ئەڤرۆ نیوز، رەزوان رۆژبەیانی:
ئەڤرۆ دوشەمبی 7.9.2020 زارۆیەک د رووبارێ خازری دا خەندقی و پشتی چەند دەمژمێران تەرمێ وی ژ ئاڤێ ئینادەر، کەسەکێ نێزیکی وی زارۆیی، بۆ ئەڤرۆ نیوز دیار کر: ئەو زارۆیێ خەندقی ناڤێ وی ئەحمەد مەهدی عەلی یە و د ژیێ 9 سالیێ دایە و ل پۆلا دویێ سەرەتایی بوویە، خەلکێ گوندێ بەنینان بوویە ل سنۆرێ قەزا بەردەرەش، بەری چەندەکێ تەرمێ وی ژ ئاڤێ ئینایە دەر و تەرمێ هاتیە ڤەگوهاستن بۆ نۆشداریا داد ل ئاکرێ.
ئەڤرۆ نیوز:
وەزارەتا ساخلەمیێ یا حوکمەتا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٧٨٨ کەس ل هەرێما کوردستانێ تووشی ڤایرۆسێ کۆرۆنایێ بووینە کو ئەو یەک زێدەترین رێژەیە د رۆژەکێ دا و هەروەسا ٢٤ تووشبوو ژی مرینە.
ڕاگەیاندراوی (٢٤) کاتژمێری تایبەت بە نەخۆشی ڤایرۆسی کۆڕۆنای نوێ COVID19 ژمارە (١٩٤)
١. کەرەنتین: (هیچ هاوڵاتی نوێ کەرەنتین نەکراون)
هیچ هاوڵاتی لە کەرەنتینن نەماونەتەوە.
٢. پشکنین: (٥٠٥٠ پشکنینی نوێ)
(١٨٠٦ هەولێر)، (٧٤٠ سلێمانی، ١٥٣ گەرمیان)، (٢٢٩١ دهۆك)، (٦٠ هەڵەبجە)
٣. تووشبوو: (٧٨٨ تووشبووی نوێ)
(٢٨١ هەولێر)
(١٠٤ سلێمانی، ٢٤ گەرمیان)
(٣٤٩ دهۆك)
(٣٠ هەڵەبجە)
٤. چاکبوون: (٤٣١ چاکبوون)
(٢٢١ هەولێر)
(٣٨ سلێمانی، ٣٦ گەرمیان)
(١٠٦ دهۆك)
(٣٠ هەڵەبجە)
٥. مردن: (٢٤ مردن)
(٧ هەولێر)
(١٢ سلێمانی، ١ ڕاپەڕین)
(٣ دهۆك)
(١ هەڵەبجە)
ئاماری گشتی:
کەڕەنتین هاوڵاتی ٢١٨٧١ (٢١٨٧١ دەرچوو)
پشکنین ٣٤٨٧٨٥ (١٣٥٦١٥ هەولێر، ٩٣٦١٣ سلێمانی، ١١٦٢٤١ دهۆك، ٣٣١٦ هەڵەبجە)
تووشبوون ٣٢٩٩٨ (١٣١٨٣ هەولێر، ١٢٧٧٣ سلێمانی، ٥٩٦٩ دهۆك، ١٠٧٣ هەڵەبجە)
چاکبوون ٢٠٩٢٣ (٩٣٢٧ هەولێر، ٨٥٥٩ سلێمانی، ٢٠٥٢ دهۆك، ٩٨٥ هەڵەبجە)
لەژێر چارەسەر ١٠٨٤٤ (٣٣٩٨ هەولێر، ٣٥٣٨ سلێمانی، ٣٨٣٩ دهۆك، ٦٩ هەڵەبجە)
مردن ١٢٣١ (٤٥٨ هەولێر، ٦٧٦ سلێمانی، ٧٨ دهۆك ، ١٩ هەڵەبجە)
ئه‌ڤرۆ نیوز، مه‌حمود نهێلی:
د سه‌ره‌دانه‌كی دا بۆ ده‌ڤه‌را ئامێدیێ مه‌سرۆر بارزانی سه‌رۆكێ حكومه‌تا هه‌رێما كوردستانێ ل رۆژا دوشه‌مبی 7/9/2020 به‌رێ بنیاتی بو نه‌خوشخانه‌یه‌كا 100 ته‌ختی ل كومه‌لگه‌ها هێتوتێ یا سه‌ر ب ناحیا دێره‌لۆك ڤه دانا.
