ئەڤرۆ نیوز:
پشتی تۆمار كرنا تۆشبوویان ب ڤایرۆسێ كۆڕۆنا ل چینی ب دووماهی هاتی، 500 هۆلێن سینەمایێ دەرگەهێن خوە ڤەكرن.
دەزگەهێن راگەهاندنێ یێن حكومی ل چینێ دیار کرن، كو نێزیكی 70 هزار هۆلێن سینەما یێ ل سەرانسەری وەڵاتێ چینێ هەنە و ژ ئەگەرێ بەلاڤبوونا كۆرۆنا یێ هەموو هاتبوونە داخستن و ڤێ چەندێ ب بهایێ دو ملیار دۆلاران زیان گەهاندینە كەرتێ سینەمایێ ل چینێ، بەلێ نوكە 500 هۆل هاتینە ڤەكرن.
هەروەسا پشتی ڤێ بریارێ، بەرهەم هینەرێن سینەمایێ ل چینێ خۆ بەرهەڤ دكەن بۆ نیشادانا فلمێن نوو.
ئەڤرۆ نیوز:
د. سەباح نەسرەدین، رێڤەبەرێ گشتی یێ ساخلەمیا سلێمانیێ دیار کر، پێنج تووشبوویێن ڤایرۆسێ کۆرۆنا یێ ل سلێمانیێ چێبووینە و هاتینە رەوانەکرن بۆ مال.
هەروەسا گۆتیە، ئەو تووشبوویی چەندین رۆژان ل ژێر چاڤدێریی و چارەسەریا نۆشداری دا بوون، نوکە ئەو تووشبوویی ڤەگەریاینە مالێن خوە و دێ ژیانا خوە یا ئاسایی بورینن.
ب چاکبوونا وان پێنج کەسان، هژمارا ئەوێن ل هەرێما کوردستانێ چێبووین گەهشتنە 27 کەسان.
ئەڤرۆ نیوز:
وەزیرێ پەروەردێ یێ هەرێما کوردستانێ راگەهاند، مە پلانەکا پێشنیازکری ئاراستەی لیژنا بلند یا روو ب رووبوونا کۆرۆنا یێ کریە بۆ دەستپێکرنا خواندنێ و دلنیایێ ددەت، کوخواندنا ئەڤ سالە ب هیچ جۆرەکێ نافەوتیت.
ئالان حەمە سەعید، وەزیرێ پەروەردێ یێ هەرێما کوردستانێ د پەیامەکا ڤیدیۆیی دا دەربارەی وەزارەتا پەروەردێ چی کریە بۆ روو ب رووبوونا کۆرۆنا یێ گۆتیه، 30% یا ئاکنجیێن هەرێما کوردستانێ دناڤا ناڤەندێن خواندنا وەزارەتا پەروەردێ دانە، راگرتنا دەواما وان ناڤەندان ژی بۆ پاراستنا سلامەتی و گیانێ خویندکاران، مامۆستایان و فەرمانبەرێن وێ وەزارەتێ بوویە.
هەروەسا گۆتیە، پلانا وان ب شێوەکێ قۆناخبەندییە بۆ دەستپێکرنا دەواما خواندنێ، کو پێدڤیە هەلسەنگاندنا ساخلەمێ بەرچاڤ بهێتە وەرگرتن بۆ دەستپێکرنا دەوامێ ل ناڤەندێن خواندنێ.
وەزیرێ پەروەردێ گۆتیە ژی، لژنا بلند یا روو ب رووبوونا کۆرۆنا یێ پێشنیازێن وەزارەتا پەروەردێ ل بەردەستدانە و دێ بڕیارێ ل سەر دەت، ئەم دلنیایێ ددەینە هەموو قوتابیێن کوردستانێ کو سالا خواندنا 2019 – 2020 ب هیچ جۆرەکێ نافەوتیت، پلان هەیە بۆ قەرەبووکرنا خواندنێ و ل دەمێ پێدڤی دێ لژنا بلند یا ڤایرۆسێ کۆرۆنا بریارێ دەت.
