NO IORG
نووترين نووچه
Twitter

ئەڤرۆ:

ھەستکرن ب خوریانێ و ھەبوونا ھندەک ھوورکێ سپی ل سەر قەمیسێ مرۆڤی تشتەکێ نەخوشە و پەیدادبن دەما مرۆڤ بەرئاتافی ھێرشەکا کەڤشکی د پرچێ دا دبیت، گەلەک کەس نەخۆشیا خۆ ژ کەڤشکێ پرچێ دبینن و دیمەنەکێ کرێت بۆ پەیدادبیت، ھەول ددەن ب ھەر رێکەکا ھەبیت و ب ھەر چ چارەسەری بیت خۆ ژێ قورتال بکەن، بەلێ ئەرێ تو دزانی کو  رەنگە کەڤشکێ پرچێ دبیت نیشانەک ژ نیشانێن ئالوزیێ بیت؟

کەڤشکێ پرچێ حالەتەکێ سروشتی یە و پەیدادبیت دکەڤلێ سەری دا دماوێ کریارا وەرارا سروشتی د کەڤلێ سەری دا، د کەڤلێ سەرێ مرۆڤی دا ھەر ھەیڤێ جارەکێ شانەیێن کەڤن دمرن و تیڤل دبن، ھندەکێن دی ل جھێ وان شین دبن داکو شانە بھێنە گوھارتن، بەلێ ھەکە مرۆڤی کەڤشک ھەبیت، دیارە کو ئەو شانە دبنە تیڤکل بەری بمرن، و گەلەک فاکتەر ھەنە دبنە ئەگەرێن کەڤشکی، ئێک ژ وان کو گەلەکێ دەگمەنە، وەستیانا مرۆڤی یە، وەستیان دبیت دوبارە پەیداببیت، ئەڤە دبیتە ئەگەر کو کارتێکرنێ ل ساخلەمیا لەشی بکەت و دشیاندایە ئەڤ گوھۆرینێن نێگەتیف بەروڤاژی رەنگڤەدانێ ل کەڤشکێ پرچێ بکەن.

دو جورێن فاکتەران ھەنە کو دبنە ئەگەرێ پەیداکرنا کەڤشکی د پرچێ دا، فاکتەرێن ناڤخۆ وەکو فشارا دەروونی و نەھەڤسەنگیا ھورمونی و نەباشیا حالەتێ ساخلەمیێ و بەد پاقژی و ھەستداری ب شیری و شوکولاتە و مەحار و کێمیا بێھنڤەدانێ و گەلەک ب کارئینانا شەکرێ و چەوریان و کاربوھیدران.

ھەروەسان فاکتەرێن دەرەکی وەکو گەلەک ب کارئینانا سپرەیێن پرچێ و کریمان، و بەرھەمێن رەنگکرن و بویاغکرنێ گەلەک ب کارئینانا فێری و سەقایێ سار و کێم شووشتنێ یان باش شەنەکرنا پرچێ.

پتریا شارەزایێن پرچێ دگەل وێ بووچۆنێ نە کو کەڤشکی ھەڤبەندی ب فتریاتان ھەیە ئەوێن کو دناڤ سەری و لەشیدا دژین کو پتریا جاران چ ئاریشەیان پەیداناکەن ئەو فتریات ژدەرڤەی لەشی وەرارێ دکەن دبنە ئەگەرێ کەڤشکی، ژبو وێ چەندێ کو تە شیانێن کونترولکرنێ ھەبن، باشترە ئالوزیێ ب شێوازەکێ دروست کونترول بکەی و ھندەک رێکێن سروشتی ھەنە کو خۆ ژ کەڤشکی قورتال بکەی وەکو پارچەکرنا پیڤازەکێ و پاشی ل پرچێ سەرێ خۆ بدەی و بۆ نیڤ دەمژمێرێ بھێلە و پاشی سەرێ خۆ باش ب ئاڤێ و سابوونێ بشوو و ئەڤە ھاریکارە بۆ کونترولکرنا کەڤشکی. یان نیڤ کوپێ زەیتا زەیتینا و یا گیزا ھندێ بدانە ل سەر پرچێ خۆ برەشینە و پاشی ب خاولیەکێ داپوشە و بۆ دەمێ نیڤ دەمژمێرێ بھێلە و ل سپێدێ ب ئاڤەکا گەرم سەرێ خۆ باش بشوو و ئەڤ رێکە ژی گەلەک یا کاریگەرە بۆ نەھێلانا کەڤشکی.

