ئەڤرۆ نیوز:
فەرمانگەها میدیا و زانیاریان یا حوکمەتا هەرێما کوردستانێ راگەهاند کو حوکمەتا عیراقێ ژ بەر قەدەغەیا هاتن و چوونێ و ژ بۆ هاریکاریا خەلکێ هەژار کوژمێ ٦٠٠ ملیارد دیناران تەرخان کرینە و هەرێما کوردستانێ ژی داخواز کریە کو ژ وی پارەی پشکەکا هەرێما کوردستانێ ژی بهێتە رەوانەکرن و تێگەهشتنەکا باش ژی د ناڤبەرا هەر دو ئالیان دا دروست بوویە، لێ هەتا نها ئەو پارە نەگەهشتیە هەرێما کوردستانێ.
ئەڤرۆ نیوز:
رێکخراوا چاڤدێریا مافێن مرۆڤی یا سووریێ راگەهاند کو ئەڤرۆ ل باژێرێ سەرێکانیێ یێ رۆژئاڤایێ کوردستانێ د ئەنجاما پەقینەکا ب هێز دا گەلەک چەکدارێن سەر ب تورکیا هاتنە کوشتن و ب دەهان چەکدار ژی بریندار بووینە.
ل گۆر رێکخراوا چاڤدێریا مافێن مرۆڤی یا سووریێ پەقین ب رێیا ترۆمبێلەکا بومبرێژکری روو دایە، لێ هەتا نها چو ئالیەکێ بەرپرسیار خوە ل هەمبەر وێ پەقینێ دیار نەکریە.
ئەڤرۆ نیۆز، قائید میرۆ:
ل دەوروبەرێ مووسل مەترسیێن داعش زێدەبووینە و رێڤەبەرێ ناحیا زوممارژی دبێژیت، مەترسی ھەیە بۆ ڤەگەڕیانا داعش و خەلکێ دەڤەرێ ب کورد و عەرەبڤە داخوازا ڤەگەڕیانا پێشمەرگەی کەن.
ئەحمەد جەعفەر، رێڤەبەرێ زوممار بۆ ئەڤرۆ نیۆز دیارکر” ل دەڤەرێن دەروبەرێ مووسل لڤینێن چەکدارێن داعش زێدەکریە و ل چەند رۆژێن بۆری دا ل دەڤەرا محەلەبیە ھژمارەک وەلاتیێن سڤیل کرینە ئارمانج و سەرێ وان ھاتیە بڕین ژلایێ داعشڤە، خەلکێ دەڤەرێ دلگرانن ب لڤینێن داعش.
رێڤەبەرێ ناحیا زوممار گۆتژی” ل چوار دوورێن زممار داعش پەیدابوویە ھەر دەڤەرا حەزەر و محەلەبیە و بادۆش ھەتا دگەھیتە سینورێ سووریێ ل ناحیا رەبیعە یا ڤەکریە.
ئەحمەد جەعفەر ئاشکراکر” پێدڤیە رێکەفتن دناڤبەرا ھێزێن پێشمەرگە و عێراقی بھێتەکرن ژبۆی کۆنتڕۆلکرنا رەوشا ئەمنیا زومار و دەڤەرێن دی یێن کوردستانی، ژبلی کوردان عەرەبێن زوممار دخوازن پێشمەرگە ڤەگەڕیت بۆ دەڤەرێ، ژبەرکو بەری نوکە سەربور دگەل ھێزا پێشمەرگەی ھەیە و دەمێ پێشمەرگە ل دەڤەرێ رەوشا ئەمنی یا پاراستی بوو.
ئەڤرۆ نیۆز، قائید میرۆ:
سەرەڕای رێکەفتنا ئەندامێن رێکخراوا ئوپێک و ئوپێک پلەس بەلێ ھێشتا کاریگەری لسەر بھایێ پەتڕۆلێ نەکریە و بسپۆرەکێ کەرتێ پەتڕۆلێ ئاماژەکر، بھایێ پەتڕۆلێ دێ بچیتە سەرڤەی ٥٠ دۆلاران.
