ئەڤرۆ نیوز، عەلی حاجی :

بۆ ئێکەم جار سەنتەرەکێ جێندەرناسیێ ھاتە ڤە کرن و کو ئەڤ سەنتەرە دێ تایبەت بو یەکسان کرنا جێندەری دناڤ جڤاکی دا.

نازدار عارف بەرپرسا سەنتەرێ جێندەرناسی بو ئەڤرۆ نیوز ئاشکەرا کر ئەڤ سەنتەرە دناڤ ھەمی زانکویێن کوردستانێ دا ھەیە لەورا مە دخاست ئەڤ سەنتەرە دناڤ زانکویا زاخۆ ژی دا بھێتە ڤەکرن و ئەڤ پێنگاڤە ب ھەڤکاری دگەل سەروکێ زانکویا زاخۆ ھاتە ھاڤێژتن و دگەل ژی دا مە پێشانگەھەکا شێوەکاری بو ٣ ژنێن شێوەکار دناڤ زانکویێ دا ڤەکر ، مەرەما مە یا سەرەکی ژی ئەوە وەکھەڤیا جێندەری دناڤ جڤاکی دا پەیدا بکەین و ھەر دیسان بابەتێن گرنگ دناڤ جڤاکی دا وەکو توندوتیژی و رێژەیا زور یا بەردانێ و دانا شیا یا کچێ ب زوری و زێدەباری چەندین بابەتێن دیێن جڤاکی ب رەنگەکی ئەکادیمی بھێنە خواندن و ڤەکولین ل سەر بھێنە ئەنجام دان و دگەل دا ژی رێین چارەسەریێ بۆ بھێنە دیتن ب رەنگەکێ زانستی.
.

ئەڤرۆ نیوز، نەوزاد ھلۆری:

نێزیکێ حەفتیەکێ یە ژ ئەگەرێ بارینا بارانان و شێلی بوونا رووبارێ زێ ل سنوورێ ناحیا دێرھالووک ھاتیە سنوردارکرن و وەکو پێدڤی بۆ وەلاتیان ناھێتەدان، وەلاتی گازندا دکەن ب تایبەتی نوکە بەر ب ھەیڤا رەمەزانا پیروز چین.

بارین حەسەن، وەلاتیەکا ناحیا دێرەلووکێ یە بۆ ئەڤرۆ نیوز گۆت: ئەڤە پتری شەش رۆژانە ئاڤا مە ل دێرەلووکێ ناھێت و ئەگەر بھێت ژی زۆر کێمە، ئەم ماینە بێ ئاڤ و ھەر جار ب رەنگەکێ ئاڤێ بخوە ل جھەکێ دئینین، ھەتا نوکە ژی ئەم نوزانین کا بوچی ئاڤ نینە.

زێدەتر گۆت: دێرەلووک یا دناڤبەرا دو رووباران دا و پێشتر ژی ئاڤەکا زور باش ھەبوو، لێ پشتی ئاڤ خستیە سەر پرۆژێ ستراتیجی ب تایبەتی ل روژانێن باران د راوستیت، بەشەک ژ خەلکی بخوە ئاڤێ ب تانکەران دکرن، لەورا گرنگە کو لایەنێن شولەژێ کار ل سەر دروستکرنا ئاڤێ بکەن ب تایبەتی نوکە کو ھەیڤا رەمەزانا پیروز ھات و زێدەتر پێدڤی ب ئاڤێ نە.

ژ لایێ خوە ڤە مەحمود تەھا، ژ راگەھاندنا ناحیا دێرالووک بۆ ئەڤرۆ نیوز گۆت: ھەر دەمێ ئاستێ ئاڤا رووبارێ زێ بلند بوو ئاڤ شێلی دبیت، شێلی بوونا ئاڤێ دبیتە ئەگەرێ پیسبوونا غەتاسێن ئاڤێ، ژبەرڤێ د روژانێن باران و شێلیبوونا ئاڤا روباری ئاڤ کێمتر ژ روژێن دی دھێتە بەردان.

زێدەتر گۆت: ناحیا دێرالووک ب رێیا قائمقامیا ئامێدیێ داخوازکریە کو ھندەک غەتاسێن باشتر بھێنە دابینکرن داکو ئاڤ ب شێوەیەکێ بەردەوام بھێتەدان.