ل ده‌سپێكی عه‌لی ته‌ته‌ر پارێزگارێ دهوكێ په‌یڤه‌ك پێشكێش كر و دیار كر، كو ئه‌ڤه دووه‌م سه‌ره‌دانه یا جه‌نابێ سه‌رۆكێ حكومه‌تێ بو ده‌ڤه‌را به‌هدینان بو دانانا به‌رێ بنیاتی بو چه‌ند پرۆژه‌یه‌كان ل ده‌ڤه‌رێ ژ بو خزمه‌تكرنا خه‌لكێ ده‌ڤه‌رێ و دورستكرنا پرۆژه‌یان .
ناڤهاتی سوپاسیا خه‌لكێ گوندێ هێتوتێ ژی كر، كو بێ داخازیا هیچ تشته‌كی بكه‌ن ئه‌ڤ پارچا ئه‌ردی كو دورێن 45 هزار میترێن چار گوشه‌یه پێكێشی حكومه‌تێ كریه بو ئه‌نجامدان ڤێ پرۆژه‌ی.
دووڤ دا دكتور سامان به‌رزنجی وه‌زیرێ ساخله‌میێ یێ حكومه‌تا هه‌رێما كوردستانێ د په‌یڤه‌كی دا سوپاسیا جه‌نابێ سه‌رۆكێ حكومه‌تێ كر، بو گرنگی دانا وی ب كه‌رتێ ساخله‌میێ و گۆت: ئه‌ڤ پرۆژه‌یه دێ خزمه‌ته‌كا باش یا خه‌لكێ ده‌ڤه‌رێ كه‌ت ژلایێ ساخله‌میێ ڤه بو دابینكرنا خزمه‌تگوزیارێن ئاست بلند وه‌ك نشته‌رگه‌ری و نڤاندنا نه‌خوه‌شان و هه‌وارهاتنێ و ئامیرێن پێشكه‌فتی یێن ئێم ئار ئه‌ی و سیتی سكان و تاقیگه‌ه و هه‌موو ئامیرێن پێشكه‌فتی یێن ته‌كنیكی و هونه‌ری.
پاشان مه‌سرۆر بارزانی سه‌رۆكێ حكومه‌تا هه‌رێما كوردستانێ د په‌یڤا خوه دا خوه‌شخالیا خوه ده‌ربری كو جاره‌كا دی سه‌ره‌دانا ده‌ڤه‌را ئامێدیێ كریه و گۆت: ( سه‌ره‌دانا مه یا ڤێ جارێ بو دانانا به‌رێ بنیاتی یێ ڤێ نه‌خوه‌شخانه‌یێ بوویه و هڤیدارم ل سه‌ر ئاستێ ستانده‌ردێن جیهانی و د ماوه‌یه‌كی كێم دا بهێته چێكرن بو هندێ زێده‌تر خزمه‌تا خه‌لكێ ڤێ ده‌ڤه‌رێ بكه‌ن).
سەرۆکێ حوکمەتێ گۆت: (د به‌رنامه‌یێ حكومه‌تێ دا مه گه‌له‌ك گرنگی دایه هندێ كو فه‌رمانگه‌هێن حكومی و خزمه‌تگوزاری بگه‌هنه هه‌موو گوند و ناوچه و ده‌ڤه‌رێن كوردستانێ بو وێ یه‌كی هاولاتی نه‌چار نه‌بن و پێدڤی ب هندی نه‌بیت سه‌ره‌دانا سه‌نته‌رێن پارێزگه‌هان و باژێران بكه‌ن).
