ئەڤرۆ نیوز:
بەری نها بەرپرسێن ئیرانێ دیار کربوون ئەو دێ سندوقا رەش یا فرۆکا ئوکرانی رادەستی وی وەلاتی بکەن، لێ دوهی بەرپرسەکێ هێزێن ئەسمانی یێ ئیرانێ راگەهاند کو هەتا نها ژی سندوقا رەش یا فرۆکا ئوکرانی ل ئیرانێ یە و جارێ وان نەڤێت رادەستی چو ئالیەکێ بکەن.
ل ئالیێ دی سەرۆک وەزیرێن ئوکرانیا و کەنەدا ژی داخواز ژ ئیرانێ کرینە کو قەرەبۆیا کەسوکارێن قوربانیێن کەفتنا فرۆکا ئوکرانی بکەن.
ئەڤرۆ نیۆز، قائید میرۆ:
پەیڤدارێ دەستەیا گەشت و گوزارێ ئاشکراکر، پلان ھاتیە دانان بۆ ئینانا چوار ملیۆن گەشتیاران و ئاماژەکر، کاودانێن دەڤەرێ کاریگەری لسەر کەرتێ گەشتیاری لھەرێما کوردستانێ ھەبوویە.
نادر رۆستی، پەیڤدارێ دەستەیا گەشت و گوزارێ بۆ ئەڤرۆ نیۆز دیارکر” پلان ھاتیە دانان بۆ ئەڤسالە کەرتێ گەشتیاری بھێتە پێشڤەبرن و بۆڤێ مەرەمێ ژی پێشبینی دھێتەکرن چوار ملیۆن گەشتیار بھێنە ھەرێما کوردستانێ و سەرەدانا جھێن گەشتیاری بکەن، چونکە سالا بۆری ژی سێ ملیۆن و ٧٠٠ ھزار گەشتیاران سەرەدانا ھەرێما کوردستانێ کریە.
رۆستی ئەویەکژی ئاشکراکر” ئالۆزیێن عێراقێ و کاودانێن دەڤەر تێدا دەرباز دبیت کاریگەری لسەر کەرتێ گەشتیاری ھەبوویە و رێژا گەشتیارێن بیانی بۆ ھەرێما کوردستانێ کێمتربوویە ل گەشتیارێن عێراقێ و ھەرێما کوردستانێ، لەوڕا ھەر دەمێ ئالۆزی پەیداببن دێ کاریگەری لسەر رەوشا گەشتیاری ژی ھەبیت.
نادر رۆستی دبێژیت” سەرەڕای ئالۆزیا رەوشێ ژی دێ ھەموو بزاڤەکێ بکەین بۆ ئینانا گەشتیارێن بیانی و گرنگیدان ب کەرتێ گەشتیاری د ھەموو بیاڤاندا، بمەرەما بلندکرنا رێژێ داھاتێ ھەرێما کوردستانێ.
ئه‌ڤرۆ نیوز، نه‌وزاد هلۆرى:
پێله‌كا به‌فرێ ل چیایێ پیرس بارى و بویه ئه‌گه‌رێ گرتنا رێكێ و هژماره‌كا زرا ترومبێلێن وه‌لاتیان ئاسێ بوون، د نوكه دا باژێرڤانیا دینارته كار ل سه‌ر ده‌رئینانا وان ترومبێلان دكه‌ن و هژماره‌ك ژى رزگاركرینه.
ردوان محیه‌دین، ژ راگه‌هاندنا باژێرڤانیا دینارته ۆ ئه‌ڤرۆ نیوز گۆت: (ژ ئه‌گه‌رێ بارینا پێله‌كا به‌فرێ و حلیسوك بونا جاددێ، هژماره‌كا زور یا ترومبێلان ل چیایێ پیرس ئاسێ بوینه، تیمێن باژێرڤانیا مه به‌رده‌وام دده‌نرئینانا ترومبێلان و هه‌تا نوكه پترى 10 ژ وان ترومبێلان ده‌رئیناینه).
