ئەڤا ل رۆژهەلاتا ناڤین مە دیتی و دبینین دڤێت بكەینە سەربۆڕ
ڕەمزی سیسۆ
دەما ئەم سەحدكەینە رۆژهەلاتا ناڤین، ئەم وان وەك مریشكێن بیلادی دبینن بێ خودان ماین. و بەهارا عەرەبی هات، وان گۆت ئازادی دێ هێت. لێ چ هات؟ لیبیا هەرفتی، سوریا بوو ئاخ، یەمەن نەما، میسر زڤڕی بۆ دەستێ عەسكەری. ئەو دەستهەلاتێن عەرەبی یێن هاتینە رووخاندن، جێگرەكێ وان نەبوو. خەلك هاتە كوشتن و ئاوارە بوو، لێ ئازادی نەهات.
خەلكێ مەغریبێ، تونس، جەزائیر، هەمی ل سەر بەحرا سپی د خەندقین بۆ چوونا ئەورۆپا. بێژن چما؟ ژبەركو دەستهەلاتێن وان پارە و سامان دزیت و زولمێ ل خەلكێ خوە دكەن. هەردەما پارە و دەستهەلات بكەڤیتە دەستێ عەرەبان، ئێكسەر زولمێ ل خەلكێ خوە و ل كوردا دكەن و نۆكە سەح بكەن، شەڕێ فەلسگینێ هاتە ژبیر كرن. كەس بەحس ناكەت. ژبەرچی؟ ژبەركو فوكسا جیهانێ ئێخستنە سەر شەڕێ ئیران و ئیسرائیلێ. ئیران هاتە لێدان و ئەو ژی لێددەت. مەبەست ئەوە خەلك شەڕێ غەززێ ژبیر بكەن. غەززە بوو گۆڕستان و عەرەب و جیهان بێدەنگن و ل ملەكێ دی، شەڕێ روسیا و ئوكرانیا 4 سالە بەردەوامە. باش دزانن ئەو شەڕە نە بۆ ئوكرانیا بوو، ئەو شەڕە بۆ لاوازكرنا ئەورۆپایێ بوو. ئەمریكا دخوازیت ئەورۆپا هەر موحتاجێ وێ بیت.ل وێرێ ژی شەڕێ پاكستان و ئەفغانستانێ ل سەر سنوورە. ژبەركو دەڤەر نابیت ئارام بیت. ئەگەر ئارام بوو، چین دێ هێز وەرگریت.
هەكە پریار بكەین، ئەرێ كی ڤان شەران ل دەڤەرێ بەردەوام دكەت و ئاگری خوەش دكەت؟ بێگومان ئەو دەولەتێن مەزن. ئەمریكا، ئیسرائیل، روسیا. ئەڤ شەرە د بەرژەوەندیا كێ دانە؟ د بەرژەوەندیا وان دا یە یێن چەكان دفرۆشن. هەر مووشەكەك ب ملیۆنان دۆلارانە. هەر فڕۆكەكا شەڕی ب سەدان ملیۆنانە. ئەو دخوازن شەڕ هەر هەبیت دا كو چەكێن وان بهێنە فرۆتن. د نوكە دا كی هەیە سەركێشیا عەرەبا بكەت؟ ـ چ كەس نینە. سعوودیە د ترسێ دایە، میسر برسیە، ئیمارات بزنسی دكەت، قەتەر ل گەل هەمیان دكەڤیت و رادبیت. عەرەب بووینە وەك مریشكێن بێ خودان و بێ سەركێش ماینە. و ل ناڤەڕاستا ڤی هەمی شەڕی دا، كورد بوویە قوربانی. ئەڤرۆ رۆژئاڤا هاتیە و كەس نینە وان بپارێزیت. بۆچی؟ ژبەركو دابەشكاری دناڤ مە دایە. باشوورێ كوردستانێ ژی ل بەر چاڤێ دوژمنایە.
ئەگەر ئەم وەك عەرەبا لێ بهێین، ئازادیا مە دێ چیت. ئەڤ ئازادیە ب هەمی سامان و سەروەتێن جیهانێ ناهێتە كرین. ئەڤ ئازادیە ب خوینا ئەنفال و كیمیاباران و پێشمەرگەی هاتیە و هەتا نۆكە دلێن دایكێن جانگوریان سوتیە و ب دەهان شۆرش و داستانان ب دەستڤە هاتیە. .. ئەرێ چارە چیە؟ ـ چارە ئێكە: ئیدی بەسە دووبەرەكی و دژایەتی و ئێكدو شكاندن و ئێكدو نەقەبوولكرن. دڤێت ئەم كورد ببینە ئێك. هەولێر و دهۆك و سلێمانی و رۆژئاڤا و باكوور هەمی ئێك دەنگ بین. هشیاری ل ئێكدو ببین. ئەگەر ئەم نەبینە ئێك، چاڤێ دوژمنان ل سەر مە یە و دێ مە هنجنن و دڤێت فێر بین ژ هەڕفتانا عەرەبان. ئەو ژبەر دوبەرەكیێ هەرفتن و نابیت ئەم وەك وان بكەن داكۆ وەكی وان لێ نەهێن و زۆرا فەرە حكۆمەتاخوە پێك بینن
ئەڤ دەمە پتری ژ هەمی دەمان وەختێ ئێكبوونێ یە و ئێكگرتنا مللەتێ كۆردە .