دکتۆر عەلی بەلو، بسپۆرێ کەرتێ پەتڕۆلێ بۆ ئەڤرۆ نیۆز گۆت” داکەتنا بھایێ پەتڕۆلێ د بازاڕی دا دەمکیە و ئەمریکا رازینابیت پەتڕۆل بڤی بھایێ نوکە بھێتە فرۆتن، چونکە زیانێن مەزن دێ بەر کۆمپانیێن ئەمریکی بکەڤن، ئەمریکا بەحسێ ھەڤڕکیێن ناڤبەرا سعودیێ و رۆسیا لدۆر بھایێ پەتڕۆلێ کریە و پەیوەندی ب ھەردو وەلاتانکریە.
ئەڤی بسپۆرێ کەرتێ پەتڕۆلێ ئاشکراکر”بڕیار لدۆر کێمکرنا بەرھەم ئینانا پەتڕۆلێ ھاتیە دان ژلایێ وەلاتێن پەتڕۆلێ بەرھەم دئینن، ھەگەر بڕیار بکەڤیتە بیاڤێ بجە ئینانێ دا دێ کاریگەری ھەبن لسەر بازاڕی.
دکتۆر عەلی بەلو پێشبینی کر” بھایێ پەتڕۆلێ بۆ ٥٠ی دۆلاران بلندببیت و بھایێ پەتڕۆلێ دێ بڤی بھای مینیت بۆ دەمەکی و ئەڤ بھایێ نوکە نامینیت، ھەتا وی دەمێ بازاڕ سەقامگیر دبیت.
ئەڤرۆ نیوز، عەلی حاجی :
بەرپرسێ راگەهاندنا ساخلەمیا زاخۆ د داخویانیەکێ ل دور ژڤانێ دەست پێکرنا فاکسیندانا زاروویان دا بۆ ئەڤرۆ نیوز ئاشکەرا کر ” ل دەست پێکا حەفتیا بهێت دێ دەست ب فاکسیندانا زاروویان دناڤ بنگەهێن ساخلەمیێ دا ل سنورێ قەزا زاخۆ دەست پێکەت و بۆ ماوەیەکێ دێ یا بەردەوام بیت”.
ئەمیر عەلی ئەو چەندە ژی ئاماژە پێکر فاکسیندان ل روژا شەمبێی رێکەڤتی ١٨/٤/٢٠٢٠ هێتە دەست پێکرن و فاکسیندان دێ بۆ زاروویێن دژیێ ئێک روژی هەتا پێنچ سالی بیت و پێدڤی یە ئەو کەسێ زاروویێ خوە ببیتە ڤاکسیندانێ پلێتا ڤاکسیندانێ هەبیت و بۆ جێبەجێ کرنا رێکارێن خوە پاراستنێ ژ ڤایروسێ کورونایێ و دروست نەبونا قەرەبالغیێ دناڤ بنگەهێن ساخلەمیێ دا ل حەفتیا ئێکێ دا دێ زاروویێن د ژیێ ئێک روژی دا هەتا ژیێ بن ئێک سالیێ دا هێتە دانان بۆ فاکسیندانێ و د حەفتێین دووف دا دێ زاروویێن د سەر ئێک سالێی دا هەتا بن پێنچ سالیێ دا بیت،هەر دیسان ل بنگەهێن ساخلەمێی ژی بەرهەڤی هاتینە کرن کو دناڤبەرا هەر دو کەسان دا دو مەترا ژ ئێک دوو دور بن و پشتی ئێک دهێتە فاکسیندان ژ نوو رێک ب کەسەکێ دیتر بهێتە دان فاکسین بۆ زاروویان وان بهێتە دانان دا کو قەرەبالغی دروست نەبیت.
ناڤهاتی گوت ژی هەر ئافرەتەکا زاروویێ خوە بینیتە دناڤ بنگەهێ ساخلەمیێ دا پێدڤی یە کەمامە و دەست لەپ د دەستێ وان هەبن دا کو پاراستی بن ژ هەر نەخوەشیەکێ.
