ئەڤرۆ نیوز:
جێگرێ سەرۆکێ پەرلەمانا عیراقێ راگەهاند، هەکە بهایێ نەفتێ داکەڤیت ژی ئاریشا پارڤەکرنا مووچەی ل عیراقێ دورست نابیت، ژبەر کو عیراقێ یەدەکەکێ باش یێ پارەی و زێری هەیە.
بەشیر حەدادی گۆت ژی: هەکە بەغدا مووچێ فەرمانبەرێن خوە بدەت ئاریشە بۆ مووچێ فەرمانبەرێن هەرێمی دورست نابیت، هەکە پشتی دەمەکێ ژی بەغدا نەشیا مووچەی بدەت، وی دەمی دشێت ژ سندوقا نێڤدەولەتی پارەی قەر بکەت.
ئه‌ڤرۆ نیوز، بارزان مزوورى:
سه‌ردار یه‌حیا عەبدولعەزیز، قائیمقامێ قه‌زا شێخان بۆ ئه‌ڤرۆ نیوز گۆت: ئه‌ڤرۆ 17/3/2020 لژنا هه‌ڤپشك یا دووڤچوونا بازارى كۆ پێك دهێت ژ ئاسایش و پولیس و ساخله‌می و چاڤدێرى و بازرگانیا شێخان سامونخانا بناڤێ”شێخان”دناڤ سه‌نته‌رێ شێخان دا داخست بۆ ماوێ سێ رۆژا ژبه‌ر نه‌پێگیرى كرنا رێنمایێن لژنا چاڤدێریا بازارى.
ناڤهاتى خویاكر ئەو رێنمایێن ژلایێ لژنێ ڤە پێشکێشی وان کرین چ ژوان رێنمایا نەهات بون جێبەجێکرن دیسان دناڤ سامونخانێ دا جگارە دهاتە کێشان.
ئەڤرۆ نیوز:
ب فەرمانا سەرۆکێ حوکمەتا هەرێما کوردستانێ، بوودجێ دویێ یێ هەوارهاتنێ بۆ بەرهنگاربوونا نەخۆشیا کۆرۆنا یێ هاتە تەرخانکرن.
وەزارەتا ساخلەمیا حوکمه‌تا هه‌رێما کوردستانێ راگەهاندیە، ب فەرمانا مەسرور بارزانی سەرۆکێ حوکمەتا هەرێما کوردستانێ، ژ بۆ پاراستنا ساخلەمیا وەلاتیان، بوودجێ دویێ بۆ بەرهنگاربوونا ڤایرۆسێ کۆرۆنا یێ هاتیە تەرخانکرن.
ئەڤرۆ نیوز:
هژمارەکا بەلێندەرێن پارێزگەها دھۆکێ بریار دایە سوبەهی 18 ئادارێ دەست ب دروستکرنا نەخۆشخانەکا 104 تەختی بکەن کو دێ یا تایبەت بیت ب تووشبوویێن کۆرۆنا یێ ڤە.
زیرەک دۆسکی، سەرۆکێ کۆمەلا بەلێندەرێن کوردستانێ لقێ دھۆک، بۆ رووداوێ راگەهاند، ئەڤرۆ 17 ئادارێ هژمارەک ژ بەلێندەرێن دھۆکێ پشتی ئەنجامدانا کۆمبوونەکێ بڕیار دایە ھەر ئێک لدووڤ شیانێن خوە، پشکداریێ د پرۆژێ دروستکرنا نەخۆشخانەکا تایبەت بۆ کۆرۆنا یێ ڤە بکەن.
گۆتیە ژی، مە نڤیسارەک پێشکێشی پارێزگارێ دھۆکێ کریە بۆ دەستنیشانکرنا پارچە زەڤیەکێ و پشتی رەزامەندیا وی بۆ دابینکرنا پارچە زەڤیەکێ ل سنوورێ ناحیا رزگاری یا سەر ب قەزا سێمێلێ ڤە، بڕیارە ب چاڤدێریا رێڤەبەرایا گشتی یا ساخلەمیا دھۆکی و لژنا بلند یا خۆپاراستنێ ژ کۆرۆنا یێ، دەست ب دروستکرنێ بهێته کرن و د زووترین دەمدا بهێتە تەمام کرن، هەر ھێشتا پەم نزانین دێ چەند پارە بۆ هێته خەرج کرن، بەلێ دێ یا 104 تەختی بیت و ھەموو پێدڤیێن ساخلەمیێ دێ تێدا هەبن.
ئەڤرۆ نیوز:
حوکمەتا ئیرانێ راگەهاند، بۆ رێگریکرنێ ژ بەلاڤبوونا کۆرۆنایێ د دەمێ چەند حەفتیان دا نێزیکی ٨٥ هزار زیندانی ب ئاوایەکێ دەمکی هاتنە ئازادکرن.