پشتی کۆمپانیا ئەپل نمرەکا پیڤای شکاندی ب فرۆتنا ١٠ ملیۆن ئامیران ل ١٢ وەلاتان د دەمێ سێ رۆژان دا، ژ نیشکەکێ ڤە ھندەک کێماسیێن ئایفونا نوو ب ناڤێ Iphone٦ دەرکەفتن و بھایێ پشکێن وێ ل بورسێن ئەمریکی ب رێژا ٣.٨١% داکەفتن و سەرجەمێ تێچوویێ خوسارەتیا وێ گەھشتە ٢٣ ملیار دۆلاران، کۆمپانیا ئەپل سوز دا بکڕێن خوە ل نێزیکترین دەم شاشیان چارەسەر بکەت و ئامیرەکێ نوو ب ھاڤێژتە دبازاری دا.

ديمه‌نه‌ك ژ حه‌جيێن كوردستانێ يێن به‌رى نوكه‌ فه‌ريزا حه‌جێ ئه‌نجام داين

ئەڤرۆ:

رێڤەبەرێ راگەھاندنا وەزارەتا ئەوقافێ و سەرپەرشتێ تیمێ راگەھاندنا حەجیان دیار کر کو د دو حەفتیێن بۆری دا، پارە ب کۆژمێن جودا ژ حەجیێن ھەرێما کوردستانێ ل باژێرێ مەکەھێ ھاتینە دزین و بەرزە بووینە.

مەریوان نەقشبەندی ئاشکرا ژی کر، پارێ ڤان حەجیان ژ ٣٠ ھزار دۆلاران پترە و گۆت:(وەزارەتا ئەوقافێ نەشیایە پارێ حەجیان ھەموویێ بۆ قەرەبوو بکەت، لێ ٢٠٠ ھەتا ٣٠٠ دۆلاران یێن داینە وان حەجیێن پارەَ ڤێ نەماین).

عەبدولکەریم زەھرانی رێڤەبەرێ ھۆبا ڤەکۆلین و ئاسایشا کەعبێ راگەھاند کو وان ژنەکا ئاسیایی د ناڤ حەرەمێ کەعبێ دا و ل دەمێ تەوافێ یا گرتی کو دزی ژ چەندین حەجیان کرینە و ب شەفرێ چانتە و بەریکێن وان دڕاندینە و پارێ وەلاتێن جودا جودا دزیە.

ئه‌ڤرۆ نیوز، ناجى به‌ده‌ل:

به‌رده‌ڤكێ وه‌زاره‌تا دارای و ئابووریا حوكمه‌تا هه‌رێما كوردستانێ راگه‌هاند: به‌ری جه‌ژنا قوربان موچێ هه‌یڤا هه‌شت یێ نه‌هـ وه‌زاره‌تان دێ هێته‌ به‌لاڤكرن و وه‌زاره‌تا پێشمه‌رگه‌ی دێ يا ئێكێ بیت.

دلێر تارق به‌رده‌ڤكێ وه‌زاره‌تا دارای و ئابووریا حوكمه‌تا هه‌رێما كوردستانێ بۆ ده‌زگه‌هێن راگه‌هاندنێ دیاركر كو د ڤێ حه‌فتیێ دا مووچه‌یێ هه‌یڤا ته‌باخێ دێ مووچێ نه‌هـ وه‌زاره‌تێن حوكمه‌تێ به‌لاڤ كه‌ن.

