ئەڤرۆ زاخۆ دێ گەشتا توركیا كەت و هەولێر بەر ب توونس ڤە چیت
قەیس وەیس:
یانەیێن كوردستانی ل سەر ڕاهێنانێن خوە یێن رۆژانە بەردەوامن خوە بەرهەڤكرن بۆ وەرزێ نوو یێ خولا ستێرێن ئیراقێ یا فوتبۆلێ، ل دووڤ بەرنامەیێن یانەیێن پشكدار د خولا دا بڕیارە ئەڤرۆ شاندێ یانەیا زاخۆ بەر ب وەلاتێ توركیا بچیت و بگەهیتە یانەیا دهۆك ئەوا ل هەمان وەلات كەمپە دانایی، ژلایێ خوەڤە یانەیا هەولێر دێ چیتە توونسێ بۆ هەمان مەرەم ئەوا بڕیارە هەڤڕكیێن وێ ل 13ێ مەها بهێت دەستپێبكەت.
زاخۆ دێ سێ یارییان كەت
چاڤەڕێ دهێتە كرن ئەڤرۆ نتیما فوتبۆلا یانەیا زاخۆ بەر ب باژێرێ سیاسۆن ل وەلاتێ توركیا بكەت خوە بەرهەڤكرن بۆ وەرزێ نوو ئەوا دێ بۆ ماوەیێ 12 رۆژان ڤەكێشیت، تێدا دێ سێ یاریێن هەڤالینی بڤی شێوەیی كەت، سوبەهی یارییەكا هەڤالینی دگەل یانەیا نەجمە یا سعۆدیێ كەت، ل 26ێ ڤی مەهێ دێ بەرانبەر ئەنتالیا سپۆر كەت، ل 31ێ ڤێ مەهێ دێ یارییا خوە یا سێیێ بەرانبەر یانەیا ئامەد سپۆرت كەت كو دێ بیتە دووماهی یارییا هەڤالینی بەری ڤەگەڕیتە باژێرێ خوە،
دهۆك بەردەوامە
ب سەرپەرستییا ڕاهێنەرێ تیمێ یێ ئیرانی یەحیا گۆلمحەمەد یانەیا دهۆك د نوكە دا ل باژێرێ ئسپارتا یێ توركیایە دناڤا كەمپەكا دەرڤە كو تێدا رۆژانە ڕاهینانێن جەستەیی و لەشسڤكیێ دهێنە كرن ئەوا دێ هەتا 31ێ ڤێ مەهێ بەردەوامبیت، تێدا هەبن دیسان هەتا سێ یاریێن هەڤالینی دێ ئەنجامدەن و بڤی ڕەنگی، سوبەهی دێ بەرانبەر ئەنتالیا سپۆر، ل 25ێ ڤێ مەهێ بەرانبەر ئەلوەحدە یا سعۆدیێ یاریێ كەت، ل 30ێ ڤێ مەهێ دێ یارییا خوە یا دووماهیێ ژ كەمپا ڕاهێنانێ بەرانبەر یانەیا ئامەد سپۆر كەت و دووڤدا دێ ڤەگەڕیتە كوردستانێ ژبۆ بەردەوامییت بەرهەڤیێن خوە بۆ سۆپەرا كەنداڤی ل 13ێ مەها بهێت بەرانبەر ڕەیان یا قەتەری و خولا ستێرێن ئیراقێ.
هەولێر دێ چیتە توونس و نەورۆز ل پایتەختی یە
لدووڤ ژێدەرێن رۆژنامەڤانی ل پایتەختێ كوردستانێ بڕیارە یانەیا هەولێر كەمپا خوە یا ڕاهێنانێ بەر ب وەلاتێ توونس ببەت خو بەرهەڤكرن بۆ وەرزێ نوو، ئەوا دێ ب سەرپەرشتییا ڕاهێنەر لوئەی سلاح بیت، هەولێر بەرهەڤییا بۆ دو قارەمانیان دكە یا كەنداڤی و خولا ستێرێن ئیراقێ، ژلایێ خوەڤە یانەیا نەورۆز ئەڤ دێ بیتە رۆژا حەفتێ د كەمپەكا ڕاهێنانێ دا یە ل هەولێرا پایتەخت و بڕیارە سوبەهی یارییەكا هەڤالین ژی ئەنجامبدەت.
