ئەڤرۆ نیوز ، عەلی حاجی :

ب ھەلکەڤتا ٢٨ سالیا رۆژا سەرھلدانا زاخۆ ئەڤرۆ ل رۆژا چارشەمبیێ رێککەڤتی ١٣/٣/٢٠١٩ ب ئامادەبوونا خەلکێ دەڤەرا زاخو ب ھەمی تەخ و چینان ڤە ئاھەنگەکا ھونەری ل پارکا شەھیدان د ناڤا سەنتەرێ زاخۆ دا ھاتە سازکرن.

ئەڤرۆ نیوز، عەلی حاجی :

لیژنا تایبەت یا لێگەریان و دەستەسەر کرنا کلینیک و دەرمانان ل زاخۆ د ماوەیێ حەفتیەکێ دا کلینیکەکا ھاریکارێ نوژداری دائێخست و مولەتا ٤٥ رۆژان بو جێبەجێکرنا رێنمایان دایە ٩ نوشدارێن ئافرەت و ١٦ نوشدارێن نەشتەرگەریێن مەزن .

خەلات عوسمان نوونەرێ ھەرێمداریا زاخۆ بۆ ئەڤرۆ نیوز دیار کر ل حەفتیا بوری دا مە شیابوو کلینیکەکا ھاریکارێ نوژداری بۆ ماوەیێ ١٠ رۆژان دائێخین پشتی زێدەتر ژ رێنمایان کارێ فروتنا دەرمانان دکر ئەڤ چەندە دبیتە سەرپێچی لەورا ھاتە دائێخستن، ھەر دیسان لیژنا لم مولەتا ٤٥ رۆژان دا ٩ نوشدارێن ژن کو ئێدی ب چو رەنگان راکێچا چارەسەریێ ب دەستی بھێتە نڤیسین و پێدڤیە ب کومپیوتەری بھێتە نڤیسین.

ناڤھاتی زێدەتر گوت ھەر دیسان مە ١٦ نوشدارێن نەشتەرگەریێن مەزن ئاگەھدار کرینە نابیت ب چو رەنگان د ئێک دەمی دا چارەسەریا دو نەخوشان بھێتە کرن ئەڤە دچیتە چارچوڤێ دژی رێنمایێن ئەنجوومەنێ وەزیران).

ئەڤرۆ نیوز ، عەلی حاجی :

جوتیار خدر رێڤەبەرێ کار و راھێنانێن پیشەیی ل زاخۆ بۆ روژناما ئەڤرۆ دیار کر بریار ژلایێ رێڤەبەریا گشتی یا کار و دەستەبەرکرنا کومەلایەتی  ھاتیە دان پشکا خزمەتێن پشتی فروتنێ بھێتە ڤەکرن ژ بەر کو خەلکێ زاخۆ بۆ  برێڤەبرنا مامەلەێن خوە قەستا باژێرێ دھوکێ دکرن .

ناڤھاتی ئەو چەندە ژی دیار کر کو ڤەکرنا ڤێ پشکێ ل رێڤەبەریا مە زور یا گرنگ بوو ژ بەر کو ئەو کەسێن خودان کار رادبن ب سەخبێریکرنا ئامیرەێن ژکارکەڤتی دروست دکەن ئێدی دشێن ل رێڤەبەریا مە مولەتا کاری ل دەڤ مە بدەستخوەڤە بینن ژبەر کو بەری نوکە ھەر کەسەکێ ڤیابا جھەکێ ب ڤی رەنگی ڤەکەت پێدڤی بوو قەستا باژێرێ دھوکێ کربا بو برێڤەبرنا مامەلەیێن خوە و نێزیکی سێ ھەیڤایە ئەو پشکە ل رێڤەبەریا مە دەست ب برێڤەبرنا کارێن وەلاتیان کریە).

ئەڤرۆ نیوز، عەلی حاجی :

ب مەرەما باشتر کرنا کەرتێ کشتوکالی رێڤەبەریا چاندنێ ل زاخۆ رابوو ب بەلاڤکرنا چەند کەرەستەێن کشتوکالی ل سەر جوتیار و مێشڤانێن دەڤەرا زاخۆ  کو ٢٥٠ جوتیاران سودمەند بوون ژ وان ھاریکاریان .

ئەحمەد سامی رێڤەبەرێ چاندنێ ل زاخۆ بۆ روژناما ئەڤرۆ دیار کر ل قوناغا ئێکێ دا ئەم رابووین ب بەلاڤکرنا ٤٩٣ سندوقان ل سەر ٢٢٠ مێشڤانێن سەر ب سێ ناحێن قەزا زاخۆ ڤە، ئەڤ سندوقە ل وەلاتێ تورکیا ھاتینە دروست کرن و کوالێتیا وان یا بلندە و بھایێ ھەر سندوقەکێ بتنێ ٣٦ ھزار دینارن و ژ بەر کو سندوقێن ب ڤی کوالێتیێ ل ناڤ بازاری دا نینن و ب شێوەیەکێ باش ھاتینە دروست کرن، مەرەما مە ژبەلاڤکرنا ڤان سندوقان ژ بەر وێ چەندێ یە دا کو بەرھەمیێن مێشڤانان زێدەتر ببیت ل دەڤەرا زاخۆ .

ناڤھاتی ئەو چەندە ژی گوت: (ھەر ل بەردەوامیا پشتەڤانیکرنا مە دا بو جوتیارێن دەڤەرێ دقوناغا ئێکێ دا مە نایلونێ خانیێن پلاستیکی ل سەر ٣٠ جوتیارێن دەڤەرێ بەلاڤکر و داشکاندن ٦٠% بو وان جوتیاران ھاتبوو کرن).

ئەڤرۆ نیوز، نەوزاد ھلۆری:

ب مەرەما خزمەتکرنا دەڤەرا دێرەلووکێ گرۆپەکێ خوبەخش دێ رابیت ب دانانا تابلویەکێ وەکو ھێمایەک بۆ ناحیا دێرەلوک بریارە ل بەری نەوروزی بھێتەدانان .

سەمیع نێروەی ئێک ژ رێکخەرێن چالاکیێ بۆ ئەڤرۆ نیوز گۆت: (ھەتا نوکە چ رەمز و ھێما ل دێرەلوک نەھاتینە دانان، ژ بەر ڤێ مە وەکو گرۆپێ خوبەخش ل دێرەلوک ب ھەڤکاری ل گەل دام و دەزگەھێن میری رابووینە ب چێکرنا تابلویەکێ وەکو ھێما بۆ دێرەلووک).

زێدەتر گۆت: (تابلو رامانا ڤیانێ بۆ دێرەلوک ددەت و دێ ب I❤ Dereluk ھێتە نڤیسان،  دێ لسەر پرا ناڤەراستا دێرەلوک ھێتەدانان کو دکەڤیتە سەر رووبارێ زێ مەزن، جھەکێ گرنگ و ستراتیجیە و دیمەن و رەوشەکا جوان ددەتە دەڤەرێ و سەرنجا گەشتیاران راکێشیت).