ئه‌ڤه‌ ژی د ده‌مه‌كی دایه‌ رێباز محه‌مه‌د وه‌زیرێ دارای و ئابووری ل حوكمه‌تا هه‌رێما كوردستانێ ئاشكه‌را كر د كۆمبوونا وه‌زیران دا ئاشتی هه‌ورامی وه‌زیرێ سامانێن سرۆشتی راگه‌هاند: مووچه‌یێ هه‌یڤا ته‌باخێ یێ فه‌رمانبه‌ران ژ داهاتێ نه‌فتێ هاتیه‌ دابینكرن، به‌لێ میكانيزما گوهۆڕینا پاره‌ی بۆ دینارێ عیراقی يا مايى.

وه‌زاره‌تێن دێ مووچه‌ى به‌رى جه‌ژنێ وه‌رگرن ئه‌ڤێن ل خوارێ نه‌:

وەزارەتا پێشمەرگە

وەزارەتا ناڤخۆ

دەزگه‌هێ ئاسایشێ

وەزارەتا دارایی و ئابووری

وەزارەتا داد

وەزارەتا سامانێن سروشتی

وەزارەتا ره‌وشنبیری

وەزارەتا کاروبارێن جڤاكى

وەزارەتا ئاڤه‌دانكرن و بنه‌جهكرنێ

وەزارەتا شەهید و ئەنفالکريان

74

ئه‌ڤرۆ نیوز:

توریا نوچه‌گه‌هانیا CNN ڤیدویه‌كا به‌رهه‌نگاریبوونا ئێكینه‌یێن پاراستنا گه‌ل (په‌په‌گه‌) و چه‌كدارێن ده‌وله‌تا ئیسلامی ل عیراقێ و شامێ ناڤدار ب داعشێ ل كوبانێ ل سه‌ر توخیبێ توركیا و سوریا به‌لاڤكر.

په‌رله‌مانێ ئه‌ورۆپا

ئەڤرۆ، سەرجان مەحمود:

پەرلەمانێ ئورۆپا د روونشتنا خوە یا تایبەت دا ل سەر رەوشا سووریێ و عیراقێ راوەستیا و پرانیان کۆمێن د ناڤ پەرلەمانێ دا داخواز کرن کو بلا ئێکەتیا ئورۆپا ب ھەموو رەنگان ھاریکاریا سەربازی، سیاسی و ئابووری بدەتە کوردێن باشور و رۆژئاڤا. ھەروەسا گەلێ کورد بۆ پشتەڤانیا باشور و رۆژئاڤا ل ھەر جھەکی ل سەر پیانە و ل ئورۆپا خوەنیشادانێن بۆ شەرمزارکرنا ھێرشێن داعشێ بەردەوام دکەن.

کەوسەر ئەحمەد ئەنداما پارتا چەپ ل ئەلمانیا د داخۆیانیەکا تایبەت دا بۆ رۆژناما ئەڤرۆ راگەھاند کو ل سەر پێشنیازا پارتا چەپ و پارتا کەس د روونشتنا پەرلەمانێ ئورۆپا دا رەوشا کوردێن باشور و رۆژئاڤا ھاتە گەنگەشەکرن و گۆت: (پشتی گەنگەشەیێن بەرفرەە پرانیا ئەندامێن پەرلەمانێ ئورۆپا داخواز کرن کو ئێکەتیا ئورۆپا دەستێوەردانێ د ناڤ رەوشا رۆژئاڤا دا بکەت و ھەڤکاریێن بۆ ھەرێما کوردستانێ د ھەر بیاڤەکێ دا بھێنە زێدەکرن).