زێده‌تر گۆت: (هه‌رده‌ما به‌فر باریت كێشه بۆ هاتن و چوونا وه‌لاتیان دروست دبیت، له‌وا دخوازین ل ده‌ما بارینا به‌فرێ وه‌لاتى و شوفێر ب هوشیارى هاتن و چوونێ بكه‌ن).
ئه‌ڤرۆنیۆز، ئه‌میر ئه‌ترووشی
به‌شداربوویێن هێلا كوره‌ك تێلیكوم ب رێیا پارێزه‌ره‌كی سكالایه‌ك ل سه‌ر كۆمپانیا كۆره‌ك تۆماركر ب تۆمه‌تا فێلبازیێ ب رێیا هنارتنا نامه‌یه‌كێ.
ئه‌ڤرۆ رۆژا ئێكشه‌مبی 18/1/2020 پارێزه‌ر هێرش ره‌شید، ل دادگه‌ها دهۆكێ ب رێكا داواكارێ گشتی، ب شێوه‌یه‌كێ فه‌رمی سكالایه‌ك ل سه‌ر كۆمپانیا كۆره‌ك تێلیكوم تۆماركر، پشتی ب هزاره‌ها خه‌لكێ دهۆكێ گله‌ی ل سه‌ر نامه‌یه‌كا كۆره‌ك تێلیكه‌م كری كو ب رێكا وێ نامێ كۆمپانیا كۆره‌ك داخواز ژ به‌شداربوویێن خوه كریه هێلێن خوه ب كۆژمێ 8000 دیناران بكه‌ته (اشتراك)، پشتی ئه‌ڤ پێنگاڤه دهێته هاڤێتن، (8000) دینار ژی دچن و نابیته (اشتراك).
پارێزه‌ر هێرش زێده‌تر بۆ ئه‌ڤرۆ نیۆز گۆت: ب هزاره‌كا نامه بۆ به‌شداربووێن كوره‌ك ل دهۆكێ هاتینه و ب تنێ بۆ به‌شداربوویێن دهۆكێ و هه‌موویان گازنده كرینه و مه ژی ڤیایه ب رێیا دادگه‌هێ مافێ هاوولاتیان ژ كۆمپانیێ وه‌رگرین.
ئەڤرۆ نیوز ، زنار تۆڤی:
د دەمێ 24 دەمژمێرێن بوری دا، پێلەکا دیتر یا بەفرێ ناحیا کانی ماسێ ڤەگرتینە و د ئەنجامدا رێژەکا باش یا بەفرێ ل ناحیا کانی ماسێ و دەروازێ نێڤدەولەتی یێ سەرزێری باریە، هەروەسا رێکێن هاتنووچوونێ ژی هاتینە ڤەکرن.
کامیران محەمەد رێڤەبەرێ شارەوانیا کانی ماسێ، تایبەت بۆ ئەڤرۆ نیوز دیار کر: شڤێدی رێژەکا باش یا بەفرێ ل سنورێ ناحیا کانی ماسێ باریە و د ئەنجامدا 22 سەنتیمێن بەفرێ ل سەنتەرێ ناحیا کانی ماسێ بارینە و هەتا نوکە 152 سەنتیمێن بەفرێ ل سەنتەرێ ناحیا کانی ماسێ بارینە، هەروەسا هەتا نوکە 240 سەنتیمێن بەفرێ ل دەروازێ سەرزێری بارینە.
ناڤهاتی گۆت ژی: هەر زوو تیمێن رامالینا بەفرێ شیاینە رێیا سەرزێری ژ بەفرێ رابمالن و نوکە هاتنوچوونا رێڤنگان د ڤی دەرگەهی را یا ئاسایی یە، هەروەسا هەردەم تیمێن رامالینا بەفرێ د بەرهەڤن و ب زووترین دەم رێیا هاتنوچوونێ ژ بەفرێ پاقژ بکەن.