غولام حسێن ئیسماعیلی، پەیڤدارێ جڤاتا دادوەرێن ئیرانێ راگەهاند، پتر ژ ٥۰ ٪ یا وان زیندانیان هاتنە ئازادکرن، یێن کو زیندانیکریێن سیاسی و ژ وان کەسانە تاوانا وان پەیوەندی ب ئاسایش و ئێمناهیێ ڤە هەیە.
گۆت ژی، ئەڤ بریارە دێ زیندانیێن هەموو پارێزگەهان ڤەگریت و هەتا نوکە ٨٥ هزار زیندانی مفادار بووینە.
ئه‌ڤرۆ نیوز، زنار تۆڤى:
مه‌نار زیاد، خه‌لكا شنگالێ یه و ئه‌ڤه ده‌مێ چه‌ند سالانه ل باژێرێ دهۆكێ دژیت، نوكه قۆتابیه ل قۆناغا چارێ ل كۆلیژا ئه‌ندازیارى ل زانكۆیا حه‌دبا ل مۆسل، د دیداره‌كێ دا بۆ ئه‌ڤرۆ نیوز دیار كر: وێ پێلاڤه‌ك بۆ كه‌سێن نابینا و ئه‌وێن گه‌له‌ك هه‌ست ب ده‌نگان ژى نه‌كه‌ن چێكریه، مه‌ره‌ما وێ ژ ڤى پرۆژه‌ى ئه‌و بوویه، كو ئه‌و كه‌سێن نابینا، ده‌مێ وێ پێلاڤێ دكه‌نه پێن خوه، ل دووراتیا مه‌تره‌كێ ئه‌و پێلاڤ دێ وان ئاگه‌هدار كه‌ت و دێ پێن وان ره‌جفینیت و دێ بۆ دیار كه‌ت، كو تشته‌كێ ب مه‌ترسى ل پێشیا وان هه‌یه، ب رێیا وێ پێلاڤێ ئه‌و كه‌سه دێ ژ وێ مه‌ترسیێ هێته پاراستن و دێ وى كه‌سى ئاگه‌هدار كه‌ت، كو نابیت ئه‌و كه‌سه د وى جهى را بچیت و باشتره رێیا خوه ب گوهۆریت، داكو توشه كه‌فتنێ نه‌بیت، دیسان ئه‌و دشێت هه‌تا دووراتیا چار مه‌تران ژى ب رێیا وێ پێلاڤێ وان كه‌سێن نابینا ئاگه‌هدار بكه‌ت.
ناڤهاتیێ گۆت ژى: ئه‌ڤه ده‌مه‌كێ درێژ بوو، ئه‌ز مژوولى ڤى كارى، لێ پشتى من ب دووماهى ئیناى، من سه‌ركه‌فتن تێدا ئینایه و مه ئه‌و پێلاڤه جه‌رباندى یه ل دووراتیا مه‌تره‌كێ مرۆڤى ئاگه‌هدار دكه‌ت، هه‌كه تشته‌ك د رێیا مرۆڤێ نابینان دا هه‌بیت، هه‌روه‌سا داخوازیا من ئه‌وه، كو جهێن شۆله‌ژێ هاریكاریا وێ یا مادى بكه‌ن، داكو ئه‌ز بشێم ڤى پرۆژه‌ى به‌رفره‌ه بكه‌م و ڤێ چه‌ندێ بێخمه د خزمه‌تا كه‌سێن نابینا دا ل كوردستانێ.
مه‌نارێ ئه‌و ژى گۆت: ئه‌ڤ هزره بۆ من ژ هندێ هات، ده‌مێ من ل زانكۆیێ دخواند، من كه‌سێ نابینا دیت و ڤێ چه‌ندێ كارتێكرنه‌كا مه‌زن ل من كر، له‌وما من هزر د چێكرنا ڤێ پێلاڤێ دا كر، ژ پێخه‌مه‌ت ئه‌ز بشێم هاریكاریا كه‌سێن نابینا بكه‌م، نوكه ب تنێ من پێدڤى ب هاریكاریا مادى هه‌یه، ژ پێخه‌مه‌ت ئه‌ز بشێم ڤان پێلاڤان بێخمه دناڤا بازارى دا، هه‌روه‌سا من ل به‌ره ڤى پرۆژه‌ى بێخمه د خزمه‌تا هه‌موو مرۆڤێن جیهانێ دا.
ئەڤرۆنیوز، ڕەزوان ڕۆژبەیانی:
ل ناحیا باشیک ل سنوورێ پارێزگەها موسل ژ ئەگەرێ ئاریشەکا بچووک کەسەک هاتە کوشتن و سێ کەسێن دی ژی بریندار بوون.
