ل هەیڤا ئادارێ وێڤە دێ زێدەیی چیتە سەر سزایێ هاتن و چوونێ
هەولێر، قائید میرۆ
بەرپرسەكێ پۆلیسێن هاتن و چوونێ ئاشكراكر، بڕیارا كێمكرنا پارەیێ سزایێن هاتن و چوونێ د بەرژەوەندیا وەلاتیاندایە و دبێژیت: ئەو بڕیار ب شاشی گەهشتیە وەلاتیان و هەتا دووماهیا هەیڤا شوباتێ ئەگەر پارەیێ سزایێ هاتن و چوونێ نەهێتە دان ژی ب هیچ شێوەیەكی زێدەنابیت، ب تنێ پشتی هەیڤا شوباتێ ئەگەر د دەمێ ئێك هەیڤدا پارەیێ سزای نەهێتەدان دێ زێدەبیت، ئەڤە ژی ب تنێ بۆ سزایێن نوویە نەك یێن بەرێ.
موقەدم فازل حاجی، پەیڤدارێ هاتن و چوونا هەولێرێ بۆ رۆژناما ئەڤرۆ دیار كر «بڕیارا ئازاكرنا وەلاتیان ل رێژەیەكا پارەیێ سزایێن هاتن وچوونێ بۆ وەزیرێ ناڤخۆ هاتیە بلندكرن و پشتی پێداچوونێ بۆ بەرچاڤگرتنا رەوشا ئابووری یا وەلاتیان، بڕیار هاتیەدان رێژەیەك ژ سەدێ وەلاتی بهێنە ئازاكرن ل پارەیێ سزایێ هاتن و چوونێ، بڕیار 28ی تەباخێ دەرچوویە و هەتا 28ی هەیڤا شوباتا سالا داهاتی دێ كار پێ بهێتەكرن.
زێدەتر دبێژیت: ئەگەر بهێت و وەلاتیەكی د دەمێ نوكە دا ئێك ملیۆن دینار سزایێن هاتن و چوونێ ل سەر هەبن، هەتا ژڤانێ دیاركری واتە هەتا دووماهیا هەیڤا شوباتێ سەرەدانا فەرمانگەهێن هاتن و چوونێ بكەت، ل جهێ ئێك ملیۆن دینار، ب تنێ دێ 800 هزار هێنە وەرگرتن و ب 200 هزار دیناران دێ هێتە ئازاكرن، بەرۆڤاژی ئەگەر وەلاتیەكی ئێك ملیۆن سزایێ هاتن و چوونێ لسەر هەبیت و د دەمێ نوكەدا شیانێن دانا ئەڤی پارەی نەبن ب چو شێوەیەكی لسەر ناهێتە زێدەكرن و بڕیارا وەزارەتا نافخۆ بۆ بەرژەوەندیا وەلاتیێن هەرێما كوردستانێ هاتیە دەركرن، بەلێ مخابن رەنگە ب شاشی گەهشتبیتە وەلاتیان.
موقەدم فازل حاجی ئاماژە كر «ل گۆرەی بڕیارا وەزارەتا نافخۆ، هەر كەسەكێ هەتا 28ی شوباتێ پارەیێ سزایێن هاتن و چوونێ نەدەتە حوكمەتێ، ئەڤە دێ هەر وەكی خوە لسەر مینیت و زێدە نابیت، بەلێ ئەگەر پشتی ب دووماهی هاتنا بڕیارێ شۆفێرەك سەرپێچیێ بكەت یان هەر پارەیەكێ وەكی سزا بكەڤیتە سەر و د دەمێ ئێك هەیڤدا پێگیر نەبیت ب دانا سزایێ هاتن و چوونێ، ئەڤە دێ بیتە دو بەرامبەر، بەلێ سزایێن بەرێ زێدە نابن، ئەڤە ژی بۆ پێگیریا وەلاتیانە بۆ دانا سزایێن هاتن و چوونێ و هەر وەلاتیەكێ قەردارێ هاتن و چوونێ بیت دشێت مفاداربیت ژ بڕیارا حوكمەتا هەرێما كوردستانێ ب رێژەیا 20%ێ هاتیە كێمكرن هەتا ژڤانێ دیاركری.