و دیار ژی کر ژ به‌ر هندێ مه بریار دا ئه‌م ڤێ نه‌خوه‌شخانه‌یێ ل ڤێ ده‌ڤه‌رێ دروست بكه‌ین ژ به‌ر كو ئه‌ڤه ده‌ڤه‌ره‌كا به‌رفره‌یه و خه‌لكه‌كی قه‌هره‌مان و خه‌باتكه‌ر و تێكوشه‌ر، ساله‌هانه خه‌بات كریه بو ئازادكرنا كوردستانێ و نوكه ژی وه‌ختێ هندێ یه ئه‌م هه‌موو خزمه‌تا خه‌لكێ ڤێ ده‌ڤه‌رێ بكه‌ین.
ناڤهاتی دیار ژی كر، ب مخابنی ڤه هه‌ر ل ده‌سپێكا ده‌ست بكار بوونا كابینا نوویا حكومه‌تێ ئه‌و توشی گه‌له‌ك قه‌یرانان بوون كو ئێك ژ وانا نه‌خوشیا كورونایێ یوو یه و دووڤ دا ئاریشه‌یێن ئابوری. به‌س ئه‌ڤان قه‌یرانان ئه‌م رانه‌گرتین به‌لكو وه‌كو پێدڤی و وه‌كو مه دڤیا ئه‌م نه‌شیانه زوو ڤان پرۆژان ئه‌نجام بده‌ین چونكه یا پیدڤی ئه‌و بوو ئه‌م به‌رسینگێ ڤان قه‌یرانان بگرین و هه‌كه خودێ فه‌رسه‌تی بده‌ت دێ یێن به‌رده‌وام بین ل سه‌ر بجهئینانا پرۆژه‌یان ل هه‌موو ده‌ڤه‌رێن كوردستانێ .
ناڤهاتی گۆت ژی بو ڤێ ده‌ڤه‌رێ ژی نه بتنێ ئه‌ڤ پرۆژه‌یه دێ هێته چێكرن به‌لكو هند پرۆژه‌یێن دیتر ژی هه‌نه و ئه‌م ل گه‌ل پارێزگارێ دهوكێ قایمقامێ ئامێدیێ و رێڤه‌به‌رێن ناحیان كومبووینه و مه به‌حسێ داخازی و پێداویستیێن خه‌لكێ ده‌ڤه‌رێ و ئاریشه و پرۆژێن پیدڤی كریه كو دێ ل ده‌ڤه‌رێ هێنه ئه‌نجام دان و ئه‌وا مه پێچیت ئه‌م ته‌خسیریێ ناكه‌ین بۆ خزمه‌تكرنا خه‌لكێ ده‌ڤه‌رێ.
و گۆت: (ئه‌ز حه‌ز دكه‌م هوین بزانن جه‌نابێ سه‌رۆكی گه‌له‌ك حه‌ز دكه‌ت پتر خزمه‌تا خه‌لكێ ده‌ڤه‌رێ بهێته كرن چونكه ئه‌وی پێشمه‌رگایه‌تی یێ ل ڤێ ده‌ڤه‌رێ كری و ئه‌و دزانیت قه‌در و قیمه‌تێ خه‌لكێ ڤێ ده‌ڤه‌رێ چه‌نده و مه بۆ ڤێ یه‌كی لیژنه پێك ئیناینه بو وێ یه‌كێ بزانین پێدڤیێن خه‌لكێ ڤێ ده‌ڤه‌رێ چنه كو بكه‌ینه به‌رنامێ حكومه‌تێ دا بو بجهینانێ) .