ئه‌ڤرۆ نیوز:
گۆپیتكا بلندنا به‌رلینێ د چاره‌كرنا پرسا لیبیا دگه‌ریت و هه‌مو لایه‌نێن هه‌ڤرك پیكڤه كۆم بن ل بن رۆناهیا بریارا دو هزار و 259 یا جڤاتا ئاسایشا نه‌ته‌وه‌یێن ئیكگرتی تایبه‌ت ب لیبیا بۆ راوه‌ستاندنا شه‌ری و هێرشان.
مایك پومپه‌یو وه‌زیرێ ده‌رڤه‌یێ ئه‌مریكا راگه‌هاند: ل به‌رلینێ ل گه‌ل سه‌رۆكێن جیهانێ و به‌رپرسێن نه‌ته‌وه‌یێن ئیكگرتی ب مه‌به‌ستا كاركرنێ ب ئاراسته‌یا دوماهی هاتنا ئاریشان ل لیبیا، سوپاسیا ئه‌لمانیا ژی دهكین بۆ ئه‌ڤێ خزمه‌ت و پێشوازی و سه‌رۆكایه‌تیكرنا ئه‌ڤێ ده‌ست پێشخه‌ریا گرنگ بۆ لیبیا كری.
ئه‌ڤرۆ نیۆز، ئه‌میر ئه‌ترووشی
ل رێڤه‌به‌ریا چاكسازیا مه‌زنا ل دهۆكێ به‌ریكانا خواندنا په‌رتوكان یا ژماره دو ب پشكداریا 48 دادگه‌هكریان ده‌ست پێكر.
عرفان محه‌مه‌د ئه‌مین، به‌رپرسێ راگه‌هاندنا رێڤه‌به‌ریا چاكسازیا مه‌زنا ل دهۆكێ بۆ ئه‌ڤرۆ نیۆز دیار كر، ئه‌ڤه بۆ جارا دوویێ یه دناڤا چاكسازیێ دا به‌ریكانا خواندنا په‌رتۆكان دهێته سازكرن و د ئه‌ڤ جاره دا 48 دادگه‌هكریان پشكداری كریه و هژماره‌كا زۆر یا دادگه‌هكریان حه‌زا پشكداریێ هه‌بوویه، لێ ژ به‌ر وێ چه‌ندێ بۆ كار ئاسانیێ مه هه‌موو وه‌رنه‌گرتن و د به‌ریكانێن بهێت دا دێ یێن دی هێنه وه‌رگرتن.
زێده‌تر دبێژیت: مه‌ره‌م ژ ڤێ به‌ریكانێ ئه‌و بوویه دا كو دادگه‌هكری مفایی ژ خواندنا په‌رتوكان وه‌ربگرن و ئاستێ وان یێ ره‌وشه‌نبیری به‌رزترببیت و هه‌ر دیسان دا كو ب كاره‌كیڤه مژوول بن، چه‌ند ناڤ و نیشانه‌كێن په‌رتوكان ژلایێ لژنه‌یه‌كا تایبه‌ت ڤه هاتنه هه‌لبژارتن ب زمانێ كوردی و عه‌ره‌بی و هه‌ر هه‌مان لژنه دێ تێستی ب به‌شداربوویان كه‌ت، پشتی بۆ ماوێ هه‌یڤه‌كێ په‌رتوك ل ده‌ف دمینن و دخوینن.
عرفان خویاژی كر كو ئه‌ڤ به‌ریكانه دێ یا به‌رده‌وام بیت بۆ دادگه‌هكریان پشتی د به‌ریكانا ئێكێ دا دیار بووی بۆ رێڤه‌به‌ریا چاكسازیێ كو دادگه‌هكریان مفایه‌كێ باش ژێ وه‌رگرتی و هه‌ردیسان حه‌زا وان ل سه‌ر هه‌بوو.