کەوسەر ھەروەسا راگەھاند ژی دەزگەھێ راگەھاندنێ و سازیا ڤەکۆلینێ یێ سەر ب ئێکەتیا ئورۆپا ژی دو راپۆرتێن جودا ل سەر رەوشا کوردان و شەرێ وان ل ھەمبەرێ داعشێ پێشکێشێ پەرلەمانی کرن و د راپۆرتان ھاتە خوەیاکرن کو داعش ب ھەموو ھێزا خوە ڤە ژ سێ ئالیان رۆژانە ھێرشێ دکەتە سەر کانتۆنا کۆبانێ ل رۆژئاڤا کوردستانێ و ب ھزاران وەلاتیێن کۆبانێ گوندێن خوە ڤالا کرینە و بەر ب تورکیا ڤە چووینە و شەرەکی دژوار ل ھەرێمێ ھەیە، د راپۆرتان دا ھاتە دیارکرن ژی کو تیرۆرستێن داعشێ ژ سنۆرێن تورکیا ڤە دەربازی ئاخا رۆژئاڤا و سووریێ دبن و کەل و پەلێن سەربازی و چەکێن گران ژ تورکیا ڤە دەربازی مەیدانا شەری دکەن و دڤێت د زووترین دەم دا ئورۆپا دەستێوەردانێ د رەوشا کۆبانێ دا بکەت دا کو کارەساتا شنگالێ دووبارە نەبیت.

ئەنداما پارتا چەپ د پشکەکا دی یا داخویانیا خوە دا ژی دیار کر کو سەرۆکێ پەرلەمانێ ئورۆپا سۆز دایە کو ھەردو راپۆرتێن دەزگەھێ راگەھاندنێ و سازیا ڤەکۆلینێ ل گەل سەرکردەیێن ئورۆپا و ھەڤپەیمانیا ئەتلانتیک (ناتۆ) گەنگەشە بکەت و راپۆرتان بدەتە وان ژی دا کو بریارەکا لەزگین د دەربارێ دەستێوەردانا رەوشا کۆبانێ دا بھێتە وەرگرتن.

ل ئالیێ دی کوردێن ل ئەلمانیا، فرەنسا، بەلجیکا، نەمسا، ھۆلەندا و سویدێ خوەنیشادانێن بەرفرەە سازکرن و کریارێن نە مرۆڤی یێن تیرۆرستێن داعشێ و ئاریکاریا تورکیا بۆ تیرۆرستان شەرمزار کرن و داخواز ژ پارت و ئالیێن سیاسی یێن ھەر چار پارچەیێن کوردستانێ کرن کو پێکڤە ل دژی دۆژمنان راوەستن و دەستێ ھەڤدو بگرن دا کو دەستکەڤتێن گەلێ کورد ل باشور، رۆژئاڤا و ھەر جھەکی دی بھێتە پاراستن.

رەڤەندا کورد ل ئەلمانیا ل ھەمبەر ئۆفیسا ئێکەتیا ئورۆپا و نەتەوێن ھەڤگرتی دو خوەنیشادان سازکرن و یاداشتنامەیەک د دەربارێ کریارێن تیرۆرستان یێن ل ھەمبەر گەلێ کورد دانە بەرپرسێن ئۆفیسا ئێکەتیا ئورۆپا و نەتەوێن ھەڤگرتی و داخواز ژ وان کرن کو فشارێ بخنە سەر تورکیا دا کو ئێدی ھەڤکاریا داعشێ نەکەت و د ھەمان دەمی دا ئورۆپا و نەتەوێن ھەڤگرتی ب رەنگەکی لەزگین خوە بگەھیننە ھەوارا کوردێن کۆبانێ.