ئەڤرۆ نیوز، عەلی حاجی :
نوونەرێ قایمقامێ زاخۆ د لژنا دووڤچوونا بازاری دا بۆ ئەڤرۆ نیوز دیار کر، لژنا وان سەرەدانا ٥٦ جهان ژ مارکێت نانپێژ و خارنگەهان ل زاخۆ کرینە و چەندین جهـ ب پارەیی هاتینە سزادان ب ئەگەرێن جۆدا.
زێدەتر وەلات هەجەر گوت : ب هەڤکاریا ساخلەمی و ئاسایش و پۆلیسان و چاڤدێریا بازرگانی ل زاخۆ ژ وان جهێن مە سەرەدانا وان کری نەهـ نانپێژی ب کوژمەیەکێ پارەیی سزادان ژبەر کو ئەو کەسێن پارە د وەرگرتین بێ دەست گورک بون و هەر وی کەسی نان ژی د فروشتە وەلاتیان و هەر دیسان دە مارکێتێن دیتر ژی ب کوژمەیەکێ پارەیی هاتنە سزادان ژبەر کو هندەک کەرەستەیێن ئێکسپایەر دناڤ وان مارکێتان دا هەبوو و مارکێتەکا دیتر ژی ب کوژمێ ٥٠٠ هزار دیناران هاتە سزادان ژبەر کو بازار بۆ خوە ب دەلیڤە دیت بوو و هێک ژ بازاری گرانتر دفروشتن سەرەرای سزایێ ماددی مە ل سەر وێ مارکێتێ ژی کرە فەرمان کو هێکان وەکو بازاری بفروشیت و نابیت گرانتر بفروشیت،هەر دیسان مە سەرەدانا گومرکێن فێقیان کر دا کو بزانین کو بهایێ فێقی هاتیە گران کرن و پشتی کو مە ژ نێزیک سەحکری یە وی بازاری دیار بوو چو گرانیەک دروست نەببوو.
ئەڤرۆ نیوز:
وەزارەتا ساخلەمیا هەرێما کوردستانێ دیار کریە، پێدڤیە هەموو نەخۆشخانێن ئەهلی ل کوردستانێ پێگیریێ پێ بکەن و ٢٥% بهایان کێم وان، هەر نەخۆشخانەکا پێگێریێ نەکەت دێ هێتە سزادان.
ئەڤرۆ وەزارەتا ساخلەمیا هەرێمێ د نڤیسارەکێ دا، کو بۆ هەموو نەخۆشخانێن ئەهلی هاتیە شاندن، دیارکریە، پێدڤیە ٢٥% بهایی ل هەموو پشکێن نەخۆشخانێن ئەهلی کێم بکەن بۆ زێدەتر هاریکاریکرنا نەخۆشان.
گۆتیە ژی ، هەر نەخۆشخانەکا ب ڤێ بریارێ پێگیریێ نەکەت، دێ رێکارێن قانوونی ل هەمبەری هێنە وەرگرتن.
ئەڤرۆ نیوز،عەلی حاجی :
رێڤەبەرێ ئاڤا زاخۆ د داخویانیەکێ دا بۆ ئەڤرۆ نیوز دیار کر خەلکەکێ زێدەگاڤی ل سەر بوریێن سەرەکیێن ئاڤێ ل زاخۆ کرینە و بوویە ئەگەر ئاڤ ب دروستی نەگەهیتە هندەک مالان و نەبوونا یاسایا ئاڤێ مە نەشیایە چ کەسان سزا بدەین.
زێدەتر هاشم ئیبراهیم گۆت : ل تاخەکێ باژێرێ زاخۆ حەفت مالان زێدەگاڤی ل سەر بوریا گەهاندنا ئاڤێ بۆ هندەک تاخان یا شەش ئێنجی کری یە و ب بوو ئەگەرێ وێ چەندێ چەندین مالێن وان تاخان ژ ئاڤێ بێ بەهر ببن و بەردەوام ژی گازندەیا نەبوونا ئاڤێ دکرن و پشتی دروست بوونا لەهیان ژی ئەو خەتێ وان مالان ب نەیاسایی کێشایی ئەو ژی شکەست ببوون و ببوو ئەگەر ئەو ئاڤە هەمی ب هەروەی بچیت و وەلاتی بێ بەهر بن ژ ئاڤێ،نەبوونا یاسایەکا تایبەت ل کوردستانێ بوویە رێگر ئەم وان کەسان سزا بدەین یێ ئەڤ کارە ب نەیاسایی کرین و هەکە یاسایەکا تایبەت هەبایە دا شێن وان کەسان سزا بدەین.