ئه‌ڤرۆ نیوز:
ڤلادیمیر پوتن سه‌رۆكێ روسیا پرۆژه یاسایه‌ك پێشكێشی په‌رله‌مانێ وه‌لاتێ خۆ كر، كۆ تێدا ده‌ستورێ وه‌لاتی ب شێوه‌یه‌كێ به‌رچاڤ گوهوریه و ژ وان گوهورینان ژی ده‌سه‌لاتێن خۆ كێم كرینه و ده‌سه‌لاتا وه‌زیر و والی و سه‌رۆك وه‌زیران زێده‌كرینه.
بریاره ل چه‌ند رۆژێن بهێت په‌رله‌مانی روسیا ده‌نگی ل سه‌ر پرۆژه‌یێ بده‌ت كۆ پوتنی پێشكێشی په‌رله‌مانی كریه، ژ 1993 هه‌تا نوكه ئه‌ڤه جارا ئیكێ یه بڤی شێوه‌یی دستورێ روسیا گوهورین ب سه‌ر دا بهێت.
د وێ پرۆژه‌یێ دا، پوتنی بۆ په‌رله‌مانی شاندیه، كۆ ئێك ژ برگه‌یێن وێ پرۆژه‌ی پۆستێ سه‌رۆك و سه‌رۆك وه‌زیران و والی یان وه‌زیر و دادوه‌ران دڤێت ناسنامه‌یا چ وه‌لاتێن دی نه‌بیت.
ئه‌ڤرۆ نیوز:
سه‌رۆك كۆمارێ توركیا گه‌فا هنارتنا هیزێن زیده‌تر بۆ ده‌ست ب سه‌رداگرتنا زێده‌ترا ئاخا رۆژئاڤا و سوریا دكه‌ت.
ره‌جه‌ب ته‌یب ئه‌ردوغان سه‌رۆك كۆمارێ توركیا راگه‌هاند: هه‌بوونا هیزێن توركیا ل رۆژئاڤایێ كوردستانێ باكوری سوریا بۆ پاراستنا توخیبێن توركیا یه.
سه‌رۆك كۆمارێ توركیا رژدبوونا خو بۆ ڤه‌مانا هێزێن توركیا ل رۆژئاڤا و باكورێ سوریا ده‌رئیخستن و گه‌فا هنارتنا بۆ ئه‌وان ده‌ڤه‌ران ژی كر.
ئه‌ڤرۆ، سالار دۆسكی:
سه‌رۆكا لقێ دهوك یێ سه‌ندیكا هونه‌رمه‌ندێن كوردستانێ بۆ رۆژناما ئه‌ڤرۆ ئاشكراكر كو پشتی بۆرینا 10 سالان ژ ئه‌نجامدانا كونگرێ هونه‌رمه‌ندێن كوردستانێ، ل رۆژێن بۆری كار ل سه‌ر بجهئینانا برگێن په‌یره‌وێ ناڤخۆ یێ سه‌ندیكا هونه‌رمه‌ندان هاته‌كرن.