بەرپرسێ ئۆفیسا ئێکەتیا ئورۆپا ل ئەلمانیا ژی د دەمێ وەرگرتنا یاداشتنامەیێ دا دیار کر کو ئەو دێ داخوازا رەوا یا گەلێ کورد بگەھیننە سکرتێرێ گشتی یێ نەتەوێن ھەڤگرتی و سۆز دا کو ب رەنگەکی جدی بزاڤێ بکەت بۆ کۆبانێ نەکەڤیتە دەستێ تیرۆرستان. بەرپرسێ ئۆفیسا ئێکەتیا ئورۆپا ژی راگەھاند کۆ ئەو ل گەل داخوازێ رەڤەندا کوردە و دیار کر دڤێت د بلەز ھاریکاریا کۆبانێ و ھەرێما کوردستانێ بھێتە کرن.

ھەر د ڤێ دەربارێ دا ل باکورێ کوردستانێ ژی ل ھەموو باژێران خوەنیشادانێن بۆ شەرمزارکرنا کریارێن تیرۆرستان و ھەڤکاریا تورکیا بۆ دۆژمنێن گەلێ کورد سازکرن و راگەھاندن کو ئەو ب جان و مال و خوینا خوە ل گەل باشور و رۆژئاڤایێ کوردستانێ نە و سۆزا پشتەڤانیا تەمام بۆ ھەردو پارچەیێن کوردستانێ دان. ھەروەسا ل دووڤ زانیاریێن کو ھاتینە پشتراستکرن د ناڤا شەش رۆژێن دەربازبوویی دا ژ باکور و باژێرێن مەزنێن تورکی ٣٢٠٠ کەس ژ لاوێن کورد و ھندەک پارتێن چەپ یێن تورکیا بۆ ھەڤکاریکرنا کۆبانێ و شەرکرنا ل دژی داعشێ دەربازی رۆژئاڤایێ کوردستانێ بووینە.

دھۆک، لەزگین جۆقی:

فەرماندێ پێشمەرگێن ئیزدی ل چیایێ شنگالێ بۆ ئەڤرۆ دیار کرکو شەڤا بۆری چەکدارێن داعش ھێرش کریە دوگرێ و شەری ھەتا سپێدەھیا رۆژا ٢٧/٩ ڤەکێشا و گۆت “د ئەنجام دا ئەم شیاین زیانەکا مەزن ل داعش بدەین کو زێدەتر ژ ٥٠ چەکدارێن داعش ھاتنە کوشتن و چار ھەمەر و شەفەرێن وان ژی ھاتنە سۆتن”.

قاسم شەشۆ فەرماندێ پێشمەرگێن ئێزدی ل چیایێ شنگالێ دیار کر کو ل دو میحوەران داعش ھێرش کرە مە، لێ ل ھەردو میحوەران زیانێن مەزن گەھشتنێ و نەشیان بگەھنە ناڤ دوگرێ و زۆراڤایی و گۆت “پشتی ئەو ژمارە ژێ ھاتینە کوشتن و ھێرشێن وان بۆ کونترۆلکرنا چیایێ شنگالێ ھاتنە تێکشکاندن، نەچار بوون خوە ڤەکێشن و برەڤن”.

شەشۆی ئەو ژی خویا کر کو ل سپێدەھیا رۆژا ٢٧/٩ تیرۆرستان ب ھەشت ترۆمبێلێن ھەمەر ھێرشی سەر کۆمەلگەھا زۆراڤایی کربوو، لێ ھەڤال و برادەرێن ل ناڤ کۆمەلگەھا زۆراڤا رێک نەدا داعش و پێنچ چەکدارێن وان کوشتن وێ ھێرشێ ژی سەرنەگرت و ھەموو رەڤین و گۆت “ھەر ل رۆژا ئەینیێ مە ب ھاونا شەفەرەکا داعش و ٢٠ چەکدارێن وان ل قبلەتا شنگالێ کوشتن”.

ئەڤرۆ، حکمەت زێوکی:

سەرۆکێ زانکۆیا دھۆکێ دیار کر کو ئەو قوتابیێن دەربەدەر بووین ئەڤرۆ ئێکشەمبی ٢٨/٩/٢٠١٤ دێ دەست ب ئەزموونان کەن  و گۆت “ل گۆر ھەماھەنگیا ھەردو وەزارەتێن خواندنا بلندا بەغدا و ھەرێمێ ئەم وەکو زانکۆیا دھۆکێ ب تنێ مە جە و قورتاسی بۆ دابین کرینە”.