مەسرور بارزانی دیار ژی كر، كو خه‌لكی ده‌ڤه‌رێ به‌رێزێن مه نه و ئه‌و خودانێ ده‌ڤه‌رێ نه و بلا چ كه‌سه‌كی دی خوه ل ده‌ڤه‌رێ و خه‌لكێ ده‌ڤه‌رێ نه‌كه‌ته خودان و ئه‌و كه‌سێن دبنه ئه‌گه‌ر كو ئه‌ف ده‌ڤه‌ره نه‌هێنه ئاڤاكرن و د سه‌ر هندێ را دهێن و خه‌لكی هاندده‌ن كو گازندا ژ حكومه‌تێ بكه‌ن ل سه‌ر نه‌گه‌هشتنا خزمه‌تگوزاریان بلا پسیارێ ژ وان بكه‌ن كو كیه بوویه ئه‌گه‌رێ هندێ 800 گوند نه‌هێنه ئاڤاكرن هه‌روه‌سا دڤێت واز ل هندێ بینن كو خه‌لكی بلڤین بو دروستكرنا ئاریشه‌یان و دڤێت بزانن ئه‌وێن حه‌ژ خزمه‌تكرنا وه‌لاتێ خوه دكه‌ت ئه‌ون یێن توڤێ دوبه‌ره‌كیێ نه‌چینن . و ته‌كه‌ز كر، كو حكومه‌تا هه‌رێمێ حكومه‌تا هه‌وه‌یه و یا د خزمه‌تا هه‌وه دا و ئه‌م خزمه‌تكارێن هه‌وه‌ینه و ئه‌م نه مه‌زنێن هه‌وه‌ینه و ئه‌ركێ مه یه ئه‌م خزمه‌تا هه‌وه بكه‌ین.
ناڤهاتی ده‌ربارێ نه‌خوشیا كورونایێ ئاشكراكر، كو هنده‌ك لایه‌نان ئه‌ڤ نه‌خوه‌شیه كره بابه‌ته‌كی سیاسی و خه‌لكی باجا هندێ دا و داخاز ژی كر، خو دڤێت هاولاتی خوه ب پارێزن دكو خوه‌شتڤێن خوه ژ ده‌ست نه‌ده‌ین.
تێ زانین ئه‌ڤ نه‌خوه‌شخانه‌یه دێ یا 100 ته‌ختی بیت و دێ ل سه‌ر رووبه‌رێ 45 هزار میترێن دوو جاری هێته دروست كرن و كوژمێ 43 ملیون دولاران بو هاتینه ته‌رخانكرن و پێك دهێت ژ ئاڤاهیێ سه‌ره‌كی یێ نه‌خوشخانێ و ئاڤاهیێ نوژداریا داد و هه‌وارهاتنێ و ئاڤاهیێ ته‌كنیكی و جهێ دانانا فرۆكه‌یێ دێ لێ هه‌بیت و دێ د ماوێ 900 رۆژان دا ب دووماهی هێت.
ئەڤرۆ نیوز:
تارق مەندەلاوی رێڤەبەرێ گشتی یێ فەرمانگەها قوربانیێن تیرۆرێ ل دەزگەهێ شەهیدێن عیراقێ راگەهاند کو وان بریار داینە دەست ب وەرگرتنا معاملێن کەسوکارێن شەهیدێن ئێزدیان ل شەنگالێ و دەوروبەرێن وێ بکەن و نها وان لقێ دویێ ژی ل وێرێ ڤەکرینە دا زووتر بشێن معاملێن وەلاتیان ل شەنگالێ وەربگرن.
ناڤهاتی راگەهاند کو دێ ب دەه ملیۆن دیناران کەسوکارێن شەهیدێن ئێزدی یێن کو ب دەستێ تیرۆرستێن داعشێ هاتینە شەهید کرن دێ هێنە قەرەبۆ کرن.
هەمان بەرپرسی راگەهاند ل شەنگالێ وەلاتیێن کو ب دەستێ رێکخراوا تیرۆرستی یا داعشێ هاتینە شەهید کرن یان ژی هەتا نها چارەنڤیسێ وان دیار نینە هژمارا وان پترە ژ حەفت هزار کەسان.
