ئەڤرۆ، حه‌مزه‌ ره‌زيكى:

ھەکە نەخۆشیێن سێکسی نەھێنە چارەسەرکرن زیانێ ل کۆئەندامێن خوینێ و دەماران و ھەرەسێ دکەن و ھندەک جاران دبنە ئەگەرێ مرنێ، نەخوشیێن سێکسی ھەکە تووشی ژنێن دوگیان ببن کارتێکرنەکا مەزن ل کورپەلەی دکەن و کرێتیێن زکماکی ل دەڤ پەیدادکەن و شوونوارێن وان ھەر ئێکسەر پشتی زارووبونێ پەیدادبن، ل ڤێرێ نیشانێ د دەین کو ھندەک نەخوشێن سێکسی چارەسەردبن و چ سەربارکان ژی ل دووڤ خوە ناھێلن.

د.کامیران جەلالەدین، تایبەتمەندێ نەخۆشیێن گولچیسکان و میزەرۆیێ بۆ رۆژنامەیا ئەڤرۆ دیارکر کو ئەگەر نەخۆشیێن سێکسی نەھێنە چارەسەرکرن مەترسیەکا مەزن ھەیە و گەلەک سەربارک ژێ پەیدادبن و زیانێ ل کۆئەندامێن خوینێ و دەماران و ھەرەسێ دکەن و ھندەک جاران دبنە ئەگەرێ مرنێ.

دەربارەی کولکێن نەخوشیێن سێکسی ل چ جھێن دی پەیدادبن ژبلی ئەندامێ سێکسی،دکتوری گوت:کولکێن نەخوشیێن سێکسی ل سەر لێڤێن نەخۆشی و دناڤ دەڤی و جھێ دەستئاڤێ و ھندەک جھێن دی دناڤ لەشی دا پەیدادبن و رەنگێ قەوارێن ژێک جودا.

د بەرسڤا پرسیارەکێ دا ل دور کارتێکرنا نەخۆشیێن سێکسی ل سەر ژنێن دوگیان، دکتوری دیارکر کو

نەخوشیێن سێکسی کارتێکرنەکا مەزن ل کورپەلەی دکەن و کرێتیێن زکماکی ل دەڤ پەیدادکەن و شوونوارێن وان ھەر ئێکسەر پشتی زارووبونێ پەیدادبن و دبیت ژی دەمەکێ درێژ ببوریت ھەتا پەیدادبن و نەخۆشیێن سێکسی ل دەڤ ژنێن دوگیان دبنە ئەگەرێ ژبەرچوونا زارۆکی، یان پەیدابوونا پێشوەخت یا زارۆیان و گەلەک سەربارکێن دی.

بەلێ ھندەک کەس ھەموو دەمان گازندەیان دکەن کو بالیلکێن بچووک ل سەر ئەندامێ وان یێ سێکسی پەیدادبن و دبنە ئەگەرێ خوریانێ و ئێشانەکا زور ژێ پەیدادبیت و دەم بۆ دەمی بەرزە دبن، ئەرێ ڤێ چەندێ گرێدانەک ب نەخۆشیێن سێکسی ھەیە؟

د.کامیران د بەرسڤا ڤێ پرسیارێ دا دیارکر کو دبێژنە ڤێ نەخۆشیێ ھرپس، ئەوژی ب رێکا سێکسی دھێتە ڤەگوھاستن و یا دومدرێژە و ئێشانێن وێ د ئەندامی و دەروونی نە و کارتێکرنێن جڤاکی ژی ھەنە و بۆ ھەڤژینا وی ژی دھێتە ڤەگوھاستن و ھندەک جاران دبیتە ئەگەرێ پەنجەشێرا مالبچووکی.

بۆ خوپاراستنێ ژ ڤێ نەخۆشیێ گوت: پێدڤی یە نەخوش خو ژ کریارێن سێکسی یێن نەرەوا دوور بکەت و دەربارەی چارەسەریێ ژی نەخوشی بۆ دەمەکێ درێژ پێدڤی ب وەرگرتنا دەرمانان ھەیە و ھەموو دەمان مفای ژێ نابینیت.

ھەلبەت ھندەک کەس ھەنە ل بەر خوارنگەھان کاردکەن و ئەنجامێن پشکنینێن وان دەردکەڤن کو نەخوشیێن سێکسی ھەنە، ئەرێ پەیوەندیا ڤێ ب نەخوشیێن سێکسی ڤە چیە؟

تایبەتمەندێ نەخۆشیێن میزەرۆیێ گوت: ئەڤە دیاروکەکا بەربەلاڤە و کەسێ نەخوش دکەڤیتە دبن گەڤان ڤە و گەلەک جورێن چارەسەریێ ژی لێ دھێنە جەرباندن و پێدڤی ب دودلیێ ناکەت و پتریا جاران نەخوشیێن سێکسی دەردکەڤن بێی ئەو کەس تووش ببیتێ.

و دیارکر ژی بۆ پشتراست بوون ژ تووشبونا وی پێدڤی یە پشکنینێن ( FTE-ABC) یان (T.B.h.A) بھێنە کرن و ئەگەر پوزەتیف دەرچوو وە دیارە ئەو یێ تووشبویێ و پێدڤی ب شیرەتکاریا نوشداری دبیت و ل ڤێرێ ئەم نیشانێ دەین کو ھندەک نەخوشێن سێکسی چارەسەردبن و چ سەربارکان ژی ل دووڤ خوە ناھێلن، بەلێ ھندەک دژە نەخوشیێن سێکسی دلەشێ وان دا دمینن و د پشکنینان دا ئەرێنی دەردکەڤن و ل وی دەمی ئەگەر تەئکید بو کو ئەڤ نەخوشە یا نوی نینە، ئەو کەس پێدڤی ب چارەسەریێ نابیت و مەترسی ژی نینە ل سەر چ کەسێن دیتر.

ئەو چ نەخوشی نە کو د ئەنجامێ پشکنینێ دا نەخوشیێن سێکسی پوزەتیف دەردکەڤن؟

د.کامیران دیارکر کو ھەلبەت گەلەک نەخوشی ھەنە، ژوانژی ھندەک نەخوشیێن تا دگەل دا وەک تیفو و مەلاریا و ئەنفلاوەنزا و پەرسیڤ و ھندەک نەخوشیێن جەگەرێ و ئێشا گورگێ سۆر و ھندەک جورێن روماتویدێ، و دبیت ژی ژئەگەرێ ئێکسپایربوونا وان کەرستەیان بیت ئەوێن ژبۆ پشکنینان دھێنە ب کارئینان، یان ئەنجامێ وێ یێ دروست نەبیت.