب كه‌رتێ تایبه‌ت.
په‌یڤدارێ وه‌زاره‌تا ساخله‌میا هه‌رێما كوردستانێ ئه‌و چه‌نده ژی راگه‌هاند هزره‌ك هه‌یه كۆ ئه‌ڤێن دڤێن و نه‌خوش نینن بتنێ بۆ پشت راستبوونا خو پشكنینا ڤایرۆسێ كورونایێ ل تاقیگه‌هێن ئه‌هلی ئه‌نجام بده‌ن، رێك پێ بهێته‌دان، به‌لێ ئه‌ڤی بابه‌تی پێدڤی ب ڤه‌كۆلینان هه‌یه پشتی دگه‌هینه ئه‌نجامی ب چه‌ند مه‌رج و رێنمایه‌كان بریارا پێدڤی ل سه‌ر هێته دان.
ناڤبری ئه‌و چه‌نده ژی دازانین پێشكێشكرنا خزمه‌تگۆزاریا ساخله‌میێ بۆ وه‌لاتیان ئه‌ركێ حوكمه‌تێ یه ب ئه‌گه‌رێ گه‌هشتن و دابینكرنا پێدڤیێن چاره‌سه‌ركرنێ و تانوكه چاره‌سه‌ركرنا توشبوویێن ڤایرۆسێ كورونایێ ل هه‌رێما كوردستانێ بله‌ز و ساناهی بوویه.
نيشاندان