ئەرێ سۆشیال میدیا دێ نفشێ نوو بەر ب كیڤە دبەت؟
كاروان كێستەی
د چەرخێ تەكنۆلۆژیا و سۆشیال میدیایێ دا تێگەهێ ناڤداری یان بەرنیاسبوونێ گوهۆرینەكا ڕێژەیی و مەترسیدار ب خۆڤە دیتییە ئەگەر د دوهی یا نێزیك دا ناڤداری بەرهەمێ زانست و ئەدەب و هونەر یان كارەكێ مرۆڤایەتی یێ مەزن با ئەڤرۆ د جیهانا نووی دا هەر تشت گۆهرینە و ئەوا ئەم دبینین دیاردەكا سەیر و دلگرانكەرە كو ئەو ژی سەرهەلدان و مەزنبوونا مرۆڤێن بێ ناڤەروكە واتە مرۆڤێن كو چ سەربۆڕێن ژیانێ و چ بهایێن جڤاكی و چ ڕەوشەنبیری ل دەف نینن و ب تنێ ژبەر دیمەنەكێ سەیر یان ڕەفتارەكا كێم ئاست یان پێشكێشكرنا تشتێن بێ مانا د شەڤ و ڕۆژەكێ دا دبنە خۆدان سەدان هزار فۆلۆوەرس و دبنە بەرنیاسێن سۆشیال میدیایێ و یا كو پتر مرۆڤی دلگران دكەت ئەوە كو ئەڤ كەسە نەك تنێ بەلاڤبووینە، بەلكو ئەڤرۆكە د ناڤ جڤاكی دا وەسا خۆ ددەنە نیاسین كو ئەون یێن گوهۆرینێ دكەن و ئەو ب خۆ چ پەیامێن ساخلەم بۆ جڤاكی نینن لێ د هەمان دەم دا خۆ ددانن خۆدان پێشنیار و دەستێوەردانێ د هەمی بابەتێن جڤاكی و ئاینی و زانستی دا دكەن و ئەڤ بێ ڕەوشەنبیری یا وان هێدی هێدی ل سەر جڤاكی دهێتە سەپاندن وەك كو ئەڤە ستانداردێ نوو یێ ژیانێ بیت و ئەڤە مەترسیدارترین پسیارە كو پێدڤییە هەر دایك و بابەك و هەر كەسەكێ خەمخورێ ڤی وەلاتی ژ خۆ بكەت كا ئایا چارەنڤیس و پاشەڕۆژا نەڤیێن مە دێ كەڤیتە د دەستێ ڤان بێ پەیامان دا چونكی مەترسی ل ڤێرێ یە كو زارۆكێن مە د تەمەنەكێ وەسادانە كو پێدڤی ب نموونەیێن بلند هەیە بۆ ئاڤاكرنا كەسایەتییا خۆ و دەما د شاشەیێن ئای پاد یان تێلەفوونێن خۆدا ناڤداری و پارەی و رێزگرتنێ ب تنێ بۆ ڤان مرۆڤا دبینن دێ هزر كەن كو ڕێكا سەركەفتنێ د ژیانێ دا نە خواندنە و نە زانستە و نە ژی ڕەوشتە و دێ هزر كەن كو پێدڤی ناكەت مرۆڤ یێ ڕەوشەنبیر بیت دا یێ سەركەفتی بیت و ئەڤە ژی مەزنترین گەفە ل سەر ژناڤچوونا ناسنامەیا چاند و فەرهەنگا جیلێ داهاتی
ڕاستە ڕەوش یا نەخۆشە لێ ب چ جۆران ناهێتە واتا هندێ كو ئەم دەستا داهێلین و رادەستی ڤێ پێلا ب ترس بببین و چارەسەری نە یا مەحالە بەلكو پێدڤی ب هۆشیاریەكا كۆمەلایەتی هەیە و ل ڤێرێ مەزنترین چەك د دەستێن مە دا تەلەفۆنێن مەنە بهێنە بكارئینان چونكی ئەڤ كەسە ب ڤیۆ و فۆلۆوەرێن مە دژین و ئەگەر مە بریار دا ل سەر ئاستێ تاكەكەسی و جڤاكی بایكۆتا هەر ناڤدارەكێ بێ پەیام بكەین و وان بێدەنگ بكەین ئەو ب خۆ دێ كێم بن و د هەمان دەم دا ئەركێ دایك و بابان یێ ئێكێ یە كو ل مال د گەل زارۆكێن خۆ باخڤن و تێبگەهینن كو ئەوا د سۆشیال میدیایێ دا دهێتە دیتن دیمەنەكێ دەستكردە و ژیانا ڕاستەقینە نینە و پێدڤییە ئەم پشتەڤانیا مرۆڤێن خۆدان شیان بكەین، چونكی وەك چاوا سۆشیال میدیا دشێت تشتێ خراب مەزن كەت دشێت تشتێ باش ژی مەزن كەت و ئەركێ مەیە ئەگەر مە كەسەكێ ڕەوشەنبیر یان پێشكێشكەرێ ناڤەڕۆكەكا پاقژ دیت پشتەڤانیێ لێ بكەین دا كو ئەو ببیتە دەنگێ سەرەكی
د دوماهیا هەمیا دا سۆشیال میدیا جیهانەكا ئاوێنەیی یە و تشتێ ئەم تێدا دبینین پتریا جاران ڕەنگڤەدانە و گرنگیدانا مەیە و ئەگەر مە پاشەڕۆژا جیلێ نووی دڤێت دەم هاتییە ئەم بهایێ ڕاستەقینە بۆ زانست و ڕەوشەنبیریێ ب دانین و ڕێكێ نەدەین مرۆڤێن بێ ناڤەروك ببنە خودان بڕیار د ژیانا زارۆكێن مە دا چونكی پاشەڕۆژ یا وی كەسی یە یێ كو د سەری دا تشتەك هەی نەك یێ كو د شاشەیێ دا یێ دەنگە دەنگێ دكەت.
