دهۆك و زاخۆ نەشیان سەركەفتنێ بینن
هەردو یانەیێن پارێزگەهێ تیما فوتبۆلا یانەیا دهۆك و یانەیا زاخۆ نە شیان سەركەفتنێ د كلاسیكۆیێن كوردستانی بەرانبەر هەولێر و نەورۆز بینن، د هەڤڕكیێن واندا ئەوا ژ چارچووڤەیێ گەڕا دویێ یا خولا ستێرێن ئیراقێ دناڤ ئەرد و جەماوەرێن وێ دا هاتینە ئەنجامدان، بۆ زانین ل سەر راسپاردا فەرمانە مەنسۆر بارزانی تكێتێكن هەردو یاریێن دهۆك دگەل هەولێر و زاخۆ دگەل نەورۆز بێ بەرانبەر هاتنە بەلاڤكرن و وەكو دیاری بۆ پشتەڤانێن یانەیێن كوردستانێ هاتنە دانان.
دهۆكێ بەردەوامی دا خوسارەتییان
تیما یانەیا دهۆك بەردەوامە ل سەر ئەنجامێن خوە یێن خراب پشتی د یارییا دویێ دا و دناڤ ئەرد و جەماوەرێ خوە دا نەشیایی سەركەفتنێ بینت و پشتەڤانێن وێ ب تۆرەیی ژ یاریگەهێ چوون، دەمێ بەرانبەر یانەیا هەولێر ب گۆلەكێ بێ بەرانبەر تووشی خوسارەتیێ بوو، د یارییا واندا ئەوا ل شەڤا ئەینییا بۆری ب بەرهەڤبوونا فەرماندە مەنسۆر بارزانی ل یاریگەهێ ئامادەبووی، گۆلا هەولێرێ ژلایێ پیشەكارێ وێ یێ بەرازیلی هیلیۆ مۆنتێرۆ ڤە هاتە تۆماركرن، هەرچەندە یاریزانێن دهۆكێ گەلەك بزاڤكرن بۆ راستڤەكرنا ئەنجامێ یاریێ و خوە نێزیكی گۆلا هەولێر كرن لێ هێلا بەرەڤانییا تیما مێڤان نە هێلا چو ژ بزاڤەكا دهۆكییان ببیتە گۆل، هەتا فیركا دادڤانێ یاریێ ب سەركەفتنا هەولێرێ د كلاسیكۆیا نەهێ دا بینن، بەرانبەر 10 سەركەفتنان بۆ دهۆكێ و دەهـ وەكهەڤی هاتینە تۆماركرن.
د كۆنگرەیێ رۆژنامەڤانی دا
هارون ئەحمەد ستێرێ یانەیا دهۆك گۆت: هەرچەندە مە ئاستەكێ گەلەك باش نیشان دا و گەلەك گڤاشتن ل سەر تیما مێڤان كر، لێ ئەڤە تەپا پێی یە و تایبەت یاریێن كلاسیكۆیێ هەردەم ب زەحمەت و ب هێزن، دانپێدانێ ب خەلەتیێن خوە دكەین، ئارمانجا مە ب تنێ سەركەفتن بوو و كەیفخوەشیا جەماوەری بوو، لێ ئەم نە گەهشتینە ئەڤێ ئارمانجێ لەوما لێبۆرینێ ژ جەماوەرێ یانەیێ دخوازین ب ئانەهییا خودێ بۆ یاریێن بهێت دێ قەرەبوو كەین.
ژلایێ خوەڤە شێركۆ كەریم هێرشبەرێ یانەیا هەولێرێ گۆت: دەستپێكێ پیرۆزباهییا تیما خوە دكەم ب سەركەفتنەكا گرنگ و بەختەكێ باشتر بۆ تیما دهۆكێ دكەم مە یارییەكا جوان و ئاستەكێ بلند و تەكتیكی نیشان دا، ئەم شیایین سەركەفتنێ ل سەر تیمەكا ب هێز بینن ب پلانێن راهێنەرێ خوە ئەوا بۆ ماوەیێ حەفتیەكە كار ل سەر كێماسیێن تیما دهۆكێ دكەین، ئەردێ یاریگەهێ كارتیكرن ل سەر ئاستێ مە كر لێ دووماهیێ دا ئەم شیان سێ خالێن گرنگ ژ دهۆكێ وەربگرین.
