ئەڤرۆ نیوز:
پارێزگەها دهۆکێ قوناغا شەشێ یا ئاسانکاریێن قەدەغەیا هاتنوچوونێ راگەهاند، کو سوبەهی دێ چیتە د وارێ جێبەجێکرنێ دا.
پارێزگارێ دهۆکێ راگەهاند، ئەڤرۆ دوشەمبێ ٢٠ نیسانا ٢٠٢٠ قوناغا شەشێ یا ئاسانکاریان بۆ وەلاتیێن پارێزگەها دهۆکێ بۆ قەدەغەیا هاتنوچوونێ دا راگەهاند، و بریارە سوبەهی بچینە د وارێ جێبەجێکرنێ دا.
دیار کر ژی، د قوناغا شەشێ دا رێک دێ ب پیشەسازیان هێتە دان بۆ ڤەکرنێ و کارگەهێن دارتاشیێ و کرین و فرۆشتنا کەلوپەلێن کارەبایێ و جهێن موبایلان و مەیدانێن تەرش و کەوالی هێتە دان بهێنە ڤەکرن.
ئەڤرۆ نیوز:
عەلی باباجان جێگرێ بەرێ یێ سەرۆک وەزیرێن تورکیا و سەرۆکێ پارتیا DEVA ل تورکیا راگەهاند کو گەلەک جاران پرسا کوردی و بابەتێ تیرۆرێ تێکەلی ئێکتر دهێتە کرن، ئەو یەک چو ئەنجامێن خوە نابن و پێدڤیە پرسا کوردی دوور ژ شەری و ب رێیێن سیاسی بهێتە چارەسەرکرن.
ناڤهاتی ئەو یەک ژی دیار کر کو ئاکپارتی ژ راستیا خوە یا دەمێ هاتیە دامەزراندن دوور کەفتیە و ئاکپارتی ب سیاسەتا خوە یا شاش تورکیا تووشی قەیرانەکا مەزن یا ئابووری، سیاسی و جڤاکی کریە.
ئەڤرۆ نیوز:
دەزگەهێن راگەهاندنا بریتانیا دیار دکەن کو پشتی کۆرۆنا ل چینێ دەرکەفتی شەش نوشداران هەر زوو ل دۆر ڤایرۆسێ کۆرۆنا دەست ب ڤەکۆلینان کرن دا بشێن چارەسەریەکێ بۆ ڤایرۆسێ کۆرۆنا پەیدا بکەن، لێ نوشدارەک هاتە کوشتن و هەتا نها ژی ٥ نوشدارێن دی ل چینێ بەرزە نە و چارەنڤیسێ وان دیار نینە.
بەری نها ژی سەرۆکێ ئەمریکا دیار کربوو کو چینێ راستیا کۆرۆنایێ بۆ جیهانێ ئاشکرا نەکریە و دوهی ژی ترامپی دیار کر کو دڤێت ل دۆر هندێ چین ب توندی بهێتە سزادان.
ئەڤرۆ نیوز:
ئەمین ئوزگونول ئەندامێ پەرلەمانێ تورکیا راگەهاند کو پرانیا داهاتێ تورکیا ل سەر گەشتوگوزارێ یە و ژ بەر ڤایرۆسێ کۆرۆنا نها کەرتێ گەشتوگوزارێ ل تورکیا بەر ب نەمانێ ڤە دچیت و ژ بەر هندێ دێ نێزیکی ١٠ ملیون کەس ل تورکیا بێکار مینن و دڤێت دەولەتێ بەرنامەکا خوە یا تایبەت هەبیت دا بشێت هاریکاریا خەلکی بکەت.
ئەو یەک د دەمەکێ دایە کو دوهی سەرۆک کۆمارێ تورکیا راگەهاند دووماهیا مەها ٥ دێ کەرتێ گەشتوگوزارێ ل تورکیا ئاسایی بیت.
ئەڤرۆ نیوز:
شاندێ هەرێما کوردستانێ ئەڤرۆ ل گەل سەرۆک کۆمارێ عیراقێ کۆمبوو و پاشی ژی دێ ل گەل سەرۆک وەزیرێن عیراقێ و وەزیرێ دارایی ژی کۆمبن.