پ.د. مسلح محەمەد سەعید دھۆکی سەرۆکێ زانکۆیا دھۆکێ بۆ رۆژناما ئەڤرۆ دیار کر کو ٣٥٠ قوتابی کو ل سەر ھەشت کۆلیژان دگەل کۆلیژەکا ئەھلی ھاتینە بەلاڤکرن ئەڤرۆ ئێکشەمبی دێ دەست ب ئەزموونان کەن و گۆت “ئەزموونێن مە سپێدی دێ دەست پێ کەن و سەعەت ١٢ ی نیڤرۆ دێ خلاس بن و یێن قوتابیێن دەربەدەر دێ سەعەت ٢ ی پشتی نیڤرۆ دەست پێ کەن”.

سەرۆکێ زانکۆیا دھۆکێ ئاشکرا ژی کر کو پشتی چەکدارێن داعش چووینە  چەندین دەڤەران و کونترۆل کرین ژمارەکا زۆرا قوتابیان ژ زانکۆیێن مووسل و تکریت و ئەنبار ھاتینە ھەرێمێ کو پرانیا وان برایێن ئێزدی و مەسیحی و عەرەبن و گۆت “پشتی وەزیرێ خواندنا بلندا بەغدایێ پەیوەندی ب وەزیرێ خواندنا بلند و ڤەکۆلینێن زانستی یێ ھەرێما کوردستانێ کری، ب ھەماھەنگی ژوورەکا پرۆسا ھاتە دانان و پشتی چەندین دانوستاندنان چار ئۆفیس بۆ تۆمارکرنا ڤان قوتابیان ل  دھۆکێ و سلێمانیێ و کەرکووکێ و ھەولێرێ ھاتنە ڤەکرن”.

د. مسلح محەمەد خویا ژی کر  کو وان زانکۆیان پێگەھەکێ ئەلکترۆنی دابوو قوتابیان، لێ ئەو رژد بوون کو پێدڤیە قوتابی ب خوە سەرەدانا زانکۆیێن ھەرێمێ بکەن و ئەو ژی بن کو ب راستی ژ بەر داعش رەڤین و گۆت “پشکا شێری بوویە بەھرا زانکۆیا کەرکووکێ کو ٧ ھزار قوتابی ژ زانکۆیا تکریت و ٤٨٧٢ قوتابی ژ مووسلێ ھاتینە زانکۆیا کەرکووکێ و پشتی کەرکووکێ زانکۆیا دھۆکێ دھێت کو ٣٥٠٠ قوتابی لێ ھاتینە تۆمارکرن و پاشی ھەولێرە و ١١٧٢ قوتابی لێ ھاتینە تۆمارکرن و ٤٥٠ قوتابی ژی ل سلێمانیێ ھاتینە تۆمارکرن”.

نەرویج، ئاراس سوبحی رەشاڤایی

پەنابەرەکا کورد ب ناڤێ، پرژین  قادر ئەترووشی، د ژیێ ١٦ سالیێ دایە ژبەر چالاکیێن وێ یێن ل دژی داعش ئەنجامدای، ل وەلاتێ نەرویج گەفێن کوشتنێ لێ دھێنە کرن و ب رێیا فێسبوکێ ئاگەھدارکرینە کو دەستان ژ چالاکیێن خوە بەردەت و وێ ژی د بەرسڤێ دا دیارکریە کو ئەڤ ژ گەفێن تیرورستان ناترسیت و دێ د بزاڤێن خوەدا بۆ پشتەڤانیکرن و سەرکەفتنا گەلێ کورد یا بەردەوام بیت.

