بەرتەنگی مرۆڤان ئاڤا دكەت
شەهادە نزاركی
ژیان هەردەم ل سەر ڕێكەكا ڕاست ناچێت، ئەڤرازی و نشیڤی، تەنگاڤی و بەرتەنگی پشكەكن ژ زڤڕۆكا وێ، لێ یا سەیر ئەوە مرۆڤ ل سەر جادەیێن بەرتەنگیێ ل دووماهیێ بەرزە نابیت و د ئەنجامدا كەسایەتیەكا بێهنفرەهـ و بەرهەنگار دهێتە هەبوونێ. بەرتەنگی و نەخۆشی ژوان ئاشێن ئاگرینە كو ب نەخۆشیان خودانێ خۆ ڕاستەڕێ دكەت و دەمێ مرۆڤ دكەڤیتە د ناڤ فشار و سەختیان دا، هەموو سیستەمێ بیركرن و ڕاگرتنا وی دهێتە ئەزموونكردن، د وێ كێلیا (چركەیا تاڕی دا) هێزا ڤەشارتی یا مرۆڤی ب داراژتنێ دكەڤیت،وەك چەوا ئاسن ل ژێر گەرماتیەكا دژوار و لێدانا چەكوچی دبیتە فولادەكێ سەخت، مرۆڤ ژی د كوره بەرتەنگیێ دا دبیتە خوەڕاگرەكێ بێ وێنە و چەپەر بۆ جەنگێن مەزنتر و كەسێ نەخۆشی نەدیتبن، زوی ب زوی نابیتە خوەڕاگر، چونكی خۆڕاگری نهێنیەكا زكماكی نینە، بەلكو بەرهەمێ تێكشكستن و دووبارە ب هەڤبەكرنا پارچەیێن ڕۆحی یە، بەرتەنگی مرۆڤی فێر دكەت كو بێهنا خۆ درێژ بكەت، خۆ بگونجینیت و بزانیت كو هەر شەڤەكا تاڕی ڕۆژهەلاتنەك ل هیڤیێ یە.
ل دووماهیێ نەخۆشی ناهێن دا مە بڕوخینن یان بشكێنن، بەلكو دهێن دا وان هێزێن ل پاش ڕۆحا مە د ڤەشارتی بەرچاڤ بكەن. هەروەسان من دڤێت ژ نیڤا دلێ خۆ بێژم(مرۆڤێ ڕاستەڕێ و سەركەفتی، بەرهەمێ بەرتەنگیێن خۆ یە) ڕاستییا بەرتەنگی و دەستكورتیێ وەك دەرمانەكی تەحلن، گەلەك جاران مرۆڤێ دروست و خۆڕاگر چێدكەن، بەلێ ب خۆ ڤە نیشانا وێ چەندێ نینن كو هەموو دەمان مرۆڤی باش دروست بكەن، ل سەر ڤێ چەندێ ژی دو ئالی هەنە: ئالیێ ئەرێنی(بەرتەنگی چەوا مرۆڤی دروستدكەت) خۆ ڕاگری و هێز و شیان ل دەمێ تەنگافییان، مرۆڤ فێر دبین چەوا بەرهنگاری ئاستەنگان ببن و ئەو كەسێن د ناڤ دەستكورتیێ دا مەزن ببن، پتر قەدرێ هزر و هەولدانێن خۆ و تشتێن بچووك دزانن، داهێنان و چارەسەری: بەرتەنگی مرۆڤی نەچار دكەت ڕێكێن نوو بۆ چارەسەركرنا ئاریشەیان ببینیت، ئالیێ نەرێنی (كەنگی بەرتەنگی مرۆڤی تێكددەت) هەكە فشارێن ژیانێ زێدە ل سەر ئاستێ شیانێن مرۆڤی بن، دشێن مرۆڤی تووشی دلگرانی، خەمۆكی و بێهێڤیبوونێ بكەن و هەژاری و دەستكورتی جاران رێگەیێ ل مرۆڤی دەگرن كو بشێت بەهرە و زانستێ خۆ پەرە پێ بدەت. بەرتەنگی ب خۆ كەرەستەیەكە هەكە ب ئیرادە و خۆڕاگری بێتە وەرگێڕان، مرۆڤەكی مەزن و دروست دكەت، بەلێ هەكە بێهێڤییاتی بگەهینیت، د پاشەرۆَژێ مرۆڤی دئێشینیت.