ئەندامەکێ پەرلەمانێ عیراقێ ژی دیار دکەت کو پشتی کۆمبوونێن شاندێ هەرێمێ ل گەل سەرۆک کۆمار، سەرۆک وەزیر و وەزیرێ دارایی رەنگە شاندێ کوردی ل گەل مستەفا کازمی سەرۆک وەزیرێن راسپاردی بۆ ئاڤاکرنا کابینا نوو یا عیراقێ ژی کۆمبیت کو بریارە سپێدێ کارناما کابینا خوە راگەهینیت.
ئه‌ڤرۆنیۆز، سالار دۆسكی:
ل ناحیه‌كا سه‌ر ب قه‌زا سێمێلێ ڤه بۆ جارا ئێكێ لیترا پانزینێ بۆ ئاسته‌كێ نزم دابه‌زی، خودانێ پانزینێ ژی هوكار ڤه‌گه‌راند بۆ هاریكاریا خه‌لكی.
سه‌ركه‌فت شه‌عه‌بان، خودانێ پانزیخانا راستی ل كومه‌لگه‌ها دومیز سه‌ر ب ناحیا فه‌دیێ ڤه، ئه‌ڤرۆ رۆژا دوشه‌مبی 20 نیسانێ بۆ ئه‌ڤرۆ نیۆز ئاشكراكر كو بهایێ هه‌ر لیترەکا پانزینێ بۆ 400 دیناران ئه‌رزانكریه و ئه‌ڤه وه‌ك هاریكاری بۆ خه‌لكێ كوردستانێ.
خودانێ هه‌مان پانزیخانه ئه‌و ژی گۆت: (پانزینا دفرۆشم ژ جورێ كاره و ب 475 ژ ژێده‌ری دگه‌هیته پانزیخانێ و ئه‌ڤ جوره پانزینه ل هه‌موو پانزیخانا ژ 500 دیناران و زێده‌تر و ئه‌ف كاره مه ئه‌نجام دا وه‌ك هاریكاری بۆ خه‌لكی و داخوازێ ژ هه‌ڤالێن خوه هه‌موویان دكه‌م پشته‌ڤان و هاریكارێ خه‌لكی بن).
سه‌ركه‌فت ئه‌و ژی دیاركر كو ماوێ هه‌یڤه‌كێ یه كار نه‌كریه ژ به‌ر ڤایرۆسێ كورونایێ و بلا ڤێ هه‌یڤێ ژی قازانج نه‌بیت و بۆ هه‌ژاران بیت.
ل دور بابه‌تی ئه‌ڤرۆ نیۆز، په‌یوه‌ندی ب عه‌بدوسه‌مه‌د تێلی سه‌رۆكێ لیژنا پیشه‌سازی و سامانێن سرۆشتی كر ل جڤاتێ لێ په‌یوه‌ندیا وی یا به‌رده‌ست نه‌بوو.
ئەڤرۆ نیوز:
عەباس موسەوی پەیڤدارێ وەزارەتا دەرڤە یا ئیرانێ راگەهاند کو شاندێ ئیرانێ ب سەرۆکاتیا وەزیرێ دەرڤە یێ ئیرانێ محەمەد جەواد زەریف ئەڤرۆ ل دیمەشقێ ل گەل بەشار ئەسەدێ سەرۆکێ سووریێ کۆمبووینە و د کۆمبوونێ دا بەحسێ گوهۆرینێن دووماهیێ ل دەڤەرێ و سووریێ و پەیوەندیێن هەر دو ئالیان کرینە.
ئەڤ سەرەدانا وەزیرێ دەرڤە یێ ئیرانێ د دەمەکێ دایە کو ژ بەر ڤایرۆسێ کۆرۆنا د ئاستێ جیهانی دا هەموو پەیوەندیێن دبلۆماسی و هەڤدیتنێن سیاسی هاتینە راگرتن.
نيشاندان