ئیڤۆن داود: مافێ مهیه چار گۆشهیا زێڕین ل دهۆكێ بیت
تاهر رێکانی:
پشتی ههڤركیێن خولا ئیراقێ یا ڤۆلیبولێ لسهر ئاستێ كچان ب دووماهی هاتین، ههر چوار یانهیێن سهنحاریب ههلگرا ناسناڤی، ئهكاد، قهرهقووش و ئهڤرۆدێت دهربازبووینه چوار گۆشهیا زێرین، چهند گازنده و بۆچوونێن جۆدا ژلایێ پشكدارانڤه ههبوون، لدۆر ڤێ چهندێ مه ڤیا راپۆرتهكێ بهرههڤبكهین :
ل دهستپێكێ دورین رۆمێل یاریزانا ههلبژارتیێ ئیراقێ و یانهیا سهنحاریب گۆت: مه هزر نهدكر دێ ئاستێ ڤێ خۆلێ یێ لاواز بیت، ههر چهنده تارادهیەکی ئاستێ كۆما مە یێ باش بوو، لێ كۆما دویێ تنێ یانهیا ئهكاد یا بهێزبوو، لهوا دشێم بێژم مه چ مفا ژ ڤان یاریان نهدیت، پێنهڤێت ههر یاریهكا بهێته كرن یاریزان مفا ژێ دبینن ئهو خالێن لاواز یێن لدهف یاریزانی ههین دێ بۆ یاریێن بهێز و چارهنڤیسی چارهسهر دكهن، سهركهفتنێن مه ههمی ب ساناهی بوون، ئهم گهلهك كهیفخۆشین كو دهربازبووین بهیڤینە ناسناڤێ خۆلێ ب دهستخۆڤهئینین و ناڤێ پارێزگهها دهۆكێ بلند ڕاگرین.
ژلایهكێ دووڤه ئیڤۆن داوود رهبهن هاریكارا راهێنهرێ یانهیا سهنحاریب گۆت: ئهم ههمی دزانین ئاستێ تیمێن خولێ یێ دیاره، تنێ چهند یانهیێن ههرێمێ ههنه گرنگیێ د دهنه یاریان تایبهتی ههرسێ یانهیێن سهنحاریب، ئهكاد و قهرهقووش، زێدهباری ههردو یانهیێن ئهڤرۆێت و ئهمانهت بهغدا كو ئاستێ وان یێ ناڤنجییه، لهوڕا یا لسهر فدراسیۆنا ڤۆلیبولا ئیراقێ ئهوه گرنگیێ ب یاریێن كچان بدهن، ئهگهر بڤی شێوهی بیت ئهوا مه د ڤاڤارتناندا دیتی گهلهكا لاواز بوو، هندهك تیم پێدڤیه خۆ ماندیبكهن داكو خۆشییهك و ههڤركییهك د خولێدا پهیدا بیت، ئهڤه دو ساله لدووف ئێك یاریێن دووماهیێ ناهینه یاریزگهها دهۆكێ لهوڕا ئهم دخازین ئهڤه لبهر چاڤ بهێته وهرگرتن چونكه ئهم ههلگرێن ناسناڤی نه و بۆمه دكهڤیت.
لدووماهیێ مهناف خهلیل ئهندامێ فدراسیۆنا ڤۆلیبولا ئیراقێ گۆت: ئهڤ قارهمانییه ب سهركهفتیانه بێی ئاریشهك و كێماسی ب دووماهیی هات، ژ ههموو لایانڤه گهلهك یا رێكوپێك بوو، سۆپاسیهكا بێ سنۆر بۆ سهرۆكێ یانهیا سهنحاریب داود رهبهن دکەین گهلهكێ هاریكاربوو دگهل ههموو ئهندام و یانهیێن پشكدار و بۆ مه دیاربوو كو پارێزگهها دهۆكێ و هۆلا یانهیا سهنحاریب یا ههژیه قارهمانیێن نێڤدهولهتی مێڤان بكهت، دهربارهی ڤهگۆهاستنا یاریێن قۆناغا دووماهیێ كو دێ ل سلێمانیێ هێنه كرن و ل وهرزێ بۆری ل ههولێرێ هاتبوونه كرن، سهرهرای هندێ كو یانهیا سهنحاریب ههلگرا ناسناڤی یه، لێ نههاته دهستنیشانكرن بۆ مێڤانداریا یاریێن چوارگۆشهیا زێرین دڤی دهربارهی دا ئهندامێ ئێكهتیێ دیاركر و گۆت، هێلا سور لسهر یانهیا سهنحاریب نینە كو نههاتیه دهستنیشانكرن، بهلكو پارێزگهها دهۆكێ دوورترین خاله د ئیراقێ دا، لهورا سلێمانیێ هاته دهستنیشانكرن.
