ئەڤرۆ نیوز:
سەرۆک وەزیرێن بریتانیا راگەهاند، کو پشکنینێن کۆرۆنا یێ بۆ هاتیە کرن و ئەنجامێن پشکنینێ د پۆزەتیڤ بووینە، هەلگرێ ڤایرۆسێ کۆرۆنا یێ بوویە.
بۆریس جۆنسن، سەرۆک وەزیرێن بریتانیا ل ئەکاونتێ توویتەرێ خوە بەلاڤکریە، د 24 دەمژمێرێن بوری دا و چەند نیشانێن ناڤنجی یێن کۆرۆنا یێ هەبووینە و پشتی پشکنینێ دەرکەفتیە کو تووشی کۆرۆنا یێ بوویە.
هەروەسا گۆتیە، وی خوە کەرەنتینە کریە، بەلێ ب رێیا ڤیدیۆیان کارێ خوە دکەت.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند، 10 تووشبوویێن نوو ل هەولێر، سلێمانیێ و دهۆکێ هاتنە تۆمارکرن.
د ماوێ ٢٤ دەمژمێرێن بوری (٤٧٧) پشکنین هاتینە کرن، (٣١١) هەولێر، (٩٩) سلێمانی، (٦٧) دهۆك،
دەرئەنجام (١٠) تووشبوویێن نوو هاتینە تۆمارکرن ب ڤی رەنگی:-
– پارێزگەها هەولێرێ (٤) پۆزەتیڤ، کو ژنەکا تەمەن (٢٨) سالیە و (٣) گەنج د ژیێن (١٥)، (١٨)، (٢٦) سالیێ دانە و بەرکەفتیێن تووشبوویێن بەری نوکە نە.
– پارێزگەها سلێمانیێ (١) پۆزەتیڤ، کو ژنەکا تەمەن (٥٦) سالیە بەرکەفتیا تووشبوویێ پێشیە.
– پارێزگەها دهۆك (٥) پۆزەتیڤ، کو هەموو ئەندامێن ئێك خێزانێ نە (١) زەلام د تەمەنێ (٤٥) سالیێ دایە و کو ل وەلاتێ بریتانیا ڤەگەریایە، ژنەکا تەمەن (٣٩) سالی، (٢) گەنجێن د ژیێ (١٤)، (١٣) سالیێ دانە، زارۆیەکێ تەمەن (٥) سالی.
ئامارا گشتی یا هەلگرێن ڤایرۆسێ کۆڕۆنا یێ ل هەرێما کوردستانێ گەهشتە (١١٣) کەسان.
ئه‌ڤرۆ نیوز:
حكومه‌تا چینێ راگه‌هاند ب شێوه‌یه‌كێ ده‌مكی و بۆ رێگرتن ژ سه‌روشنی به‌ربه‌لاڤبوونا كورونایێ، گه‌شتێن بۆ ده‌رڤه‌ی وه‌لاتی دێ هێنه راوه‌ستاندن.
لگۆری راگه‌هاندنه‌كا حكومه‌تا چینێ هاتیه به‌لاڤكرن، پشتی بوورینا حه‌فت رۆژان كۆ چ حاله‌تێن توشبوویی ب كورونایێ نه‌بوون ئه‌ڤێن نوكه‌ژی په‌یدا بووین كۆ ژ ده‌رڤه هاتینه، له‌ورا دێ گه‌شت هێنه راوه‌ستاندن و توخیب دێ ب شێوه‌یه‌كێ ده‌مكی ل گه‌ل وه‌لاتان هێنه گرتن.
لگۆری ئه‌وێ بریارێ چین دێ رێگریێ ژ گه‌شتیارێن بیانی بۆ ناڤخۆ و ده‌رڤه‌ییێ چینێ كه‌ت، هه‌ڤده‌م رێگریكرن ژ ئه‌وان كه‌سان ناهێته‌كرن كۆ هه‌لگرێن پاسپورتێن دیپلوماسی یان بازرگانن بچنه ناڤ ئاخا چینێ دا.
ئه‌ڤه دده‌مه‌كی دایه كۆ چین كو ناڤه‌ندا سه‌رهلدانا ڤایرۆسێ كورنایێ یه، پشتی ده‌ربازبوونا هه‌فتیه‌كێ چ توشبووی نه‌هاتبوونه توماركرن، ئه‌ڤرۆ لژنا ساخله‌میا نیشتمانی یا ئه‌وی وه‌لاتی راگه‌هاند: ل باژێرێ ئوهان 55 حاله‌تێن توشبوون ب كورنایێ هاتینه توماركرن ژبلی ئێك توشبوو ته‌ڤایا یێن دی ژ ده‌رڤه‌ی وه‌لاتی هاتبوونه ناڤ چینێ.