و گۆت ژی : زێدەباری وێ چەندێ ژی سەرەرای کێم بوونا ئاڤێ هندەک کەس فێربوینە د ڤی دەمی دا بەر دەریێن خوە دشون و ئاڤەکا زێدە هەدەر ددەن و دبیتە ئەگەر ژی ئاڤ کێمتر بگەهیتە هندەک هاولاتیێن دیتر و هیڤیدارین خەلکەک زێدەتر هەڤکار بیت دگەل مە دا.
نیوز،عەلی حاجی :
بەرپرسێ پشکا هاتن و چوونا ناڤ باژێری ل زاخۆ د داخویانیەکێ دا بۆ ئەڤرۆ نیوز دیار کر ب مەرەما زێدەتر کۆنترول کرنا هاتن وچونا دناڤ سەنتەرێ باژێری دا هندەک رێکێن نەسەرەکی دناڤ باژێرێ زاخۆ دا هاتینە گرتن و ئێدی هاتن وچوون دناڤ وان رێکان دا نامینیت.
زێدەتر رائید محەمەد سلێمان گۆت : پشتی قەدەغەیا هاتن و چوونێ هاتیە راگەهاندن ل سەرانسەری کوردستانێ و ل باژێرێ زاخۆ ب رێڤەبەریا هاتن و چوونا زاخۆ هەماهەنگی دگەل دەزگایێن ئەمنی چەندین رێکێن نەسەرەکی ب کلبستونا قەپات کرینە و هەر دیسان چەندین رێکێن لاوەکی ل دەوروبەرێن جادەیێن سەرەکی دا کۆ زێدەتر بشێن قەدەغەیا هاتن و چوونێ کۆنترول بکەین و گەلەک شوفێران ئەو رێکە ب کار دئینان ب مەرەما دەرکەڤتنێ ژ مالێن خوە لەورا ب بڤی رەنگی دێ زێدەتر شێن کۆنترولا قەدەغەیا هاتن و چوونێ بکەین.
و گۆت ژی : نوکە چار ترۆمبێل هاتینە بەرهەڤ کرن ژلایێ رێڤەبەریا هاتن و چوونا زاخۆ ڤە کو بەردەوام دناڤ تاخێن زاخۆ دا هاتن وچوونێ دکەن و رێنمایێن خوە پاراستنی ب ریێا دەنگێ وان ترومبێلان دەنە خەلکی دا کو ئەو ژی بشێن زێدەتر خوە پارێزن ژ ڤایروسێ کورونایێ.
ئه‌ڤرۆ نیوز، نه‌وزاد هلۆری:
ب مه‌ره‌ما پاراستنا گیانێ وه‌لاتیان ژ ڤایرۆسا كرۆۆنایێ، چونا وه‌لاتیان یا پیاده بۆ چیایێ زاوا و كێلیا شه‌دا هاته قه‌ده‌غه‌كرن و پۆلیس دێ چاڤدێرییه‌كا توند ل سه‌ر كه‌ن.
هێمن سلێمان، به‌رپرسێ راگه‌هاندنا پۆلیسێن پارێزگه‌ها دهۆكێ بۆ ئه‌ڤرۆ نیوز گۆت: (پشتی كو قه‌ده‌غه‌یا هاتن و چوونێ هاتیه راگه‌هاندن، هژماره‌كا زۆرا وه‌لاتیان به‌رێ خوه دایه كێلیا شه‌دا و چیایێ زاوا و نزاركێ و هێتوتێ و ب كوم كوم دچن بۆ گه‌ریانێ ئه‌ڤێ یه‌كێ مه‌ترسی ل سه‌ر ژیانا وان دروست كریه، ژبه‌رڤێ پولیسێن پارێزگه‌ها دهۆكێ بریارا قه‌ده‌غه‌كرنا وان جهان دایه).
