بریتانیا فـرۆشتنا چەکـی بۆ ئسرائیلـێ راگـرت
وەزارەتا بەرگریێ یا بریتانیا د داخۆیانیەکێ دا راگەهاند بەری نها هندەک کۆمپانیێن بریتانیا چەک دفرۆشتنە ئسرائیلێ، لێ ئەو وەسا دبینن کو ئسرائیل چەکێن بریتانیا ل دژی خەلکێ سڤیل یێ غەزە بکار دئینیت و ژ بەر ڤێ یەکێ ژی وەکو بریتانیا وان بریار داینە ئێدی چو چەکان نەدەنە ئسرائیلێ.
وەزارەتا بەرگریێ یا بریتانیا ئەو یەک ژی دیار کر، ئەو پشتەڤانیێ ل راگەهاندنا ئاگربەستێ ل غەزە دکەن و دخوازن ئسرائیل و حەماس هەموو پرسێن هەی د ناڤبەرا خوە دا چارەسەر بکەن، لێ مخابن نها رەوشا غەزە گەلەک خرابە و رۆژان وەلاتیێن سڤیل ل غەزە دبنە قوربانی، ژ بەر ڤێ یەکێ ژی بریتانیا ب چو رەنگەکێ پشتەڤانیێ ل شەڕێ نها ناکەت و د چارچۆڤێ سیاسەتا دژبەریا شەڕی دا ژی بریتانیا بریار دایە کو ب چو رەنگەکی چەکی نوو و گران نەدەتە ئسرائیلێ.
ل ئالیێ دی بنیامین نەتانیاهۆ سەرۆک وەزیرێن ئسرائیلێ ژی راگەهاند بریارا بریتانیا شەرمەکا مەزنە بۆ وی وەلاتی و د خزمەتا بەرژەوەندیێن بریتانیا دا نینە.