ئەڤرۆ نیوز، عەلی حاجی :
ئەندامەکێ لژنا دیفچوونا بازاری ل زاخۆ د داخویانیەکێ دا بۆ ئەڤرۆ نیوز ئاشکەرا کر ژلایێ لژنا وان ڤە سێ مارکێت بۆ ماوەیێ سێ روژان هاتنە دائێخستن و دەست ب سەر زێدەتری ٦٠٠ کێلوگرامێن کەرەستەیێن ئێکسپایەر دا هاتە گرتن .
زێدەتر وەلات هەجەر گوت: ( ئەڤرۆ ل روژا پێنچ شەمبێ رێکەڤتی ١٦/٤/٢٠٢٠ ل دووف فەرمانا قایمقامێ زاخۆ بوتان محسن لژنا دیفچوونا بازاری ب هاریکاریا ئاسایش و پولیس و لژنا چاڤدێریا بازرگانی ل زاخۆ دیفچوونا بازاری ل زاخۆ کرن و ئەڤرۆ مە سەرەدانا ١٥ جهان کر، ژ ئەگەرێ هەبونا کەرەستەیێن ئێکسپایەر دناڤ سێ مارکێتان دا ئەو سێ جهە بۆ ماوەیێ سێ روژان هاتنە دائێخستن و ژبەر هەبونا لێک نەتێگەهشتنەکێ د ئاڤ تەزینکەکێ دا مە دەست ب سەر ٢٥ کارتونێن مریشکێن ئێکسپایەر دا گرتن و هەر دیسان دەست ب سەر ٦٥١ کێلو گرامێن کەرەستەیێن ئێکسپایەر دا هاتنە گرتن دناڤ مارکێتان دا و ئەو کەرەستە ژی ژلایێ لژنا مە ڤە دێ هێنە ژناڤ برن ).
ناڤهاتی خویاکر ژی مە هەمی جهـ ل زاخۆ ئاگەهدار کرینە هەر جهەک پێگیریێ ب رێنمایان نەکەت و کەرەستەیێن ئێکسپایەر دناڤ جهێ وی دا بهێتە دیتن یان ژی بهایان بلند بکەت دێ ئێکسەر هێتە دائێخستن و دیفچوونا مە ل سەر بازاری دێ بەردەوام بیت و دێ رێکارێن توند ژی ل بەرامبەری کەسانێن سەرپێچکار گرینە بەر.
ئه‌ڤرۆ نیوز:
فه‌رمانگه‌ها میدیا و زانیاریان یا حكومه‌تا هه‌رێما كوردستانێ هیرده‌كاریێن هه‌ڤكاریێ بۆ حكومه‌تا هه‌رێما كوردستانێ بۆ ڤایرۆسێ كروونایێ ئاشكراكر و راگه‌هاند هه‌تا نوكه زێده‌تری 20 ملیۆن و نیڤێن دۆلاری، هه‌ڤكاریا حكومه‌تا هه‌رێمێ هاتیه‌كرن، هه‌ڤده‌م به‌غدا ژی سێ سێ ملیار و 500 هزار دینار بۆ هه‌رێمێ هنارتینه.
فه‌رمانگه‌ها میدیایی و زانیاری یا حكومه‌تا هه‌رێما كوردستانێ ئه‌و چه‌نده ژی راگه‌هاند: ئه‌و هه‌ڤكاریێن ل ده‌مێ قه‌یرانا ڤایرۆسێ كورونایێ گه‌هشتینه ده‌ست حكومه‌تا هه‌رێما كوردستانێ بڤی شێوه‌یێ خارێ بوون:
ئێكه‌م: هاریكاری تاكو نوكه بیست ملیۆن و نیڤێن دۆلاری هاتینه بۆ سه‌ر هژمارا ناڤه‌ندا جڤاتا وه‌زیران، ئه‌و پاره بۆ كرینا خوارنێ و ده‌رمانان هاتینه ته‌رخانكرن، پاشی ب سه‌ر هه‌موو پارێزگه‌هێن هه‌رێمێ لگۆری رێژه‌یا ئاكنجییان هاتینه پارڤه‌كرن.