زێده‌تر گۆت: (رۆژانه دێ تیمێن پۆلیسان دوچڤوون و چاڤدێرییه‌كا توند لسه‌ر وان جهان كه‌ت و ناهێلن وه‌لاتی بچنه وان جهان، ئه‌م ژی دخوازین خه‌لك هه‌ڤكاربن داكو گیانێ وه‌لاتیان ب گشتی یێ پاراستی بیت).
ئەڤرۆ نیۆز، قائید میرۆ:
تۆرا رێکخراوێن مەدەنی ل ھەولێرێ دو پێشنیار داینە حوکمەتێ و ئێک ژوان پێشنیاران ئازادکرنا زیندانیێن ناڤا چاکسازیێن ھەرێما کوردستانێ یە.
رێباز یوسف، سەرۆکێ تۆڕا رێکخراوێن مەدەنی بۆ ئەڤرۆ نیۆز دیارکر” داخوازێ ل سەرۆکێ حوکمەتا ھەرێما کوردستانێ دکەین بۆ بەرچاف گرتنا رەوشا نوکەیا ھەرێما کوردستانێ میکانزمەکی ڤەبینیت بۆ ئازادکرنا چوار ھزار زیندانیێن ھەرێما کوردستانێ، کو نوکە دناڤا چاکسازیێن ھەولێر و دھۆک و سلێمانیێ نە.
رێباز یوسف گۆتژی” بلا ئەف لێبۆرین مادێن تیرۆرێ نەگریت و تنێ کەسێن دی بشێوەیەکێ وەختی بھێنە ئازادکرن، چونکە زۆر ولاتێن دیژی ئەف بڕیار دەرکریە و کەسێن ناڤا چاکسازیان ھاتینە ئازادکرن ژبەر مەترسیێن ڤایرۆسا کۆرۆنا، ژلایەکێ دیڤە دێ پارەیەکێ زۆر بۆ حوکمەتێ ڤەگەڕیت و بۆ ھەوا بەرھنگاربوونا کۆرۆنایێ ھێتە مەزاختن.
ئەڤرۆ نیۆز، قائید میرۆ:
بڕیارە ل چەند رۆژێن داھاتی حکوومەت بڕیارەکێ لدۆر چارەنڤیسێ خواندنا ئەڤسالە یا زانکۆ پەیمانگەھان بدەت و ئەندامەکێ جڤاتا وەزارەتا خواندنا بلندژی دبێژیت، پێشنیار ھاتیەکرن بشێوەیێ ئۆنلاین ھەیڤەکا خواندنا ئەڤسالە بھێتە تەمام کرن.
دکتۆر کاوە شێروانی، ئەندامێ جڤاتا وەزارەتا خواندنا بلند بۆ ئەڤرۆ نیۆز دیارکر” جڤاتا وەزارەتی لدۆر چارەنڤیسێ خواندنا زانکۆ پەیمانگەھان کۆمبوویە و تێدا ھژمارەک پێشنیار ھاتینەکرن ژوانا خواندنا ئەڤسالە بکەڤیتە وەرزێ ھاڤینێ پێشنیارەکادیژی ھەیە کو بشێوەیی ئۆنلاین ئەڤسالە بھێتە تەمام کرن.
ئەڤی ئەندامێ جڤاتا وەزارەتا خواندنا بلند و ڤەکۆلینێن زانستی گۆتژی” مە پێشنیار کریە، سیستەمێ ئۆنلاین ل کۆمپانیەکا جیھانی بھێتە کڕین و گورەی پیڤەرێن پیشکەفتی بھێتە بجە ئینان.
دکتۆر کاوە شێروانی ئاشکراکر” پێشنیارا سیستەمێ ئۆنلاین ھاتیە بلندکرن بۆ سەرۆکایەتیا جڤاتا وەزیران و بڕیار دێ ھێتە دان لدۆر چارەنڤیسێ خواندنا ئەڤسالە، بەلێ ھەتا ١٥ی نیسانێ رەنگە دەوام ھەر نەھێنەکرن.
نيشاندان