هه‌تا نوكه ل چینێ 81 هزار و 340 توشبوو ب ڤایرۆسێ كوڤید 19 هاتینه توماركرن و سێ هزار و 292 توشبوو ب ئه‌گه‌رێ ڤایرۆسی مرینه و هه‌مبه‌ر دا 74 هزار و 588 توشبوویێن كورونایێ ساخ بووینه.
ئه‌ڤرۆ نیوز:
ب ئه‌گه‌رێ داكه‌تنا بهایێ پترۆلێ ب كارتێكرنا به‌لاڤبوونا ڤایرۆسێ كورونایێ، حكومه‌تا عیراقێ داخازیه‌ك ئاراسته‌ی كۆمپانیێن بیانی یێن بیاڤێ پترۆلێ كریه كۆ مه‌زاختیێن خۆ ب رێژا 30% كێم بكه‌ن.
ئاژانسا رویته‌رز به‌لاڤكریه، حكومه‌تا عیراقێ ب ئه‌گه‌رێ كێم بوون و داكه‌تنا بهایێ پترۆلێ داخاز ژ كۆمپانیێن بیانی یێن بیاڤێ پترۆلێ كریه مه‌زاختیێن خۆ كێم بكه‌ن كۆ ب رێژا 30%.
حكومه‌تا عیراقێ مه‌رج ژی دانایه بۆ كێمكرنا مه‌زاختیێن كۆمپانیا كۆ مه‌رج ژی ئه‌وه نابیت كێمكرن كارتێكرنێ ل سه‌ر رێژا به‌رهه‌مئینانا پترۆلێ بكه‌ت.
كۆمپانیا ئیكسون موبیل یا ئه‌مریكی كۆ به‌رهه‌مهێنه‌رێ سه‌ره‌كی یێ پترۆلێ یه ل عیراقێ، داخازژ كۆمپانیا دابینكه‌را پیدڤێن خۆ كریه مه‌زاختیان كێم بكه‌ن، چونكو بهایێ پترۆلێ داكه‌تی یه.
ب ئه‌گه‌رێ به‌لاڤ بوونا كورونایێ ل جیهانێ، بهایێ پترۆلێ نێزیكی 60% داكه‌تیه و ئه‌ڤێ چه‌ندێ ژی وه‌لاتێن به‌رهه‌مهێنه‌رێن پترۆلێ و كۆمپانیێن ئه‌وی بیاڤی ئێخستنه ره‌وشه‌كا دژوار دا.
ئه‌ڤرۆ نیوز:
ژماره‌یا توشبوویێن ب كورونایێ ل ئه‌مریكا ب رێژه‌یه‌كا به‌رچاڤ بلند بوویه چویه به‌ری چینێ .
د نوترین ئاماردا، كۆ ئاژانسا ده‌نگو و باسێن ئه‌مریكا كه‌ناله‌كێ تایبه‌ته ب كورونا ڤایرۆس به‌لاڤكریه، ژماره‌یا توشبوویان بۆ 82 هه‌زار و 179 كه‌سان بلند بوویه.
ئه‌و چه‌نده ژی هاتیه روونكرن كۆ ئه‌مریكا ل ژماره‌یا توشبوویان دا چوویه به‌ری چینێ كۆ 81 هزار و 285 كه‌س توشی ڤایرۆسێ كورونایی بوون.
به‌لێ ژ روویێ ژماره‌یا گیان ژ ده‌ست دانێ ب ئه‌گه‌رێ ڤایرۆسی ل ئه‌مریكا هزار و 177 كه‌س بوون، به‌لێ ل چینێ هزار و 287 كه‌س بوون.
هه‌ڤده‌م میدایێن ئه‌مریكا ئاماژه ب وێ چه‌ندێ ژی داینه كۆ ل ویلایه‌تا نیویورك و چه‌ند ویلایه‌ته‌كێن دی ژماره‌یا توشبوونیان ب شێوه‌یه‌كێ مه‌ترسیدار به‌لاڤ بوویه.
ئه‌ڤرۆ نیوز:
ب ئه‌گه‌رێ كورونایێ وه‌زاره‌تا ده‌رڤه‌یا ئه‌مریكا پشكه‌كا كارمه‌ندێن خۆ ل بالیوزخانه‌یا به‌غدا و قونسلخانه‌یا هه‌ولێرێ ڤه‌دكێشیت.