دوو: به‌غدا سێ ملیار و نیڤ دینار هنارتن، جڤاتا وه‌زیران ب نفیسار بۆ وه‌زاره‌تا دارایی هنارت كۆ بۆ ئه‌وێ چه‌ندێ ب سه‌ر پاریزگه‌هان بهێنه پارڤه‌كرن.
سێ: ریكخراوا WHO چ هه‌ڤكاریا مه ب پاره‌ی نه‌كریه، بتنێ هنده‌ك ئامێر وكه‌ره‌سته‌یێن ساخله‌میێ راده‌ستی وه‌زاره‌تا ساخله‌میێ كرینه.
چار: جڤاتا وه‌زیران یا عیراقێ بریاردایه 600 ملیار دیناران ب سه‌ر خه‌لكێ هه‌ژار دا پارڤه بكه‌ت، هه‌رێما كوردستانێ ب فه‌رمی نفیسار كریه به‌لێ تاكو نوكه چ رێژه‌یه‌كژ وی پاره‌یی بۆ هه‌رێمێ نه هنارتیه.
ئەڤرۆ نیوز،عەلی حاجی :
رێڤەبەرێ چاندنێ ل زاخۆ د داخویانیەکێ دا بۆ ئەڤرۆ نیوز ئاشکەرا کر ب ریێا تیمێن خوەیێن گەروک نوکە دا چاڤدێریا وان جۆتیاران دکەن یێ بەرهەمێ گەنمی چاندین دا کو هەر نەخوەشیەک پەیدا ببیت ژناڤ ببەن.
زێدەتر ئەحمەد سامی گۆت : رۆژانە تیمێن مە سەرەدانا بەرهەمێن جۆتیاران دکەن بۆ وێ چەندێ هەکە نەخوەشیێن سمک و کولی دناڤ بەرهەمێن وان دا پەیدا بوو ب رێیا دەرمانێ تایبەت وێ نەخوەشیێ ژناڤ ببەن و بۆ ڤێ چەندێ ژی مە دەرمان ژی ئامادە کری یە و ئەم د ئامادەباشیەکا تەمام داینە بۆ کۆنترول کرن ل سەر وان جورێن نەخوەشیان، هەر دیسان ئەم نوکە ژ نێزیک ڤە چاڤدێریا بەرهەمێ گەنمێ پلە ئێک دکەین کو ژبەریا ماوەیەکێ ب رێیا رێڤەبەریا مە ٥١ تەنێن ژ وی جورێ گەنمی سەر وان جۆتیاران دا بەلاڤ کر بوون و هەکە دشیانێن حکومەتێ ژی دا هەبن وی گەنمی بکرن،هەکە وی گەنمی سەرکەڤتن ئینا و یێ باش بیت بۆ سالێن بهێت دێ چاندنا وی جورێ گەنمی زێدە کەین. ئەو چەندە ژی خوەیاکر ” رێ پێدانا حکومەتا هەرێما کوردستانێ ل دووف رێنمایێن نوو دەلیڤەیەک باش پەیدا کر د ڤی دەمێ گرنگ دا جوتیار گرنگیێ ب کارێ چاندنێ بکەن”.
ئه‌ڤرۆ نیوز:
محه‌مه‌د شیاع سودانی ئه‌ندامێ جڤاتا نوونه‌رێن عیراقێ راگه‌هاند ته‌ڤایا فراكسیونێن سیاسی رێكه‌تن ل سه‌ر ئه‌وێ چه‌ندێ كۆ گرنگه حكومه‌تا مسته‌فا كازمی ل جڤاتا نوونه‌ران بهێته ده‌رباز بكرن.