ل گۆر نوچەکێ کو رۆژناما ( Aftenposten) یا نەرویجی بەلاڤکریە و دیدارەک ل گەل پەنابەرا کورد ( پرژین قادر) ئەنجامدایە و دیارکریە کو ب رێیا تورا جڤاکی یا فێسبووکێ گەلەک نامە بۆ ھاتینە و گەفێن کوشتنێ لێ کرینە، ژبەر کو پرژین  قادر کچەکا چالاکە و بەری سێ حەفتیان پشکداری د خونیشادانەکا کوردان یا ل دژی ( داعش ) داکریە ل باژێرێ Stavanger  یێ نەرویجی و وێ گوتارەک پێشکێشی بەرھەڤبوویێن خونیشاندانێ کریە و گەلەک چالاکی ل تورا جڤاکی یا فێسبوکێ و قوتابخانان ئەنجامداینە.

رۆژناما ( Aftenposten) د درێژاھیا دیدارا ل گەل پرژین  قادر ئەنجامدای، ئاماژە ب وێ یەکێ کریە کو ئێک نڤیسینێن بۆ ھاتیە رەوانەکرن تێدا ھاتیە ( ئەگەر تو ڤان کارێن خوە دەست ژێ بەرنەدەی، دێ مالباتا تە ھێتە بەرزەکرن و تو ژی دێ ھێیە کوشتن).

ھەر ل گۆر نوچەیێ رۆژنامێ، پرژین کچەکا چالاکە د ناڤ ئێکەتیا لاوێن نەرویج دا کو ئەڤ ئێکەتیا لاوان سەر ب پارتا سوشیال یا نەرویجی ڤەیە.

د پەیوەندیەکا تەلەفونی دا، پرژینێ بۆ ئەڤرۆ گەفێن لێ ھاتینە کرن، پشتراستکر و گۆت” گەلەک نڤیسیێن گەفکرنێ بۆ من ب رێیا تورا جڤاکی یا فێسبوکێ و ئێمێلێ من ژ ئالیێ گەلەک کەسان ڤە ھاتینە و گەفێن کوشتنێ ل مان ھاتینە کرن، ئەگەر د چالاکیێن خوە دا بەردەوام بن و پشکداری خونیشادانان ببم، من ژی پۆلیسێن وەلاتێ نەرویج ل دۆر ڤان گەفێن ل من ھاتینە کرن، ئاگەھدار کرینە).

پەنابەرا کورد پرژین  قادر ئەترووشی دیسا د درێژاھیا ئاخافتنێن خوە دا بۆ ئەڤرۆ گۆت”ئەم ژ ڤان گەفان ناترسین و دێ ل سەر چالاکیێن خوە د بەردەوام بین وەک خەباتەک و پشتەڤانیەک بۆ پێشمەرگێ کوردستانێ کو نوکە پێشمەرگە ل ھەرێما کوردستانێ شەری دژی تیرورستێن داعش دکەت بۆ پاراستنا گیانێ وەلاتیان و دوورئێخستنا داعش ژ ئاخا پیرۆزا کوردستانێ”.

پرژین قادر ئەترووشی نوکە ل قوناغا ئامادەیی دخوینیت و ئەڤە ١٥ سالە ل باژێرێ Stavanger یێ نەرویجی دژیت.

ئەڤرۆ، مللەت جەمال:

تیما تەپا پێی یا یانا گارە ماوەکە بەرھەڤیێن خوە دکەت بو ھەڤرکیێن خولا پلە ئێکا ھەرێما کوردستانێ و شیایە د ماوەکێ دیارکری دا و ب پشتەڤانیەکا دارایی یا لاواز تیمەکا گونجایی دروست بکەن و بشێت ھەڤرکیێ لسەر ناسناڤی بکەن لدووڤ گوتنا وان.