ئه‌ڤرۆ نیۆز، عه‌زیز هه‌ورامی:
كه‌سانێك پڕۆژه‌یه‌كیان ڕاگه‌یاندووه، به‌ناوی به هه‌رێم كردنی پارێزگاكانی سلێمانی و هه‌ڵه‌بجه و ئیداره‌كانی ڕاپه‌ڕین و گه‌رمیان، سه‌رۆكی فڕاكسیۆنی پارتی له ئه‌نجوومه‌نی پارێزگای سلێمانی داوا ده‌كات په‌رله‌مان یاسایه‌ك ده‌ربكات و هیچ كه‌سێك بۆی نه‌بێت كاربۆ له‌ت كردنی كوردستان بكات و كاربكرێت بۆ نووسینه‌وه‌ی ده‌ستوور.
زیاد كاكه ڕه‌زا سه‌رۆكی فڕاكسیۆنی پارتی له ئه‌نجوومه‌نی پارێزگای سلێمانی، تایبه‌ت به ئه‌ڤرۆ نیۆزی ڕاگه‌یاند:” پێویسته ئه‌وكه‌سه‌ی پڕۆژه‌ی به هه‌رێم كردنی سلێمانی و هه‌ڵه‌بجه و ئیداره‌كانی گه‌رمیان و ڕاپه‌ڕین ڕاگه‌یاندووه، به خه‌ڵكی كوردستان بڵێن هه‌ده‌ف ئامانجی ئه‌و پڕۆژه چییه، خه‌ڵكی ئه‌م سنووره ئه‌وه‌نده زه‌حمه‌ت و خوێنی داوه بۆ دروستكردنی كیانی كوردستان له‌ده‌ستووری عێراق ددانی پێنداندراوه،به‌و جۆره پڕۆژانه رازی نابن.
وتیشی:”ده‌بێت به خه‌ڵكی بڵێن ئایا پڕۆژه‌یه‌كی میلی داواكاری هاوڵاتییانه یان پڕۆژه‌یه‌كی سیاسی، به‌ڵێ پڕۆژه‌یه‌كی سیاسییه ده‌ستی ده‌ره‌كی له پشته بۆ له‌ت كردنی كوردستان، پڕۆژه له دنیادا ده‌بێت بۆ خزمه‌ت كردنی خه‌ڵكی وڵاته‌كه‌بێت نه‌ك بۆ له‌ت كردنی خاك و حكوومه‌ت.
ئاماژه‌ی به‌وه‌كرد:”پڕۆژه‌ی به هه‌رێم كردنی سلێمانی و ده‌وروبه‌ری پڕۆژه‌یه‌كی سیاسییه، پێویسته حزبه سیاسییه‌كان قسه‌ی خۆیان بكه‌ن په‌رله‌مان كۆببێته‌وه یاساییه‌ك ده‌ربكات كه‌س بۆی نه‌بێت پڕۆژه داتاشێت بۆ له‌ت كردنی هه‌رێمه‌كه‌مان، پاشان به زوی ده‌ستووری كوردستان بنوسرێته‌وه.
ئەڤرۆ نیوز:
پشتی کو مایک پومپیۆ وەزیرێ دەرڤە یێ ئەمریکا راگەهاند کو ئیسرائیل و ئیمارات دێ پێکڤە بەرەیەکێ ل دژی ئیرانێ دروست کەن بەرپرسەکێ ئیرانێ ژی گەف ل ئیماراتێ کرن.
حسێن ئەمیر عەبدوللاهیان هاریکارێ سەرۆکێ پەرلەمانێ ئیرانێ بۆ کاروبارێن نێڤدەولەتی راگەهاند کو ئیسرائیل بەر ب ژناڤچوونێ یە و ئەمریکا دڤێت ب رێیا ئیماراتێ و هندەک وەلاتێن دی ئیسرائیلێ قورتال بکەت و گۆت: (هەکە ئیمارات ب هاریکاریا ئیسرائیلێ ل دژی بەرژەوەندیێن ئیرانێ کار بکەت دێ ب توندی بەرسڤا وێ دەین).