د خولەكا 90+8 دا وەكهەڤی ئینا
ژلایێ خوەڤە د كلاسیكۆیا دویێ یا كوردستانی دا تیما یانەیا زاخۆ د ناڤ ئەرد و جەماوەرێ خوە دا دگەل مێڤانا خوە یانەیا نەورۆز ب گۆلەكێ وەكهەڤبوو، د یارییا واندا ئەوا ل پێنچ شەمبییا بۆری ل یاریگەها زاخۆ یا نێڤدەولەتی هاتییە كرن، گۆلا ئێكێ یا یانەیا نەورۆز د خولەكێ حەفتێ یا دەستپێكرنا یاریێ ژلایێ محەمەد مەحمود هاتبوو تۆماركرن، د ماوەیێ یاریێ دا تیما زاخۆ بزاڤێن مەزن كرن و كۆمەكا باش یا دەلیڤەیان ژ دەستدا، دەرئەنجامێ ئەوان گڤاشتنا دادڤانێ یاریێ پەنەلتیەك بۆ تیما زاخۆ هژمارت ئەوا د خولەكا 90+8 ژلایێ كاپتنێ تیمێ ئەمجەد عتوان ڤە هاتییە تۆماركرن، ئەنجامێ ڤێ یاریێ دبیتە یێ ئێكێ یێ وەكهەڤیێ دناڤبەرا هەردو تیمان د دیرۆكا هەردو یانەیان دا و یارییا حەفتێ یە، ژ سێ سەركەفتن بۆ زاخۆ و سێ بۆ نەورۆزێ و ئێك وەكهەڤی.
د كۆنگرەیێ رۆژنامەڤانی دا چ هاتە گۆتن
راهێنەرێ یانەیا نەورۆز چۆڤانی ڤیێرا گۆت: یاری ب ئاستەكێ بلند بڕێڤە دچوو هەر ژدەستپێكێ هەتا دووماهییا وێ، ب شێوەیێ تەكتیكی ئەم باشتر بووین و مە گۆلەك هەر ژ دەستپێكی ئینابوو، لێ گڤاشتنا جەماوەری ل سەر یاریزانی و هێرشێن بەردەوام بوو ئەگەر پەنەلتییە بهێتە هژمارتن و گۆلا وەكهەڤیێ بهێتە كرن، مە دو خال ژ دەستدان لێ ئەڤە تەپاپێی یە.
ژلایێ خوەڤە راهێنەرێ زاخۆ یێ قەتەری تەلال ئەلبلۆشی گۆت: سەرباری وەكهەڤیێ ئەز ژ ئاستێ یاریزانێ خوە رازی مە یارییەكا جوان و بهێز بوو، مە گەلەك دەلیڤە ژ دەستدان و گۆلێن مسۆگەر ژی ژ دەستدان ئەگەر ژی لەز د شۆتكرنێ دا، تیما نەورۆز هەڤڕكیەكا بهێز بوو، لێ وەكهەڤی باشترە ژ خوسارەتیێ، بۆ یاریێن بهێت دێ بزاڤێن كەین ئەوان كێماسیان چارەسەربكەن و ئەنجامان باشتر لێبكەین.
ژ ئەنجامێن یاریێن دی، شورتە 2-2 ئەلكەرمە، ئەلجەوییە 2-1 مینا، ئەلقاسم چنە-چنە كارەبا، كەربەلا 1-1 نەجەف، زەورا 2-1 ئەلكەرخ، ئەلكەرمە 0-2 ئەلنەفت، دیالا چنە-6 شورتە.