لدور بەرھەڤیێن تیمێ ژلایێ کارگێری ڤە سەروکێ یانا گارە شێروان بشار بۆ رۆژناما ئەڤرۆ گوت: قەیرانا دارایی یا نوکە ھەرێم تێدا دبوریت ھەمی لایەن ب خوڤە گرتینە و ئەم ژی ئێک ژ وا لایەناینە کاودانێن مە یێن دارایی گەلەک دلاوازن و چ لبەر دەستێ مە نینە بتنێ رێڤەبەریا گشتی یا وەرزشی پشتەڤانیێ لمە دکەت وەک ھەر تیمەکا دی و ژبەر ڤێ چەندێ ژی مە ژمارەکا دیارکری بو یاریکەران لسەر راھێنەران سەپاندیە کو زێدەتری وێ ھژمارێ نەشێین مووچێن وان و پێدڤیێن وان دابین بکەین.

زێدەتر شێروانی ئەو چەندە ژی دیارکر کو ھیڤی و ئومێدێن وان بو وەرزێ ئەڤ سالە نە بتنێ پشکداریکرنە د خولێ دا تایبەت پشتی یاریێن ھەڤالینی یێن تیمێ کو ئاستەکێ باش نیشان دایە کو گەلەک ژ وێ پشتەڤانیێ مەزنترە ئەوا ئەم لێ دکەین لەورا ھیڤیێن مە مەزنتر لێھاتینە.

لدووماھیێ سەروکێ یانێ گوت: یاریکەرا ھەمی یا لسەر لاپەرێن سپی مورکریە و مە ژی وەک کارگێریا یانێ بەرامبەر ڤی ھەلویستی سوزدایە ھەر یاریکەرەکێ باش ھەڤبەستەکا رەمزی بدەینێ.

ژلایەکێ دووڤە راھێنەرێ تیمێ خالد موسا گوت:پشتی کارگێریێ ھژمارەکا یاریکەران لسەر من سەپاندی کو زێدەتر نەشێن موچێن وا دابین بکەن ئەز نەچاربووم دەستا ژ ھندەک یاریکەرێن خوە بەردەم و باش دزانم دێ د خولێ دا پێدڤی شیانێن وا بم لێ ھەکە پشتەڤانی ل من و کارگێریا یانێ نەھێتە کرن نەچارم ڤان پێنگاڤا بھاڤێژین.

زێدەتر خالدی لدور ئاستێ تیمێ گوت: پشتی مە چەندین یاریێن ھەڤالینی کرین زورێ رازیمە ژ ئاستێ تیما خوە و ھیڤیا مە ئەوە سەرکەڤینە خولا پلا نایاب چنکو ھەتا گەنگی دێ ل خولا پلە ئێک بین و ئەم نەکێمترین ژ یانێن پلا نایاب.

لدووماھیێ خالدی ھیڤی خواستن کا چەوا پشتەڤانیا یانێن دی دھێتەکرن وەسا پشتەڤانیا گارە ژی بھێتەکرن و  سوزدا پشتەڤانی لێ بھێتەکرن ئەنجامێن باش بدەستخوڤە بینیت.

ژلایەکێ دووڤە کاپتنێ تیمێ جەمال محەمەد گوت: ل وەرزێ ئەڤ سالە تیما مە ئاستێ وێ باشتر لێھاتیە و یاریکەر ھەمی د رژدن بو وێ چەندێ ئەنجامەکێ باش بدەستخوڤە بینن و بشێین تیممێ سەر بێخینە خولا نایاب بتنێ ئەم پێدڤی پشتەڤانیێ ینە ژلایێ جھێن پەیوەندیدار ڤە.

ناڤبری ئەو چەندە ژی دیارکر کو یاریکەر کاودانێن تیمێ دزانن لەورا ژی لسەر بەرپەرێن سپی ئیمزا کریە و باوەری ب کارگێریێ ھەیە ھەر دەمێ تشتەک کەفتە بەردەستێ وان دێ پشتەڤانیا مە کەن.

website security
WP Facebook Auto Publish Powered By : XYZScripts.com