ئەڤرۆ نیوز:
تارق شێرکو بەرپرسێ لقێ دو یێ ئێکگرتو ئیسلامی کوردستانێ پشتی کو بۆ ماوەیێ مەهەکێ ل نەخوشخانێ دا بوو، جانێ خوە ژ دەست دا.
لقێ دو یێ هەولێرێ یێ ئێکگرتو د داخۆیانیەکێ دا دیار کریە کو تارق شێرکو پشتی کو تووشی ڤایرۆسێ کۆرۆنایێ ببوو بۆ ماوەیێ مەهەکێ ل نەخوشخانێ ل ژێر چاڤدێریێ دا بوو و شەڤا بۆری جانێ خوە ژ دەست دا.
ئه‌ڤرۆ نیوز:
وه‌زیرێ ساخله‌میا عیراقێ راگه‌هاند هه‌رده‌مێ ڤاكسینێ كورونایێ به‌رده‌ست بیت و ژلایێ رێكخراوا ساخله‌میا جیهانێ ڤه ب فه‌رمی دان پێدان لسه‌ر بهێته‌كرن، ئه‌ڤه عیراق ئێكه‌م وه‌لات دبیت بۆ كرینێ.
حه‌سه‌ن ته‌میمی وه‌زیرێ ساخله‌میا عیراقێ راگه‌هاند نوكه چاڤه‌ریێ ئه‌وێ چه‌ندێ دكه‌ین، ڤاكسینێ كورونایێ ئه‌وان ده‌وله‌تێن ده‌ست دایێ بۆ به‌رهه‌م ئینانێ ژلایێ رێكخراوا ساخله‌میا جیهانی ڤه بهێته په‌سندكرن، ئینانا هه‌ر ڤاكسینه‌كی دكه‌ڤته سه‌ر ئه‌وێ چه‌ندی ل جیهانێ بكار دئیت و پشت راست بوون ل سه‌ر سه‌ركه‌ڤتنا ڤاكسینی هه‌بیت.
ناڤبری ئه‌و چه‌نده ژی راگه‌هاند وه‌زاره‌تا ساخله‌میێ هه‌موو ئه‌و چاره‌سه‌ری هاتینه دابینكرن، كو د چارچوڤه‌یێ پرۆتوكولێن جیهانی یێ چاره‌سه‌ركرنێ دا هاتینه په‌سندكرن بۆ چاره‌سه‌ركرنا توشبوویێن سڤك و ناڤه‌ندی و گرانیێن كورونایێ.
وه‌زیرێ ساخله‌میا عیراقێ داخازژ وه‌لاتیان كر پێگیری رێكارێن ساخله‌میێ و رێكخراوا ساخله‌میا جیهانی بن و پێگیری پاراستن و دووركه‌ڤتنێن جڤاكی بۆ ئه‌وێ چه‌ندێ ریگریێ ژ به‌ربه‌لاڤبوونا ڤایرۆسی بهێته‌كرن.
ئه‌ڤرۆ نیوز:
په‌یڤدارێ هێزێن چه‌كدارێن عیراقێ كوشتنا دو سه‌ركرده‌یێن رێكخراوا تیرۆریستی یا داعشێ ل داقوقێ سه‌ر پارێزگه‌ها كه‌ركوكێ راگه‌هاند.
یه‌حیا ره‌سول په‌یڤدارێ فه‌رمانده‌یا هێزێن چه‌كدارێن عیراقێ راگه‌هاند هێزه‌كا تایبه‌ت یا دژی تیرۆرێ ل سه‌ر بنه‌مایێ بزاڤه‌كا مه‌زنا هه‌والگریێ دو سه‌ركرده‌یێن رێكخراوا تیرۆریستی یا داعشێ ل ده‌مێ بزاڤا ده‌ربازبوونێ داین هاتنه كوشتن.
ناڤبری ئه‌و چه‌نده ژی راگه‌هاند كۆ هێزه‌كا دژه تیرۆرێ دو تیرۆریستێن مه‌ترسیدار ل باژێرێ گه‌رمه لاكورێ رۆژهه‌لاتا فه‌لوجه گرتینه.
نيشاندان