زەنون یونس رێڤەبەرێ ناحیە باشیک بۆ ئەڤرۆنیوز خویاکر، بەری مەغرەبا ئەڤرۆ ل گوندێ گولیجە”یێ سەر ب ناحیە باشیک ل سنوورێ پارێزگەها موسل شەر دناڤبەرا دو مالاندا روودا کو هەردو مال ژی کورمامێت ئێکبوون د ئەنجام دا کەسەک هاتە کوشتن و سێ کەسێن دی ژی بریندار بوون کو برێنێ ئێک ژوان دژوارە ،گۆت ژی ئەف شەرە ل سەر چەروان و مەرومالات هاتیە روودان، نوکەژی ژ لایێ پۆلیس و ئاسایش رەوش هاتیە کۆنتۆلکرن
گوندێ گولیجە سەرجەم ئاکنجێین وی کوردن و دکەڤیتە سنورێ پارێزگەها موسل.
ئەڤرۆ نیوز، رەزوان رۆژبەیانی:
راگەهاندنا هاتنوچوونا قەزا بەردەڕەش ڕاگەهاند بەری دەمەکێ کێم د روودانەکا هاتن چوونێ ل سنوورێ قەزا بەردەڕەش کەسەک جانێ خوە ژ دەست دا کەسەکێ دی ژی بریندار بوو.
کۆمیسەر حازم محەمەد ژ راگەهاندنا هاتنوچوونا قەزا بەردەڕەش بۆ ئەڤرۆنیوز خویاکر، بەری دەمەکێ کێم ژ ئەگەرێ پێکدادانا دوو ترومپێلێن بارهەلگر ترێلە ل سەر رێیا گشتی یاناڤبەرا قەزا بەردەڕەش و ناحیە روڤیە ل نزیک گوندێ ئامیان کەسەک جانێ خوە ژ دەست دا و کەسەکێ دیژی ب دژواری بریندار بوو گوت ژی پشتی روودانێ پۆلیسێن هاتن و چوونی ل جهێ روودانێ ئامادە بوون بریندار ژی هاتە رەوانەکرن بۆ نەخۆشخانێ
ئه‌ڤرۆ نیۆز، عه‌زیز هه‌ورامی:
پارێزگاری هه‌ڵه‌بجه له كۆبونه‌وه‌ی لیژنه‌ی ڕوبه‌ڕوبونه‌وه‌ی كۆرۆنا ڕای گه‌یاند، 72 سه‌عاتی داهاتوو هه‌موو هاتوچۆیه‌ك قه‌ده‌غه نوێ ده‌كرێته‌وه هه‌ركه‌س سه‌رپێچی بكات سزاده‌درێت.
له ڕاگه‌یه‌ندراوه‌كه‌ی پارێزگای هه‌ڵه‌بجه هاتووه، نانه‌واخانه و سه‌مونخانه و سۆپه‌رماركێته‌كانی ناو كۆڵانه‌كان كراوه‌ده‌بێ، ڕۆژی 18ی مانگیش له سه‌عات شه‌شی به‌یانی تاوه‌كو 11ی پێش نیوه‌ڕۆ قه‌ساب خانه‌كان كراوه‌ده‌بن.
ته‌واوی بڕیاره‌كانی پارێزگاری هه‌ڵه‌بجه.
– بە هیچ شێوەیەك قەرەباڵغی رێگەپێدراو نییە.
– لە كاتی وەستان و سەرەدا، دەبێت نێوان كڕیارەكان لە دوو مەتر كەمتر نەبێت.
– پێویستە رەچاوی سەرجەم رێنماییە تەندروستییەكان بكرێت، كە لە بەڕێوەبەرایەتی گشتی تەندروستی و بەڕێوەبەرایەتی ڤێتێرنەری و لیژنەكان دەردەچێت، وەك بەكارهێنانی دەمامك و دەستكێش و بە بەردەوامی مەوادی پاكژكردنەوە بەكار بهێنن .
– كڕیارەكان بە هیچ شێوەیەك بواری چوونە ناو دوكانی گۆشت فرۆشەكانیان نییە و دەبێت شریتی قردێلەیی دابنرێت بۆ جیاكردنەوەیان.
– هەر دووكانێك پێویستە كەسێكی تایبەت، بۆ وەرگرتن و ژماردنی پارە لە كڕیارەكان دابنێت .
– سەرجەم هەفتە بازاڕەكانی ناو شاری هەڵەبجە جگە ئەوانەی ناو بازاڕ، كراوە دەبن، لەژێر چاودێری لیژنە ھاوبەشەكانی قایمقامیەت بە رەچاوكردنی سەرجەم رێكارە تەندروستییەكان و ئەم رێنماییانەی خوارەوە:
– بە پێی بەیانی ژمارە (19)ی ساڵی 2020 وەزارەتی ناوخۆی حكوومەتی هەرێمی كوردستان، هاتوچۆی ئۆتۆمبێل و ماتۆڕ بە هەموو شێوەیەك بۆ هەفتەبازاڕ و شوێنە رێگەپێدراوەكان قەدەغەیە و رووبەڕووی ئیجرائاتی یاسایی دەبنەوە .
نيشاندان