ئه‌ڤین حسێن، سه‌رۆكا لقێ دهۆك یێ سه‌ندیكا هونه‌رمه‌ندێن كوردستانێ بۆ رۆژناما ئه‌ڤرۆ گۆت: “ل دووڤ په‌یره‌وێ سه‌ندیكا هونه‌رمه‌ندێن كوردستانێ كو ل سالا 2010 هاتیه په‌سندكرن، ئه‌ڤ برگا ڤی په‌یره‌وی نه بتنێ ل سه‌ندیكا هونه‌رمه‌ندێن كوردستانێ هه‌یه به‌لكو ل هه‌موو سه‌ندیكایێن هونه‌ری ل سه‌ر ئاستێ جیهانێ هه‌یه كو هه‌ر جهه‌كێ كارێن هونه‌ری تێدا بهێنه ئه‌نجامدان، ژلایێ (شانۆ، مۆزیك، شێوه‌كاری، دراما، سینما، شه‌هیان، ئاهه‌نگ) دڤێت رازیبوونا ئه‌نجامدانا وی كارێ هونه‌ری هه‌بیت، دیسا ئه‌ڤ كاره هاته ئه‌نجامدان ژ به‌ر وێ یه‌كێ كو دهاتنه دیتن كو سترانبێژن كورد كاری ناكه‌ن و پتر سترانبێژێن بیانی كاری ئه‌نجام دده‌ن، له‌وما مه خواست كو ئه‌و كه‌سێ ڤی كاری ئه‌نجام بده‌ت دڤێت ب رێژا پتر ژ 50% ئه‌ندامێ سه‌ندیكا هونه‌رمه‌ندێن كوردستانێ بیت، ده‌ستیردانا كاری بۆ ساله‌كێ دهێـته‌دان، ئه‌ڤ كاره هاته ئه‌نجامدان بۆ وێ چه‌ندێ دا ئه‌ندامێ سه‌ندیكایێ ببیته خودان كار و داهاته‌ك بۆ دروست بیت”.
ئه‌ڤینێ خویا كر كو ئه‌ڤ كاره هاته ئه‌نجامدان ژبه‌ر وێ چه‌ندێ‌َ بوویه كو سترانا ده‌ڤه‌رێ هاتبوو پشست گوه هاڤێتن و پتر گرنگی ب سترانا بیانی دهاته‌دان و ئه‌ڤێ چه‌ندێ ژی مه‌ترسی ل سه‌ر سترانا ده‌ڤه‌رێ دروست كربوو.
سه‌رۆكا سه‌ندیكا هونه‌رمه‌ندێن كوردستانێ ئه‌و ژی ئاشكراكر كو ڤێ حه‌فتیێ دێ دووماهی كۆمبوون ل سه‌ر ئه‌نجامدانا ئه‌ڤان رێنمایان ل هۆلێن ده‌واتا و كافێ یا هێته‌كرن و دێ كار ل سه‌ر وێ چه‌ندێ هێـته‌كرن كو ب زووترین ده‌م بكه‌ڤنه دبیاڤێ بجهئینانێ دا و گۆت: “پشتی مه وه‌كو سه‌ندیكا هونه‌رمدان كۆمبوونه‌ك ل دۆر گێرانا ئاهه‌نگان ئه‌نجامدای مه چه‌ند رێنما ده‌ركرن بۆ ئه‌وا كه‌سان ئه‌وێن ل باژێرێ مه رادبن ب گێڕانا ئاهه‌نگان، ل دووڤ رێنمایان دڤێت رێژه‌ك بۆ سه‌ندیكا هونه‌رمه‌ندان بیت و دڤێت ئه‌و كه‌سێ ئاهه‌نگێ دگێریت ئه‌ندامێ سه‌ندیكا هونه‌رمه‌ندێن كوردستانێ بیت”.
خانم ئه‌ڤینێ زێده‌تر گۆت: “ئه‌ڤ كاره مه ئه‌نجام دا وه‌ك پشته‌ڤانی بۆ هونه‌رمه‌ندێن كورد كو پتر گرنگی ب هونه‌رێ كوردی بهێته‌دان و ل ئاهه‌نگا گرنگی ب هونه‌رێ كوردی بهێَته‌دان، دیسا ل كافێ یا حه‌فتیانه ئاهه‌نگه‌ك دهێته رێكخستن و تێدا سترانێن زمانێ عه‌ره‌بی دهاتنه گۆتن مه ل سه‌ر خودانێن كافێیان سه‌پاندیه كو دڤێت سترانێن كوردی ژی ل وێ ئاهه‌نگێ بهێنه گۆتن و ده‌سپێك ژی سترانا كوردی بهێته گۆتن”.
نيشاندان