محه‌مه‌د شیاع سودانی ئه‌و چه‌نده ژی راگه‌هاند: عیراق دێ ژ كۆمه‌كا قه‌یرانان دا ده‌رباز بیت و پیدڤی ب تیمه‌كا پیشه‌یی و دلسوزی و ده‌ستپاكی هه‌یه كۆ ل گه‌ل سه‌رۆك وه‌زیران دا كار بكه‌ن، بۆ دیتنا چاره‌سه‌ریێ یان كێمكرنا كاریگه‌ریێن ئه‌وێ قه‌یرانێ.
ئه‌ندامێ جڤاتا نوونه‌رێن عیراقێ دیاركر هه‌ر بژارده‌یه‌كا شكه‌ستنێ ژ دیاركرناكه‌سێن نه‌پیشه‌یی كۆ بێ شیان بن، دێ كارتێكرنه‌كا نه‌گه‌تیڤ ل سه‌ر ئه‌دایا حكومه‌تی درۆست كه‌ت كار كه‌ته سه‌ر ئاستێ رازیبوونا جاده‌یێ، دڤێت قه‌یرانا كورونایێ و قه‌ده‌غه‌یا هاتنوچونێ و نه‌بوونا فشارێن جه‌ماوه‌ری نه بنه بهانه بۆ ڤه‌گه‌راندنا پارڤه‌كرنێ.
ناڤبری ئه‌و چه‌نده ژی دیاركر كازمێ سه‌ربورێن راسپارده‌یێن به‌ری خۆ لبه‌رچاڤ گرتینه، ئه‌وان تێبینیان كۆ ل سه‌ر ئه‌وان هه‌بوون بجهـ بكه‌ت، هه‌روه‌سا حكومه‌ت بهێته پێك ئینان كۆ ب شێت باوه‌ریا گه‌لی بده‌ستخوڤه بینیت.
ئه‌ڤرۆ نیوز:
بسپوره‌كێ ساخله‌میا ئه‌مریكا هوشداریا ئه‌وێ چه‌ندێ دده‌ت كۆ ل هاتنا وه‌رزێ زڤستانێ پێله‌كا دی یا ڤایرۆسێ كورونایێ ده‌ركه‌ڤیت، له‌ورا داخازا به‌رهه‌ڤیێ ژ وه‌لاتیان دكه‌ت.
روبه‌رت ریدفیله رێڤه‌به‌رێ سه‌نته‌رێ رێگرتن و كۆنترولكرنا نه‌خوشیان ل ئه‌مریكا د داخویانیه‌كا رۆژنامه‌ڤانی دا دیاركر ل وه‌رزێ زڤستانا بهێت دێ كورونا ل ئه‌مریكا ده‌ركه‌ڤیت و پێدڤیه ب توندی روو ب روو ببین، له‌ورا ب پێدڤی دزانین ئه‌مریكا شیانێن خۆ بۆ ئه‌نجامدانا پشكنینان زیده‌تر بكه‌ت، ژبوی ئه‌و كه‌سێن توشبووین ل گه‌ل ئه‌ڤێن به‌ركه‌ڤتی هه‌بوون بله‌ز بهێنه دیتن و ژیك جوداكرن.
بسپورێ ساخله‌میا ئه‌مریكا ئه‌و چه‌نده ژی دازانین، ئه‌مریكا به‌ری ده‌می نه‌شیا پێش وه‌خت رێگریێ ژ به‌لاڤبوونا ڤایرۆسی بكه‌ت، له‌ورا كه‌رتێ ساخله‌میێ ب شێوه‌یه‌كێ باش دخزمه‌تا وه‌لاتیان دا نه‌بوون، به‌لێ نوكه كار دكه‌ین بۆ ئه‌وێ چه‌ندێ ل وه‌رزێن بهێت ب شیێن ب شێوه‌یه‌كێ كاریگه‌ر رێگریێ ژ به‌لاڤ بوونا ڤایرۆسێ كورونایێ بگرن.
نيشاندان