ئه‌ڤرۆ بالیوزخانه‌یا ئه‌مریكا ل به‌غدا راگه‌هاند: لبه‌رچاڤگرتنا ره‌وشا ئه‌منی و رێ و ئاوایێن توخیبداركرنا گه‌شتكرنێ ب ئه‌گه‌رێ ڤایرۆسێ كورونایێ، وه‌زاره‌تا ده‌رڤه فه‌رمان ل ژماره‌كا كارمه‌ندێن دیاریكری ل به‌غدا و هه‌ولێرێ كریه عیراقێ بجهـ بهێلن.
بالیوزخانه‌یا عیراقێ ئه‌و چه‌نده ژی دیاركر شیانێن حكومه‌تا ئه‌مریكا هاتینه دیاریكرن ژ پێشكێشكرنا خزمه‌تگۆزاریێن ژ نشكه‌كێ ڤه بۆ ئه‌وان ئه‌مریكێن ل عیراقێ نه.
داخاز ژ ئه‌مریكیان ژی كر ب زووترین ده‌م عیراقێ بجهـ بهێلن.
بالیوزخانه‌یا ئه‌مریكا ئه‌و چه‌نده ژی دا زانین خزمه‌تگۆزاریێن دانا ڤیزێ ب هه‌لاویستی هێلایه هه‌تا ده‌مه‌كی نه‌دیاریكری.
ئەڤرۆ نیوز:
د ماوێ ئێک رۆژ دا 662 کەسان ب ڤایرۆسێ کۆرۆنا ل ئیتالیا گیانێ خوە ژ دەستدایە و هژمارا گشتی یا تووشبوویان گەهشتە 80589 کەسان.
ئاگۆستینۆ میۆزۆ، رێڤەبەرێ بەرگریا شارستانی ل ئیتالیا د کۆنفرانسەکێ رۆژنامەڤانیدا راگەهاند، دوهی 662 کەسان ب ئەگەرێ ڤایرۆسێ کۆرۆنا گیانێ خوە ژ دەستدایە و 4492 کەس ژی تووشی ڤی ڤایرۆسی بووینە.
هەتا نوکە ب گشتی ل ئیتالیا 80589 کەس تووشی ڤی ڤایرۆسی بووینە، 10361 کەس چێبووینە و 8215 کەسان ژی گیانێ خوە ژ دەستدایە.
ئەڤرۆ نیوز:
وەزارەتا خەزینا ئەمریکا ١٥ کەسایەتی و کۆمپانیایێن ئیرانێ خستنە د لیستا سزایێن ولاتێ خوە دا، کو د ناڤا وان دا چەندین کەسایەتیێن عێراقێ ژی هەنە.
ئاژانسا میهر یا ئیرانی دیار کریە، ئەو کەسایەتیێن عیراقێ کو سزا ب سەر دا هاتینە سەپاندن پێک دهێن ژ محەمەد سەعید بەهادلی، محەمەد عەریفی، عەدنان حەمیداوی، عەدنان یونس جاسم، کەسایەتیێن ئیرانی ژی عەلی فەرهان ئەسەدی، عەلی رەزا فەداکاری و مەهدی قاسم زادەیە.
گۆتیە ژی، هەر د لیستا سزایێن ئەمریکا دا، کۆمپانیایێن سەهامیا تایبەتا موتاجری نوین مەدائین، سامان شیمیا رۆژهەلاتا ناڤین و لژنا ئاڤەدانکرنا جهێن پیرۆز ژی تێدانە.
هەروەسا ل ٧ تەباخا ٢٠١٨ قۆناغا ئێکێ یا سزایێن ئەمریکا بۆ سەر ئیرانێ چوو د بیاڤێ جێبەجێکرنێ دا.
ئه‌ڤرۆ نیوز:
هێزه‌كا سه‌ر ب فه‌رقه‌یا 11 یا سه‌ر ب سوپایێ عیراقێ چونه ناڤ تاخێ سه‌در یێ به‌غدا بۆ بجهكرنا قه‌ده‌غه‌یا هاتنوچونێ.
میدیایێن عیراقی به‌لاڤكرن ب ئه‌گه‌رێ پێگیرنه‌بوونا وه‌لاتیان ب بجهكرنا قه‌ده‌غه‌یا هاتنوچونێ، حكومه‌تا عیراقێ نه‌چار بوو هێزه‌كا سه‌ربازی ب بته ناڤ ئه‌وی تاخی.
ئه‌ڤه بۆ ده‌مێ چه‌ندین رۆژانه حكومه‌تا عیراقێ قه‌ده‌غه‌یا هاتنوچونێ راگه‌هاندی و بریاره تا رۆژا 12 ئه‌ڤێ هه‌یڤێ به‌رده‌وام بیت.
نيشاندان