ئەم پشتەڤانێن یانەیێن خۆینە نەك یاریزانان
نەهلا ئەحمەد
وەرزێ ڤەگوهاستنا یاریزانان د ناڤبەرا یانەیێن خولا ستێرێن ئیراقێ دا دەستپێكریە، هەر ژ ڕاوەستیانا خولا فوتبولێ كارگێریێن یانەیان لێگەریان ل سەر یاریزانێن ئاست بلند دكەن، هەتا نوكە هندەك یانەیان تا ڕادەیەكێ باش پێكهاتیێ خوە گەهاندیە قووناغێن دووماهیێ، هندەك ژ یاریزانان ژی ماف هەیە ژ یانەیێ بچن هندەكان ژی ماف نینە بچن تاكۆ گرێبەستێن وان دگەل یانەیێن وان ب دووماهی نەهێن، یا من دڤێت بێژم و دیار بكەم ئەرێ چوونا یاریزانان كارتێكرنێ ل یانەیان و پشتەڤانێن یانەیان دكەن؟ بێ گۆمان بەلێ گەلەك جارا چوونا یاریزانێن خۆدان شیان و ئەو یاریزانێن پشتەڤان حەز ژ یاری و كەسایەتیا وی دكەن كارتێكرنێ ل سەر یانەیان دكەن، بۆ نموونە چوونا یاریزانێ جیهانی لیونێل میسی كو تا نوكە ژی كارتێكرنا چوونا وی ل سەر یانەیا بەرشەلونا هەیە و پشتەڤانێن یانەیا ناڤهاتی ب هیڤی نە كو یاریزانێ ناڤهاتی رۆژەكێ بزڤریتەڤە د ناڤ یانەیێ دا ئەگەر هات و ژ بەر ژیێ خو نەشێت یارییا فوتبولێ بكەت هەر چنەبیت وەكۆ كارگێرەك د ناڤ یانەیێ دا كار بكەت، لێ یا ژ هەمیان گرنگتر ئەوە چوونا هیچ یاریزانەكی ناڤێ یانەیێ ناهێتە كێمكرن و یانە هەر دمینیت، ڕاستە یاریزان نامینیت بەلێ یانە دمینیت و گەلەك جارا ئەنجامێن باشتر بدەستڤە دهێن لێ هندەك جاران ژی چوونا وان كارتێكرنێ ل ئەنجامێن یانەیان ژی دكەت كۆ ئەنجامێن نەباش بدەستخوڤە دئینیت، لێ ب بۆچوونا من وەكۆ پشتەڤانەكا وەرزشی بلا ئەم چوونا یاریزانان ب دەلیڤە نەبینین كو هەر یاریزانەكێ ژ یانەیا ئەم حەز ژێ بكەین دەما كۆ هەڤبەستا خۆ نوو نەكەت ئاخفتنێت كرێت بێژینێ و گازندەیان ژێ بكەین ب بۆچوونا من ئەڤە خەلەتیەكا مەزنە ژ بەركۆ مە هەق نینە مایێ خۆ د ژیانا یاریزانی یا تایبەت دا بكەین مەرەما من ئەوە ئەرێ ئەو هەڤبەستا یانە پێكێش دكەت بدلێ یاریزانیە؟ ئەرێ سۆزێن دگەل یاریزانی دهێنە گوتن دهێنە بجهئینان؟ ئەرێ ئەم وەكۆ پشتەڤان خۆ بدانینە جهێ وان یاریزانان دێ ڕازی بین ل سەر مەرجێن یانە پێشكێشی مەدكەن؟ بێ گومان پترییا مە رازی نابن ئەڤچا ب بۆچوونا من بلا ئەم هند هەقی نەدەینە خوە مایتێكرنێ دژیانا یاریزانی دا نەكەین بلا ئەم بزانین ژ بەر چ یاریزان بریارا چوونا خۆ ژ یانەیان ددەن، بلا ئەم رێزێ ل خزمەت و چوونا یاریزانی بگرین ئەم ب باشترین شێوە خاترا خۆە ژ یاریزانی بخازین ب رێورەسمەكێ ژ هەژی خزمەتا ئەو بۆ یانەیێن مە دكەن، ڕاستە یاریزان دچن و نامینن لێ ناڤێ یانەیێن مە هەر مینن و دبیت مەزنتر ژی لێ بهێن ئەڤچا بلا ئەم پشتەڤان ژ چوونا چ یاریزانان ب خەم نەكەڤین ژ بەركۆ یاریزان دهێن و دچن لێ یانەیێن مە ددلێ دا دمینن.
